ಅಗತ್ಯ ಸೇವೆ Emergency Services

ಆರೋಗ್ಯ ಶಿಬಿರಲು ಗ್ರಾಮೀಣ ಬೊಕ್ಕ ಸಾಮಾನ್ಯ ಜನಕ್ಲೆಗ್ ವರದಾನ: ಡಾ. ಸತೀಶ್ ಭಂಡಾರಿ

ಕೆ.ಎಸ್. ಹೆಗ್ಡೆ ಮೆಡಿಕಲ್ ಅಕಾಡೆಮಿ ಬೊಕ್ಕ ಜಸ್ಟೀಸ್ ಕೆ.ಎಸ್. ಹೆಗ್ಡೆ ಚಾರಿಟೇಬಲ್ ಆಸ್ಪತ್ರೆ ದೇರಳಕಟ್ಟೆ, ಕುಡ್ಲ ಬೊಕ್ಕ ತಾಳಿಪಾಡಿಗುತ್ತು ಜನಕಲ್ಯಾಣ ಸೇವಾ ಸಮಿತಿ ಟ್ರಸ್ಟ್ ಮೊಕ್ಲೆನ ಒಟ್ಟುಸೇರಿಗೆಡ್ ಉಚಿತ ಆರೋಗ್ಯ ತಪಾಸಣಾ ಶಿಬಿರ ಐತಾರ ತಾಳಿಪಾಡಿಗುತ್ತು ಗ್ರಾಮೀಣ ಅರೋಗ್ಯ ಕೇಂದ್ರಡ್ ನಡತ್ಂಡ್.

ಲೇಸ್ ನ್ ಕೆ.ಎಸ್. ಹೆಗ್ಡೆ ಚಾರಿಟೇಬಲ್ ಆಸ್ಪತ್ರೆದ ಒತ್ತು ಗುರ್ಕಾರ್ಲು ಡಾ. ಸತೀಶ್ ಭಂಡಾರಿ ಮೇರ್ ಉದಿಪನ ಮಲ್ತ್ ದ್ ಪಾತೆರ್ದ್ ಸಮಾಜದ ಪ್ರತಿಯೊರಿಗ್ಲಾ ಎಡ್ಡೆ ಆರೋಗ್ಯ ಸೇವೆ ತಿಕ್ಕೊಡು ಪನ್ಪುನ ಉದ್ದೇಶರ್ದ್ ಇಂಚಿನ ಶಿಬಿರಲು ಅಗತ್ಯ ಉಂಡು. ಗ್ರಾಮೀಣ ಬೊಕ್ಕ ಹಿಂದುಳಿದ ಪ್ರದೇಶಲೆನ ಜನಕ್ಲೆಗ್ ಉಂದು ಮಾಸ್ತ್ ಉಪಯೋಗ ಆಪುಂಡು. ಇಂಚಿನ ಆರೋಗ್ಯ ಶಿಬಿರಲು ಗ್ರಾಮೀಣ ಬೊಕ್ಕ ಸಾಮಾನ್ಯ ಜನಕುಲೆಗ್ ವರದಾನ ಆತ್ಂಡ್‌, ಆರೋಗ್ಯ ಜಾಗೃತಿ ಕೊರ್ಪುನಲ್ಪ ಮಹತ್ವದ ಪಾತ್ರ ದೆತೊಂದುಂಡು ಪಂದ್ ಪಂಡೆರ್.

ಈ ಲೇಸ್ ದ ಗುರ್ಕಾರ್ಮೆನ್ ಜನಕಲ್ಯಾಣ ಸೇವಾ ಸಮಿತಿ ಟ್ರಸ್ಟ್ ದ ಗುರ್ಕಾರ್ಲು ಭಾಸ್ಕರ್ ಶೆಟ್ಟಿ ತಾಳಿಪಾಡಿಗುತ್ತು ವೈಸೊಂದಿತ್ತೆರ್.

ಚಾವಡಿಡ್ ರಾಮಚಂದ್ರ ಎನ್ ಶೆಟ್ಟಿ ತಾಳಿಪಾಡಿಗುತ್ತು, ತಾಳಿಪಾಡಿ ಕೋರ್ದಬ್ಬು ದೈವಸ್ಥಾನದ ಗುರ್ಕಾರ್ಲು ಧನಪಾಲ ಶೆಟ್ಟಿ ತಾಳಿಪಾಡಿಗುತ್ತು, ಕಿನ್ನಿಗೋಳಿ ವ್ಯ. ಸೇ. ಸ. ಸಂಘದ ಗುರ್ಕಾರ್ಲು ಜೋಸೆಫ್ ಕ್ವಾಡ್ರಸ್, ಡಾ. ಸನತ್ ಕುಮಾರ್ ಶೆಟ್ಟಿ, ಡಾ. ಶ್ರವಣ್ ಶೆಟ್ಟಿ, ಡಾ.ವಿಜಯಲಕ್ಷ್ಮಿ, ಡಾ. ರಾಘವೇಂದ್ರ ಹುಚ್ಚನವರ್, ಡಾ. ಅರುಣ್ ಶೆಟ್ಟಿ ಇತ್ತೆರ್.

ದಾಮೋದರ ಶೆಟ್ಟಿ ಎದ್ಕೊನಿಯೆರ್. ಉದಯ ಪೂಂಜಾ ತಾರಿಪಾಡಿಗುತ್ತು ಸೊಲ್ಮೆ ಸಂದಾಯೆರ್, ಕುಶಲ ಪೂಜಾರಿ ತಾಳಿಪಾಡಿ ಲೇಸ್ ನ್ ಸುಧಾರಿಕೆ ಮಲ್ತೆರ್.

ಈ ಪೊರ್ತುಡು ಕಿನ್ನಿಗೋಳಿ ಪಟ್ಟಣ ಪಂಚಾಯತಿಡ್ ನಡತಿನ ವೋಟುಡು ಗೆಂದಿನ ತಾಳಿಪಾಡಿ ವಾರ್ಡ್ ದ ಮಲ್ಲಿಕಾ ಗುತ್ತಕಾಡ್ ಬೊಕ್ಕ ಪ್ರಣೀಕ್ ಕಿನ್ನಿಗೋಳಿ ಮೊಕ್ಲೆಗ್ ಅಭಿನಂದನೆ ಮಲ್ತೆರ್. ಬೊಕ್ಕ ಶಿಬಿರಡ್ ಕಣ್ಣ್, ಕೆಬಿ–ಮೂಂಕು–ಎಲು (ENT), ಸಾಮಾನ್ಯ ವೈದ್ಯಕೀಯ, ಚರ್ಮರೋಗ ಬೊಕ್ಕ ಬೇತೆ ಬೇತೆ ವಿಭಾಗದ ತಜ್ಞ ವೈದ್ಯೆರ್ ಸೇವೆ ಕೊರಿಯೆರ್. ನೂದೆರ್ದ್ ಜಾಸ್ತಿ ಜನ ಸಾರ್ವಜನಿಕೆರ್ ಶಿಬಿರದ ಪ್ರಯೋಜನ ಪಡೆಯೆರ್. ತಪಾಸಣೆ ನಡಪಾಯಿನ ವೈದ್ಯೆರ್ ಆರೋಗ್ಯ ಜಾಗೃತಿದ ಬಗೆಟ್ಟ್ ಸಲಹೆನ್ ಕೊರಿಯೆರ್.