ಬೆದ್ರದ ಸುದ್ದಿ | Moodbidri News

ಬೆದ್ರ ಶ್ರೀ ವೆಂಕಟರಮಣ ದೇವಲ್ಯದ 34ನೇ ವರ್ಷೊದ ಶ್ರೀ ಶಾರದಾ ಮಹೋತ್ಸವ

ಬೆದ್ರ: ಶ್ರೀ ವೀರಮಾರುತಿ ಸೇವಾ ಟ್ರಸ್ಟ್‌ (ರಿ.) ಬೆದ್ರದ ಮುತಾಲಿಕೆಡ್ ನಡಪರೆ ಇಪ್ಪುನ 34ನೇ ವರ್ಷೊದ ಶ್ರೀ ಶಾರದಾ ಮಹೋತ್ಸವ ಅ.20-22 ಮುಟ್ಟ ಬೆದ್ರದ ಶ್ರೀ ವೆಂಕಟರಮಣ ದೇವಲ್ಯದ ಶ್ರೀ ಸುಕೃತೀಂದ್ರ ಕಲಾ ಮಂದಿರಡ್ ಗೌಜಿಡ್ ನಡಪರೆ ಉಂಡು.

ಅ.18 ಬುಧಾರ ಬಯ್ಯಗ್ ಶ್ರೀ ಶಾರದಾ ದೇವಿನ ವಿಗ್ರಹನ್ ಬೆದ್ರ ಸ್ವರಾಜ್ಯ ಮೈದಾನದ ಪಿರಾಕ್ ದ ಶ್ರೀ ಆದಿಶಕ್ತಿ ದೇವಲ್ಯರ್ದ್ ಪಿದಾಡ್ ದ್ ಶ್ರೀ ಹನುಮಂತ ದೇವಲ್ಯಗ್ ಪೋದು ಶ್ರೀ ವೆಂಕಟರಮಣ ದೇವಲ್ಯಗ್ ಕನಯೆರೆ ಉಂಡು.

ಅ.20 ಸುಕ್ರಾರ ಬೊಲ್ಪುಗು ಗಣಹೋಮ, ಶ್ರೀ ಶಾರದಾ ದೇವಿನ ಪ್ರತಿಷ್ಠೆ, ಬೆದ್ರ ತಾಲೂಕ್ ಮಟ್ಟದ ಜೋಕುಲೆನ ನಲಿಕೆ ಭಜನೆ ಪಂತೊ ಲೇಸ್ ನಡಪರೆ ಉಂಡು.

ಅ.22 ಕ್ಕ್ ಅರಳುಮಲ್ಲಿಗೆದ ಸರ್ವಾಲಂಕಾರರ್ದ್ ಶಾರದಾ ಮಾತೆನ ವಿಗ್ರಹನ್ ಒಪನ್ ಇಪ್ಪುನ ಲಾಲಕ್ಕಿಡ್ ಉತ್ಸಾಹಿ ಯುವಸೇವಕೆರ್ ಪುಗೆಲ್ ದ ಮಿತ್ತ್ ದೀದ್ ಪೋಪುನ ವರ್ಣರಂಜಿತ ಬೆದ್ರ ಶ್ರೀ ಶಾರದಾ ದೇವಿನ ವೈಭವದ ಶೋಭಾಯಾತ್ರೆ ನಡಪರೆ ಉಂಡು.

ಅಂಚೆನೆ ಪ್ರತಿದಿನೊಲ ಬೇತೆ ಬೇತೆ ವಿಶೇಷ ಅಲಂಕಾರಡ್ ಶ್ರೀ ಶಾರದ ದೇವಿ ಮೆನ್ಕೆಯೆರೆ ಉಲ್ಲೆರ್. ಬೊಕ್ಕ ಪ್ರತಿದಿನೊಲ ತಿಂಡಿ, ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು. ಅಕೇರಿದಾನಿ ಶ್ರೀ ಶಾರದಾ ದೇವಿನ ಶೋಭಾಯಾತ್ರೆ ಸುಕೃತೀಂದ್ರ ಕಲಾ ಮಂದಿರರ್ದ್ ಪಿದಾಡ್ ದ್ ಮುಖ್ಯರಸ್ತೆಡ್ ಪೋದು ಅಲಂಗಾರು ಶ್ರೀಮಹಾಲಿಂಗೇಶ್ವರ ದೇವಲ್ಯದ ‘ಮಾನಸ ಗಂಗೋತ್ರಿ ಸರೋವರ’ಡ್ ಶ್ರೀ ಶಾರದಾ ದೇವಿನ ಮೂರ್ತಿನ್ ನೀರ್ ಪಾಡುವೆರ್.

ಸೆ.22: ಬೆಳುವಾಯಿ ಯುವಶಕ್ತಿ ವಾಟ್ಸಾಪ್ ಬಳಗದ ದಶಮಾನೋತ್ಸವ ಸಂಭ್ರಮ

ಬೆದ್ರ: ಯುವಶಕ್ತಿ ವಾಟ್ಸಾಪ್ ಬಳಗ ಬೆಳುವಾಯಿದ ಮುತಾಲಿಕೆಡ್ ಸೆ.22 ಸುಕ್ರಾರ ರಾತ್ರೆ ಬೆಳುವಾಯಿ ಕಮಲಮ್ಮ ಕಾಂಪ್ಲೆಕ್ಸ್ ದ ಪಿರವು ದಶಮಾನೋತ್ಸವ ಸಂಭ್ರಮ, ಪ್ರತಿಭಾನ್ವಿತೆರೆಗ್ ಸನ್ಮಾನ, ಆಟ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಯುವಶಕ್ತಿ ವಾಟ್ಸಾಪ್ ಬಳಗ ಬೆಳುವಾಯಿದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ಗ್ ಕೃಷ್ಣೋತ್ಸವ ಪ್ರಶಸ್ತಿ-2023

ಬೆದ್ರದ ಮೊಸರು ಕುಡಿಕೆ ಉಚ್ಚಯದ ಲೆಕ್ಕೊಡು ಜವನೆರ್ ಬೆದ್ರ ಅರ್ಪಣೆ ಮಲ್ಪುನ ಕೃಷ್ಣೋತ್ಸವ ಯಕ್ಷ ಸಂಭ್ರಮ 2023 ಲೇಸ್ ಡ್ ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ಕೂಟದ ಸಮಾಜ ಸೇವೆನ್ ಗುರುತಿಸಾದ್ ಈ ಸಂಸ್ಥೆಗ್ ಕೃಷ್ಣೋತ್ಸವ ಪ್ರಶಸ್ತಿನ್ ಕೊರಿಯೆರ್.

ಈ ಲೇಸ್ (ಸೆ.7) ಕೋಡೆ ಬಯ್ಯಗ್ ಬೆದ್ರ ಅಮರನಾಥ ಶೆಟ್ಟಿ ವೃತ್ತದ ಕೈತಲ್ ದ ಭಾಗವತ ಬಲಿಪ ನಾರಾಯಣ ವೇದಿಕೆಡ್ ನಡತ್ಂಡ್.

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ರ್ದ್ ಬಡಪತ್ತ್ ಕುಟುಂಬಗ್ ಪನವುದ ಸಕಾಯ

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ದ ಮುತಾಲಿಕೆಡ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.

ಬೆದ್ರ ತಾಲೂಕ್ ದ ಕೇಮಾರು ಪಾಲಡ್ಕ ನಿವಾಸಿ ಸುರೇಶ ಮೆರೆಗ್ ಇಂಚಿಪ್ಪ ಗಾಡಿ ಆಕ್ಸಿಡೆಂಟ್ ತರೆ ಕೈ ಕಾರ್ ಗ್ ಪೆಟ್ಟಾದ್ ಕೆಲಸ ಮಲ್ಪರೆ ಆವಂದಿನ ಪರಿಸ್ಥಿತಿಡ್ ಉಲ್ಲೆರ್. ಬಡಪತ್ತ್ ಡ್ ಇಪ್ಪುನ ಮೆರೆನ ಕುಟುಂಬ ಒಂಜಿ ಎಲ್ಯ ಇಲ್ಲ್ ನ್ ಮೂಜಿ ಸೆಂಟ್ಸ್ ಕಾಲನಿಡ್ ಕಟ್ಟೆರೆ ಸುರು ಮಲ್ತಿನ ಪೊರ್ತುಡೇ ಈ ಘಟನೆ ನಡತ್ಂಡ್.

ಅಂಚಾದ್ ಮೆರೆನ ಇಲ್ಲ್ ದ ನಿರ್ಮಾಣ ಕಾರ್ಯಡ್ ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ಗ್ ಆಯಿನಾತ್ ಇಲ್ಲಗ್ ಬೋಡಾಯಿನ ಸೊತ್ತುಲೆನ್ ಸಕಾಯ ಮಲ್ಪರೆ ಬಿನ್ನಾಪು ಬತ್ತಿತ್ತ್ಂಡ್. ‌ನೆಕ್ಕ್ ಸ್ಪಂದಿಸಾಯಿನ ಈ ಕೂಟ 25 ಸಾರ ರೂ.ದ ಚೆಕ್ಕ್ ನ್ ರೋಟರಿಕ್ಲಬ್ ಟೆಂಪಲ್ ಟೌನ್ ಬೆದ್ರ ಕಮ್ಯೂನಿಟಿ ಸರ್ವಿಸಸ್ ದ ಹರೀಶ್ ಎಂ. ಕೆ ಮೆರೆನ ಮುಖೇನ ಕೊರಿಯೆರ್.

ಈ ಪೊರ್ತುಡು ಯುವ ಉತ್ಸಾಯಿ ಬಳಗ (ರಿ.) ಕೇಮಾರು ನೆತ್ತ ಸಂಚಾಲಕೆರ್ ಜೀವಂಧರ್ ಶೆಟ್ಟಿಗಾರ್ ಬೋವಾಡಿ, ಪ್ರಧಾನ ಕಾರ್ಯದರ್ಶಿ ಸುದರ್ಶನ್ ಆಚಾರ್ಯ ಕೊಳಕೆಬೈಲು ಬೊಕ್ಕ ಪದಾಧಿಕಾರಿಲು ಇತ್ತೆರ್.