ಬೆಂಗಳೂರು : ತುಳು ಕನ್ನಡ ಚಿತ್ರರಂಗದ ಮಾಮಲ್ಲ ನಟಿ, ಬೊಲ್ತೇರ್ ಮೂಲದ ಲೀಲಾವತಿ (87) ಮೇರ್ ಪ್ರಾಯದ ನಿಲೆಟ್ಟ್ ಬತ್ತಿನ ಅನಾರೋಗ್ಯರ್ದ್ ದೇವೆರ್ನ ಪಾದ ಸೇರಿಯೆರ್.
ಆರ್ ನಮಕ್ಕ್ ನನ ನೆಂಪು ಮಾತ್ರ. ಉಸುಲ್ ದ ತೊಂದರೆ ಅನುಭವಿಸಾವೊಂದು ಇತ್ತಿನ ಲೀಲಾವತಿ ಮೇರ್ ನೆಲಮಂಗಲದ ಸೋಲದೇವನಹಳ್ಳಿ ಫಾರ್ಮ್ ಹೌಸ್ ಡ್ ಮಗೆ ವಿನೋದ್ ರಾಜ್ ನೊಟ್ಟುಗು ಇತ್ತೆರ್.
ಹುಷಾರ್ ದಾಂತಿನ ಪೊರ್ತುಡು ಅರೆನ್ ಸಿಎಂ ಸಿದ್ದರಾಮಯ್ಯ, ನಟೆ ಶಿವರಾಜ್ ಕುಮಾರ್, ದರ್ಶನ್, ಅಭಿಷೇಕ್, ಇಂಚ ಸುಮಾರ್ ಜನ ಬತ್ತ್ ದ್ ತೂದು ಸಮಾಧಾನ ಪಂದ್ ಪೋದಿತ್ತೆರ್.
19 ವರ್ಷದೊಲಯಿದಕ್ಲೆನ ಏಷ್ಯಾಕಪ್ ಟೂರ್ನಿ ಇನಿರ್ದ್ ಸುರು ಆಪುಂಡು.
ನೆತ್ತ ಸುರುತ್ತ ಮ್ಯಾಚ್ ಭಾರತ ಬೊಕ್ಕ ಅಫ್ಘಾನಿಸ್ತಾನ ಗೊಬ್ಬೆರೆ ಉಂಡು. ಡಿ.10 ಕ್ಕ್ ಭಾರತ ಬೊಕ್ಕ ಪಾಕಿಸ್ತಾನ ಎದುರುಬದುರು ಗೊಬ್ಬೆರೆ ಉಂಡು. ದುಬೈಡ್ ನಡಪುನ ಈ ಟೂರ್ನಿಡ್ ಒಟ್ಟು 8 ಕೂಟಲು ಪಾಲ್ ಪಡೆಯೆರೆ ಉಂಡು.
ಭಾರತದೊಟ್ಟಿಗೆ ಪಾಕಿಸ್ತಾನ, ಜಪಾನ್, ಶ್ರೀಲಂಕಾ, ಅಫ್ಘಾನಿಸ್ತಾನ, ಬಾಂಗ್ಲಾದೇಶ, ನೇಪಾಳ ಬೊಕ್ಕ ಯುಎಇ ಕೂಟಲು ಟ್ರೋಫಿಗಾದ್ ಗೊಬ್ಬೆರೆ ಉಂಡು.
ಅಯೋಧ್ಯೆ ರಾಮಮಂದಿರ ಉದಿಪನಗ್ ಅಂಬಾನಿ, ಅದಾನಿ, ಸಚಿನ್ ಸೇರಿನಂಚೆನೆ 7 ಸಾರ ಬಿನ್ನೆರೆಗ್ ಲೆಪ್ಪೋಲೆ ಕೊರ್ತೆರ್.
ರಾಮಲಲ್ಲಾ ಮೂರ್ತಿದ ಪ್ರಾಣ ಪ್ರತಿಷ್ಠಾಪನೆ ಲೇಸ್ ಜ.22 ಕ್ಕ್ ನಡಪರೆ ಉಂಡು. ಈ ಲೇಸ್ ಡ್ ಪ್ರಧಾನಿ ಮೋದಿ, ಯೋಗಿ ಪಾಲ್ ಪಡೆಯೆರೆ ಉಲ್ಲೆರ್.
ಅತ್ತಂದೆ ಈ ಲೇಸ್ ಗ್ ರತನ್ ಟಾಟಾ, ಕೊಹ್ಲಿ, ಅಮಿತಾಬ್, ಅಕ್ಷಯ್ ಕುಮಾರ್ ಕಂಗನಾ ಸೇರಿನಂಚೆನೆ ದೇಶಡ್ ಇಪ್ಪುನ ಧಾರ್ಮಿಕ ಮುಖಂಡೆರ್ ಬೊಕ್ಕ 50 ದೇಶಲೆನ ಪ್ರತಿನಿಧಿಲೆಗ್ ಲೆಪ್ಪೋಲೆ ಕೊರ್ದು ಲೈದೆರ್.
ಒಂಜಿ ದಿನಟ್ಟ್ ಇನಿ ದೇಶದ ಮೂಜಿ ಕಡೆಟ್ಟ್ ಭೂಕಂಪ ಆತ್ಂಡ್ ಪಂದ್ ವರದಿ ಆತ್ಂಡ್.
ಬೊಲ್ಪುಗು ಗುಜರಾತ್ ದ ರಾಜ್ ಡ್ 3.9 ಬಿರ್ಸ್ ದ ಭೂಕಂಪ, ತಮಿಳ್ ನಾಡ್ ದ ಚೆಂಗಲ್ಪಟ್ಟುಡು 3.2 ಬಿರ್ಸ್ ದ ಭೂಕಂಪ ಬೊಕ್ಕ ವಿಜಯಪುರ ಜಿಲ್ಲೆಡ್ 3.1 ಬಿರ್ಸ್ ದ ಭೂಕಂಪ ಆತ್ಂಡ್.
ಬೊಲ್ತೇರ್: ಉಜಿರೆ ಬದುಕು ಕಟ್ಟೋಣ ಬನ್ನಿ ಸೇವಾ ಟ್ರಸ್ಟ್ ದ ಸಮಾಜಸೇವೆಗ್ ಗ್ಲೋಬಲ್ ಎಕ್ಸಲೆನ್ಸ್ ಅವಾರ್ಡ್-2023 ಅಂತರಾಷ್ಟ್ರೀಯ ಪ್ರಶಸ್ತಿ ತಿಕ್ ದ್ಂಡ್.
ಈ ಪ್ರಶಸ್ತಿನ್ ಟ್ರಸ್ಟ್ ದ ಸಂಚಾಲಕೆರ್, ಉದ್ಯಮಿ ರಾಜೇಶ್ ಪೈ ಮೇರ್ ಕಾಂಬೋಡಿಯಾ ದೇಶದ ಅಂಕೋರ್ ಮಿರಾಕಲ್ ರೆಸಾರ್ಟ್, ಸಿಯಾಮ್ ರೀಪ್ ಸಭಾಂಗಣಡ್ ದೆತೊಂಡೆರ್.
ಸೊರಬೆಟ್ಟು ಶ್ರೀ ಸಿದ್ದಿವಿನಾಯಕ ದೇವಲ್ಯಡ್ ಡಿ.16 ಕ್ಕ್ ಮಹಾಚೌತಿದ ಲೆಕ್ಕೊಡು ಸಾಮೂಹಿಕ ಅಷ್ಟೋತ್ತರ ಸಹಸ್ರ ನಾರಿಕೇಳ ಗಣಯಾಗ ನಡಪರೆ ಉಂಡು.
ಆನಿ ಬೊಲ್ಪುಗು ಮಹಾ ಪೂರ್ಣಾಹುತಿ, ಮಧ್ಯಾಹ್ನ ನುಪ್ಪು ಪ್ರಸಾದ ಸೇವೆ, ಬಯ್ಯಗ್ ದೀಪೋತ್ಸವ, ತುಳುವೆರ್ ತುಡಲ್ ಕಲಾ ಕೂಟ ಸುರತ್ಕಲ್ ಮೊಕ್ಲೆರ್ದ್ ಇನಿ ಅತ್ತ್ಂಡ ಎಲ್ಲೆ ತುಳು ನಾಟಕ ನಡಪರೆ ಉಂಡು.
ಪುತ್ತಿಲ ಪರಿವಾರ ವಿಟ್ಲ ಸಾರ್ವಜನಿಕ ಶ್ರೀ ಶನೀಶ್ವರ ಪೂಜಾ ಸಮಿತಿದ ಮುತಾಲಿಕೆಡ್ ಸಾರ್ವಜನಿಕ ಶ್ರೀ ಶನೀಶ್ವರ ಪೂಜೆ ಬೊಕ್ಕ ಹಿಂದೂ ಚೈತನ್ಯ ಸಮಾವೇಶ ಡಿ.9 ಸನಿಯಾರ ವಿಟ್ಲ ಶ್ರೀ ಪಂಚಲಿಂಗೇಶ್ವರ ದೇವಲ್ಯದ ಚಾವಡಿಡ್ ನಡಪರೆ ಉಂಡು.
ಅಂಚೆನೆ ಪುತ್ತೂರು ಶ್ರೀ ಮಹಾಲಿಂಗೇಶ್ವರ ದೇವಲ್ಯರ್ದ್ ವಿಟ್ಲ ಶ್ರೀ ಪಂಚಲಿಂಗೇಶ್ವರ ದೇವಲ್ಯಗ್ ಬೃಹತ್ ಪಾದಯಾತ್ರೆ ನಡಪರೆ ಉಂಡು.
ಡಾ. ಆರ್ ಕೆ ನಾಯರ್ ಮೆರೆನ ಸಂಪೂರ್ಣ ಸಹಕಾರಡ್, ಬೊಂಬೈ ಕಮಲ ಕಲಾ ವೇದಿಕೆದ ಮುತಾಲಿಕೆಡ್, ಅಮ್ಮ ಕಲಾವಿದೆರ್ ಕುಡ್ಲ ಮೊಕ್ಲೆನ ಅಭಿನಯಡ್ ಡಿ.9 ಸನಿಯಾರ ಬಯ್ಯಗ್ ಸಾಂತಕ್ರೂಸ್ ಬಿಲ್ಲವ ಭವನಡ್ ಅಮ್ಮೆರ್ ತುಳು ನಾಟಕ ನಡಪರೆ ಉಂಡು.
ಈ ನಾಟಕ ಶಿವಾನಂದ ಶೆಟ್ಟಿ ಮಂಗಲ್ಪಾಡಿ ಸಾರಥ್ಯಡ್, ತುಳುನಾಡ ಕಲಾಬಿರ್ಸೆ ದೀಪಕ್ ರೈ ಪಾಣಾಜೆ ಮೆರೆನ ಅಭಿನಯಡ್, ಸೋಮನಾಥ ಶೆಟ್ಟಿ ಮಂಗಲ್ಪಾಡಿ ಮೆರೆನ ರಚನೆಡ್, ರಂಗ್ ದ ರಾಜೆ ಸುಂದರ್ ರೈ ಮಂದಾರ ಮೆರೆನ ನಿರ್ದೇಶನ ಬೊಕ್ಕ ಅಭಿನಯಡ್ ನಡಪರೆ ಉಂಡು ಪಂದ್ ಲೇಸ್ ದ ವ್ಯವಸ್ಥಾಪಕೆರ್, ಕಮಲ ಕಲಾ ವೇದಿಕೆ ಸಂಚಾಲಕೆರ್ ನವೀನ್ ಪಡು ಇನ್ನಾ ಲೆಪ್ಪೋಲೆಡ್ ತೆರಿಪಾದೆರ್.
ಕಾಂತಾವರ ಬಾರಾಡಿಬೂಡು ಡಾ/ ಜೀವಂಧರ್ ಬಲ್ಲಾಳ್ ಮೆರೆನ ಮುತಾಲಿಕೆಡ್ ಡಿ.9 ಕ್ಕ್ ದಿ. ಪಾಂಡ್ಯರಾಜ್ ಬಲ್ಲಾಳ್ ಸ್ಮಾರಕ ಕಂಬುಲ ಕ್ರೀಡಾಂಗಣಡ್ 37ನೇ ವರ್ಷದ ಸೂರ್ಯ ಚಂದ್ರ ಜೋಡುಕರೆ ಕಂಬುಲ ನಡಪರೆ ಉಂಡು.
ಈ ಕಂಬುಲ ಕೂಟಡ್ ಕಂಬುಲಾಭಿಮಾನಿಲು ಎಚ್ಚದ ಸಂಖ್ಯೆಡ್ ಸೇರ್ದ್ ಈ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಬಂಟ್ವಾಳ: ಹನುಮಾನ್ ನಗರ ಶ್ರೀ ರಾಮ ವಿದ್ಯಾಕೇಂದ್ರಡ್ ಡಿ.9 ಸನಿಯಾರ ಬಯ್ಯಗ್ ಕಲ್ಲಡ್ಕ ಕ್ರೀಡೋತ್ಸವ-2023 ನಡಪರೆ ಉಂಡು.
ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಮಾಜಿ ಮುಖ್ಯಮಂತ್ರಿ ಎಚ್ ಡಿ. ಕುಮಾರಸ್ವಾಮಿ ಬೊಕ್ಕ ಮಾಜಿ ಕೇಂದ್ರ ಸಚಿವೆರ್ ಬಸವನಗೌಡ ಆರ್ ಪಾಟೀಲ್ (ಯತ್ನಾಳ್) ಪಾಲ್ ಪಡೆಯೆರೆ ಉಲ್ಲೆರ್.
