ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ತುಳು ಸರಣಿ ಲೇಸ್ ದ ಸಂಚಿಕೆ ಡಿ.14 ಗುರುವಾರ ಬಯ್ಯಗ್ 5 ಗಂಟೆಗ್ ಪ್ರಸಾರ ಆಂಡ್.
ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾತೆರಿಯೆರ್. ಡಿ.15 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಬೆಂಗ್ಲೂರು: ಬೆಂಗ್ಲೂರು ಬಿಲ್ಲವ ಅಸೋಸಿಯೇಶನ್ (ರಿ.) ದ 46ನೇ ವರ್ಷದ ಬಿಲ್ಲವ ಯುವ ಪರ್ಬ2023 ಬೊಕ್ಕ ಸಾಂಸ್ಕೃತಿಕ, ವೈವಿಧ್ಯಮಯ, ಮನರಂಜನಾ ಲೇಸ್ ಡಿ.17 ಐತಾರ ಬೊಲ್ಪುಗು ಬನ್ನೇರುಘಟ್ಟ ಮಾರ್ಗದ ದೇವಕಿ ಆನಂದ ಸುವರ್ಣ ಕನ್ವೆನ್ಷನ್ ಹಾಲ್ ಡ್ ನಡಪರೆ ಉಂಡು.
ಬಿಲ್ಲವ ಮಹಿಳಾ ಘಟಕದ ಸದಸ್ಯೆರೆರ್ದ್ ಕನ್ನಡ ಯಕ್ಷಗಾನ ಲಂಕಾ ದಹನ ನಡಪರೆ ಉಂಡು. ಅಂಚೆನೆ ಮಧ್ಯಾಹ್ನ ವನಸ್ ಬಯ್ಯಗ್ ಉಪಹಾರದ ವ್ಯವಸ್ಥೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಪೊತ್ತಿನ ಬೊಳ್ಳುಳ್ಳಿನ್ ತಿನ್ಪುನೆರ್ದ್ ಆರೋಗ್ಯಗ್ ಮಸ್ತ್ ಪ್ರಯೋಜನ ಆಪುಂಡು.
ಉಂದು ಕೊಲೆಸ್ಟ್ರಾಲ್ ನ್ ಕಮ್ಮಿ ಮಲ್ಪುಂಡು. ಬೊಕ್ಕ ಶೀತ, ತೆಮ್ಮ ಬೊಕ್ಕ ಜ್ವರನ್ ಬರಂದಿಲೆಕ್ಕ ತೂವೊಂಡು. ಅತ್ತಂದೆ ನೆರ್ದ್ ಜೀರ್ಣಕ್ರಿಯೆ ಸರಿ ಆಪುಂಡು. ಜಾಸ್ತಿ ನೆತ್ತೆರ್ ದ ಸಮಸ್ಯೆ ಇತ್ತಿನಕುಲು ಒಂತೆ ಒಂತೆನೇ ಬೊಳ್ಳುಳ್ಳಿ ತಿನೊಡು. ನೆರ್ದ್ ಎಲು ಗಟ್ಟಿ ಆಪುಂಡು.
ಪಂಪ್ ವೆಲ್ ಟೀಮ್ ಜಾಗರಣ, ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜಾ ಸಮಿತಿ, ದಶಮಾನೋತ್ಸವ ಸಮಿತಿದ ಒಟ್ಟುಸೇರಿಗೆಡ್ ದಶಮಾನೋತ್ಸವ ಸಂಭ್ರಮ 2024 ಜ.6 ಬೊಕ್ಕ 7 ಕ್ಕ್ ನಂತೂರು ಪಂಪ್ ವೆಲ್ ಮಾರ್ಗದ ಮರೋಳಿ ಪಾದೆ ಮೈದಾನಡ್ ನಡಪರೆ ಉಂಡು.
ಜ.6 ಸನಿಯಾರ ಬಯ್ಯಗ್ 10ನೇ ವರ್ಷದ ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ, ಸಭಾ ಲೇಸ್, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಜ.7 ಐತಾರ ಬಯ್ಯಗ್ ಕಟೀಲ್ ಮೇಳದಕ್ಲೆರ್ದ್ ಶ್ರೀ ದೇವಿ ಮಹಾತ್ಮೆ ಆಟ, ರಾತ್ರೆ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ಆದರ್ಶ್ ಯು ನಾಯಕ್ ಲೆಪ್ಪೋಲೆಡ್ ತೆರಿಪಾದೆರ್.
ನವಿಬೊಂಬೈ: ಪನ್ವೆಲ್ ದ ದೇರವಲಿ ಶ್ರೀ ಕಾಳಿಕಾಂಬಾ ವಿಶ್ವಕರ್ಮ ಸೇವಾ ಸಂಘ (ರಿ.) ದ ಮುತಾಲಿಕೆಡ್ ಬೆಂಗ್ಲೂರು ಸಿರಿಕಲಾಮೇಳದಕ್ಲೆರ್ದ್ ಕೃಷ್ಣಾರ್ಜುನ ಕಾಳಗ ಯಕ್ಷಗಾನ ಡಿ.20 ಬುಧಾರ ಬಯ್ಯಗ್ ದೇರವಲಿ ಶ್ರೀ ಕಾಳಿಕಾಂಬಾ ವಿನಾಯಕ ದೇವಲ್ಯಡ್ ನಡಪರೆ ಉಂಡು.
ಈ ಲೇಸ್ ದ ಗುರ್ಕಾರ್ಮೆನ್ ದೇರವಲಿ ಶ್ರೀ ಕಾಳಿಕಾಂಬಾ ವಿನಾಯಕ ದೇವಲ್ಯದ ಕಾರ್ಯಾಧ್ಯಕ್ಷೆರ್ ಸಿ.ಎ ಶ್ರೀಧರ್ ಆಚಾರ್ಯ ಒಯಿಸೊನ್ವೆರ್. ಬಾಂಬೆ ಬಂಟ್ಸ್ ಎಸೋಸಿಯೇಶನ್ ದ ಮಾಜಿ ಗುರ್ಕಾರೆ ಶ್ಯಾಮ ಎಸ್ ಶೆಟ್ಟಿ ತುಡರ್ ಅರ್ಲಾವೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಪನ್ವೆಲ್ ಕಾಂದಕಾಲೋನಿ ಖಾಂದೇಶ್ವರ ಅಯ್ಯಪ್ಪ ಭಕ್ತ ವೃಂದದ ಮಾನಾದಿಗೆದ ಗುರ್ಕಾರೆ ಖಾಂದೇಶ್ ಭಾಸ್ಕರ್ ವೈ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ನವಿಬೊಂಬೈ ಪನ್ವೆಲ್ ದ ದೇರವಲಿ ಶ್ರೀ ಕಾಳಿಕಾಂಬಾ ವಿಶ್ವಕರ್ಮ ಸೇವಾ ಸಂಘ (ರಿ.), ಶ್ರೀ ಕಾಳಿಕಾಂಬಾ ವಿನಾಯಕ ದೇವಲ್ಯದ ಪದುಕೆರ್, ಸರ್ವಸದಸ್ಯೆರ್ ಬೊಕ್ಕ ಮಹಿಳಾ ವಿಭಾಗ ಲೆಪ್ಪೋಲೆಡ್ ತೆರಿಪಾದೆರ್.
ಬೆಂಗ್ಲೂರುದ ಏಳುಮಲೈ ಪನ್ಪುನ ಬೈಕ್ ಸವಾರಗ್ ತನ್ನ ಬೈಕ್ ಬಿಲೆರ್ದ್ 4 ಪಟ್ಟ್ ಎಚ್ಚದ ದಂಡ ಬುರ್ದುಂಡು.
ಈ ಜನ ಸುಮಾರ್ 255 ಸರ್ತಿ ಸಂಚಾರಿ ನಿಯಮನ್ ಉಲ್ಲಂಘನೆ ಮಲ್ತಿನೆಕ್ಕ್ ಬೆಂಗ್ಲೂರು ಟ್ರಾಫಿಕ್ ಪೊಲೀಸೆರ್ 1.34 ಲಕ್ಷ ರೂ. ದಂಡ ಪಾಡ್ದೆರ್. ನೆಟ್ಟ್ ಕುತೂಹಲದ ಸಂಗತಿ ದಾದ ಪಂಡ ಈ ಜನತ್ತ ಬೈಕ್ ದ ಬಿಲೆ ಖಾಲಿ 30 ಸಾರ ರೂ. ಆತ್ಂಡ್.
ಬುಲಿಯನ್ ಮಾರ್ಕೆಟ್ ಡ್ ಬಂಗಾರ್ ಬೊಕ್ಕ ಬೊಳ್ಳಿದ ಕಿರಯ ಎಚ್ಚಾತ್ಂಡ್.
22 ಕ್ಯಾರೆಟ್ ದ 10 ಗ್ರಾಂ ಬಂಗಾರ್ ದ ಕಿರಯ 1 ಸಾರ ರೂ. ಎಚ್ಚಾದ್ 57650 ರೂ. ಆತ್ಂಡ್. 24 ಕ್ಯಾರೆಟ್ ದ 10 ಗ್ರಾಂ ಬಂಗಾರ್ ದ ಕಿರಯ 1090 ರೂ. ಎಚ್ಚಾದ್ 62890 ರೂ. ಆತ್ಂಡ್.
ಬೊಳ್ಳಿದ ಕಿರಯ 2500 ರೂ. ಎಚ್ಚಾತ್ಂಡ್. ಕೆಜಿಗ್ 79500 ರೂ. ಆತ್ಂಡ್. ಒಂಜೇ ದಿನಟ್ಟ್ ಈ ರೀತಿ ಕಿರಯ ಎಚ್ಚಾಯಿನೇ ಉಂದುವೇ ಸುರುತ್ತ ಸರ್ತಿ ಆತ್ಂಡ್.
ಇಂಡಿಗೋ ಏರ್ ಲೈನ್ಸ್ ಕಂಪೆನಿ ಡಿ.30 ರ್ದ್ ಡೆಲ್ಲಿರ್ದ್ ಅಯೋಧ್ಯೆಗ್ ಪೊಸ ಇನಾಮನ್ ಸುರು ಮಲ್ಪುವ ಪಂದ್ ಘೋಷಣೆ ಮಲ್ದ್ಂಡ್.
ಡೆಲ್ಲಿರ್ದ್ ಅಯೋಧ್ಯೆಗ್ ವಾಣಿಜ್ಯ ನೇರ ಇಮಾನಲು ಜ.6 ರ್ದ್ ಸುರು ಆಪುಂಡು. ಅಹಮದಾಬಾದ್ ರ್ದ್ ಅಯೋಧ್ಯೆಗ್ ಮೂಜಿ ಸರ್ತಿ ವಾರದ ಇಮಾನಲು ಜ.11 ರ್ದ್ ಸುರು ಆಪುಂಡು ಪಂದ್ ಇಂಡಿಗೋ ಪ್ರಕಟಣೆಡ್ ತೆರಿಪಾದ್ಂಡ್.
ತೆಕ್ಕಟ್ಟೆ: ಕುಂಭಾಶಿ ಆನೆಗುಡ್ಡೆ ವಿನಾಯಕ ದೇವಲ್ಯಡ್ ಮಲ್ಲ ತೇರ್ ಉಚ್ಚಯ, (ಬ್ರಹ್ಮರಥೋತ್ಸವ) ಅಷ್ಟೋತ್ತರ ಸಹಸ್ರ ನಾಳಿಕೇರ ಗಣಪತಿ ಯಾಗ, ಸಾಂಸ್ಕೃತಿಕ ಲೇಸ್ ಡಿ.13-16 ಮುಟ್ಟ ನಡಪರೆ ಉಂಡು.
ಇನಿ (ಡಿ.13) ಬೊಲ್ಪುಗು ಪ್ರಾರ್ತನೆ, ಗಣಪತಿ ಹೋಮ ನಡತ್ಂಡ್. ರಾತ್ರೆ ರಂಗಪೂಜೆ, ಪಲ್ಲಕ್ಕಿ ಉಚ್ಚಯ ನಡತ್ಂಡ್.
ಡಿ.14 ಕ್ಕ್ ಬೊಲ್ಪುಗು ಗಣಪತಿ ಹೋಮ, ಸತ್ಯಗಣಪತಿ ವ್ರತ, ಮಹಾಪೂಜೆ, ರಾತ್ರೆ ರಂಗಪೂಜೆ, ಪಲ್ಲಕ್ಕಿ ಉಚ್ಚಯ ನಡತ್ಂಡ್.
ಡಿ.15 ಕ್ಕ್ ನವಕ ಪ್ರಧಾನ ಕಲಶಾಭಿಷೇಕ, ರಾತ್ರೆ ಮೆರವಣಿಗೆ ರಂಗಪೂಜೆ, ಪಲ್ಲಕ್ಕಿ ಉಚ್ಚಯ ನಡಪರೆ ಉಂಡು.
ಡಿ.16 ಕ್ಕ್ ಬೊಲ್ಪುಗು ಅಷ್ಟೋತ್ತರ ಸಹಸ್ರ ನಾಳಿಕೇರ ಗಣಪತಿ ಯಾಗ, ಬ್ರಹ್ಮರಥೋತ್ಸವ, ಪಾನಕ ಪಟ್ಟುನ ಲೇಸ್, ಅನ್ನ ಪ್ರಸಾದ ಸೇವೆ ಬಯ್ಯಗ್ ತೇರ್ ಒಯಿಪೆರೆ, ಸುಡುಮದ್ದು ಪ್ರದರ್ಶನ ನಡಪರೆ ಉಂಡು.
ಡಿ.17 ಕ್ಕ್ ಬೊಲ್ಪುಗು ಚೂರ್ಣೋತ್ಸವ, ಅವಭ್ರಥ ಸ್ನಾನ, ವಸಂತಾರಾಧನೆ, ಮಂತ್ರಾಕ್ಷತೆ ನಡಪರೆ ಉಂಡು.
ಅಂಚೆನೆ ಪ್ರತಿದಿನೊಲ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು ಪಂದ್ ದೇವಲ್ಯದ ಆಡಳಿತ ಧರ್ಮದರ್ಶಿ ಕೆ. ಶ್ರೀರಮಣ ಉಪಾಧ್ಯಾಯ ತೆರಿಪಾದೆರ್.
ಕುಡ್ಲ: ಬಂದಾರ್ ಟೆಂಪೋ ಚಾಲಕ ಬೊಕ್ಕ ಮಾಲಕರ ಸಂಘ (ರಿ.) ದ ಮುತಾಲಿಕೆಡ್ ಇಂಡಿಯನ್ ರೆಡ್ ಕ್ರಾಸ್ ಸೊಸೈಟಿ ಬ್ಲಡ್ ಬ್ಯಾಂಕ್, ಲೇಡಿಗೋಶನ್ ಆಸ್ಪತ್ರೆ ಕುಡ್ಲ, ಲಯನ್ಸ್ ಕ್ಲಬ್ ಅಶೋಕ ನಗರದ ಒಟ್ಟುಸೇರಿಗೆಡ್ ನೆತ್ತೆರ್ ಉಂಬೊಲಿ ಡಿ.17 ಕ್ಕ್ ಕಸೈಗಲ್ಲಿ ಶಾಲೆದ ಚಾವಡಿಡ್ ನಡಪರೆ ಉಂಡು.
ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಬಂದಾರ್ ಪೊಲೀಸ್ ಇನ್ಸ್ ಪೆಕ್ಟರ್ ಅಝ್ಮ್ ತ್ ಅಲಿ, ಕುಡ್ಲ ಮಹಾನಗರ ಪಾಲಿಕೆದ ಕಾರ್ಪೊರೇಟರ್ ಝೀನತ್ ಶಂಸುದ್ದೀನ್, ಪೂರ್ಣಿಮಾ, ಅಶೋಕ ನಗರ ಲಯನ್ಸ್ ಕ್ಲಬ್ ದ ಗುರ್ಕಾರೆ ಚರಣ್ ಆಳ್ವ, ಬಂದಾರು ದ.ಕ.ಜಿ.ಪಂ ಸರಕಾರಿ ಉರ್ದು ಪ್ರಾಥಮಿಕ, ಪ್ರೌಢ ಶಾಲೆದ ಗುರ್ಕಾರೆ ಬಿ. ಮುಹಮ್ಮದ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಗುರ್ಕಾರೆ ಮಕ್ಬೂಲ್ ಅಹ್ಮದ್, ಪ್ರಧಾನ ಕಾರ್ಯದರ್ಶಿ ದೇವದಾಸ್ ಎನ್ ಪೂಜಾರಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
