ಪಂಜ ಕೊಯಿಕುಡೆ ಶ್ರೀ ವಿಠೋಬ ಭಜನಾ ಮಂದಿರದ ವರ್ಷದ ಭಜನಾ ಮಂಗಲೋತ್ಸವದ ನಿಲೆಟ್ಟ್ ಡಿ.23 ರಾತ್ರೆ 7.30 ಗು ಶ್ರೀ ವಿಠೋಬ ಯಕ್ಷ ನೂಪುರ ನಾಟ್ಯ ಕೇಂದ್ರದ ಜೋಕುಲೆನ ಗೆಜ್ಜೆ ಕಟ್ಟುನ ಸೇವೆ, ರಂಗಪ್ರವೇಶ, ಯಕ್ಷ ವೈಭವ ನಡಪರೆ ಉಂಡು.
ನಾಟ್ಯ ಮಯೂರಿ ಬಿರುದು ಪಡೆತಿನ ಯಕ್ಷ ಗುರು ರಕ್ಷಿತ್ ಶೆಟ್ಟಿ ಪಡ್ರೆ ಮೆರೆಡ ತರಬೇತಿ ಪಡೆಯಿನ ಎಲ್ಯ ಕಲಾವಿದೆರ್ “ಕಾಳಿಂಗ ಮರ್ದನ ಹನುಮೋದ್ಭವ” ಪನ್ಪಿನ ಯಕ್ಷಗಾನ ಪ್ರದರ್ಶನ ಮಲ್ಪರೆ ಉಲ್ಲೆರ್.
ಕಾಂತಾವರ: ಕೇಪ್ಲಾಜೆ ಶ್ರೀ ಮಹಮ್ಮಾಯಿ ದೇವಿ ಗುಡಿಟ್ಟ್ ಜ.4 ಗುರುವಾರ ನಿಧಿಕುಂಭ ಸ್ಥಾಪನೆ ಆವೆರೆ ಉಂಡು.
ಅಂಚೆನೆ ನಿಧಿಕುಂಭಗ್ ಬಂಗಾರ್, ಬೊಳ್ಳಿ, ನವರತ್ನನ್ ಸಮರ್ಪಣೆ ಮಲ್ಪುನಕುಲು ಶ್ರೀ ಕ್ಷೇತ್ರಡ್ ಅವ್ವೇ ದಿನ ದೆತೊಂದು ಪಾಡುನ ವ್ಯವಸ್ಥೆನ್ ಮಲ್ದೆರ್. ಅಂಚಾದ್ ಭಕ್ತೆರ್ ಮಾತೆರ್ಲಾ ಸಹಕಾರ ಕೊರೊಡು ಪಂದ್ ಜೀರ್ಣೋದ್ಧಾರ ಸಮಿತಿ, ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬೊಲ್ತೇರ್: ಪೆರ್ಮುಡ ಕುಕ್ಕಜೊಟ್ಟು ಯಕ್ಷಗಾನ ಬಯಲಾಟ ಸಮಿತಿದ ಮುತಾಲಿಕೆಡ್, ಶ್ರೀ ನಿರಂಜನ ಸ್ವಾಮೀಜಿನ ಆಶೀರ್ವಾದಡ್, ಬಜಪೆದ ಸುಂಕದಕಟ್ಟೆ ಶ್ರೀ ಅಂಬಿಕಾ ಅನ್ನಪೂರ್ಣೇಶ್ವರಿ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದಕ್ಲೆರ್ದ್ ಡಿ.24 ಐತಾರ ರಾತ್ರೆ ನಿಟ್ಟಡೆ ಗ್ರಾಮದ ಪೆರ್ಮುಡ ಕುಕ್ಕಜೊಟ್ಟುಡ್ ಪಾಡಿನ ರಂಗಮಂಟಪಡ್ ಶ್ರೀ ದೇವಿ ಮಹಾತ್ಮೆ ಆಟ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಪೆರ್ಮುಡ ಕುಕ್ಕಜೊಟ್ಟು ಯಕ್ಷಗಾನ ಬಯಲಾಟ ಸಮಿತಿದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
KSRTC ತನ್ನ ಪಾರ್ಸೆಲ್ ಸೇವೆನ್ ಡಿ.23 ರ್ದ್ ಸುರು ಮಲ್ಪುಂಡು.
ಇತ್ತೆನೇ 20 ಟ್ರಕ್ ನ್ KSRTC ದೆತೊಂದುಂಡು. ಉಂದುವೇ ಸುರುತ್ತ ಸರ್ತಿ ಟ್ರಕ್ ನ್ ಗಲಸೊನ್ನ ನಿಗಮ ಸಾರ್ವಜನಿಕೆರೆಗ್ ನಮ್ಮ ಕಾರ್ಗೊ ಸೇವೆ ಕೊರ್ಪುಂಡು.
ಟ್ರಕ್ ಲೆನ ಪರಿಶೀಲನೆನ್ ಸಾರಿಗೆ ಸಚಿವೆರ್ ರಾಮಲಿಂಗಾರೆಡ್ಡಿ ಮಲ್ದೆರ್. ಇಡೇ ಮುಟ್ಟ ಬಸ್ ಟ್ಟ್ ತಿಕೊಂದು ಇತ್ತಿನ ಪಾರ್ಸೆಲ್ ಸೇವೆ ನನ ಟ್ರಕ್ ತಿಕ್ಕುಂಡು. ಪಾರ್ಸೆಲ್ ಲು ಟ್ರಕ್ ಡೇ ಸರಿಯಾಯಿನ ಜಾಗೆಗ್ ಎತ್ತುಂಡು.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ತುಳು ಸರಣಿ ಲೇಸ್ ಡಿ. 21 ಕ್ಕ್ ಗುರುವಾರ ಬಯ್ಯಗ್ 5.05 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾತೆರಿಯೆರೆ ಉಲ್ಲೆರ್. ಡಿ.22 ಕ್ಕ್ ಮಧ್ಯಾಹ್ನ 1.05 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಒರಿ ಸಮರ್ಥ ಸಂಘಟಕೆಯಾದ್, ಸಮಾಜ ಸೇವಕೆಯಾದ್, ಕಲೆ ಸಂಸ್ಕೃತಿ ಪೋಷಕೆಯಾದ್ ಪುಗರ್ತೆ ಪಡೆಯಿನ ಗುತ್ತಿನಾರ್ ರವೀಂದ್ರ ಶೆಟ್ಟಿ ಬಳ್ಕುಂಜೆ ಗುತ್ತು ಮೇರ್ ಮೀರಾ ಭಾಯಂದರ್ ಬಂಟರ ಸಂಘದ ಪ್ರಾದೇಶಿಕ ಸಮಿತಿಗ್ ಈ ಸಾಲ್ ದ ಮೂಜಿ ವರ್ಷದ ಅವಧಿಗ್ ಆಯ್ಕೆ ಆತೆರ್.
ಮೇರ್ ಕರ್ನಾಟಕ ರಾಜ್ಯದ ಒಡಿಪು ಜಿಲ್ಲೆದ ಕಾರ್ಲ ತಾಲೂಕ್ ದ ಬಳ್ಕುಂಜೆ ಚೆನ್ನಯ ಬೆನ್ನಿ ಕುತ್ಯಾರು ಅಂಜಾರು ಮನೆ ದೇಜು ಶೆಟ್ಟಿ ಬೊಕ್ಕ ಬಳ್ಕುಂಜೆ ಗುತ್ತು ಪುಷ್ಪಾ ಶೆಟ್ಟಿ ದಂಪತಿಲೆನ ನಾಲ್ ಜನ ಜೋಕುಲೆಡ್ ಎಲ್ಯಾರಾದ್ 1972 ಇಸವಿಡ್ ಬೊಂಬೈಡ್ ಪುಟ್ಟಿಯೆರ್.
ಮೇರ್ ತನ್ನ ಪ್ರಾಥಮಿಕ ಶಿಕ್ಷಣನ್ ಕೊಟ್ರಪಾಡಿ ಹಯರ್ ಎಲಿಮೆಂಟರಿ ಶಾಲೆಡ್ ಬೊಕ್ಕ ನಿಡ್ಡೋಡಿ ಸತ್ಯನಾರಾಯಣ ಶಾಲೆಡ್ ಮುಗಿತೆರ್. ಬೊಕ್ಕದ ಶಿಕ್ಷಣನ್ ಸಂಕಲಕರಿಯ ಬೊಕ್ಕ ವಿದ್ಯಾವರ್ಧಕ ಶಿಕ್ಷಣ ಸಂಸ್ಥೆದ ಮುಕೇನ ಮುಗಿತೆರ್. ಬೊಕ್ಕ ಗವರ್ನಮೆಂಟ್ ಹೈಸ್ಕೂಲ್ ಕೆಮ್ಮಣ್ಣುಡ್ ಪಿಯುಸಿ ಶಿಕ್ಷಣ ಮುಗಿತಿನ ಮೇರ್ ಬೊಕ್ಕ ಅನಿವಾರ್ಯ ಕಾರಣರ್ದ್ ಶಿಕ್ಷಣನ್ ಅರ್ಧಗೆ ಉಂತಾಯೆರ್.
ಬೊಕ್ಕ ಬೂಕು ಓದುದು ಲೋಕಾನುಭವ ಪಡೆದ್ ಬುದ್ಧಿವಂತೆ ಜವನೆ ಪಂದ್ ಗುರುತಿಸಾಯೆರ್. ಅವೆರ್ದ್ ಬೊಕ್ಕ ಪತ್ತ್ ವರ್ಷ ಊರುಡೇ ಬೇಸಾಯ ಕೃಷಿ ಮಲ್ತ್ ದ್ ಒರಿ ಎಡ್ಡೆ ಕೃಷಿಕೆ ಪಂದ್ ಊರುಡು ಪುಗರ್ತೆ ಪಡೆತೆರ್.
ಬೊಂಬೈಗ್ ಬತ್ತಿನ ಮೇರ್ ತನ್ನ ಮಾಮುನ ಅಖಿಲಾ ಹೊಟೇಲ್ ಬೊಕ್ಕ ಶಿವರಾಂ ಶೆಟ್ಟಿ ಮೆರೆನ ಹೊಟೇಲ್ ವ್ಯವಸಾಯಡ್ ತನ್ನ ಅನುಭವ ಸಂಪತ್ತ್ ನ್ ಎಚ್ಚ ಮಲ್ತಿನವು ಅರೆನ ಹೊಟೇಲ್ ಉದ್ಯಮಗ್ ಸಹಕಾರಿ ಆಂಡ್. ಬೊಂಬೈದ ಪೇಂಟೆಡ್ ಆರೆಗ್ ಸಹಕಾರ ಮಲ್ತಿನ ಉದ್ಯಮಿ ಮಹೇಶ್ ಶೆಟ್ಟಿ ತೆಳ್ಳಾರ್, ಗಿರೀಶ್ ಶೆಟ್ಟಿ ತೆಳ್ಳಾರ್, ರಾಜೇಶ್ ಶೆಟ್ಟಿ ತೆಳ್ಳಾರ್, ಸುಕೇಶ್ ಶೆಟ್ಟಿ ತೆಳ್ಳಾರ್ ಬೊಕ್ಕ ಕಿಶೋರ್ ಕುಮಾರ್ ಕುತ್ಯಾರು, ಬಂಟರ ಸಂಘ ಬೊಂಬೈದ ಮೀರಾ ಭಾಯಂದರ್ ಪ್ರಾದೇಶಿಕ ಸಮಿತಿದಕ್ಲೆನ್ ಮೇರ್ ಕೃತಜ್ಞತೆರ್ದ್ ನೆಂಪು ಮಲ್ಪುವೆರ್.
ಅಂಚೆನೆ ಮೆರೆಗ್ ಜೀವರಕ್ಷಕ ಪ್ರಶಸ್ತಿ, ಯಕ್ಷರಕ್ಷಾ ಪ್ರಶಸ್ತಿ, ಕೊರೊನಾ ವಾರಿಯರ್ ಪ್ರಶಸ್ತಿ, ಸಮಾಜ ರತ್ನ ಪ್ರಶಸ್ತಿ, ಧರ್ಮರಕ್ಷಕ ಪ್ರಶಸ್ತಿ, ತೌಳವ ಸಿರಿ ಪ್ರಶಸ್ತಿ, ಬಳ್ಕುಂಜೆ ಗುತ್ತು ರಾಜನ್ ದೈವ ಧೂಮಾವತಿ ದೈವೊಲ್ಯದ ಗುತ್ತಿನಾರ್ ಪಟ್ಟ ಬೊಕ್ಕ ಸುಮಾರ್ ಸಂಘ ಸಂಸ್ಥೆಲೆರ್ದ್ ಸಮಾಜ ಸೇವಾ ದುರಂಧರ ಪ್ರಶಸ್ತಿ ತಿಕ್ ದ್ಂಡ್.
ಭಾರತೀಯ ಜನತಾ ಪಕ್ಷದ ದಕ್ಷಿಣ ಭಾರತೀಯ ಘಟಕ ಮೀರಾ ಭಾಯಂದರ್ ದ ಗುರ್ಕಾರೆಯಾದ್ ಆಯ್ಕೆ ಆಯಿನ ಮೆರೆಗ್ ಬೇತೆ ಬೇತೆ ಕಡೆಟ್ಟ್ ಹೊಟೇಲ್ ಸಂಚಾಲಕೆಯಾದ್ ಬೆಂದಿನ ಅನುಭವ ಉಂಡು. ಮೇರ್ ಆಜಿ ವರ್ಷದ ಅವಧಿಡ್ ಮೀರಾ ಭಾಯಂದರ್ ಪ್ರಾದೇಶಿಕ ಸಮಿತಿದ ಕಾರ್ಯದರ್ಶಿಯಾದ್ ಸಮಿತಿದ ಬೊಕ್ಕ ಸಮಾಜದ ಪ್ರೀತಿ ವಿಶ್ವಾಸಗ್ ಪಾತ್ರರಾತೆರ್.
ಬೊಡೆದಿ ಸುಶೀಲ ಬೊಕ್ಕ ರಡ್ಡ್ ಪ್ರತಿಭಾವಂತ ಆಂಜೋಕುಲು ಇಪ್ಪುನ ಸಂಸಾರ ರವೀಂದ್ರ ಶೆಟ್ರೆನವು. ಯಕ್ಷಗಾನ ಕಲೆಟ್ಟ್ ಆಸಕ್ತಿ ಇಪ್ಪುನ ಶೆಟ್ರ್ ಪ್ರತಿ ವರ್ಷ ಬಂಟರ ಸಂಘದ ವಾರ್ಷಿಕೋತ್ಸವದ ಅಂಗವಾದ್ ನಡಪುನ ಯಕ್ಷಗಾನ ಲೇಸ್ ಡ್ ಪಾತ್ರ ಮಲ್ಪುವೆರ್. ಮೇರ್ ಯಕ್ಷ ಕಲಾಗುರು ಅಜೆಕಾರು ಬಾಲಕೃಷ್ಣ ಶೆಟ್ರೆರ್ದ್ ಯಕ್ಷಗಾನದ ಪಜ್ಜೆ, ನಟನೆ, ನಲಿಕೆ, ಪಾತೆರಕತೆದ ತರಬೇತಿ ಪಡೆತೆರ್.
ಮಂಗಳೂರು ವಿಶ್ವವಿದ್ಯಾನಿಲಯದ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳು ಪೀಠ, ಶ್ರೀ ಸಂಸ್ಥಾನ ಒಡಿಯೂರು ತುಳು ಅಧ್ಯಯನ ಕೇಂದ್ರ, ತುಳು ಸ್ನಾತಕೋತ್ತರ ಅಧ್ಯಯನ ವಿಭಾಗ, ಕುಡ್ಲ ವಿಶ್ವವಿದ್ಯಾನಿಲಯ ಸಂಧ್ಯಾ ಕಾಲೇಜ್ ದ ಒಟ್ಟುಸೇರಿಗೆಡ್ ಡಿ.23 ಸನಿಯಾರ ಬಯ್ಯಗ್ ‘ತುಳುನಾಡ್ ದ ರಾಜಬೂಡು ಬಾರಕೂರು”ದ ಗೇನ ಪೊಲಬುದ ಪರಪು ನಡಪರೆ ಉಂಡು.
ಈ ಲೇಸ್ ದ ಗುರ್ಕಾರ್ಮೆನ್ ಉದ್ಯಮಿ ಡಿ.ಕಿರಣ್ ಚಂದ್ರ ಒಯಿಸೊನ್ವೆರ್. ಬಸ್ರೂರು ಶ್ರೀ ಶಾರದಾ ಕಾಲೇಜ್ ದ ನಿವೃತ್ತ ಪ್ರಾಧ್ಯಾಪಕೆರ್, ವಿಭಾಗ ಮುಖ್ಯಸ್ಥೆರ್ ಪ್ರೊ. ಪುರುಷೋತ್ತಮ ಬಲ್ಯಾಯ ಗೇನದ ಪೊಲಬು ಕೊರಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಕುಡ್ಲ ಮರಕಡ ವಿಜಯಾ ಬ್ಯಾಂಕ್ ದ ನಿವೃತ್ತ ಬ್ಯಾಂಕ್ ಮೆನೇಜರ್ ಅಂಡಾಲ ಗಂಗಾಧರ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್. ಮಾನಾದಿಗೆದ ಬಿನ್ನೆರಾದ್ ಶಿವಮೊಗ್ಗದ ತೀರ್ಥಹಳ್ಳಿ ಸರಕಾರಿ ಪ್ರಥಮ ದರ್ಜೆ ಕಾಲೇಜ್ ಬೊಕ್ಕ ಸ್ನಾತಕೋತ್ತರ ಕೇಂದ್ರದ ಮನೋವಿಜ್ಞಾನ ವಿಭಾಗದ ಸಹಾಯಕ ಪ್ರಾಧ್ಯಾಪಕೆರ್ ಮೊಹಮ್ಮದ್ ಇಕ್ಬಾಲ್ ಬರಿಯೆರೆ ಉಲ್ಲೆರ್ ಪಂದ್ ಲೇಸ್ ದ ಸಂಯೋಜಕೆರ್ ವೇದಸ್ಮಿತಾ, ಪ್ರಸಾದ್ ಅಂಚನ್, ಶ್ರೀ ಧ.ಮ. ತುಳುಪೀಠ ತುಳು ಸ್ನಾತಕೋತ್ತರ ಅಧ್ಯಯನ ವಿಭಾಗದ ಸಂಯೋಜಕೆರ್ ಡಾ. ಮಾಧವ ಎಂ.ಕೆ, ಮಂಗಳೂರು ವಿಶ್ವವಿದ್ಯಾನಿಲಯ ಸಂಧ್ಯಾ ಕಾಲೇಜ್ ದ ಪ್ರಾಂಶುಪಾಲೆರ್ ಡಾ. ಲಕ್ಷ್ಮೀದೇವಿ ಎಲ್ ಲೆಪ್ಪೋಲೆಡ್ ತೆರಿಪಾದೆರ್.
ಪುತ್ತೂರು: ಪುತ್ತಿಲ ಪರಿವಾರದ ವತಿರ್ದ್ ಡಿ.24 ಬೊಕ್ಕ 25 ತಾನಿ ಪುತ್ತೂರು ಮಹಾಲಿಂಗೇಶ್ವರ ದೇವಸ್ಥಾನದ ಕಂಡಡ್ ಲೋಕಕಲ್ಯಾಣರ್ಥವಾದ್ ಶ್ರೀನಿವಾಸ ಕಲ್ಯಾಣೋತ್ಸವ ಬೊಕ್ಕ ಬೃಹತ್ ಸಂತ ಸಮ್ಮೇಳನ ನಡಪುನ ಬಗೆಟ್ಟ್ ಅಟ್ಟಣೆದ ಸಭೆ ಮುಕ್ರಂಪಾಡಿದ ಸುಭದ್ರ ಕಲ್ಯಾಣಮಂಟಪಡ್ ನಡತ್ಂಡ್.
ಸಭೆಟ್ಟ್ ಪಾತೆರ್ನ ಹಿಂದೂ ಮುಖಂಡೆರ್ ಅರುಣ್ ಕುಮಾರ್ ಪಾತೆರ್ದ್, ಡಿ.24 ತಾನಿ ಬಯ್ಯಗ್ ಬೊಳುವಾರ್ರ್ದ್ ತಿರುಪತಿರ್ದ್ ಬರ್ಪುನ ದೇವೆರ್ನ ವೈಭವದ ಮೆರವಣಿಗೆ, ಬೊಕ್ಕ ರಾತ್ರೆ ಪೂಜೆ, ಸಾಂಸ್ಕೃತಿಕ ಕಾರ್ಯಕ್ರಮ, ಮನದಾನಿ ಕಾಂಡೆ ವಿಶೇಷ ಉದಯಾಸ್ತಮಾನ ಪೂಜೆ , ರಾಮಕೃಷ್ಣ ಕಾಟುಕುಕ್ಕೆ ಮೊಕ್ಲೆರ್ದ್ ಭಜನೋತ್ಸವ ಬಯ್ಯಗ್ ಬೃಹತ್ ಸಂತ ಸಮ್ಮೇಳನ, ಸಭೆರ್ದ್ ಬೊಕ್ಕ ಶ್ರೀನಿವಾಸ ಕಲ್ಯಾಣೋತ್ಸವ ನಡಪರೆ ಉಂಡು.
ರಡ್ಡ್ ದಿನತ್ತ ಕಾರ್ಯಕ್ರಮಡ್ ಬೇತೆ ಬೇತೆ ಜಿಲ್ಲೆದ ಬೇತೆ ಬೇತೆ ಭಾಗರ್ದ್ ಅಂದಾಜಿ 1 ಲಕ್ಷರ್ದ್ ಎಚ್ಚ ಜನ ಸೇರುನ ನಿರೀಕ್ಷೆ ಉಂಡು, ರಡ್ಡ್ ದಿನಲ ಅನ್ನದಾನ ನಡಪೆರೆ ಉಂಡು ಪಂದ್ ಪಂಡೆರ್. ಪೂರ್ವಭಾವಿ ಸಭೆಟ್ ಬೇತೆ ಬೇತೆ ಸಮಿತಿದ ರಚನೆ ನಡತ್ಂಡ್. ಪುತ್ತಿಲ ಪರಿವಾರದ ಗುರ್ಕಾರ್ಲು ಪ್ರಸನ್ನ ಮಾರ್ತ, ಶ್ರೀನಿವಾಸ ಕಲ್ಯಾಣೋತ್ಸವದ ಗುರ್ಕಾರ್ಲು ಶಶಾಂಕ್ ಕೊಟೇಚಾ, ಪ್ರಧಾನ ಕಾರ್ಯದರ್ಶಿ ಮನೀಶ್ ಕುಲಾಲ್, ಮಹಿಳಾ ಘಟಕದ ಗುರ್ಕಾರ್ದಿ ಮಲ್ಲಿಕಾ ಪ್ರಸಾದ್, ಗಣೇಶ್ ಭಟ್ ಮಕರಂದ ಇತ್ತೆರ್.
ಪುತ್ತಿಲ ಪರಿವಾರದ ಕಾರ್ಯದರ್ಶಿ ರವಿಕುಮಾರ್ ರೈ ಕೆದಂಬಾಡಿ ಮಠ ಸಭೆ ಸುಧಾರಿಕೆ ಮಲ್ತೆರ್.
ಒಡಿಪು ಜಿಲ್ಲಾ ಹಿರಿಯ ನಾಗರಿಕರ ಒಕ್ಕೂಟದ 2023-24 ತ್ತ ಗುರ್ಕಾರ್ಲು ಆದ್ ಎಚ್ ವಿಶ್ವನಾಥ ಹೆಗ್ಡೆ ಆಯ್ಕೆ ಆತೆರ್. ಕಾರ್ಯದರ್ಶಿಯಾದ್ ಪಿ.ನಾಗರಾಜ ರಾವ್ ಕೋಶಾಧಿಕಾರಿಯಾದ್ ಎಸ್. ಹರಿದಾಸ ನಾಯಕ್ ಆಯ್ಕೆ ಆತೆರ್.
ಒಡಿಪು ಜಿಲ್ಲೆದ ಒಡಿಪು, ಬ್ರಹ್ಮಾವರ, ಕುಂದಾಪುರ, ಬೈಂದೂರ್ ಬೊಕ್ಕ ಕಾರ್ಲ ಮುಲ್ಪ ಕಾರ್ಯ ನಿರ್ವಹಣೆ ಮಲ್ತೊಂದಿಪ್ಪುನ ಹಿರಿಯ ನಾಗರಿಕೆರ್ನ ಸಂಘದ ಒಕ್ಕೂಟದ ಸದಸ್ಯ ಸಂಸ್ಥೆಯಾದಿತ್ತ್ದ್ ಉಂದೆತ್ತ ಗುರ್ಕಾರ್ಲು, ಕಾರ್ಯದರ್ಶಿ, ಕೋಶಾಧಿಕಾರಿ ಆದ್ ಕೆ ಸದಾನಂದ ಹೆಗ್ಡೆ, ಕೆ. ಮುರಳೀಧರ, ಎಸ್.ಎಚ್ ನಾಯಕ್, ಉದಯ್ ಕುಮಾರ್, ವರದಾನಂದ ಶೆಟ್ಟಿ, ರುಡಾಲ್ಫ್ ಡಿಸೋಜ, ಬಿ.ಭೋಜರಾಜ ಶೆಟ್ಟಿ, ಕೆ ಕೃಷ್ಣಯ್ಯ ಆಚಾರ್, ಕೆ. ರಘುವೀರ್, ಪುಂಡಲೀಕ ನಾಯಕ್, ಕೆ.ಗೋವಿಂದ ಬಿಲ್ಲವ, ಎಂ.ಎನ್ ಸೇರೆಗಾರ್, ಕೆ. ವಾಸುದೇವ ರಾವ್, ಕೆ.ಪ್ರದೀಪ ನಾಯಕ್, ಎಂ. ಕಮಲಾಕ್ಷ ಕಾಮತ್ ಮೊಕುಲು ಪದ ನಿಮಿತ್ತ ಒಕ್ಕೂಟದ ಕಾರ್ಯಕಾರಿ ಸಮಿತಿದ ಪದುಕೆರ್ ಆದಿಪ್ಪುವೆರ್. ಮಾಜಿ ಅಧ್ಯಕ್ಷೆರ್ ಆಯಿನ ಎ.ಪಿ ಕೊಡಂಚ ಬೊಕ್ಕ ಸಿ.ಎಸ್ ರಾವ್ ಮೊಕುಲು ವಿಶೇಷ ಸಲಹೆಗಾರೆರ್ ಆತೆರ್.
ಮುಲ್ಕಿ: ಮುಲ್ಕಿಡ್ ಡಿ.24 ಕ್ಕ್ ನಡಪರೆ ಇಪ್ಪುನ ಮುಲ್ಕಿ ಸೀಮೆದ ಅರಸು ಕಂಬುಲ ವೈಭವ 2023 ತ್ತ ಸೌತ್ ಕೆನರಾ ಫೋಟೋಗ್ರಾಫರ್ ಎಸೋಸಿಯೇಷನ್ ಮುಲ್ಕಿ ವಲಯದ ಸದಸ್ಯೆರೆನ ಛಾಯಾಚಿತ್ರ ಪಂತೊದ ಪೋಸ್ಟರ್ ಬುಡುಗಡೆ ಲೇಸ್ ಪಡುಪಣಂಬೂರು ಮುಲ್ಕಿ ಸೀಮೆದ ಅರಮನೆಟ್ಟ್ ನಡತ್ಂಡ್.
ಪೋಸ್ಟರ್ ಬಿಡುಗಡೆ ಮಲ್ತಿನ ಮುಲ್ಕಿ ಸೀಮೆದ ಅರಸೆರ್ ದುಗ್ಗಣ್ಣ ಸಾವಂತೆರ್ ಪಾತೆರ್ದ್, ಪಿರಕ್ ದ ವೈಭವನ್ ನೆಂಪು ಮಲ್ಪುನ ಅರಸು ಕಂಬುಲ ಸಾಂಪ್ರದಾಯಿಕವಾದ್ ನಡತೊಂದು ಉಂಡು. ಬೇತೆ ಬೇತೆ ಪಂತೊಲೆನ ಮುಖೇನ ಕಂಬುಲಗ್ ಪ್ರೋತ್ಸಾಹ ಕೊರ್ಪುನ ಸಂಸ್ಥೆಲೆನ ಸಹಕಾರನ್ ಮೆಚ್ಚೊಡಾಯಿನವು ಪಂದ್ ಪಂಡೆರ್.
ಎಸ್ ಕೆ ಪಿ ಎ ಮುಲ್ಕಿ ವಲಯದ ಗುರ್ಕಾರೆ ಪ್ರಕಾಶ್ ಸುವರ್ಣ ಪಾತೆರ್ದ್, ಕಂಬುಲದ ಛಾಯಾಚಿತ್ರ ಪಂತೊಡು ಸಂಸ್ಥೆದ ಸದಸ್ಯೆರ್ ಮಾತ್ರ ಪಾಲ್ ಪಡೆಯೆರೆ ಅವಕಾಶ ಉಂಡು ಪಂದ್ ಪಂಡೆರ್.
ಈ ಪೊರ್ತುಡು ಗೌತಮ್ ಜೈನ್ ಮುಲ್ಕಿ ಅರಮನೆ, ಎಸ್ ಕೆಪಿಎ ಮುಲ್ಕಿ ವಲಯದ ಮಾಜಿ ಗುರ್ಕಾರೆ ನವೀನ್ ಚಂದ್ರ ಬೊಕ್ಕ ಸಂಸ್ಥೆದ ಪದುಕೆರ್ ಪಾಲ್ ಪಡೆದಿತ್ತೆರ್.
