December 6, 2023

ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಪುತ್ತೂರ್ದ ಸುದ್ದಿ | Puttur News

ಡಿ.9: ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಡ್ ದೇವೆರ್ನ ದರ್ಶನ ಇಜ್ಜಿ

Dec 6, 2023

ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಡ್ 2023-24 ನೇ ಸಾಲ್ ದ ವಾರ್ಷಿಕ ಜಾತ್ರಾ ಮಹೋತ್ಸವದ ಪ್ರಯುಕ್ತ ಡಿ.9 ತಾನಿ ಶನಿವಾರ “ಮೂಲಮೃತಿಕಾ”ಪ್ರಸಾದ ದೆಪ್ಪುನ ಕಾರ್ಯಕ್ರಮ ಇಪ್ಪುನೆದಾತ್ರ, ಭಕ್ತಾದಿಲೆಗ್ ಕಾಂಡೆರ್ದ್ ಮದ್ಯಾಹ್ನ 2.00 ಗಂಟೆ ಮುಟ್ಟ ಶ್ರೀ ದೇವೆರ್ನ ದರ್ಶನ ಬೊಕ್ಕ ಸೇವೆಗ್ ಅವಕಾಶ ಇಪ್ಪುಜಿ. ಅಂಚಾದ್ ಮಾತ ಭಕ್ತಾದಿಲು ಸಹಕಾರ ಕೊರೊಡು ಪಂದ್ ಪ್ರಕಟನೆಡ್ ತೆರಿಪಾದೆರ್.

ಸುಬ್ರಹ್ಮಣ್ಯಡ್ ನೇಜಿ ನಾಟಿದ ಪ್ರಾತ್ಯಕ್ಷಿಕೆ

Dec 6, 2023

ಕುಕ್ಕೆ ಶ್ರೀ ಸುಬ್ರಹ್ಮಣೇಶ್ವರ ಮಹಾವಿದ್ಯಾಲಯದ ವಾಣಿಜ್ಯ ಬೊಕ್ಕ ಉದ್ಯಮಾಡಳಿತ ವಿಭಾಗ, ಐಕ್ಯೂಎಸಿ ಘಟಕ ಆಶ್ರಯಡ್ ನೇಜಿ ಬೇಸಾಯ ರಕ್ಷಣೆ ಮಲ್ಪುನೆಟ್ಟ್ ಯುವಜನತೆದ ಪಾತ್ರ ಕಾರ್ಯಕ್ರಮದ ಅಂಗವಾದ್ ನೇಜಿ ನಾಟಿ ಕಾರ್ಯಕ್ರಮ ಬೊಕ್ಕ ಪ್ರಾತ್ಯಕ್ಷಿಕೆ ಕಂದ್ರಪ್ಪಾಡಿ ಪ್ರೀತಮ್ ಮುಂಡೋಡಿ ಅರೆನ ಕಂಡಡ್ ನಡತ್ಂಡ್.

ವಿದ್ಯಾರ್ಥಿಲು ಕಾಲಿ ಶೈಕ್ಷಣಿಕ ಪಠ್ಯದ ವಿಚಾರದ ಬಗ್ಗೆ ಚರ್ಚೆ ಮಲ್ಪುನ ಒಟ್ಟಿಗೆ ಪಠ್ಯೇತರ ವಿಚಾರನ್ ಕಲ್ಪೊಡು ಪನ್ಪುನ ಉದ್ದೇಶಡ್ ಈ ಕಾರ್ಯಕ್ರಮ ಆಯೋಜನೆ ಮಲ್ತ್, ಇಂಚಿಪಗ್ ಕಂಡಲು ತೂವೆರೆನೆ ತಿಕ್ಕುಜಿ, ಕೃಷಿತ ಬಗ್ಗೆ ಮಾಹಿತಿ ಇತ್ತೆದ ಜೋಕುಲೆಗ್ಲ ಇಜ್ಜಿ. ಕೃಷಿತ ಬಗ್ಗೆ ತೆರಿಪಾಯೆರೆ ಅಂಚನೆ ಆಸಕ್ತಿ ಬರಿಯೆರೆ ನೇಜಿ ನಾಟಿ ಕಾರ್ಯಕ್ರಮ ಹಮ್ಮಿ ಮಲ್ತ ಪಂದ್ ಕಾರ್ಯಕ್ರಮದ ಸಂಘಟಕೆರ್ ತೆರಿಪಾಯೆರ್.

ಕಾಲೇಜ್ ದ ಸುರುತ ಬಿ. ಕಾಂ ಎ ಬೊಕ್ಕ ಬಿ.ಕಾಂ ಬಿ ವಿಭಾಗದ ಮಾತ ವಿದ್ಯಾರ್ಥಿಲು ನೇಜಿ ನಾಟಿ ಕಾರ್ಯಡ್ ಪಾಲ್ ಪಡೆದಿತ್ತೆರ್. ಪ್ರಾಂಶುಪಾಲೆರ್ ಡಾ। ದಿನೇಶ ಪಿ.ಟಿ ಬೊಕ್ಕ ಐಕ್ಯೂಎಸಿ ಘಟಕ ಸಂಯೋಜಕಿ ಲತಾ ಬಿ.ಟಿ ಅರೆನ ಮಾರ್ಗದರ್ಶನಡ್ ನಡತ್ತಿನ ಕಾರ್ಯಕ್ರಮಡ್ ಉಪನ್ಯಾಸಕೆರ್ ರಾಮನಾಥ್ ಎ, ರಮ್ಯ ಎಂ ಇತ್ತೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ರೇಡಿಯೊ ಮಣಿಪಾಲಡ್ ಮಧುರಗಾನ ಲೇಸ್

Dec 6, 2023

ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರ ಅರ್ಪಣೆ ಮಲ್ಪುನ ಮಧುರಗಾನ ಕಾರ್ಯಕ್ರಮದ ಸಂಚಿಕೆ ಡಿ.6 ತಾನಿ 6.30ಕ್ಕ್ ಪ್ರಸಾರ ಆವೆರೆ ಉಂಡು.

ಲತಾಚೇತನ್ ಅಶ್ವತ್ಥಕಟ್ಟೆ ಪಾಲ್ ಪಡೆದ್ ಪದ್ಯ ಪನಿಯೆರೆ ಉಲ್ಲೆರ್. ಡಿ.7 ತಾನಿ ಮಧ್ಯಾಹ್ನ 2.30ಕ್ಕ್ ನೆತ್ತ ಮರುಪ್ರಸಾರ ಆವೆರೆ ಉಂಡು.

ಉಡುಪಿದ ಸುದ್ದಿ | Udupi News ಊರ್ದ ಸುದ್ದಿ Regional News ಕಾರ್ಲದ ಸುದ್ದಿ Karkala News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಡಿ.17: ಬನ್ನಂಜೆ ಬಾಬು ಅಮೀನ್‌ ಅಭಿನಂದನೆದ “ಸಿರಿತುಪ್ಪೆ” ಲೇಸ್‌

Dec 6, 2023

ಒಡಿಪು: ಬನ್ನಂಜೆ ಬಾಬು ಅಮೀನ್‌-80 ಅಭಿನಂದನಾ ಸಮಿತಿ ಕಿನ್ನಿಮೂಲ್ಕಿ-ಗರೋಡಿ ನೆತ್ತ ಮುತಾಲಿಕೆಡ್‌ ತುಳುನಾಡ್‌ದ ಸಾಹಿತ್ಯಿಕ, ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್‌ ಮೆರೆನ ಸಾರ್ಥಕ 80ನೇ ಸಂವತ್ಸರದ ಅಭಿನಂದನೆದ ನಿಲೆಟ್ಟ್ “ಸಿರಿತುಪ್ಪೆ” ಕಾರ್ಯಕ್ರಮ ಡಿ.17 ತಾನಿ ಒಡಿಪು ಬನ್ನಂಜೆ ನಾರಾಯಣಗುರು ಆಡಿಟೋರಿಯಂಡ್‌ ನಡಪೆರೆ ಉಂಡು.

ಲೇಸ್‌ದ ಉದಿಪನನ್‌ ಜಿ.ಶಂಕರ್‌ ಪ್ಯಾಮಿಲಿ ಟ್ರಸ್ಟ್‌ದ ಪ್ರವರ್ತಕೆರ್‌ ನಾಡೋಜ ಡಾ.ಜಿ. ಶಂಕರ್‌ ಮಲ್ಪೆರೆ ಉಲ್ಲೆರ್.‌ ಅವ್ವೇ ಪೊರ್ತುಡು ಬನ್ನಂಜೆ ಬಾಬು ಅಮೀನ್‌ ಮೇರೆನ ತುಳುನಾಡ ಸುತ್ತಮುತ್ತ ಬೊಕ್ಕ ಗರೋಡಿದ ಒಂಜಿ ಚಿಂತನೆ ಪುಸ್ತಕ ಬುಡುಗಡೆ ಆವೆರೆ ಉಂಡು. ಈ ಪುಸ್ತಕನ್‌ ಪೆರಿಯ ಸಾಹಿತಿ ಬಿ.ಎಂ ರೋಹಿಣಿ ಮಲ್ಪೆರೆ ಉಲ್ಲೆರ್.‌ ಮುಂಬೈ ಅಕ್ಷಯ ಮಾಸ ಪತ್ರಿಕೆದ ಸಂಪಾದಕೆರ್‌ ಹರೀಶ್‌ ಹೆಜಮಾಡಿ ಪಾಲ್‌ ಪಡೆಯೆರೆ ಉಲ್ಲೆರ್.‌ ಅಂಚನೆ ವಿಚಾರ ಗೋಷ್ಠಿ ಬೊಕ್ಕ ಆರಾಧನಾ ಗೋಷ್ಠಿಲ ನಡಪೆರೆ ಉಂಡು.

ಮದ್ಯಾಹ್ನ 3 ಗಂಟೆಗ್‌ ಅಭಿಮಾನದ ಅಭಿನಂದನೆ ಅರ್ಪಣೆ ನಡಪೆರೆ ಉಂಡು. ಈ ಲೇಸ್‌ದ ಗುರ್ಕಾರ್ಮೆನ್‌ ವಿಶ್ರಾಂತ ಕುಲಪತಿ ಪ್ರೊ.ಕೆ. ಚಿನ್ನಪ್ಪ ಗೌಡ ವಹಿಸೆರೆ ಉಲ್ಲೆರ್.‌ ಅಭಿನಂದನಾ ನುಡಿತೋರಣ ಹಿರಿಯ ಪತ್ರಕರ್ತೆರ್‌ ಬೊಕ್ಕ ಚಿಂತಕೆರ್‌ ದಿನೇಶ್‌ ಅಮೀನ್‌ ಮುಟ್ಟು ಮಲ್ಪೆರೆ ಉಲ್ಲೆರ್.‌ ಅಭಿನಂದನಾ ಗ್ರಂಥ ಸಿರಿ ಕುರಲ್‌ ಅನಾವರಣನ್‌ ಕುದ್ರೋಳಿ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್‌ ಆರ್‌ ಮಲ್ಪೆರೆ ಉಲ್ಲೆರ್.‌ ಅಭಿನಂದನಾ ಸಮಿತಿ ಗುರ್ಕಾರ್ಲು ಜಯಕರ ಶೆಟ್ಟಿ ಇಂದ್ರಾಳಿ ಬೊಕ್ಕ ಕಾರ್ಯಾಧ್ಯಕ್ಷೆರ್‌ ರಘುನಾಥ ಮಾಬಿಯಾನ್‌ ಅಭಿನಂದನೆ ಮಲ್ಪೆರೆ ಉಲ್ಲೆರ್.‌ ಮಲ್ಲ ಬಿನ್ನೆರಾದ್‌ ಬೊಂಬೈದ ಉದ್ಯಮಿ, ಕಲಾಪೋಷಕೆರ್‌ ಮೇನಾಳಗುತ್ತು ಕಿಶನ್‌ ಜೆ. ಶೆಟ್ಟಿ, ಬನ್ನಂಜೆ ಬಿಲ್ಲವ ಸಂಘದ ಗುರ್ಕಾರ್ಲು ಮಾಧವ ಬನ್ನಂಜೆ, ಜಾನಪದ ವಿದ್ವಾಂಸೆರ್‌ ಡಾ.ವೈ.ಎನ್‌ ಶೆಟ್ಟಿ ಪಾಲ್‌ ಪಡೆಯೆರೆ ಉಲ್ಲೆರ್.

ಕಾಂಡೆ ಗುರು ಪೂಜೆ ಆದ್ , ನಾಗಸ್ವರ ವಾದನ, ಡೋಲು ವಾದನ, ಪಾಡ್ದನ ಕಾರ್ಯಕ್ರಮ ನಡಪೆರೆ ಉಂಡು. 11.45 ಕ್ಕ್‌ ಪಟ್ಲ ಸತೀಶ್‌ ಶೆಟ್ಟಿ ಬೊಕ್ಕ ಬಳಗದಕ್ಲೆರ್ದ್‌ ಸುದರ್ಶನ ವಿಜಯ ಯಕ್ಷಗಾನ ನಡಪೆರೆ ಉಂಡು. ಮದ್ಯಾಹ್ನ 2.30 ಕ್ಕ್‌ ಬೈದಶ್ರೀ ಆದಿ ಒಡಿಪು ಪ್ರಸ್ತುತ ಮಲ್ಪುನ ವೀನಸ್‌ ಇಂಟರ್‌ ನ್ಯಾಷನಲ್‌ ಸಾರಥ್ಯಡ್‌ ಬನ್ನಂಜೆ ಬಾಬು ಅಮೀನ್‌ ಮೇರೆನ ಸಾಕ್ಷ್ಯಚಿತ್ರ ಪ್ರದರ್ಶನ ಆವೆರೆ ಉಂಡು.

ಡಿ.17: ತಿಬಾರ ಕೊಡಮಂದಾಯನ ನಡೆಟ್ಟ್ ತಿಬರಾಯನ

Dec 6, 2023

ಕುಡ್ಲ: ಶ್ರೀ ಕೊಡಮಣಿತ್ತಾಯ ಕ್ಷೇತ್ರ ಶಿಬರೂರು ದೇಲಂತಬೆಟ್ಟು ಮೂಲು ಡಿ.16ರ್ದ್‌ 23 ಮುಟ್ಟ ವಾರ್ಷಿಕ ಮಹೋತ್ಸವ ತಿಬರಾಯನ ನಡಪೆರೆ ಉಂಡು. ಶನಿವಾರ ಕಾಂಡೆ ನವಕ ಕಲಶಾಭಿಷೇಕ, ಮಹಾಪೂಜೆ ಆದ್ ರಾತ್ರೆ ಕೊಡಿ ಏರುಂಡು. ಡಿ.17 ತಾನಿ ತುಲಾಭಾರ ಸೇವೆ, ಕಾಂಡೆ ಶ್ರೀ ಉಳ್ಳಾಯ ದೈವದ ನೇಮೋತ್ಸವ, ಮಡಸ್ತಾನ ಸೇವೆ, ಕಂಚಿಲ್ ಸೇವೆ, ಅನ್ನಸಂತರ್ಪಣೆ, ರಾತ್ರೆ ಕೊಡಮಣಿತ್ತಾಯ ದೈವದ ನೇಮೋತ್ಸವ ನಡಪೆರೆ ಉಂಡು.

ಡಿ.18 ಕಾಂತೇರಿ ಜುಮಾದಿ ನೇಮೋತ್ಸವ, ಡಿ.19 ಸರಳ ಧೂಮಾವತಿ ನೇಮೋಚ್ಚಯ, 20 ಗು ಜಾರಂದಾಯ ದೈವದ ನೇಮೋಚ್ಚಯ, 21 ಕ್ಕೆ ಕೈಯ್ಯೂರು ಧೂಮಾವತಿ ದೈವದ ನೇಮೋಚ್ಚಯ, 22 ತಾನಿ ಪಿಲಿಚಾಮುಂಡಿ ದೈವದ ನೇಮೋಚ್ಚಯ, 23 ತಾನಿ ಕಾಂಡೆ ತುಲಾಭಾರ ಸೇವೆ, ಕೊಡಿ ಜಾವರೆ. ಮದ್ಯಾಹ್ನ ಅನ್ನಸಂತರ್ಪಣೆ ನಡಪೆರೆ ಉಂಡು. ಡಿ.24 ಐತಾರ ಕಟೀಲು ದುರ್ಗಾಪರಮೇಶ್ವರಿ ಕೃಪಾಪೋಷಿತ ಯಕ್ಷಗಾನ ಮಂಡಳಿರ್ದ್‌ ಯಕ್ಷಗಾನ ಬಯಲಾಟ ನಡಪೆರೆ ಉಂಡು. ಅಂಚನೆ ಕ್ಷೇತ್ರಡ್‌ ಜೀರ್ಣೋದ್ದಾರದ ಬೇಲೆಲ ಆವೊಂದು ಇತ್ತ್‌ದ್‌ ಮಾತೆರ್ಲ ಸಹಕಾರ ಕೊರೊಡು ಪಂದ್‌ ಲೆಪ್ಪೋಲೆಡ್‌ ತೆರಿಪಾದೆರ್.