ದುಬೈ: ನಾಲ್ ವರ್ಷದ ಪಿರವು ಬೇಲೆ ನಾಡೊಂದು ದುಬೈಗ್ ಪೋಯಿನ ಭಾರತೀಯ ಮೂಲದ ಅಜಯ್ ಒಗುಲಾ ಮೇರ್ ‘ಎಮಿರೇಟ್ಸ್ ಡ್ರಾ‘ ಲಾಟರಿಡ್ 33 ಕೋಟಿ ರೂ. ಗೆಂದ್ ದ್, ರಾತ್ರೋ ರಾತ್ರೆ ಕೋಟ್ಯಾಧಿಪತಿ ಆತೆರ್.
ಬಂಗಾರ್ ದ ಅಂಗಡಿ ಒಂಜೇತ ಗಾಡಿ ಡ್ರೈವರ್ ಆದ್, ಬೇಲೆ ಮಲ್ತೊಂದು ಇಪ್ಪುನ ಮೇರ್ 72000 ತಿಂಗೊಲ್ದ ಸಂಬಳ ದೆತೊನೊಂದು ಉಲ್ಲೆರ್. ಈ ಗೆಂದಿನ ಕಾಸ್ ರ್ದ್ ದತ್ತಿ ಸಂಸ್ಥೆ ಸ್ಥಾಪನೆ ಮಲ್ತ್ ದ್, ತನ್ನ ಗ್ರಾಮದ ಬೊಕ್ಕ ಕೈತಲ್ ದ ಗ್ರಾಮದ ಬಡಪತ್ತ್ ಇತ್ತಿನಕ್ಲೆಗ್ ಸಕಾಯ ಮಲ್ಪುವೆ ಪಂದ್ ಪಂಡೆರ್.
ಮಣಿಪಾಲ: ರೇಡಿಯೋ ಮಣಿಪಾಲ್ 90.4 mhz, ಡ್ ಕನ್ನಡ ಸಾಹಿತ್ಯ ಪರಿಷತ್ತ್ ಒಡಿಪು ಜಲ್ಲೆ ಬೊಕ್ಕ ಒಡಿಪು ತಾಲೂಕ್ ಘಟಕದ ಕಥೆ ಕೇಳೋಣ ಸರಣಿ ಲೇಸ್ ದ 34 ನೇ ಸಂಚಿಕೆ ಡಿ.24 ಶನಿಯಾರ ಬಯ್ಯಗ್ 4:30 ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಸಾಹಿತ್ಯಾಸಕ್ತೆರ್ ಬೊಕ್ಕ ಉಪನ್ಯಾಸಕೆರ್ ರಾಘವೇಂದ್ರ ಜಿ.ಜಿ ಒಡಿಪು ಪಾಲ್ ಪಡೆಯೆರೆ ಉಲ್ಲೆರ್. ನನ ಡಿ.25ಕ್ ಮಧ್ಯಾಹ್ನ 12: 30 ಕ್ ಮರುಪ್ರಸಾರ ಆಪುಂಡು.
ಮಾಸ್ಕೋದ ಸೈಬೀರಿಯಾದ ಕೆಮೆರೊವೊ ನಗರದ ನರ್ಸಿಂಗ್ ಹೋಮ್ ಡ್ ತೂ ಪೊತ್ತ್ ದ್ 20 ಜನ ತೀರ್ ಪೋಯೆರ್ ಪಂದ್ ರಷ್ಯಾದ ತುರ್ತು ಸಚಿವಾಲಯ ತೆರಿಪಾದ್ಂಡ್.
ರಡ್ಡ್ ಅಂತಸ್ತ್ ದ ಕಟ್ಟಡಡ್ ಬೊಲ್ಪುಗು ಈ ಘಟನೆ ನಡತ್ಂಡ್. ನೆಕ್ ಕಾರಣ ನನಲ ತೆರಿದ್ ಬೈದಿಜಿ. ಹೆಚ್ಚದ ಮಾಹಿತಿ ನನ ಗೊತ್ತಾವೊಡಾತೆ.
ಮಣಿಪಾಲ: ರೇಡಿಯೋ ಮಣಿಪಾಲ್ 90.4 mhz, ಡ್ ಪುರಾಣಾಮೃತ ಪೌರಾಣಿಕ ಪಾತ್ರ ಜೀವನ ಸೂತ್ರ ಸರಣಿ ಲೇಸ್ ದ 75 ನೇ ಸಂಚಿಕೆ ಡಿ.24 ಶನಿಯಾರ ಬಯ್ಯಗ್ 4:15 ಕ್ ಪ್ರಸಾರ ಆಂಡ್.
ಈ ಲೇಸ್ ನ್ ಉಪನ್ಯಾಸಕೆರಾಯಿನ ಮುಂಡಾಜೆ ಕುಮಾರೇಶ್ವರ ಭಟ್ ನಡಪಾದ್ ಕೊರಿಯೆರ್. ನನ ಡಿ.25ಕ್ ಮಧ್ಯಾಹ್ನ 12: 15 ಕ್ ಮರುಪ್ರಸಾರ ಆಪುಂಡು.
ಹಳೆ ಮೈಸೂರ್ ಭಾಗಡ್ ಪಕ್ಷ ಸಂಘಟನೆ ಮಲ್ಪೆರೆ ದುಂಬಾಯಿನ ಬಿಜೆಪಿ ಡಿ.30 ಕ್ ಮಂಡ್ಯಡ್ ಸಮಾವೇಶ ಆಯೋಜನೆ ಮಲ್ದ್ಂಡ್.
ಈ ಸಮಾವೇಶಗ್ ಗೃಹ ಸಚಿವೆರ್ ಅಮಿತ್ ಶಾ ಬರಿಯೆರೆ ಉಲ್ಲೆರ್. ಬೊಕ್ಕ ಮನ್ ಮುಲ್ ದ ಮೆಗಾ ಡೈರಿ ಉದಿಪನ ಮಲ್ಪೆರೆ ಇಪ್ಪುನ ಮೇರ್, ಪಕ್ಷದ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್. ಮಂಡ್ಯ ಜಿಲ್ಲೆದ 7 ಕ್ಷೇತ್ರಲೆಡ್ 5 ಕ್ಷೇತ್ರಡ್ ಬಿಜೆಪಿ ಗೆಂದಾವೊಡು ಪಂದ್ ಹೈಕಮಾಂಡ್ ರ್ದ್ ರಾಜ್ಯದ ನಾಯಕೆರೆಗ್ ಸೂಚನೆ ಬೈದ್ಂಡ್ ಪಂದ್ ತೆರಿದ್ ಬೈದ್ಂಡ್.
2021-22 ನೇ ಸಾಲ್ ದ ಸ್ಕಾಲರ್ ಶಿಪ್ ಗ್ ಅರ್ಜಿ ಸಂದಾದಿತ್ತಿನ ಕಟ್ವಾಣ ಬೇಲೆದಕ್ಲೆನ ಜೋಕುಲೆನ ಸ್ಕಾಲರ್ ಶಿಪ್ ಬುಡುಗಡೆ ಮಲ್ಪುವ ಪಂದ್ ಕಾರ್ಮಿಕ ಸಚಿವೆರ್ ಶಿವರಾಂ ಹೆಬ್ಬಾರ್ ತೆರಿಪಾದೆರ್.
ಈ ಸ್ಕಾಲರ್ ಶಿಪ್ ಗ್ ಸಂದಾದಿತ್ತಿನ 42000 ಜೋಕುಲೆಗ್ ತಾಂತ್ರಿಕ ಕಾರಣರ್ದ್ ನನಲ ಸ್ಕಾಲರ್ ಶಿಪ್ ತಿಕ್ಕಿಜಿ. ನೆತ್ತ ಪರಿಶೀಲನೆ ನಡತೊಂದು ಉಂಡು ಪಂದ್ ಪಂಡೆರ್.
ಉಳ್ಳಾಲ: ವಿದೇಶಿ ಕಲ್ಪಾರ್ಥಿಲು ಇತ್ತಿನ ಸ್ಕೂಟರ್ಗ್ ಗುದ್ದುದು ಕಾರ್ ಡ್ರೈವರ್ ಒರಿ ಬಲಿಪೆರೆ ತೂನಗ ಕೈತಲ್ ದಕುಲು ಉಂತಾದ್ ಪೊಲೀಸೆರೆಗ್ ಒಪ್ಪಾಯಿನ ಘಟನೆ ಕುಡ್ಲದ ತಲಪಾಡಿದ ದೇವಿನಗರಡ್ ನಡತ್ಂಡ್.
ಈ ಘಟನೆಡ್ ಸ್ಕೂಟರ್ ರೈಡರ್ ಸೆಟಿದ್ ಬಾಷಾಂಗ್ (30)ಗ್ ಮಸ್ತ್ ಪೆಟ್ಟಾತ್ಂಡ್. ಕುಡ್ಲದ ಇಂಡಿಯಾನ ಆಸ್ಪತ್ರೆಡ್ ದಾಖಲ್ ಆತೆರ್. ಮೆರೆನೊಟ್ಟಿಗೆ ಗಾಡಿಡ್ ಇತ್ತಿನ ಕುಡೊರಿ ಅಲಿ ಸಾಗರ್ (30) ಮೇರ್ ಆಸ್ವತ್ರೆಡ್ ಚಿಕಿತ್ಸೆ ಪಡೆದ್ ಪಿದಯಿ ಬೈದೆರ್. ಈ ಘಟನೆದ ಬಗೆಟ್ ಕೇರಳ ಮೂಲದ ಕಾರ್ ಬೊಕ್ಕ ಆಯಿನ ಡ್ರೈವರ್ ಅಹಮ್ಮದ್ ಮುಬಾರಿಷ್ ಎ.ಕೆ. ಪನ್ಪುನರೆನ್ ಕುಡ್ಲ ದಕ್ಷಿಣ ಸಂಚಾರಿ ಠಾಣೆ ಪೊಲೀಸೆರ್ ವಶಕ್ ಪಡೆತೆರ್.
ಬೆಂಗ್ಲೂರ್: ಕೊರೋನಾ ಸೋಂಕು ಹೆಚ್ಚ ಆಪುನ ಪೋಡಿಗೆ ಇಪ್ಪುರ್ನೇದಾವೆರ ಬಿಎಂಟಿಸಿ ಬಸ್ ಬೊಕ್ಕ ಮೆಟ್ರೋ ರೈಲ್ ಲೆನ್ ಪ್ರಯಾಣ ಮಲ್ಪುನ ಪ್ರಯಾಣಿಕೆರೆಗ್ ಇನಿರ್ದ್ ಬೊಕ್ಕ ಮಾಸ್ಕ್ ಪಡುನೆನ್ ಕಡ್ಡಾಯ ಮಲ್ಪೊಡು ಪಂದ್ ಬಿಎಂಟಿಸಿ ಎಂಡಿ ಕೆಎಸ್ ಸತ್ಯವತಿ ಸುತ್ತೋಲೆಡ್ ತೆರಿಪಾದೆರ್.
ಬಿಎಂಟಿಸಿ ಬಸ್ ಲೆನ್ ದಿನಲ ಲಕ್ಷಾಂತರ ಜನ ಪ್ರಯಾಣ ಮಲ್ಪುವೆರ್. ಮೊಕ್ಲೆನ ಸುರಕ್ಷತೆದ ದಿಟ್ಟಿರ್ದ್ ಬಿಎಂಟಿಸಿ ಈ ತೀರ್ಮಾನ ದೆತೊಂದುಂಡು.
Masks compulsory in Metro, BMTC buses
Bangalore: With increasing trends in the number of Corona cases; wearing of masks has been made compulsory for persons traveling in Metro trains and BMTC buses said BMTC MD K. S Satyavati.
The decision was taken for the safety of lakhs of passengers making use of these services.
ಡೆಲ್ಲಿ: ಇಟ್ಟಿಗೆ ಕಾರ್ಖಾನೆಡ್ ಪುಡಾದ್ 7 ಜನ ಬೇಲೆದಕುಲು ತೀರ್ ಪೋಯಿನ ಘಟನೆ ಶುಕ್ರಾರ ಬಯ್ಯಗ್ ಬಿಹಾರದ ರಾಮಗಢ್ವಾ ಪೊಲೀಸ್ ಠಾಣೆ ವ್ಯಾಪ್ತಿಡ್ ನಡತ್ಂಡ್.
ಈ ಘಟನೆದ ಪೊರ್ತುಡು ಸುಮಾರ್ 24 ಜನ ಕಾರ್ಮಿಕೆರ್ ಬೇಲೆ ಮಲ್ತೊಂದು ಇತ್ತೆರ್ ಪಂದ್ ತೆರಿದ್ ಬೈದ್ಂಡ್. ನೆಟ್ ಸುಮಾರ್ ಜನಕ್ ಪೆಟ್ಟಾತ್ಂಡ್. ಮೊಕ್ಲೆನ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಈ ಘಟನೆದ ಬಗೆಟ್ ಪ್ರಧಾನಿ ನರೇಂದ್ರ ಮೋದಿ, ಪ್ರಧಾನಮಂತ್ರಿ ರಾಷ್ಟ್ರೀಯ ಪರಿಹಾರ ನಿಧಿರ್ದ್ ತೀರ್ ಪೋಯಿನಕ್ಲೆನ ಕುಟುಂಬಗ್ 2 ಲಕ್ಷ ರೂ. ಬೊಕ್ಕ ಪೆಟ್ಟಾಯಿನಕ್ಲೆಗ್ 50 ಸಾರ ರೂ. ಪರಿಹಾರ ಘೋಷಣೆ ಮಲ್ದೆರ್.
ಕಾನ್ಪುರ್: ಉತ್ತರ ಪ್ರದೇಶದ ಕಾನ್ಪುರಡ್ ಕಲ್ವೆರ್ 4 ಅಡಿ ಅಗೆಲ ಬೊಕ್ಕ 10 ಅಡಿ ಉದ್ದದ ಮಾಟೆ (ಸುರಂಗ) ಕೊರೆದ್ ಬ್ಯಾಂಕ್ಡ್ ಇತ್ತಿನ 1 ಕೋಟಿ ರೂ. ಬಿಲೆತ ಬಂಗಾರ್ ಪತೊಂದು ಬಲಿತಿನ ಘಟನೆ ಕಾನ್ಪುರ ಎಸ್ಬಿಐ ಬಾನುತಿ ಶಾಖೆಡ್ ನಡತ್ಂಡ್.
ಕಲ್ವೆರ್ ಸುರಂಗ ಕೊರೆದ್ ಬ್ಯಾಂಕ್ದ ಸ್ಟ್ರಾಂಗ್ ರೂಮ್ ಗ್ ಬತ್ ದ್, ಬಂಗಾರ್ ದೀದಿತ್ತಿನ ಲಾಕರ್ ಪುಡಾತ್ ದ್, 1 ಕೋಟಿ ರೂ. ಬಿಲೆತ 1.8 ಕೆಜಿ ಬಂಗಾರ್ ಕಂಡ್ ದೆರ್. ಆಂಡ ಕಾಸ್ ದ ಲಾಕರ್ ಪುಡಾಪೆರೆ ಅಕ್ಲೆಗ್ ಆತಿಜಿ. ಆಯಿಟ್ 32 ಲಕ್ಷ ರೂ. ನಗದು ಇತ್ಂಡ್ ಪಂದ್ ಪೊಲೀಸೆರ್ ತೆರಿಪಾದೆರ್.
