December 28, 2023

ವಿಧಾನಸೌಧಡ್ ತುಳುಕೂಟದ ಕ್ಯಾಲೆಂಡರ್ ಬುಡುಗಡೆ ಮಲ್ತಿನ ಶಾಸಕೆರ್ ಅಶೋಕ್ ಕುಮಾರ್ ರೈ

ವಿಧಾನಸೌಧಡ್ ನಡತಿನ ತುಳುಕೂಟದ 50ನೇ ವರ್ಷದ ಗೌಜಿಡ್ ಪುತ್ತೂರು ಶಾಸಕೆರ್ ಅಶೋಕ್ ಕುಮಾರ್ ರೈ ಇನಿ ಕ್ಯಾಲೆಂಡರ್ ಬುಡುಗಡೆ ಮಲ್ತೆರ್.

ತುಳುಕೂಟ ಗುರ್ಕಾರೆ ಸುಂದರ್ ರಾಜ್ ರೈ, ಮಾಜಿ ಗುರ್ಕಾರೆ ಕೆಸಿ ಬಳ್ಳಾಲ್, ಶ್ರೀ ಪ್ರೇಮ್ ಪ್ರಸಾದ್ ಅಡ್ಯಂತಾಯ, ರಾಜ್ ರಾಮ್ ಶೆಟ್ಟಿ ಉಪ್ಪಳ, ಸೃಷ್ಟಿ ಕಲಾ ರಂಗಭೂಮಿದ ಮಂಜುನಾಥ್ ಅಡ್ಪೆರ್, ದ.ಕ ವಿಶ್ವ ಬ್ರಾಹ್ಮಣ ಸಂಘದ ಪ್ರಶಾಂತ್ ಕುಮಾರ್ ಜಿ, ಯಕ್ಷಮಿತ್ರೆರ್ ನಾಗರಾಜ ಆಚಾರ್ಯ, ಮುರಳೀಧರ್ ರೈ, ಜಯರಾಜ್ ಅರಿಗ, ನವೀನಾ ಶೆಟ್ಟಿ, ಸುಧಾ ಪುತ್ತರಾಯ, ತುಳುಕೂಟದ ಸದಸ್ಯೆರ್ ಪಾಲ್ ಪಡೆದಿತ್ತೆರ್.

ಕಡಂದಲೆ ಹಾಲು ಉತ್ಪಾದಕರ ಸಹಕಾರ ಸಂಘದ ಗುರ್ಕಾರೆಯಾದ್ ಸುಚರಿತ್ ಶೆಟ್ಟಿ ಕುಡೊರ ಆಯ್ಕೆ

ಕಡಂದಲೆ ಹಾಲು ಉತ್ಪಾದಕರ ಸಹಕಾರಿ ಸಂಘ (ನಿ.) ದ ನನದ 5 ವರ್ಷದ ಆಡಳಿತ ನಿರ್ದೇಶಕೆರೆನ ಮಂಡಳಿದ ತಾನಗ್ ಡಿ.23 ಕ್ಕ್ ನಡತಿನ ವೋಟುಡು ನೆರ್ದ್ ದುಂಬುದ ಮಾತಾ ನಿರ್ದೇಶಕೆರ್ ಆವಿರೋಧವಾದ್ ಆಯ್ಕೆ ಆತೆರ್.

ಗುರ್ಕಾರೆಯಾದ್ ದ.ಕ. ಹಾಲು ಉತ್ಪಾದಕರ ಸಹಕಾರಿ ಒಕ್ಕೂಟದ ಗುರ್ಕಾರೆ ಕೆ.ಪಿ. ಸುಚರಿತ್ ಶೆಟ್ಟಿ ಬೊಕ್ಕ ಒತ್ತು ಗುರ್ಕಾರೆಯಾದ್ ಕೆ. ಪಾಂಡುರಂಗ ಶೆಟ್ಟಿ ಕುಡೊರ ಆಯ್ಕೆ ಆತೆರ್. ಮೊಕುಲು 5 ನೇ ಸರ್ತಿ ಆಯ್ಕೆ ಆತೆರ್. ಅಂಚೆನೆ ನಿರ್ದೇಶಕೆರಾದ್ ಕೆ. ಬಾಬು ಶೆಟ್ಟಿ, ರಮೇಶ ಪೂಜಾರಿ, ವಿಲಿಯಂ ಡಯಾಸ್, ಜಯಂತ ಗೌಡ, ವಿಕ್ಟ‌ರ್ ಡಿ’ಸೋಜಾ, ಜಯಂತಿ, ಟಾಕು ಹರಿಜನ, ನಾರಾಯಣ ಮಡಿವಾಳ, ಚಂದ್ರಶೇಖರ ತಿಮ್ಮಯ್ಯ ಶೆಟ್ಟಿ ಗೀತಾ ಯಾನೆ ಗಾಯತ್ರಿ ಭಟ್, ಅಮಿತಾ ಶೆಟ್ಟಿ ಇಂಚ 13 ಜನ ಕುಡೊರ ಆಯ್ಕೆ ಆತೆರ್.

ಎಕ್ಕಾರ್ ಶ್ರೀ ಕೊಡಮಂದಾಯ ದೈವೊಲ್ಯಡ್ ನೇಮೋಚ್ಚಯ

ಬಜಪೆ: ಎಕ್ಕಾರು ಶ್ರೀ ಕೊಡಮಂದಾಯ ದೈವೊಲ್ಯಡ್ ವರ್ಷಾವಧಿ ಜಾತ್ರೆದ ಲೆಕ್ಕೊಡು ಡಿ.25 ಸೋಮಾರ ರಾತ್ರೆ ಶ್ರೀ ಕೊಡಮಂದಾಯ ದೈವೊದ ನೇಮ ನಡತ್ಂಡ್.

ಈ ಪೊರ್ತುಡು ದೈವೊಲ್ಯದ ಆಡಳಿತ ಮೊಕ್ತೇಸರೆರ್ ತಿಮ್ಮ ಕಾವ (ನಿತಿನ್ ಹೆಗ್ಡೆ ಕಾವರ ಮನೆ), ಮೊಕ್ತೇಸರೆರ್ ಎಕ್ಕಾರು ಶ್ರೀ ಗೋಪಾಲಕೃಷ್ಣ ಮಠತ್ತ ವೇ।ಮೂ। ಹರಿದಾಸ ಉಡುಪ, ಭಾಸ್ಕರ ಮುದ್ದ ನದ್ದೋಡಿಗುತ್ತು, ರತ್ನಾಕರ ಶೆಟ್ಟಿ ಬಡಕರೆ ಬಾಳಿಕೆ, ರಮೇಶ್ ಭಂಡಾರಿ ಮಿತ್ತೊಟ್ಟು ಬಾಳಿಕೆ ಪಾಲ್ ಪಡೆದಿತ್ತೆರ್.

ಡಿ.28: ಉದ್ಯಾರ ಬಲಯಿಪಾದೆ ಯುವವಾಹಿನಿ ಸಭಾಭವನಡ್ ಬಲೆ ತುಲು ಲಿಪಿ ಕಲ್ಪುಗ ಲೇಸ್ ಉದಿಪನ

ಒಡಿಪು: ಯುವವಾಹಿನಿ (ರಿ.) ಒಡಿಪು ಘಟಕ ಬೊಕ್ಕ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಜೈ ತುಲುನಾಡ್ (ರಿ.) ದ ಒಟ್ಟುಸೇರಿಗೆಡ್ ಡಿ.28 ಗುರುವಾರ ಉದ್ಯಾವರದ ಬಲಯಿಪಾದೆ ಯುವವಾಹಿನಿ ಸಭಾಭವನಡ್ ಬಲೆ ತುಲು ಲಿಪಿ ಕಲ್ಪುಗ ಲೇಸ್ ದ ಉದಿಪನ ನಡಪರೆ ಉಂಡು.

ಈ ಲೇಸ್ ಡ್ ತುಲು ಲಿಪಿ ಶಿಕ್ಷಕೆರ್ ಸಂತೋಷ್ ಕಟಪಾಡಿ, ಸುಶೀಲ ಕೊಡವೂರು, ಪ್ರಜ್ಞಾಶ್ರೀ ಎಂ ಪಾಲ್ ಪಡೆಯೆರೆ ಉಲ್ಲೆರ್.

ರೇಡಿಯೊ ಮಣಿಪಾಲಡ್ ಬನ್ನಂಜೆ ಬತ್ತೆರ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ತುಳು ಸರಣಿ ಲೇಸ್ ಡಿ.28 ಗುರುವಾರ ಬಯ್ಯಗ್ 5‌ ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾತೆರಿಯೆರೆ ಉಲ್ಲೆರ್. ಡಿ.29 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಕೊರೊನಾ ಸೀಕ್ ಡ್ ದೇವೆರೆ ಪಾದೊ ಸೇರಿಯೆರ್ ತಮಿಳು ನಟೆ ವಿಜಯಕಾಂತ್

ತಮಿಳ್ ಚಿತ್ರರಂಗದ ಹಿರಿಯ ನಟೆ, ಡಿಎಂಡಿಕೆ ಪಕ್ಷದ ಮುಖ್ಯಸ್ಥೆರ್ ವಿಜಯಕಾಂತ್ (71) ದೇವೆರೆ ಪಾದೊ ಸೇರಿಯೆರ್.

ಆರೋಗ್ಯ ಸಮಸ್ಯೆ ಬೊಕ್ಕ ಕೊರೊನಾ ಸೀಕ್ ರ್ದ್ ಚೆನ್ನೈ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಇತ್ತಿನ ಮೇರ್ ಗುರುವಾರ ತೀರ್ ಪೋಯೆರ್.

ವಿಜಯಕಾಂತ್ ಮೇರ್ 25 ಆಗಸ್ಟ್‌ 1952 ಕ್ಕ್ ಅಪಗದ ಮದ್ರಾಸ್ ಡ್ ಪುಟ್ಟಿಯೆರ್. 1990 ಟ್ಟ್ ಪ್ರೇಮಲತಾ ಮೆರೆನ್ ಮದಿಮೆ ಆತೆರ್. ಸಿನಿಮಾ ನಟೆಯಾದ್, ನಿರ್ಮಾಪಕೆಯಾದ್ ಇತ್ತಿನ ಮೇರ್ ರಾಜಕೀಯಡ್ಲಾ ಬೇಲೆ ಮಲ್ದೆರ್.

ತುಳುನಾಡ ಐತಿಹಾಸಿಕ ಪಟ್ಟದ ಬಂಕಿ ನಾಯ್ಗೆರೆಗ್ ಮಾನಾದಿಗೆ

ಮುಲ್ಕಿ: ತುಳುನಾಡ್ ದ ಪ್ರತಿಷ್ಠಿತ ಐತಿಹಾಸಿಕ ಪಟ್ಟ ಪಡೆದಿನ, ಧಾರ್ಮಿಕ ಕ್ಷೇತ್ರದ ಮಲ್ಲ ಸಾಧಕೆರ್, ಹಳೆಯಂಗಡಿ ಗರಡಿದ ಬಂಕಿ ನಾಯ್ಕೆರ್ ಮೆರೆಗ್ ಗುರುವಾರ ಹೊಸ ಅಂಗಣ ಪತ್ರಿಕೆದ ತಿಂಗಳ ಬೆಳಕು ಲೇಸ್ ಡ್ ಮಾನಾದಿಗೆ ನಡತ್ಂಡ್.

ಧರ್ಮದರ್ಶಿ ಹರಿಕೃಷ್ಣ ಪುನರೂರು ಲೇಸ್ ದ ಗುರ್ಕಾರ್ಮೆ ಒಯಿಸ್ ದಿತ್ತೆರ್.

ಮಲ್ಲ ಬಿನ್ನೆರಾದ್ ಎಲ್ ಐಸಿ ಅಧಿಕಾರಿ ಕೆ.ಪ್ರಕಾಶ್,
ಮಯೂರಿ ಪ್ರತಿಷ್ಠಾನದ ಜಯ ಕೆ. ಶೆಟ್ಟಿ, ಮೊಗವೀರ ಪತ್ರಿಕೆ ಸಂಪಾದಕೆರ್ ಅಶೋಕ್ ಸುವರ್ಣ, ಮುಲ್ಕಿ ಬಿಲ್ಲವ ಸಂಘದ ಮಾಜಿ ಅಧ್ಯಕ್ಷೆರ್ ಗೋಪಿನಾಥ ಪಡಂಗ, ಬಪ್ಪನಾಡು ಲಯನ್ಸ್ ಇನ್ ಸ್ಫೈರ್ ದ ವೆಂಕಟೇಶ್ ಹೆಬ್ಬಾರ್ ಇತ್ತೆರ್.

ಹೊಸ ಅಂಗಣ ಸಂಪಾದಕೆರ್ ಡಾ. ಹರಿಶ್ಚಂದ್ರ ಸಾಲ್ಯಾನ್ ಬಿನ್ನೆರೆನ್ ಸ್ವಾಗತ ಮಲ್ತೆರ್. ಚಿತ್ರಾಪು ವಾಸು ಪೂಜಾರಿ ಪ್ರಾರ್ಥನೆ ಮಲ್ತೆರ್. ವಿಜಯಕುಮಾರ್ ಕುಬೆವೂರು ಸನ್ಮಾನ ಪತ್ರ ಓದಿಯೆರ್. ದಿನೇಶ್ ಕೊಲ್ನಾಡು ಸೊಲ್ಮೆ ಸಂದಾಯೆರ್. ವೈ.ಎನ್.ಸಾಲ್ಯಾನ್ ನಿರೂಪಣೆ ಮಲ್ತೆರ್.

ಜ.6: ಸಾಕೇತನಗರ ಶ್ರೀರಾಮ ಭಜನಾ ಮಂದಿರಡ್ ಸಾಮೂಹಿಕ ಶನೀಶ್ವರ ಪೂಜೆ

ಬಂಟ್ವಾಳ: ಕೆದಿಲ ಗ್ರಾಮದ ಸಾಕೇತನಗರ ಶ್ರೀರಾಮ ಭಜನಾ ಮಂದಿರಡ್ ಜ.6 ಸನಿಯಾರ 32 ನೇ ವರ್ಷದ ವಾರ್ಷಿಕೋತ್ಸವ, ಏಕಾಹ ಭಜನೆ ಬೊಕ್ಕ ಸಾಮೂಹಿಕ ಶನೀಶ್ವರ ಪೂಜೆ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಸಾಕೇತನಗರ ಶ್ರೀರಾಮ ಭಜನಾ ಮಂಡಳಿದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಡಿ.31: ಕರಿಮಜಲು ಶ್ರೀ ಕೃಷ್ಣ ಭಜನಾ ಮಂದಿರಡ್ ಸಾಮೂಹಿಕ ಸತ್ಯನಾರಾಯಣ ಪೂಜೆ

ಕೆದಿಲ: ಕರಿಮಜಲು ಶ್ರೀ ಕೃಷ್ಣ ಭಜನಾ ಮಂದಿರಡ್ ಡಿ.31 ಐತಾರ ಏಕಾಹ ಭಜನಾ ಸಂಕೀರ್ತನೆ, 18 ನೇ ವರ್ಷದ ಸಾಮೂಹಿಕ ಸತ್ಯನಾರಾಯಣ ಪೂಜೆ ಬೊಕ್ಕ ಧಾರ್ಮಿಕ ಸಭಾ ಲೇಸ್ ನಡಪರೆ ಉಂಡು.

ಆನಿ ಬೊಲ್ಪುಗು ಗಣಹೋಮ, ಭಜನೆ, ಬಯ್ಯಗ್ ಮಂಗಳ, ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ, ರಾತ್ರೆ ಸಭಾ ಲೇಸ್, ಸಾರ್ವಜನಿಕ ಅನ್ನ ಪ್ರಸಾದ ಸೇವೆ ಬೊಕ್ಕ ಶ್ರೀ ಕೃಷ್ಣ ಕಲಾವೃಂದ ಕರಿಮಜಲು ಮೊಕ್ಲೆರ್ದ್ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಕರಿಮಜಲು ಶ್ರೀ ಕೃಷ್ಣ ಭಜನಾ ಮಂಡಳಿ (ರಿ.) ದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಧರ್ಮ ಬೊಕ್ಕ ಶಿಕ್ಷಣಡ್ ರಾಜಕೀಯ ಸೇರ್ಂಡ ಸಂಸ್ಕೃತಿ ನಾಶ ಆಪುಂಡು: ಡಾ.ಗಣೇಶ ಅಮೀನ್ ಸಂಕಮಾರ್

ಮುಲ್ಕಿ ತಾಲೂಕು ಕನ್ನಡ ಸಾಹಿತ್ಯ ಸಮ್ಮೇಳನಡ್ ಸಮ್ಮೇಳನಾಧ್ಯಕ್ಷೆರ್ನ ಮದಿಪು

ಮುಲ್ಕಿ : ಧರ್ಮ ಬೊಕ್ಕ ಶಿಕ್ಷಣಡ್ ರಾಜಕೀಯ ಸೇರ್ರೆ ಬಲ್ಲಿ. ಅವು ಸೇರ್ಂಡ ಸಂಸ್ಕೃತಿ ಸೈಪುಂಡು ಪಂದ್ ಮುಲ್ಕಿ ತಾಲೂಕು ಸಾಹಿತ್ಯ ಸಮ್ಮೇಳನಾಧ್ಯಕ್ಷೆರ್ ಡಾ.ಗಣೇಶ ಅಮೀನ್ ಸಂಕಮಾರ್ ಎಚ್ಚೆರ್ಗೆ ಕೊರಿಯೆರ್.

ಆರ್ ಮುಲ್ಕಿ ತಾಲೂಕು ಕನ್ನಡ ಸಾಹಿತ್ಯ ಸಮ್ಮೇಳನದ ಉದಿಪನದ ಲೇಸ್ ಡ್ ಸಮ್ಮೇಳನಾಧ್ಯಕ್ಷೆರ್ ನ ಭಾಷಣೊಡು ಪಂಡೆರ್.

ದಕ್ಷಿಣ ಕನ್ನಡ ಜಿಲ್ಲೆಡ್ ಉಪ್ಪುನ ಜಾತಿ ಸಂಘಟನೆಲೆನ ಅತಿಯಾಯಿನ ಮೋಹ ಬಹುಸಂಸ್ಕೃತಿದ ಸಮಾಜದ ವಿಕೃತಿಗ್ ಕಾರಣ ಆವೊಂದುಂಡು. ಇತ್ತೆದ ರಾಜಕೀಯೊಡು ಬ್ರಿಟಿಷೆರೆನ ಒಡೆದು ಆಳುನ ನೀತಿ ಅಪಾಯಕಾರಿ. ಶಿಕ್ಷಣ ಬೊಕ್ಕ ಮಾಧ್ಯಮ ಜಗತ್ತ್ ಉದ್ಯಮ ಆವಂದೆ ಕರ್ತವ್ಯ, ಜಬದಾರಿನ್ ತೆರಿಪಾವುನ ಕೆಲಸ‌ ಮಲ್ಪೊಡು. ಸೋಶಿಯಲ್ ಮೀಡಿಯಾಡ್ ಕನ್ನಡ ಭಾಷೆ ಬೊಕ್ಕ ಸಂಸ್ಕೃತಿನ್ ವಿಕೃತಿ ಮಲ್ಪುನ ವಿರುದ್ಧ ಜಾಗ್ ರ್ತೆಡ್ ಉಪ್ಪೊಡು ಪಂದ್ ಆರ್ ಪಂಡೆರ್.

ಮುಲ್ಕಿ ಪಂಡ ಒಂಜಿ ಕಾಲೊಡು ನೀರ್ ಡ್ ಮುರ್ಕುದು ಲಕ್ ದಿನ ಊರು. ಮರ್ದ್ ದ ದೈಕುಲು ಉಪ್ಪುನ ಮೂಲಿಕಾಪುರ. ಕಡಲ್ ಪಿರ ಜಾರ್ ದ್ ಒರಿದಿನ ಜಾಗೆ ಗಜನಿ . ಶಾಂಭವಿ ಬೊಕ್ಕ ನಂದಿನಿ ತುದೆಕ್ಲೆನ ನಡುಟ್ಟು ಉಪ್ಪುನ ಈ ಊರುಡು ಮಾರಿ ಕೈಗಾರಿಕೆ ಇಜ್ಜಿ. ಉಂದು 9 ಮಾಗಣೆದ ಸಾಂಸ್ಕೃತಿಕ ಶ್ರೀಮಂತಿಕೆದ ಊರು. ಬಪ್ಪನಾಡ್ ದುರ್ಗಾಪರಮೇಶ್ವರಿ, ಕಟೀಲು ದುರ್ಗೆ, ಶಿಮಂತೂರು ಆದಿ ಜನಾರ್ದನ ದೇವಸ್ಥಾನ, ಪಡುಪಣಂಬೂರು ಅರಮನೆ, ಇಗರ್ಜಿ, ಮಸೀದಿ, ಬಸದಿ ಪುಣ್ಯದ ಮಣ್ಣ್. ತುಳು, ಕೊಂಕಣಿ , ಬ್ಯಾರಿ ಬಾಷೆ ಪಾತೆರುನ ಸರ್ವ ಧರ್ಮ, ಸೌಹಾರ್ದತೆದ ಕೃಷಿ ಸಂಪತ್ತ್ ದ ಪುಣ್ಯ ನೆಲ ಉಂದು. ಅಗೊಳಿ ಮಂಜಣ್ಣೆ, ಕಾಂತಾಬಾರೆ ಬೂದಬಾರೆರ್ ಪುಟ್ಟುದು ಬಲದಿನ ತಾಕತ್ತ್ ದ ನಾಡ್. ಕಟೀಲ್, ಬಪ್ಪನಾಡ್, ಪಾವಂಜೆ, ಸಸಿಹಿತ್ಲು ಸೇರ್ದ್ 9 ಯಕ್ಷಗಾನ ಮೇಳ ಉಂಡು. ಪಾಡ್ದನದ ರಾಮಕ್ಕ, ಸಿಂದು ಗುಜರನ್ ಮೊಕ್ಲೆನ ಜಾನಪದ ಸಾಹಿತ್ಯ, ಅರಸು ಕಂಬುಲ, ಐಕಳ ಕಂಬುಲ ಇಂಚ ದೆತ್ತಿನಾತ್ ಲ ಮುಗಿಯಂದಿನ ಸಾಂಸ್ಕೃತಿಕ, ಜಾನಪದ, ಧಾರ್ಮಿಕ ವೈಭವದ ಈ ನಮ್ಮ ಮುಲ್ಕಿ ತಾಲೂಕುಡು ಪುಟ್ಟಿನನೇ ನಮ್ಮ ಭಾಗ್ಯ ಪಂದ್ ಆರ್ ಪಂಡೆರ್.