ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಆನೆ ಮಾವುತೆರಾದ್ ಬೇಲೆ ಮಲ್ತೊಂದು ಇತ್ತಿನ ಶ್ರೀನಿವಾಸ ಧರ್ಮಸ್ಥಳ ಮೇರ್ ಇನಿ ತನ್ನ ವೃತ್ತಿ ಜೀವನದ ಬದ್ಕ್ ರ್ದ್ ನಿವೃತ್ತಿಯಾತೆರ್.
ಈ ಪೊರ್ತುಡು ಶ್ರೀ ದೇವಳದ ವ್ಯವಸ್ಥಾಪನ ಸಮಿತಿ ಗುರ್ಕಾರ್ಲು ಮೋಹನ್ ರಾಮ್ ಸುಳ್ಳಿ ಶಾಲ್ ಪಾರ್ದ್ ಮಾನಾದಿಗೆ ಮಲ್ತೆರ್. ಆನೆ ಯಶಸ್ವಿರ್ದ್ ಇತ್ತ್ ನೆಟ್ಟ ಬೇಲೆ ಮಲ್ತಿನ ಆನೆ ಮಾವುತೆ ಶ್ರೀನಿವಾಸ್ ಅರೆಗ್ ನಿವೃತ್ತಿ ಜೀವನದ ಪೊರ್ತುಡು ಮಾಲೆ ಪಾರ್ದ್ ಆಶೀರ್ವಾದ ಮಲ್ತ್ಂಡ್.
ಕುಡ್ಲ : ಸಮಾಜಡ್ ಎಡ್ಡೆ ಬೇಲೆ ಮಲ್ತಿನ ಸಜ್ಜನ ಮಹೋದಯರೆನ್ ಗುರುತಿಸಾದ್ ಕಲ್ಕೂರ ಪ್ರತಿಷ್ಠಾನ ಪ್ರತಿವರ್ಷ ಕೊರ್ಪಿನ “ಪೇಜಾವರ ಶ್ರೀ ವಿಶ್ವೇಶತೀರ್ಥ ಜೀವಮಾನ ಪ್ರಶಸ್ತಿ”ನ್ ಬೊಂಬೈದ ಪುಗರ್ತೆದ ರಂಗನಟೆ, ಸಮಾಜ ಸೇವಕೆರ್ ಭಾಸ್ಕರ ಸುವರ್ಣ ಸಸಿಹಿತ್ಲು ಪಡೆಯೊಂದೆರ್.
ಕಲ್ಕೂರ ಪ್ರತಿಷ್ಠಾನ ಒಡಿಪುದ ಪೇಜಾವರ ಸ್ವಾಮಿಲೆನ ಕೈರ್ದ್ ಪ್ರಶಸ್ತಿನ್ ಪಡೆನ ಭಾಸ್ಕರ ಸುವರ್ಣ ಸಸಿಹಿತ್ಲು ಮೇರೆಗ್ ಶ್ರೀಕೃಷ್ಣ ಪರಮಾತ್ಮನ ಆಶೀರ್ವಾದದೊಟ್ಟಿಗೆ ಪ್ರಶಸ್ತಿನ್ ಹಸ್ತಾಂತರ ಮಲ್ತೆರ್.
ಮಸ್ತ್ ಸಂಘಟೆನೆದೊಟ್ಟುಗೆ ತನ್ನನ್ ತಾನ್ ತೊಡಗಿಸಿಸಾವೊಂದು ನಾಡು -ನುಡಿ ಸೇವೆಗೆ ತನ್ನನ್ ಅರ್ಪಣೆ ಮಲ್ತೊಂದು ಬತ್ತಿನಾರ್ ಭಾಸ್ಕರ್ ಸುವರ್ಣ.
ಈ ಪ್ರಶಸ್ತಿ ವಿತರಣೆದ ಪೊರ್ತುಡು ಚಾವಡಿಡ್ ಶ್ರೀ ಪೇಜಾವರ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿ, ಶಿರೂರು ಮಠದ ಸ್ವಾಮೀಜಿ, ಸಂಘಟಕೆರ್ ಡಾ. ಎಂ ಮೋಹನ ಆಳ್ವ, ಶಾಸಕೆರ್ ವೇದವ್ಯಾಸ ಕಾಮತ್, ಕುಡ್ಲ ನಗರದ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಪಡೆನ ಲಕ್ಮೀಶ ತೋಳ್ಪಾಡಿ,ಕಲ್ಕೂರ ಪ್ರತಿಷ್ಠಾನದ ಮುಖ್ಯಸ್ಥೆರ್ ಪ್ರದೀಪ ಕುಮಾರ್ ಕಲ್ಕೂರ ಇತ್ತೆರ್.
ಲೈಬೀರಿಯಾಡ್ ಪೆಟ್ರೋಲ್ ಟ್ಯಾಂಕರ್ ಪುಡಾದ್ 40 ಜನ ನಾಗರಿಕೆರ್ ತೀರ್ ಪೋಯಿನ ಘಟನೆ ನಡತ್ ದ್ಂಡ್.
ಟ್ಯಾಂಕರ್ ರ್ದ್ ಪೆಟ್ರೋಲ್ ಬುರೊಂದು ಇಪ್ಪುನಗ ಜನ ಅವೆನ್ ಸಂಗ್ರಹ ಮಲ್ಪರೆ ದುಂಬಾತ್ತೆರ್. ಈ ಪೊರ್ತುಡು ಪುಡಾದ್ ಸುಮಾರ್ ಜನಕ್ಕ್ ಪೆಟ್ಟಾತ್ಂಡ್. ಅತ್ತಂದೆ ತೀರ್ ಪೋಯಿನಕ್ಲೆನ ಸಂಖ್ಯೆ ಎಚ್ಚಾಪುನ ಅಂದಾಜಿ ಉಂಡು. ಅವ್ವಂತ್ತದೆ ಟೊಮೊಟಾ ಪೇಂಟೆಡ್ ನಡತಿನ ಕುಡೊಂಜಿ ಘಟನೆಡ್ 88 ಜನಕ್ಕ್ ಪೆಟ್ಟಾತ್ಂಡ್ ಪಂದ್ ಲೈಬೀರಿಯಾನ್ ಅಧಿಕಾರಿಲು ತೆರಿಪಾದೆರ್.
ಬೊಂಬೈ: ನೆರೂಲ್ ಶ್ರೀ ಅಯ್ಯಪ್ಪ ಭಕ್ತವೃಂದ ಚಾರಿಟೇಬಲ್ ಟ್ರಸ್ಟ್ ದ 31ನೇ ವರ್ಷದ ಶ್ರೀ ಅಯ್ಯಪ್ಪ ಸ್ವಾಮಿ ಮಹಾಪೂಜೆ (ಡಿ.29) ಇನಿ ರಾತ್ರೆ ನೆರೂಲ್ ಶ್ರೀ ಶನೀಶ್ವರ ದೇವಲ್ಯಡ್ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ನೆರೂಲ್ ಶ್ರೀ ಅಯ್ಯಪ್ಪ ಭಕ್ತವೃಂದ ಚಾರಿಟೇಬಲ್ ಟ್ರಸ್ಟ್ (ರಿ.) ದ ಗುರ್ಕಾರೆ, ಟ್ರಸ್ಟಿಲು, ಪದುಕೆರ್, ಮಹಿಳಾ ವಿಭಾಗದ ಸದಸ್ಯೆರ್, ಸ್ವಾಮಿನಕುಲು ಲೆಪ್ಪೋಲೆಡ್ ತೆರಿಪಾದೆರ್.
ನಾಲಾಸೋಪಾರ ಶ್ರೀ ಅಯ್ಯಪ್ಪ ಭಕ್ತ ವೃಂದ ಸಾಮಾಜಿಕ ಸಂಸ್ಥೆ (ರಿ.) ಡ್ ವರ್ಷದ ಶ್ರೀ ಅಯ್ಯಪ್ಪ ಮಹಾಪೂಜೆ ಬೊಕ್ಕ ಇರುಮುಡಿ, ಶಬರಿಮಲೆ ಯಾತ್ರೆ ಜ.7 ಐತಾರ ನಾಲಾಸೋಪಾರ ದ್ವಾರಕಾ ಹೋಟೆಲ್ ಕೈತಲ್ ದ ಅಚೋಲ್ ಮಾರ್ಗದ ಮಜಿಥಿಯಾ ನಾಕಾಡ್ ನಡಪರೆ ಉಂಡು.
ಅಂಚೆನೆ ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು. ಈ ಲೇಸ್ ಡ್ ಮಾತ ಭಕ್ತೆರ್ ಪಾಲ್ ಪಡೆವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಕಡಂಬಾರು ಶ್ರೀ ಚೌಕಾರು ಮಂತ್ರವಾದಿ ಗುಳಿಗ ದೈವೊಲ್ಯಡ್ (ಡಿ.29) ಇನಿ ತಂಬಿಲ ಸೇವೆ ಬೊಕ್ಕ ವರ್ಷಾವಧಿ ಕೋಲೋತ್ಸವ ನಡಪರೆ ಉಂಡು.
ಅಂಚನೆ ಸಾಂಸ್ಕೃತಿಕ ಲೇಸ್ ದ ಲೆಕ್ಕೊಡು ಕಡಂಬಾರು ಶಾಸ್ತ ಫ್ರೆಂಡ್ಸ್ (ರಿ.) ಮುತಾಲಿಕೆಡ್ ಸಸಿಹಿತ್ಲು ಶ್ರೀ ಭಗವತೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದಕ್ಲೆರ್ದ್ ಅರ್ಧ ಸತ್ಯ ತುಳು ಆಟ ನಡಪರೆ ಉಂಡು.
ಸುಬ್ರಹ್ಮಣ್ಯ: ಇತ್ತೆ ಕಂಡ ಬೇಸಾಯ ಮಾದೆ ಅವೊಂದು ಇಪ್ಪುರ್ನೆದಾವೆರ ಜೋಕ್ಲೆಗ್ ಬೇಸಾಯದ ಬಗೆಟ್ಟ್ ತೆರಿಪಾವುನವು ಬೊಕ್ಕ ಕೆಸರ್ ಕಂಡ ಗೊಬ್ಬುದ ಮಹತ್ವನ್ ತೆರಿಪಾವುನೇ ಮಸ್ತ್ ಅಗತ್ಯ ಆತ್ಂಡ್. ಆ ಮುಕೇನ ಕಂಡ ಬೇಸಾಯ, ನೇಜಿ ನಡ್ಪುನೆ, ಕೆಸರ್ ದ ಗೊಬ್ಬು ಮಾತ ಜೋಕ್ಲೆಗ್ ಕಂಡಗ್ ಜಪ್ಪದ್ ತೂಪಾವುನೇ ಎಡ್ಡೆ ಪಂದ್ ಪಂಜ ರೈತ ಉತ್ಪಾದಕೆರೆನ ಕಂಪನಿ ಗುರ್ಕಾರೆ ತೀರ್ಥಾನಂದ ಕೊಡಿಂಕೇರಿ ಮೇರ್ ಪಂಡೆರ್.
ಮೇರ್ ಡಿ.28 ಗುರುವಾರ ಪಂಜ ಶ್ರೀ ಪರಿವಾರ ಪಂಚಲಿಂಗೇಶ್ವರ ದೇವಲ್ಯದ ಕಂಡಡ್ ಪಂಜ ಸರಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆದ ಜೋಕ್ಲೆನ “ಬೇಸಾಯದ ಪಾಠ, ಕೆಸರಿನ ಆಟ” ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಸಭಾಧ್ಯಕ್ಷತೆನ್ ಶಾಲಾ ಅಭಿವೃದ್ಧಿ ಬೊಕ್ಕ ಮೇಲುಸ್ತುವಾರಿ ಸಮಿತಿದ ಗುರ್ಕಾರೆ ಸೋಮಶೇಖರ ನೇರಳ ಒಯಿಸ್ ದಿತ್ತೆರ್.
ಮಲ್ಲ ಬಿನ್ನೆರಾದ್ ಪಂಜ ಗ್ರಾಮ ಪಂಚಾಯತ್ ಗುರ್ಕಾರ್ದಿ ವಿಜಯಲಕ್ಷ್ಮಿ ಜಳಕದ ಹೊಳೆ, ಪಂಜ ಪಂಚಶ್ರೀ ಜೇಸಿ ರಜತ ವರ್ಷದ ಗುರ್ಕಾರೆ ಶಿವಪ್ರಸಾದ್ ಹಾಲೆಮಜಲು, ಪಂಚ ಶ್ರೀ ಜೇಸಿ ಸ್ಥಾಪಕಾಧ್ಯಕ್ಷೆರ್ ದೇವಿ ಪ್ರಸಾದ್ ಜಾಕೆ ಚಾವಡಿಡ್ ಇತ್ತೆರ್.
ಶಾಲೆದ ಮುಖ್ಯ ಶಿಕ್ಷಕಿ ಲೀಲಾ ಕುಮಾರಿ ಟಿ. ಎದ್ಕೊನಿಯೆರ್. ಸಹ ಶಿಕ್ಷಕೆರ್ ಹರೀಶಕುಮಾರ್ ಲೇಸ್ ಸುಧಾರಿಕೆ ಮಲ್ತೆರ್. ದೈಹಿಕ ಶಿಕ್ಷಣ ಶಿಕ್ಷಕಿ ಭುವನೇಶ್ವರಿ ಕಂಬಳ ಸೊಲ್ಮೆ ಸಂದಾಯೆರ್. ಶಾಲೆದ ಮಾತ ಜೋಕುಲು ಕಂಡಡ್ ಬೇತೆ ಬೇತೆ ಗೊಬ್ಬುನ್ ಗೊಬ್ಬುದು ಕುಸಿ ಪಡೆಯೆರ್. ಶಾಲೆದ ಶಿಕ್ಷಕೆರ್ ಸಹಕಾರ ಕೊರಿಯೆರ್. ಈ ಪೊರ್ತುಡು ಪೋಷಕೆರ್, ವಿದ್ಯಾಭಿಮಾನಿಲು ಪಾಲ್ ಪಡೆದಿತ್ತೆರ್.
ಮೀರಾರೋಡ್ ಅಯ್ಯಪ್ಪ ಸೇವಾ ಸಮಿತಿದ ಮುತಾಲಿಕೆಡ್ ಡಿ.30 ಸನಿಯಾರ ಶಾಂತಿನಗರದ ಅಯ್ಯಪ್ಪ ಮಂದಿರದ ಸಭಾಂಗಣಡ್ ವಿಶ್ವೇಶದಾಸ ಹರಿಕಥಾ ವಿದ್ವಾನ್ ಕೈರಬೆಟ್ಟು ವಿಶ್ವನಾಥ ಭಟ್ ಮೆರೆರ್ದ್ ಏಕಾದಶಿ ವೃತ ಮಹಾತ್ಮೆ ಪನ್ಪುನ ತುಳು ಹರಿಕಥಾ ಸಂಕೀರ್ತನೆ ನಡಪರೆ ಉಂಡು.
ಈ ಹರಿಕಥಾ ಸಂಕೀರ್ತನೆಗ್ ತುಳು ಕನ್ನಡಿಗೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಲೇಸ್ ದ ಆಯೋಜಕೆರ್ ಅಜಿತ್ ಜೆ. ಶೆಟ್ಟಿ ಬೆಳ್ಮಣ್ ಪತ್ರಿಕಾ ಪ್ರಕಟಣೆಡ್ ಬಿನ್ನಾಪು ಮಲ್ದೆರ್.
ಮುಲ್ಕಿ: ಶಿಕ್ಷಣದೊಟ್ಟಿಗೆ ಎಡ್ಡೆ ಸಂಸ್ಕಾರನ್ ಸಂಸ್ಥೆ ಎಂಕ್ ಕೊರ್ನೆದಾವೆರ ಯಾನ್ ಜೀವನಡ್ ಮಲ್ಲ ತಾನನ್ ಪಡೆಯೆರೆ ಸಾಧ್ಯ ಆಂಡ್ ಪಂದ್ ಶ್ರೀ ನಾರಾಯಣ ಗುರು ಸಮೂಹ ಶಿಕ್ಷಣ ಸಂಸ್ಥೆದ ಹಳೆ ವಿದ್ಯಾರ್ಥಿ, ಲಿಯೋ ಜಿಲ್ಲಾ ಸಂಯೋಜಕೆರ್ ಕವನ್ ಕುಬೆವೂರು ಪಂಡೆರ್.
ಮೇರ್ ಮುಲ್ಕಿದ ಶ್ರೀ ನಾರಾಯಣ ಗುರು ಸಮೂಹ ಶಿಕ್ಷಣ ಸಂಸ್ಥೆಡ್ 44ನೇ ವಾರ್ಷಿಕೋತ್ಸವದ ಲೆಕ್ಕೊಡು ನಡತಿನ ಇನಾಮು ಪಟ್ಟುನ ಲೇಸ್ ಡ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್ ಪಾತೆರಿಯೆರ್.
ಶಾಲೆದ ಹಳೆವಿದ್ಯಾರ್ಥಿ, ಮಣಿಪಾಲ ಕೆ.ಎಂ.ಸಿದ ಸಹಾಯಕ ಪ್ರಾಧ್ಯಾಪಕೆರ್ ಡಾ|ವಿನಾಯಕ ಅಂಚನ್, ಶ್ರೀ ನಾರಾಯಣ ಗುರು ಸಮೂಹ ಶಿಕ್ಷಣ ಸಂಸ್ಥೆಲೆನ ಪ್ರಾಥಮಿಕ ವಿಭಾಗದ ನಿವೃತ್ತ ಮುಖ್ಯೋಪಾಧ್ಯಾಯಿನಿ ಯಶೋದ ಎಲ್. ಸಾಲ್ಯಾನ್, ನಿವೃತ್ತ ಶಿಕ್ಷಕಿ ಐರಿನ್ ರೋಡ್ರಿಗಸ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್. ಈ ಪೊರ್ತುಡು ಕಲೆ ಸಾಹಿತ್ಯ ಬೊಕ್ಕ ಗೊಬ್ಬುಡು ಗೆಂದಿನ ಕಲ್ಪಾರ್ಥಿಲೆಗ್ ಇನಾಮುನ್ ಕೊರಿಯೆರ್.
ಈ ಪೊರ್ತುಡು ಸಂಸ್ಥೆದ ಸಂಚಾಲಕೆರ್ ಹರೀಂದ್ರ ಸುವರ್ಣ, ಕಾರ್ಯದರ್ಶಿ ಬಾಲಚಂದ್ರ ಸನಿಲ್, ಆಡಳಿತ ಮಂಡಳಿದ ಸದಸ್ಯೆರ್ ಹೇಮರಾಜ್, ಯೋಗಿಶ್ ಕೋಟ್ಯಾನ್, ಪ್ರಜ್ಞಾ, ಪ್ರಾಂಶುಪಾಲೆರ್ ಯತೀಶ್ ಅಮೀನ್, ಮುಖ್ಯೋಪಾಧ್ಯಾಯಿನಿ ಗೀತಾ ಪಾಲ್ ಪಡೆದಿತ್ತೆರ್. ಗೀತಾ ಎದ್ಕೊನಿಯೆರ್.
ಮಾಟುಂಗಾ ಪೂರ್ವದ ಬೊಂಬೈ ಕನ್ನಡ ಸಂಘದ ಮುತಾಲಿಕೆಡ್ ದತ್ತಿ ಉಪನ್ಯಾಸ ಲೇಸ್ ಡಿ.23 ಕ್ಕ್ ಬಯ್ಯಗ್ ಮಾಟುಂಗಾದ ಮೈಸೂರು ಅಸೋಸಿಯೇಶನ್ ಡ್ ನಡತ್ಂಡ್.
ಈ ಲೇಸ್ ಡ್ ಸಮಾಜ ಸೇವಕೆರ್ ಚಿತ್ರಾಪು ಕೆ. ಎಂ.ಕೋಟ್ಯಾನ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್. ಲಕ್ಷ್ಮಿ ಹೇರೂರು ಬೊಕ್ಕ ಪದ್ಮಜಾ ಮಣ್ಣೂರ ಉಪನ್ಯಾಸ ಕೊರಿಯೆರ್. ಸಂಘದ ಗುರ್ಕಾರೆ ಗುರುರಾಜ ಎಸ್ ನಾಯಕ ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್. ಸಂಘದ ಪ್ರಧಾನ ಕಾರ್ಯದರ್ಶಿ ಸೋಮನಾಥ ಎಸ್ ಕರ್ಕೇರ ಲೇಸ್ ನ್ ಸುಧಾರಿಕೆ ಮಲ್ತೆರ್.
