Uncategorized

ಭಾರತೀಯ ಕ್ರೀಡಾ ಪ್ರಾಧಿಕಾರಗ್ ಕಬಡ್ಡಿ ಪ್ಲೇಯರ್ ಆಶಿಶ್ ಕೆ.ವೈ ಆಯ್ಕೆ

ಧಾರವಾಡ: ಭಾರತೀಯ ಕ್ರೀಡಾ ಪ್ರಾಧಿಕಾರ (ಸಾಯಿ)ಗ್ ಕೋಟೆಬಾಕಿಲ್ ದ ಕಬಡ್ಡಿಪಟು ಆಶಿಶ್ ಕೆ.ವೈ ಆಯ್ಕೆ ಆತೆರ್.

ಕಬಡ್ಡಿಡ್ ಮೆರೆನ ಪ್ರದರ್ಶನ ಬೊಕ್ಕ ಸಾಧನೆನ್ ಗುರುತಿಸಾದ್ ಮೆರೆನ್ ಸಾಯಿ ಆಯ್ಕೆ ಮಲ್ದ್ಂಡ್.

ಮೇರ್ ಕುಡ್ಲದ ಶಕ್ತಿ ಕಾಲೇಜ್ ದ ವಿದ್ಯಾರ್ಥಿ. ತಾಲೂಕ್, ಜಿಲ್ಲೆ ರಾಜ್ಯ ಬೊಕ್ಕ ರಾಷ್ಟ್ರಮಟ್ಟದ ವಿದ್ಯಾಭಾರತಿ ಕೂಟಡ್ ಇತ್ತೆರ್. ಮೆರೆಗ್ ಕಿರಣ್ ಆರಂಪಾಡಿ ಬೊಕ್ಕ ಮನೋಹರ್ ಸವಣೂರು ಮೊಕುಲು ತರಬೇತಿದಾರೆರಾತೆರ್.

ಬಿಳಿನೆಲೆ ಗ್ರಾಮದ ಕೋಟೆ ಬಾಕಿಲ್ ನಿವಾಸಿ, ಸುಬ್ರಹ್ಮಣ್ಯ ಠಾಣೆದ ಹೆಡ್ ಕಾನ್ಸ್ ಟೇಬಲ್ ಸಂಧ್ಯಾ ಮಣಿ ಬೊಕ್ಕ ಯೋಗೀಶ್ ಕುಮಾರ್ ದಂಪತಿಲೆನ ಮಗೆ ಆಶಿಶ್.

ಮೇಘ ಕಲಾ ಆರ್ಟ್ಸ್ ಮುತಾಲಿಕೆಡ್ ಚಿತ್ತಾರ ಜೋಕ್ಲೆನ ಬೇಸಿಗೆ ಶಿಬಿರ

ಮೇಘ ಕಲಾ ಆರ್ಟ್ಸ್ ಬೊಕ್ಕ ಮೇಘ ಡಾನ್ಸ್ ಸ್ಟುಡಿಯೋ ದರ್ಬೆ ಬೊಕ್ಕ ಮುರಳಿ ಬ್ರದರ್ಸ್ ಡ್ಯಾನ್ಸ್ ಕ್ರೂ ಪುತ್ತೂರುದ ಒಟ್ಟುಸೇರಿಗೆಡ್ ಎ.12 ಸುಕ್ರಾರ (ಇನಿ) ಪುತ್ತೂರು ಮಾಯಿದೆ ದೇವುಸ್ ಸಭಾಂಗಣಡ್ ಚಿತ್ತಾರ ಜೋಕ್ಲೆನ ಬೇಸಿಗೆ ಶಿಬಿರ ನಡತ್ಂಡ್.

ಈ ಲೇಸ್ ದ ಗುರ್ಕಾರ್ಮೆನ್ ಪುತ್ತೂರು ಮಾಯಿದೆ ದೇವುಸ್ ಸಮೂಹ ಶಿಕ್ಷಣ ಸಂಸ್ಥೆದ ಸಂಚಾಲಕೆರ್ ಅ.ವಂ.ಲಾರೆನ್ಸ್ ಮಸ್ಕರೇನ್ಹಸ್ ಒಯಿಸ್ ದಿತ್ತೆರ್.

ಮಲ್ಲ ಬಿನ್ನೆರಾದ್ ಚೇತನ ಆಸ್ಪತ್ರೆದ ಡಾ.ಜೆ.ಸಿ ಅಡಿಗ, ಪುತ್ತೂರು ಮಹಿಳಾ ಠಾಣಾ ಇನ್ಸೆಪೆಕ್ಟರ್ ಸುನೀಲ್ ಕುಮಾರ್, ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರ್ ದಿನೇಶ್ ರೈ ಕಡಬ, ಪುತ್ತೂರು ಲಿಟ್ಲ್‌ ಫ್ಲವರ್ ಶಾಲೆದ ಶಿಕ್ಷಕೆರ್ ಬಾಲಕೃಷ್ಣ ಪೋರ್ದಲ್, ದರ್ಬೆ ಕೋಸ್ಟಲ್ ಹೋಮ್ ದ ಸಂದೇಶ್ ರೈ, ಪುತ್ತೂರು ಮಾಯಿದೆ ದೇವುಸ್ ಅನುದಾನಿತ ಶಾಲೆದ ಮುಖ್ಯೋಪಾಧ್ಯಾಯೆರ್ ಜಾನೆಟ್ ಡಿಸೋಜ, ಸಂತ ವಿಕ್ಟರ್ ಆಂಗ್ಲ ಮಾಧ್ಯಮ ಶಾಲೆದ ಹ್ಯಾರಿ ಡಿಸೋಜ ಪಾಲ್ ಪಡೆದಿತ್ತೆರ್.

ಶಿಕ್ಷಕೆರ್ ಬಾಲಕೃಷ್ಣ ಪೋರ್ದಲ್, ಚಿಂತಾಮಣಿ ಡಾನ್ಸ್ ಗ್ರೂಪ್ ದ ಮಹೇಶ್ ಕುಲಾಲ್, ಝೀ ಕನ್ನಡ ಡ್ರಾಮಾ ಜೂನಿಯರ್ ದ ರಿಷಿತ್ ರಾಜ್ ವಿಟ್ಲ, ಯಕ್ಷಗಾನ ಬಾಲ ಪ್ರತಿಭೆ ಆದ್ದೈತ್ ಯು ಕುಳಾಯಿಗ್ ಸನ್ಮಾನ ನಡತ್ಂಡ್.

ರೇಡಿಯೊ ಮಣಿಪಾಲಡ್ ‘ಸಂಗೀತ ಪಾಠ’ ಸರಣಿ ಲೇಸ್

ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪಾದ್ ಕೊರ್ಪುನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 55ನೇ ಸಂಚಿಕೆ ಎ.12 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಂಡ್.

ಈ ಲೇಸ್ ಡ್ ವಿದ್ಯಾರ್ಥಿನಿಯಾದ್ ಬೇಬಿ ಅನಘ ಪಾಲ್ ಪಡೆಯೆರ್. ಎ.13 ಸನಿಯಾರ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು‌.

ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಬ್ಯಾಂಕ್ ಆಫ್ ಬರೋಡಾ ಜಿಎಮ್ ಗಾಯತ್ರಿ ಆರ್. ವರ್ಗಾವಣೆ; ಆಟ ಕೂಟ ಟ್ರಸ್ಟ್ ರ್ದ್ ಬೀಳ್ಕೊಡುಗೆ

ಕುಡ್ಲದ ಬ್ಯಾಂಕ್ ಆಫ್ ಬರೋಡಡ್ ಜನರಲ್ ಮ್ಯಾನೆಜರಾದ್ ಬೊಕ್ಕ ಝೋನಲ್ ಹೆಡ್ ಆದ್ ಕೆಲಸ ಮಲ್ತಿನ ಗಾಯತ್ರಿ ಆರ್ ಮೇರ್ ಬೊಂಬೈಗ್ ವರ್ಗಾವಣೆ ಆತೆರ್.

ಕರಿನ ಮೂಜರೆ ವರ್ಷೊದಿಂಚ ಕುಡ್ಲಡ್ ವಾಸ ಇತ್ತಿನ ಗಾಯತ್ರಿ ಆರ್ ಮೇರ್ ಕುಡ್ಲಡ್ ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಚಟುವಟಿಕೆಡ್ ಇತ್ತ್ ದ್ ಕುಡ್ಲದ ಜನಕ್ಲೆನ ಪ್ರೀತಿ ಪಡೆತೆರ್.

ಕೈತಲ್ ಡೇ ನಡತೊಂದು ಇತ್ತಿನ ಸಾಂಸ್ಕೃತಿಕ ಲೇಸ್ ಲೆಗ್ ಪ್ರೋತ್ಸಾಹ ಕೊರೊಂದು ಲೇಸ್ ಡ್ ಪಾಲ್ ಪಡೆವೊಂದಿತ್ತಿನ ಗಾಯತ್ರಿ ಆರ್ ಮೇರ್ ಕೈತಲ್ ದಾರೇ ಆದ್ ಪೋತೆರ್. ಇಂಚಾದ್ ಸುಮಾರ್ ಅಭಿಮಾನಿಲೆನ್ ಪಡೆವೊಂದು ಉತ್ತಮ ಸ್ನೇಹ ಜೀವಿಯಾದ್ ಅವ್ವೆ ರೀತಿ ಬ್ಯಾಂಕ್‌ ದ ಉತ್ತಮ ಅಧಿಕಾರಿಯಾದ್ ಗಮನ ಸೆಳೆತೆರ್.

ಅಂಚಾದ್ ಮೇರ್ ವರ್ಗಾವಣೆ ಆದ್ ಪೋನಗ ಮೆರೆಗ್ ಅಭಿಮಾನಿ ಬಳಗ ಬೀಳ್ಕೊಡುಗೆ ಮಲ್ದೆರ್. ಅತ್ತಂದೆ ನಮ್ಮೂರ ಆಟ ಕೂಟ ಟ್ರಸ್ಟ್ ದ ಮುತಾಲಿಕೆಡ್ ಮೆರೆಗ್ ಬೀಳ್ಕೊಡುಗೆ ಸಮಾರಂಭ ಮಲ್ತ್ ದ್ ನೆಂಪುದ ಕಾಣಿಕೆ ಕೊರ್ದು ಮಾನಾದಿಗೆ ಮಲ್ತೆರ್.

ನವನೀತ ಶೆಟ್ಟಿ ಪಾತೆರ್ದ್, ಗಾಯತ್ರಿ ಆರ್ ಮೇರ್ ಬೊಂಬೈಗ್ ವರ್ಗಾವಣೆಯಾದ್ ಪೋವೊಂದು ಇತ್ತ್ಂಡಲ ಆರ್ ಏಪಲ ಎಕ್ಲೆನೊಟ್ಟಿಗೆ ಉಲ್ಲೆರ್ ಪಂದ್ ಪಂಡೆರ್. ಗಾಯತ್ರಿ ಮೇರ್ ಪ್ರಮೋಷನ್ ಪಡೆದ್ ಕುಡ ಕುಡ್ಲಗ್ ಬರ್ಪುಲೆಕ್ಕ ಆವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ಈ ಪೊರ್ತುಡು ನಮ್ಮೂರ ಆಟ ಕೂಟ ಟ್ರಸ್ಟ್‌ ದ ಪ್ರಮುಖೆರ್ ಎಂ ಗಣೇಶ್ ಮಲ್ಲಿ, ರಾಜ್ ಗೋಪಾಲ್ ರೈ, ಬೋಳಾರ ತಾರನಾಥ ಶೆಟ್ಟಿ, ಮುಲ್ಕಿ ಕರುಣಾಕರ ಶೆಟ್ಟಿ ಬೊಕ್ಕ ವಿಜಯಲಕ್ಷ್ಮಿ ಬಿ. ಶೆಟ್ಟಿ ಪಾಲ್ ಪಡೆದಿತ್ತೆರ್.

ಪುತ್ತೂರು ಶ್ರೀ‌ ಮಹಾಲಿಂಗೇಶ್ವರ ದೇವಸ್ಥಾನಡ್ ಕೊಡಿ ಏರ್ಂಡ್

ಪುತ್ತೂರು: ಪುಗರ್ತೆದ ಮಹತೋಭಾರ ಶ್ರೀ‌ ಮಹಾಲಿಂಗೇಶ್ವರ ದೇವಸ್ಥಾನಡ್ ವರ್ಷಾವಧಿ ಜಾತ್ರೆದ ಲೆಕ್ಕೊಡು (ಎ‌.10) ಇನಿ ಕೊಡಿ ಏರ್ಂಡ್.

ಈ ಪೊರ್ತುಡು ದೇವಸ್ಥಾನದಕುಲು ಬೊಕ್ಕ ಭಕ್ತೆರ್ ಪಾಲ್ ಪಡೆದಿತ್ತೆರ್.