ಒಡಿಪು: ಕಾರ್ಲ ತಾಲೂಕ್ ದ ಮುನಿಯಾಲ್ ಡ್ ಅಪರೂಪದ ಸಾಂಪ್ರದಾಯಿಕ ಕಂಬುಲ ಆಚರಣೆ ಇಂಚಿಪ್ಪ ನಡತ್ಂಡ್.
ಕಂಬುಲದ ಕಂಡಡ್ ಎರ್ಲು ಬಲಿತಿನ ಬೊಕ್ಕ ಹದವಾಯಿನ ಮಣ್ಣ್ ಡ್ ಜವನೆರೆಗ್ ಬೇತೆ ಬೇತೆ ಪಂತೊನ್ ಆಯೋಜನೆ ಮಲ್ತ್ ದ್ ಇತ್ತ್ಂಡ್. ಕೆಸರ್ ಕಂಡದ ಪಂತೊಡು ಜವನೆರ್ ಪಾಲ್ ಪಡೆದ್ ಖುಷಿ ಪಡೆಯೆರ್. ಅಂಚೆನೆ ಈ ಮುನಿಯಾಲು ಕಂಬುಲದ ಕೆಸರ್ ಕಂಡಡ್ ಬಲಿತ್ ದ್ ಗೆಂದಿನಕ್ಲೆಗ್ ಇನಾಮುನ್ ಕೊರ್ದು ಮಾನಾದಿಗೆ ಮಲ್ತೆರ್.
ಲಂಬೋರ್ಗಿನಿ ಇಂಡಿಯಾ ಪೊಸ ಸೂಪರ್ ಕಾರ್ ರೆವೊಲುಟೊನ್ ಭಾರತಡ್ ಬುಡುಗಡೆ ಮಲ್ದ್ಂಡ್.
ನೆತ್ತ ಎಕ್ಸ್ ಶೋರೂಂ ಬಿಲೆ 8.89 ಕೋಟಿ ರೂ. ಉಂಡು. ಈ ಕಾರ್ ಕೇವಲ 2.5 ಸೆಕೆಂಡ್ ಡ್ 100KMPH ವೇಗಡ್ ಪೋಪುಂಡು. ನೆಟ್ಟ್ 6.5 ಲೀಟರ್ V12 ಎಂಜಿನ್ ಉಂಡು. ಉಂದು 9250RPM ಡ್ 803bhp ಬೊಕ್ಕ 6750RPM ಡ್ 712NM ದ ಗರಿಷ್ಠ ಟಾರ್ಕ್ ನ್ ಉತ್ಪಾದನೆ ಮಲ್ಪುಂಡು. ಎಂಜಿನ್ ನ್ 8 ಸ್ಪೀಡ್ ಡ್ಯುಯಲ್ ಕ್ಲಚ್ ಗೇರ್ ಬಾಕ್ಸ್ ದೊಟ್ಟಿಗೆ ಟ್ಯೂನ್ ಮಲ್ಪುಂಡು. ನೆತ್ತ ಗರಿಷ್ಠ ವೇಗ 350KMPH ಉಂಡು.
ಪ್ರೊ ಕಬಡ್ಡಿದ 2ನೇ ಪಂತದ ಲೀಗ್ ಮ್ಯಾಚ್ ಎಲ್ಲೆರ್ದ್ ಬೆಂಗ್ಲೂರ್ ದ ಕಂಠೀರವ ಒಳಾಂಗಣಡ್ ನಡಪರೆ ಉಂಡು.
ಈ ಮ್ಯಾಚ್ ಡಿ.13 ಮುಟ್ಟ ನಡಪುಂಡು. ಒಟ್ಟು 13 ಮ್ಯಾಚ್ ನಡಪರೆ ಉಂಡು. ಬೆಂಗ್ಲೂರ್ ಬುಲ್ಸ್ ಕೂಟ ಡಿ.8 ಕ್ಕ್ ದಬಾಂಬ್ ದಿಲ್ಲಿ, ಡಿ.9 ಕ್ಕ್ ಹರ್ಯಾಣ ಸ್ಟೀಲರ್ಸ್, ಡಿ.11 ಕ್ಕ್ ಪಟ್ನಾ ಪೈರೇಟ್ಸ್, ಡಿ.13 ಕ್ಕ್ ಜೈಪುರ ಪಿಂಕ್ ಪ್ಯಾಂಥರ್ಸ್ ವಿರುದ್ಧ ಗೊಬ್ಬೆರೆ ಉಂಡು.
2022-23 ತ್ತ ಹಣಕಾಸು ವರ್ಷಡ್ ದೇಶ ಇಡೀ ಕೈದಿಲೆಗ್ 2528 ಕೋಟಿ ರೂ. ಕರ್ಚಿ ಆತ್ಂಡ್ ಪಂದ್ ಕೇಂದ್ರ ಸರ್ಕಾರ ತೆರಿಪಾದ್ಂಡ್.
ಹರಿಯಾಣಡ್ 406 ಕೋಟಿ ರೂ., ಉತ್ತರ ಪ್ರದೇಶಡ್ 403 ಕೋಟಿ ರೂ. ಕರ್ಚಿ ಆತ್ಂಡ್. 2018 ಟ್ಟ್ ದೇಶದ ಒಟ್ಟು ಜೈಲ್ ದ ಸಂಖ್ಯೆ 1341 ಇತ್ತ್ಂಡ್. ಆಂಡ 2022 ತ್ತ ಪೊರ್ತುಡು 1330 ಆತ್ಂಡ್ ಪಂದ್ ರಾಜ್ಯಸಭೆಟ್ಟ್ ಸರ್ಕಾರ ತೆರಿಪಾದ್ಂಡ್.
ಅಸ್ಸಾಂದ ಗುವಾಹಟಿಡ್ ಇನಿ ಬೊಲ್ಪುಗು 3.5 ಬಿರ್ಸ್ ದ ಭೂಕಂಪ ಆತ್ಂಡ್ ಪಂದ್ ರಾಷ್ಟ್ರೀಯ ಭೂಕಂಪಶಾಸ್ತ್ರ ಕೇಂದ್ರ ತೆರಿಪಾದ್ಂಡ್.
ಭೂಮಿದ 5KM ಅಡಿಟ್ಟ್ ಈ ಭೂಕಂಪ ಆತ್ಂಡ್. ನೆರ್ದ್ ಒವ್ವೇ ತೊಂದರೆ ಆಯಿನ ಬಗೆಟ್ಟ್ ವರದಿ ಆತಿಜಿ ಪಂದ್ ತೆರಿದ್ ಬೈದ್ಂಡ್.
ಬೆದ್ರ: ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಬೆದ್ರ ಯುವವಾಹಿನಿ ಘಟಕದ ಪೊಸ ಗುರ್ಕಾರೆಯಾದ್ ಉದ್ಯಮಿ ಶಂಕರ್ ಎ. ಕೋಟ್ಯಾನ್ ಆಯ್ಕೆ ಆತೆರ್.
ಕಾರ್ಯದರ್ಶಿಯಾದ್ ಗಿರೀಶ್ ಕೋಟ್ಯಾನ್, ಒತ್ತು ಗುರ್ಕಾರೆಯಾದ್ ಮುರಳೀಧರ ಕೋಟ್ಯಾನ್, ಪ್ರಭಾಕರ ಚಾಮುಂಡಿಬೆಟ್ಟ, ಜತೆ ಕಾರ್ಯದರ್ಶಿಯಾದ್ ವಿನೀತ್, ಸಂಪತ್ ಬಂಗೇರ, ಕೋಶಾಧಿಕಾರಿಯಾದ್ ಪ್ರತಿಭಾ ಸುರೇಶ್, ನಿರ್ದೇಶಕೆರಾದ್ ಅಶೋಕ ಬಿ., ಸೌಮ್ಯ ಕೋಟ್ಯಾನ್, ಹನಿ ಎ.ಕೋಟ್ಯಾನ್, ಶುಭಕರ ಅಂಚನ್, ವಸಂತ ಪೂಜಾರಿ, ಯೋಗಿತಾ ಸದಾನಂದ, ಶಿವರಾಮ್ ಕಡಂದಲೆ, ಸ್ವಪ್ನ, ಪವನ್, ಆದರ್ಶ್ ಸುವರ್ಣ, ಜಯಶೀಲ, ಅಶ್ವಿನಿ ಬೊಕ್ಕ ಅನಿತಾ ಮುಂಡ್ರೊಟ್ಟು ಆಯ್ಕೆ ಆತೆರ್.
ಈ ಪೊರ್ತುಡು ಘಟಕದ ಮಾಜಿ ಗುರ್ಕಾರೆ ನವಾನಂದ, ಜಗದೀಶ್ಚಂದ್ರ ಡಿ.ಕೆ, ಸುಶಾಂತ್ ಕರ್ಕೇರ, ಪಿ ಹರಿಪ್ರಸಾದ್, ಗೌರವ ಸಲಹೆಗಾರೆರಾದ್ ಹರೀಶ್ ಕಾಪಿಕಾಡ್ ಬೊಕ್ಕ ಯೋಗೀಶ್ ಕೈರೋಡಿ ಪಾಲ್ ಪಡೆದಿತ್ತೆರ್.
ಉಪ್ಪಳ, ಸಸಿಹಿತ್ಲು ನೆಲ್ಲಿಕತ್ತಿದ ತರವಾಡು ಇಲ್ಲಲ್ ಬೇತೆ ಬೇತೆ ವೈದಿಕ ಲೇಸ್ ನಡಪರೆ ಉಂಡು.
ಫೆ.4 ಕ್ಕ್ ಶ್ರೀ ದೈವೊಲೆನ ಬಾಲಾಲಯಡ್ ಪ್ರತಿಷ್ಠೆ, ವೆಂಕಟರಮಣ ಮುಡಿಪುನ್ ತಿರುಪತಿಗ್ ಕೊನೊಯೆರೆ ಉಂಡು.
ಫೆ.24 ಕ್ಕ್ ನಾಗದೇವೆರೆನ ಪೊಸ ಕಲ್ಲ್ ನ್ ಪಾಡಿಯೆರೆ ಉಂಡು. ಅನಿರ್ದ್ ಕುಟುಂಬದ ಮಾತ ಸದಸ್ಯೆರ್ ವ್ರತಡ್ ಇಪ್ಪೊಡು ಪಂದ್ ಪ್ರಶ್ನೆಡ್ ತೆರಿದ್ ಬೈದ್ಂಡ್.
ಏ.5 ಕ್ಕ್ ಪೊಸ ತರವಾಡು ಇಲ್ಲದ ಇಲ್ಲ್ ಒಕ್ಕೆಲ್, ನಾಗದೇವೆರೆನ ಪ್ರತಿಷ್ಠೆ, ಬೊಕ್ಕ ರಕ್ತೇಶ್ವರಿ ದೇವಿನ ಪುನರ್ ಪ್ರತಿಷ್ಠೆ ನಡಪರೆ ಉಂಡು.
ಏ.12 ಕ್ಕ್ ಬೊಲ್ಪುಗು ಧರ್ಮ ದೈವೊಲೆನ ಪ್ರತಿಷ್ಠೆ ಲೇಸ್, ವೆಂಕಟರಮಣ ಮುಡಿಪು ಕಟ್ಟೆರೆ, ಬೊಕ್ಕ ಅವ್ವೆ ದಿನ ಬಯ್ಯಗ್ ವರ್ಷಾವಧಿದ ಪರ್ವ, ಮತ ದೈವೊಲೆಗ್ ಕೋಲ ನಡಪರೆ ಉಂಡು.
ಏ.13 ಕ್ಕ್ ಗುಳಿಗನ ಕೋಲ ಬೊಕ್ಕ ಮರುಪುತ್ತರಿ ನಡಪರೆ ಉಂಡು.
ಈ ಮತ ಲೇಸ್ ನ್ ಸರಿಯಾಯಿನ ಪೊರ್ತುಡು ನಡಪಾಯೆರೆ ಬೊಕ್ಕ ಇಲ್ಲದ ಕೆಲಸನ್ ಮುಗಿಪೆರೆ ಕಾಸ್ ದ ಭಂಗ ಉಂಡು. ಅಂಚಾದ್ ಕುಟುಂಬದ ಪ್ರತಿಯೊರಿ ಸದಸ್ಯೆರ್ ಅಕ್ಲೆಗ್ ಪಾಡಿನ ವಂತಿಗೆ ಕಾಸ್ ನ್ ಆಯಿನಾತ್ ಬೇಗ ತರವಾಡ್ ಕನತ್ ದ್ ಕೊರ್ದು ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಉಪ್ಪಳ ಸಸಿಹಿತ್ಲು ನೆಲ್ಲಿಕತ್ತಿ ತರವಾಡುದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಪೆಜಮಾಡಿ ಬಿರುವೆರ್ ಬ್ರದರ್ಸ್ ದ ಮುತಾಲಿಕೆಡ್ ಸುರುತ್ತ ಸರ್ತಿ ರಾಜ್ಯಮಟ್ಟದ ಕ್ರಿಕೆಟ್ ಪಂತೊ ಬಿರುವೆರ್ ಟ್ರೋಫಿ 2024 ಫೆ.10 ಬೊಕ್ಕ 11 ಕ್ಕ್ ಪೆಜಮಾಡಿ ಬಸ್ತಿಪಡ್ಪು ರಾಜೀವ್ ಗಾಂಧಿ ಕ್ರೀಡಾಂಗಣಡ್ ನಡಪರೆ ಉಂಡು.
ಈ ಮ್ಯಾಚ್ ಡ್ ಗೆಂದಿನಕ್ಲೆಗ್ ಸುರುತ್ತ ಇನಾಮು 2,22,222 ಬೊಕ್ಕ ಬಿರುವೆರ್ ಟ್ರೋಫಿ, ರಡ್ಡನೇ ಇನಾಮು 1,22,222 ಬೊಕ್ಕ ಬಿರುವೆರ್ ಟ್ರೋಫಿ ತಿಕ್ಕುಂಡು. ಅಂಚೆನೆ ಪ್ರತಿ ಮ್ಯಾಚ್ ಗ್ ಪಂದ್ಯ ಶ್ರೇಷ್ಠ, ಫೈನಲ್ ಪಂದ್ಯ ಶ್ರೇಷ್ಠ, ಸರಣಿ ಶ್ರೇಷ್ಠ, ಉತ್ತಮ ದಾಂಡಿಗ, ಉತ್ತಮ ಎಸೆತಗಾರ ಇನಾಮುನ್ ಕೊರ್ದು ಮಾನಾದಿಗೆ ಮಲ್ಪೆರೆ ಉಲ್ಲೆರ್. ಈ ಪಂತೊಡು ಪಾಲ್ ಪಡೆಪುನ ಗೊಬ್ಬುಗಾರೆರ್ ತನ್ನ ಪುದರ್ ನ್ ಜ.20 ತ್ತೊಲಯಿ ನೊಂದಣಿ ಮಲ್ಪೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ತುಳು ಸರಣಿ ಲೇಸ್ ದ ಸಂಚಿಕೆ ಡಿ.7 ಗುರುವಾರ ಬಯ್ಯಗ್ 5 ಗಂಟೆಗ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾತೆರಿಯೆರೆ ಉಲ್ಲೆರ್. ಡಿ.8 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಕುಡ್ಲ ಬ್ರಹ್ಮಶ್ರೀ ನಾರಾಯಣ ಗುರುಸ್ವಾಮಿ ಪ್ರಕಾಶನ, ಚಾರಿಟೇಬಲ್ ಟ್ರಸ್ಟ್ (ರಿ.) ಬೊಕ್ಕ ಆತ್ಮಶಕ್ತಿ ಪತ್ರಿಕೆದ ದ್ವಿದಶಮಾನೋತ್ಸವ ಡಿ.24 ಐತಾರ ಕುದ್ರೋಳಿದ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೊರಗಪ್ಪ ಸಭಾಭವನಡ್ ನಡಪರೆ ಉಂಡು.
ಈ ಲೇಸ್ ಡ್ ಕುದ್ರೋಳಿ ಶ್ರೀ ಗೋಕರ್ಣನಾಥ ದೇವಲ್ಯದ ಗುರ್ಕಾರೆ ಸಾಯಿರಾಮ್ ತುಡರ್ ಅರ್ಲಾವೆರೆ ಉಲ್ಲೆರ್. ಗೌರವ ಉಪಸ್ಥಿತಿಡ್ ಕುಡ್ಲ ನಗರ ಪಾಲಿಕೆದ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ವಿರೋಧ ಪಕ್ಷದ ನಾಯಕೆ ಪ್ರವೀಣ್ ಚಂದ್ರ ಆಳ್ವ ಪಾಲ್ ಪಡೆಯೆರೆ ಉಲ್ಲೆರ್.
ಬಯ್ಯಗ್ ನಡಪುನ ಸಭಾ ಲೇಸ್ ದ ಗುರ್ಕಾರ್ಮೆನ್ ಬ್ರಹ್ಮಶ್ರೀ ನಾರಾಯಣ ಗುರುಸ್ವಾಮಿ ಪ್ರಕಾಶನ ಬೊಕ್ಕ ಚಾರಿಟೇಬಲ್ ಟ್ರಸ್ಟ್ (ರಿ.) ದ ಗುರ್ಕಾರೆ ವಾಮನ್ ಕುದ್ರೋಳಿ ಒಯಿಸೊನ್ವೆರ್. ಮಾಜಿ ವಿತ್ತ ಸಚಿವೆರ್ ಬಿ. ಜನಾರ್ದನ ಪೂಜಾರಿ ತುಡರ್ ಅರ್ಲಾವೆರೆ ಉಲ್ಲೆರ್. ವಿಧಾನ ಪರಿಷತ್ ಸದಸ್ಯೆರ್ ಬಿ.ಕೆ ಹರಿಪ್ರಸಾದ್ ಆತ್ಮಶಕ್ತಿ ಪ್ರಶಸ್ತಿ ಪ್ರದಾನ ಮಲ್ಪುವೆರ್. ಮಾಜಿ ಸಚಿವೆರ್ ಕೋಟ ಶ್ರೀನಿವಾಸ ಪೂಜಾರಿ ಸಾಧನಾ ಶ್ರೇಷ್ಠ ಪ್ರಶಸ್ತಿ ಪುರಸ್ಕಾರ ಮಲ್ಪುವೆರ್. ವಿಧಾನಸಭೆ ಸಭಾಧ್ಯಕ್ಷೆರ್ ಯುಟಿ ಖಾದರ್, ವಿಧಾನ ಪರಿಷತ್ ಸದಸ್ಯೆರ್ ಹರೀಶ್ ಕುಮಾರ್ ಬೊಲ್ತೇರ್ ಪ್ರತಿಭಾವಂತೆರೆಗ್ ಸನ್ಮಾನ ಮಲ್ಪೆರೆ ಉಲ್ಲೆರ್. ಮಾಜಿ ಸಚಿವೆರ್ ವಿನಯ ಕುಮಾರ್ ಸೊರಕೆ ಆತ್ಮಶಕ್ತಿ ವಿಶೇಷಾಂಕ ಬುಡುಗಡೆ ಮಲ್ಪುವೆರ್. ಶಾಸಕೆರ್ ಉಮಾನಾಥ ಕೋಟ್ಯಾನ್ ಅಭಿನಂದನಾ ಗ್ರಂಥ ತ್ರಿವಿಕ್ರಮ ಬುಡುಗಡೆ ಮಲ್ಪುವೆರ್. ಶಾಸಕೆರ್ ವೇದವ್ಯಾಸ ಕಾಮತ್ ಅಸಹಾಯಕೆರೆಗ್ ಪನವುದ ಸಕಾಯನ್ ಪಟ್ಟುವೆರ್. ಸಹಾಯಕ ಪೊಲೀಸ್ ಆಯುಕ್ತೆರ್ ಮಹೇಶ್ ಕುಮಾರ್ ಎಸ್ ವಿದ್ಯಾರ್ಥಿವೇತನ ಬುಡುಗಡೆ ಮಲ್ಪುವೆರ್. ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್ ಆರ್, ಪ್ರಬಂಧ ಪಂತೊಡು ಗೆಂದಿನಕ್ಲೆಗ್ ಇನಾಮು ಕೊರಿಯೆರೆ ಉಲ್ಲೆರ್. ಈ ಲೇಸ್ ಡ್ ನಿವೃತ್ತ ಗ್ರಂಥಪಾಲಕೆರ್ ಡಾ.ಎಂ.ಕೆ ಬಂಡಿ, ಆತ್ಮಶಕ್ತಿ ಪತ್ರಿಕೆದ ವ್ಯವಸ್ಥಾಪಕ ಸಂಪಾದಕೆರ್ ಸಹಕಾರರತ್ನ ಚಿತ್ತರಂಜನ್ ಬೋಳಾರ್ ಪಾಲ್ ಪಡೆಯೆರೆ ಉಲ್ಲೆರ್.
ಅಂಚೆನೆ ಸಂದೇಶ ಬೆಳ್ಳೂರು ಮೆರೆರ್ದ್ ಸ್ಟ್ಯಾಂಡ್ ಅಪ್ ಕಾಮಿಡಿ, ಕು. ರಕ್ಷಾ ಸತೀಶ್ ಮೆರೆರ್ದ್ ಭರತನಾಟ್ಯ ಬೊಕ್ಕ ಆತ್ಮಶಕ್ತಿ ವಿವಿಧೋದ್ದೇಶ ಸಹಕಾರಿ ಸಂಘದ ಸಿಬ್ಬಂದಿಲೆರ್ದ್ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು ಪಂದ್ ಆತ್ಮಶಕ್ತಿ ಪತ್ರಿಕೆದ ಗುರ್ಕಾರೆ ವಾಮನ್ ಕುದ್ರೋಳಿ, ಒತ್ತು ಗುರ್ಕಾರೆ ಚಂದ್ರಹಾಸ ಮರೋಳಿ, ಕಾರ್ಯದರ್ಶಿ ಗೋಪಾಲ್ ಎಂ, ವ್ಯವಸ್ಥಾಪಕ ಸಂಪಾದಕೆರ್ ಸಹಕಾರ ರತ್ನ ಚಿತ್ತರಂಜನ್ ಬೋಳಾರ್ ಬೊಕ್ಕ ಟ್ರಸ್ಟಿಲು ಲೆಪ್ಪೋಲೆಡ್ ತೆರಿಪಾದೆರ್.
