Wed. Nov 18th, 2026

ಮುಲ್ಕಿ

ಪಾರಂಪರಿಕ ಸ್ಮಾರಕ ಸಂರಕ್ಷಣೆಡ್ ಐತಿಹಾಸಿಕ ತಿರುವು

ಬಪ್ಪನಾಡ್ ಸ್ವಾಗತ ಗೋಪುರದ ಸ್ಥಳಾಂತರ ಕಾರ್ಯ 185 ದಿನೊತ್ತ ಸುದೀರ್ಘ ಪ್ರಯತ್ನದ ಬೊಕ್ಕ ಯಶಸ್ವಿ

ಪಾರಂಪರಿಕ ಸ್ಮಾರಕ ಸಂರಕ್ಷಣೆ, ಇಂಜಿನಿಯರಿಂಗ್ ಪರಿಣತಿ ಬೊಕ್ಕ ಧಾರ್ಮಿಕ ಬದ್ಧತೆದ ಅಪೂರ್ವ ಸಂಗಮಗ್ ಸಾಕ್ಷಿಯಾದ್, ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಐತಿಹಾಸಿಕ ಸ್ವಾಗತ ಗೋಪುರನ್ ನ.12 ಕ್ಕ್ ಯಶಸ್ವಿಯಾದ್ ಅವೆತ್ತ ಅಕೇರಿದ ಸ್ಥಾನಡ್ ಪ್ರತಿಷ್ಠಾಪನೆ ಮಲ್ತೆರ್. ಮೇ.13 ಕ್ಕ್ ಸುರು ಆಯಿನ ಈ ಸವಾಲ್ ದ ಕಾರ್ಯ ಒಟ್ಟು 185 ದಿನೊತ್ತ ಸುದೀರ್ಘ ಪ್ರಯತ್ನದ ಫಲವಾದ್ ಮುಗಿತಲ ಆಂಡ್.

1996ಟ್ಟ್ ಐಕಳ ಹರೀಶ್ ಶೆಟ್ಟಿ ಬೊಕ್ಕ ಕುಟುಂಬದಕುಲು ದೇವಸ್ಥಾನಗ್ ಸಮರ್ಪಣೆ ಮಲ್ತಿನ ಈ ಸ್ವಾಗತ ಗೋಪುರ ರಾಷ್ಟ್ರೀಯ ಮಾರ್ಗ ಅಗಲೀಕರಣದ ಲೆಕ್ಕೊಡು ದೆತ್ತಿನ ಅತ್ತಂಡ ದೆಪ್ಪುನ ಅನಿವಾರ್ಯತೆನ್ ಎದುರಿಸಾದ್ಂಡ್. ಈ ಪೊರ್ತುಡು, ಪಾರಂಪರಿಕ ರಚನೆನ್ ದೆಪ್ಪುನ ಬದಲ್ ವೈಜ್ಞಾನಿಕವಾದ್ ಸ್ಥಳಾಂತರ ಮಲ್ತ್ ದ್ ಸಂರಕ್ಷಣೆ ಮಲ್ಪು‌ನ ಪರ್ಯಾಯ ಯೋಜನೆನ್ ಎಂಜಿನಿಯರ್ ಮುಲ್ಕಿ ಜೀವನ್ ಕೆ. ಶೆಟ್ಟಿ, ಶಾರದಾ ಅಸೋಸಿಯೇಟ್ಸ್ ಮೇರ್ ಪ್ರಸ್ತಾಪ ಮಲ್ತೆರ್.

ಈ ಪಾರಂಪರಿಕ ಸಂರಕ್ಷಣಾ ಕಾರ್ಯದ ಮಹತ್ವನ್ ತೆರಿದ್ ಐಕಳ ಹರೀಶ್ ಶೆಟ್ಟಿ ಮೇರ್ ಸಂಪೂರ್ಣ ಸ್ಥಳಾಂತರ ಕಾರ್ಯದ ಕರ್ಚಿನ್ ದೆತೊನಿಯೆರೆ ಎಡ್ಡೆ ಮನಸ್ ಡ್ ದುಂಬು ಬತ್ತೆರ್. 1996ಟ್ಟ್ ಮೂಲ ಗೋಪುರನ್ ಸಮರ್ಪಣೆ ಮಲ್ತಿನ ದಾನಿಲಾದ್ ಬೊಕ್ಕ 2026ಟ್ಟ್ ಅವೆತ್ತ ಸ್ಥಳಾಂತರದ ಪೂರ ಕರ್ಚಿನ್ ದೆತೊನ್ನ ಮಹಾದಾನಿಯಾದ್ ಅರೆನ ಕೊಡುಗೆ ಇಸೇಸವಾದ್ ಮೆಚ್ಚೊಡಾಯಿನವು.

ಇಂಜಿನಿಯರಿಂಗ್ ದುಂಬಾತ್ತಿಗೆ ಬೊಕ್ಕ ಯೋಜನಾ ನಿರ್ವಹಣೆ:

ಎಂಜಿನಿಯರ್ ಮುಲ್ಕಿ ಜೀವನ್ ಕೆ. ಶೆಟ್ಟಿ ಮೇರ್ ಈ ಯೋಜನೆದ ಇಂಜಿನಿಯರ್ ಬೊಕ್ಕ ಯೋಜನಾ ಸಂಯೋಜಕೆರಾದ್ ಬೆಂದ್ ದ್, ದಾನಿಲು, ದೇವಸ್ಥಾನದ ಆಡಳಿತ ಮಂಡಳಿ, ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI), ಬೇತೆ ಬೇತೆ ಸರ್ಕಾರಿ ಇಲಾಖೆಲು ಬೊಕ್ಕ ಕಾಮಗಾರಿ ಗುತ್ತಿಗೆದಾರೆರೆನ ನಡುಟ್ಟು ಸಮನ್ವಯ ಮಲ್ಪುನಲ್ಪ ಪ್ರಮುಖ ಪಾತ್ರ ಒಯಿಸೊಂದೆರ್.

ಎಂಜಿನಿಯರ್ ನಿತಿನ್ ದೇವಾಡಿಗ ಮೇರ್ ಸ್ಟ್ರಕ್ಚರಲ್ ಎಂಜಿನಿಯರ್ ಆದ್ ತನ್ನ ತಾಂತ್ರಿಕ ಪರಿಣತಿ ಬೊಕ್ಕ ರಚನಾತ್ಮಕ ಮಾರ್ಗದರ್ಶನನ್ ಕೊರಿಯೆರ್. ಹರಿಯಾಣದ HSPL ಸಂಸ್ಥೆ ಸ್ಥಳಾಂತರ ಕಾಮಗಾರಿದ ಅನುಷ್ಠಾನದ ಜಬದಾರಿನ್ ಮಲ್ತೆರ್.

77 ಅಡಿ ಸಮತಲ ಸ್ಥಳಾಂತರ ಬೊಕ್ಕ 4 ಅಡಿ ಲಂಬ ಎತ್ತರ ಮಲ್ಪೆರೆ ಉಂಡು.

ಒಟ್ಟು 185 ದಿನಟ್ಟ್ ಗೋಪುರದ ಸ್ಥಳಾಂತರ ಕಾರ್ಯನ್ ಐನ್ ಹಂತಡ್ ಮಲ್ಪೆರೆ:

1. ಸುರುತ್ತ ಹಂತದ ಲಂಬ ಎತ್ತರ ಮಲ್ಪೆರೆ – 3 ಅಡಿ.
2. ಪಶ್ಚಿಮ ದಿಕ್ಕ್ ರ್ದ್ ದೇವಸ್ಥಾನದ ಕಡೆಕ್ಕ್ ಸಮತಲ ಸ್ಥಳಾಂತರ – 51 ಅಡಿ.
3. ಉತ್ತರ ದಿಕ್ಕ್ ಗ್ ಸ್ಥಳಾಂತರ – 11 ಅಡಿ.
4. ಪುನಃ ಪಶ್ಚಿಮ ದಿಕ್ಕ್ ಡ್ ದೇವಸ್ಥಾನದ ಕಡೆಕ್ಕ್ ಸ್ಥಳಾಂತರ – 15 ಅಡಿ.
5. ಅಕೇರಿದ ಹೆಚ್ಚುವರಿ ಲಂಬ ಎತ್ತರ ಮಲ್ಪೆರೆ – 1 ಅಡಿ.

ಈ ಮುಕೇನ ಗೋಪುರನ್ ಒಟ್ಟು 77 ಅಡಿ ಸಮತಲವಾದ್ ಸ್ಥಳಾಂತರ ಮಲ್ತ್ ದ್, 4 ಅಡಿ ಲಂಬವಾದ್ ಎತ್ತರ ಮಲ್ತೆರ್.

ಮೂಜಿ ಪ್ರಮುಖ ತಾಂತ್ರಿಕ ಉದ್ದೇಶಲೆನ ಯಶಸ್ವಿ ಸಾಧನೆ:

ಗೋಪುರದ ಅಕೇರಿದ ಸ್ಥಾನನ್ ನಿರ್ಧಾರ ಮಲ್ಪುನಗ ಮೂಜಿ ಪ್ರಮುಖ ತಾಂತ್ರಿಕ ಬೊಕ್ಕ ಧಾರ್ಮಿಕ ಅಗತ್ಯಲೆಗ್ ಆದ್ಯತೆ ಕೊರ್ತೆರ್.

1.ರಾಷ್ಟ್ರೀಯ ಮಾರ್ಗದ ಸ್ವಾಧೀನ ಮಲ್ತಿನ ಗಡಿ ಪ್ರದೇಶದ ಪಿದಯಿಗ್ ಸ್ಥಳಾಂತರ:

ರಾಷ್ಟ್ರೀಯ ಮಾರ್ಗಗಾದ್ ಸ್ವಾಧೀನ ಮಲ್ತೊನ್ನ ಗಡಿ ಪ್ರದೇಶರ್ದ್ ಮಾಸ್ತ್ ದೂರಡ್ ಗೋಪುರನ್ ಸುರಕ್ಷಿತವಾದ್ ಸ್ಥಾಪನೆ ಮಲ್ಪುನ ಮುಕೇನ ಮಾರ್ಗ ಅಭಿವೃದ್ಧಿ ಕಾಮಗಾರಿಗ್ ಒವ್ವೇ ಅಡಚಣೆ ಅವಂದಿಲೆಕ್ಕ ಕ್ರಮ ದೆತೊಂದೆರ್.

2. ಬ್ರಹ್ಮರಥದ ಸುರಕ್ಷಿತ ಸಂಚಾರ:

ವರ್ಷೊದ ಜಾತ್ರೆದ ಪೊರ್ತುಡು ರಥಬೀದಿಡ್ ಗೋಪುರದ ಕೈತಲ್ದ ಮುಕೇನ ಪವಿತ್ರ ಬ್ರಹ್ಮರಥ ಸುರಕ್ಷಿತವಾದ್ ಸಂಚಾರ ಮಲ್ಪೆರೆ ಅಗತ್ಯವಾಯಿನ ಸ್ಥಳಾವಕಾಶನ್ ನಿಗಂಟ್ ಮಲ್ತೆರ್.

3. ಇಮಾನ ರಥತ್ತ ಸುರಕ್ಷಿತ ಸಂಚಾರ:

ವರ್ಷೊದ ಜಾತ್ರೆದ ಪೊರ್ತುಡು ಇಮಾನ ರಥ ಸ್ವಾಗತ ಗೋಪುರದ ತೀರ್ತ್ ಭಾಗರ್ದ್ ಒವ್ವೇ ಅಡಚಣೆ ಇಜ್ಜಂದೆ ಸುರಕ್ಷಿತವಾದ್ ಪೋಯೆರೆ ಅಗತ್ಯವಾಯಿನ ಲಂಬ ಎತ್ತರನ್ ಕೊರ್ತುಂಡು. ಈ ಉದ್ದೇಶಗಾದ್ ಅಕೇರಿದ ಹೆಚ್ಚುವರಿ ಒಂಜಿ ಅಡಿ ಎತ್ತರ ಮಲ್ಪುನ ಬೇಲೆನ್ ಮಲ್ಪೊಡು.

ಪ್ರಮುಖ ಇಂಜಿನಿಯರಿಂಗ್ ಸವಾಲುಲೆನ ಯಶಸ್ವಿ ನಿರ್ವಹಣೆ:

ಈ ಸ್ಥಳಾಂತರ ಕಾರ್ಯಡ್ ಸುಮಾರ್ ಕಠಿಣ ತಾಂತ್ರಿಕ ಸವಾಲು ಉಂಡು. ಇಸೇಸವಾದ್, ಮಿತ್ತ್ ಭಾಗಡ್ ಇತ್ತಿನ ಹೈಟೆನ್ಷನ್ ಕರೆಂಟ್ ವಾಯರ್ ನ್ ಸುರಕ್ಷಿತವಾದ್ ಪಾಡುನ ಬೊಕ್ಕ ಸ್ಥಳಾಂತರದ ಮಾರ್ಗಡ್ ತೀರ್ತ್ ಇತ್ತಿನ ಬೃಹತ್ ಬರ್ಸದ ನೀರ್ ಪರಪುನ ಚರಂಡಿನ್ ಮಲ್ಪುನೇ ಮಾಸ್ತ್ ಸವಾಲ್ ದ ಕೆಲಸ ಆತ್ಂಡ್.

ಮರಿಯಾಲದ ಪೊರ್ತುಡು ಈ ಮಾತ ಬೇಲೆನ್ ಯಶಸ್ವಿಯಾದ್ ಮಲ್ಪುನೇ ಯೋಜನೆದ ಕುಡೊಂಜಿ ಮಹತ್ವದ ಸಾಧನೆ ಆತ್ಂಡ್.

ಈ ಕಾರ್ಯಾಚರಣೆಡ್ ಇಸೇಸ ಟ್ರ್ಯಾಕ್ ಪಾಡುನ ವ್ಯವಸ್ಥೆ, ರೋಲರ್‌ಲು ಬೊಕ್ಕ ಕೈಚಾಲಿತ ಜ್ಯಾಕ್‌ನ್ ಗಲಸ್ ದೆರ್, ಸರಿಯಾಯಿನ ತಾಂತ್ರಿಕ ಯೋಜನೆ, ರಚನಾತ್ಮಕ ಮೇಲ್ವಿಚಾರಣೆ ಬೊಕ್ಕ ಸಂಬಂಧಪಟ್ಟಿನ ಇಲಾಖೆಲೆನ ನಿರಂತರ ಸಮನ್ವಯದೊಟ್ಟಿಗೆ ಕಾಮಗಾರಿನ್ ಯಶಸ್ವಿಯಾದ್ ಮುಗಿತಲ ಮಲ್ತೆರ್.

ನನದ ಪೀಳಿಗೆಗಾದ್ ಸಂರಕ್ಷಣೆ ಆಯಿನ ಪಾರಂಪರಿಕ ಸ್ಮಾರಕ:

ಈ ಯೋಜನೆ ಆಧುನಿಕ ಮೂಲಸೌಕರ್ಯ ಅಭಿವೃದ್ಧಿದೊಟ್ಟಿಗೆ ಪಾರಂಪರಿಕ ಸ್ಮಾರಕಲೆನ ಸಂರಕ್ಷಣೆ ಸಾಧ್ಯ ಪನ್ಪಿನೆನ್ ಇಂಜಿನಿಯರಿಂಗ್ ಪರಿಣತಿ, ದಾನಶೀಲತೆ ಬೊಕ್ಕ ಸಾಮೂಹಿಕ ಬದ್ಧತೆದ ಮುಕೇನ ಸಾಬೀತು ಮಲ್ದೆರ್.

1996ಟ್ಟ್ ಭಕ್ತಿಭಾವರ್ದ್ ದೇವಸ್ಥಾನಗ್ ಸಮರ್ಪಣೆ ಮಲ್ಪುನ ಈ ಗೋಪುರ 2026ಟ್ಟ್ ಕುಡೊಂಜಿ ಮಹತ್ವದ ದಾನಶೀಲ ಪ್ರಯತ್ನದ ಮುಕೇನ ಸಂರಕ್ಷಣೆ ಮಲ್ತ್ ದ್ ನನದ ಪೀಳಿಗೆಗ್ ಒರಿಪುಲೆಕ್ಕ ಅವಡ್.

ಒಂಜಿ ಪಾರಂಪರಿಕ ಸ್ಮಾರಕ ಒರಿಯೆರೆ ಉಂಡು. ಒಂಜಿ ಧಾರ್ಮಿಕ ಸಂಪ್ರದಾಯಗ್ ಸುರಕ್ಷತೆ ಕೊರೊಡು. ಒಂಜಿ ಮಹತ್ವದ ಇಂಜಿನಿಯರಿಂಗ್ ಸಾಧನೆ ಸಾಕಾರ ಆತ್ಂಡ್. ಒಂಜಿ ಪರಂಪರೆ ನನದ ಪೀಳಿಗೆಗಾದ್ ಸಂರಕ್ಷಣೆ ಆತ್ಂಡ್.

ಎಂಜಿನಿಯರ್ ಮುಲ್ಕಿ ಜೀವನ್ ಕೆ.ಶೆಟ್ಟಿ ಮೇರ್ ಶಾರದಾ ಅಸೋಸಿಯೇಟ್ಸ್ ದ ಸ್ಥಾಪಕೆರ್, ಮುಲ್ಕಿ ಅಸೋಸಿಯೇಷನ್ ಆಫ್ ಸಿವಿಲ್ ಎಂಜಿನಿಯರ್ಸ್ (ACEM) ಸ್ಥಾಪಕ ಅಧ್ಯಕ್ಷೆರ್, ಇಂಡಿಯನ್ ರೋಡ್ಸ್ ಕಾಂಗ್ರೆಸ್ (ನವ ಡೆಲ್ಲಿ ಕೇಂದ್ರ ರಸ್ತೆ ಸಾರಿಗೆ ಬೊಕ್ಕ ಹೆದ್ದಾರಿ ಸಚಿವಾಲಯ,) ಜೀವಮಾನ ಸದಸ್ಯೆರ್, ಹೈದರಾಬಾದ್ ಇಂಡಿಯನ್ ಗ್ರೀನ್ ಬಿಲ್ಡಿಂಗ್ ಕೌನ್ಸಿಲ್ ಸದಸ್ಯೆರ್, ಸ್ವಾಗತ ಗೋಪುರ ಸ್ಥಳಾಂತರ ಯೋಜನೆದ ಇಂಜಿನಿಯರ್ ಬೊಕ್ಕ ಯೋಜನಾ ಸಂಯೋಜಕೆರಾತೆರ್.

ಕಟೀಲ್ದ ಗೋಶಾಲೆ ಗೋಸೇವೆಗ್ ಮಾದರಿ, ಗೋಸೇವೆಗೆ ಪ್ರೋತ್ಸಾಹ ಅಗತ್ಯ: ನಳಿನ್‌ಕುಮಾರ್

ಕಟೀಲ್ ಡ್ ಸಾಮೂಹಿಕ ಗೋಪೂಜೆ

ಕಟೀಲ್ : ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನ ಮೂಜಿ ಗೋಶಾಲೆಡ್ ಇರ್ನೂದು ಜಾಸ್ತಿ ದೇಸೀ ಪೆತ್ತಲೆನ್ ತಾಂಕುನ ಒರುಟು , ದೇಸೀ ತಳಿಲೆನ ಅಭಿವೃದ್ಧಿ, ದೇವಲ್ಯಗ್ ಬೋಡಾಯಿನ ಶುದ್ಧ ಪೇರ್ , ಅಲೆ ಇಂಚ ಬೇತೆ ಬೇತೆ ಉತ್ಪನ್ನದ ಪೂರೈಕೆ ಆವೊಂದುಂಡು ಪನರೆ ಪೆರ್ಮೆ ಆಪುಂಡು. ಉಂದೆಕ್ ವರ್ಸಡ್ ಸುಮಾರು ಒಂಜಿ ಕೋಟಿ ರೂಪಾಯಿರ್ದ್ ಜಾಸ್ತಿ ಕಾಸ್ ಖರ್ಚಿ ಮಲ್ಪುನ ಕಟೀಲ್ ದೇವಲ್ಯ ಮಾದರಿ ಗೋಶಾಲೆನ್ ನಡಪಾವೊಂದುಂಡು. ಕೈಕಂಜಿ ತಾಂಕುನು ಬಾಯಿಡ್ ಪಂಡಿನಾತ್ ಸುಲಭ ಅತ್ತ್ . ಅಂಚೆನೆ ಗೋಸೇವೆಗ್ ಪ್ರೋತ್ಸಾಹ ಅಗತ್ಯ ಪಂದ್ ಮಾಜಿ ಸಾಂಸದ ನಳಿನ್ ಕುಮಾರ್ ಪಂಡೆರ್ .
ಆರ್ ಕಟೀಲ್ ದೇವಸ್ಥಾನದ ಮಾಂಜಡ್ ಇಪ್ಪುನ ಗೋಶಾಲೆಡ್ ಸಜ್ಜನ ಬಂಧುಲೆನ ಸಂಯೋಜನೆಡ್ ಅಟ್ಟನೆ ಮಲ್ದಿನ ಸಾಮೂಹಿಕ ಗೋಪೂಜೆಡ್ ಪಾಲ್ ಪಡೆದ್ ಪಾತೆರಿಯೆರ್.
ಕೈಕಂಜಿಲೆಗ್ ಪುರ್ಪ ದ ಮಾಲೆ ಪಾರ್ದ್, ಪಂಚಕಜ್ಜಾಯ, ದೋಸೆ, ಫಲ ವಸ್ತು ಕೊರಿಯೆರ್. ಗೋಶಾಲೆಡ್ ಬೇಲೆ ಮಲ್ಪುನ ಸಿಬಂದಿಲೆನ್ ಗೌರವ ಮಲ್ತೆರ್ .
ದೇವಲ್ಯದ ಅರ್ಚಕೆರ್ ಶ್ರೀಹರಿನಾರಾಯಣದಾಸ ಆಸ್ರಣ್ಣ ಪಾತೆರ್ದ್ ಕಟೀಲ್ ಡ್ ಪರಪುನ ನಂದಿನೀ ತುದೆ ಕಾಮಧೇನುನ ಮಗಲ್ ಪನ್ಪುನ ಪುರಾಣಕಥೆತ ಲೆಕ್ಕ ಮುಲ್ಪ ಗೋಸೇವೆಗ್ ಮಹತ್ವ ಉಂಡು . ಅಂಚಾದ್ ಭಕ್ತೆರ್ ಗೋಸೇವೆನ್ ಮಸ್ತ್ ಜನ ಮಲ್ತೊಂದುಲ್ಲೆರ್, ಕಾಮಧೇನು, ನಂದಿನಿ ಇಂಚ ಮೂಜಿ ಗೋಶಾಲೆ ನಡಪಾವರೆ ಉಂದು ಸಾಕಾರ ಕೊರ್ತುಂಡು ಪಂದ್ ಪಂಡೆರ್. ಏಲ್ ಎಕರೆದಾತ್ ಭೂಮಿ ಗೋಶಾಲೆಗ್ ತಿಕ್ಕ್ಂಡ್ ಉಂದೆನ್ ಮಲ್ಲ ಮಲ್ಪರೆ ಮಾಸ್ಟರ್ ಪ್ಲಾನ್ ತಯಾರಿ ಅತುಂಡ್. ಮುಖ್ಯವಾದ್ ದೇಸೀ ತಳಿಲೆಗ್ ಮಾತ್ರ ಮುಲ್ಪ ಅವಕಾಶ ಮಲ್ದಿನಿ , ತಳಿ ಅಭಿವೃದ್ಧಿಗ್ ಪ್ರಾಮುಖ್ಯ ಕೊರೊಂದುಲ್ಲ ಪಂದ್ ತೆರಿಪಾಯೆರ್.
ಗೋಶಾಲೆದ ಮೇಲ್ವಿಚಾರಕೆರ್ ಸದಾನಂದ ಮಾಹಿತಿ ಕೊರ್ದು ಕಟೀಲ್ ಗೋಶಾಲೆಡ್ ಮಲೆನಾಡ ಗಿಡ್ಡ, ಕಬೆತ್ತಿ, ಮಿಶ್ರತಳಿ, ಗೀರ್, ಹಳ್ಳಿಕಾರ್, ಸಾಯಿವಾಲಾ, ಕಾಸರಗೋಡು ಗಿಡ್ಡ, ಹೆಚ್‌ಹೆಫ್, ಜರ್ಸಿ, ಪುಂಗನೂರು, ಕಾಂಕ್ರೀಜ್ ಇಂಚ 115 ಬೋರಿ 75 ಪೆತ್ತಲು ಉಲ್ಲ. 12 ಜನ ಬೇಲೆಗ್ ಜನ ಉಲ್ಲೆರ್ ಪಂದ್ ಪಂಡೆರ್.
ದೇವಲ್ಯ ದ ಮುಕ್ತೇಸೆರೆರ್ ವಾಸುದೇವ ಆಸ್ರಣ್ಣ, ಅರ್ಚಕೆರ್ ಅನಂತಪದ್ಮನಾಭ ಆಸ್ರಣ್ಣ, ಶ್ರೀಕರ ಆಸ್ರಣ್ಣ, ಗೋಸೇವಕ ಸುಮನ್ ಶೆಟ್ಟಿ, ಬಿಪಿನ್‌ಚಂದ್ರ ಶೆಟ್ಟಿ ಕೊಡೆತ್ತೂರುಗುತ್ತು, ಕಿನ್ನಿಗೋಳಿ ಪಟ್ಟಣ ಪಂಚಾಯತ್ ಗುರ್ಕಾರ್ಲು ಗುರುರಾಜ ಮಲ್ಲಿಗೆಯಂಗಡಿ, ಸದಸ್ಯರಾಯಿನ ಲೋಕಯ್ಯ ಸಾಲ್ಯಾನ್, ದಾಮೋದರ ಶೆಟ್ಟಿ, ಪ್ರಕಾಶ್ ಆಚಾರ್, ಶೈಲೇಶ್ ಅಂಚನ್, ಈಶ್ವರ ಕಟೀಲು, ಕಸ್ತೂರಿ ಪಂಜ, ಆದರ್ಶ ಶೆಟ್ಟಿ, ವಿಜಯ ಯುವಸಂಗಮದ ಧನಂಜಯ ಶೆಟ್ಟಿ ಎಕ್ಕಾರು, ದೇವದಾಸ ಮಲ್ಯ, ಸಿಎ ಚಂದ್ರಶೇಖರ ಶೆಟ್ಟಿ, ರವೀಂದ್ರ ಅತ್ತೂರು, ಪ್ರಕಾಶ್ ಕುಕ್ಯಾನ್, ಕೇಶವ್ ಬೊಕ್ಕ ಕೆಲವೆರ್ ಇತ್ತೆರ್ .

ಮುಲ್ಕಿ ಪೊಲೀಸ್ ಠಾಣೆಡ್ ಆಯುಧ ಪೂಜೆ

ಮುಲ್ಕಿ: ಪೊಲೀಸ್ ಠಾಣೆಡ್ ಆಯುಧ ಪೂಜೆ ಗೌಜಿಡ್ ನಡತ್ಂಡ್.
ಈ ಪೊರ್ತುಡು ಮುಲ್ಕಿ ಪೊಲೀಸ್ ಠಾಣೆದ ಅಧಿಕಾರಿಲು ಸಿಬ್ಬಂದಿ ವರ್ಗ ಬೊಕ್ಕ ಗ್ರಾಮಸ್ಥೆರ್ ಉಪಸ್ಥಿತರಿತ್ತೆರ್.

ಬಪ್ಪನಾಡ್ ದೇವಲ್ಯೊಗು ಖ್ಯಾತ ಬಾಲಿವುಡ್ ನಟ ಸುನಿಲ್ ಶೆಟ್ಟಿ ಭೇಟಿ

ಮುಲ್ಕಿ: ಮಾರ್ನೆಮಿದ ಪೊರ್ತುಡು ಸೀಮೆda ಒರುಂಭ ಮಾಗಣೆದ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯೊಗು ಖ್ಯಾತ ಬಾಲಿವುಡ್ ನಟ ಸುನಿಲ್ ಶೆಟ್ಟಿ ಭೇಟಿ ಕೊರಿಯೆರ್.
ದೇವಸ್ಥಾನದ ಅರ್ಚಕ ಪ್ರಸಾದ್ ಭಟ್ ಶ್ರೀದೇವಿನ ಶೇಷ ವಸ್ತ್ರ ಬೊಕ್ಕ ಪ್ರಸಾದ ಕೊರ್ದು ನಟ ಸುನಿಲ್ ಶೆಟ್ರೆನ್ ದೇವಸ್ಥಾನದ ವತಿರ್ದ್ ಗೌರವ ಮಲ್ತೆರ್.
ಬೊಕ್ಕ ನಟ ಸುನಿಲ್ ಶೆಟ್ರ್ ಶಿಮಂತೂರು ಶ್ರೀ ಆದಿ ಜನಾರ್ಧನ ದೇವಸ್ಥಾನಗ್ ಭೇಟಿ ಕೊರಿಯೆರ್.
ಮೂಲತಃ ಮುಲ್ಕಿದಾರ್ ಆದ್ ಇಪ್ಪುನ ಸುನಿಲ್ ಶೆಟ್ರ್ ಮುಂಬೈಡ್ ಇಪ್ಪುನು ಆಂಡ ಬಪ್ಪನಾಡ್ ದೇವಸ್ಥಾನಡ್ ನಡಪುನ ಜಾತ್ರಾ ಮಹೋತ್ಸವ ಬೊಕ್ಕ ಬೇತೆ ಬೇತೆ ಕಾರ್ಯಕ್ರಮಲೆಡ್ ಪಾಲ್ ಪಡೆಪೆರ್.
ಈ ಪೊರ್ತುಡು ದೇವಸ್ಥಾನದ ಅರ್ಚಕೆರ್ ಶ್ರೀಪತಿ ಉಪಾಧ್ಯಾಯ, ಅನುವಂಶಿಕ ಮೊಕ್ತೇಸೆರೆರ್ ದುಗ್ಗಣ್ಣ ಸಾವಂತ ಅರಸುಲು , ಕಾರ್ಯನಿರ್ವಹಣಾಧಿಕಾರಿ ಶ್ವೇತಾ ಪಳ್ಳಿ, ಗೋಪಾಲ ಕೃಷ್ಣ ಭಟ್, ನಾಗಸ್ವರ ವಾದಕ ನಾಗೇಶ್ ಬಪ್ಪನಾಡು ಅಕೌಂಟೆಂಟ್ ಶಿವಶಂಕರ್, ಅಶ್ವಿನ್ ಆಳ್ವ ಕುಬೆವೂರು,ಕಾರ್ತಿಕ್ ಕೋಟ್ಯಾನ್,ಅರ್ಚನಾ ಶೆಟ್ಟಿ ಬೊಕ್ಕ ಕೆಲವೆರ್ ಉಪಸ್ಥಿತರಿತ್ತೆರ್.

ಮುಲ್ಕಿಟೂರಿಸ್ಟ್ ಕಾರ್ ಬೊಕ್ಕ ಟೆಂಪೋ ಚಾಲಕರ ಬೊಕ್ಕ ಮಾಲಕರ ಸಂಘದ 2026-27 ನೇ ವರ್ಸದ ನೂತನ ಪೊಸ ಗುರ್ಕಾರ್ಲು ಆದ್ ನಾರಾಯಣ ನ್ಯಾಕ್ ಆಯ್ಕೆ

ಮುಲ್ಕಿ:ಟೂರಿಸ್ಟ್ ಕಾರ್ ಬೊಕ್ಕ ಟೆಂಪೋ ಚಾಲಕರ ಬೊಕ್ಕ ಮಾಲಕರ ಸಂಘದ 2026-27 ನೇ ವರ್ಸದ ಪೊಸ ಗುರ್ಕಾರ್ಲು ಆದ್ ನಾರಾಯಣ ನ್ಯಾಕ್ ಸರ್ವಾನುಮತಟ್ ಆಯ್ಕೆಯಾತೆರ್ .
ಸಂಘದ ಪೊಸ ಒತ್ತು ಗುರ್ಕಾರ್ಲು ಆದ್ ಮೋಹನ್ ಕುಂದರ್ ಬೊಕ್ಕ ಜಗನ್ನಾಥ, ಕಾರ್ಯದರ್ಶಿಯಾದ್ ಮಂಜುನಾಥ್ ಶೆಟ್ಟಿ, ಒತ್ತು ಕಾರ್ಯದರ್ಶಿಯಾದ್ ವಿಜಯ ಮಾನಂಪಾಡಿ ಬೊಕ್ಕ ಅನಿಲ್ ಕುಮಾರ್, ಕೋಶಾಧಿಕಾರಿಯಾದ್ ನಿತಿನ್ ದೇವಾಡಿಗ ಬೊಕ್ಕ ಕಾರ್ಯಕಾರಿ ಸಮಿತಿ ಸದಸ್ಯರಾದ್ ಪಿ.ಆರ್ ರಾಜೇಶ್, ದೇವಣ್ಣ ನಾಯಕ್, ಲತೀಶ್ ಕುಂದರ್, ಚಂದ್ರಶೇಖರ್ ರಾವ್, ಸಂತೋಷ್ ಶೆಟ್ಟಿ ಚಿತ್ರಾಪು, ಸಂತೋಷ್ ಪೂಜಾರಿ, ಸುರೇಶ್ ದೇವಾಡಿಗ, ಮೋಹನ್ ಶೆಟ್ಟಿ, ಶೆಕ್ ಫಹಾದ್ (ಪಪ್ಪು), ಆಯ್ಕೆಯಾತೆರ್ .
ಸಭೆಟ್ ಸಂಘದ ಸದಸ್ಯೆರೆನ ಜೋಕುಲೆಗ್ ವಿದ್ಯಾರ್ಥಿವೇತನ ಕೊರಿಯೆರ್.
ಪೊಸ ಗುರ್ಕಾರ್ಲು ಬೊಕ್ಕ ಪದಾಧಿಕಾರಿಲೆಗ್ ಬೆಂಗಳೂರುದ ಆಧ್ಯಾತ್ಮಿಕ ಗುರು ಶ್ರೀ ಚಂದ್ರಶೇಖರ ಸ್ವಾಮೀಜಿ ಎಡ್ಡೆಪ್ಪುಲು ಬಯಕಿಯೆರ್

ಗೋಳಿಜೋರಡ್ 18ನೇ ವರ್ಷದ ಮಾರ್ನೆಮಿ ಪಿಲಿವೇಷದ ಊದು ಪೂಜೆ ಲೇಸ್

ಮುಲ್ಕಿ: ಗೋಳಿಜೋರ ಫ್ರೆಂಡ್ಸ್, ಆಶ್ರಯಡ್ ಮಾರ್ನೆಮಿ ನಿಟ್ಟ್‌ಡ್ ಅಟ್ಟನೆ ಮಲ್ದಿನ 18ನೇ ವರ್ಷದ ದಸರಾ ಪಿಲಿವೇಷದ ಊದು ಪೂಜೆ ಲೇಸ್ ನ್ ಜಯಕೃಷ್ಣ ಕೋಟ್ಯಾನ್ ಬೊಲ್ಪು ಅರ್ಲಾದ್ ಚಾಲನೆ ಕೊರಿಯೆರ್ .
ಈ ಪೊರ್ತುಡು ಮೂಲ್ಕಿ ಮೂಡುಬಿದಿರೆ ಕ್ಷೇತ್ರ ಶಾಸಕ ಉಮಾನಾಥ್ ಕೋಟ್ಯಾನ್, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ಎಂ. ರೈ , ಡಾ. ಸರಳ ರಮೇಶ್ ಕುಂದರ್, ಕಿನ್ನಿಗೋಳಿ ಪಟ್ಟಣ ಪಂಚಾಯತ್ ಗುರ್ಕಾರ್ಲು ಗುರುರಾಜ್ ಮಲ್ಲಿಗೆಯಂಗಡಿ, ಮೂಲ್ಕಿ ಮಾನಂಪಾಡಿ ಶ್ರೀ ವೀರಭದ್ರ ಮಹಮ್ಮಾಯಿ ದೇವಸ್ಥಾನದ ಆಡಳಿತ ಮೊಕ್ತೇಸೆರೆರ್ ಪುರಂದರ ಶೆಟ್ಟಿಗಾರ್, ಕಿನ್ನಿಗೋಳಿ ಪಟ್ಟಣ ಪಂಚಾಯತ್ ಪದುಕೆರ್ ಪ್ರಣಿಕ್ ಕಿನ್ನಿಗೋಳಿ , ಗೋಪಾಲಕೃಷ್ಣ ಪುನರೂರು, ಉದ್ಯಮಿ ಜಗನ್ನಾಥ್ ಬರ್ಕೆ ಮನೆ, ಶಿಮಂತೂರು, ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಗುರ್ಕಾರ್ಲು ಮೋಹನ್ ಕೊಟ್ಯಾನ್, ಮುಲ್ಕಿ ಮೂಡಬಿದ್ರೆ ಕ್ಷೇತ್ರದ ಯುವ ಕಾಂಗ್ರೆಸ್ ಗುರ್ಕಾರ್ಲು ಶಯನ್ ಕುಮಾರ್ ಶೆಟ್ಟಿಗಾರ್, ಮುಲ್ಕಿ ಬ್ಲಾಕ್ ಯುವ ಕಾಂಗ್ರೆಸ್ ಗುರ್ಕಾರ್ಲು ರಕ್ಷಿತ್ ಪೂಜಾರಿ, ಮೋಹಿನಿ ಕಲಾ ಸಂಪದ ಮಾಲಕ ಗಂಗಾಧರ್ ಶೆಟ್ಟಿಗಾರ್ , ಹರಿಹರ ಶ್ರೀ ರಾಮ ಭಜನಾ ಮಂದಿರದ ಗುರ್ಕಾರ್ಲು ಬೊಕ್ಕ ಪದಾಧಿಕಾರಿಲು, ಸರ್ವ ಸದಸ್ಯೆರ್ ಬೊಕ್ಕ ಅಪಾರ ಸಂಖ್ಯೆದ ಭಕ್ತಾಭಿಮಾನಿಲು ಉಪಸ್ಥಿತರಿತ್ತೆರ್.
ಊದು ಪೂಜೆಯ ಬೊಕ್ಕ ಸೇವಕರ್ತೆರ್ ಅಂಕಿತ ಶಯನ್ ಶೆಟ್ಟಿಗಾರ್, ಶ್ರೀಯಾನ್, ತನಿಷ್ಕಾ, ಸತೀಶ್ ಪೂಜಾರಿ ಕೊಡೆತ್ತೂರು, ಆಶಿರ್ವಾದ್ ಗೋಳಿಜೋರ, ರಂಜಿತಾ ನವನೀತ್, ಮಾಸ್ಟರ್ ದರ್ಶಿಲ್ ಗೋಳಿಜೋರ, ಕವಿತಾ ಜಗದೀಶ್ ಶೆಟ್ಟಿಗಾರ್ ಕುಜಿಂಗಿರಿ, ದೀಪ್ತಿ ಸನತ್ ಗೋಳಿಜೋರ, ಇಂಡಿಯನ್ ಆರ್ಮಿ ಹರೀಶ್ ಮುಲ್ಕಿ, ಸೇವಂತಿ ಚಾರಿಟೇಬಲ್ ಟ್ರಸ್ಟ್ ಮುಲ್ಕಿ ಮೊಕುಲೆರ್ದ್ ನುಪ್ಪುಪ್ರಸಾದ ನಡತ್ಂಡ್.

ಕಿಲ್ಪಾಡಿ ತಿರುಮಲ ಗುತ್ತು ಕೈತಲ್ದ ಇಲ್ಲಲ್ ಲಕ್ಷರ್ದ್ ಎಚ್ಚ ರೂ. ಬಿಲೆತ್ತ ಕಾಸ್ ಬಂಗಾರ್ ಕಂಡಿನ ಕಲ್ವೆರ್

ಮುಲ್ಕಿ: ಶಿಮಂತೂರು ದೇವಸ್ಥಾನಗ್ ಮಾರ್ಗ ಸಂಪರ್ಕ ಮಲ್ತಿನ ಕಿಲ್ಪಾಡಿ ಗ್ರಾಮದ ತಿರುಮಲ ಗುತ್ತು ಕೈತಲ್ದ ಶಕೀಲಾ ಪೂಜಾರಿ ಪನ್ಪಿನಾರೆನ ಇಲ್ಲಲ್ ರ್ದ್ ಸನಿಯಾರ ಪಗೆಲ್ ಡ್ ಲಕ್ಷರ್ದ್ ಎಚ್ಚ ರೂ. ಬಿಲೆತ್ತ ಕಾಸ್-ಬಂಗಾರ್ ಕಂಡ್ ದ್ ಪೋಯಿನ ಬಗ್ಗೆ ಮುಲ್ಕಿ ಪೊಲೀಸ್ ಠಾಣೆಡ್ ಕೇಸ್ ದಾಖಲಾತ್ಂಡ್.

ಶಕೀಲಾ ಪೂಜಾರಿ ತನ್ನ ಕಂಡನಿ ಹರೀಶ್ ಪನ್ಪಿನಾರೆನೊಟ್ಟಿಗೆ ಇಲ್ಲಲ್ ವಾಸ ಇತ್ತೆರ್. ಇಲ್ಲಲ್ ಎರ್ಲಾ ಇಜ್ಜಂದಿನ ಪೊರ್ತುಡು ಈ ಘಟನೆ ನಡತ್ ದ್ಂಡ್.

ಕಲ್ವೆರ್ ಶಕೀಲಾ ಮೆರೆನ ಇಲ್ಲದ ಎದುರು ಭಾಗದ ಕರ್ಬದ ಬಾಕಿಲ್ ದ ಉಲಯಿದ ಚಿಲಕನ್ ಗಟ್ಟಿದ ಸೊತ್ತುರ್ದು ತುಂಡು ಮಲ್ತ್ ದ್ ಉಲಯಿ ಪೋತೆರ್. ಬೊಕ್ಕ ಓಪನ್ ಇತ್ತಿನ ಕಪಾಟ್ ನ್ ನಡ್ ದ್, ಕುಂಟುದೊಲಯಿ ದೆಂಗದ್ ದೀದಿತ್ತಿನ ಕಪಾಟ್ ದ ಬೀಗದ ಕೀ ಮುಕೇನ ಕಪಾಟ್ ದ ಉಲಯಿದ ಡ್ರಾವರ್ ನಡ್ ದ್ 6 ಕಾಜಿ (60 ಗ್ರಾಂ), 1 ನೆಕ್ಲೆಸ್ (20 ಗ್ರಾಂ), 1 ಮಾಲೆ (35 ಗ್ರಾಂ), 1 ಹವಳದ ಮಾಲೆ (16 ಗ್ರಾಂ), 1 ಮುತ್ತುದ ಮಾಲೆ (24 ಗ್ರಾಂ), 4 ಜತೆ ಕೆಬಿತ್ತ (32 ಗ್ರಾಂ), 15 ಉಂಗುರ (45 ಗ್ರಾಂ), 1 ಕರಿಮಣಿ (56 ಗ್ರಾಂ), 6 ಬಂಗಾರ್ ದ ತುಂಡು (8 ಗ್ರಾಂ), 1 ಪೆಂಡೆಂಟ್ (5 ಗ್ರಾಂ), 1 ಬ್ರಾಸ್ ಲೆಟ್ (10 ಗ್ರಾಂ), 1 ಚೈನ್ (10 ಗ್ರಾಂ) ಸೇರ್ದ್ ಸುಮಾರ್ 40,56,000 ರೂ.‌ ಬಿಲೆತ್ತ 321 ಗ್ರಾಂ (39 ಪವನ್ ಬಂಗಾರ್), ಸುಮಾರ್ 10,000ರೂ, 2000 ರೂ. ಕ್ವಾಯಿನ್ ಸೇರ್ದ್ ಲಕ್ಷರ್ದ್ ಎಚ್ಚ ರೂ. ಬಿಲೆತ್ತ ಬಂಗಾರ್ ಬೊಕ್ಕ ಕಪಾಟ್ ಡ್ ಇತ್ತಿನ ಶಕಿಲಾ ಮೆರೆನ ಮಗಲೆನ ಚೂಡಿದಾರ, ಡ್ರೆಸ್ ನ್ ಕಂಡ್ ದೆರ್. ಕಲ್ವೆರ್ ಕಂಡ್ ದ್ ವಾಪಸ್ ಪೋನಗ ಒಂಜಿ ಕರಿಮಣಿ ಮಾಲೆನ್ ಅಲ್ಪನೇ ಬುರ್ದು ಪೋತೆರ್. ಬೊಕ್ಕ ಇಲ್ಲದ ಎದುರುದ ಬಾಕಿಲ್ ನ್ ಉಲಯಿರ್ದ್ ಲಾಕ್ ‌ಮಲ್ದೆರ್.

ಶಕೀಲ ಮೆರೆನ ಕಂಡನಿ ಹರೀಶ್ ಮೇರ್ ಬೊಲ್ಪುಗು 8 ಗಂಟೆಗ್ ಎಪೊಲದಲೆಕ್ಕನೇ ಕಿನ್ನಿಗೋಳಿದ ಹಾರ್ಡ್ವೇರ್ ಅಂಗಡಿಗ್ ಪ್ರತಿ‌ ದಿನೊಲ ಕೆಲಸಗ್ ಪೋವೊಂದು ಇತ್ತೆರ್. ಇಲ್ಲಲ್ ಶಕೀಲಾ ಪೂಜಾರಿ ಮೇರ್ ತನ್ನ ಇಲ್ಲದ‌‌ ಮಿತ್ತ್ ಬಾಡಿಗೆ ಇಲ್ಲಲ್ ವಾಸ ಇಪ್ಪುನ ದಿಲ್ ಶಾದ್ ಪನ್ಪಿನರೆನೊಟ್ಟಿಗೆ ಸ್ಕೂಟರ್ ಡ್ ಮುಲ್ಕಿ ಮುಟ್ಟ ಪೋದು ಬೊಕ್ಕ ಬಸ್ಸ್ ಟ್ಟ್ ಪಡುಪಣಂಬೂರು ಶನಿಮಂದಿರ, ಪಾವಂಜೆ ದೇವಸ್ಥಾನ ಬೊಕ್ಕ ಕಾರ್ನಾಡ್ ಸಂತೆಗ್ ಪೋದು ವಾಪಸ್ ಬಯ್ಯಗ್ ನಾಲ್ ಗಂಟೆಗ್ ಇಲ್ಲಲ್ ದಂಚಿ‌ ಬನ್ನಗ ಕಂಡಿನವು ಗೊತ್ತಾತ್ಂಡ್.

ಗ್ರಾಮೀಣ ಪ್ರದೇಶಡ್ ಪಗಲೆಡೇ ಲಕ್ಷರ್ದ್ ಎಚ್ಚ ರೂ. ಬಿಲೆತ್ತ ಕಾಸ್ ಬಂಗಾರ್ ಕಂಡಿನವು ಕೈತಲ್ ದಕ್ಲೆಗ್ ಪೋಡಿಗೆ ಸುರು ಆತ್ಂಡ್. ಜಾಗೆಗ್ ಶ್ವಾನದಳ, ಬೆರಳಚ್ಚುತಜ್ಞೆರ್, ಮುಲ್ಕಿ ಪೊಲೀಸ್ ಇನ್ಸ್ ಪೆಕ್ಟರ್ ಶ್ರೀಕಾಂತ್, ಸಾಮಾಜಿಕ ಕಾರ್ಯಕರ್ತೆರ್ ಭೀಮಾಶಂಕರ್, ಕಾರ್ನಾಡ್ ಆಟೋ ಚಾಲಕೆರೆನ ಸಂಘದ ಅಧ್ಯಕ್ಷೆರ್ ಕಿರಣ್ ಶಿಮಂತೂರು ಭೇಟಿ ಕೊರ್ತೆರ್. ಇಲ್ಲಲ್ ಕಂಡುನ ದುಂಬುದ ದಿನ ಕೆಲವು ಅನುಮಾನ ವ್ಯಕ್ತಿಲು ರಾತ್ರೆದ ಪೊರ್ತು ಇಲ್ಲದ ಸುತ್ತಮುತ್ತ ಪೋವೊಂದು ಇತ್ತೆರ್ ಪಂದ್ ಶಕೀಲಾ ಪಂಡೆರ್.
ಶಕೀಲಾ ಮೆರೆನ ಇಲ್ಲದ ಕೈತಲ್ ಒವ್ವೇ ಇಲ್ಲ್ ಇಜ್ಜಂದಿರ್ನೆದಾವೆರ ಬೊಕ್ಕ ಮಾರ್ಗಗ್ ಸರಿಯಾಯಿನ ಲೈಟ್ ಇಜ್ಜಂದಿರ್ನೆದಾವೆರ ಕಲ್ವೆರೆಗ್ ಎಡ್ಡೆ ಆತ್ಂಡ್ ಪಂದ್
ಮುಲ್ಕಿ ಪೊಲೀಸೆರ್ ಕೇಸ್ ದಾಖಲ್ ಮಲ್ತ್ ದ್ ತನಿಖೆ ನಡಪಾವೊಂದು ಉಲ್ಲೆರ್.

ಮುಲ್ಕಿ ಪರಿಸರಡ್ ಕಂಡಿನ ಬೊಕ್ಕ ಸುರು ಆತ್ಂಡ್. ಕರಿನ ತಿಂಗೊಲ್ ಠಾಣೆ ವ್ಯಾಪ್ತಿದ ಕವಾತ್ತಾರು ಕೈತಲ್ದ ಇಲ್ಲ್ ಒಂಜೇಟ್ ಲಕ್ಷರ್ದ್ ಎಚ್ಚ ಬಿಲೆತ್ತ ಬಂಗಾರ್ ಉಂದುವೇ ರೀತಿ ಕಂಡ್ ದೆರ್. ಇಡೇ ಮುಟ್ಟ ಕಲ್ವೆರ್ ತಿಕಿಜೆರ್. ಅಂಚೆನೆ ಮುಲ್ಕಿ ಪೊಲೀಸ್ ಠಾಣೆ ವ್ಯಾಪ್ತಿದ ಕಿಲ್ಪಾಡಿ ಕೋರ್ದಬ್ಬು ದೈವಸ್ಥಾನಡ್ ಲಕ್ಷರ್ದ್ ಎಚ್ಚ ರೂ. ಬಿಲೆತ್ತ ದೈವೊದ ಸೊತ್ತುಲೆನ್ ಕಂಡ್ ದೆರ್. ಇತ್ತೆ ತಿರುಮಲ ಗುತ್ತು ಕೈತಲ್ದ ಶಕೀಲಾ ಮೆರೆನ ಲಕ್ಷರ್ದ್ ಎಚ್ಚ ರೂ. ಬಿಲೆತ್ತ ಸೊತ್ತುಲೆನ್ ಕಂಡ್ ದೆರ್. ಕಿಲ್ಪಾಡಿ, ಶಿಮಂತೂರು ಪರಿಸರದ ನಾಗರಿಕೆರೆನ್ ಪೋಡಿಗೆ ಸುರು ಆತ್ಂಡ್. ಕೂಡ್ಲೇ ಮುಲ್ಕಿ ಪೊಲೀಸೆರ್ ಕಲ್ವೆರೆನ್ ಬಂಧನ ಮಲ್ಪುನೊಟ್ಟಿಗೆ ಬೀಟ್ ವ್ಯವಸ್ಥೆ ಮಲ್ಪೊಡು ಪಂದ್ ನಾಗರಿಕೆರ್ ಒತ್ತಾಯ ಮಲ್ದೆರ್.

ನ್ಯಾಯಂತಡೆಗ್ ಹಾಜರಾವಂದೆ 12 ವರ್ಷ ದೆಂಗುದ್ ಕುಲ್ದಿನ ಆರೋಪಿ ಕೈದ್

ಮುಲ್ಕಿ : ಕರಿನ 12 ವರ್ಷರ್ದ್ ಅವೆತೋ ಸರ್ತಿ ಬಾರಿ ದಸ್ತಗಿರಿ ವಾರಂಟ್, ಪ್ರೊಕ್ಲಮೇಷನ್ ಇತ್ತ್ಂಡಲಾ ನ್ಯಾಯಂತಡೆಗ್ ಹಾಜರಾವಂದೆ ದೆಂಗುದ್ ಕುಲ್ದಿನ ಆರೋಪಿನ್ ಮುಲ್ಕಿ ಪೊಲೀಸೆರ್ ಮುಲ್ಕಿ ಲಿಂಗಪ್ಪಯ್ಯ ಕಾಡ್ ಡ್ ಕೈದ್ ಮಲ್ತ್ ದ್ ನ್ಯಾಯಂತಡೆಗ್ ಲೆತೊಂದು ಪೋತೆರ್. ನ್ಯಾಯಂತಡೆ ಆರೋಪಿಗ್ ನ್ಯಾಯಾಂಗ ಬಂದನ ಕೊರ್ತೆರ್.
ಆರೋಪಿನ್ ಮುಲ್ಕಿ ಕೈತಲ್ದ ಕೆಎಸ್ ರಾವ್ ನಗರ ಹನುಮಂತ ದೇವಸ್ಥಾನದ ದಲ್ಪದ ಸಂತೋಷ (33 ) ಪಂದ್ ತೆರಿದ್ ಬೈದುಂಡ್.
ಆರೋಪಿ ಸಂತೋಷ್ ಮುಲ್ಕಿ ಪೊಲೀಸ್ ಠಾಣೆ ಅ. ಕ್ರ 209/2014 ಕಲಂ 448, 354 IPC ಬೊಕ್ಕ ಬೆದ್ರದ ಹಿರಿಯ ಸಿಜೆ & ಜೆ. ಎಂ. ಎಫ್. ಸಿ ನ್ಯಾಯಾಲಯ, ಮೇರೆನ CC No 274/2023 ಪ್ರಕರಣಡ್ ಸುಮಾರ್ 12 ವರ್ಷರ್ದ್ ಮಾನ್ಯ ನ್ಯಾಯಂತಡೆಗ್ ಪೋವಂದೆ ದೆಂಗುದ್ ಕುಲ್ದು ಇತ್ತೆ ಪಂದ್ ಪೊಲೀಸ್ ತೆರಿಪಾದೆರ್.

ಮುಲ್ಕಿ: ದಲಿತ ಸಂಘರ್ಷ ಸಮಿತಿ ಅಂಬೇಡ್ಕರ್ ವಾದ ಮುಲ್ಕಿ ತಾಲೂಕು ಶಾಖೆ ಉದಿಪನ

ಮುಲ್ಕಿ:ಕರ್ನಾಟಕ ದಲಿತ ಸಂಘರ್ಷ ಸಮಿತಿ ಅಂಬೇಡ್ಕರ್ ವಾದ ಮುಲ್ಕಿ ತಾಲೂಕು ಶಾಖೆನ್ ಶ್ರೀ ಕೋರಬ್ಬು ದೈವಸ್ಥಾನದ ಅರ್ಚಕ ಸುಧಾಕರ ಗೇರುಕಟ್ಟೆ ಉಡಿಪನ ಮಲ್ತೆರ್.
ದಸಂಸ ಮೈಸೂರು ವಿಭಾಗೀಯ ಸಂಘಟನಾ ಸಂಚಾಲಕೆರ್ ಬಿ.ಕೆ.ವಸಂತ್ ಬೆಳ್ತಂಗಡಿ ಗುರ್ಕಾರ್ಮೆ ವೈಸೊಂದು ಪಾತೆರ್ದ್ ಶೋಷಿತ ಸಮುದಾಯಗ್ ಅನ್ಯಾಯ, ದೌರ್ಜನ್ಯ ಆನಗ ಸಂಘಟನೆ ಕಾನೂನಾತ್ಮಕವಾದ್ ಹೋರಾಟ ಮಲ್ತ್ ನ್ಯಾಯ ತಿಕ್ಕರೆ ಸಂಘಟನೆದ ಅಗತ್ಯ ಉಂಡು . ದಲಿತ ಸಮಾಜ ಶೈಕ್ಷಣಿಕ, ಸಾಮಾಜಿಕ, ಆರ್ಥಿಕ, ಧಾರ್ಮಿಕ ಸಾಧಕರಾವರೆ ಅಂಬೇಡ್ಕರ್ ತೋಜಾಯಿನ ಸಾದಿಡ್ ಪೋವೊಡು ಪಂಡೆರ್.
ಈ ಲೇಸ್ ಡ್ ಮಲ್ಲ ಬಿನ್ನೆರಾದ್ ಮಾಜೀ ಸೈನಿಕ ಸುಧಾಕರ ಗುತ್ತಕಾಡು, ದಲಿತ ಮುಖಂಡೆರ್ ಸಂಜೀವ ಅಂಚನ್, ಲೋಕೇಶ್ ಬಿ., ಶಂಕರ್ ಅಮೃತಾನಂದಮಯಿ ನಗರ, ಭಾಸ್ಕರ್ ಮಾಬೆನ್, ಪುರಂದರ ಕೆರೆಕಾಡು, ಸಚ್ಚಿದಾನಂದ ಗೇರುಕಟ್ಟೆ ಉಪಸ್ಥಿತರಿತ್ತೆರ್.
ಕುಮಾರ್ ಎಸ್.ಅಂಗರಗುಡ್ಡೆ ಎದ್ಕೊಂದು ಲೇಸ್ ಸುದಾರಿಕೆ ಮಲ್ತೆರ್ .

ಪೊಸ ದ ಸಂ ಸ ಅಂಬೇಡ್ಕರ್ ವಾದ ಮುಲ್ಕಿ ತಾಲೂಕು ಶಾಖೆ ಸಮಿತಿದ ಪದಾಧಿಕಾರಿಲು

ಸಂಚಾಲಕೆರ್ ಪುರಂದರ ಕೆರೆಕಾಡು, ಸಂಘಟನಾ ಸಂಚಾಲಕೆರ್ ಸಂಜೀವ ಅಂಚನ್, ಜಯ ಅಮೃತಾನಂದಮಯಿ ನಗರ, ಶ್ರೀಕುಮಾರ್ ಎಸ್.ಅಂಗರಗುಡ್ಡೆ, ಸಚ್ಚಿದಾನಂದ ಗೇರುಕಟ್ಟಿ, ಶಂಕರ್ ಕೆಎಸ್‌ರಾವ್ ನಗರ, ಭಾಸ್ಕರ ಮಾಬೆನ್ ಕಾರ್ನಾಡು.

ನಿರ್ವಹಣಾ ಸಮಿತಿ ಸದಸ್ಯೆರ್

ಜಗನ್ನಾಥ್ ಗೇರುಕಟ್ಟೆ, ಸುಧಾಕರ ಗುತ್ತಕಾಡು, ಮೋಹನ್ ಚಿತ್ರಾಪು, ವಿಜಯ ಕಾರ್ನಾಡು, ಸುಧಾಕರ ಗೇರುಕಟ್ಟೆ, ರಕ್ಷಣ್ ಕಾರ್ನಾಡು, ಶಯನ್ ಕೆಎಸ್‌ರಾವ್ ನಗರ,

ತಾಲೂಕು ಸಮಿತಿ ಸದಸ್ಯೆರ್

ಸತೀಶ್ ಅಮೃತಾನಂದಮಯಿ ನಗರ, ಗೋಪಾಲ ಅಮೃತಾನಂದಮಯಿ ನಗರ, ರಮೇಶ್ ಕಾರ್ನಾಡು, ಪ್ರಕಾಶ್ ಪೊಯ್ಯಾರು, ವಿಠಲ ಸಾಲ್ಯಾನ್ ಮುಲ್ಕಿ ರಮೇಶ್ ಜೆ.ಬಿ., ಸಂಜನಾ, ರೇಣುಕಾ ಪ್ರವೀಣ್ ಗೇರುಕಟ್ಟೆ, ಕೃಷ್ಣ ಅಮೃತನಂದಮಯಿ ನಗರ

ಸೆ.30 : ಮುಲ್ಕಿಡ್ ಇಂಜಿನಿಯರ್ಸ್ ಡೇ ಆಚರಣೆ

ಮುಲ್ಕಿ:ಅಸೋಸಿಯೇಷನ್ ಆಫ್ ಸಿವಿಲ್ ಇಂಜಿನಿಯರ್ಸ್, ಮುಲ್ಕಿ (ACEM) ವತಿರ್ದ್ ಇಂಜಿನಿಯರ್ಸ್ ಡೇ 2026 ಲೇಸ್ ಸೆ.30 ಬುಧವಾರ ಬಯ್ಯಡ್ 6:30 ಗಂಟೆಗ್ ಮುಲ್ಕಿ ಸುಂದರ ರಾಮ ಶೆಟ್ಟಿ ಕನ್ವೆನ್ಶನ್ ಸೆಂಟರ್, ಕೊಲ್ನಾಡ್ ಮುಲ್ಕಿ ಮೂಲು ನಡಪರೆ ಉಂಡು.
ಲೇಸ್‌ಡ್ ಮಲ್ಲ ಬಿನ್ನೆರಾದ್ ಡಾ. ಶ್ವೇತಾ ಪೈ, ನಿರ್ದೇಶಕೆರ್ MBA, ಶ್ರೀದೇವಿ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ಮೇರ್ ಪಾಲ್ ಪಡೆವೆರ್.
Er. ರಾಜೇಂದ್ರ ಕಲ್ಬಾವಿ, ACCEI ರಾಷ್ಟ್ರೀಯ ಅಧ್ಯಕ್ಷೆರ್ ಮುಖ್ಯ ಭಾಷಣ ಮಲ್ಪುವೆರ್.
ಈ ಪೊರ್ತುಡು ಕರ್ನಾಟಕ ಕೌನ್ಸಿಲ್ ಫಾರ್ ಪ್ರೊಫೆಷನಲ್ ಸಿವಿಲ್ ಇಂಜಿನಿಯರ್ಸ್ ಸದಸ್ಯೆರಾಯಿನ Er. ಜಗದೀಶ್ ಪ್ರಸಾದ್ ಮೆರೆಗ್ ಮಾನಾದಿಗೆ ನಡಪರೆ ಉಂಡು.
ಅಲ್ಟ್ರಾಟೆಕ್ ಸಿಮೆಂಟ್ ಟೆರಿಟರಿ ಸೇಲ್ಸ್ ಹೆಡ್ ಮೋಹನ್ ಎಸ್. ಮೇರ್ ಮಾನಾದಿಗೆದ ಬಿನ್ನೆರಾದ್ ಲೇಸ್‌ಡ್ ಪಾಲ್ ಪಡೆವೆರ್.
“ಅಸೋಸಿಯೇಷನ್ ಆಫ್ ಸಿವಿಲ್ ಇಂಜಿನಿಯರ್ಸ್ ಸಂಸ್ಥೆ ಸಿವಿಲ್ ಇಂಜಿನಿಯರಿಂಗ್ ಪ್ರೊಫೆಶನಲ್ಸ್‌ನ್ ಒಂಜೇ ವೇದಿಕೆಗ್ ಕನಪಿನ ಬೊಕ್ಕ ಮುಲ್ಕಿ ಸುತ್ತಮುತ್ತ ಅಭಿವೃದ್ಧಿ ಮಲ್ಪುನ ಉದ್ದೇಶಡ್ ಸ್ಥಾಪನೆ ಆತ್ಂಡ್” ಪಂದ್ ಎಸಿಇಎಂ ಸ್ಥಾಪಕ ಅಧ್ಯಕ್ಷೆರ್
Er. ಮುಲ್ಕಿ ಜೀವನ್ ಕೆ. ಶೆಟ್ಟಿ ಬೊಕ್ಕ ಕಾರ್ಯದರ್ಶಿ Er. ಸುಜಿತ್ ಸಾಲ್ಯಾನ್ ಪತ್ರಿಕಾ ಹೇಳಿಕೆಡ್ ತೆರಿಪಾದೆರ್.

You Missed