ಇಂಡಿಗೋ ಏರ್ ಲೈನ್ಸ್ ಕಂಪೆನಿ ಡಿ.30 ರ್ದ್ ಡೆಲ್ಲಿರ್ದ್ ಅಯೋಧ್ಯೆಗ್ ಪೊಸ ಇನಾಮನ್ ಸುರು ಮಲ್ಪುವ ಪಂದ್ ಘೋಷಣೆ ಮಲ್ದ್ಂಡ್.
ಡೆಲ್ಲಿರ್ದ್ ಅಯೋಧ್ಯೆಗ್ ವಾಣಿಜ್ಯ ನೇರ ಇಮಾನಲು ಜ.6 ರ್ದ್ ಸುರು ಆಪುಂಡು. ಅಹಮದಾಬಾದ್ ರ್ದ್ ಅಯೋಧ್ಯೆಗ್ ಮೂಜಿ ಸರ್ತಿ ವಾರದ ಇಮಾನಲು ಜ.11 ರ್ದ್ ಸುರು ಆಪುಂಡು ಪಂದ್ ಇಂಡಿಗೋ ಪ್ರಕಟಣೆಡ್ ತೆರಿಪಾದ್ಂಡ್.
ತೆಕ್ಕಟ್ಟೆ: ಕುಂಭಾಶಿ ಆನೆಗುಡ್ಡೆ ವಿನಾಯಕ ದೇವಲ್ಯಡ್ ಮಲ್ಲ ತೇರ್ ಉಚ್ಚಯ, (ಬ್ರಹ್ಮರಥೋತ್ಸವ) ಅಷ್ಟೋತ್ತರ ಸಹಸ್ರ ನಾಳಿಕೇರ ಗಣಪತಿ ಯಾಗ, ಸಾಂಸ್ಕೃತಿಕ ಲೇಸ್ ಡಿ.13-16 ಮುಟ್ಟ ನಡಪರೆ ಉಂಡು.
ಇನಿ (ಡಿ.13) ಬೊಲ್ಪುಗು ಪ್ರಾರ್ತನೆ, ಗಣಪತಿ ಹೋಮ ನಡತ್ಂಡ್. ರಾತ್ರೆ ರಂಗಪೂಜೆ, ಪಲ್ಲಕ್ಕಿ ಉಚ್ಚಯ ನಡತ್ಂಡ್.
ಡಿ.14 ಕ್ಕ್ ಬೊಲ್ಪುಗು ಗಣಪತಿ ಹೋಮ, ಸತ್ಯಗಣಪತಿ ವ್ರತ, ಮಹಾಪೂಜೆ, ರಾತ್ರೆ ರಂಗಪೂಜೆ, ಪಲ್ಲಕ್ಕಿ ಉಚ್ಚಯ ನಡತ್ಂಡ್.
ಡಿ.15 ಕ್ಕ್ ನವಕ ಪ್ರಧಾನ ಕಲಶಾಭಿಷೇಕ, ರಾತ್ರೆ ಮೆರವಣಿಗೆ ರಂಗಪೂಜೆ, ಪಲ್ಲಕ್ಕಿ ಉಚ್ಚಯ ನಡಪರೆ ಉಂಡು.
ಡಿ.16 ಕ್ಕ್ ಬೊಲ್ಪುಗು ಅಷ್ಟೋತ್ತರ ಸಹಸ್ರ ನಾಳಿಕೇರ ಗಣಪತಿ ಯಾಗ, ಬ್ರಹ್ಮರಥೋತ್ಸವ, ಪಾನಕ ಪಟ್ಟುನ ಲೇಸ್, ಅನ್ನ ಪ್ರಸಾದ ಸೇವೆ ಬಯ್ಯಗ್ ತೇರ್ ಒಯಿಪೆರೆ, ಸುಡುಮದ್ದು ಪ್ರದರ್ಶನ ನಡಪರೆ ಉಂಡು.
ಡಿ.17 ಕ್ಕ್ ಬೊಲ್ಪುಗು ಚೂರ್ಣೋತ್ಸವ, ಅವಭ್ರಥ ಸ್ನಾನ, ವಸಂತಾರಾಧನೆ, ಮಂತ್ರಾಕ್ಷತೆ ನಡಪರೆ ಉಂಡು.
ಅಂಚೆನೆ ಪ್ರತಿದಿನೊಲ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು ಪಂದ್ ದೇವಲ್ಯದ ಆಡಳಿತ ಧರ್ಮದರ್ಶಿ ಕೆ. ಶ್ರೀರಮಣ ಉಪಾಧ್ಯಾಯ ತೆರಿಪಾದೆರ್.
ಕುಡ್ಲ: ಬಂದಾರ್ ಟೆಂಪೋ ಚಾಲಕ ಬೊಕ್ಕ ಮಾಲಕರ ಸಂಘ (ರಿ.) ದ ಮುತಾಲಿಕೆಡ್ ಇಂಡಿಯನ್ ರೆಡ್ ಕ್ರಾಸ್ ಸೊಸೈಟಿ ಬ್ಲಡ್ ಬ್ಯಾಂಕ್, ಲೇಡಿಗೋಶನ್ ಆಸ್ಪತ್ರೆ ಕುಡ್ಲ, ಲಯನ್ಸ್ ಕ್ಲಬ್ ಅಶೋಕ ನಗರದ ಒಟ್ಟುಸೇರಿಗೆಡ್ ನೆತ್ತೆರ್ ಉಂಬೊಲಿ ಡಿ.17 ಕ್ಕ್ ಕಸೈಗಲ್ಲಿ ಶಾಲೆದ ಚಾವಡಿಡ್ ನಡಪರೆ ಉಂಡು.
ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಬಂದಾರ್ ಪೊಲೀಸ್ ಇನ್ಸ್ ಪೆಕ್ಟರ್ ಅಝ್ಮ್ ತ್ ಅಲಿ, ಕುಡ್ಲ ಮಹಾನಗರ ಪಾಲಿಕೆದ ಕಾರ್ಪೊರೇಟರ್ ಝೀನತ್ ಶಂಸುದ್ದೀನ್, ಪೂರ್ಣಿಮಾ, ಅಶೋಕ ನಗರ ಲಯನ್ಸ್ ಕ್ಲಬ್ ದ ಗುರ್ಕಾರೆ ಚರಣ್ ಆಳ್ವ, ಬಂದಾರು ದ.ಕ.ಜಿ.ಪಂ ಸರಕಾರಿ ಉರ್ದು ಪ್ರಾಥಮಿಕ, ಪ್ರೌಢ ಶಾಲೆದ ಗುರ್ಕಾರೆ ಬಿ. ಮುಹಮ್ಮದ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಗುರ್ಕಾರೆ ಮಕ್ಬೂಲ್ ಅಹ್ಮದ್, ಪ್ರಧಾನ ಕಾರ್ಯದರ್ಶಿ ದೇವದಾಸ್ ಎನ್ ಪೂಜಾರಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ನರಮಾನಿ ಆಪ್ಯಲ್ ತಿನ್ಪುನೆರ್ದ್ ಆರೋಗ್ಯಗ್ ಮಸ್ತ್ ಎಡ್ಡೆ ಆಪುಂಡು.
ಆ್ಯಪಲ್ ಡ್ ಎಚ್ಚ ಆಂಟಿ ಆಕ್ಸಿಡೆಂಟ್ ಉಂಡು. ಚರ್ಮದ ಪೊರ್ಲುನ್ ಎಚ್ಚ ಮಲ್ಪುಂಡು. ಅತ್ತಂದೆ ಸ್ತನ ಕ್ಯಾನ್ಸರ್, ಬಾಯಿದ ಗಜ್ಜಿ ಬೊಕ್ಕ ಅನ್ನನಾಳ ಸೇರಿನಂಚೆನೆ ಕ್ಯಾನ್ಸರ್ ದ ಸಮಸ್ಯೆನ್ ಕಮ್ಮಿ ಮಲ್ಪುಂಡು. ನೆಟ್ಟ್ 14% ದಾತ್ ವಿಟಮಿನ್ ಸಿ ಉಂಡು. ಉಂದು ರೋಗನಿರೋಧಕ ಶಕ್ತಿನ್ ಎಚ್ಚ ಮಲ್ಪುಂಡು. ಅಂಚೆನೆ ಜೀರ್ಣಕ್ರಿಯೆನ್ ಸರಿ ಮಲ್ಪುಂಡು. ನೆತ್ತೆರ್ ದ ಸಮಸ್ಯೆ, ಎಚ್ಚಾಯಿನ ಕೊಲೆಸ್ಟ್ರಾಲ್ ನ್ ಕಮ್ಮಿ ಮಲ್ಪುಂಡು. ನೆರ್ದ್ ಕೆಜಿ ಕಮ್ಮಿ ಆಯೆರೆ ಸಹಕಾರಿ ಆಪುಂಡು.
ಮುಂಚಿ, ನಿರುಳ್ಳಿ, ಟೊಮ್ಯಾಟೊ ಇಂಚೆನೆ ಇತ್ತೆ ಬೊಳ್ಳುಳ್ಳಿ ಕಿರಯ ಎಚ್ಚಾತ್ಂಡ್.
ಇತ್ತೆ ಬೊಳ್ಳುಳ್ಳಿ ಕೆಜಿಗ್ 400 ರೂ. ಆತ್ಂಡ್. ಅಂಚಾದ್ ಕಲ್ವೆರ್ ಕಂಡಿಯೆರೆ ಸುರು ಮಲ್ದೆರ್. ಈ ಘಟನೆ ಚಿತ್ರದುರ್ಗ ತಾಲೂಕ್ ದ ದಂಡಿನಕುರುಬರ ಹಟ್ಟಿ ಗ್ರಾಮಡ್ ನಡತ್ಂಡ್. ಸುಮಾರ್ 6 ಲಕ್ಷ ರೂ. ದ ಬೊಳ್ಳುಳ್ಳಿ ಕಂಡ್ ದ್ ಪೋತ್ಂಡ್.
ಕಂಡಿದ ಬಾಕಿಲ್ ಪುಡಾತ್ ದ್, ಗೋಡೌನ್ ಬತ್ತಿನ ಕಲ್ವೆರ್ 150 ಚೀಲ ಬೊಳ್ಳುಳ್ಳಿನ್ ಕಂಡ್ ದೆರ್. ಈ ಬೊಳ್ಳುಳ್ಳಿನ್ ಮಧ್ಯಪ್ರದೇಶರ್ದ್ ಕನತ್ ಇತ್ತೆರ್.
ಕೇಂದ್ರ ಸಶಸ್ತ್ರ ಪಡೆಟ್ಟ್ (BSF, CRPT, CISF, SSB, ITBP, SSF) 75768 ಕಾನ್ಸ್ ಟೇಬಲ್ (ಜಿಡಿ) ಬೇಲೆಗ್ ಅರ್ಜಿ ಸಂದಾಯೆರ್ ಡಿ.28 ಅಕೇರಿದ ದಿನ ಆತ್ಂಡ್.
1-8-2023 ಕ್ಕ್ SSLC ಮುಗಿತಿನ ಬೊಕ್ಕ 18-23 ವರ್ಷದ ಅಭ್ಯರ್ಥಿಲು ಅರ್ಜಿ ಸಂದಾವೊಲಿ. ನೆತ್ತ ಪರೀಕ್ಷೆ ಫೆಬ್ರವರಿಡ್ ನಡಪರೆ ಉಂಡು.
ಕುಲಾಲ ಬಾಂಧವೆರೆನ್ ಗಟ್ಟಿ ಮಲ್ಪು ಬೇಲೆ ಪ್ರತಿಷ್ಠಾನರ್ದ್ ನಡಪಡ್: ನ್ಯಾ. ಜಗನ್ನಾಥ್ ಶೆಟ್ಟಿ ಪಣಿಯೂರು
ಬೊಂಬೈ: ಕುಡ್ಲ ಕುಲಾಲ ಪ್ರತಿಷ್ಠಾನ (ರಿ.) ದ ಮುತಾಲಿಕೆಡ್, ಬೊಂಬೈ ಮುಂಡ್ಕೂರು ನಾನಿಲ್ತಾರ್ ಅಭಿಮಾನಿ ಬಳಗ, ಮಲಾಡ್ ಶ್ರೀ ವರಮಹಾಲಕ್ಷ್ಮಿ ಪೂಜಾ ಸಮಿತಿ, ಬೊಂಬೈ ಶ್ರೀ ವೀರನಾರಾಯಣ ದೇವಲ್ಯದ ಭಕ್ತೆರೆನ ಒಟ್ಟುಸೇರಿಗೆಡ್ ಡಿ.10 ಕ್ಕ್ ಸಂತಾಕ್ರೂಸ್ ಪೂರ್ವದ ಬಿಲ್ಲವ ಭವನಡ್ ವಿಜಯ ಕಲಾವಿದೆರ್ ಕಿನ್ನಿಗೋಳಿ ಮೊಕ್ಲೆರ್ದ್ “ಪಿರಾವುಡು ಒರಿ ಉಲ್ಲೆ” ತುಳು ನಾಟಕ ಪ್ರದರ್ಶನ ಆಂಡ್.
ಮಾನಾದಿಗೆದ ಗುರ್ಕಾರೆ, ಶ್ರೀ ವರಮಹಾಲಕ್ಷ್ಮಿ ಪೂಜಾ ಸಮಿತಿ ಮಲಾಡ್ ದ ಗುರ್ಕಾರೆ ನ್ಯಾ. ಜಗನ್ನಾಥ್ ಎನ್ ಶೆಟ್ಟಿ ಪಾತೆರ್ದ್, ಊರುದ ಕಲಾವಿದೆರೆನ ಇನಿತ್ತ ನಾಟಕ ಅರ್ಥಪೂರ್ಣ ಆತ್ಂಡ್. ನಾಟಕಲು ಸಮಾಜನ್ ತಿದ್ದುನ ಕೆಲಸ ಮಲ್ಪುಂಡು. ಮಲಾಡ್ ಪರಿಸರಡ್ ಶ್ರೀ ವರಮಹಾಲಕ್ಷ್ಮಿ ಪೂಜಾ ಸಮಿತಿ ಧಾರ್ಮಿಕ ಸೇವೆನ್ ಮಲ್ತೊಂದು ತುಳು ಕನ್ನಡಿಗೆರೆನ್ ಒಟ್ಟು ಸೇರ್ಸಾದ್ಂಡ್. ಕಲೆಕ್ಕ್ ಬೊಕ್ಕ ಕಲಾವಿದೆರೆಗ್ ಪ್ರೋತ್ಸಾಹ ಕೊರ್ಪುನ ದಿಟ್ಟಿಡ್ ಇನಿ ನಡತಿನ ನಾಟಕಗ್ ವರಮಹಾಲಕ್ಷ್ಮಿ ಪೂಜಾ ಸಮಿತಿಲ ಬೆಂಬಲ ಕೊರ್ತುಂಡು. ನಾಟಕಡ್ ಕುಲಾಲ ಸಮಾಜದ ಸುಮಾರ್ ಕಲಾವಿದೆರ್ ಅಭಿನಯ ಮಲ್ದೆರ್. ಅಕ್ಲೆಗ್ ಪ್ರೋತ್ಸಾಹ ಮಲ್ಪುನ ದಿಟ್ಟಿಡ್ ಕುಲಾಲ ಪ್ರತಿಷ್ಠಾನ ಆಯೋಜನೆ ಮಲ್ತಿನ ನಾಟಕಗ್ ಮಾಸ್ತ್ ಸಂಖ್ಯೆಡ್ ಕಲಾಭಿಮಾನಿಲು ಪ್ರೋತ್ಸಾಹ ಕೊರ್ತೆರ್. ಉಂದುವೇ ರೀತಿ ಕುಲಾಲ ಸಮಾಜ ಬಂಧುಲೆನ್ ನನಾತ್ ಗಟ್ಟಿ ಮಲ್ಪುನ ಕೆಲಸ ಪ್ರತಿಷ್ಠಾನರ್ದ್ ನಡಪಡ್ ಪಂದ್ ಪಂಡೆರ್.
ಶ್ರೀ ಶನಿ ಮಹಾತ್ಮಾ ಪೂಜಾ ಸಮಿತಿ ಇರಾನಿ ಚಾಲ್ ಮಲಾಡ್ ಪೂರ್ವ ದ ಗುರ್ಕಾರೆ ಮೋಹನ್ ಜಿ ಬಂಗೇರ ಬೊಕ್ಕ ಆರೆನ ಬೊಡೆದಿ ಜಯ ಬಂಗೇರ ಮೊಕ್ಲೆಗ್ ಸನ್ಮಾನ ಮಲ್ತೆರ್.
ಸನ್ಮಾನ ಸ್ವೀಕಾರ ಮಲ್ತಿನ ಮೋಹನ್ ಬಂಗೇರ ಪಾತೆರ್ದ್, ಮುಲ್ಪ ಎಡ್ಡೆ ನಾಟಕನ್ ಪ್ರದರ್ಶನ ಮಲ್ದೆರ್. ಮಹಾನಗರಗ್ ಬತ್ತಿನ ಊರುದ ನಾಟಕ ಕೂಟಗ್ ನಮ ಮಾತ ಪ್ರೋತ್ಸಾಹ ಮಲ್ಪುಗ. ಮಲಾಡ್ ಗೋರೆಗಾಂವ್ ದ ನಡುಟ್ಟ್ ಇಪ್ಪುನ ಶನಿಮಂದಿರ ಬೊಂಬೈಡ್ ಧಾರ್ಮಿಕ ಸಾಮಾಜಿಕ ಶೈಕ್ಷಣಿಕ ಸೇವೆನ್ ಮಲ್ತೊಂದು ಪುಗರ್ತೆನ್ ಪಡೆತ್ಂಡ್. ಶನಿಮಂದಿರದ ಗುರ್ಕಾರೆಯಾದ್ ಕೆಲಸ ಮಲ್ತೊಂದು ಇಪ್ಪುನ ಎನನ್ ಮಾಸ್ತ್ ಅಭಿಮಾನರ್ದ್ ಸನ್ಮಾನ ಮಲ್ತಿನವು ಕುಸಿ ಆಂಡ್. ಕ್ಷೇತ್ರಡ್ ಬತ್ತ್ ದ್ ಪ್ರಾರ್ಥನೆ ಮಲ್ಪುನಕ್ಲೆನ ಬೇಡಿಕೆ ಖಂಡಿತವಾದ್ ಈಡೇರುಂಡು. ಎಕ್ಲೆನ ಕ್ಷೇತ್ರಗ್ ಆರ್ಥಿಕವಾದ್ ಒವ್ವೇ ತೊಂದರೆ ಇಜ್ಜಿ. ಧಾರ್ಮಿಕ ಸೇವೆದೊಟ್ಟಿಗೆ ಕ್ಷೇತ್ರಡ್ ಸಮಾಜ ಸೇವೆನ್ ಮಲ್ತೊಂದು ಉಲ್ಲ. ಕುಲಾಲ ಸಮಾಜಡ್ ಬುಲೆಯಿನ ಎನನ್ ಸುರುತ್ತ ಸರ್ತಿ ಪ್ರತಿಷ್ಠಾನ ಗುರುತಿಸಾದ್ಂಡ್. ಎನ್ನ ಸೇವಾ ಕಾರ್ಯಾಲು ಸಮಾಜಗ್ ಎಪಲ ಇಪ್ಪುಂಡು ಪಂದ್ ಪಂಡೆರ್.
ವಿಜಯ ಕಲಾವಿದೆರ್ ಕಿನ್ನಿಗೋಳಿ ಕೂಟದ ಕುಲಾಲ ಸಮಾಜದ ಕಲಾವಿದೆರಾಯಿನ ಸುರೇಶ್ ಕುಲಾಲ್, ಸುಧಾಕರ ಸಾಲಿಯಾನ್, ಭಾಸ್ಕರ ಕುಲಾಲ್, ನಿತೇಶ್ ಕುಲಾಲ್, ಕು.ಕೃತಿಕಾ ಕುಲಾಲ್ ಬೊಕ್ಕ ವಿಜಯ ಕಲಾವಿದೆರೆನ ಕೂಟದ ರೂವಾರಿ ಪತ್ರಕರ್ತೆರ್ ಶರತ್ ಶೆಟ್ಟಿ ಕಿನ್ನಿಗೋಳಿ ಮೊಕ್ಲೆಗ್ ಚಾವಡಿಡ್ ಮಾನಾದಿಗೆ ನಡತ್ಂಡ್.
ಶರದ್ ಶೆಟ್ಟಿ ಕಿನ್ನಿಗೋಳಿ ಪಾತೆರ್ದ್, ಎಕ್ಲೆನ ಕೂಟಡ್ ಕುಲಾಲ ಸಮುದಾಯದ ಒಟ್ಟು 8 ಜನ ಕಲಾವಿದೆರ್ ಉಲ್ಲೆರ್. ಉಪಸ್ಥಿಡ್ ಇಪ್ಪುನ 5 ಜನ ಕಲಾವಿದೆರೆಗ್ ಮಾನಾದಿಗೆ ಮಲ್ಪುನವು ಕುಸಿತ್ತ ಇಚಾರ. ಕುಲಾಲ ಸಮಾಜಡ್ ನನಲ ಎಚ್ಚದ ಕಲಾವಿದೆರ್ ಪುಟ್ಟ್ ದ್ ಬರಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ಚಾವಡಿಡ್ ವರ್ಲಿ ಶ್ರೀ ಸಿದ್ದೇಶ್ವರ ಅನ್ನದಾತ ಅಪ್ಪಾಜಿ ಬೂಡು ಫೌಂಡೇಶನ್ ದ ಸಲಹೆಗಾರೆರ್ ಪ್ರವೀಣ್ ಶೆಟ್ಟಿ ಕುರ್ಕಾಲ್, ಶ್ರೀ ಶನಿ ಮಹಾತ್ಮಾ ಪೂಜಾ ಸಮಿತಿ ಇರಾನಿ ಚಾಲ್ ಮಲಾಡ್ ದ ಕಾರ್ಯದರ್ಶಿ ಹರೀಶ್ ಕರ್ಕೇರ, ಯಕ್ಷಗುರು ನಾಗೇಶ್ ಪೊಳಲಿ, ಹೋಟೆಲ್ ಉದ್ಯಮಿ ಪದ್ಮನಾಭ ಬಂಗೇರ, ಉದ್ಯಮಿ ಅಶೋಕ್ ಸಾಲ್ಯಾನ್, ನಾನಿಲ್ತಾರ್ ಅಭಿಮಾನಿ ಬಳಗ ಬೊಂಬೈದ ಒತ್ತು ಗುರ್ಕಾರೆ ದಿನೇಶ್ ಬಂಗೇರ, ಕುಲಾಲ ಸಂಘ ಬೊಂಬೈ ಯುವ ವಿಭಾಗದ ಬಿನೀತ್ ಗಿರೀಶ್ ಸಾಲ್ಯಾನ್, ಜ್ಯೋತಿ ಕ್ರೆಡಿಟ್ ಸೊಸೈಟಿದ ನಿರ್ದೇಶಕಿ ಡಾ. ಸುರೇಖಾ ರತನ್ ಕುಲಾಲ್, ಕುಲಾಲ ಸಂಘ ಬೊಂಬೈದ ಕಟ್ವಾನ ನಿರ್ಮಾಣ ಸಮಿತಿದ ಕಾರ್ಯದರ್ಶಿ ಉಮೇಶ್ ಬಂಗೇರ, ನಾರಾಯಣ್ ಸಾಲಿಯಾನ್ ಮಲಾಡ್ ಇತ್ತೆರ್.
ಲೇಸ್ ನ್ ಸಂಘಟಕೆರ್ ಬಿ. ದಿನೇಶ್ ಕುಲಾಲ ಸುಧಾರಿಕೆ ಮಲ್ತ್ ದ್, ಕುಡ್ಲ ಕುಲಾಲ ಪ್ರತಿಷ್ಠಾನ (ರಿ.) ದ ಕಾರ್ಯಚಟುವಟಿಕೆಲೆನ ಬಗೆಟ್ಟ್ ಪೊಲಬು ಕೊರಿಯೆರ್. ವಾಮನ್ ಅದ್ಯಪಾಡಿ, ಯೊಗೀಶ್ ಬಂಗೇರ, ರೋಹಿತ್ ಬಂಜನ್, ಕೃಷ್ಣ ಬಂಗೇರ ನಾಲಸಪೂರ್, ರತ್ನ ಕುಲಾಲ್, ಸುದೀಪ್ ಮಲಾಡ್, ಸುರೇಂದ್ರ ಮಲಾಡ್ ಸಹಕಾರ ಕೊರಿಯೆರ್.
ಕಲಾವಿದೆರೆನ ಸನ್ಮಾನ ಪೊರ್ತುಡು ಮಮತಾ ಗಿರೀಶ್ ಸಾಲಿಯಾನ್, ಪುಷ್ಪಲತಾ ಸಾಲಿಯಾನ್, ಗೀತಾ ಬಂಗೇರ, ಸುರೇಖಾ ಬಂಗಾರ, ರೇಣುಕಾ ಸಾಲಿಯಾನ್, ಜಯಂತಿ ಬಂಗೇರ, ಶ್ರೀಮತಿ ಆಚಾರ್ಯ, ನಳಿನಿ ಕರ್ಕೇರ, ಭಾರತಿ ಆಚಾರ್ಯ, ಡಾ. ಶಶಿನ್ ಆಚಾರ್ಯ, ವೇಣುಗೋಪಾಲ್ ಕರ್ಕೇರ ಪಾಲ್ ಪಡೆದಿತ್ತೆರ್.
ಕುಡ್ಲ: ಎಕ್ಕೂರುದ ಕಂಕನಾಡಿ ಕೆ.ಎಚ್.ಬಿ ನಾಗರಿಕ ಕ್ಷೇಮಾಭಿವೃದ್ಧಿ ಸಮಿತಿ (ರಿ.) ದ 8ನೇ ವರ್ಷದ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ ಬೊಕ್ಕ ಸಾಂಸ್ಕೃತಿಕ ಲೇಸ್ ಡಿ.24 ಐತಾರ ಕೆ.ಎಚ್.ಬಿ ಚಾವಡಿಡ್ ನಡಪರೆ ಉಂಡು.
ಬಯ್ಯಗ್ ಪೂಜೆದ ಲೇಸ್, ರಾತ್ರೆ ಮಂಗಳಾರತಿ, ಮನೋರಂಜನೆ ಲೇಸ್, ಅನ್ನ ಪ್ರಸಾದ ಸೇವೆ, ಸಭಾ ಲೇಸ್ ಬೊಕ್ಕ ಕಲಾಶ್ರೀ ಕುಸಾಲ್ದ ಕಲಾವಿದೆರ್ ಬೆದ್ರ ಮೊಕ್ಲೆರ್ದ್ ಉಲಾಯಿ ಲೆಪ್ಪುಗ ತುಳು ನಾಟಕ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಕೆ.ಎಚ್.ಬಿ ನಾಗರಿಕ ಕ್ಷೇಮಾಭಿವೃದ್ಧಿ ಸಮಿತಿ (ರಿ.) ದ ಮಾನಾದಿಗೆದ ಗುರ್ಕಾರೆ ದಿವಾಕರ ಆಚಾರ್, ಗುರ್ಕಾರೆ ಕೃಷ್ಣ ಬಂಗೇರ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ದುಬೈ : ಗಡಿನಾಡ ಸಾಹಿತ್ಯ ಸಾಂಸ್ಕೃತಿಕ ಅಕಾಡೆಮಿ (ರಿ) ದುಬೈ ಘಟಕದ ವತಿರ್ದ್ ದುಬೈಡ್ ರಡ್ಡನೇ ಸರ್ತಿ “ದುಬೈ ಗಡಿನಾಡ ಉತ್ಸವ-2023” ಅಭೂತಪೂರ್ವವಾದ್ ನಡತ್ತಿನ ಕನ್ನಡ ಭಾಷೆ, ಸಾಹಿತ್ಯ, ಸಾಂಸ್ಕೃತಿಕತೆದ ಮೋನೆಲು ಅನಾವರಣ ಆಂಡ್. ನಗರದ ಅಲ್ ಗಿಸಾಸ್ ದ ವುಡ್ಲ್ಯಾಮ್ ಪಾರ್ಕ್ (Woodlem park School) ಶಾಲೆದ ಚಾವಡಿಡ್ ಮಧ್ಯಾಹ್ನರ್ದ್ ಬೊಕ್ಕ ಸುರು ಆಯಿನ ಕಾರ್ಯಕ್ರಮಡ್ ಯುಎಇ ಡ್ ಇತ್ತಿನ ಕನ್ನಡಿಗೆರ್, ಕನ್ನಡಾಭಿಮಾನಿಲು ಸಾಕ್ಷಿಯಾಯೆರ್.
ಕರ್ನಾಟಕ ವಿಧಾನ ಪರಿಷತ್ತ್ ಸಭಾಪತಿ ಬಸವರಾಜ ಎಸ್ ಹೊರಟ್ಟಿ ಉತ್ಸವನ್ ಉದಿಪನ ಮಲ್ತ್ ಬೇಲೆಗಾದ್ ಅಪ್ಪೆನ ಊರುನು ಬುಡ್ದು ಕನ್ನಡ ನೆಲರ್ದ್ ಬತ್ತಿನ ಕನ್ನಡಿಗೆರ್ ಮೂಲು ಮಾತೆರ್ನ ಒಟ್ಟಿಗೆ ಒಂಜಾದ್ ಕನ್ನಡ ಭಾಷೆ ಸಾಹಿತ್ಯ ಅಭಿಮಾನನ್ ಮಿತ್ತ್ ಕೊನೊವೊಂದು ಇಪ್ಪುನ ಎಡ್ಡೆ ಕಾರ್ಯ. ಗಡಿನಾಡ ಉತ್ಸವದಂಚಿನ ಕಾರ್ಯಕ್ರಮಗ್ ದುಬೈಗ್ ಬತ್ತ್ಂಡಲ ಮುಲ್ಪ ಕನ್ನಡ ಪ್ರೇಮ ತೂನಗ ಕರ್ನಾಟಕದ ಉಲಾಯಿಯೆ ಉಲ್ಲ ಪಂದ್ ಆಪುಂಡು ಭಾಷೆ ,ಸಂಸ್ಕೃತಿ ಪ್ರೋತ್ಸಾಹಗಾದ್ ಬೊಕ್ಕ ಅರಬ್ ರಾಷ್ಟ್ರಗ್ ಪ್ರೇರಣೆ ಆಪುನಂಚ ಮೂಲು ಒಂಜಿ ಕನ್ನಡ ಭವನ ನಿರ್ಮಾಣಗ್ ಬೊಕ್ಕ ಕನ್ನಡ ಕಾರ್ಯಕ್ರಮದ ಪ್ರೋತ್ಸಾಹಗ್ ಸರಕಾರದೊಟ್ಟಿಗೆ ಚರ್ಚಿಸಾದ್ ಸೂಕ್ತ ಅನುದಾನಗ್ ಕ್ರಮ ದೆತೊನುವೆ ಪಂದ್ ಭರವಸೆನ್ ಕೊರಿಯೆರ್.
ಅಬುಧಾಬಿ ಕರ್ನಾಟಕ ಸಂಘದ ಗುರ್ಕಾರ್ಲು ಸರ್ವೋತ್ತಮ ಶೆಟ್ಟಿ ಸಭೆತ ಗುರ್ಕಾರ್ಮೆನ್ ವಹಿಸ್ ದ್ ಪಾತೆರ್ನ ಆರ್ ಭಾಷಾಭಿಮಾನ ದೇಶನ್ ದಾಟ್ ನಗ ಆಪುನ ಅನುಭವ ನಿಜವಾಯಿನ ಅಪ್ಪೆನ ಊರುದ ಮಮತೆ. ಮೂಲು ನಡಪುನ ಪ್ರತಿಯೊಂಜಿ ಕಾರ್ಯಕ್ರಮ ಸೌಹರ್ದತವಾದ್ ನಡಪುನೆಟ್ಟ್ ಸರ್ವ ಧರ್ಮದ ಬೊಕ್ಕ ಜನತೆಸ ಸಹಕಾರ ಪ್ರದಾನ ಕಾರಣ. ನೆಕ್ಕಾದ್ ಸಾಮರಸ್ಯಗ್ ಕೊಲ್ಲಿ ರಾಷ್ಟ್ರದ ಕನ್ನಡಿಗೆರ್ನ ಕೊಡುಗೆ ಗಣನೀಯ ಪಂದ್ ಪಂಡೆರ್. ರಾಜ್ಯಸಭಾ ಸದಸ್ಯೆರ್ ಡಾ|ಎಲ್.ಹನುಮಂತಯ್ಯ, ಮಂಜೇಶ್ವರ ಶಾಸಕೆರ್ ಎ.ಕೆ.ಎಂ ಅಶ್ರಫ್, ಅಂತಾರಾಷ್ಟ್ರೀಯ ಖ್ಯಾತಿದ ವಿನ್ಯಾಸಗಾರ ರವೀಂದ್ರ ಕುಮಾರ್ ,ಯಕ್ಷಗಾನ ಅಭ್ಯಾಸ ಕೇಂದ್ರದ ಸಂಚಾಲಕೆರ್ ದಿನೇಶ್ ಶೆಟ್ಟಿ ಕೊಟ್ಟಿಂಜ, ಎಣ್ಮಕಜೆ ಗ್ರಾಮ ಪಂಚಾಯತ್ ಗುರ್ಕಾರ್ಲು ಸೋಮಶೇಖರ ಜೆ ಎಸ್, ಪಂ.ಮಾಜಿ ಉಪಾಧ್ಯಕ್ಷೆ ,ವಾಗ್ಮಿ ಎ.ಎ ಆಯಿಷಾ ಪೆರ್ಲ, ಶಾರ್ಜಾ ಕರ್ನಾಟಕ ಸಂಘದ ಗುರ್ಕಾರ್ಲು ಸತೀಶ್ ಪೂಜಾರಿ, ಸಮಾಜ ಸೇವಕೆರ್ ಹರೀಶ್ ಬಂಗೇರ, ಸಂದೀಪ್ ಮೂಲ್ಕಿ, ಉದ್ಯಮಿ ಅಬುಲ್ ಸಲಾಂ ಚೇವಾರು ಈ ಪೊರ್ತುಡು ಇತ್ತೆರ್. ಸಂಘಟಕೆರಾಯಿನ ಎ.ಆರ್. ಸುಬ್ಬಯ್ಯಕಟ್ಟೆ, ಝಡ್.ಎ.ಕಯ್ಯಾರ್, ಕೋಶಾಧಿಕಾರಿ ಇಬ್ರಾಹಿಂ ಬಾಜೂರಿ, ನವೀನ ಗೌಡ ಬೊಕ್ಕ ಗಡಿನಾಡ ಸಾಹಿತ್ಯ ಸಾಂಸ್ಕೃತಿಕ ಘಟಕ ಯುಎಇಸ ಸರ್ವ ಸದಸ್ಯೆರ್ನ ಸಹಭಾಗಿತ್ವಡ್ ಕಾರ್ಯಕ್ರಮ ಯಶಸ್ವಿಯಾದ್ ನಡತ್ಂಡ್. ಘಟಕದ ಪ್ರದಾನ ಕಾರ್ಯದರ್ಶಿ ಅಮರ್ ದೀಪ್ ಕಲ್ಲೂರಾಯ ಪ್ರಾಸ್ತವನೆ ಮಲ್ತೆರ್.ಗಡಿನಾಡ ಸಾಹಿತ್ಯ ಸಾಂಸ್ಕೃತಿಕ ಅಕಾಡೆಮಿ (ರಿ) ದುಬೈ ಘಟಕದ ಗುರ್ಕಾರ್ಲು ನ್ಯಾ.ಇಬ್ರಾಹಿಂ ಖಲೀಲ್ ಬತ್ತಿ ಬಿನ್ನೆರೆನ್ ಎದ್ಕೊಂಡೆರ್., ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ ಸೊಲ್ಮೆ ಸಂದಾಯ ಮಲ್ತೆರ್.
ಗಡಿನಾಡ ರತ್ನ ಪ್ರಶಸ್ತಿ ಪ್ರದಾನ ಸಮಾಜ ಸೇವೆದ ಸಾಧನೆನ್ ಗುರುತಿಸಾದ್ ಜೋಸೆಫ್. ಮಾತಿಯಾಸ್, ಅಶ್ರಫ್ ಮಂತೂರ್, ಸಿ ಎ ರಮಾನಂದ ಪ್ರಭು ಮಸ್ಕತ್ ಮೊಕ್ಲೆಗ್ ಗಡಿನಾಡ ರತ್ನ ಪ್ರಶಸ್ತಿನ್ ಕೊರಿಯೆರ್.
ಗಡಿನಾಡ ರತ್ನ ಪ್ರಶಸ್ತಿ ಪ್ರದಾನ
ಸಾಧಕರತ್ನ ಪುರಸ್ಕಾರ
ಬೊಕ್ಕ ಸುಧಾಕರ ರಾವ್ ಪೇಜಾವರ, ಡಾ ಮಲ್ಲಿಕಾರ್ಜುನ ಎಸ್ ನಾಸಿ, ಅಶ್ರಫ್ ಕಾರ್ಲೆ ಶಾಹುಲ್ ಹಮೀದ್ ತಂಗಳ್ ಮಾಳಿಗೆ, ಆಸೀಫ್ ಮೇಲ್ಪರಂಭ, ಫಾರೂಕ್ ಚಂದ್ರನಗರ ಒಡಿಪು,ಕಲಿಮಾ ಫೌಂಡೇಶನ್ ಒಡಿಪು ನೆತ್ತ ಗುರ್ಕಾರ್ಲು ಡಾ| ಸಿಬಗತುಲ್ಲ ಶರೀಫ್ ಮೇರೆಗ್ ಸಾಧಕರತ್ನ ಪುರಸ್ಕಾರ ಕೊರ್ದು ಮಾನಾದಿಗೆ ಮಲ್ತೆರ್.
ಅವೆರ್ದ್ ಬೊಕ್ಕ ಯಕ್ಷಗಾನ ಅಭ್ಯಾಸ ಕೇಂದ್ರ ಯು.ಎ.ಇ ಕಲಾವಿದೆರ್ “ಮೋಹನ ಮುರಳಿ” ಯಕ್ಷಗಾನ ನೃತ್ಯ ನಾಟಕ, ಯುಎಇಯ ಪ್ರಸಿದ್ಧ ನೃತ್ಯ ಕಲಾವಿದೆರ್ದ್ “ನೃತ್ಯ ವೈಭವ”, ಯುಎಇಡ್ ಇಪ್ಪುನ ಗಡಿನಾಡ್ ದ ಪ್ರಸಿದ್ಧ ಗಾಯಕ ಗಾಯಕಿರ್ದ್ “ಸಂಗೀತ ರಸಸಂಜೆ”,ಪೊಣ್ಣು ಪಿಲಿ ಡ್ಯಾನ್ಸ್ ಬೊಕ್ಕ ದಫ್ ಮುಟ್ಟ್ ಇಂಚಿನ ಸಾಂಸ್ಕೃತಿಕ ಕಾರ್ಯಕ್ರಮ ನಡತ್ಂಡ್.
ಆರತಿ ಅಡಿಗ ಬೊಕ್ಕ ವಿಘ್ನೇಶ್ ಕುಂದಾಪುರ ಲೇಸ್ ದ ಸುದಾರಿಕೆ ಮಲ್ತೆರ್.
ಶ್ರೀ ಸ್ವಾಮಿಯೇ ಅಯ್ಯಪ್ಪ ಸೇವಾ ಟ್ರಸ್ಟ್ (ರಿ.) ದ 27 ನೇ ವರ್ಷದ ಅಯ್ಯಪ್ಪ ಸ್ವಾಮಿ ಮಹಾಪೂಜೆ ಬೊಕ್ಕ ಅನ್ನ ಪ್ರಸಾದ ಸೇವೆ ಡಿ.23 ಸನಿಯಾರ ಉಲ್ಹಾಸ್ನಗರದ ಸೆಂಚುರಿ ರಾಯಾನ್ ವಿಶ್ರಾಮ್ ಭವನಡ್ ನಡಪರೆ ಉಂಡು.
ಬೊಲ್ಪುಗು ಗಣಹೋಮ, ಭಜನೆ, ಮಹಾಪೂಜೆ, ಮಂಗಳಾರತಿ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಸಾಂಸ್ಕೃತಿಕ ಲೇಸ್, ಧಾರ್ಮಿಕ ಸಭಾ ಲೇಸ್, ಸನ್ಮಾನ ಬೊಕ್ಕ ಯಕ್ಷಭ್ರಾರಿ ಪ್ರಶಸ್ತಿ ಕೊರ್ಪುನ ಲೇಸ್ ನಡಪರೆ ಉಂಡು ಪಂದ್ ಸಂಘಟಕೆರ್ ಲೆಪ್ಪೋಲೆಡ್ ತೆರಿಪಾದೆರ್.
