ತುಳು ಸುದ್ದಿ

ಸುರತ್ಕಲ್ ಬಂಟರ ಸಂಘ‌ದ 26ನೇ ವರ್ಷದ ಮಹಾಸಭೆ, ವಿದ್ಯಾರ್ಥಿ ವೇತನ,ವಿಶೇಷ ಚೇತನೆರೆಗ್ ಪನವುದ ಸಕಾಯ

ಸುರತ್ಕಲ್: ಬಂಟರ ಸಂಘ (ರಿ) ಸುರತ್ಕಲ್‌ ನೆತ್ತ 26ನೇ ವರ್ಷದ ಮಹಾಸಭೆ, ಅಭಿನಂದನೆ, ಸಹಾಯಹಸ್ತ, ವಿದ್ಯಾರ್ಥಿ ವೇತನ, ದತ್ತಿ ನಿಧಿ ಬೊಕ್ಕ ಸಮೂಹ ನೃತ್ಯ ಸ್ಪರ್ಧೆ ಕಾರ್ಯಕ್ರಮ ಐತಾರ ಬಂಟರ ಸಂಘದ ಚಾವಡಿಡ್ ನಡತ್ಂಡ್.
ಬಂಟರ ಯಾನೆ ನಾಡವರ ಮಾತೃಸಂಘದ ಅಧ್ಯಕ್ಷೆರ್ ಕೆ ಅಜಿತ್ ಕುಮಾರ್ ರೈ ಮಾಲಾಡಿ ತುಡರ್ ಅರ್ಲಾದ್ ಲೇಸ್ ಉದಿಪನ ಮಲ್ತೆರ್. ಈ ಪೊರ್ತುಡು ಪಾತೆರ್ನ ಆರ್ “ನಮ್ಮ ಜೋಕುಲೆಗ್
ಶಿಕ್ಷಣದ ಒಟ್ಟುಗು ಎಡ್ಡೆ ಸಂಸ್ಕಾರ ಕಲ್ಪಾವೊಡು. ಪುಟುದು ಬಲದಿನ ಊರು, ಹಿರಿಯೆರ್, ಅಪ್ಪೆ ಅಮ್ಮೆರೆನ್ ಜೋಕುಲು ಬುಡ್ದು ಪಾಡರೆ ಬಲ್ಲಿ” ಪಂದ್ ಪಂಡೆರ್.
ಮುಂಬೈ ಬಂಟರ ಸಂಘದ ಅಧ್ಯಕ್ಷೆರ್ ಪ್ರವೀಣ್ ಭೋಜ ಶೆಟ್ಟಿ
ಪಾತೆರ್ದ್, ”ಸುರತ್ಕಲ್ ಬಂಟರ ಸಂಘಡ್ ಈ ಸರ್ತಿ ಶೈಕ್ಷಣಿಕ ಸಾಧನೆ ಮಲ್ದಿನ ವಿದ್ಯಾರ್ಥಿಲು, ಭಿನ್ನ ಸಾಮರ್ಥ್ಯ ಬೊಕ್ಕ ವಿಶೇಷಚೇತನೆರೆಗ್ ಪನವುದ ಸಕಾಯ ಕೊರ್ಪಿನವು ಮಸ್ತ್ ಕುಷಿತ ವಿಷಯ” ಪಂದ್ ಪಂಡೆರ್.
ಬಿನ್ನೆರಾದ್ ಪಡುಬಿದ್ರಿ ಬಂಟರ ಸಂಘದ ಅಧ್ಯಕ್ಷೆರ್ ದೇವಿಪ್ರಸಾದ್ ಶೆಟ್ಟಿ, ನಿವೃತ್ತ ಸೇನಾಧಿಕಾರಿ ಕರ್ನಲ್ ನಿಟ್ಟೆಗುತ್ತು ಶರತ್ ಭಂಡಾರಿ ಲೇಸ್‌ಡ್ ಪಾಲ್ ಪಡೆದಿತ್ತೆರ್. ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರ್ ಬಾಳ ಜಗನ್ನಾಥ ಶೆಟ್ಟಿ ಲೇಸ್‌ದ ಗುರ್ಕಾರ್ಮೆ ವಹಿಸ್‌ದಿತ್ತೆರ್.
ಸಂಘದ ಮಾಜಿ ಅಧ್ಯಕ್ಷೆರ್ ಎಂ. ದೇವಾನಂದ ಶೆಟ್ಟಿ, ನಿಕಟ ಪೂರ್ವ ಅಧ್ಯಕ್ಷೆರ್ ಎಂ ಲೋಕಯ್ಯ ಶೆಟ್ಟಿ, ಉಪಾಧ್ಯಕ್ಷೆರ್ ಪ್ರವೀಣ್ ಶೆಟ್ಟಿ ಪ್ರಧಾನ ಕಾರ್ಯದರ್ಶಿ ಲೀಲಾಧರ ಶೆಟ್ಟಿ ಕಟ್ಲ, ಕೋಶಾಧಿಕಾರಿ ರತ್ನಾಕರ ಶೆಟ್ಟಿ, ಜತೆಕಾರ್ಯದರ್ಶಿ ಮೀರಾವಾಣಿ ಎಂ ಶೆಟ್ಟಿ, ಸಾಂಸ್ಕೃತಿಕ ಕಾರ್ಯದರ್ಶಿ ದೇವೇಂದ್ರ ಶೆಟ್ಟಿ, ಸಂಘಟನಾ ಕಾರ್ಯದರ್ಶಿ ಪುಷ್ಪರಾಜ್ ಶೆಟ್ಟಿ ಕುಡುಂಬೂರು, ಕ್ರೀಡಾ ಕಾರ್ಯದರ್ಶಿ ಪುಷ್ಪರಾಜ್ ಶೆಟ್ಟಿ ಮಧ್ಯ, ಮಹಿಳಾ ವೇದಿಕೆ ಅಧ್ಯಕ್ಷೆರ್ ಸರೋಜ ಟಿ ಶೆಟ್ಟಿ ಮೊಕುಲು ಮಾತ ಇತ್ತೆರ್.
ಉಂದುವೇ ಪೊರ್ತುಡು ವಿಶೇಷ ಚೇತನೆರೆಗ್ ಸಹಾಯಧನ, ಮಾತಾ ಸಮಾಜದ ಜೋಕುಲೆಗ್ ವಿದ್ಯಾರ್ಥಿವೇತನ, ಶೈಕ್ಷಣಿಕ ಬೊಕ್ಕ ಬೇತೆ ಬೇತೆ ಕ್ಷೇತ್ರದ ಸಾಧಕೆರೆಗ್ ಮಾನಾದಿಗೆ ನಡತ್ಂಡ್.
ಪ್ರಧಾನ ಕಾರ್ಯದರ್ಶಿ ಲೀಲಾಧರ್ ಶೆಟ್ಟಿ ಕಟ್ಲ ಬಿನ್ನೆರೆನ್ ಸ್ವಾಗತ ಮಲ್ತೆರ್. ಲಾವಣ್ಯ ಶೆಟ್ಟಿ ಚೇಳಾಯರು ದೇವೆರೆನ್ ಸುಗಿತೆರ್. ಪ್ರವೀಣ್ ಶೆಟ್ಟಿ ಸೊಲ್ಮೆ ಸಂದಾಯೆರ್. ರಾಜೇಶ್ವರಿ ಡಿ ಶೆಟ್ಟಿ ಬೊಕ್ಕ ಡಾ. ಸುಧಾ ಚಂದ್ರಶೇಖರ ಶೆಟ್ಟಿ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.

ಸಾಂಸ್ಕೃತಿಕ ಪಂತ

ಸುರತ್ಕಲ್ ಬಂಟರ ಸಂಘಡ್ ಮಧ್ಯಾಹ್ನ ಗ್ರಾಮವಾರು ಸಾಂಸ್ಕೃತಿಕ ಪಂತ ನಡತ್ಂಡ್. ಪಂತೊಡು ಸುರುತ್ತ ಇನಾಮು ಇಡ್ಯಾ ಗ್ರಾಮ, ರಡ್ಡನೇ ಇನಾಮುನು ಕೃಷ್ಣಾಪುರ- ಕಾಟಿಪಳ್ಳ ಗ್ರಾಮ ಬೊಕ್ಕ ಮೂಜಿನೇ ಇನಾಮುನು ಚೇಳಾರ್ ಗ್ರಾಮ ಬೊಕ್ಕ ಕುಡುಂಬೂರು ಗ್ರಾಮ‌ ಗೆಂದ್ಂಡ್. ಪಂತೊದ ನಿರೂಪಣೆನ್ ನಿತೇಶ್ ಶೆಟ್ಟಿ ಎಕ್ಕಾರ್ ಮಲ್ತೆರ್.