December 2023

ರೇಡಿಯೊ ಮಣಿಪಾಲಡ್ ಆರೋಗ್ಯ ದರ್ಶನ

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್ ಬೊಕ್ಕ ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲದ ಒಟ್ಟುಸೇರಿಗೆಡ್ ಆರೋಗ್ಯ ದರ್ಶನ ಸರಣಿ ಲೇಸ್ ಡಿ.13 ಬುಧಾರ ಬಯ್ಯಗ್ 5 ಗಂಟೆಗ್ ನ್ಯುಮೋನಿಯಾ ಬಗೆಟ್ಟ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಕಸ್ತೂರ್ಬಾ ಮೆಡಿಕಲ್ ಆಂಡ್ ಹಾಸ್ಪಿಟಲ್ ದ ರೆಸಿಪ್ರೇಟರಿ ಮೆಡಿಸಿನ್ ವಿಭಾಗಡ್ ಸಲಹೆಗಾರೆರಾಯಿನ ಡಾ.ದಿವ್ಯಾಬಾಲನ್ ಪಾಲ್ ಪಡೆಯೆರೆ ಉಲ್ಲೆರ್. ಡಿ.14 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಮಂಗಳಾ ಸ್ವಿಮ್ಮಿಂಗ್ ಪೂಲ್ ಡ್ ಮುರ್ಕುದು ತೀರ್ ಪೋಯಿನ ಜವನೆ

ಕುಡ್ಲ ಪೇಂಟೆದ ಮಂಗಳಾ ಸ್ವಿಮ್ಮಿಂಗ್ ಪೂಲ್ ಡ್ ಜವನೆಯೊರಿ ಮುರ್ಕುದು ತೀರ್ ಪೋಯಿನ ಘಟನೆ (ಡಿ.12) ಅಂಗಾರೆ ಬಯ್ಯಗ್ ನಡತ್ಂಡ್.

ತೀರ್ ಪೋಯಿನ ಜವನೆ ಹರ್ಯಾಣ ಮೂಲದ ಅಭಿಷೇಕ್ (30) ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ಟ್ ಬರ್ಕೆ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ‌

ಕುಡ್ಲ- ಬೆಂಗ್ಲೂರು ರೈಲ್ ಕ್ಯಾನ್ಸಲ್!

ಎಲ್ಲೆರ್ದ್ (ಡಿ.14) 18 ಮುಟ್ಟ 5 ದಿನ ರಾಜಬೂಡುಗು ಪೋಪುನ ಕೆಲವು ರೈಲ್ ಕ್ಯಾನ್ಸಲ್ ಆತ್ಂಡ್.

ಹಾಸನ ಜಂಕ್ಷನ್ ರೈಲ್ ನಿಲ್ದಾಣಡ್ ಸಿಗ್ನಲಿಂಗ್ ಬೊಕ್ಕ ಇಂಟರ್ ಲಾಕಿಂಗ್ ವ್ಯವಸ್ಥೆನ್ ನವೀಕರಣ ಮಲ್ಪರೆ ಯಾರ್ಡ್ ನ್ ಕುಡ ಮಲ್ಪುನ ಸಲುವಾದ್ ನೈಋತ್ಯ ರೈಲ್ವೆ ಕಾಮಗಾರಿ ಮಲ್ಪರೆ ಉಂಡು. ಅಂಚಾದ್ 5 ದಿನ ಬೆಂಗ್ಲೂರ್, ಹಾಸನ ಬೊಕ್ಕ ಕರಾವಳಿಗ್ ಸಂಪರ್ಕ ಇಪ್ಪುನ ಬೆಂಗ್ಲೂರ್-ಕಣ್ಣೂರು ಪಂಚಗಂಗಾ ಎಕ್ಸ್‌ಪ್ರೆಸ್‌ ಸೇರಿನ ರೈಲ್ ಕ್ಯಾನ್ಸಲ್ ಆತ್ಂಡ್.

ರಂಗ ತರಂಗದ ನಟೆ, ನಿರ್ದೇಶಕೆರ್ ಕಾಪು ಲೀಲಾಧರ ಶೆಟ್ಟಿ ದಂಪತಿ ಆತ್ಮಹತ್ಯೆ!

ಕಾಪು: ಪುಗರ್ತೆದ ರಂಗತರಂಗ ನಾಟಕ ಕೂಟದ ನಟೆ, ನಿರ್ದೇಶಕೆರ್ ಕಾಪು ಲೀಲಾಧರ ಶೆಟ್ಟಿ ಬೊಕ್ಕ ಅರೆನ ಬೊಡೆದಿ ವಸುಂಧರಾ ಶೆಟ್ಟಿ ಒಟ್ಟಿಗೆ ಆತ್ಮಹತ್ಯೆ ಮಲ್ತೊನ್ನ ಘಟನೆ ಅಂಗಾರೆ ರಾತ್ರೆ ನಡತ್ ದ್ಂಡ್.

ಸರಳ ವ್ಯಕ್ತಿ ಆಯಿನ ಲೀಲಾಧರ ಶೆಟ್ಟಿ ಒರ ಕಾಪು ಕ್ಷೇತ್ರರ್ದ್ ವಿಧಾನಸಭೆ ವೋಟುಗು ಉಂತುದು ಇತ್ತೆರ್. ಮೆರೆಗ್ ಮಲ್ಲ ನಾಟಕ ಕೂಟ ಇತ್ತ್ಂಡ್. ಅತ್ತಂದೆ ಕಾಪು ರಂಗತರಂಗ ಕೂಟದ ಯಜಮಾನೆ ಆದ್ ಭಾರೀ ಪುಗರ್ತೆ ಪಡೆತೆರ್. ಬಡಪತ್ತ್ ದಕ್ಲೆಗ್ ಸಕಾಯ ಮಲ್ಪುನ ಮೆರೆಗ್ ಏಪಲ ಸಮಾಜದ ಪರವಾದ್ ಕಾಳಜಿ ಇತ್ತ್ಂಡ್.

ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ ಮೆರೆನ ಆಪ್ತೆರಾಯಿನ ಮೇರ್ ಕಾಪು ಬಂಟರ ಸಂಘದ ಮಾಜಿ ಗುರ್ಕಾರೆ, ಭಜನಾ ಮಂಡಳಿದ ಸಂಚಾಲಕೆರ್, ನಟೆ ಬೊಕ್ಕ ನಿರ್ದೇಶಕೆರಾದಿತ್ತೆರ್. ಆತ್ಮಹತ್ಯೆಗ್ ಕಾರಣ ದಾದ ಪಂದ್ ನನ ಗೊತ್ತಾವೊಡಾತೆ.

ಡಿ.24: ಪೊವಾಯಿ ಶ್ರೀ ಅಯ್ಯಪ್ಪ ಭಕ್ತ ವೃಂದದ 21ನೇ ವರ್ಷದ ಮಹಾಪೂಜೆ

ಬೊಂಬೈ: ಪೊವಾಯಿ ಶ್ರೀ ಅಯ್ಯಪ್ಪ ಭಕ್ತ ವೃಂದದ 21ನೇ ವರ್ಷದ ಮಹಾಪೂಜೆ ಡಿ.24 ಐತಾರ ಪೊವಾಯಿ ಓಂ ಶಾಂತಿ ಕಾಂಪ್ಲೆಕ್ಸ್ ಡ್ ನಡಪರೆ ಉಂಡು.

ಅವ್ವೇ ದಿನ ಬಯ್ಯಗ್ ಶ್ರೀ ಗೀತಾಂಬಿಕ ಯಕ್ಷಗಾನ ಮಂಡಳಿ ಘಾಟ್ಕೋಪರ್ ಮೊಕ್ಲೆರ್ದ್ ಶ್ರೀ ಕೊಲ್ಲೂರು ಕ್ಷೇತ್ರ ಮಹಾತ್ಮೆ ಆಟ ನಡಪರೆ ಉಂಡು ಪಂದ್ ರಾಮು ಗುರುಸ್ವಾಮಿ ಲೆಪ್ಪೋಲೆಡ್ ತೆರಿಪಾದೆರ್.

ರೇಡಿಯೊ ಮಣಿಪಾಲಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಒಟ್ಟುಸೇರಿಗೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 36ನೇ ಸಂಚಿಕೆ ಡಿ.12 ಕ್ಕ್ ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರೆ ಉಲ್ಲೆರ್. ಡಿ.13 ಕ್ಕ್ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಐಕಳ ಕಂಬುಲ ಮಾತೆರ್ನ ಸಹಕಾರರ್ದ್ ಐಕಳೋತ್ಸವ ಆತ್ಂಡ್: ದೇವಿಪ್ರಸಾದ್ ಶೆಟ್ಟಿ ಬೆಳಪು

ಐಕಳ ಕಂಬುಲ ಇಂಚಿಪ್ಪದ ದಿನಟ್ಟ್ ಪೊಸ ರೂಪ ಪಡೆತ್ಂಡ್. ಐಕಳ ಕುಟುಂಬಸ್ಥೆರೆನ ಬೊಕ್ಕ ಗ್ರಾಮಸ್ಥೆರೆನ ಸಹಕಾರರ್ದ್ ಐಕಳೋತ್ಸವವಾದ್ ಬದಲಾತ್ಂಡ್. ಐಕಳೋತ್ಸವ ಕಾಲಿ ಕಂಬುಲಗ್ ಸೀಮಿತ ಅವಂದೆ, ಜವನೆರೆಗ್, ಜೋಕುಲೆಗಾದ್ ಬೇತೆ ಬೇತೆ ರೀತಿದ ಕ್ರೀಡೋತ್ಸವ, ಅತ್ತಂದೆ ಈ ಸರ್ತಿ ಜಾನುವಾರು ಮೇಳ, ಸಾರ್ವಜನಿಕೆರೆಗಾದ್ ಆರೋಗ್ಯ ಶಿಬಿರನ್ ಆಯೋಜನೆ ಮಲ್ದ್ಂಡ್ ಪಂದ್ ಐಕಳ ಕಾಂತಾಬಾರೆ ಬೂದಬಾರೆ ಕಂಬುಲ ಸಮಿತಿದ ಗುರ್ಕಾರೆ, ಜಿಲ್ಲಾ ಸಮಿತಿದ ಗುರ್ಕಾರೆ ಐಕಳ ಬಾವ ದೇವಿಪ್ರಸಾದ್ ಶೆಟ್ಟಿ ಬೆಳಪು ಪಂಡೆರ್.

ಮೇರ್ ಐಕಳ ಬಾವಡ್ ನಡತಿನ ಐಕಳೋತ್ಸವದ ಅಟ್ಟಣೆ ಸಭೆಟ್ಟ್ ಪಾತೆರಿಯೆರ್.

ಕೋಶಾಧಿಕಾರಿ ಪ್ರಕಾಶ್ ಶೆಟ್ಟಿ ಪಡುಹಿತ್ಲು ಲೆಕ್ಕಪತ್ರ ಓದಿಯೆರ್. ಕಂಬುಲ ಸಮಿತಿದ ಹಿರಿಯೆರ್ ಯೋಗೀಶ್ ರಾಯೆರ್ ಶಾಶ್ವತ ನಿಧಿಗ್ 25000 ರೂ. ದೇಣಿಗೆ ಕೊರಿಯೆರ್. ಪ್ರಧಾನ ಕಾರ್ಯದರ್ಶಿಯಾದ್ ಸ್ವರಾಜ್ ಮುಂಡ್ಕೂರು ದೊಡ್ದಮನೆ ಆಯ್ಕೆ ಆತೆರ್. ಬೊಕ್ಕ ಜಿಲ್ಲಾ ಕಂಬುಲ ಸಮಿತಿದ ಗುರ್ಕಾರೆಯಾದ್ ಆಯ್ಕೆ ಆಯಿನ ಸಮಿತಿದ ಗುರ್ಕಾರೆರೆನ್ ಸನ್ಮಾನ ಮಲ್ತೆರ್.

ಈ ಪೊರ್ತುಡು ಕಂಬುಲ ಸಮಿತಿದ ಮಾನಾದಿಗೆದ ಸಲಹೆಗಾರೆ ಕೆ.ಲವ ಶೆಟ್ಟಿ, ಒತ್ತು ಗುರ್ಕಾರೆ ಪ್ರಮೋದ್ ಶೆಟ್ಟಿ, ಸಂಘಟನಾ ಕಾರ್ಯದರ್ಶಿ ಸಂಜೀವ ಶೆಟ್ಟಿ ಸ್ಥಳಂತಗುತ್ತು, ಐಕಳ ಗ್ರಾ ಪಂ ಸದಸ್ಯೆರ್ ದಯೇಶ್ ಐಕಳ, ದೇವಿಪ್ರಸಾದ್ ಶೆಟ್ಟಿ ಕಲ್ಪವೃಕ್ಷ ಪಾಲ್ ಪಡೆದಿತ್ತೆರ್. ಸಮಿತಿದ ಒತ್ತು ಗುರ್ಕಾರೆ ಚಿತ್ತರಂಜನ್ ಭಂಡಾರಿ ಐಕಳ ಎದ್ಕೊನಿಯೆರ್. ಸಂಚಾಲಕೆರ್ ಮುರಳೀಧರ ಶೆಟ್ಟಿ ಸೊಲ್ಮೆ ಸಂದಾಯೆರ್.

ಕುಡ್ಲಡ್ ಬೊಳ್ಳುಳ್ಳಿಗ್ ಕೆಜಿಗ್ 300 ರೂ.

ಕರಿನ 2 ವಾರರ್ದಿಂಚ ಬೊಳ್ಳುಳ್ಳಿ ಕಿರಯ ಎಚ್ಚಾವೊಂದೆ ಉಂಡು.

ಕುಡ್ಲಡ್ ಇತ್ತೆ ಬೊಳ್ಳುಳ್ಳಿ ಕಿರಯ ಕೆಜಿಗ್ 300 ರೂ. ಆತ್ಂಡ್. ಬೆಂಗ್ಲೂರ್ ಡ್ ಎಡ್ಡೆ ದರ್ಜೆದ ಬೊಳ್ಳುಳ್ಳಿ ಕೆಜಿಗ್ 400 ರೂ. ಬೊಕ್ಕ ಸಾಧಾರಣ ಗುಣಮಟ್ಟದ ಬೊಳ್ಳುಳ್ಳಿಗ್ ಕೆಜಿಗ್ 240-320 ರೂ. ಉಂಡು.