ಹನುಮಗಿರಿ ಶ್ರೀ ಪಂಚಮುಖಿ ಆಂಜನೇಯ ಕ್ಷೇತ್ರಡ್ ಡಿ.17 ರ್ದ್ ಜ.14 ಮುಟ್ಟ ಧನುಪೂಜೆ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತಾದಿಲು ಮಾತೆರ್ಲಾ ಪಾಲ್ ಪಡೆದ್ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಹನುಮಗಿರಿ ಧರ್ಮಶ್ರೀ ಪ್ರತಿಷ್ಠಾನ (ರಿ.) ದ ಮಹಾಪೋಷಕೆರ್ ಜಿ.ಕೆ ಮಹಾಬಲೇಶ್ವರ ಭಟ್, ಆಡಳಿತ ಧರ್ಮದರ್ಶಿಲು ನನ್ಯ ಅಚ್ಚುತ ಮೂಡೆತ್ತಾಯ ಲೆಪ್ಪೋಲೆಡ್ ತೆರಿಪಾದೆರ್.
ಬೊಂಬೈ: ಬೆಂಗ್ಲೂರು ಸಿರಿಕಲಾ ಮೇಳ (ರಿ.) ದ ಸುವರ್ಣ ಕರ್ನಾಟಕ ಸಂಭ್ರಮ ಯಕ್ಷೋತ್ಸವದ ನಿಲೆಟ್ಟ್ “ದಕ್ಷಯಜ್ಞ ಮೀನಾಕ್ಷಿ ಕಲ್ಯಾಣ” ಆಟ ಡಿ.14 ಸೋಮಾರ ಬಯ್ಯಗ್ ಬೊಂಬೈದ ಕುರ್ಲಾ ಬಂಟರ ಭವನಡ್ ನಡಪರೆ ಉಂಡು.
ಈ ಲೇಸ್ ನ್ ಬೊಂಬೈದ ತೋನ್ಸೆ ವಿಜಯ್ ಕುಮಾರ್ ಶೆಟ್ಟಿ ಅಭಿಮಾನಿ ಬಳಗ ಆಯೋಜನೆ ಮಲ್ದೆರ್.
ಪುತ್ತೂರು: ಸಂಪ್ಯ ಕೈತಲ್ದ ಕಲ್ಲರ್ಪೆ ನಿವಾಸಿ ಪತ್ರಕರ್ತೆರ್ ಗಣೇಶ್ ಕಲ್ಲರ್ಪೆ ಅರೆನ ಮೆಗ್ಯೆ ಭರತ್ ಕಲ್ಲರ್ಪೆ(24) ಇಲ್ಲದ ಕೈತಲ್ದ ಮರಕ್ಕ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆರ್. ಆತ್ಮಹತ್ಯೆಗೆ ಕಾರಣ ತೆರಿದ್ ಬೈದಿಜಿ. ಹೆಚ್ಚಿನ ಮಾಹಿತಿ ನನ ತೆರಿದ್ ಬರೊಡಾತೆ.
ಶ್ರೀ ಸಾಲಿಗ್ರಾಮ ಮೇಳದಕ್ಲೆರ್ದ್ ಪೊಸ ವರ್ಷಗ್ ಪೊಸ ಪ್ರಸಂಗ ನೀಲ ಗಗನದೊಳು ಜ.1 ಕ್ಕ್ ಸಾಯಿಬ್ರಕಟ್ಟೆಡ್ ನಡಪರೆ ಉಂಡು.
ಕೌಟುಂಬಿಕ ಪ್ರಸಂಗದ ಸರದಾರೆ ನಂದೀಶ್ ಶೆಟ್ಟಿ ಬಿಲ್ಲಾಡಿ ಮೆರೆನ ಉಂದು ಆಜಿನೇ ಪ್ರಸಂಗ ಆತ್ಂಡ್. ನಾಗರಾಜ್ ಶೆಟ್ಟಿ ಕಾಜ್ರಳ್ಳಿ ಸಂಯೋಜನೆ ಮಲ್ದೆರ್.
ಕಡಬ ತಾಲೂಕು ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ವಾರ್ಷಿಕ ಚಂಪಾಷಷ್ಠಿ ಮಹೋತ್ಸವ ಡಿಸೆಂಬರ್ 24 ಮುಟ್ಟ ನಡಪೆರೆ ಉಂಡು. ಡಿಸೆಂಬರ್ 16ರ್ದ್ 19 ಮುಟ್ಟ ಮುಖ್ಯ ರಥೋತ್ಸವ ನಡಪೆರೆ ಉಂಡು.
ಈ ಪೊರ್ತುಡು ಮಸ್ತ್ ಭಕ್ತೆರ್ ಸೇರುನ ನಿರೀಕ್ಷೆ ಉಂಡು. ಅಂಚಾದ್ ಶಾಂತಿ ಸುವ್ಯವಸ್ಥೆ ಕಾಪುನ ಹಿತ ದೃಷ್ಟಿಡ್ ಡಿಸೆಂಬರ್ 17 ತಾನಿ ಕಾಂಡೆ 6 ಗಂಟೆರ್ದ್ ಡಿಸೆಂಬರ್ 18 ಮಧ್ಯರಾತ್ರೆ 12 ಗಂಟೆ ಮುಟ್ಟ ಮದ್ಯದಂಗಡಿ ಮುಚ್ಚುನಂಚ ಜಿಲ್ಲಾಧಿಕಾರಿ ಮುಲ್ಲೈ ಮುಗಿಲನ್ ಎಂ.ಪಿ. ಸೂಚನೆ ಕೊರ್ತೆರ್.
ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ವ್ಯಾಪ್ತಿದ ಇಂಚಾಡಿದ ಕೈತಲ್ ಇಪ್ಪುನ ಪ್ರಶಾಂತ್ ಬಾರ್ ಆಂಡ್ ರೆಸ್ಟೋರೆಂಟ್ ಬೊಕ್ಕ ಬೆಳ್ಳಿ ಬಾರ್ ಆಂಡ್ ರೆಸ್ಟೋರೆಂಟ್ದ ಬೇತೆ ಬೇತೆ ಅಮಲ್ ಪದಾರ್ಥ ಮಾರಾಟ ಮಲ್ಪುನೆನ್ ನಿಷೇಧ ಮಲ್ಪುನಂಚ ಜಿಲ್ಲಾಧಿಕಾರಿ ಆದೇಶ ಕೊರ್ತೆರ್.
ಸುಬ್ರಹ್ಮಣ್ಯ: ಭಾರತೀಯ ಬಾಹ್ಯಾಕಾಶ ಸಂಸ್ಥೆದ ಟೆಲಿಮೆಟ್ರಿ ಟ್ರ್ಯಾಕಿಂಗ್ ಆಂಡ್ ಕಮಾಂಡ್ ನೆಟ್ವರ್ಕ್ ನಿರ್ದೇಶಕೆರ್ ಬಿ.ಎನ್. ರಾಮಕೃಷ್ಣ ಬುಧವಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಕ್ಷೇತ್ರಗ್ ಭೇಟಿ ಕೊರಿಯೆರ್.
ಕ್ಷೇತ್ರಗ್ ಭೇಟಿ ಕೊರ್ನ ಆರ್ ಶ್ರೀ ದೇವೆರ್ನ ದರ್ಶನ ಮಲ್ತ್ ದ್ ಪ್ರಾರ್ಥನೆ ಸಲ್ಲಿಸಾದ್ ಪ್ರಸಾದ ಸ್ವೀಕಾರ ಮಲ್ತೆರ್.
ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಸದಸ್ಯೆರಾಯಿನ ವನಜಾ ವಿ.ಭಟ್, ಶೋಭಾ ಗಿರಿಧರ್, ಕುಮಾರಸ್ವಾಮಿ ವಿದ್ಯಾಸಂಸ್ಥೆದ ಗುರ್ಕಾರ್ಲು ಗಣೇಶ್ ಪ್ರಸಾದ್, ಪ್ರಾಂಶುಪಾಲೆರ್ ಸಂಕೀರ್ತ್ ಹೆಬ್ಬಾರ್, ದೇವಸ್ಥಾನದ ಶಿಷ್ಟಾಚಾರ ಅಧಿಕಾರಿ ಜಯರಾಮ ರಾವ್ ಬೊಕ್ಕ ಪ್ರಮೋದ್ ಕುಮಾರ್ ಈ ಪೊರ್ತುಡು ಇತ್ತೆರ್.
ಮುಲ್ಕಿ ಸೀಮೆದ ಒರ್ಂಬ ಮಾಗಣೆದ ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಲಕ್ಷ ದೀಪ ಬಲಿ ಉಚ್ಚಯ ಗೌಜಿಡ್ ನಡತ್ಂಡ್.
ಕ್ಷೇತ್ರದ ತಂತ್ರಿಲಾಯಿನ ಶಿಬರೂರು ಗೋಪಾಲಕೃಷ್ಣ ತಂತ್ರಿಲು ಬೊಕ್ಕ ಅರ್ಚಕೆರ್ ಶ್ರೀಪತಿ ಉಪಾಧ್ಯಾಯ, ನರಸಿಂಹ ಭಟ್ ಮೊಕ್ಲೆನ ಪೌರೋಹಿತ್ಯಡ್ ಇಸೇಸ ಪ್ರಾರ್ತನೆ, ಭಕ್ತೆರೆರ್ದ್ ಲಕ್ಷ ಕುಂಕುಮಾರ್ಚನೆ, ಮಧ್ಯಾಹ್ನ ಮಹಾಪೂಜೆ, ಅನ್ನ ಪ್ರಸಾದ ಸೇವೆ ಬಯ್ಯಗ್ ಸಾಮೂಹಿಕ ಕುಂಕುಮಾರ್ಚನೆ, ಶ್ರೀ ದೇವೆರೆನ ಲಕ್ಷ ದೀಪ ಬಲಿ ಉಚ್ಚಯ, ಅಷ್ಟಾವಧಾನ ಸೇವೆ, ಪ್ರಸಾದ ಪಟ್ಟುನ ಲೇಸ್ ನಡತ್ಂಡ್.
ಈ ಪೊರ್ತುಡು ಕ್ಷೇತ್ರದ ಅನುವಂಶಿಕ ಮೊಕ್ತೇಸರೆರ್ ದುಗ್ಗಣ್ಣ ಸಾವಂತ ಅರಸೆರ್, ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ಟಿ, ಕಾರ್ಯನಿರ್ವಹಣಾಧಿಕಾರಿ ಪಿ. ಜಯಮ್ಮ, ವಾದಿರಾಜ ಉಪಾಧ್ಯಾಯ ಕೊಲಕಾಡಿ ಬೊಕ್ಕ ಭಕ್ತವೃಂದ ಪಾಲ್ ಪಡೆದಿತ್ತೆರ್.
ಕಟೀಲ್: ಮಲ್ಲಿಗೆಯಂಗಡಿ ಶ್ರೀ ವನದುರ್ಗಾ ಪ್ರಕೃತಿ ಅನಂತೇಶ್ವರ ಕಾಲಭೈರವ ಗುರು ಸನ್ನಿಧಿದ ಜೀರ್ಣೋದ್ಧಾರ ಕೆಲಸಲು ನಡತೊಂದು ಉಂಡು.
ನೆತ್ತ ಕಿರೆ ನಿರ್ಮಾಣ, ಅನ್ನಛತ್ರ ಬೊಕ್ಕ ಬತ್ತಿನ ಭಕ್ತೆರೆಗ್ ಕುಲ್ಲುನ ವ್ಯವಸ್ಥೆ ಮಲ್ಪರೆಗ್ ಭೂಮಿ ದೆತೊನೊಡಾಪುಂಡು. ಅಂಚಾದ್ ಭಕ್ತಾದಿಲು ತನು ಮನ ಧನ ಕೊರ್ದು ಸಹಕಾರ ಮಲ್ಪೊಡು. ಅಂಚೆನೆ ಕ್ಷೇತ್ರದ ಅಭಿವೃದ್ಧಿ ಕಾರ್ಯಡ್ ಪಾಲ್ ಪಡೆದ್ ಶ್ರೀ ವನದುರ್ಗಾ ಪ್ರಕೃತಿ ಅನಂತೇಶ್ವರ ಗುರು ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಮಲ್ಲಿಗೆಯಂಗಡಿ ಶ್ರೀ ವನದುರ್ಗಾ ಪ್ರಕೃತಿ ಅನಂತೇಶ್ವರ ಕಾಲಭೈರವ ಗುರು ಸನ್ನಿಧಿ (ರಿ.) ದ ಮುಖ್ಯಸ್ಥೆರ್, ಗುರ್ಕಾರೆ, ಸರ್ವಸದಸ್ಯೆರ್ ಬೊಕ್ಕ ಜೀರ್ಣೋದ್ಧಾರ ಸಮಿತಿ ಲೆಪ್ಪೋಲೆಡ್ ಬಿನ್ನಾಪು ಮಲ್ದೆರ್.
ಕುಡ್ಲ: ಹೊಸಬೆಟ್ಟು ಈಶ್ವರಗೋಳಿ ಬ್ರಹ್ಮಶ್ರೀ ಮುಗೇರ ಶ್ರೀ ಮಹಾಂಕಾಳಿ ದೈವೊಲ್ಯದ ಜೀರ್ಣೋದ್ಧಾರದ ಕಾರ್ಯಗ್ ಸುಮಾರ್ 1 ಕೋಟಿ 20 ಲಕ್ಷ ರೂ. ದ ಅಂದಾಜಿ ಉಂಡು.
ನೆತ್ತ ಸುಮಾರ್ 30 ಲಕ್ಷ ರೂ.ದ ಕೆಲಸ ಕಜ್ಜೊಲು ನಡತ್ ದ್ಂಡ್. ನನದ ದುಂಬುದ ದಿನಟ್ಟ್ ನೆತ್ತ ಸಾನದ ಶಿಲೆ, ಕಲ್ಲ್ ದ ಗೋಡೆ, ಮರತ ಕೆತ್ತನೆದ ಬೇಲೆ ಬೊಕ್ಕ ಗರ್ಭ ಗುಡಿಕ್ಕ್ ಪಿತ್ತಾಳೆ ಮುಚ್ಚುನ ಬೇಲೆ ನಡಪರೆ ಉಂಡು.
ಅಂಚಾದ್ ಭಕ್ತೆರ್ ಮಾತೆರ್ಲಾ ತನು ಮನ ಧನಟ್ಟ್ ಸಹಕಾರ ಮಲ್ತ್ ದ್, ಈಶ್ವರಗೋಳಿದ ಸತ್ಯೊಲೆನ ಪುಣ್ಯ ಕಾರ್ಯಡ್ ಪಾಲ್ ಪಡೆಯೊಡ್ ಪಂದ್ ಶ್ರೀ ಕ್ಷೇತ್ರದ ಆಡಳಿತ ಸಮಿತಿದ ಬೊಕ್ಕ ಜೀರ್ಣೋದ್ಧಾರ ಸಮಿತಿದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ತೆರಿಪಾದೆರ್.
ಬ್ಯಾಂಕ್ ದ ಪೊಲಬು:
JEERNODDARA SAMITHI SBMMD
Bank Of Baroda, Hosabettu Branch
A/c No :71080100009149
IFSC : BARBOVJHOBE
ನವಿಬೊಂಬೈ: ಘನ್ಸೋಳಿ ಶ್ರೀ ಮೂಕಾಂಬಿಕಾ ಧರ್ಮಶಾಸ್ತ ಸೇವಾ ಸಂಸ್ಥೆದ 21ನೇ ವರ್ಷದ ಅಯ್ಯಪ್ಪ ಮಹಾಪೂಜೆ ಡಿ.17 ಐತಾರ ಘನ್ಸೋಳಿ ಶ್ರೀ ಮೂಕಾಂಬಿಕಾ ದೇವಲ್ಯದ ಚಾವಡಿಡ್ ನಡಪರೆ ಉಂಡು.
ಬೊಲ್ಪುಗು ಶ್ರೀ ಮಹಾಗಣಪತಿ ಹೋಮ, ಶ್ರೀ ಅಯ್ಯಪ್ಪ ಸಹಸ್ರ ನಾಮಾರ್ಚನೆ, ಭಜನೆ, ಮಧ್ಯಾಹ್ನ ಮಹಾಪೂಜೆ, ಸಾರ್ವಜನಿಕ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಭಜನೆ, ರಾತ್ರೆ ದೀಪಾರಾಧನೆ, ಮಹಾಪೂಜೆ, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಗಂಧ ಪ್ರಸಾದ ದೆತೊಂದು ಶ್ರೀ ಅಯ್ಯಪ್ಪ ಸ್ವಾಮಿನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
