CSIR-IGIB ಡ್ ಖಾಲಿ ಇಪ್ಪುನ 444 ಸಹಾಯಕ ಸೆಕ್ಷನ್ ಆಫೀಸರ್ ಬೇಲೆಗ್ ಅರ್ಜಿ ಸಂದಾವೊಲಿ.
ಆಸಕ್ತ ಅಭ್ಯರ್ಥಿಲು ಜ.12 ತ್ತೊಲಯಿ ಅಧಿಕೃತ ವೆಬ್ಸೈಟ್ csir.res.in ಮುಖೇನ ಆನ್ ಲೈನ್ ಡ್ ಅರ್ಜಿ ಸಂದಾವೊಲಿ. ಅರ್ಜಿದಾರೆರ್ ಒವು ಆಂಡಲ ಒಂಜಿ ಇಸಯಡ್ ಸ್ನಾತಕೋತ್ತರ ಪದವಿ ಆದಿಪ್ಪೊಡು. ಅತ್ತಂದೆ 33 ವರ್ಷದೊಲಯಿ ಇಪ್ಪೊಡು.
ಅಭ್ಯರ್ಥಿಲೆನ್ 2 ಹಂತದ ಲಿಖಿತ ಪರೀಕ್ಷೆದ ಆಧಾರದ ಮಿತ್ತ್ ನೇಮಕಾತಿ ಮಲ್ಪರೆ ಆಪುಂಡು.
ಆರ್. ಅಶೋಕ್ ವಿಪಕ್ಷ ನಾಯಕೆಯಾದ್ ಆಯ್ಕೆ ಆಯಿನ ಬೊಕ್ಕ ಬಿಜೆಪಿದ ಸುರುತ್ತ ಶಾಸಕಾಂಗ ಸಭೆ ಇನಿ ಬೆಳಗಾವಿದ ಖಾಸಗಿ ಹೋಟೆಲ್ ಡ್ ನಡಪರೆ ಉಂಡು.
ಚಳಿಗಾಲದ ಅಧಿವೇಶನಡ್ ಬಾಕಿ ಇಪ್ಪುನ ದಿನಟ್ಟ್ ಅನುಸರಿಸಾವೊನ ಕಾರ್ಯತಂತ್ರ, ಕಲಾಪ ಇಚಾರದ ಬಗೆಟ್ಟ್ ಚರ್ಚೆ ಮಲ್ಪರೆ ಈ ಸಭೆನ್ ಲೈದೆರ್.
ಕುಡ್ಲ: ಕರೆನ್ ಕ್ಷಿತಿ ಸುವರ್ಣ ನಿರ್ದೇಶನ ಮಲ್ದಿನ ಕಿರು ಚಿತ್ರ ಹೈಡ್ & ಸೀಕ್ ಪುಗರ್ತೆದ ಕೇನ್ಸ್ ವಿಶ್ವ ಚಲನಚಿತ್ರೋತ್ಸವಗ್ ಆಯ್ಕೆ ಆತ್ಂಡ್.
“ಹೈಡ್ ಅಂಡ್ ಸೀಕ್” ಕಿರುಚಿತ್ರನ್ ಭಾರತದ ಯುವ ನಿರ್ದೇಶಕಿ 20 ವರ್ಷದ ಮಿಸ್ ಕರೆನ್ ಕ್ಷಿತಿ ಸುವರ್ಣ ಮೇರ್ ನಿರ್ದೇಶನ ಮಲ್ದೆರ್. ಉಂದು ಸ್ಕಿಜೋಫ್ರೇನಿಯಾ ಬೊಕ್ಕ ಅವೆತ್ತ ಪರಿಣಾಮದ ಬಗೆಟ್ಟ್ ಸಂದೇಶ ಇಪ್ಪುನ 10 ನಿಮಿಷದ ಸ್ವತಂತ್ರ ಕಿರುಚಿತ್ರ ಆತ್ಂಡ್. ಇತ್ತೆದ ಜಗತ್ತ್ ಡ್ ಉಂಡು ಇತ್ತೆದ ವಿಷಯ ಆತ್ಂಡ್.
ಕರೆನ್ ಕ್ಷಿತಿ ಸುವರ್ಣ ಮೇರ್ ತನ್ನ ಕ್ರಾಫ್ಟ್ ಬೊಕ್ಕ ಕಲೆಗಾದ್ ಮೇರ್ ತಯಾರ್ ಮಲ್ತಿನ ಚಲನಚಿತ್ರ ಮೆಚ್ಚುಗೆ ಪಡೆತ್ಂಡ್. ಯುವ ನಿರ್ದೇಶಕೆರ್ ರೋಮಾಂಚಕ ಕಥೆನ್ ತೆರಿಪಾದೆರ್ ಬೊಕ್ಕ ಆಧುನಿಕ ಪ್ರಪಂಚದ ಸ್ಕಿಜೋಫ್ರೇನಿಯಾ ಇಸಯದ ಬಗೆಟ್ಟ್ ಸಂದೇಶನ್ ಕೊರ್ತೆರ್.
ಈ ಕಿರುಚಿತ್ರನ್ ವಿಸಿಕಾ ಫಿಲಂಸ್ ದೊಟ್ಟಿಗೆ ಮೋಹನ್ ಬೊಕ್ಕ ಮನು ಗೊರೂರ್ ಸಹ ನಿರ್ಮಾಪಕೆರಾದ್ ನಿರ್ಮಾಣ ಮಲ್ದೆರ್. ಅನಿಲ್ ಕುಮಾರ್ ಛಾಯಾಗ್ರಹಣ ಬೊಕ್ಕ ರಾಷ್ಟ್ರ ಪ್ರಶಸ್ತಿ ಗೆಂದಿನ ಸಂಗೀತ ಸಂಯೋಜನೆದ ಬಾಪಿ ತುತುಲ್ ಹಿನ್ನೆಲೆ ಸಂಗೀತ ಕೊರ್ತೆರ್.
ಸುಮಾರ್ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವಡ್ ಈ ಕಿರುಚಿತ್ರನ್ ಪ್ರದರ್ಶನ ಮಲ್ದೆರ್. ಆವೆಟ್ಟ್ ಮಲ್ಲವು ಕೇನ್ಸ್ ವಿಶ್ವ ಚಲನಚಿತ್ರೋತ್ಸವ ಆತ್ಂಡ್. ಉಂದೆನ್ ಕೊಲಂಬಿಯನ್ ಇನ್ಕ್ಲೂಸಿನ್ ಫೆಸ್ಟಿವಲ್ ಬೊಕ್ಕ ಸುಮಾರ್ ಅರ್ಹತಾ ಚಲನಚಿತ್ರೋತ್ಸವಡ್ ಪ್ರದರ್ಶನ ಮಲ್ದೆರ್. ನಿರ್ದೇಶಕಿ ಕರೆನ್ ಈ ಚಿತ್ರನ್ ಅಕಾಡೆಮಿ ಬೊಕ್ಕ BAFTA ಪ್ರಶಸ್ತಿಗ್ ಕಡಪಾಯೆರೆ ತಯಾರಾತೆರ್. ಹೈಡ್ ಅಂಡ್ ಸೀಕ್ 2024 ಟ್ಟ್ ಪ್ರಪಂಚ ಇಡೀ ಭಾರತನ್ ಪ್ರತಿನಿಧಿಸಾವುನ ಕಿರುಚಿತ್ರ ಆಪುನ ನಿರೀಕ್ಷೆ ಉಂಡು.
ಉಳ್ಳಾಲ : ಕೊಲ್ಯಡ್ ಫೆಬ್ರವರಿ 25ಕ್ಕ್ ನಡಪುನ ಬಿಲ್ಲವ ಸಮಾವೇಶದ ಸ್ವಾಗತ ಸಮಿತಿದ ಅಧ್ಯಕ್ಷೆರಾದ್ ಸಮಾಜಸೇವಕೆರ್ ಎ.ಜೆ.ಶೇಖರ್ ಆಯ್ಕೆ ಆತೆರ್.
ಮೇರ್ ಬಿಲ್ಲವ ಸಮಾಜದ ನಾಯಕೆರ್ , ಶ್ರೀ ಉಮಾ ಮಹೇಶ್ವರಿ ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಆದುಲ್ಲೆರ್. ಮೇರ್ ಸರಳ ಸಜ್ಜನಿಕೆ ಅಂಚೆನೆ, ಪರೋಪಕಾರಿ ಮನಸ್ ಡ್ ಜನ ಮೆಚ್ಚಿಗೆ ಪಡೆದೆರ್.
ಮೆರೆನ ಮುತಾಲಿಕೆಡ್ ಬಿಲ್ಲವ ಸಮಾಜದ ಸಂಘಟನೆ ಗಟ್ಟಿ ಆವಡ್, ಅಂಚೆನೆ ಬಿಲ್ಲವ ಸಮಾವೇಶ ಯಶಸ್ವಿ ಆವಡ್ ಪಂದ್ ಸಮಸ್ತ ಬಿಲ್ಲವ ಸಮಾಜದಕುಲು ಹಾರೈಕೆ ಮಲ್ದೆರ್.
ಧರ್ಮಸ್ಥಳ: ಶ್ರೀ ಕ್ಷೇತ್ರ ಧರ್ಮಸ್ಥಳದ ದೀಪೋತ್ಸವದ ಅಂಗವಾದ್ ಡಿ.8 ಕ್ಕ್ ಅಮೃತ ವರ್ಷಿಣಿ ಸಭಾಭವನಡ್ ಸರ್ವಧರ್ಮ ಸಮ್ಮೇಳನದ 91 ನೇ ಅಧಿವೇಶನ ನಡತ್ಂಡ್.
ವಿದ್ವಾಂಸೆರ್ ಗುರುರಾಜ ಕರ್ಜಗಿ ಈ ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರ್ದ್, ಮಾತ ಧರ್ಮಲೆನ ಬದ್ಕ್ ಗ್ ಶಾಂತಿ, ತೃಪ್ತಿ, ನೆಮ್ಮದಿ ಬೊಕ್ಕ ಸಂತೊಷ ಕೊರ್ಪುನವೇ ಆತ್ಂಡ್. ಧರ್ಮದ ಸತ್ವೊನು ತೆರಿದ್ ಬದ್ ಕ್ ಡ್ ಅನುಷ್ಠಾನ ಮಲ್ತ್ಂಡ ಶಾಂತಿ, ಸಾಮರಸ್ಯದ ಜೀವನ ಸಾಧ್ಯ. ಧರ್ಮದ ಪುದರ್ ಡ್ ಹಿಂಸೆ ಬೊಕ್ಕ ಭಯೋತ್ಪಾದನೆ ಸರಿ ಅತ್ತ್, ಸರ್ವಧರ್ಮ ಸಮನ್ವಯರ್ದ್ ಪವಿತ್ರತೆ, ಉದಾರತೆ ಬೊಕ್ಕ ಶಕ್ತಿವರ್ಧನೆದೊಟ್ಟಿಗೆ ಸಾಮಾಜಿಕ ಸಾಮರಸ್ಯ ಶಾಂತಿ, ನೆಮ್ಮದಿ ಬೊಕ್ಕ ಎಡ್ಡೆ ಜೀವನ ನಡಪಾವೊಲಿ. ಅತ್ತಂದೆ ಶ್ರೀ ಮಂಜುನಾಥ ಸ್ವಾಮಿ ಬೊಕ್ಕ ಧರ್ಮ ದೇವತೆಲೆನ ಸಾನ್ನಿಧ್ಯ, ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆರೆನ ಸಾಧನೆ ಬೊಕ್ಕ ಬಹುಮುಖಿ ಸಮಾಜ ಸೇವಾಕಾರ್ಯರ್ದ್ ಧರ್ಮಸ್ಥಳ ಇನಿ ಸರ್ವಧರ್ಮ ಸಮನ್ವಯ ಕೇಂದ್ರವಾದ್ ಜಾಗತಿಕ ಮಟ್ಟಡ್ ಪುಗರ್ತೆ ಬೊಕ್ಕ ಗೌರವನ್ ಪಡೆತ್ಂಡ್ ಪಂದ್ ಪಂಡೆರ್.
ಬತ್ತಿ ಬಿನ್ನೆರೆನ್ ಎದ್ಕೊನ್ನ ಡಿ. ವೀರೇಂದ್ರ ಹೆಗ್ಗಡೆರ್ ಪಾತೆರ್ದ್, ನಮ್ಮ ಸಾರ್ಥಕ ಬದ್ಕ್ ಗ್ ಬೊಲ್ಪು ಕೊರ್ದು ತಾದಿ ತೂಪಾವುನ ಸಾಧನನ್ ಧರ್ಮ ಪಂದ್ ಲೆಪ್ಪುವೆರ್. ಮಾನವ ಜನಾಂಗದ ಕಲ್ಯಾಣನೇ ಧರ್ಮದ ಗುರಿ ಆತ್ಂಡ್. ದೇಶಡ್ ಕಾಲಕಾಲಗ್ ಧಾರ್ಮಿಕ, ಆರ್ಥಿಕ ಬೊಕ್ಕ ಸಾಮಾಜಿಕ ಏರಪೇರಾತ್ಂಡ್. ಅಂಚೆನೆ ವಿಜ್ಞಾನ ಬೊಕ್ಕ ತಂತ್ರಜ್ಞಾನ ಪಂದ್ ಬತ್ತ್ಂಡ ಇತ್ತೆದ ಕಾಲಡ್ ಜ್ಞಾನಗ್ ಮಹತ್ವ ಎಚ್ಚಾತ್ಂಡ್. ವಿಜ್ಞಾನ ಜ್ಞಾನ ಬೊಕ್ಕ ಜ್ಞಾನ ವಿಜ್ಞಾನ ಆತ್ಂಡ್. ಸಮಾಜಡ್ ಭಿನ್ನಾಭಿಪ್ರಾಯ ಸಹಜ ಆತ್ಂಡ್. ಆಂಡ ಭಿನ್ನಾಭಿಪ್ರಾಯ ಬನ್ನಗ ಧರ್ಮಿಷ್ಠೆರ್, ಜ್ಞಾನಿಲು ಅವೆನ್ ಬುಡ್ದ್ ಬುಡಂದೆ ಒಟ್ಟಿಗೆ ಸೇರ್ಸಾವೊಂದು ಪೋವೊಡು. ಅಕೇರಿಗ್ ಸತ್ಯ ಬೊಕ್ಕ ಧರ್ಮಗ್ ಜಯ ಆಪುಂಡು ಪಂದ್ ಪಂಡೆರ್.
ಗುರ್ಕಾರ್ಮೆನ್ ಒಯಿಸೊನ್ನ ತುಮಕೂರು ಸಿದ್ಧಗಂಗಾ ಮಠತ್ತ ಶ್ರೀ ಸಿದ್ಧಲಿಂಗ ಸ್ವಾಮೀಜಿ ಪಾತೆರ್ದ್, ಅನ್ನದಾನ, ವಿದ್ಯಾದಾನ, ಔಷಧದಾನ ಬೊಕ್ಕ ಅಭಯದಾನ ಪನ್ಪುನ ಚತುರ್ವಿಧ ದಾನಲು ಧರ್ಮಸ್ಥಳಡ್ ನಿತ್ಯೋತ್ಸವ ಆತ್ಂಡ್. ಭಾರತಡ್ ಮಾತ್ರ ಮಾತೆರೆಗ್ಲಾ ಸಮಾನ ಸ್ಥಾನಮಾನ ಬೊಕ್ಕ ಅವಕಾಶ ಉಂಡು ಪಂದ್ ಪಂಡೆರ್.
ಆಧುನಿಕ ಭಾರತ- ಧರ್ಮ ಸಮನ್ವಯತೆ ಪನ್ಪುನ ಇಸಯದ ಬಗೆಟ್ಟ್ ಡಾ. ಎಂ. ಆರ್.ವೆಂಕಟೇಶ್ ಉಪನ್ಯಾಸ ಕೊರಿಯೆರ್. ಪ್ರಾಚೀನ ಭಾರತ- ಧರ್ಮ ಸಮನ್ವಯತೆ ಪನ್ಪುನ ಇಚಾರಡ್ ಡಾ. ವಿ.ಬಿ.ಆರತಿ ಬೊಕ್ಕ ಮಧ್ಯಕಾಲೀನ ಭಾರತ- ಧರ್ಮ ಸಮನ್ವಯತೆ ಪನ್ಪುನ ಇಸಯಡ್ ಮಹಮ್ಮದ್ ಗೌಸ್ ರಶೀದ್ ಅಹ್ಮದ್ ಹವಾಲ್ದಾರ್ ಉಪನ್ಯಾಸ ಕೊರಿಯೆರ್. ಎಸ್.ಆರ್. ವಿಘ್ನರಾಜ್ ಸಂಪಾದನೆ ಮಲ್ತಿನ ಭೈರವೇಶ್ವರ ಪುರಾಣ ಗ್ರಂಥನ್ ಸ್ವಾಮೀಜಿ ಬುಡುಗಡೆ ಮಲ್ತ್ ದ್ ಎಡ್ಡೆಪ್ಪು ಬಯಕಿಯೆರ್.
ಈ ಪೊರ್ತುಡು ಹೇಮಾವತಿ ವಿ.ಹೆಗ್ಗಡೆ, ಡಿ. ಸುರೇಂದ್ರ ಕುಮಾರ್, ಡಿ. ಹರ್ಷೇಂದ್ರ ಕುಮಾರ್ ಬೊಕ್ಕ ಶ್ರದ್ಧಾ ಅಮಿತ್ ಪಾಲ್ ಪಡೆದಿತ್ತೆರ್. ಶ್ರೀನಿವಾಸ ರಾವ್ ಧರ್ಮಸ್ಥಳ ಸೊಲ್ಮೆ ಸಂದಾಯೆರ್. ಶ್ರೀಧರ ಭಟ್ ಲೇಸ್ ದ ಸುಧಾರಿಕೆ ಮಲ್ತೆರ್. ರಾತ್ರೆ ಕಂಚಿಮಾರು ಕಟ್ಟೆ ಉಚ್ಚಯ ನಡತ್ಂಡ್.
ಒಡಿಪು: ಕಾರ್ಲ ತಾಲೂಕ್ ದ ಸೂಡ ಶ್ರೀ ಸುಬ್ರಹ್ಮಣ್ಯ ದೇವಲ್ಯಡ್ ಡಿ.12-23 ಮುಟ್ಟ ಷಷ್ಠಿ ಉಚ್ಚಯ ನಡಪರೆ ಉಂಡು.
ಡಿ.12 ಅಂಗಾರೆ ಬೊಲ್ಪುಗು ಕಾಲ ಪೂಜೆ, ಪ್ರಧಾನ ಹೋಮ, ಕಲಶಾಭಿಷೇಕ, ಮಧ್ಯಾಹ್ನ ಮಹಾಪೂಜೆ, ನುಪ್ಪು ಪ್ರಸಾದ ಸೇವೆ, ರಾತ್ರೆ ಉಚ್ಚಯಮೂರ್ತಿ ಪಿದಾಡಿಯೆರೆ, ರಂಗಪೂಜೆ, ದೀಪೋತ್ಸವ ಬಲಿ ನಡಪರೆ ಉಂಡು.
ಡಿ.13-15 ಮುಟ್ಟ ಪ್ರತಿದಿನ ಬೊಲ್ಪುಗು ಕಾಲಪೂಜೆ, ಕಲಶಾಭಿಷೇಕ, ಮಹಾಪೂಜೆ, ರಾತ್ರೆ ನಿತ್ಯಬಲಿ ನಡಪರೆ ಉಂಡು.
ಡಿ.16 ಸನಿಯಾರ ಬೊಲ್ಪುಗು ಪಂಚಾಮೃತಾಭಿಷೇಕ, ಕಲಶಾಭಿಷೇಕ, ಮಧ್ಯಾಹ್ನ ಮಹಾಪೂಜೆ ರಾತ್ರೆ ನಿತ್ಯಬಲಿ, ಅಂಕುರ ಬಲಿ, ಅಂಕುರಾರೋಪಣ ನಡಪರೆ ಉಂಡು.
ಡಿ.17 ಐತಾರ ಬೊಲ್ಪುಗು ಕೊಡಿ ಏರಿಯೆರೆ, ಬಲಿ ಮಧ್ಯಾಹ್ನ ಮಹಾಪೂಜೆ, ಅನ್ನ ಪ್ರಸಾದ ಸೇವೆ, ರಾತ್ರೆ ಮಹಾರಂಗಪೂಜೆ, ಭೂತಬಲಿ ನಡಪರೆ ಉಂಡು.
ಡಿ.18 ಸೋಮಾರ ಬೊಲ್ಪುಗು ಕಲಶಾಭಿಷೇಕ, ಮಹಾಪೂಜೆ, ಬಲಿ, ಷಷ್ಠಿ ಉಚ್ಚಯ, ತೇರ್ ಒಯಿಪೆರೆ, ಅನ್ನ ಪ್ರಸಾದ ಸೇವೆ, ರಾತ್ರೆ ಬಲಿ, ತೇರ್ ಒಯಿಪೆರೆ, ಭೂತಬಲಿ ನಡಪರೆ ಉಂಡು.
ಡಿ.19 ಅಂಗಾರೆ ಬೊಲ್ಪುಗು ಹೋಮ, ಮಹಾಪೂಜೆ, ರಾತ್ರೆ ಊರಾಯಣ ಬಲಿ, ಪೂಜೆ, ಭೂತ ಬಲಿ ನಡಪರೆ ಉಂಡು.
ಡಿ.20 ಬುಧಾರ ಬೊಲ್ಪುಗು ಆಶ್ಲೇಷಾಬಲಿ, ಕಲಶಾಭಿಷೇಕ, ಮಹಾಪೂಜೆ, ರಾತ್ರೆ ಕಟ್ಟೆಪೂಜೆ ನಡಪರೆ ಉಂಡು.
ಡಿ.21 ಗುರುವಾರ ಬೊಲ್ಪುಗು ಅಷ್ಟಕುಲ ನಾಗಾಪೂಜೆ, ಹೋಮ, ಬಲಿ ರಥಾರೋಹಣ, ಅನ್ನ ಪ್ರಸಾದ ಸೇವೆ, ರಾತ್ರೆ ತೇರ್ ಒಯಿಪೆರೆ ಉಂಡು.
ಡಿ.22 ಸುಕ್ರಾರ ಬೊಲ್ಪುಗು ಅಭಿಷೇಕ ಪೂಜೆ, ಮಹಾಪೂಜೆ, ತುಲಾಭಾರ, ನಾಗದರ್ಶನ, ರಾತ್ರೆ ಸವಾರಿ ಬಲಿ, ಓಕುಳಿ, ಕೆರೆ ದೀಪೋತ್ಸವ, ಕಟ್ಟೆಪೂಜೆ ನಡಪರೆ ಉಂಡು.
ಡಿ.23 ಸನಿಯಾರ ಬೊಲ್ಪುಗು ಗಣಯಾಗ, ಮಹಾಪೂಜೆ ಬೊಕ್ಕ ಪ್ರಸಾದ ಪಟ್ಟಿಯೆರೆ ಉಂಡು.
ಅಂಚೆನೆ ಪ್ರತಿದಿನೊಲ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು. ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಶ್ರೀ ಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ಸುಬ್ರಹ್ಮಣ್ಯ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಹಯವದನ ತಂತ್ರಿಲು, ಅರ್ಚಕೆರ್ ವಿಷ್ಣುಮೂರ್ತಿ ಭಟ್, ಅನುವಂಶಿಕ ಆಡಳಿತ ಮೊಕ್ತೇಸರೆರ್ ಶಿರ್ವಕೋಡು ಜಯಶೀಲ ಹೆಗ್ಡೆ ಬೊಕ್ಕ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.
ನವಿಬೊಂಬೈ: ನೆರೂಲ್ ಶ್ರೀ ಗಣಪತಿ ಅಯ್ಯಪ್ಪ ದುರ್ಗಾದೇವಿ ಕ್ಷೇತ್ರಡ್ 7ನೇ ವರ್ಷದ ಉಚ್ಚಯ, ಧರ್ಮ ಶಾಸ್ತಾರದ 34 ನೇ ವರ್ಷದ ಅಯ್ಯಪ್ಪ ಮಂಡಲ ಪೂಜೆ ಬೊಕ್ಕ ನುಪ್ಪು ಪ್ರಸಾದ ಸೇವೆ ಡಿ.15-17 ಮುಟ್ಟ ನಡಪರೆ ಉಂಡು.
ಈ ಲೇಸ್ ತಂತ್ರಿಲಾಯಿನ ವಿದ್ವಾನ್ ರಾಮಚಂದ್ರ ಬಾಯಾರ್ ಮೆರೆನ ಮುತಾಲಿಕೆಡ್ ನಡಪರೆ ಉಂಡು.
ಡಿ.15 ಸುಕ್ರಾರ ಬೊಲ್ಪುಗು ಸಾಮೂಹಿಕ ಪ್ರಾರ್ತನೆ, ಉಗ್ರಾಣ ಮೂರ್ತ, ಮಧ್ಯಾಹ್ನ ಮಹಾಪೂಜೆ, ನುಪ್ಪು ಪ್ರಸಾದ ಸೇವೆ, ಬಯ್ಯಗ್ ರಾಕ್ಷೋಘ್ನ ಹೋಮ, ವಾಸ್ತು ಹೋಮ, ವಾಸ್ತು ಪೂಜೆ, ವಾಸ್ತು ಬಲಿ, ರಾತ್ರೆ ಪೂಜೆ ಮಹಾಪೂಜೆ ನಡಪರೆ ಉಂಡು.
ಡಿ.16 ಸನಿಯಾರ ಬೊಲ್ಪುಗು ಕಾಲಪೂಜೆ, ಅಯ್ಯಪ್ಪ ದೇವೆರೆನ 49 ಕಲಶಾಧಿವಾಸ, ಮಹಾಗಣಪತಿ ಹೋಮ, ನ್ಯಾಸ ಪೂಜೆ, ಮಹಾಪೂಜೆ, ಉಚ್ಚಯ ಬಲಿ, ಪಲ್ಲ ಪೂಜೆ ನಡಪರೆ ಉಂಡು.
ಡಿ.17 ಐತಾರ ಬೊಲ್ಪುಗು ಕಾಲ ಪೂಜೆ, ಪ್ರಧಾನ ಹೋಮ, ಮಧ್ಯಾಹ್ನ ನುಪ್ಪು ಪ್ರಸಾದ ಸೇವೆ, ಸಾಂಸ್ಕೃತಿಕ ಲೇಸ್, ಭಕ್ತಿ ವೈಭವ, ಬಯ್ಯಗ್ ಧಾರ್ಮಿಕ ಸಭಾ ಲೇಸ್, ಸನ್ಮಾನ, ಭರತನಾಟ್ಯ ರಾತ್ರೆ ಲಕ್ಕಿಡಿಪ್ ಡ್ರಾ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ನೆರೂಲ್ ಶ್ರೀ ಗಣಪತಿ ಅಯ್ಯಪ್ಪ ದುರ್ಗಾದೇವಿ ಕ್ಷೇತ್ರದ ಗುರ್ಕಾರೆ, ಕಾರ್ಯಾಧ್ಯಕ್ಷೆರ್, ವಿಶ್ವಸ್ಥೆರ್, ಪದುಕೆರ್, ಸಮಿತಿ ಸದಸ್ಯೆರ್, ಮಹಿಳಾ ವಿಭಾಗ, ಯುವ ವಿಭಾಗ, ಸರ್ವಸದಸ್ಯೆರ್ ಬೊಕ್ಕ ನೆರೂಲ್ ಶ್ರೀ ಮಣಿಕಂಠ ಸೇವಾ ಸಂಘ, ನವಿ ಬೊಂಬೈ ಧರ್ಮ ಶಾಸ್ತಾ ಭಕ್ತ ವೃಂದ ಚಾರಿಟೇಬಲ್ ಟ್ರಸ್ಟ್ ಲೆಪ್ಪೋಲೆಡ್ ತೆರಿಪಾದೆರ್.
ಸುಬ್ರಹ್ಮಣ್ಯ: ಮಾಜಿ ಉಪಮುಖ್ಯಮಂತ್ರಿ ಕೆ. ಎಸ್ ಈಶ್ವರಪ್ಪ ಡಿ.11 ತಾನಿ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಸ್ವಾಮಿ ದೇವಸ್ಥಾನಗ್ ಭೇಟಿ ಕೊರಿಯೆರ್.
ಕುಟುಂಬ ಸಮೇತ ಬತ್ತಿನ ಅಕುಲು ದೇವರ ದರ್ಶನ ಪಡೆದ್ ಪೂಜೆ ಸಲ್ಲಿಸಾಯೆರ್. ಈ ಪೊರ್ತುಡು ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನದ ಸ್ವಚ್ಛತಾ ಕಾರ್ಯಗ್ ಚಾಲನೆ ಕೊರಿಯೆರ್ . ವ್ಯವಸ್ಥಾಪನಾ ಸಮಿತಿದಕುಲು, ಕಾರ್ಯನಿರ್ವಹಣಾಧಿಕಾರಿ ಇತ್ತೆರ್.
ಬೊಕ್ಕ ದೇವಸ್ಥಾನ, ಸಂಘಟನೆದ ಸಹಕಾರಡ್ ಸ್ವಚ್ಚತಾ ಕಾರ್ಯ ನಡತ್ಂಡ್.
ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಲಕ್ಷ ಕುಂಕುಮಾರ್ಚನೆ, ಸಾಮೂಹಿಕ ಕುಂಕುಮಾರ್ಚನೆ, ಲಕ್ಷ ದೀಪ ಬಲಿ ಉಚ್ಚಯ, ಅಷ್ಟಾವಧಾನ ಸೇವೆ ಡಿ.12 ಅಂಗಾರೆ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಪ್ರಸಾದ ದೆತೊಂದು, ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಅನುವಂಶಿಕ ಮೊಕ್ತೇಸರೆರ್ ದುಗ್ಗಣ್ಣ ಸಾವಂತೆರ್, ಅನುವಂಶಿಕ ಆಡಳಿತ ಮೊಕ್ತೇಸರೆರ್ ಎನ್ ಎಸ್ ಮನೋಹರ ಶೆಟ್ಟಿ, ಕಾರ್ಯಾ
ನಿರ್ವಾಹಣಾಧಿಕಾರಿ ಜಯಮ್ಮ ಪಿ, ತಂತ್ರಿಲು, ಅರ್ಚಕೆರ್ ಬೊಕ್ಕ ಸಿಬ್ಬಂದಿ ವರ್ಗ ಲೆಪ್ಪೋಲೆಡ್ ತೆರಿಪಾದೆರ್.
ಮುಲ್ಕಿ: ಪುಗರ್ತೆದ ಮುಲ್ಕಿ ಸೀಮೆ ಅರಸು ಕುಂಬುಲ ಡಿ. 24 ಕ್ಕ್ ನಡಪರೆ ಉಂಡು. ನೆತ್ತ ಲೆಪ್ಪೋಲೆನ್ ಸುರಗಿರಿ ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಸೀತಾರಾಮ ಶೆಟ್ಟಿ ಮೇರ್ ಪಡು ಪಣಂಬೂರು ಅರಮನೆತ್ತ ಧರ್ಮ ಚಾವಡಿಡ್ ಬುಡುಗಡೆ ಮಲ್ತೆರ್.
ಈ ಲೇಸ್ ಮುಲ್ಕಿ ಸೀಮೆ ಅರಸೆರ್ ಎಂ ದುಗ್ಗಣ್ಣ ಸಾವಂತೆರೆನ ಮುತಾಲಿಕೆಡ್, ಸಮಿತಿದ ಗುರ್ಕಾರೆ ಕಿರಣ್ ಕುಮಾರ್ ಶೆಟ್ಟಿ ಗುರ್ಕಾರ್ಮೆಡ್ ನಡತ್ಂಡ್.
ದುಗ್ಗಣ್ಣ ಸಾವಂತೆರ್ ಪಾತೆರ್ದ್, ಡಿ.24 ಕ್ಕ್ ಮುಲ್ಕಿ ಸೀಮೆದ ಅರಸು ಕಂಬುಲ ನಡಪರೆ ಉಂಡು. ಅವ್ವೆ ದಿನ ಬೊಲ್ಪುಗು ಪುಗರ್ತೆದ ಮುಲ್ಕಿ ಅರಮನೆಗ್ ಮೈಸೂರ್ ಸಂಸ್ಥಾನದ ಮಹಾರಾಜೆರ್ ಯದುವೀರ್ ಕೃಷ್ಣರಾಜ ಒಡೆಯರ್ ಕಂಬುಲಡ್ ಪಾಲ್ ಪಡೆಯೆರೆ ಉಲ್ಲೆರ್. ಅತ್ತಂದೆ ಲಕ್ಷರ್ದ್ ಎಚ್ಚ ಜನ ಕಂಬುಲಗ್ ಬರ್ಪುನ ನಿರೀಕ್ಷೆ ಉಂಡು. ಅಂಚೆನೆ ಲೇಸ್ ನ್ ಮುಲ್ಕಿ ಸೀಮೆದ ನಾಗರಿಕೆರ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಪಂಡೆರ್.
ಈ ಪೊರ್ತುಡು ರಾಮ ಭಟ್, ಬಂಕಿ ನಾಯಕೆರ್, ಸೂರ್ಯ ಕುಮಾರ್ ಹಳೆಯಂಗಡಿ, ಪಡು ಪಣಂಬೂರು ಗ್ರಾಪಂ ಅಭಿವೃದ್ಧಿ ಅಧಿಕಾರಿ ಸುಧೀರ್, ಗೌತಮ್ ಜೈನ್ ಮುಲ್ಕಿ ಅರಮನೆ, ಕಂಬುಲ ಸಮಿತಿದ ಪದುಕೆರ್ ವಕೀಲೆರ್ ಚಂದ್ರಶೇಖರ್, ಶ್ಯಾಮ್ ಪ್ರಸಾದ್, ನವೀನ್ ಬಾಂಧಕೆರೆ, ಶಶೀಂದ್ರ ಸಾಲ್ಯಾನ್, ವಸಂತ್ ಬೆರ್ನಾಡ್, ಮಹಿಮ್ ಹೆಗ್ಡೆ, ಹಳೆಯಂಗಡಿ ಗ್ರಾಪಂ ಸದಸ್ಯೆರ್ ಅಬ್ದುಲ್ ಖಾದರ್, ಪಿ. ಸಿ. ಕೋಟ್ಯಾನ್, ಮನ್ಸೂರ್ ಹಳೆಯಂಗಡಿ ಯುವ ಕಾಂಗ್ರೆಸ್ ಗುರ್ಕಾರೆ ಅಶೋಕ್ ಪೂಜಾರಿ, ದಿನೇಶ್ ಹೊಸಲಕ್ಕೆ ದಾಮೋದರ್ ಸಾಲ್ಯಾನ್, ಚಂದ್ರಹಾಸ ಪಡು ತೋಟ ಇತ್ತೆರ್.
