ಕಾರ್ಲದ ಸುದ್ದಿ Karkala News

ಕಾರ್ಲದ ಸ್ವರ್ಣ ತುದೆಟ್ಟ್ ನೀಂದರೆ ಪೋಯಿನ 2 ಜನ ಜವನೆರ್ ನೀರ್‌ಪಾಲ್

Sep 30, 2026

ಕಾರ್ಲ : ದೋಸ್ತಿನಕ್ಲೆನ ಒಟ್ಟುಗು ಸುವರ್ಣ ತುದೆಕ್ಕ್ ನೀಂದರೆ ಪೋತಿನ ರಡ್ಡ್ ಜನ ಜವನೆರ್ ನೀರ್ ಪಾಲಾತಿನ ಘಟನೆ ಅಂಗಾರೆ ಮದ್ಯಾನ ಹಿರ್ಗಾನ ಗ್ರಾಮಡ್ ನಡತ್ಂಡ್. ಹಿರ್ಗಾನದ ಭರತ್ ಪೂಜಾರಿ (29) ಬೊಕ್ಕ ಹರ್ಷನ್ ಆಚಾರ್ಯ (23) ತೀರ್ ಪೋಯಿನಕುಲು ಪಂದ್ ಗೊತ್ತಾತ್ಂಡ್.

ಕೆಲಸೊಗು ರಜೆ ಇತ್ತಿನೆರ್ದಾವರ 5 ಜನ ದೋಸ್ತಿಯಲ್ಲು ಮಂಗಿಲಾರು ಮುಕೇನ 2 ಕಿ.ಮೀ. ದೂರದ ಸಾದಿಡ್ ನಡತೊಂದು ಪೋದು ನೀರ್‌ಗ್ ಜತ್ತ್‌ದ್ ಗುಂಡಿ ಗೊತ್ತಾವಂದೆ ಭರತ್ ಬೊಕ್ಕ ಹರ್ಷನ್ ಮುರ್ಕುದೆರ್ ಪಂದ್ ತೆರಿದ್ ಬೈದ್ಂಡ್.
ಅಗ್ನಿಶಾಮಕ ದಳದ ಸಿಬ್ಬಂದಿ ಮೂಜಿ ಕಿ.ಮೀ. ನಡತ್ ಪೋದು ಸ್ಥಳೀಯೆರ್‌ನ ಸಹಕಾರೊಡು 3 ಗಂಟೆರ್ದ್‌ಲ ಹೆಚ್ಚ ಪೊರ್ತುಡು ಕಾರ್ಯಾಚರಣೆ ಮಲ್ತ್‌ದ್ ಪುನ ಮಿತ್ತ್ ದೈದೆರ್.

ಊರ್ದ ಸುದ್ದಿ Regional News ಕಾರ್ಲದ ಸುದ್ದಿ Karkala News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಕಾರ್ಲಡ್ ಸೆ. 13 ಕ್ ‘ತೌಳವ ಯಕ್ಷಾಯನ’

Sep 9, 2026

ಕಾರ್ಲ, ಸೆ. 09: ತುಳು ಭಾಷೆ, ಸಂಸ್ಕೃತಿ, ಸಾಹಿತ್ಯ ಇತಿಹಾಸೊದ ಒರಿಪು ಬುಲೆಪುಗು ಬೆನ್ಪುನ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ (ರಿ.) ದ ಕಡೆರ್ದ್ ಉಂದೇ ಬರ್ಪುನ ಐತಾರ ಸೆಪ್ಟೆಂಬರ್ 13 ಕ್ ಕಾರ್ಲದ ಶ್ರೀ ವೇಣುಗೋಪಾಲಕೃಷ್ಣ ಸಭಾಭವನೊಡು ಮದ್ಯಾನ 2 ಗಂಟೆರ್ದ್, ತುಳು ಯಕ್ಷಗಾನ ಬುಲೆದ್ ಬತ್ತಿನ ಸಾದಿದ ಪೊಲಬು ಮಲ್ತ್ ಕೊರ್ಪುನ ‘ತೌಳವ ಯಕ್ಷಾಯನ’ ಲೇಸ್ ನಡಪರೆಗುಂಡು.

ಈ ಕಾರ್ಯಕ್ರಮೊಡು ಪೆರಿಯ ಯಕ್ಷಗಾನ ಕಲಾವಿದೆರ್ ಕೊಳ್ತಿಗೆ ನಾರಾಯಣ ಗೌಡೆರ್ ‘ತುಳು ಯಕ್ಷಗಾನ ಬುಲೆದ್ ಬತ್ತಿನ ಸಾದಿ’ ಪನ್ಪಿ ವಿಷಯೊದ ಬಗೆಟ್ ಪನ್ಯಾಸ ಕೊರ್ಯೆರ ಉಲ್ಲೆರ್.

ಕೇಮಾರ್ ಸಾಂದೀಪನಿ ಮಠೊತ ಶ್ರೀ ಈಶವಿಠ್ಠಲದಾಸ ಸ್ವಾಮಿಲು ಆಶೀರ್ವಚನ ಕೊರ್ಯೆರ ಉಲ್ಲೆರ್. ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್‌ದ ಗುರ್ಕಾರ್ಲು ನಿಶ್ಚಿತ್ ಜಿ ರಾಮಕುಂಜ ಮೆರೆನ ಗುರ್ಕಾರ್ಮೆಡ್ ನಡಪುನ ಈ ಲೇಸ್‌ಡ್ ಮಲ್ಲಬಿನ್ನೆರಾದ್ ಕಾರ್ಲ ವಿಧಾನಸಭಾ ಕ್ಷೇತ್ರೊದ ಶಾಸಕೆರ್ ವಿ ಸುನಿಲ್ ಕುಮಾರ್, ಕಾಂಗ್ರೆಸ್ ಮುಖಂಡೆರ್ ಉದಯ ಕುಮಾರ್ ಶೆಟ್ಟಿ ಮುನಿಯಾಲ್, ಗಾಯತ್ರಿ ಎಕ್ಸ್‌ಪೋರ್ಟ್ಸ್‌ದ ಬೋಳ ಪ್ರಶಾಂತ್ ಕಾಮತ್, ತುಳುವ ಮಹಾಸಭೆದ ಕರ್ನಾಟಕ ರಾಜ್ಯಾಧ್ಯಕ್ಷೆರ್ ದೇವೇಂದ್ರ ಹೆಗ್ಡೆ ಕೊಕ್ರಾಡಿ, ಮಂದಾರ ಪ್ರತಿಷ್ಠಾನೊದ ಗುರ್ಕಾರ್ಲು ರಾಜೇಶ್ ಭಟ್ ಮಂದಾರ, ಬೊಟ್ಟಿಕೆರೆ ಅಂಬರುಹ ಯಕ್ಷಸದನ ಪ್ರತಿಷ್ಠಾನೊದ ಗುರ್ಕಾರ್ಲು ಶೋಭಾ ಪುರುಷೋತ್ತಮ ಪೂಂಜ, ಪೆರಿಯ ಯಕ್ಷಗಾನ ಕಲಾವಿದೆರ್ ತಾರಾನಾಥ್ ವರ್ಕಾಡಿ, ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್‌ದ ಸ್ಥಾಪಕೆರ್ ಮಹಿ ಮುಲ್ಕಿ ಪಾಲ್‌ಪಡೆಪೆರ್.

ಈ ಲೇಸ್‌ಡ್ ಮಂದಾರ ಕೇಶವ ಭಟ್ರ್ ಬರೆತಿನ ‘ಭರತನ ಮೋಕೆ ಬೊಕ್ಕ ಮಾಯೆದ ಸೂರ್ಪನಕಿ’ ತುಳು ಯಕ್ಷಗಾನ ಪ್ರಸಂಗ ಬೊಕ್ಕ ಬೊಟ್ಟಿಕೆರೆ ಪುರುಷೋತ್ತಮ ಪೂಂಜೆರ್ ಬರೆತಿನ ‘ಕುಡಿಯನ ಕೊಂಬಿರೆಲ್’ ತುಳು ಯಕ್ಷಗಾನ ಪ್ರಸಂಗೊಲೆನ ಪುಸ್ತಕೊಲು ಬುಡುಗಡೆ ಆವೊಂದುಲ್ಲ.

ಈ ಲೇಸ್‌ದ ಅಕೇರಿಡ್ ತುಳುನಾಡ ಪುಗಾರ್ತೆದ ಯಕ್ಷಗಾನ ಕಲಾವಿದೆರೆನ ಗೋಡ್ಯಾವೊಂದು ‘ಸಿರಿಕಿಷ್ಣ ಚಂದಪಾಲಿ’ ಪನ್ಪಿನ ಯಕ್ಷಗಾನ ಪ್ರಸಂಗ ಗೊಬ್ಬುದ್ ತೋಜಾವರೆ ಉಲ್ಲೆರ್. ಆಯಿನಾತ್ ಎಚ್ಚಿಗೆ ಸಂಖ್ಯೆಡ್ ತುಳುವೆರ್, ಯಕ್ಷಾಭಿಮಾನಿಲು ಬತ್ತ್‌ದ್ ಈ ಲೇಸ್‌ನ್ ಗೆಂದಾದ್ ಕೊರೊಡೂ ಪನ್ದ್ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್‌ದ ಒತ್ತು ಗುರ್ಕಾರ್ಲು ಅಂಚೆನೇ ತೌಳವ ಯಕ್ಷಾಯನ ಲೇಸ್‌ದ ಸಂಯೋಜಕೆರ್ ಅಭಿಷೇಕ್ ಕುಂದರನ್ನಾಯ ತುಳು ಸಮಾಚಾರಗ್ ತೆರಿಪಾಯೆರ್.

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಕಾರ್ಲದ ಸುದ್ದಿ Karkala News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಸೂರಾಲು ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿ ಅಧ್ಯಕ್ಷೆರಾದ್ ತಾರಾನಾಥ್ ಕೋಟ್ಯಾನ್ ಸೂರಾಲು ಆಯ್ಕೆ

Aug 3, 2026

ಕಾರ್ಲ : ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿ(ರಿ.) ಸೂರಾಲು ನೆತ್ತ 34ನೇ ವರ್ಷದ ಸಾರ್ವಜನಿಕ ಗಣೇಶೋತ್ಸವದ ಸಮಿತಿಗ್ ಅಧ್ಯಕ್ಷೆರಾದ್ ಮಿಯ್ಯಾರು ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಆಡಳಿತ ಮೊಕ್ತೇಸರೆರ್, ಕಾರ್ಲ ತಾಲೂಕು ಭೂನ್ಯಾಯ ಮಂಡಳಿದ ಸದಸ್ಯೆರ್ ಬೊಕ್ಕ ಬೇತೆ ಬೇತೆ ಸಾಮಾಜಿಕ ಸಂಘಟನೆಡ್ ಸಕ್ರಿಯವಾದುಪ್ಪುನ ತಾರಾನಾಥ್ ಕೋಟ್ಯಾನ್ ಸೂರಾಲು ಮೇರ್ ಆಯ್ಕೆ ಆತೆರ್.

ಜೂನ್ 28 ಗು ನಡತಿನ ಮಹಾಸಭೆಟ್ಟ್ ಸಮಿತಿಗ್ ಪದಾಧಿಕಾರಿಲೆನ ಆಯ್ಕೆ ಮಲ್ತೆರ್.

ಕಾರ್ಯದರ್ಶಿಯಾದ್ ಜೆಸಿಐ ಕಾರ್ಕಳ ರೂರಲ್‌ದ ಪೂರ್ವಾಧ್ಯಕ್ಷೆರ್ ಮಂಜುನಾಥ್ ಕೋಟ್ಯಾನ್ ಮೆರೆಮ್ ಸರ್ವಾನುಮತಡ್ ಪುನರಾಯ್ಕೆ ಮಲ್ತೆರ್.
ಸಮಿತಿದ ಗೌರವಾಧ್ಯಕ್ಷೆರಾದ್ ಮಾದೇಶ್ ಎಂ, ಸುಧಾಕರ್ ಎಂ ಶೆಟ್ಟಿ, ಜಯಪ್ರಕಾಶ್ ದೇವಾಡಿಗ, ಶಿವಾಜಿ ರಾವ್,ಉಪಾಧ್ಯಕ್ಷೆರಾದ್ ವಸಂತ ಕುಲಾಲ್, ಪ್ರವೀಶ್ ಎಚ್ ರಾವ್,ಮೀರಾ ಜಯಪ್ರಕಾಶ್, ಪ್ರಧಾನ ಕಾರ್ಯದರ್ಶಿಯಾದ್ ಉಮೇಶ್ ಎಸ್ ಪೂಜಾರಿ,ಕೋಶಾಧಿಕಾರಿಯಾದ್ ಹರೀಶ್ ಅಂಚನ್ ಜೊತೆ ಕಾರ್ಯದರ್ಶಿಲಾದ್ ಸುಭಾಷ್ ಪೂಜಾರಿ, ದಿನೇಶ್ ಹೆಚ್. ರಾವ್, ಅರ್ಫಾನ್, ಸಂಘಟನಾ ಕಾರ್ಯದರ್ಶಿಲಾದ್ ಉಮೇಶ್ ಕುಲಾಲ್, ಪ್ರಕಾಶ್ ರಾವ್, ರಮೇಶ್ ಪೂಜಾರಿ, ರಾಜೇಶ್ವರಿ ರಾವ್, ಕ್ರೀಡಾ ಕಾರ್ಯದರ್ಶಿಲಾದ್ ವಿಷ್ಣು ಕೋಟ್ಯಾನ್, ಮನಿಷ್ ಕುಮಾರ್, ಸುಮಂತ್ ರಾವ್,
ಶುಭದರ ಪೂಜಾರಿ, ರಾಕೇಶ್ ಪೂಜಾರಿ, ಸಾಂಸ್ಕೃತಿಕ ಕಾರ್ಯದರ್ಶಿಲಾದ್ ಸುರೇಶ್ ಬಂಗೇರ, ಶಾಲಿನಿ ದೇವಾಡಿಗ, ಸತೀಶ್ ಬಂಗೇರ, ವೆಂಕಟೇಶ್, ಕಾಂಚನ ರಾವ್, ದಿಶಾ, ದೀಕ್ಷಿತಾ , ನಿಶ್ಮಿತಾ , ಸ್ವಚ್ಛತಾ ಸಮಿತಿ ಸದಸ್ಯೆರಾದ್ ದೇಜಪ್ಪ ಕುಲಾಲ್, ಪ್ರವೀಶ್ ಪಿ ರಾವ್, ರಾಮಚಂದ್ರ ಭಂಡಾರಿ,
ದೀಕ್ಷಿತ್ ಕೋಟ್ಯಾನ್, ಪ್ರವೀಣ್ ಪೂಜಾರಿ, ಸುಕೇಶ್ ಕುಲಾಲ್, ಆಶಾ ರಮೇಶ್, ಲೋಲಾಕ್ಷಿ ಜಯಂತಿ, ಶಿವಾನಂದ ಪೂಜಾರಿ, ಶ್ರೀಜಿತ್, ಸುನಿತಾ ಸತೀಶ್, ಪ್ರಸಾದ ವಿತರಣಾ ಸಮಿತಿದ ಸದಸ್ಯೆರಾದ್ ರಾಘವೇಂದ್ರ ಕುಲಾಲ್, ಗಣೇಶ್ ಕುಲಾಲ್, ಗಣೇಶ್ ರಾವ್,ರಕ್ಷಿತ್ ಕುಲಾಲ್ ಅಶೋಕ್ ಕುಲಾಲ್, ವಿಕೇಶ್ ರಾವ್,ಶಂಕರ, ಪ್ರವೀಣ್ ಮೂಲ್ಯ, ವಿಶಾಲ್ ಕುಮಾರ್, ಭರತ್ ರಾಜ್ ಸುಧಾಕರ್ ಪೂಜಾರಿ, ವಸಂತ ಶೆಟ್ಟಿ, ಅಲ್ತಾಫ್, ಮನೋಜ್,ನಿಶಿತ್ ಶೆಟ್ಟಿ, ಧನುಷ್ ರಾವ್, ಸಲಹಾ ಸಮಿತಿ ಸದಸ್ಯೆರಾದ್ ರಮೇಶ್ ಎ ದೇವಾಡಿಗ, ಓಬಯ್ಯ ಕೋಟ್ಯಾನ್,ರಮೇಶ್ ಎಂ,ಕಾರ್ಯಕಾರಿ ಸಮಿತಿ ಸದಸ್ಯೆರಾದ್
ರಮೇಶ್ ದೇವಾಡಿಗ, ಸುರೇಶ್ ಕುಲಾಲ್, ಅನಿಲ್ ಕುಲಾಲ್, ರಿತೇಶ್ ರಾವ್, ಪ್ರಸನ್ನ ಕುಲಾಲ್,ಮಂಜುನಾಥ್ ನಾಯಕ್,ರಿತೇಶ್ ಜಿ ಅಂಚನ್,ಹೇಮಂತ್,ತೇಜಸ್ ಜಿ ಅಂಚನ್, ಪ್ರಣಾಮ್ ಆರ್ ಪೂಜಾರಿ,ಸಂಕೇತ್ ಕುಲಾಲ್,ರಕ್ಷಿತ್ ಕೋಟ್ಯಾನ್,ಶ್ರೀನಿವಾಸ್ ಶೆಟ್ಟಿಗಾರ್,ಪ್ರತಿಕ್ ರಾವ್,ಅಂಕಿತ್ ಕೋಟ್ಯಾನ್, ವಿಶ್ವನಾಥ್ ನಾಯಕ್, ಹರ್ಷ ಎಸ್ ಬಂಗೇರ, ಸುಶಾಂತ್,ಸುಮಂತ್ ಪೂಜಾರಿ, ಆಯುಷ್, ಶಶಾಂಕ್ ಪೂಜಾರಿ, ಶೈಲೇಶ್, ಪುನೀತ್ ಹೆಗ್ಡೆ ಆಯ್ಕೆ ಆತೆರ್.

ಊರ್ದ ಸುದ್ದಿ Regional News ಕಾರ್ಲದ ಸುದ್ದಿ Karkala News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News ರಪಕ್ಕ ಸುದ್ದಿ Flash News

ಕಾರ್ಕಳ ಯೂತ್ ಬಿಲ್ಲವ ಸಂಘಟನೆಗ್ ಶರತ್ ಬೈಲಡ್ಕ ಅಧ್ಯಕ್ಷೆರಾದ್ ಆಯ್ಕೆ

Jul 3, 2026

ಕಾರ್ಲ : ಯೂತ್ ಬಿಲ್ಲವ ಕಾರ್ಕಳ ಸಂಘಟನೆದ ಪೊಸ ಅಧ್ಯಕ್ಷೆರಾದ್ ಪೆರ್ವಾಜೆ ಪತ್ತೊಂಜಿಕಟ್ಟೆ ಶರತ್ ಬೈಲಡ್ಕ ಆಯ್ಕೆ ಆತೆರ್.
ಪ್ರಧಾನ ಕಾರ್ಯದರ್ಶಿಯಾದ್ ಅಭಿಲಾಷ್ ಕೋಟ್ಯಾನ್ ತೆಳ್ಳಾರ್, ಗೌರವಾಧ್ಯಕ್ಷೆರಾದ್ ಭಾಸ್ಕರ್ ಎಸ್.ಕೋಟ್ಯಾನ್ ಬೊಕ್ಕ ಪ್ರಮಲ್‌ಕುಮಾರ್, ಉಪಾಧ್ಯಕ್ಷೆರಾದ್ ರವಿರಾಜ್ ಪೂಜಾರಿ ಬೊಕ್ಕ ಸುಧೀರ್ ಪೂಜಾರಿ, ಜತೆ ಕಾರ್ಯದರ್ಶಿಯಾದ್ ಶ್ರವಣ್ ಅಂಚನ್, ಕೋಶಾಧಿಕಾರಿಯಾದ್ ಸುಜಿತ್ ನಿಟ್ಟೆ , ಸಂಘಟನಾ ಕಾರ್ಯದರ್ಶಿಯಾದ್ ಶ್ರೀನಿವಾಸ್ ಪೂಜಾರಿ ಯರ್ಲಪಾಡಿ, ಕ್ರೀಡಾ ಕಾರ್ಯದರ್ಶಿಯಾದ್ ಜಗದೀಶ್ ಪೂಜಾರಿ ಮಿಯ್ಯಾರು, ಸಾಂಸ್ಕೃತಿಕ ಕಾರ್ಯದರ್ಶಿಯಾದ್ ರಕ್ಷಿತ್ ಮುಂಡ್ಲಿ, ಕಾರ್ಯಕಾರಿ ಸಮಿತಿ ಸದಸ್ಯೆರಾದ್ ಕಾರ್ತಿಕ್ ಸುವರ್ಣ, ವಿಶಾಲ್ ಸಾಲಿಯಾನ್, ರವೀಂದ್ರ ಪೂಜಾರಿ ಶಿರ್ಲಾಲು, ಕರುಣಾಕರ ಪೂಜಾರಿ, ಶ್ರೇಯಸ್ ಪೂಜಾರಿ ಬೊಕ್ಕ ಸುದೇಶ್ ನಿಟ್ಟೆ ಆಯ್ಕೆ ಆತೆರ್.

ಊರ್ದ ಸುದ್ದಿ Regional News ಕಾರ್ಲದ ಸುದ್ದಿ Karkala News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಕಾರ್ಲ : ಮಾರ್ಗದ ಬರಿಟ್ಟ್ ಕಜವು ದಕಿನ 2 ಜನಕ್ಲೆಗ್ ದಂಡ

Jun 18, 2026

ಕಾರ್ಲದ ಮಾರ್ಕೆಟ್ ಪ್ರದೇಶಡ್ ಇಲ್ಲರ್ದ್ ಕಜವು ಕನತ್ ದಕಿನ 2 ಜನಕ್ಕ್ ಸಿಸಿಟಿವಿ ದೃಶ್ಯದ ಆಧಾರದ ಮಿತ್ತ್ ಆರೋಗ್ಯ ನಿರೀಕ್ಷಕಿ ಲೈಲಾ ಥಾಮಸ್ ತಲಾ 500 ರೂ. ದಂಡ ಪಾಡ್ದೆರ್.

ಉಡುಪಿದ ಸುದ್ದಿ | Udupi News ಕಾರ್ಲದ ಸುದ್ದಿ Karkala News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ದೇವಲ್ಯದ ಉಚ್ಚಯೊಡು ತಾಳಮದ್ದೊಳಿ ಲೇಸ್

Apr 28, 2026

ನಂದೊಲಿಗೆ : ಕರಾವಳಿದ ಬೇತೆ ಬೇತೆ ಊರುದ
ವಾರ್ಷಿಕ ಎಪ್ರಿಲ್..2026 ಉಚ್ಚಯದ ಕಾಲೂಡು, ತುಳು ಬೊಕ್ಕ ಕನ್ನಡ ತಾಳಮದ್ದೊಳಿ ಲೇಸ್ ಇತ್ತ್ಂಡ್.
ಕಾರ್ಕಳ ತಾಲೂಕು ನಂದಳಿಕೆ, ವಿಶಾಲ ಯಕ್ಷ ಕಲಾ ಬಳಗದ ಕಲಾವಿದೆರೆನ ಸೇರಿಗೆಡ್ ಕೂಟ ನಡತ್ಂಡ್.
ಶ್ರೀ ಕ್ಷೇತ್ರ ಕಟೀಲು, ಮಧೂರು, ಕುಂಭಾಶಿ, ಕೆರ್ವಾಶೆ, ನಂದಳಿಕೆ, ಸಸಿಹಿತ್ಲು,ಉಳೆಪಾಡಿ,ನಕ್ರೆ ಮೂಲು ಊರುಡು ಲೇಸ್ ಸಂಪೂಲಿಗೆ ಆಂಡ್.
ಸಿರಿ ಕಿಷ್ಣ ಮೈಮೆ,ಪೇರ ಕಡಲ್,
ಗಿರಿಜಾ ಕಲ್ಯಾಣ, ಶನಿ ಗೆರೆಚಾರ,
ಸುಧಾಮ ಚರಿತ್ರೆ, ಮಾಯಾ ಮಂಥರೆ, ಶಿವ ಸಂಕಲ್ಪ, ಪ್ರಸಂಗ
ಆಯ್ಕೆ ಆದಿತ್ಂಡ್.
ಹಿಮ್ಮೇಳೊಡು ಗಣೇಶ ಮಯ್ಯ ವರ್ಕಾಡಿ, ಲಕ್ಷ್ಮೀ ನಾರಾಯಣ ಹೊಳ್ಳ ಕೃಷ್ಣಾಪುರ,ಆನಂದ ಗುಡಿಗಾರ, ದೇವಾನಂದ ಭಟ್,
ವಾಸುದೇವ ಮಯ್ಯ ವರ್ಕಾಡಿ,
ಸ್ಕಂದರಾಜ ಮಯ್ಯ,ಉದಯ ಪಾಟ್ಕರ್ ಇತ್ತೆರ್.
ಅಂಚೆನೆ ಅರ್ಥಗಾರಿಕೆಡ್,
ಗಣೇಶ ಶೆಟ್ಟಿ ಕನ್ನಡಿ ಕಟ್ಟೆ,ಡಾ, ವಾದಿರಾಜ ಕಲ್ಲೂರಾಯ,ಡಾ, ಶಿವಕುಮಾರ ಅಳಗೋಡ್, ಸದಾಶಿವ ಆಳ್ವ ತಲಪಾಡಿ,ಹರಿರಾಜ ಶೆಟ್ಟಿಗಾರ ಕಿನ್ನಿಗೋಳಿ , ಬೊಕ್ಕ ಸುಬ್ರಹ್ಮಣ್ಯ ಬೈಪಾಡಿತ್ತಾಯ ನಂದಳಿಕೆ,
ಪಾಲ್ಪಡೆಯೆರ್.
ದೇವಲ್ಯದ ಆಡಳಿತ ಮಂಡಳಿದ
ಯಜಮಾನೆರ್,ಮಾನಾದಿಗೆ ಮಲ್ತೆರ್.
ಕುಂಭಾಶಿ ಶ್ರೀರಮಣ ಉಪಾಧ್ಯಾಯ, ಕೆರ್ವಾಶೆ ಹರಿ ಭಟ್, ಶ್ರೀ ವತ್ಸ ಕಟೀಲು, ಜ್ಯೋತಿ ಕಟೀಲು, ರಂಜಿತ ಉಳೆಪಾಡಿ, ಲೇಸ್ದ ಸುಧಾರಿಕೆ ಮಲ್ತೆರ್.

ಕಾರ್ಲದ ಸುದ್ದಿ Karkala News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ನಿನ್ನಿಕಲ್ಲ್ ಪಾದೆ ಶ್ರೀಚಕ್ರ ಸಾನ್ನಿಧ್ಯ ಆದಿತ್ತ್ಂಡಾ ?

Mar 23, 2026

ಬರಿಟ್ಟ್ ಗುಪ್ತಗಾಮಿನಿ ತುದೆತ್ತ ಪರಪು, ನಾಗ ಯಕ್ಷಿಗ್ ಬಂಧನ?

ಜಾಗತಿಕ ಪ್ರಾಕೃತಿಕ ಪಾರಂಪರಿಕ ಅಧ್ಯಯನ, ಧ್ಯಾನ ಬೊಕ್ಕ ಆರಾಧನಾ ಕೇಂದ್ರ ಸ್ಥಾಪನೆಗ್ ಪ್ರಶ್ನೆ ಚಿಂತನೆಡ್ ಒಪ್ಪಿಗೆ

ನಂದಿಕೂರು : ತುಳುನಾಡ್‌ದ ಅಪರೂಪದ ಪವಿತ್ರ ಸಾನ್ನಿಧ್ಯ ಆದಿಪ್ಪುನ ಪಡ್ಡೆದ್ರ- ನಂದಿಕೂರು ಮಾರ್ಗದ ನಿನ್ನಿಕಲ್ಲ್ ಪಾದೆದ ಐತಿಹಾಸಿಕ ಹಿನ್ನೆಲೆದ ಬಗೆಟ್ಟ್ ಇಂಚೊಗು ನಡತಿನ ತಾಂಬೂಲ ಪ್ರಶ್ನೆಡ್ ಮಹತ್ವದ ವಿಚಾರ ಬೊಲ್ಪುಗು ಬತ್ತ್‌ದ್, ಈ ಜಾಗೆನ್ ಜಾಗತಿಕ ಮಟ್ಟದ ಪ್ರಾಕೃತಿಕ ಪಾರಂಪರಿಕ ಅಧ್ಯಯನ, ಧ್ಯಾನ ಅಂಚೆನೆ ಆರಾಧನಾ ಕೇಂದ್ರವಾದ್ ಅಭಿವೃದ್ಧಿ ಮಲ್ಪರೆ ಪ್ರಶ್ನೆ ಚಿಂತನೆಡ್ ಸಂಪೂರ್ಣ ಒಪ್ಪಿಗೆ ತಿಕ್‌ದ್ಂಡ್.
ಪ್ರಶ್ನೆ ಚಿಂತನಾ ಫಲಿತಾಂಶದ ಪ್ರಕಾರ, ನಿನ್ನಿಕಲ್ಲ್ ಪಾದೆ ಪ್ರಾಕೃತಿಕವಾದ್ ಶ್ರೀಚಕ್ರ ನೆಲೆ ಆತಿನ ಪವಿತ್ರ ಕ್ಷೇತ್ರವಾದಿತ್ತ್‌ದ್, ಭೂಮಿ ಉಂಡಾನಗನೇ ಸಹಜವಾದ್ ನಿರ್ಮಾಣ ಆತಿನ ದೇವಲ್ಯ ಪನ್ಪಿನ ಅಭಿಪ್ರಾಯ ವ್ಯಕ್ತವಾಂಡ್. ಈ ಜಾಗೆ ತುಳುನಾಡ್‌‌ದ ಪಂಚಭೂತ, ಪಂಚತತ್ವ ಬೊಕ್ಕ ಪಂಚಶಕ್ತಿಲೆನ ನೆಲೆ ಆದಿತ್ತ್‌ದ್, ಅಯಿತ್ತ ಕಾಲ ನಿರ್ಣಯ ಸಾಧ್ಯ ಆವಂದಿನಾತ್ ಪಿರಾಕ್‌ದ ಆದುಂಡು ಪಂದ್ ತೆರಿದ್ ಬತ್ತ್ಂಡ್.
ಈ ಜಾಗೆಡ್ ದುಂಬುದ ಕಾಲೊಡ್ ಪಾಪನಾಶಿನಿ ತುದೆ ಪರತೊಂದಿತ್ತ್‌ದ್, ಇನಿಕ್ಕ್‌ಲ ಅವು ಭೂಮಿದ ಉಲಯಿ ಅಗೋಚರವಾದುಂಡು ಪನ್ಪಿನ ನಂಬಿಕೆ ಉಂಡು. ಪ್ರಧಾನ ದೇವತೆಯಾದ್ ತುಳುವೇಶ್ವರಿ ಪೂಜೆ ಪಡೆಯೊಂದಿತ್ತ್‌ದ್, ಇನಿಕ್ಕ್‌ಲ ಕೆಲವೆರ್ ಗುಪ್ತವಾದ್ ಪೂಜೆ ಮಲ್ತೊಂದುಲ್ಲೆರ್. ಇಂಚೊಗು ಈ ದೇವಿನ್ ಖಡ್ಗೇಶ್ವರಿ ಪನ್ಪಿನ ಪುದರ್‌ಡ್‌ಲ ಲೆಪ್ಪುವೆರ್.
ಮುಲ್ತ ವೈಶಿಷ್ಟ್ಯಲೆಡ್ ಸೌರಮಾನ ಬೊಕ್ಕ ಚಂದ್ರಮಾನ ಕಾಲಗಣನೆದ ಬಳಕೆ ಮಾತ್ರ ಅತ್ತಾಂದೆ, ಪೊರ್ತುದ ಆವಿಷ್ಕಾರ, ಗಡಿಯಾರ, ಪಂಚಾಂಗ ಬೊಕ್ಕ ಕ್ಯಾಲೆಂಡರ್ ಪದ್ಧತಿದ ಮೂಲಾಭಿವೃದ್ಧಿಲ ಈ ಪ್ರದೇಶದ ಒಟ್ಟುಗು ಸಂಬಂಧ ಪಡೆತ್ಂಡ್ ಪನ್ಪಿನ ಮಹತ್ವದ ಅಂಶ ಬೊಲ್ಪುಗು ಬೈದ್ಂಡ್.
ತುಳುನಾಡ್‌ದ ಪ್ರಾಚೀನ ವಿದ್ಯೆಲು ಬೊಕ್ಕ ಜ್ಯೋತಿಷ್ಯ ಶಾಸ್ತ್ರದ ಮೂಲ ಈ ಮಣ್ಣ್ ಡ್ ಆವಿಷ್ಕಾರ ಆತ್ಂಡ್. ಉಂದು ಅತ್ತಾಂದೆ, ಶಾಸ್ತ್ರ ಬೊಕ್ಕ ಶಸ್ತ್ರ ವಿದ್ಯೆ, ಕಳರಿ ಪರಂಪರೆ ಈ ಮಣ್ಣ್‌ಡ್ ವ್ಯಾಪಕವಾದ್ ಸಂಶೋಧನೆ ಆತ್ಂಡ್. ನಾಥ ಪಂಥದ ನವ ನಾಥೆರ್‌ನ ಶಕ್ತಿಕೇಂದ್ರಲ ಉಂದುವೇ ಆದಿತ್ತ್ಂಡ್.
ಉಂದು ಬಜಿ ಕಲ್ಲ್ ಬಂಡೆ ಅತ್ತ್; ತುಳು ನಾಡ್‌ದ ಆತ್ಮ ನಿರ್ಭರತೆಗ್ ಸಾಕ್ಷಿ ಪನ್ಪಿನ ವಿಚಾರ ಪ್ರಶ್ನೆ ಚಿಂತನೆಡ್ ಸ್ಪಷ್ಟ ಆಂಡ್.
ಈ ಪ್ರದೇಶಡ್ ಪವಿತ್ರ ತೀರ್ಥಭಾವಿ, ಹನುಮಂತನ ಪಾದಸ್ಪರ್ಶ, ಬೆರ್ಮೆರೆ ಆಲಡೆ ಬೊಕ್ಕ ಬೇತೆ ದೈವ ದೇವೆರ್‌ನ ಸಾನಿಧ್ಯ ಬೊಕ್ಕ ಪೌರಾಣಿಕ – ಜನಪದ ಇತಿಹಾಸದ ಸಾಕ್ಷ್ಯಲ ಉಂಡು ಪಂದ್ ತೆರಿದ್ ಬೈದ್ಂಡ್.
ಈ ಜಾಗೆಡ್ ಮಸ್ತ್ ಋಷಿ–ಮುನಿಕುಲು, ಸಾಧಕೆರ್ ಧ್ಯಾನ – ಸಾಧನೆ ಮಲ್ತ್‌ದ್, ಇನಿಕ್ಕ್‌ಲ ಗುಪ್ತವಾದ್ ಸಾಧಕೆರ್ ಬತ್ತ್‌ದ್ ಧ್ಯಾನ ಮಲ್ತೊಂದುಲ್ಲೆರ್ ಪನ್ಪಿನವು ಕೈತಲ್ದಕ್ಲೆನ ನಂಬಿಕೆ. ಪ್ರಾಕೃತಿಕವಾದ್ ಕಲ್ಲ್‌ಲೆಡ್ ದೈವಸಾನ್ನಿಧ್ಯ ಉಪ್ಪುನೆರ್ದಾವರ ಮೂಲು ಪ್ರತ್ಯೇಕ ದೇವಾಲಯದ ಅವಶ್ಯಕತೆ ಇಜ್ಜಿ ಪಂದ್ ಪ್ರತಿ ಕಲ್ಲ್ ದೈವಿ ಸಾದೃಶವಾದುಂಡು ಪಂದ್ ವ್ಯಕ್ತವಾದುಂಡು. ಮೂಲು ಪ್ರಾರ್ಥನೆ ಮಲ್ತಿನಕ್ಲೆಗ್ ಭಯ ನಿವಾರಣೆ, ಶತ್ರು ನಿವಾರಣೆ ಬೊಕ್ಕ ಇಷ್ಟಾರ್ಥ ಸಿದ್ಧಿ ಆಪುಂಡು ಪನ್ಪಿನ ನಂಬಿಕೆ ಇತ್ತ್‌ದ್ ಬಪ್ಪನಾಡ್ ಕ್ಷೇತ್ರಡ್ ಉಂದುವೇ ಪಂಚ ದುರ್ಗೆಯೆರ್ನ ಸಾನಿಧ್ಯ ಉಂಡು ಪಂದ್ ತೆರಿದ್ ಬತ್ತ್ಂಡ್.
ಪಿರಾಕ್‌ದ ಕಾಲಡ್
ಈ ಜಾಗೆದ ಅಪೂರ್ವ ನಿಧಿ ಸಂಗ್ರಹ ಆದಿತ್ತ್‌ದ್, ಅವೆನ್ ಅಪಹರಣ ಮಲ್ಪರೆ ಮುಲ್ತ ನಾಗ ಯಕ್ಷಿನ್ ಬಂಧನ ಮಲ್ತ್‌ದೆರ್ ಪನ್ಪಿನ ವಿಚಾರಲ ಪ್ರಶ್ನೆ ಚಿಂತನೆಡ್ ತೋಜಿದ್ ಬತ್ತ್ಂಡ್. ಈ ಹಿನ್ನೆಲೆಡ್ ನಾಗಶಕ್ತಿದ ವಿಮೋಚನೆ ಬೊಕ್ಕ ಜಾಗೆಡ್ ಉಪ್ಪುನ ಶಿಲಾ ಸಾನ್ನಿಧ್ಯದ ದೈವಿಕ ಗುರುತ್ವ ಬೊಕ್ಕ ಸಂಕಲ್ಪದ ಬೇಲೆ ಮಲ್ಪೊಡಾಪುಂಡು.
ತಾಂಬೂಲ ಪ್ರಶ್ನಾ ಚಿಂತನೆನ್ ಖ್ಯಾತ ಜ್ಯೋತಿಷಿಲಾಯಿನ ಶಶಿಧರ ಮಾಂಞಾಡ್ ಬೊಕ್ಕ ಸೂರಜ್ ಕೆ. ಪಿ. ನಡಪಾದ್ ಕೊರಿಯೆರ್. ಕಾಸ್ರೋಡು ತುಳುವೆರೆ ಆಯನಕೂಟದ ಅಧ್ಯಕ್ಷೆರ್ ಗೋಪಾಲಕೃಷ್ಣ ವಾಂತಿಚಾಲ್ ಭಾಷಾಂತರ ಮಲ್ತೆರ್.
ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ, ಎನ್ ಮಧ್ವರಾಯ ಭಟ್, ಡಾ. ವೈ. ಎನ್ ಶೆಟ್ಟಿ, ಲಕ್ಷ್ಮಣ ಶೆಟ್ಟಿ, ನಾಗರಾಜ್ ಭಟ್, ಸುರೇಶ್ ಆಚಾರ್ಯ, ಉದಯ ರೈ, ಕಿರಣ್ ಚೌಟ, ಪ್ರಮೋದ್ ಸಪ್ರೆ, ಮಾಧವ ಉಳ್ಳಾಲ್, ಕೃಷ್ಣಮೂರ್ತಿ ರಾವ್ ಪಾದೆಬೆಟ್ಟು, ಡಾ. ರಾಜೇಶ್ ಆಳ್ವ, ಅರವಿಂದ ಬೆಳ್ಚಡ ಹರಿಪ್ರಸಾದ್ ರೈ ಜಿ.ಕೆ, ರವಿಕುಮಾರ್, ಗಣೇಶ್, ನಾಗೇಶ್ ಭಂಡಾರಿ ಮೊಕುಲು ಮಾತ ಅಭಿಪ್ರಾಯ ಪಟ್ಟೊಂಡೆರ್.
ತುಳುವ ಮಹಾಸಭೆದ ಸಂಚಾಲಕೆರಾಯಿನ ವಸಂತ ರೈ ಸೂರಿಂಜೆ, ಭಾನುಮತಿ ಶೆಟ್ಟಿ ಕಕ್ವಗುತ್ತು, ಪ್ರಶಾಂತ್ ಶೆಟ್ಟಿ, ಪ್ರವೀಣ್ ಕಂದಾವರ, ಡಾ. ಅವಿನ್ ಆಳ್ವ, ಉತ್ತಮ್ ಸಿಂಗ್, ಜ್ಯೋತಿ ಶೆಟ್ಟಿ ಬೊಕ್ಕ ಸ್ಥಳೀಯೆರ್ ಬೊಕ್ಕ ಗಣ್ಯೆರ್ ಪಾಲ್ ಪಡೆದಿತ್ತೆರ್. ಪತ್ತೆರ್ ಕೂಡ್ದು ಪ್ರಾರ್ಥನೆ ಮಲ್ತ್‌ದ್ ತಾಂಬೂಲ ಪ್ರಶ್ನೆ ಕಾರ್ಯಕ್ರಮನ್ ಸಮಾಪನ ಮಲ್ತೆರ್.

ನವೆಂಬರ್ 2,3 ಬೊಕ್ಕ 4 ತಾರೀಕ್‌ಗ್ ಪ್ರಶ್ನಾ ಚಿಂತನೆ

ನಿನ್ನಿಕಲ್ ಪಾದೆ ಪವಿತ್ರ ಭೂಮಿದ ಬಗೆಟ್ಟ್ ರಡ್ಡನೇ ಹಂತದ ವಿಮರ್ಶೆ ಬೊಕ್ಕ ಚಿಂತನೆ ಮಲ್ಪರೆ ನವೆಂಬರ್ 2, 3 ಬೊಕ್ಕ 4 ತಾರೀಕ್‌ದಾನಿ ಮೂಜಿ ದಿನತ್ತ ಅಷ್ಟಮಂಗಲ ಪ್ರಶ್ನೆ ಚಿಂತನೆ ಮಲ್ಪರೆ ತೀರ್ಮಾನ ಮಲ್ತೆರ್.

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಕಾರ್ಲದ ಸುದ್ದಿ Karkala News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News

ಅ.24,25: ಅಜೆಕಾರು ಕಲಾಭಿಮಾನಿ ಕೂಟದ ರಜತಪರ್ವ: ಬೊಂಬೈ ಯಕ್ಷಗಾನ ಸಮ್ಮೇಳನ – 2026

Mar 17, 2026

‘ಬೊಂಬೈ ಮಹಾನಗರಡ್ ಯಕ್ಷಗಾನಗ್ ರಾಜಾಶ್ರಯ’- ಅಟ್ಟಣೆದ ಸಭೆಟ್ಟ್ ಡಾ. ಎಂ. ಪ್ರಭಾಕರ ಜೋಶಿ

ಕಾರ್ಲ: ‘ಕರಾವಳಿದ ಸುಮಾರ್ ಸಾಧಕೆರ್ ಬೊಂಬೈ ಮಹಾನಗರಗ್ ಪೋದು ಅಲ್ಪ ಉದ್ಯಮಿಲಾದ್ ಎತ್ತರಗ್ ಬುಲೆತೆರ್. ಅವೆತ್ತೊಟ್ಟಿಗೆ ಪುಟ್ಟಿನ ಊರುದ ಕಲಾ ಪ್ರಕಾರಲೆಗ್ ಮೇರ್ ಕೊರೊಂದು ಇಪ್ಪುನ ಪ್ರೋತ್ಸಾಹ ಮೆಚ್ಚುಡಾಯಿನವು. ಇತ್ತೆಲ ಯಕ್ಷಗಾನಗ್ ಬೊಂಬೈಡ್ ರಾಜಾಶ್ರಯ ಉಂಡು.‌ ಅಲ್ಪದ ಕಲಾಭಿಮಾನಿಲು ಯಕ್ಷಗಾನ ಕಲೆನ್ ಬೊಕ್ಕ ಕಲಾವಿದೆರೆನ್ ಎಪಲ ಬುಲೆಪಾವೆರ್’ ಪಂದ್ ಹಿರಿಯ ವಿದ್ವಾಂಸೆರ್, ಯಕ್ಷಗಾನ ಅರ್ಥಧಾರಿ ಡಾ.ಎಂ.ಪ್ರಭಾಕರ ಜೋಶಿ ಪಂಡೆರ್.

ಅಜೆಕಾರು ಕಲಾಭಿಮಾನಿ ಕೂಟ ಬೊಂಬೈದ ಬೊಳ್ಳಿ ಪರ್ಬದ ಲೆಕ್ಕೊಡು ಈ ಸರ್ತಿ ನಡಪಾವುನ ‘ಬೊಂಬೈ ಯಕ್ಷಗಾನ ಸಮ್ಮೇಳನ’ ದ ಲೆಕ್ಕೊಡು ಅಜೆಕಾರು ಶ್ರೀರಾಮ ಭಜನಾ ಮಂದಿರಡ್ ಮಾ.10 ಕ್ಕ್ ನಡತಿನ ಅಟ್ಟಣೆದ ಸಭೆಟ್ಟ್ ಪ್ರಧಾನ ಸಲಹೆಗಾರೆರಾದ್ ಡಾ. ಜೋಶಿ ಪಾತೆರಿಯೆರ್.

‘ಬೊಂಬೈಡ್ ಯಕ್ಷಗಾನ ಸಂಪ್ರದಾಯನ್ ಒರಿಪಾದ್ ಬುಲೆಪಾವುನ ದಿಟ್ಟಿಡ್ ಅಜೆಕಾರು ಕಲಾಭಿಮಾನಿ ಕೂಟದ ಬೇಲೆನ್ ನೆಂಪು ಮಲ್ಪೊಡಾನವು. ಯಕ್ಷ ಗುರು ಅಜೆಕಾರು ಬಾಲಕೃಷ್ಣ ಶೆಟ್ರ್ ಮಹಾನಗರದ ಉದ್ದ ಅಗಲಗ್ ನೂದೆರ್ದ್ ಎಚ್ಚ ಪೊಣ್ಣು – ಆನುಲೆಗ್ ಯಕ್ಷಗಾನನ್ ಕಲ್ಪಾವುನ ಮುಕೇನ ಸುಮಾರ್ ಯುವ ಕಲಾವಿದೆರೆನ ಬುಲೆಚ್ಚಿಲ್ ಗ್ ಕಾರಣರಾತೆರ್. ಲೇಸ್ ದ ಸಂಘಟನೆಡ್ ಮೇರ್ ಸಮರ್ಥೆರ್, ಸಮ್ಮೇಳನದ ಯಶಸ್ಸ್ ಗ್ ಮಾತೆರ್ಲಾ ಕೈಜೋಡಿಸಾಲೆ ಪಂದ್ ಪಂಡೆರ್.

ಅಜೆಕಾರು ಕಲಾಭಿಮಾನಿ ಕೂಟದ ಅಧ್ಯಕ್ಷೆರ್ ಅಜೆಕಾರು ಬಾಲಕೃಷ್ಣ ಶೆಟ್ಟಿ ಪಾತೆರ್ದ್, ‘ಇರ್ವ ವರ್ಷೊದ ಪಿರವುಡ್ ಬೊಂಬೈಡ್ ಪುಟ್ಟಿನ ಅಜೆಕಾರು ಕಲಾಭಿಮಾನಿ ಕೂಟ ಊರುದ ಶ್ರೆಷ್ಠ ಕಲಾವಿದೆರೆನ್ ಲೆತ್ತ್ ದ್ ಯಕ್ಷಗಾನದ ಸರಣಿ ತಾಳಮದ್ದಳೆ, ಬಯಲಾಟ, ಗ್ರಂಥ ಪ್ರಕಟಣೆ ಅತ್ತಂದೆ ಕಲಾವಿದೆರೆಗ್ ಮಾನಾದಿಗೆ ಬೊಕ್ಕ ನಿಧಿ ಸಮರ್ಪಣೆನ್ ಮಲ್ತೊಂದು ಬೈದ್ಂಡ್. ನೆಕ್ಕ್ ಬೊಂಬೈದ ಕಲಾಭಿಮಾನಿಲೆನ ಬೊಕ್ಕ ಉದ್ಯಮಿಲೆನ ಸಕಾಯ – ಸಹಕಾರ ಮಾಸ್ತ್ ಉಂಡು. ಇತ್ತೆ ಬೊಳ್ಳಿ ಪರ್ಬದ ಆಚರಣೆನ್ ವಿಶಿಷ್ಟ ರೀತಿಡ್ ನಡಪಾವುನ ಉದ್ದೇಶರ್ದ್ ಯಕ್ಷಗಾನ ಸಮ್ಮೇಳನ – 2026 ನ್ ಆಯೋಜನೆ ಮಲ್ದ್ಂಡ್. ಆಯಿನಾತ್ ಬೇಗಡೇ ನೆತ್ತ ಬಗೆಟ್ಟ್ ಸ್ವಾಗತ ಸಮಿತಿಯೊಂಜೆನ್ ರಚನೆ ಮಲ್ಪೊಡು’ ಪಂದ್ ಪಂಡೆರ್.

ಸಮ್ಮೇಳನದ ಪ್ರಧಾನ ಸಂಚಾಲಕೆರ್ ಪ್ರೊ. ಭಾಸ್ಕರ ರೈ ಕುಕ್ಕುವಳ್ಳಿ ಲೇಸ್ ದ ರೂಪುರೇಷೆಲೆನ ಬಗ್ಗೆಟ್ಟ್ ಪಾತೆರ್ದ್, ‘ದಿ|ಎಚ್.ಬಿ.ಎಲ್.ರಾವ್ ಮೆರೆನ ಬೊಕ್ಕ ಬೊಂಬೈಡ್ ಯಕ್ಷಗಾನದ ಸಮ್ಮೇಳನ ನಡಪಾವುನ ಸಾಹಸಗ್ ಎರ್ಲಾ ಕೈ ಪಾಡಿಜೆರ್. ಅಜೆಕಾರು ಬಾಲಕೃಷ್ಣ ಶೆಟ್ರ್ ತನ್ನ ಕೂಟದ ರಜತ ಪರ್ವಗ್ ಯಕ್ಷಗಾನ ಸಮ್ಮೇಳನದ ಸ್ವರೂಪ ಕೊರ್ಪುನೆತ್ತೊಟ್ಟಿಗೆ ಬೊಂಬೈ ಯಕ್ಷಗಾನದ ಇತಿಹಾಸಡ್ ಕುಡೊಂಜಿ ಅಧ್ಯಾಯ ಮಲ್ಪೆರೆ ಉಲ್ಲೆರ್. ಉಂದುವೇ 2026 ಅ.24 ಬೊಕ್ಕ 25 ಕ್ಕ್ ಯಕ್ಷಗಾನಗ್ ಸಂಬಂಧಪಟ್ಟಿನಂಚೆನೆ ಬೇತೆ ಬೇತೆ ಗೋಷ್ಟಿಲು, ಪ್ರದರ್ಶನ – ಪ್ರಾತ್ಯಕ್ಷಿಕೆ ಬೊಕ್ಕ ಕಲಾವಿದೆರ್, ಕಲಾಪೋಷಕೆರೆನ ಸನ್ಮಾನದ ಮುಕೇನ ಬೊಂಬೈಡ್ ರಡ್ಡ್ ದಿನತ್ತ ಸಮ್ಮೇಳನ ಅರ್ಥಪೂರ್ಣವಾದ್ ನಡಪುಂಡು. ಈ ಪೊರ್ತುಡು ಸಂಗ್ರಾಹ್ಯ ಸ್ಮರಣ ಸಂಚಿಕೆ ಒಂಜೆನ್ ಬುಡುಗಡೆ ಮಲ್ಪೆರೆ ಉಂಡು ಪಂದ್ ಪಂಡೆರ್.

ಹಿರಿಯ ಯಕ್ಷಗಾನ ಕಲಾವಿದೆರಾಯಿನ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ ಎಂ.ಕೆ.ರಮೇಶ ಆಚಾರ್ಯ ತೀರ್ಥಹಳ್ಳಿ, ಜಯಪ್ರಕಾಶ್ ಶೆಟ್ಟಿ ಪೆರ್ಮುದೆ, ಹರೀಶ್ ಬಳಂತಿಮೊಗೆರ್, ಸದಾಶಿವ ಆಳ್ವ ತಲಪಾಡಿ, ದೀವಿತ್ ಎಸ್.ಕೆ. ಪೆರಾಡಿ, ಪ್ರಸಾದ್ ಸವಣೂರು, ಉದ್ಯಮಿ ವಿಜಯ ಶೆಟ್ಟಿ ಅಜೆಕಾರ್ ಬೊಕ್ಕ ಕೆ. ಲಕ್ಷ್ಮೀನಾರಾಯಣ ರೈ ಹರೇಕಳ ಸಭೆಟ್ಟ್ ಪಾಲ್ ಪಡೆದ್ ಸಲಹೆ ಸೂಚನೆಲೆನ್ ಕೊರಿಯೆರ್.

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಕಾರ್ಲದ ಸುದ್ದಿ Karkala News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಕಜೆಕಾರ್ ಶ್ರೀ ಮಹಾದೇವದೇವೇಶ್ವರ ದೇವಸ್ಥಾನದ ಪ್ರತಿಷ್ಠಾ ಅಷ್ಟಬಂಧ ಬ್ರಹ್ಮಕಲಶ ಉಚ್ಚಯದ ಲೆಪ್ಪೋಲೆ ಬುಡುಗಡೆ

Jan 20, 2026

ಕಜೆಕಾರ್ ಶ್ರೀ ಮಹಾದೇವದೇವೇಶ್ವರ ದೇವಸ್ಥಾನದ ಪ್ರತಿಷ್ಠಾ ಅಷ್ಟಬಂಧ ಬ್ರಹ್ಮಕಲಶ ಉಚ್ಚಯದ ಲೆಪ್ಪೋಲೆ ಇನಿ ಧರ್ಮಸ್ಥಳಡ್ ಬುಡುಗಡೆ ಆಂಡ್.

ಈ ಲೆಪ್ಪೋಲೆನ್ ಶ್ರೀ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ. ಡಿ. ವೀರೇಂದ್ರ ಹೆಗ್ಗಡೆರ್ ಮಲ್ತೆರ್

ಜ.3: ಬೆಳ್ಮಣ್ಣು ಶ್ರೀ ದುರ್ಗಾಪರಮೇಶ್ವರೀ ಕ್ಷೇತ್ರಡ್ ಮಂಡಲ ಪೂಜೆ

Jan 1, 2026

ಕಾರ್ಲ: ಬೆಳ್ಮಣ್ಣು ಶ್ರೀ ದುರ್ಗಾಪರಮೇಶ್ವರೀ ಕ್ಷೇತ್ರಡ್ ಮಂಡಲ ಪೂಜೆ ಜ.3 ಸನಿಯಾರ ನಡಪರೆ ಉಂಡು.

ಜ.2 ಸುಕ್ರಾರ ಬಯ್ಯಗ್ ಬೆಳ್ಮಣ್ಣು ಅಯ್ಯಪ್ಪ ಭಕ್ತವೃಂದ ಶಿಬಿರರ್ದ್ ಬೆಳ್ಮಣ್ಣು ಶ್ರೀ ದುರ್ಗಾಪರಮೇಶ್ವರೀ ಕ್ಷೇತ್ರ ಮುಟ್ಟ ಪುದೆಕಾಣಿಕೆ ಮೆರವಣಿಗೆ ಬರಿಯೆರೆ ಉಂಡು.

ಜ.3 ಸನಿಯಾರ ಬೊಲ್ಪುಗು ಪಂಚಾಮೃತ ಅಭಿಷೇಕ, ನವಕ ಕಲಶಾಭಿಷೇಕ, ಅಲಂಕಾರ ಪೂಜೆ, ತುಲಾಭಾರ ಸೇವೆ, ಮಹಾಪೂಜೆ, ಮಧ್ಯಾಹ್ನ ಮಂಡಲಪೂಜೆ, ಉಚ್ಚಯ ಬಲಿ, ಪಲ್ಲಪೂಜೆ, ಅನ್ನಸಂತರ್ಪಣೆ ಬೊಕ್ಕ ನಂದಳಿಕೆ ವಿಶಾಲ ಯಕ್ಷಕಲಾ ಕೂಟದಕ್ಲೆರ್ದ್ ತಾಳಮದ್ದಳೆ ಬಯ್ಯಗ್ ಸೂಡ ಶ್ರೀ ಮಯೂರವಾಹನ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದಕ್ಲೆರ್ದ್ ವೈಜಯಂತಿ ಪರಿಣಯ ಯಕ್ಷಗಾನ ರಾತ್ರೆ ಪ್ರಸನ್ನಪೂಜೆ, ಉಚ್ಚಯಬಲಿ ಬೊಕ್ಕ ರಂಗಪೂಜೆ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ಶ್ರೀ ಅಮ್ಮನ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದುರ್ಗಾಪರಮೇಶ್ವರೀ ಅಮ್ಮನ ಕೃಪೆಗ್ ಪಾತ್ರರಾವೊಡು ಪಂದ್ ಆಡಳಿತ ಮೊಕ್ತೇಸರೆರ್ ಬಿ.ಕೆ ವಿಘ್ನೇಶ್ ಭಟ್, ಆಡಳಿತ ವರ್ಗ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್