ರಾಜ್ಯದ ಸುದ್ದಿ | State News

ಯುಪಿಐ‌ಡ್ 2000 ₹ ರ್ದ್ ಜಾಸ್ತಿ ಕಾಸ್ ದೆತೊಂಡ ಶೇ.0.4 ಚಾರ್ಜ್ ಆಪುಂಡು!

Sep 16, 2026

ಹೊಸದಿಲ್ಲಿ : ನನ ದುಂಬಗ್ ಬೇರದಕುಲು ಯುಪಿಐ ಮುಕೇನ 2000 ರೂ. ಎಚ್ಚ ದುಡ್ಡು ಸ್ವೀಕಾರ ಮಲ್ತ್ಂಡ್ ಶೇ.04 ದಾತ್ ಶುಲ್ಕ ಕೊರೊಡಾಪುಂಡು ಪಂದ್ ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (ಎನ್‌ಪಿಸಿಐ) ತೆರಿಪಾದ್ಂಡ್.
ಈ ಪೊಸ ನಿಯಮ ಆ.15 ರ್ದ್ ಜಾರಿ ಆತ್ಂಡ್. ಈ ಶುಲ್ಕ ಬೇರದಕ್ಲೆಗ್ ಮಾತ್ರ. ಗಿರಾಕಿಲೆಗ್ ಅನ್ವಯ ಆಪುಜಿ.
ಪೊಸ ನಿಯಮದ ಪ್ರಕಾರ 2000 ರೂ. ಎಚ್ಚ ದ ಪೇಮೆಂಟ್ ಯುಪಿಐಡ್ ದೆತೊಂಡ ಶೇ.0.4ರ್ದ್ 300 ರೂ. ಮುಟ್ಟ ಚಾರ್ಜ್ ಬೂರುಂಡು. ಕ್ಯುಆರ್ ಕೋಡ್ ಗಲಸ್‌ದ್ 1 ಲಕ್ಷ ರೂ. ಮುಟ್ಟ ಬೇರ ದೆತೊನ್ನ ಎಲ್ಯ ಬೇರದಕುಲು ಎಂಡಿಆರ್ ಕಟ್ಟೊಂಡುಂದಿಜ್ಜಿ.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಬೆಂಗಳೂರುದ ಸುದ್ದಿ

ತುಳು ಬಾಸೆ ಅಧಿಕೃತದ ಘೋಷಣೆ : ಸಚಿವೆರ್ ಶಿವರಾಜ್ ತಂಗಡಗಿ ವಿಶ್ವಾಸ

Sep 16, 2026

ಬೆಂಗಳೂರು: ಕರಾವಳಿ ಕರ್ನಾಟಕದ ಒಂಜಿ ಕೋಟಿರ್ದ್‌ಲ ಎಚ್ಚ ಸಂಖ್ಯೆಡ್ ಉಪ್ಪುನ ತುಳುವೆರ್‌ನ ಏತೋ ವರ್ಷದ ಕನ ಆದುಪ್ಪುನ ‘ತುಳು’ ಬಾಸೆಗ್ ರಾಜ್ಯಡ್ ರಡ್ಡನೇ ಹೆಚ್ಚುವರಿ ಅಧಿಕೃತ ಭಾಷೆದ ಸ್ಥಾನಮಾನ ಕೊರ್ಪಿನ ಬಗೆಟ್ಟ್ ರಾಜ್ಯ ಸರ್ಕಾರ ಅತ್ಯಂತ ಗಂಭೀರವಾದ್ ಚಿಂತನೆ ಮಲ್ದ್ಂಡ್. ಕಾನೂನಾತ್ಮಕ ಬೊಕ್ಕ ಸಂವಿಧಾನಾತ್ಮಕ ಚೌಕಟ್ಟ್‌ದ ಉಲಯಿ ಅಗತ್ಯ ಕ್ರಮ ದೆತೊನರೆ ಪೂರಕ ಪ್ರಯತ್ನ ಆತ್ಂಡ್” ಪಂದ್ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಚಿವ ಶಿವರಾಜ್ ತಂಗಡಗಿ ತೆರಿಪಾದೆರ್.
ಈ ಬಗೆಟ್ಟ್ ತನ್ನ ಅಧಿಕೃತ ‘ಎಕ್ಸ್’ ಖಾತೆಡ್ ಮಹತ್ವದ ಪೋಸ್ಟ್ ಪಾಡ್ದಿನ ಸಚಿವೆರ್, ತುಳು ಭಾಷೆಗ್ ಅಧಿಕೃತ ಸ್ಥಾನಮಾನ ಕೊರ್ಪಾವರೆ ಸರ್ಕಾರ ದೆತೊಂದಿನ ಸರಣಿ ಬೇಲೆದ ವಿವರನ್ ಅಯಿಟ್ ಪಟ್ಟೊಂದೆರ್.
“ತುಳು ಭಾಷೆದ ಇತಿಹಾಸ, ಸಾಹಿತ್ಯ ಪರಂಪರೆ, ಲಿಪಿ, ಪ್ರಾಚೀನ ಬೊಕ್ಕ ಆಧುನಿಕ ಸಾಹಿತ್ಯ, ಕರಾವಳಿದ ಸಂಸ್ಕೃತಿ ಬೊಕ್ಕ ತುಳು ಶಾಸನದ ಬಗೆಟ್ಟ್ ಅಪಗನೇ ಸಮಗ್ರ ಅಧ್ಯಯನ ಮಲ್ದ್ಂಡ್. ಈ ವಿಷಯಗ್ ಸಂಬಂಧ ಪಟ್‌ದ್ ಡಾ. ಮೋಹನ್ ಆಳ್ವ ಮೆರೆನ ಅಧ್ಯಕ್ಷತೆಡ್ ರಚನೆ ಮಲ್ದಿನ ತಜ್ಞೆರ್‌ನ ಸಮಿತಿ, 2023ತ್ತ ಫೆಬ್ರವರಿ 14 ಕ್ಕ್ ಸರ್ಕಾರಗ್ ವರದಿ ಕೊರ್ದಿತ್ತ್ಂಡ್.
ಡಾ. ಆಳ್ವ ಸಮಿತಿದ ವರದಿದ ಮುಂದುವರಿದ ಭಾಗವಾದ್ ದೇಶದ ಬೇತೆ ಬೇತೆ ರಾಜ್ಯಲೆಡ್ ಪ್ರಾದೇಶಿಕ ಭಾಷೆಲೆಗ್ ಹೆಚ್ಚುವರಿ ಅತ್ತ್‌ಡ 2ನೇ ಅಧಿಕೃತ ಭಾಷೆದ ಸ್ಥಾನಮಾನ ಕೊರ್ಪಿನ ಕಾನೂನು ಮಾದರಿನ್ ಅಧ್ಯಯನ ಮಲ್ಪರೆ ಸರ್ಕಾರ ನಿರ್ಧಾರ ಮಲ್ದಿತ್ತ್ಂಡ್. ಈ ಉದ್ದೇಶಗಾದ್ 2025 ತ್ತ ಜುಲೈ 30 ಗು ವಿಶೇಷ ಅಧ್ಯಯನ ತಂಡ ರಚನೆ ಮಲ್ದಿತ್ತ್ಂಡ್ . ಈ ತಂಡ 2026 ತ್ತ ಜನವರಿ 19 ಬೊಕ್ಕ 20 ತಾರೀಕ್‌ಗ್ ಆಂಧ್ರಪ್ರದೇಶಗ್ ಭೇಟಿ ಕೊರ್ದು, ಅಲ್ತ ಅಧಿಕೃತ ಭಾಷಾ ವ್ಯವಸ್ಥೆ, ಅನುಷ್ಠಾನ ಮಲ್ದಿನ ಕಾನೂನು ಚೌಕಟ್ಟು ಬೊಕ್ಕ ಆಡಳಿತಾತ್ಮಕ ಮಾದರಿನ್ ಪರಿಶೀಲನೆ ಮಲ್ದ್ಂಡ್. ಅಯಿತ್ತ ವರದಿನ್ 2026 ತ್ತ ಮಾರ್ಚ್‌ಡ್ ಸರ್ಕಾರಗ್ ಕೊರ್ತುಂಡು. ತುಳು ಒಂಜಿ ಕಾಲಿ ಕರಾವಳಿದ ಬಾಷೆ ಅತ್ತ್, ಉಂದು ಕರ್ನಾಟಕದ ಬಾಷೆ. ಅವೆಕ್ಕ್ ಮಾನಾದಿಗೆ ಕೊರಿಯರೆ ಸರ್ಕಾರ ಬದ್ಧವಾದುಂಡು” ಪಂದ್ ಸಚಿವೆರ್ ತೆರಿಪಾದೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News ರಾಜ್ಯದ ಸುದ್ದಿ | State News

ಬಜ್ಪೆ ಏರ್‌ಪೋರ್ಟ್‌ಗ್ “ಕೋಟಿ ಚೆನ್ನಯ” ಪುದರ್ ದೀವರೆ ಮಿಥುನ್ ರೈ ಬಿನ್ನಾಪು

Sep 16, 2026

ಕುಡ್ಲ : ಕುಡ್ಲಡ್ ಸೆ.18 ಸುಕ್ರಾರ ನಡಪುನ ಕಡೀರ್‌ದ ಸಚಿವ ಸಂಪುಟ ಸಭೆಟ್ಟ್ ಬಜ್ಪೆದ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗ್ ತುಳುನಾಡ್‌ದ ಕಾರ್ಣಿಕ ಪುರುಷೆರಾಯಿನ “ಕೋಟಿ ಚೆನ್ನಯೆ”ರ್‌ನ ಪುದರ್ ದೀವರೆ ನಿರ್ಣಯ ದೆತೊಂದು ಕೇಂದ್ರ ಸರಕಾರೊಗು ಶಿಫಾರಸ್ ಮಲ್ಪೊಡು” ಪಂದ್ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಎಂ. ಮಿಥುನ್ ರೈ ಬಿನ್ನಾಪು ಮಲ್ದೆರ್.
ಈ ಬಗೆಟ್ಟ್ ಜಿಲ್ಲಾ ಉಸ್ತುವಾರಿ ಸಚಿವೆರ್ ಯು.ಟಿ. ಖಾದರ್ ಮುಕೇನ ಮುಖ್ಯಮಂತ್ರಿಲು ಡಿಕೆ ಶಿವಕುಮಾರ್‌ಗ್ ಓಲೆ ಕಡಪುಡ್ದೆರ್.
“ಕೋಟಿ ಚೆನ್ನಯೆರ್ ತುಳು ಮಣ್ಣ್‌ದ ಸ್ವಾಭಿಮಾನ,ಶೌರ್ಯ, ಸಾಮಾಜಿಕ ನ್ಯಾಯ ಬೊಕ್ಕ ಸಾಂಸ್ಕೃತಿಕ ಅಸ್ಮಿತೆದ ಸಂಕೇತವಾದುಲ್ಲೆರ್. ಅಂಚಾದ್ ಅಕ್ಲೆನ ಪುದರ್ ಶಾಶ್ವತ ಆಪಿಲೆಕ ಏರ್ಪೋರ್ಟ್ ‌ಗ್ ಪುದರ್ ದೀವೊಡು” ಪಂದ್ ಬಿನ್ನಾಪು ಮಲ್ದೆರ್.
ಕುಡ್ಲದ ವಿಮಾನ ನಿಲ್ದಾಣಗ್ ಕೋಟಿ ಚೆನ್ನಯೆರ್‌ನ ಪುದರ್ ದೀವೊಡು ಪನ್ಪಿನ ಪೊರ್ಂಬಾಟದ ಒಂಜಿ ಭಾಗವಾದ್ 2010 ನೇ ಇಸ್ವಿಡ್ ಡಿಸೆಂಬರ್ 10 ಕ್ಕ್ ಕೆಪಿಟಿ ಸರ್ಕಲ್ ರ್ದ್ ತನ್ನ ನೇತೃತ್ವಡ್ ದೊಂದಿ ಬೊಲ್ಪುದ ಮೆರವಣಿಗೆ ಮಲ್ದಿನ ಬಗ್ಗೆ ಓಲೆಡ್ ಮಿಥುನ್ ರೈ ನೆಂಪು ಮಲ್ದೆರ್.

Religious & Cultural News ಮಾತ ಧರ್ಮದ ಸುದ್ದಿ ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಬೊಂಬಾಯಿದ ಸುದ್ದಿ | Bombay News ರಪಕ್ಕ ಸುದ್ದಿ Flash News

ಸೆ.11: ಜರಿಮರಿ ಉಮಾ ಮಹೇಶ್ವರಿ ಮಂದಿರಗ್ ಪುತ್ತಿಗೆ ಸ್ವಾಮೀಜಿ ಭೇಟಿ

Sep 11, 2026

ಬೊಂಬೈ: ಒಡಿಪು ಶ್ರೀ ಪುತ್ತಿಗೆ ಮಠಾಧೀಶೆರಾಯಿನ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮೀಜಿಲು ಸೆ.11 ಕ್ಕ್ ಜರಿಮರಿದ ಶ್ರೀ ಉಮಾ ಮಹೇಶ್ವರಿ ಮಂದಿರಗ್ ಸೌಹಾರ್ದ ಬೊಕ್ಕ ಧಾರ್ಮಿಕ ಭೇಟಿ ಕೊರಿಯೆರೆ ಉಲ್ಲೆರ್.

ಆನಿ ಬಯ್ಯಗ್ 4 ಗಂಟೆಗ್ ಮಂದಿರಗ್ ಬರಿಯೆರೆ ಇಪ್ಪುನ ಸ್ವಾಮೀಜಿನ್ ದೇವಸ್ಥಾನದ ಆಡಳಿತ ಮಂಡಳಿ, ಅರ್ಚಕೆರೆನ ವೃಂದ ಬೊಕ್ಕ ಭಕ್ತ ವೃಂದದಕುಲು ಸಾಂಪ್ರದಾಯಿಕ ಸ್ವಾಗತದೊಟ್ಟಿಗೆ ಎದ್ಕೊನಿಯೆರೆ ಉಲ್ಲೆರ್.

ಶ್ರೀ ಉಮಾ ಮಹೇಶ್ವರಿ ಸನ್ನಿಧಿಡ್ ಪುತ್ತಿಗೆ ಸ್ವಾಮೀಜಿನ ಉಪಸ್ಥಿತಿಡ್ ಮಹಾಮಂಗಳಾರತಿ ಬೊಕ್ಕ ಇಸೇಸ ಪ್ರಾರ್ತನೆ ಬೊಕ್ಕ ಪೂಜೆದ ವಿಧಿ ವಿಧಾನಲು ಆದ್ ಬತ್ತಿನ ಭಕ್ತೆರೆನ್ ಉದ್ದೇಶಿಸಾದ್ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮೀಜಿ ಮೆರೆರ್ದ್ ಆಶೀರ್ವಚನ ನಡಪರೆ ಉಂಡು.

ಮಂದಿರದ ಭಜನಾ ಮಂಡಳಿರ್ದ್ ಇಸೇಸ ಭಕ್ತಿ ಸಂಗೀತ ಬೊಕ್ಕ ನಾಮಸಂಕೀರ್ತನೆ ಆದ್ ಧಾರ್ಮಿಕ ಸಭೆತ್ತ ಬೊಕ್ಕ ತೀರ್ಥ ಪ್ರಸಾದ ವಿನಿಯೋಗ ನಡಪರೆ ಉಂಡು.

ಲೇಸ್ ಡ್ ದೇವಸ್ಥಾನದ ಆಡಳಿತ ಮುಕ್ತೇಶ್ವರೆರ್, ಅರ್ಚಕೆರ್, ಭಜನಾ ಮಂಡಳಿ ಬೊಕ್ಕ ಉಪನಗರದ ನೂದೆರ್ದ್ ಎಚ್ಚ ಭಕ್ತೆರ್ ಪಾಲ್ ಪಡೆಯೆರೆ ಉಲ್ಲೆರ್.

ಈ ಲೇಸ್ ಗ್ ಸಾರ್ವಜನಿಕೆರ್ ಬೊಕ್ಕ ಮಾತ ಭಕ್ತೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಸ್ವಾಮೀಜಿನ ಆಶೀರ್ವಾದ ಬೊಕ್ಕ ದೇವೆರೆನ ಪ್ರಸಾದ ದೆತೊನೊಡು ಪಂದ್ ಮಂದಿರದ ಟ್ರಸ್ಟಿಲು, ಅರ್ಚಕೆರ್, ಭಜನಾ ಮಂಡಳಿ, ಭಕ್ತ ಮಂಡಳಿ ಪ್ರಕಟಣೆಡ್ ತೆರಿಪಾದೆರ್.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಬೆಂಗಳೂರುದ ಸುದ್ದಿ ರಪಕ್ಕ ಸುದ್ದಿ Flash News

ಜೈ ತುಲುನಾಡ್ ಬೆಂಗಳೂರು (ರಿ.)ವತಿರ್ದ್ ತುಳು ಅಧಿಕೃತ ಭಾಷೆಗೆ ಬಿನ್ನಾಪು

Sep 11, 2026

ಬೆಂಗ್ಲೂರು: ಕರ್ನಾಟಕದ ಹೆಚ್ಚುವರಿ ಅಧಿಕೃತ ಆಡಳಿತ ಭಾಷೆಯಾದ್ ತುಳು ಭಾಷೆನ್ ಘೋಷಣೆ ಮಲ್ಪುಲೆಕ್ಕ ಬೆಚ್ಚ ಆಯಿನ ಬೆಂಗ್ಲೂರು ಜೈ ತುಲುನಾಡ್ (ರಿ.) ಮುತಾಲಿಕೆಡ್ ಸರ್ವ ಸಂಘಲೆನ ಪರವಾದ್ ಬಿನ್ನಾಪು ಸಂದಾದೆರ್.

ಸೆ.18 ಕ್ಕ್ ಕುಡ್ಲಡ್ ನಡಪರೆ ಇಪ್ಪುನ ಸಚಿವ ಸಂಪುಟ ಸಭೆಟ್ಟ್ ತುಳು ಭಾಷೆನ್ ಕರ್ನಾಟಕದ ಹೆಚ್ಚುವರಿ ಅಧಿಕೃತ ಆಡಳಿತ ಭಾಷೆಯಾದ್ ಘೋಷಣೆ ಮಲ್ಪುನ ಬಗ್ಗೆ ಸರ್ಕಾರ ಸರಿಯಾಯಿನ ನಿರ್ಧಾರ ದೆತೊನೊಡು ಪಂದ್ ಸಂಘಟನೆಲೆನ ಪ್ರಮುಖೆರ್ ಒತ್ತಾಯ ಮಲ್ತೆರ್.

ಈ ಲೆಕ್ಕೊಡು ಕರ್ನಾಟಕ ವಿಧಾನಸಭೆತ್ತ ಸಚಿವೆರ್ ಯು.ಟಿ. ಖಾದರ್ ಮೆರೆನ ಮುಕೇನ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಮೆರೆಗ್ ಬಿನ್ನಾಪು ಸಂದಾಯೆರ್. ತುಳು ಭಾಷೆಗ್ ಅಧಿಕೃತ ಮಾನ್ಯತೆ ಕೊರ್ಪಿನ ಮುಕೇನ ತುಳು ಭಾಷೆದಕ್ಲೆನ ಮಾಸ್ತ್ ದಿನತ್ತ ಬೇಡಿಕೆನ್ ಈಡೇರಿಸಾವೊಡು ಪಂದ್ ಬಿನ್ನಾಪುಡು ಬೆಚ್ಚ ಆತೆರ್.

ತುಳು ಭಾಷೆ, ಸಂಸ್ಕೃತಿ ಬೊಕ್ಕ ಪರಂಪರೆದ ಸಂರಕ್ಷಣೆ, ಅಭಿವೃದ್ಧಿಗ್ ಅಧಿಕೃತ ಆಡಳಿತ ಭಾಷೆದ ಸ್ಥಾನಮಾನ ಮಹತ್ವದ ಹೆಜ್ಜೆ ಆಯೆರೆ ಉಂಡು. ನೆತ್ತ ಲೆಕ್ಕೊಡು ನನ ಬರ್ಪಿನ ಸಚಿವ ಸಂಪುಟ ಸಭೆಟ್ಟ್ ಸರ್ಕಾರ ತುಳು ಭಾಷೆದ ಪರವಾದ್ ಸಕಾರಾತ್ಮಕ ತೀರ್ಮಾನ ದೆತೊನೊಡು ಪಂದ್ ಸಂಘಟನೆಲೆನ ಪ್ರಮುಖೆರ್ ಒತ್ತಾಯ ಮಲ್ತೆರ್.

“ತುಳು ಭಾಷೆಗ್ ಅಧಿಕೃತ ಮಾನ್ಯತೆ ತಿಕೊಡು ಪನ್ಪಿನವು ತುಳುವೆರೆನ ಮಾಸ್ತ್ ವರ್ಷೊದ ಆಶಯ. ಸರ್ಕಾರ ಈ ಬೇಡಿಕೆನ್ ಸಕಾರಾತ್ಮಕವಾದ್ ಪರಿಗಣಿಸಾದ್, ತುಳು ಭಾಷೆಗ್ ಹೆಚ್ಚುವರಿ ಅಧಿಕೃತ ಆಡಳಿತ ಭಾಷೆದ ಸ್ಥಾನಮಾನ ಕೊರೊಡು,” ಪಂದ್ ಬೆಚ್ಚ ಆಯೆರ್.

ತುಳು ಭಾಷೆದ ಯೂನಿಕೋಡ್‌ಗ್ ಸಂಬಂಧಪಟ್ಟಿನಂಚೆನೆ ನಡತೊಂದು ಇಪ್ಪುನ ಕೆಲಸದ ಬಗ್ಗೆ ಸಚಿವೆರೆಗ್ ಪೊಲಬು ಕೊರ್ತುಂಡು. ಈ ಬಗ್ಗೆ ಸಂಬಂಧಪಟ್ಟಿನ ಅಧಿಕಾರಿಲೆನೊಟ್ಟಿಗೆ ಪಾತೆರಕತೆ ನಡಪಾದ್, ಅಗತ್ಯ ಇಪ್ಪುನ ವ್ಯವಸ್ಥೆಲೆನ್ ಮಲ್ತ್ ಕೊರ್ಪ ಪಂದ್ ಸಚಿವೆರ್ ಭರವಸೆ ಕೊರಿಯೆರ್.

ಈ ಪೊರ್ತುಡು ಸಂಘಟನೆದ ಸಲಹೆಗಾರೆರ್ ನಿಧೀಶ್ ಶೆಟ್ಟಿ, ಅಧ್ಯಕ್ಷೆರ್ ವಿನಯ್ ಮಣಿಯನ, ಉಪಾಧ್ಯಕ್ಷೆರ್ ಶರತ್ ಕೊಡವೂರ್, ಸಂಘಟನಾ ಕಾರ್ಯದರ್ಶಿ ಗುರುಪ್ರಸಾದ್, ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಪ್ರಶಾಂತ್, ಸದಸ್ಯೆರ್ ಶರತ್ ಪೆರಾಜೆ ಬೊಕ್ಕ ಶರತ್ ಹೆಗ್ಡೆ ಕಡ್ತಲ ಪಾಲ್ ಪಡೆದಿತ್ತೆರ್.

ದಕ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರಾದ್ ಪದ್ಮರಾಜ್ ಪೂಜಾರಿ ನೇಮಕ

Sep 10, 2026

ಒಡಿಪು ಜಿಲ್ಲೆಗ್ ಕಿಶನ್ ಹೆಗ್ಡೆ ಅಧ್ಯಕ್ಷೆರ್

ಬೆಂಗಳೂರು : ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರಾದ್ ಪದ್ಮರಾಜ್ ಆರ್ ಪೂಜಾರಿ ನೇಮಕ ಆತೆರ್. ಅಂಚೆನೆ ಒಡಿಪು ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರಾದ್ ಕಿಶನ್ ಹೆಗ್ಡೆ ಕೊಳ್ಕೆಬೈಲ್ ಮೆರೆನ್ ನೇಮಕ ಮಲ್ದೆರ್.
ಅಖಿಲ ಭಾರತ ಕಾಂಗ್ರೆಸ್ ಕಮಿಟಿ (ಎಐಸಿಸಿ) ಪ್ರಧಾನ ಕಾರ್ಯದರ್ಶಿ ಕೆ.ಸಿ. ವೇಣುಗೋಪಾಲ್ ರಾಜ್ಯದ ಬೇತೆ ಬೇತೆ ಜಿಲ್ಲೆದ ಕಮಿಟಿ ಅಧ್ಯಕ್ಷೆರ್‌ನ ಪಟ್ಟಿ ಬುಡುಗಡೆ ಮಲ್ದೆರ್.
ತುಳುನಾಡ್‌ದ ರಡ್ಡ್ ಜಿಲ್ಲೆಡ್‌ಲ ಪಕ್ಷದ ಸಂಘಟನೆ ಬೊಕ್ಕ ನನ ದುಂಬುದ ಓಟುಗು ತಯಾರಿ ಮಲ್ಪುನ ನಿಲೆಟ್ಟ್ ಜಿಲ್ಲಾ ಅಧ್ಯಕ್ಷೆರ್‌ನಕಲೆನ್ ನೇಮಕ ಮಲ್ತ್‌ದ್ ಆದೇಶ ಕಡಪಾದೆರ್.
ಮೊಕ್ಲೆನ ನೇಮಕಗ್ ಮಾಜಿ ಸಚಿವೆರಾಯಿನ ಅಭಯ ಚಂದ್ರ ಜೈನ್, ವಿನಯಕುಮಾರ್ ಸೊರಕೆ, ರಮಾನಾಥ್ ರೈ, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ, ಮುಖಂಡೆರಾಯಿನ ವಸಂತ್ ಬೆರ್ನಾಡ್, ಮೋಹನ್ ಕೋಟ್ಯಾನ್, ರಕ್ಷಿತ್ ಕೊಳಚಿಕಂಬ್ಲ, ಧನಂಜಯ ಮಟ್ಟು , ಗೋಪಿನಾಥ್ ಪಡಂಗ, ಗುರುರಾಜ್ ಪೂಜಾರಿ ತೋಕೂರು, ಜಗನ್ನಾಥ ಕೋಟ್ಯಾನ್ ಸಸಿಹಿತ್ಲು, ಅನಿಲ್ ಪೂಜಾರಿ ಸಸಿಹಿತ್ಲು , ಯೋಗೀಶ್ ಕೋಟ್ಯಾನ್ ಚಿತ್ರಾಪು ಮೊಕುಲು ಮಾತ ಅಭಿನಂದನೆ ಮಲ್ದೆರ್.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಬೊಂಬಾಯಿದ ಸುದ್ದಿ | Bombay News

ಜೈ ತುಲುನಾಡ್ ಕೂಟೊರ್ದು ಬೊಂಬಾಯಿಡ್ ತುಳು ಲಿಪಿ ಕಜ್ಜಕೊಟ್ಯ

Aug 19, 2026

ಮುಂಬೈ — ಒಂಜಿ ಮಲ್ಲ ಸಾಂಸ್ಕೃತಿಕ ಒರಿಪು ಬುಲೆಚ್ಚಿಲ್ ಲೇಸ್‌ದ ಭಾಗವಾದ್, ‘ಜೈ ತುಲುನಾಡ್ಟ (ರಿ.) (ಮುಂಬೈ ವಲಯ) ಕೂಟೊರ್ದು ಶ್ರೀ ಸಾಯಿನಾಥ್ ಮಿತ್ರ ಮಂಡಳಿದ ಮುತಾಲಿಕೆಡ್ ‘ಬಲೆ ತುಳು ಲಿಪಿಟ್ ಪುದರ್ ಬರೆಕ’ ಪನ್ಪಿನ ಇಸೇಸ ಕಜ್ಜಕೊಟ್ಯ ನಡತ್ತ್ಂಡ್.

ಕರ್ಮಭೂಮಿ ಬೊಂಬಾಯಿದ ಪ್ರದೇಶೊಡು ಉಪ್ಪುನ ತುಲುವೆರ್ ತುಲು ಲಿಪಿನ್ ಕಲ್ಪೊಡು ಪನ್ಪಿನ ಉದ್ದೇಸೊಡು ಈ ಕಜ್ಜಕೊಟ್ಯೊನು ಆಯೋಜನೆ ಮಲ್ತ್ ಇತ್ತೆರ್.

ಕಾಂಡೆ 10:00 ಗಂಟೆಗ್ ಡೊಂಬಿವಲಿ (ಪಡ್ಡಾಯಿ) ದ ಭರತ್ ಭೋಯರ್ ಸಭಾಮಂಟಪೊಡು ಈ ಕಜ್ಜಕೊಟ್ಯ ನಡತ್ತ್ಂಡ್. ಬೊಂಬಾಯಿದ ತುಲುವೆರ್ ಈ ಕಜ್ಜಕೊಟ್ಯೊಡು ಮಲ್ಲ ಮಟ್ಟ್‌ಡ್ ಪಾಲ್‌ಪಡೆದ್ ಪೊರ್ಲು ಮಲ್ತ್ ಕೊರಿಯೆರ್. ಬಾಸೆದ ಇಚಾರೊಡು ಯಾಪಾಲಾ ಒಂಜಿ ಪಜ್ಜೆ ದುಂಬು ಉಂತುನ ಬೊಂಬಾಯಿದ ತುಲುವೆರ್ ಲಿಪಿ ವಿಚಾರೊಗುಲಾ ಬೆರಿತಾಂಗ್ ಕೊರ್ದು ತನ್ಕುಲೆನ ಪುದರ್‌ನ್ ತುಲು ಲಿಪಿಟ್ ಬರೆಯರೆ ಕಲ್ತೆರ್.

ತುಲು ಲಿಪಿತ ಬುಲೆಚ್ಚಿಲ್‌ಗಾದ್ ನಿರಂತರ ಪೊರ್ಂಬೊಂದು ಉಪ್ಪುನ ಜೈ ತುಲುನಾಡ್ (ರಿ.) ಕೂಟ ಲಿಪಿನ್‌ನ್ ಡಿಜಿಜಲ್ ಮಾಧ್ಯಮ, ತಾಂತ್ರಿಕತೆಟ್‌ಲಾ ಕನಪಿನ ಪೊನೆಪು ಮಲ್ತೊಂದು ಬರೊಂದು ಇತ್ತ್ಂಡ್. ಬೊಂಬಾಯಿಡ್ ನನಾತ್ ಇಂಚಿನ ಕಜ್ಜಕೊಟ್ಯ ಮಲ್ಪರೆ ಉಂಡು ಪಂಡ್‌ದ್ ಬೊಂಬಾಯಿ ವಲಯದ ಸಂಘಟಕೆರ್ ಪಂಡೆರ್.

ಈ ಕಜ್ಜಕೊಟ್ಯಡ್ ಸಂಘಟಕೆ ಚಿನ್ಮಯ್ ಬೊಕ್ಕ ಶ್ರೀ ಸಾಯಿನಾಥ್ ಮಿತ್ರ ಮಂಡಳಿದ ಪದಾಧಿಕಾರಿಲು ಬೊಕ್ಕ ಸದಸ್ಯೆರ್, ಶಿಲ್ಪಾ ಸಂತೋಷ್ ಶೆಟ್ಟಿ, ತುಳು ಲಿಪಿ ಶಿಕ್ಷಕೆರಾಯಿನ ಶಶಿಕಲಾ ವೈ. ಬಂಗೇರ ಬೊಕ್ಕ ಮಂಜುನಾಥ ಶೆಟ್ಟಿ ಒತ್ತುಪಾಲಿತ್ತೆರ್.

Religious & Cultural News ಮಾತ ಧರ್ಮದ ಸುದ್ದಿ ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಬೆಂಗಳೂರುದ ಸುದ್ದಿ

ಬೆಂಗಳೂರುದ “ಫ್ರೀಡಂ ಪರ್ಬ”ಡ್ ರೈಸಿನ ಪಂಚಮಿ ಮಾರೂರು

Aug 18, 2026

“ವಿಧಾನಸೌಧದ ಎದುರು ಯಕ್ಷಗಾನ, ಭರತನಾಟ್ಯ ಪ್ರದರ್ಶನ”

ಬೆಂಗಳೂರು: 80 ನೇ ವರ್ಷದ ಸ್ವಾತಂತ್ರ್ಯ ಉಚ್ಚಯದ ಹಿನ್ನೆಲೆಡ್ “ಫ್ರೀಡಂ ಪರ್ಬ”ದ ಅಂಗವಾದ್ ನಡತಿನ ಫ್ರೀಡಂ ಪರೇಡ್‌‌‌ಡ್ ತುಳುನಾಡ್‌ದ ಪೆರ್ಮೆದ ಮಗಲ್ ಪಂಚಮಿ ಮಾರೂರು ಮೆರೆನ ಮುತಾಲಿಕೆಡ್ “ಯಕ್ಷ ತರಂಗ” ಕೂಟದಕುಲು ಯಕ್ಷಗಾನ ಪ್ರದರ್ಶನ ಕೊರ್ದು ತುಳುನಾಡ್‌ದ ಶ್ರೀಮಂತ ಕಲಾ ಪರಂಪರೆನ್ ಅನಾವರಣ ಮಲ್ತೆರ್.
ಅಯಿಟ್‌ಲ ವಿಶೇಷವಾದ್, ನಾಡ್‌ದ ಶಕ್ತಿ ಕೇಂದ್ರವಾಯಿನ ರಾಜಬೂಡುದ ವಿಧಾನಸೌಧದ ಎದುರು ಪಾಡ್ದಿನ ಪೊರ್ಲುದ ಮಿತ್ತರ್ಮೆಡ್ ಯಕ್ಷಗಾನ ಪ್ರದರ್ಶನ ಕೊರಿನವು ತುಳುನಾಡ್‌ದ ಜನಕ್ಲೆನ ಪೆರ್ಮೆದ ಸಂಗತಿ ಆಂಡ್. ಉಂದುವೇ ಮಿತ್ತರ್ಮೆಡ್ ಪಂಚಮಿ ಮಾರೂರು ಮೆರೆನ ಶ್ರೀ ಪರಂಪರಾ ಹೆಜ್ಜೆಗಜ್ಜೆ ವೈ.ಪಿ. ಆರ್ಟ್ ಫೌಂಡೇಶನ್ (ರಿ.), ಬೆಂಗಳೂರು ಕೂಟದಕುಲು ತುಳು ಪದ್ಯೊಗು ಮನಮೋಹಕ ಭರತನಾಟ್ಯ ಪ್ರದರ್ಶನ ಕೊರ್ದು ಕಾರ್ಯಕ್ರಮದ ಸಾಂಸ್ಕೃತಿಕ ವೈಭವನ್ ನನಾತ್ ಎಚ್ಚ ಮಲ್ತೆರ್.
ರಾಜ್ಯದ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್, ಬೃಹತ್ ಬೆಂಗಳೂರು ಅಭಿವೃದ್ಧಿ ಸಚಿವೆರ್ ಕೃಷ್ಣ ಭೈರೇಗೌಡ ಸೇರ್ದ್ ಮಸ್ತ್ ಜನ ಗಣ್ಯೆರ್, ಬಿನ್ನೆರ್ ಬೊಕ್ಕ ಮಲ್ಲ ಸಂಖ್ಯೆದ ಪ್ರೇಕ್ಷಕೆರ್‌ನ ಎದುರು ಈ ಕಲಾ ಪ್ರದರ್ಶನ ಮೂಡುದು ಬತ್ತ್ಂಡ್. ತುಳುನಾಡ್‌ದ ಯಕ್ಷಗಾನ ಕಲೆನ್ ಪೆರ್ಮೆಡ್ ತೊಜಪಾಯಿನ ಪಂಚಮಿ ಮಾರೂರು ಬೊಕ್ಕ ಯಕ್ಷ ತರಂಗ ತಂಡದ ಸಾಧನೆ ವಿಶೇಷ ಮೆಚ್ಚುಗೆ ದೆತೊನ್ಂಡ್.
ಭವ್ಯ ವೇದಿಕೆಡ್ ಒಂಜಿ ಕಡೆ ತುಳುನಾಡ್‌ದ ಪೆರ್ಮೆದ ಕಲೆ ಯಕ್ಷಗಾನ, ಬೊಕ್ಕೊಂಜಿ ಕಡೆಟ್ ಭಾರತೀಯ ಶಾಸ್ತ್ರೀಯ ನೃತ್ಯ ಪರಂಪರೆದ ಭರತನಾಟ್ಯ ಪ್ರದರ್ಶನ ಆದ್ ಕಲಾಭಿಮಾನಿಲೆಗ್ ನನಾತ್ ಕುಷಿ ಕೊರುಂಡು. ಪಂಚಮಿ ಮಾರೂರು ಮೆರೆನ ನೇತೃತ್ವಡ್ ರಡ್ಡ್ ಕಲಾ ಪ್ರಕಾರ ಪ್ರತಿಷ್ಠಿತ ವೇದಿಕೆಡ್ ಪ್ರದರ್ಶನ ಮಲ್ತಿನವು ತುಳುನಾಡ್‌ಗೇ ಪೆರ್ಮೆದ ಸಂಗತಿ.
ಈ ಒಂಜಿ ಮಲ್ಲ ವೇದಿಕೆನ್ ಕಲಾವಿದೆರೆಗ್ ಕೊರ್ಪಾರೆ ಸಹಕಾರ ಮಲ್ತಿನ ಜೈ ತುಲುನಾಡು ಬೆಂಗಳೂರು (ರಿ.)ತಂಡ, ನಿಧೀಶ್ ಶೆಟ್ಟಿ ಬೊಕ್ಕ ಯತೀಶ್ ಎಂ (ಡಿಜಿಟಲ್ ಪಿಆರ್‌ಓ) ಮೊಕ್ಲೆಗ್ ಉಡಲ್ ದಿಂಜಿನ ಸೊಲ್ಮೆಲು.
ತುಳುನಾಡ್‌ದ ಕಲೆ, ಸಂಸ್ಕೃತಿ ಬೊಕ್ಕ ಯಕ್ಷಗಾನದ ಪೆರ್ಮೆನ್ ರಾಜ್ಯದ ರಾಜಧಾನಿಡ್ ದೆರ್ತ್ ಪತಿನ ತುಳುನಾಡ್‌ದ ಬಹುಮುಖಿ ಪ್ರತಿಭೆ ಪಂಚಮಿ ಮಾರೂರು ಮೆರೆಗ್ ತುಳುನಾಡ್‌ದ ಜನಕ್ಲೆನ ಪರವಾದ್ ಸಮಸ್ತ ಜನಕ್ಲೆನ ಪರವಾದ್ “ಟೈಮ್ಸ್ ಆಫ್ ಕುಡ್ಲ” ಪತ್ರಿಕೆದ ವತಿರ್ದ್ ಉಡಲ್ ದಿಂಜಿನ ಸೊಲ್ಮೆಲು ಬೊಕ್ಕ ಅಭಿನಂದನೆ.