ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯಡ್ ಷಷ್ಠಿದ ದಿನವಾಯಿನ ಸೋಮಾರ ಬೊಲ್ಪುಗು ಭಕ್ತೆರೆನ ಸಮ್ಮುಖಡ್ ಚಂಪಾಷಷ್ಠಿ ಜಾತ್ರೆ ಉಚ್ಚಯ, ಮಲ್ಲ ತೇರ್ ಒಯಿಪುನ ಲೇಸ್ ಮುಗಿತಲ ಆಂಡ್.
ಬೊಲ್ಪುಗು ಶ್ರೀ ಕುಕ್ಕೆ ಸುಬ್ರಹ್ಮಣ್ಯ ದೇವೆರೆನ ಮಲ್ಲ ತೇರ್ ಒಯಿಪುನ ಲೇಸ್ ದ ವೈದಿಕ ವಿದಿವಿಧಾನನ್ ಶ್ರೀ ದೇವಲ್ಯದ ಪ್ರಧಾನ ಅರ್ಚಕೆರ್ ಸೀತಾರಾಮ ಎಡಪಡಿತ್ತಾಯೆರ್ ಮಲ್ತೆರ್.
ಸಾರರ್ದ್ ಎಚ್ಚ ಭಕ್ತೆರ್ ಶ್ರೀ ದೇವೆರೆನ ಮಲ್ಲ ತೇರ್ ನ್ ಜಯಘೋಷದೊಟ್ಟಿಗೆ ಒಯಿತೆರ್. ವರ್ಷಡ್ ಒಂಜಿ ಸರ್ತಿ ಮಾತ್ರ ಸೇವೆ ಸಂದಾಯೆರೆ ಅವಕಾಶ ಇಪ್ಪುರ್ನೆದಾವೆರ ಬ್ರಹ್ಮರಥೋತ್ಸವ ಸೇವೆನ್ 148 ಭಕ್ತೆರ್ ಸಂದಾಯೆರ್. ಅಂಚೆನೆ ಬ್ರಹ್ಮರಥೋತ್ಸವ ಸೇವೆ ಸಂದಾಯಿನ ಭಕ್ತೆರೆಗ್ ತೇರ್ ಒಯಿಪೆರೆ ಅನುಕೂಲ ಆಪುಲೆಕ್ಕ ವಿಶೇಷ ಪಾಸ್ ನ್ ಕೊರ್ದಿತ್ತೆರ್. ನೆರ್ದ್ ಬ್ರಹ್ಮರಥೋತ್ಸವ ಪೊರ್ಲುಡು ಮುಗಿತಲ ಆಂಡ್.
ಸುರುಕು ದೇವಲ್ಯದ ಪಿದಯಿ ಕುಕ್ಕೆ ಸುಬ್ರಹ್ಮಣ್ಯ ಬೊಕ್ಕ ಉಮಾಮಹೇಶ್ವರ ದೇವೆರೆನ ಪಲಕ್ಕಿ ಉಚ್ಚಯ ನಡತ್ಂಡ್. ಬೊಕ್ಕ ರಾಜಬೀದಿಡ್ ನಾಗಸ್ವರ, ಪಂಚವಾದ್ಯ, ಬ್ಯಾಂಡ್, ಜಾಗಟೆ, ಶಂಖ ವಾದ್ಯ ಬೊಕ್ಕ ಚೆಂಡೆ ವಾದನಲೆನ ಹಿಮ್ಮೇಳಡ್ ಸಾಲಾಂಕೃತ ಆನೆ, ಬಿರುದಾವಳಿ ನಡತ್ಂಡ್.
ಪಂಚಮಿ ರಥಡ್ ಉಮಾಮಹೇಶ್ವರ ದೇವೆರ್ ಕುಲ್ಲುದು ಇತ್ತೆರ್. ಬೊಕ್ಕ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವೆರೆಗ್ ಮಹಾ ಮಂಗಳಾರತಿ ನಡತ್ಂಡ್. ಪೂಜೆದ ಬೊಕ್ಕ ಶ್ರೀ ದೇವಲ್ಯದ ಪ್ರಧಾನ ಅರ್ಚಕೆರ್ ಸೀತಾರಾಮ ಎಡಪಡಿತ್ತಾಯೆರ್ ಶ್ರೀ ದೇವೆರೆಗ್ ಸುವರ್ಣವೃಷ್ಠಿ ಮಲ್ತೆರ್. ಬೊಕ್ಕ ಭಕ್ತೆರೆಗ್ ಧನ, ಕನಕ, ಪೂವು, ಫಲಸೊತ್ತು ಪ್ರಸಾದನ್ ರಥರ್ದ್ ಭಕ್ತೆರೆನಂಚಿ ಪಾರಾಯೆರ್. ಭಕ್ತೆರ್ ನಾಣ್ಯ, ಎಡ್ಡೆ ಮುಂಚಿ, ದಾಸೆಮಿನ್ ತೇರ್ ಗ್ ರಾಪಾಯೆರ್. ಅವೆರ್ದ್ ಬೊಕ್ಕ ಪಂಚಮಿ ರಥೋತ್ಸವ ನಡತ್ಂಡ್.
ಬೊಕ್ಕ ದೇವಲ್ಯದ ಪಿದಯಿಡ್ ಇಪ್ಪುನ ದ್ವಾದಶಿ ಮಂಟಪಡ್ ಮಯೂರ ವಾಹನಡ್ ಕುಕ್ಕೆ ಸುಬ್ರಹ್ಮಣ್ಯ ದೇವೆರೆಗ್ ಬೊಕ್ಕ ಉಮಾಮಹೇಶ್ವರ ದೇವೆರೆಗ್ ಪೂಜೆ ನಡತ್ಂಡ್. ಅಂಚೆನೆ ಬ್ರಹ್ಮರಥ ಪರಕೆ ಸೇವೆ ಸಂದಾಯಿನಕ್ಲೆಗ್ ಪ್ರಧಾನ ಅರ್ಚಕೆರ್ ಶಾಲ್ ಪೊದೆಪಾದ್ ಮಹಾಪ್ರಸಾದ ಕೊರಿಯೆರ್.
ಈ ಪೊರ್ತುಡು ಸುಳ್ಯ ಶಾಸಕಿ ಭಾಗೀರಥಿ ಮುರುಳ್ಯ, ಜಿಲ್ಲಾಧಿಕಾರಿ ಮುಲ್ಲೆ ಮುಹಿಲನ್ ಎಂ.ಪಿ, ಪೊಲೀಸ್ ವರಿಷ್ಠಾಧಿಕಾರಿ ಋಷ್ಯಂತ್, ಪುತ್ತೂರು ಉಪವಿಭಾಗ ಸಹಾಯಕ ಆಯುಕ್ತೆರ್ ಗಿರೀಶ್ನಂದನ್, ಯುವ ಉದ್ಯಮಿ ಅಜಿತ್ ಶೆಟ್ಟಿ ಕಡಬ, ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಮೋಹನ್ರಾಂ ಸುಳ್ಳಿ, ಕಾರ್ಯನಿರ್ವಹಣಾಧಿಕಾರಿ ಡಾ.ನಿಂಗಯ್ಯ, ಸಹಾಯಕ
ಕಾರ್ಯನಿರ್ವಹಣಾಧಿಕಾರಿ ರಾಜಣ್ಣ, ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್ ಬೊಕ್ಕ ಸಾರರ್ದ್ ಎಚ್ಚ ಭಕ್ತೆರ್ ಪಾಲ್ ಪಡೆದಿತ್ತೆರ್.
