ಡಿ.24 ಕ್ಕ್ ಮುಲ್ಕಿ ಅರಸು ಕಂಬುಲಗ್ ಮೈಸೂರು ಅರಸೆರ್ ಬರ್ಪಿನೆತ್ತ ಅಟ್ಟಣೆದ ಸಭೆ
ಪಡುಪಣಂಬೂರು : ಮುಲ್ಕಿ ಕಂಬುಲಗ್ ಮೈಸೂರು ಅರಸೆರ್ ಯದುವೀರ ಕೃಷ್ಣರಾಜ ಒಡೆಯೆರ್ ಮೆರೆನ್ ರಾಜ ವಂಶಸ್ಥೆರೆನ ಶಿಷ್ಟಾಚಾರದಂಚೆನೆ ಎದ್ಕೊಂದು ಗೌರವ ಮಲ್ಪುನ ಕಾರ್ಯಕ್ರಮ ನಡಪರೆ ಉಂಡು ಪಂದ್ ಮುಲ್ಕಿ ಸೀಮೆದ ಅರಸೆರ್ ದುಗ್ಗಣ್ಣ ಸಾವಂತೆರ್ ತೆರಿಪಾಯೆರ್.
ಆರ್ ಡಿ.24 ಕ್ಕ್ ನಡಪುನ ಮುಲ್ಕಿ ಅರಸು ಕಂಬುಲಗ್ ಮಲ್ಲ ಬಿನ್ನೆರಾದ್ ಮೈಸೂರು ಅರಸೆರ್ ಯದುವೀರ ಕೃಷ್ಣರಾಜ ಒಡೆಯರ್ ಬರ್ಪಿನ ನಿಲೆಟ್ಟ್ ಅರಮನೆತ್ತ ಚಾವಡಿಡ್ ಗುರುವಾರ ನಡತಿನ ಅಟ್ಟಣೆದ ಸಭೆಟ್ಟ್ ಪಾತೆರಿಯೆರ್.
ಡಿ. 24 ಕ್ಕ್ ಕಾಂಡೆ ಒಡೆಯರ್ ಮೆರೆನ್ ಪೂರ್ಣಕುಂಭ ಸ್ವಾಗತ, ಚೆಂಡೆ, ವಾದ್ಯ, ಕೊಂಬು ಇಂಚ ಬೇತೆ ಬೇತೆ ಬಿರ್ದಾವಳಿಡ್ ಮೆರವಣಿಗೆಡ್ ಲೆತೊಂದು ಬತ್ತ್ ದ್ ಶ್ರೀ ಚಂದ್ರನಾಥ ಸ್ವಾಮಿನ ದರ್ಶನ ಮಲ್ಪಾದ್ ಅರಮನೆಟ್ಟ್ ಆತಿಥ್ಯ ಮಲ್ಪಾದ್ ಬೊಕ್ಕ ಕಂಬುಲದ ವೇದಿಕೆಡ್ ಕಾರ್ಯಕ್ರಮ ಮಲ್ಪುನ ಆಲೋಚನೆ ಉಂಡು ಪಂಡೆರ್.
ಒಂಜಿ ಕಾಲೊಡು ಮೈಸೂರು ಅರಸೆರ್ ನಾಲ್ವಡಿ ಕೃಷ್ಣರಾಜ ಒಡೆಯರ್ ಮುಲ್ಕಿ ಕಂಬುಲೊಗು ಬತ್ತಿತ್ತೆರ್. ಆ ಒಂಜಿ ನಿಲೆಟ್ಟ್ ಇತ್ತೆದ ಒಡೆಯರ್ ನ ಮುಲ್ಕಿ ಭೇಟಿಗ್ ಭಾರಿ ಮಹತ್ವ ಉಂಡು. ಕಂಬುಲೊಗುಲ ಮೈಸೂರು ಅರಸು ಮನೆತನೊಗ್ಲ ಆ ಒಂಜಿ ಸಂಬಂಧ ಇತ್ತಿನೆರ್ದಾವರ ಬೆಂಗಳೂರುದ ಅರಮನೆ ಮೈದಾನೊಡು ಕಂಬುಲ ನಡಪರೆ ರಾಜವಂಶಸ್ಥೆರ್ನ ಅನುಮತಿ ತಿಕ್ ದ್ಂಡ್ ಪನಿಯರೆ ಪೆರ್ಮೆ ಆಪುಂಡು. ಅಂಚೆನೆ ಮುಲ್ಕಿಗ್ ಬನ್ನಗ ಒಡೆಯರ್ ಮೆರೆನ ಅನುಮತಿ ದೆತೊಂದು ಸೀಮೆದ ದೇವೆರಾಯಿನ ಪಾವಂಜೆ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನ ಬೊಕ್ಕ ಮಾಗಣೆದ ಒಡತಿ ಬಪ್ಪನಾಡು ದುರ್ಗಾಪರಮೇಶ್ವರಿ ದೇವಸ್ಥಾನಗ್ ಭೇಟಿ ಕೊರಿಯರೆ ಒಡೆಯರ್ ಗ್ ವಿನಂತಿ ಮಲ್ಪುವ. ಅರೆನ ಅನುಮತಿ ತಿಕ್ಕುನ ನಿರೀಕ್ಷೆ ಉಂಡು ಪಂಡೆರ್.
ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ರ್ ಪಾತೆರ್ದ್, ಮೈಸೂರುದ ಅರಸುಲು ಮುಲ್ಕಿ ಸೀಮೆಗ್ ಬರ್ಪಿನಿ ಪಂಡ ನಮಕ್ಕ್ ಮಾತೆರೆಗ್ಲ ಭಾರಿ ಸಂಭ್ರಮ. ಅರೆನ್ ಶಿಸ್ತುಬದ್ಧವಾದ್ ಭಾರಿ ಗೌರವೊಡು ಎದ್ಕೊಂದು ಮಾನಾದಿಗೆ ಮಲ್ಪೊಡು ಪಂದ್ ಪಂಡೆರ್.
ಮುಲ್ಕಿ ಅರಸು ಕಂಬುಲ ಸಮಿತಿದ ಅಧ್ಯಕ್ಷೆರ್ ಕಿರಣ್ ಶೆಟ್ಟಿ ಕೊಲ್ನಾಡುಗುತ್ತು ಮೇರ್ ಪಾತೆರ್ದ್, ಮೈಸೂರು ಅರಸೆರ್ನ ಶಿಷ್ಟಾಚಾರಗ್ ಧಕ್ಕೆ ಬರಂದಿಲೆಕ ವ್ಯವಸ್ಥೆ ಮಲ್ಪರೆ ಮಾತೆರ್ನಲ ಸಹಕಾರ ಬೋಡು ಪಂದ್ ಪಂಡೆರ್.
ಮಲ್ಲ ಬಿನ್ನೆರಾದ್ ಪೊಯ್ಯೆದ ಗುಡ್ಡೆ ಶ್ರೀ ಉಮಾ ಮಹೇಶ್ವರ ಕ್ಷೇತ್ರದ ರಾಮ ಭಟ್, ಗೌರಿಶಂಕರ ಮಹಾಗಣಪತಿ ದೇವಸ್ಥಾನದ ಅರ್ಚಕೆರ್ ಶ್ರೀಕಾಂತ್ ಭಟ್, ಉಳೆಪಾಡಿ ಉಮಾಮಹೇಶ್ವರಿ ದೇವಸ್ಥಾನದ ಮೋಹನ್ ದಾಸ್ ಸುರತ್ಕಲ್, ಕಲ್ಲಾಪು ದೇವಸ್ಥಾನದ ಕಾಂತು ಗುರ್ಕಾರೆ, ಪ್ರಿಯದರ್ಶಿನಿ ಸಹಕಾರಿ ಸಂಘದ ದ ಅಧ್ಯಕ್ಷೆರ್ ವಸಂತ ಬೆರ್ನಾಡ್, ಮುಲ್ಕಿ ಅರಮನೆತ್ತ ಗೌತಮ್ ಜೈನ್, ಮುಲ್ಕಿ ಠಾಣೆದ ಎಎಸ್ ಐ ಮಾರುತಿ, ಟ್ರಾಫಿಕ್ ಪೊಲೀಸ್ ವಿಭಾಗದ ಸುಂದರ್ ರಾಜ್ ಮಿತ್ತರ್ಮೆಡ್ ಇತ್ತೆರ್.
ಸಭಿಕೆರ್ನ ನೆಲೆಟ್ಟ್ ಸುನಿಲ್ ಆಳ್ವ, ಚಂದ್ರಶೇಖರ ಸುವರ್ಣ, ಡಾ. ಹರಿಶ್ಚಂದ್ರ ಸಾಲ್ಯಾನ್ ಪಾತೆರಿಯೆರ್.
ಹಳೆಯಂಗಡಿ ವಿದ್ಯಾವಿನಾಯಕ ಮಹಿಳಾ ಮಂಡಲ, ಸ್ವಸಹಾಯ ಸಂಘ ಬೊಕ್ಕ ಬೇತೆ ಬೇತೆ ಸಂಘ ಸಂಸ್ಥೆಲೆನ ಸದಸ್ಯೆರ್ ಪಾಲ್ ಪಡೆದಿತ್ತೆರ್.
ವಿನೋದ್ ಕುಮಾರ್ ಸಾಲ್ಯಾನ್ ಸ್ವಾಗತ ಮಲ್ತೆರ್.
ಮೈಸೂರು ಅರಸೆರ್ನ ಶಿಷ್ಟಾಚಾರ ದಾದ ?
ಮುಲ್ಕಿ ಕಂಬುಲೊಗು ಮೈಸೂರು ಅರಸೆರ್ ಯದುವೀರ ಕೃಷ್ಣರಾಜ ಒಡೆಯರ್ ಮೇರ್ ಬರೊಡುಂದಾಂಡ ಅಯಿಕ್ಕ್ ಪ್ರತ್ಯೇಕ ವಾಯಿನ ಶಿಷ್ಟಾಚಾರ ಉಂಡು. ರಾಜವಂಶಸ್ಥೆರ್ನ ಘನತೆಗ್ ಸರಿಯಾದ್ ಕಾರ್ಯಕ್ರಮ ಅಟ್ಟಣೆ ಆವೊಡು. ಒಂತೆಲ ಲೋಪ ಆವರೆ ಬಲ್ಲಿ. ಅಯಿಟ್ಟ್ ರಾಜಕೀಯ ಬೆರೆಸರೆ ಬಲ್ಲಿ ಪಂದ್ ಬೆದ್ರದ ಎಕ್ಸಲೆಂಟ್ ಕಾಲೇಜಿದ ಮುಖ್ಯಸ್ಥೆರ್ ಯುವರಾಜ್ ಜೈನ್ ತೆರಿಪಾಯೆರ್.
ಅರೆನ್ ರಾಜ ಮರ್ಯಾದಿಡ್ ಲೆತೊಂದು ಬರ್ಪಿನ ಕ್ರಮ ಉಂಡು. ಪೂ ಅರ್ಪಣೆ, ಫಲವಸ್ತು, ನವಧಾನ್ಯ ಕಾಣಿಕೆ ಕೊರ್ಪಿನ ಕ್ರಮ ಉಂಡು. ನವಧಾನ್ಯದ ಭಕ್ಷ್ಯ ಅರ್ಪಣೆ ಮಲ್ಪುನ ಕ್ರಮ ಉಂಡು. ರಾಜಕೀಯದ ವ್ಯಕ್ತಿಲೆನ್ ಈ ಕಾರ್ಯಕ್ರಮ ಟ್ಟ್ ಪಾಲ್ ಪಡೆವರೆ ಅವಕಾಶ ಇಜ್ಜಿ. ಅರಸೆರ್ನ ಶಿಷ್ಟಾಚಾರೊಡ್ಲ ಬೇತೆ ಬಿನ್ನೆರ್ನ ಉಪಚಾರೊಡು ಮಸ್ತ್ ವ್ಯತ್ಯಾಸ ಉಂಡು. ಅವೆನ್ ಮಾತ ಪಾಲನೆ ಮಲ್ಪೊಡು ಪಂದ್ ಆರ್ ಪಂಡೆರ್.
