ಕುಕ್ಕೆ ಸುಬ್ರಹ್ಮಣ್ಯ : ಶಿಕ್ಷಣಪ್ರೇಮಿ, ಉದ್ಯಮಿ ಕುಮಾರ ನಾಯರ್ ಮೇರ್ ಸುರು ಮಲ್ದಿನ ಕುಮಾರಸ್ವಾಮಿ ವಿದ್ಯಾಲಯ ಪನ್ಪಿನ ಒಂಜಿ ಎಲ್ಯ ಶಿಕ್ಷಣ ಸಂಸ್ಥೆ ಆರೆನ ಅಂಚೆನೆ ಅರೆನ ಜೋಕ್ಲೆನ ಎಡ್ಡೆ ಗುಣೊರ್ದಾತ್ರ ಇತ್ತೆ ಮಲ್ಲ ಮರತಲೆಕ್ಕ ಬುಲೆದ್ಂಡ್ ಪಂದ್ ಶ್ರೀ ಸಂಪುಟ ನರಸಿಂಹ ಸ್ವಾಮಿ ಶ್ರೀ ಸುಬ್ರಹ್ಮಣ್ಯ ಮಠತ್ತ ಪೀಠಾಧಿಪತಿ ಶ್ರೀ ಶ್ರೀ ವಿದ್ಯಾಪ್ರಸನ್ನ ತೀರ್ಥ ಸ್ವಾಮೀಜಿ ಪಂಡೆರ್.
ಕುಕ್ಕೆ ಸುಬ್ರಹ್ಮಣ್ಯದ ಅನುಗ್ರಹ ಎಜ್ಯುಕೇಶನ್ ಟ್ರಸ್ಟ್ ಮುತಾಲಿಕೆದ ಕುಮಾರಸ್ವಾಮಿ ವಿದ್ಯಾಲಯದ ರಜತ ಸಂಭ್ರಮ ಲೇಸ್ “ಕುಮಾರ ಪರ್ವ- 2022” ಪರ್ವದ ರಡ್ಡನೇ ದಿನತ್ತ ಲೇಸ್ ಡ್ ಆರ್ ಆಶೀರ್ವಚನ ಕೊರಿಯೆರ್. ಕುಮಾರ ಪರ್ವ ಸ್ಮರಣ ಸಂಚಿಕೆನ್ ಸಹಕಾರ ರತ್ನ ಪ್ರಶಸ್ತಿ ಪುರಸ್ಕೃತೆರ್ ನಿತ್ಯಾನಂದ ಮುಂಡೋಡಿ ಬುಡುಗಡೆ ಮಲ್ತೆರ್. ಉಂದುವೇ ಪೊರ್ತುಡು ಮೆರೆನ್ ಸಂಸ್ಥೆದ ವತಿರ್ದ್ ಮಾನಾದಿಗೆ ಮಲ್ತೆರ್. ವಿದ್ಯಾರಶ್ಮಿ ಸಮೂಹ ವಿದ್ಯಾಸಂಸ್ಥೆದ ಅಧ್ಯಕ್ಷೆರ್ ಕೆ. ಸೀತಾರಾಮ್ ರೈ ಬೂಕುದ ಮಂಟಪ ಉದಿಪನ ಮಲ್ತ್ ದ್, ಲೇಸ್ ದ ಅಧ್ಯಕ್ಷತೆನ್ ಒಯಿಸೊಂದು ಕುಮಾರ ನಾಯರ್ ಆರೆನೊಟ್ಟಿಗೆ ಇಪ್ಪುನ ನೆಂಪುಲೆನ್ ತೆರಿಪಾಯೆರ್.
ಭಾರತೀಯ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಕಾರ್ಯಕಾರಿಣಿ ಸದಸ್ಯೆರ್ ಪಿ.ಬಿ ಹರೀಶ್ ರೈ ಕುಮಾರ ನಾಯರ್ ಬಗೆಟ್ ಸಂಸ್ಮರಣ ಪಾತೆರನ್ ಪಾತೆರಿಯೆರ್. ಸುಬ್ರಹ್ಮಣ್ಯಗ್ ಗಣನೀಯ ಕೊಡುಗೆ ಕೊರ್ನ ಅಕ್ಲೆನ ಪುದರ್ ನ್ ಸುಬ್ರಹ್ಮಣ್ಯದ ಒವೊಂಡಾಲ ಮಾರ್ಗಗ್ ನಾಮಕರಣ ಮಲ್ಪೆರೆ ಕೈತಲ್ ದ ಆಡಳಿತ ಮನಸ್ ಮಲ್ಪೊಡು ಪಂದ್ ಪಂಡೆರ್.
ಸ್ಮರಣ ಸಂಚಿಕೆ ಸಂಪಾದಕೆರ್ ದುರ್ಗಾಕುಮರ್ ನಾಯರ್ ಕೆರೆ ಸಂಚಿಕೆ ಬಗೆಟ್ ಪಾತೆರಿಯೆರ್. ಈ ಪೊರ್ತುಡು ಅನುಗ್ರಹ ಎಜುಕೇಶನ್ ಟ್ರಸ್ಟ್ ಅಧ್ಯಕ್ಷೆರ್ ಗಣೇಶ್ ಪ್ರಸಾದ್ ಎನ್, ಕುಮಾರಸ್ವಾಮಿ ವಿದ್ಯಾಲಯದ ಸಂಚಾಲಕೆರ್ ಚಂದ್ರಶೇಖರ ಎನ್.ಕೆ, ರಜತ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಶಿವರಾಮ ಏನಕೆಲ್, ಸಂಸ್ಥೆದ ಸಿ.ಎ ನರೇಂದ್ರ ಪೈ, ಶಾಲಾ ಮುಖ್ಯ ಶಿಕ್ಷಕೆರ್ ವಿದ್ಯಾರತ್ನ ಎಚ್, ಪದವಿ ಪೂರ್ವ ಕಾಲೇಜ್ ಪ್ರಾಂಶುಪಾಲೆರ್ ಡಾ. ಸಂಕೀರ್ತ್ ಹೆಬ್ಬಾರ್, ಶಿಕ್ಷಕ ರಕ್ಷಕ ಸಂಘದ ಅಧ್ಯಕ್ಷೆರ್ ಪ್ರಸಾದ್ ಮುನಿಯಂಗಳ, ಶಾಲಾ ಆಡಳಿತ ಮಂಡಳಿ ಸದಸ್ಯೆರಾಯಿನ ಡಾ. ಜಿತೇಶ್, ರವಿ ಕಕ್ಕೆಪದವು, ಶಿಕ್ಷಕೆರ್ ಉಮೇಶ್ ಶೆಟ್ಟಿ, ಹಿರಿಯ ವಿದ್ಯಾರ್ಥಿ ಸಂಘದ ಅಧ್ಯಕ್ಷೆರ್ ತೀರ್ಥೇಶ್ ಪಾರೆಪ್ಪಾಡಿ ಇತ್ತೆರ್. ಶಿವರಾಮ ಎನೆಕಲ್ಲು ಎದ್ಕೊನಿಯೆರ್. ಶರ್ಮದಾ ಸೊಲ್ಮೆ ಸಂದಾಯೆರ್. ಕಲ್ಪಾರ್ಥಿಲಾಯಿನ ಅದಿತಿ, ಮಹತಿ ಬೊಕ್ಕ ಬಿಂದು ಲೇಸ್ ದ ಸುಧಾರಿಕೆ ಮಲ್ತೆರ್. ನಿವೇದ್ಯ ಆರ್ ಸ್ಮರಣ ಸಂಚಿಕೆಡ್ ಇಪ್ಪುನ ಕುಮಾರ್ ನಾಯರ್ ಬಗೆತ ಗಣ್ಯೆರೆನ ಒಡನಾಟದ ಬರವುಲೆನ್ ತೆರಿಪಾಯೆರ್.
ವರದಿ:ಗೋಪಿಚಂದನ್ ಕೆ.ಎಸ್.
Editorial