December 22, 2023

ಪ್ರತಿಯೊರಿಯಾನ್ ತೆರಿವೊನಿಯೆರೆ ಪಂತೊಲು ಸಹಕಾರಿ ಆಪುಂಡು: ಮೊಹಮ್ಮದ್ ಹಬೀಬುಲ್ಲಾ

ಕಲ್ಪಾರ್ಥಿಲೆನ ನಡುಟ್ಟ್ ಪಂತೊ ಇತ್ತ್ಂಡ ಅವು ಪ್ರತಿಯೊರಿಯಾನ್ಲಾ ನನಾತ್ ತೆರಿವೊನಿಯೆರೆ, ಎಚ್ಚ ಕಲ್ಪರೆ ಬೊಕ್ಕ ಉತ್ಕೃಷ್ಟ ಮಲ್ಪರೆ ಹೆಚ್ಚುವರಿ ಪ್ರಯತ್ನನ್ ಮಲ್ಪರೆ ಪ್ರೇರೇಪಣೆ ಮಲ್ಪುಂಡು. ಕ್ರೀಡೆ ಅವಡ್ ಅತ್ತಂಡ ಅಧ್ಯಯನ ಅವಡ್ ಕಲ್ಪಾರ್ಥಿಲು ಸಾಧಕೆರಾಯೆರೆ ಪ್ರೇರೇಪಣೆ ಮಲ್ಪು ಒಂಜಿ ಮಾರ್ಗ ಆತ್ಂಡ್. ಕ್ರೀಡೆಡ್ ಪಾಲ್ ಪಡೆನಗ ಪ್ರತಿಯೊರಿಡ್ಲಾ ಗೆಂದುನ ಜಬದಾರಿ ಇಪ್ಪುಂಡು. ಈ ಜಬದಾರಿದ ಪ್ರಜ್ಞೆ ಜೀವನದ ಬೇತೆ ಕ್ಷೇತ್ರಗ್ ಪಸರುಂಡು ಪಂದ್ ಮುಲ್ಕಿ ಶಾಂಭವಿ ಜೇಸೀ ಟ್ರಸ್ಟ್ ದ ಗುರ್ಕಾರೆ ಮೊಹಮ್ಮದ್ ಹಬೀಬುಲ್ಲಾ‌ ಪಂಡೆರ್.

ಮೇರ್ ಶ್ರೀ ಶಾರದಾ ಸೆಂಟ್ರಲ್ ಸ್ಕೂಲ್ ಶಿಮಂತೂರುದ ಶಾಲಾ ವಾರ್ಷಿಕ ಇನಾಮು ಪಟ್ಟುನ ಲೇಸ್ ದ ಬಿನ್ನೆರಾದ್ ಪಾಲ್ ಪಡೆದ್ ಪಾತೆರಿಯೆರ್.

ಮಲ್ಲ ಬಿನ್ನೆರಾದ್ ಪಾಲ್ ಪಡೆಯಿನ ಉದ್ಯಮಿ ಜನಕರಾಜ್ ರಾವ್ ಪಾತೆರ್ದ್, ಪಂತೊ ಮಲ್ಲ ತಾನನ್ ಪೋಪುನ ಬಗೆಟ್ಟ್ ಇಪ್ಪುಂಡು. ಆಂಡ ಉಂದು ಸಾಧಕೆರೆಗ್ ತನ್ನ ಪ್ರಯತ್ನನ್ ಗುರಿತಿಸಾವೊಂಡು ಬೊಕ್ಕ ಪುರಸ್ಕಾರ ಮಲ್ಪುನ ಪನ್ಪುನ ತೃಪ್ತಿ ಆಯೆರೆ ಒಂಜಿ ಮಾರ್ಗ ಆತ್ಂಡ್ ಪಂದ್ ಪಂಡೆರ್. ಬೊಕ್ಕ ಈ ವರ್ಷರ್ದ್ ಉತ್ತಮ ವಿದ್ಯಾರ್ಥಿ ಪ್ರಶಸ್ತಿಗ್ 5000 ರೂ. ಇನಾಮುನ್ ಕೊರ್ಪ ಪಂದ್ ಘೋಷಣೆ ಮಲ್ತೆರ್.

ಈ ಲೇಸ್ ದ ಗುರ್ಕಾರ್ಮೆನ್ ಶ್ರೀ ಶಾರದಾ ಸೊಸೈಟಿದ ನಿರ್ದೇಶಕೆರ್ ಸುರೇಶ್ ರಾವ್ ನೀರಳಿಕೆ ಒಯಿಸ್ ದಿತ್ತೆರ್. ಈ ಪೊರ್ತುಡು ಶಾಲಾ ಸಂಚಾಲಕೆರ್ ದೇವಪ್ರಸಾದ್ ಪುನರೂರು, ಪ್ರಾಂಶುಪಾಲೆರ್ ಜಿತೇಂದ್ರ ವಿ ರಾವ್, ಶಿಕ್ಷಕ ರಕ್ಷಕ ಸಂಘದ ಗುರ್ಕಾರೆ ದೀಪಕ್ ಭಂಡಾರಿ ಪಾಲ್ ಪಡೆದಿತ್ತೆರ್.

ಕ್ರೀಡೆ ಬೊಕ್ಕ ಸಾಂಸ್ಕೃತಿಕ ಲೇಸ್ ಡ್ ಪಾಲ್ ಪಡೆಯಿನ ಕಲ್ಪಾರ್ಥಿಲೆಗ್ ಇನಾಮುನ್ ಕೊರಿಯೆರ್. ಬೊಕ್ಕ ಮಾತ ವಿಭಾಗಡ್ ಎಡ್ಡೆ ಪ್ರದರ್ಶನ ಕೊರ್ನ ಶಾಲೆದ ಮಂಜಲ್ ಬಣ್ಣದ ಕೂಟಗ್ ಚಾಂಪಿಯನ್ ಶಿಪ್ ಇನಾಮು ಕೊರಿಯೆರ್.

ಸಹ ಶಿಕ್ಷಕಿ ಪ್ರತಿಭಾ ಭಟ್ ಎದ್ಕೊನಿಯೆರ್. ದೀಪಿಕಾ ಬೊಕ್ಕ ನಿಶ್ಮಿತಾ ಗೆಂದಿನಕ್ಲೆನ ಪಟ್ಟಿನ್ ಓದಿಯೆರ್. ಅಶ್ಮಿತ ಸೊಲ್ಮೆ ಸಂದಾಯೆರ್. ದೀಕ್ಷಿತ ಲೇಸ್ ದ ಸುಧಾರಿಕೆ ಮಲ್ತೆರ್.

ಡಿ.24: ಕುದ್ರೋಳಿದ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೊರಗಪ್ಪ ಸಭಾಭವನಡ್ ಆತ್ಮಶಕ್ತಿ ದ್ವಿದಶಮಾನೋತ್ಸವ 2023 ಲೇಸ್

ಬ್ರಹ್ಮಶ್ರೀ ನಾರಾಯಣ ಗುರುಸ್ವಾಮಿ ಪ್ರಕಾಶನ ಬೊಕ್ಕ ಕುಡ್ಲ ಚಾರಿಟೇಬಲ್ ಟ್ರಸ್ಟ್ (ರಿ.) ದ ಒಟ್ಟು ಸೇರಿಗೆಡ್ ಆತ್ಮಶಕ್ತಿ ದ್ವಿದಶಮಾನೋತ್ಸವ 2023 ಲೇಸ್ ಡಿ.24 ಐತಾರ ಕುದ್ರೋಳಿದ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೊರಗಪ್ಪ ಸಭಾಭವನಡ್ ನಡಪರೆ ಉಂಡು.

ಈ ಲೇಸ್ ಡ್ ಕಂಕನಾಡಿ ಶ್ರೀ ಬ್ರಹ್ಮಬೈದರ್ಕಳ ಗರೋಡಿದ ಗುರ್ಕಾರೆ ಚಿತ್ತರಂಜನ್ ಕೆ ಮೆರೆಗ್ ಆತ್ಮಶಕ್ತಿ ಪ್ರಶಸ್ತಿ ಪುರಸ್ಕಾರ ಮಲ್ಪರೆ ಉಂಡು.

ಡಿ.23-24: ಇರಾ ಯುವಕ ಮಂಡಲ (ರಿ.) ದ ಬಯಲು ರಂಗಮಂದಿರಡ್ ಸುವರ್ಣ ಮಹೋತ್ಸವ

ಇರಾ ಯುವಕ ಮಂಡಲ (ರಿ.) ದ ಸುವರ್ಣ ಮಹೋತ್ಸವ ಡಿ.23 ಬೊಕ್ಕ 24 ಕ್ಕ್ ಇರಾ ಯುವಕ ಮಂಡಲ (ರಿ.) ದ ಬಯಲು ರಂಗಮಂದಿರಡ್ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಇರಾ ಯುವಕ ಮಂಡಲ (ರಿ.) ದಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಬೈಂದೂರು ಕಂಬುಲದ ಲೆಪ್ಪೋಲೆ ಬುಡುಗಡೆ

ಬೈಂದೂರು: ಬೈಂದೂರು ತಾಲೂಕ್ ರೈತ ಸಂಘ, ಸಾಂಪ್ರದಾಯಿಕ ಕಂಬುಲ ಸಮಿತಿ ಬೊಕ್ಕ ಊರುದ ಗ್ರಾಮಸ್ಥೆರೆರ್ದ್ ಜ.7 ಕ್ಕ್ ಬೈಂದೂರುದ ಗಂಗನಾಡು ಕೈತಲ್ ದ ಕ್ಯಾರ್ತೂರು ಕಂಬುಲ ಕಂಡಡ್ ಕಂಬುಲ ನಡಪರೆ ಉಂಡು‌.

ಈ ಕಂಬುಲದ ಲೆಪ್ಪೋಲೆನ್ ಬೈಂದೂರು ಪ್ರವಾಸಿ ಮಂದಿರಡ್ ಬೈಂದೂರು ಶಾಸಕೆರ್ ಗುರುರಾಜ ಗಂಟಿಹೊಳೆ ಬುಡುಗಡೆ ಮಲ್ತೆರ್. ಅವೆರ್ದ್ ಬೊಕ್ಕ ಪಾತೆರಿನ ಆರ್ ಕಂಬುಲಲು ತುಳುನಾಡ್ ದ ಸಾಂಸ್ಕೃತಿಕ ಸಿರಿವಂತಿಕೆನ್ ಎಚ್ಚ ಮಲ್ದ್ಂಡ್. ಅತ್ಯಾಧುನಿಕ ವ್ಯವಸ್ಥೆನ್ ಗಲಸುನೆರ್ದ್ ಬದಲಾವಣೆದ ಮುಕೇನ ಕಂಬುಲಲು ಯುವ ಸಮುದಾಯನ್ ಒಯಿತೊಂದು ಉಂಡು. ಬೈಂದೂರು ಕಂಬುಲ ಗ್ರಾಮೀಣ ಭಾಗದ ರೈತೆರೆನ ಸಮಾಗಮ ಅವಡ್ ಬೊಕ್ಕ ಕೃಷಿಕೆರೆನ ಸಾಂಸ್ಕೃತಿಕ ಹಿರಿಮೆನ್ ಎಚ್ಚ ಮಲ್ಪಡ್ ಪಂದ್ ಪಂಡೆರ್.

ಬೈಂದೂರು ರೈತ ಸಂಘದ ಗುರ್ಕಾರೆ ದೀಪಕ್ ಕುಮಾರ್ ಶೆಟ್ಟಿ ಪಾತೆರ್ದ್, ಸುರುತ್ತ ಸರ್ತಿ ಬೈಂದೂರುಡು ಗೌಜಿದ ರಾಜ್ಯಮಟ್ಟದ ಕಂಬುಲ ನಡಪರೆ ಉಂಡು. ಇತ್ತೆನೇ ಕಂಬುಲದ ತಯಾರಿ ನಡತೊಂದು ಉಂಡು. ರಾಜ್ಯಮಟ್ಟದ ಸುಮಾರ್ ನಾಯಕೆರ್ ಬರೊಂದು ಉಲ್ಲೆರ್ ಪಂದ್ ಪಂಡೆರ್.

ಈ ಪೊರ್ತುಡು ಕಂಬುಲದ ಸಂಚಾಲಕೆರ್ ಗಣಪ ಮರಾಠಿ ಪಾಲ್ ಪಡೆದಿತ್ತೆರ್.

ರೇಡಿಯೊ ಮಣಿಪಾಲಡ್ ‘ಸಂಗೀತ ಪಾಠ’ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪದ್ ಕೊರ್ಪುನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 39ನೇ ಸಂಚಿಕೆ ಡಿ.22 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಕಲ್ಪಾರ್ಥಿಯಾದ್ ಪುಟಾಣಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್. ಡಿ.23 ಸನಿಯಾರ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ಬೊಕ್ಕ ಮತ್ತು ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ನಿಟ್ಟೆ ಮಾತೃಜಾ ಸೇವಾ ಸಿಂಧುದಕ್ಲೆರ್ದ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ನಿಟ್ಟೆ ಮಾತೃಜಾ ಸೇವಾ ಸಿಂಧುದಕುಲು 2 ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.

ಕಲ್ಲಮುಂಡ್ಕೂರು ಕುದ್ರಿಪದವ್ ದ 4 ವರ್ಷದ ಯಶಿಕಾ ಬೊಕ್ಕ ಕಿನ್ನಿಗೋಳಿದ 6 ತಿಂಗೊಲ್ದ ಬಾಲೆ ಪೂಜಿತ್ ಶೆಟ್ಟಿಗಾರ್ ನ ವೈದ್ಯಕೀಯ ಚಿಕಿತ್ಸೆಗ್ ನಿಟ್ಟೆ ಮಾತೃಜಾ ಸೇವಾ ಸಿಂಧುದಕುಲು ನಿಧಿ ಸಂಗ್ರಹ ಮಲ್ತೆರ್.

ಈ ಸೇವಾ ಕೂಟ ಶ್ರೀ ಕ್ಷೇತ್ರ ಕಡಂದಲೆ ದೇವಲ್ಯಡ್ 62,522 ರೂ. ಬೊಕ್ಕ ಶ್ರೀ ಕ್ಷೇತ್ರ ಸೂಡಡ್ 58,433 ರೂ., ಒಟ್ಟು 120955 ರೂ. ನ್ ಸಂಗ್ರಹ ಮಲ್ದ್ಂಡ್.

ಡಿ.23: ಬೊಂಬೈದ ಸ್ವರ್ಗೀಯ ರಾಧಾ ಭೋಜ ಶೆಟ್ಟಿ ಸುರತ್ಕಲ್ ವೇದಿಕೆಡ್ ಕರ್ನಾಟಕ ಮಹಾರಾಷ್ಟ್ರ ಪತ್ರಕರ್ತರ ಸಹಮಿಲನ, ಉದಿಪನ ಲೇಸ್

ಬೊಂಬೈ: ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘ (ರಿ.) ಬೊಕ್ಕ ಕನ್ನಡಿಗ ಪತ್ರಕರ್ತರ ಸಂಘ ಮಹಾರಾಷ್ಟ್ರದ ಒಟ್ಟುಸೇರಿಗೆಡ್ ಕರ್ನಾಟಕ ಮಹಾರಾಷ್ಟ್ರ ಪತ್ರಕರ್ತರ ಸಹಮಿಲನ ಬೊಕ್ಕ ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘದ ಮಹಾರಾಷ್ಟ್ರ ಘಟಕದ ಉದಿಪನ ಲೇಸ್ ಡಿ.23 ಸನಿಯಾರ ಬೊಂಬೈದ ಚಕಲಾ-ಅಂಧೇರಿದ ಸ್ವರ್ಗೀಯ ರಾಧಾ ಭೋಜ ಶೆಟ್ಟಿ ಸುರತ್ಕಲ್ ವೇದಿಕೆಡ್ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘದ ಗುರ್ಕಾರೆ ಶಿವಾನಂದ ತಗಡೂರು ಒಯಿಸೊನ್ವೆರ್. ಕೃಷಿ ಖಾತೆ ಸಂಪುಟ ಸಚಿವೆರ್ ಎನ್. ಚೆಲುವರಾಯ ಸ್ವಾಮಿ ಲೇಸ್ ನ್ ಉದಿಪನ ಮಲ್ಪುವೆರ್. ಮಲ್ಲ ಬಿನ್ನೆರಾದ್ ವಿಧಾನಸಭೆ ಸಭಾಪತಿ ಯು.ಟಿ ಖಾದರ್, ಕರ್ನಾಟಕ ಜಾನಪದ ಪರಿಷತ್ ದ ಗುರ್ಕಾರೆ ಡಾ/ ಆರ್ ಕೆ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.

ಮಾನಾದಿಗೆದ ಬಿನ್ನೆರಾದ್ ಮಾಜಿ ಸಚಿವೆರ್ ಡಾ/ ಕೆಸಿ ನಾರಾಯಣ ಗೌಡ, ಬೊಂಬೈ ಬಂಟ್ಸ್ ಸಂಘದ ಗುರ್ಕಾರೆ ಪ್ರವೀಣ್ ಭೋಜ ಶೆಟ್ಟಿ, ಬಿಲ್ಲವ ಅಸೋಸಿಯೇಶನ್ ದ ಗುರ್ಕಾರೆ ಹರೀಶ್ ಜಿ. ಅಮಿನ್, ಫ್ರಾನ್ಸಿಸ್ ಶಿಪ್ಪಿಂಗ್ ಏಜೇನ್ಸಿ ಪ್ರೈವೇಟ್ ಲಿಮಿಟೆಡ್ ದ ಕಾರ್ಯಾಧ್ಯಕ್ಷೆರ್ ಫ್ರಾನ್ಸಿಸ್ ರಸ್ಕೀನ್ಹಾ, ವೈಬ್ರೆಂಟ್ ಎಕ್ಸ್ ಪೋರ್ಟೆಕ್ಸ್ ಪ್ರೈವೇಟ್ ಲಿಮಿಟೆಡ್ ದ ಕಾರ್ಯಾಧ್ಯಕ್ಷೆರ್ ಬಿ.ಆರ್ ರಾವ್, ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಹಿರಿಯ ಸಾಹಿತಿ ಡಾ/ ಸುನೀತಾ ಎಂ ಶೆಟ್ಟಿ, ದ.ಕ ಕಾರ್ಯನಿರತ ಪತ್ರಕರ್ತರ ಸಂಘದ ಗುರ್ಕಾರೆ ಶ್ರೀನಿವಾಸ ನಾಯಕ್ ಇಂದಾಜೆ, ಮಹಾರಾಷ್ಟ್ರ ಕನ್ನಡಿಗ ಪತ್ರಕರ್ತರ ಸಂಘದ ಗುರ್ಕಾರೆ ರೋನ್ಸ್ ಬಂಟ್ವಾಳ್ ಬರಿಯೆರೆ ಉಲ್ಲೆರ್ ಪಂದ್ ಗೌರವ ಪ್ರಧಾನ ಕಾರ್ಯದರ್ಶಿ ಸಾ. ದಯಾ (ದಯಾನಂದ್) ಒತ್ತು ಗುರ್ಕಾರೆ ಡಾ/ ಶಿವ ಮೂಡಿಗೆರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಕಲ್ಮಂಜದ ಗುಂಡ ಶ್ರೀ ಉಳ್ಳಾಯ ಉಳ್ಳಾಲ್ತಿ ದೈವೊಲ್ಯಡ್ ಪವಾಡ

ಕಲ್ಮಂಜ: ಬದಿನೆಡೆ ಗುಂಡ ಶ್ರೀ ಉಳ್ಳಾಯ ಉಳ್ಳಾಲ್ತಿ ದೈವೊಲ್ಯಡ್ ಬ್ರಹ್ಮಕಲಶ ಉಚ್ಚಯದ ನಿಲೆಟ್ಟ್ ಜೀರ್ಣೋದ್ಧಾರ ಕಾರ್ಯದ ಪರಿಹಾರ ಪೂಜೆ ನಡತೊಂದು ಉಂಡು.

ಡಿ.21 ಬೊಕ್ಕ 22 ಕ್ಕ್ ಬಾಲಾಲಯ ಪ್ರತಿಷ್ಠೆ ಬೊಕ್ಕ ಧಾರ್ಮಿಕ ವಿಧಿ ವಿಧಾನಲು ನಡತ್ಂಡ್. ಈ ಪೊರ್ತುಡು ದೈವೊದ ಸೇವಾರ್ಥವಾದ್ ಹೋಮ ನಡಪುನಗ ಹೋಮದ ತೂ ಟ್ಟ್ ಕುದುರೆದ ಮಿತ್ತ್ ಕುಲ್ಲಿನ ಕಾರ್ಣಿಕ ದೈವ ಶ್ರೀ ಉಳ್ಳಾಯ ತೂಜಿದ್ ಬೈದ್ಂಡ್.

ಗ್ರಾಮದ ಮಸ್ತ್ ಕಾರ್ಣಿಕದ ಕ್ಷೇತ್ರ ಪಂದೇ ಪುಗರ್ತೆ ಪಡೆಯಿನ ಶ್ರೀ ಉಳ್ಳಾಯ ಉಳ್ಳಾಲ್ತಿ ದೈವೊಲ್ಯಡ್ ಇತ್ತೆ ದೈವ ತಾನ್ ಇಪ್ಪುನೆನ್ ತೂಜಿಪಾಯಿನವು ಭಕ್ತೆರೆಗ್ ನನಾತ್ ಅಚ್ಚರಿ ಆತ್ಂಡ್.

ಡಿ.24: ಕುಡ್ಲ ಯುವವಾಹಿನಿ ಕೇಂದ್ರ ಸಮಿತಿದ 36ನೇ ವಾರ್ಷಿಕ ಸಮಾವೇಶ

ಕುಡ್ಲ: ಕುಡ್ಲ ಯುವವಾಹಿನಿ (ರಿ.) ಕೇಂದ್ರ ಸಮಿತಿದ 36ನೇ ವಾರ್ಷಿಕ ಸಮಾವೇಶ ಬಂಟ್ವಾಳ ತಾಲೂಕ್ ದ ಬೆಂಜನಪದವು ಶುಭಲಕ್ಷ್ಮೀ ಸಭಾಂಗಣಡ್ ಡಿ.24 ಐತಾರ ನಡಪರೆ ಉಂಡು.

ಕುದ್ರೋಳಿ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ, ಗುರುಬೆಳದಿಂಗಳು ಫೌಂಡೇಶನ್‌ ದ ಗುರ್ಕಾರೆ ಪದ್ಮರಾಜ್ ಆರ್ ಈ ಲೇಸ್ ನ್ ಉದಿಪನ ಮಲ್ಪರೆ ಉಲ್ಲೆರ್. ಲೇಸ್ ದ ಗುರ್ಕಾರ್ಮೆನ್ ಕುಡ್ಲ ಯುವವಾಹಿನಿ ಕೇಂದ್ರ ಸಮಿತಿದ ಗುರ್ಕಾರೆ ರಾಜೇಶ್ ಬಿ ಒಯಿಸೊನರೆ ಉಲ್ಲೆರ್. CREDAI ಮಹಿಳಾ ವಿಭಾಗದ ಸಂಯೋಜಕೆರ್, ನಾರ್ದನ್ ಸ್ಕೈ ಪ್ರಾಪರ್ಟೀಸ್ ನಿರ್ದೇಶಕೆರ್ ಆಯಿನ ಕೃತಿನ್ ಅಮೀನ್ “ಯುವಸಿಂಚನ ವಿಶೇಷಾಂಕನ್” ಬುಡುಗಡೆ ಮಲ್ಪುವೆರ್.

ಬೆಂಗ್ಲೂರು ಅಸಿಸ್ಟೆಂಟ್ ಕಮಿಷನರ್ ಅಫ್ ಪೊಲೀಸ್ ರೀನಾ ಸುವರ್ಣ ಪ್ರಶಸ್ತಿ ಪ್ರಧಾನ ಮಲ್ಪುವೆರ್. ಬಂಟ್ವಾಳ ರಾಣಿ ಅಬ್ಬಕ್ಕ ತುಳು ಅಧ್ಯಯನ ಕೇಂದ್ರದ ಗುರ್ಕಾರೆ ಡಾ/ ತುಕರಾಮ ಪೂಜಾರಿ ಪ್ರಧಾನ ಭಾಷಣ ಮಲ್ಪುವೆರ್. ಮಲ್ಲ ಬಿನ್ನೆರಾದ್ ಮುಖ್ಯಮಂತ್ರಿಲೆನ ಮಾಜಿ ಆಪ್ತ ಸಹಾಯಕೆರ್ ನಿರ್ಮಲ್ ಜಗನ್ನಾಥ ಬಂಗೇರ, ಉದ್ಯಮಿ ನಟೇಶ್ ಪೂಜಾರಿ, ಲೋಕೇಶ್ ಪೂಜಾರಿ ಕಲ್ಲಡ್ಕ ಪಾಲ್ ಪಡೆಯೆರೆ ಉಲ್ಲೆರ್.

ಅಂಚೆನೆ ಪ್ರಶಸ್ತಿ ಪ್ರಧಾನ ಲೇಸ್ ಡ್ ಕಂಕನಾಡಿ ಶ್ರೀ ಬ್ರಹ್ಮ ಬೈದರ್ಕಳ ಗರಡಿ ಕ್ಷೇತ್ರದ ಗುರ್ಕಾರೆ ಕೆ. ಚಿತ್ತರಂಜನ್ ಮೆರೆಗ್ ಸಾಧನಾ ಶ್ರೀ ಪ್ರಶಸ್ತಿ, ಸಜಿಪಮೂಡ, ಬೊಳ್ಳಾಯಿದ ಸಜಿಪ ಮುನ್ನೂರು ಮೂರ್ತೆದಾರೆರೆನ ಸೇವಾ ಸಹಕಾರಿ ಸಂಘಗ್ ಸಾಧನಾ ಶ್ರೇಷ್ಠ ಪ್ರಶಸ್ತಿ ಬೊಕ್ಕ ಸಂಘಟನಾ ಕ್ಷೇತ್ರದ ಸಾಧಕೆರ್ ಶ್ರೀನಿವಾಸ ಪೂಜಾರಿ ಮೆಲ್ಕಾರ್, ಸಾಮಾಜಿಕ ಕ್ಷೇತ್ರದ ಸಾಧಕೆರ್ ಮನೋಜ್ ಕುಮಾರ್ ಕಟ್ಟೆಮಾರ್, ಅಕ್ಷತಾ ಮೆರೆಗ್ ಯುವ ಸಾಧನಾ ಪುರಸ್ಕಾರ ನಡಪರೆ ಉಂಡು.

ಬೊಕ್ಕ ವೇದಾವತಿ, ಚೈತ್ತಾ, ಜಯಂತ್ ಅಮೀನ್, ಯೋಗ್ನ ಅಮೀನ್ ಮೊಕುಲೆಗ್ ಯುವವಾಹಿನಿ ಗೌರವ ಅಭಿನಂದನೆ, ಡಾ. ಸಂಜಿತ್ ಎಸ್ ಅಂಚನ್, ಡಾ. ಶುಭಕರ್ ಅಂಚನ್, ಡಾ. ಅಕ್ಷತಾ ಕೋಟ್ಯಾನ್,ಡಾ. ಲತಾ ಬಿ ಮೊಕ್ಲೆಗ್ ಯುವವಾಹಿನಿ ಅಭಿನಂದನೆ 2023, ಬೊಕ್ಕ ಅಭಿನ್ ಬಂಗೇರ ಮೆರೆಗ್ ಯುವವಾಹಿನಿ ಸಾಧಕ ಪುರಸ್ಕಾರ ನಡಪರೆ ಉಂಡು.

ಅಂಚೆನೆ ಯುವವಾಹಿನಿ ಕೇಂದ್ರ ಸಮಿತಿದ ಪೊಸ ಕಾರ್ಯಕಾರಿ ಸಮಿತಿದ ಪದಗ್ರಹಣ ನಡಪರೆ ಉಂಡು. ಯುವವಾಹಿನಿ ಕೇಂದ್ರ ಸಮಿತಿದ ಪ್ರಧಾನ ಕಾರ್ಯದರ್ಶಿ ಕುಸುಮಾಕರ ಕುಂಪಲ ವರ್ಷದ ವರದಿನ್ ಓದಿಯೆರೆ ಉಲ್ಲೆರ್.

ಈ ಲೇಸ್ ಯುವವಾಹಿನಿ ಕೇಂದ್ರ ಸಮಿತಿದ ಗುರ್ಕಾರೆ ರಾಜೇಶ್ ಬಿ, ಪ್ರಧಾನ ಕಾರ್ಯದರ್ಶಿ ಕುಸುಮಾಕರ ಕುಂಪಲ, 36ನೇ ವಾರ್ಷಿಕ ಸಮಾವೇಶದ ಸಂಚಾಲಕೆರ್ ಹರೀಶ್ ಕೋಟ್ಯಾನ್ ಕುದನೆ, ನಿರ್ದೇಶಕೆರ್ ಭುವನೇಶ್ ಪಚ್ಚಿನಡ್ಕ, ಯುವವಾಹಿನಿ ನಿಯೋಜಿತ ಗುರ್ಕಾರೆ ಹರೀಶ್ ಕೆ ಪೂಜಾರಿ, ಪ್ರಧಾನ ಕಾರ್ಯದರ್ಶಿ ಜಗದೀಶ್ಚಂದ್ರ ಡಿ.ಕೆ ಮೊಕ್ಲೆನ ಉಪಸ್ಥಿತಿಡ್ ನಡಪರೆ ಉಂಡು ಪಂದ್ ಯುವವಾಹಿನದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಜ.19: ಕುಡುಂಬೂರು ಗುತ್ತು ಧರ್ಮ ನೇಮೋಚ್ಚಯದ ದೊಂಪ ಮೂರ್ತ

ಸುರತ್ಕಲ್: ಕುಡುಂಬೂರು ಗುತ್ತು ಶ್ರೀ ಪಿಲಿಚಾಮುಂಡಿ, ಧೂಮಾವತಿ, ಜಾರಂದಾಯ ಬಂಟ ಪಂಚಶಕ್ತಿಲೆನ ಧರ್ಮನೇಮೋಚ್ಚಯ ಜ.19 ಕ್ಕ್ ಕುಡುಂಬೂರು ಗುತ್ತು ದೈವ ಚಾವಡಿಡ್ ನಡಪರೆ ಉಂಡು. ನೆತ್ತ ತಯಾರಿದ ನಿಲೆಟ್ಟ್ ದೊಂಪ ಮೂರ್ತ ನಡತ್ಂಡ್.

ಈ ಪೊರ್ತುಡು ರಂಗ ಐತಾಲ್ ಕದ್ರಿ, ಭಾಗ್ಯಚಂದ್ರ ಭಟ್ ತೋಕೂರು, ಗುತ್ತಿನಾರ್ ಜಯರಾಮ್ ಶೆಟ್ಟಿ, ಅನುವಂಶಿಕ ಆಡಳಿತ ಮೊಕ್ತೇಸರೆರ್ ಕುಡುಂಬೂರು ಗುತ್ತು, ಗುತ್ತಿನಾರ್ ಗುರುರಾಜ್ ಮಾಡ ಬೊಳ್ಳಿಲ್‌ಮಾರ ಗುತ್ತು, ಹೊಸಬೆಟ್ಟು ಗುತ್ತಿನಾರ್ ಬಾಲಕೃಷ್ಣ ಶೆಟ್ಟಿ, ಚಿನ್ನಯ್ಯ ಮಾಡ ಕಟ್ಲ ಬೂಡು, ರೋಹಿತಾಕ್ಷ ರೈ ಕುಳಾಯಿ ಗುತ್ತು, ರಮೇಶ್ ಶೆಟ್ಟಿ ಚಿಕ್ಕಪರಾರಿ, ಉಮೇಶ್ ಶೆಟ್ಟಿ ಪಂಜ ಗುತ್ತು, ಭಾಸ್ಕರ್ ಶೆಟ್ಟಿ ಮೂಡಾಡ್ಯರ ಗುತ್ತು, ಮುಕ್ತಾನಂದ ಮೆಲಾಂಟ, ಶರತ್ ಕುಮಾರ್ ಭಂಡಾರಿ ನಡಿಕಾಲ, ಸೀತಾರಾಮ ಶೆಟ್ಟಿ, ಸುಧಾಮ ಶೆಟ್ಟಿ, ಅರುಣ್ ಚೌಟ ಬಾಳದ ಗುತ್ತು, ಜಾರಪ್ಪ ಪೂಜಾರಿ, ಗಣಪ ಪೂಜಾರಿ, ಜಯಂತ್ ಸಾಲ್ಯಾನ್, ಮಾಧವ ಸುವರ್ಣ ಸೇರಿನಂಚೆನೆ ಕುಡುಂಬೂರು ಗುತ್ತು ಕುಟುಂಬಸ್ಥೆರ್, ಊರುದ ಪತ್ತ್ ಸಮಸ್ತೆರ್ ಬೊಕ್ಕ ಸಂಘ ಸಂಸ್ಥೆಲೆನ ಪದುಕೆರ್ ಪಾಲ್ ಪಡೆದಿತ್ತೆರ್.

ಜ.19 ಕ್ಕ್ ಬೊಲ್ಪುಗು ಧರ್ಮ ದೈವೊಲೆನ ಭಂಡಾರ ಏರುಂಡು. ಮಧ್ಯಾಹ್ನ ಮಂಡ್ಯ ಮಧುಸೂದನ್ ದಾಸ್ ಬೊಕ್ಕ ಕೂಟದಕ್ಲೆರ್ದ್ ಹರಿಕಥೆ “ಶ್ರೀ ಕೃಷ್ಣ ಗಾರುಡಿ”, ಬಯ್ಯಗ್ ಮೂಲ ಮೈಸಂದಾಯ ದೈವೊದ ಧರ್ಮನೇಮ, ಕಾಂತೇರಿ ಧೂಮಾವತಿ ಬಂಟ, ಜಾರಂದಾಯ ಬಂಟ, ಸರಳ ಧೂಮಾವತಿ ಬಂಟ ಬೊಕ್ಕ ಬಬ್ಬರ್ಯ ದೈವೊಲೆಗ್ ಧರ್ಮನೇಮ, ರಾತ್ರೆ ಪಿಲಿಚಾಮುಂಡಿ ದೈವೊದ ಎಣ್ಣೆ ಬೂಳ್ಯ ಬೊಕ್ಕ ಧರ್ಮನೇಮ, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.

ಜ.21 ಐತಾರ ರಾತ್ರೆ ಕುಟುಂಬದ ಪಂಜುರ್ಲಿ ದೈವೊದ ನೇಮೋಚ್ಚಯ ನಡಪರೆ ಉಂಡು.