December 2, 2022

ಕೆಬಿತ್ತ ಉದ್ದ ಕೂಜಲ್ ಡ್ ಗಿನ್ನಿಸ್ ದಾಖಲೆ ಮಲ್ತಿನ ನಿವೃತ್ತ ಶಿಕ್ಷಕೆರ್

ತಮಿಳುನಾಡ್: ಪ್ರಾಯ ಆಯಿಲೆಕ್ಕನೇ ಆನ್ ಜೋವ್ ನಕ್ಲೆಡ ಕೆಬಿತ ಮಿತ್ತ್ ಕೂಜಲ್ ಬುಲೆಪುಂಡು. ಮುಲ್ಪಯೊರಿ ಮಸ್ತ್ ಉದ್ದದ ಕೆಬಿತ ಕೂಜಲ್ ಇಪ್ಪುನ ಮುಖೇನ ಗಿನ್ನಿಸ್ ವರ್ಲ್ಡ್ ರೆಕಾರ್ಡ್ ಪಟ್ಟಿ ಸೇರ್ದೆರ್.

ಆಂಟನಿ ವಿಕ್ಟರ್ ಪನ್ಪುನ ಶಾಲೆದ ನಿವೃತ್ತ ಮುಖ್ಯ ಶಿಕ್ಷಕೆರೆಗ್ ಸುಮಾರ್ 18.1 ಸೆ.ಮೀ. (7.12 ಇಂಚಿ) ಉದ್ದದ ಕೆಬಿತ ಕೂಜಲ್ ಉಂಡು. ಈ ಮುಖೇನ 2007 ರ್ದ್ ವಿಶ್ವದ ಮಸ್ತ್ ಉದ್ದದ ಕೆಬಿತ ಕೂಜಲ್ ಇಪ್ಪುನ ವ್ಯಕ್ತಿ ಪನ್ಪುನ ವಿಶ್ವ ದಾಖಲೆ ಪಟ್ಟಿಡ್ ಉಲ್ಲೆರ್ ಪಂದ್ ವರದಿ ತೆರಿಪಾದ್ಂಡ್.

ಕಟೀಲ್ ಡ್ “ಭ್ರಮರ-ಇಂಚರ” ನುಡಿಪರ್ಬ ಉದಿಪನ

ಕಟೀಲ್: ಕಟೀಲ್ ಶ್ರೀ ದುರ್ಗಾ ಪರಮೇಶ್ವರಿ ದೇವಲ್ಯದ ಸಮೂಹ ಶಿಕ್ಷಣ ಸಂಸ್ಥೆಲೆನ ಮುತಾಲಿಕೆಡ್ “ಭ್ರಮರ-ಇಂಚರ” ನುಡಿಪರ್ಬ ಸುಕ್ರಾರ ಕಾಂಡೆ ಉದಿಪನ ನಡತ್ಂಡ್.

ಈ ಲೇಸ್ ದ ಉದಿಪನನ್ ಮುಲ್ಕಿ-ಬೆದ್ರ ಕ್ಷೇತ್ರದ ಶಾಸಕೆರ್ ಉಮಾನಾಥ್ ಕೋಟ್ಯಾನ್ ಮಲ್ತ್ ದ್, ಎಡ್ಡೆಪ್ಪು ಬಯಕಿಯೆರ್.

✍️ಜಗದೀಶ್ ಪೂಜಾರಿ
ಬೆದ್ರ

ಮುಲ್ಕಿ:ಹಿಮಾಯತುಲ್ ಇಸ್ಲಾಂ ದಫ್ ಸಮಿತಿದ ಪೊಸ ಅಧ್ಯಕ್ಷೆರಾದ್ ಪುತ್ತು ಬಾವ ಆಯ್ಕೆ

ಮುಲ್ಕಿ: ಹಿಮಾಯತುಲ್ ಇಸ್ಲಾಂ ದಫ್ ಸಮಿತಿದ 2022-23 ನೇ ಸಾಲ್ ದ ಪೊಸ ಅಧ್ಯಕ್ಷೆರಾದ್ ಮುಲ್ಕಿ ನಗರಸಭೆ ಸದಸ್ಯೆರ್ ಜನಾಬ್ ಪುತ್ತು ಬಾವ ಕಾರ್ನಾಡ್ (ಹಸನಬ್ಬ) ಅವಿರರೋಧವಾದ್ ಆಯ್ಕೆ ಆಯೆರ್.

ಹಿಮಾಯತುಲ್ ಇಸ್ಲಾಂ ದಫ್ ಸಮಿತಿದ ಸಭೆ ಮುಲ್ಕಿ ಕೇಂದ್ರದ ಕಟ್ವಾಣಡ್ ಶಾಫಿ ಜುಮ್ಮಾ ಪಲ್ಲಿದ ಅಧ್ಯಕ್ಷೆರ್ ಲಿಯಾಕತ್ ಅಲಿ ಮೆರೆನ ಮುತಾಲಿಕೆಡ್ ನಡತ್ಂಡ್. ಪುತ್ತು ಬಾವ ಮುಲ್ಕಿ ನಗರ ಪಂಚಾಯತಿದ ಸದಸ್ಯೆರ್ ಬೊಕ್ಕ ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿದ ಸದಸ್ಯೆರಾದ್ ಬೊಕ್ಕ ಮುಲ್ಕಿ ಕೇಂದ್ರ ಶಾಫಿ ಜುಮ್ಮಾ ಪಲ್ಲಿದ ಆಡಳಿತ ಮಂಡಳಿದ ಸದಸ್ಯೆರಾದ್ ಸೇವೆ ಸಂದಾವೊಂದು ಉಲ್ಲೆರ್.
2023ತ ವಾರ್ಷಿಕ ದಫ್ ರಾತೀಬ್ ಲೇಸ್ ಬರ್ಪಿನ ಫೆಬ್ರವರಿ 7ರ್ದ್ 11 ಮುಟ್ಟ ಕಾರ್ನಾಡ್ ಝಿಂದಾ ಮದರಸ ವಠಾರಡ್ ನಡಪರೆ ಉಂಡು ಪಂದ್ ಪ್ರಧಾನ ಕಾರ್ಯದರ್ಶಿ ಎಂ.ಕೆ ಹುಸೈನ್ ಮಾಧ್ಯಮ ಪ್ರಕಟಣೆಡ್ ತೆರಿಪಾದೆರ್.

ಸುರತ್ಕಲ್ ಟೋಲ್ ದ ಸುಂಕೊನು ಪೆಜಮಾಡಿಡ್ ದೆತೊನರೆ ಬಲ್ಲಿ ಪಂದ್ ಕೇಂದ್ರ ಸಚಿವೆರ್ ನಿತಿನ್ ಗಡ್ಕರಿ ಮೆರೆಗ್ ಒಡಿಪು ಶಾಸಕೆರ್ ರಘುಪತಿ ಭಟ್ ಬಿನ್ನಾಪು

ಸುರತ್ಕಲ್ ಟೋಲ್ ದೆತ್ ದ್, ಆಯಿತ ರೇಟ್ ನ್ ಪೆಜಮಾಡಿ ಟೋಲ್ ದೊಟ್ಟಿಗೆ ಸೇರ್ಸಾಯಿನವು ಅವೈಜ್ಞಾನಿಕ ಆತ್ಂಡ್. ನೇರ್ದಾವೆರ ಆಪುನ ಪರಿಣಾಮದ ಬಗೆಟ್ ಡಿ.1 ಕ್ ಶಾಸಕೆರ್ ರಘುಪತಿ ಭಟ್ ಮೇರ್ ಡೆಲ್ಲಿಡ್ ಕೇಂದ್ರ ರಸ್ತೆ ಸಾರಿಗೆ ಬೊಕ್ಕ ಹೆದ್ದಾರಿ ಸಚಿವೆರಾಯಿನ ನಿತಿನ್ ಗಡ್ಕರಿ ಮೆರೆಗ್ ಬಿನ್ನಾಪು ಸಂದಾದ್, ಸಮಸ್ಯೆಲೆನ ಬಗೆಟ್ ಪರಿಹಾರ ಮಲ್ಪೊಡು ಪಂದ್ ಕೇನೊಂಡೆರ್.

ಬಿನ್ನಾಪು ಸ್ವೀಕಾರ ಮಲ್ತಿನ ಕೇಂದ್ರ ರಸ್ತೆ ಸಾರಿಗೆ ಬೊಕ್ಕ ಹೆದ್ದಾರಿಲೆನ ಸಚಿವೆರಾಯಿನ ನಿತಿನ್ ಗಡ್ಕರಿ ಮೇರ್ ಈ ವಿಷಯದ ಬಗೆಟ್ ರಾಷ್ಟ್ರೀಯ ಹೆದ್ದಾರಿ ಅಭಿವೃದ್ಧಿ ಪ್ರಾಧಿಕಾರದ ಅಧಿಕಾರಿಲೆನೊಟ್ಟಿಗೆ ಡಿ. 5 ಕ್ ಸಭೆ ನಡಪಾವ ಪಂದ್ ತೆರಿಪಾಯೆರ್. ಒಡಿಪು- ಚಿಕ್ಕಮಗಳೂರು ಸಂಸದೆರ್, ಕೇಂದ್ರ ಕೃಷಿ ಬೊಕ್ಕ ರೈತರೆನ ಕಲ್ಯಾಣ ರಾಜ್ಯ ಸಚಿವೆರ್ ಶೋಭಾ ಕರಂದ್ಲಾಜೆ ಮೇರ್ ಗುಜರಾತ್ ಚುನಾವಣೆಡ್ ಇಪ್ಪುನೆರ್ದಾವೆರ ಆಯಿತ ಸೂಚನೆದಂಚನೆ ಡಿ. 30 ಕ್ ಶೋಭಾ ಕರಂದ್ಲಾಜೆ ಮೆರೆನ ಡೆಲ್ಲಿ ಕಚೇರಿ ಅಧಿಕಾರಿಲು ಬೊಕ್ಕ ಆಪ್ತ ಕಾರ್ಯದರ್ಶಿನೊಟ್ಟಿಗೆ ಈ ವಿಷಯದ ಬಗೆಟ್ ದುಂಬುದ ಕ್ರಮತ ಬಗ್ಗೆ ಚರ್ಚೆ ಮಲ್ತ್ ದ್, ಸುರುಕಾದ್, ಕೇಂದ್ರ ಸಚಿವೆರಾಯಿನ ನಿತಿನ್ ಗಡ್ಕರಿ ಮೆರೆನ ಕಚೇರಿ ಅಧಿಕಾರಿಲೆನ್ ಭೇಟಿ ಮಲ್ತ್ ದ್ ವಿಷಯ ಪ್ರಸ್ತಾಪ ಮಲ್ತ್ ದ್, ಅಕ್ಲೆಗ್ ಮನವರಿಕೆ ಮಲ್ಪರೆ ಆಂಡ್. ಬೊಕ್ಕ ರಾಷ್ಟ್ರೀಯ ಹೆದ್ದಾರಿ ಅಭಿವೃದ್ಧಿ ಪ್ರಾಧಿಕಾರದ ಅಧಿಕಾರಿಲೆನ್ ಭೇಟಿಯಾದ್ ಸುರತ್ಕಲ್ ಟೋಲ್ ರೇಟ್ ನ್ ಪೆಜಮಾಡಿ ಟೋಲ್ ದೊಟ್ಟಿಗೆ ವಿಲೀನ ಮಲ್ಪುನೇರ್ದಾವೆರ ಕೈತಲ್ ದಕ್ಲೆರ್ದ್ ಅಪುನ ಸಮಸ್ಯೆಲೆನ ಬಗೆಟ್ ಮನವರಿಕೆ ಮಲ್ತ್ ದ್, ಈ ಬಗ್ಗೆ ಸೂಕ್ತ ಕ್ರಮ ದೆತೊನೊನ ಬಗ್ಗೆ ಚರ್ಚೆ ಮಲ್ಪೆರೆ ಆಂಡ್. ಸುರತ್ಕಲ್ ಟೋಲ್ ನ್ ದೆತ್ ದ್, ಆಯಿತ ರೇಟ್ ನ್ ಪೆಜಮಾಡಿ ಟೋಲ್ ದೊಟ್ಟಿಗೆ ಸೇರ್ಸಾಂಡ 2 ಟೋಲ್ ರೇಟ್ ನ್ ಒಂಜೇ ಟೋಲ್ ದ ಮಿತ್ತ್ ಪಾಡುಂಡ ಒಡಿಪು ಜಿಲ್ಲೆದ ಗಾಡಿ ಸವಾರೆರ್ ಹೆಚ್ಚ ರೇಟ್ ಕೊರೊಡಾಪುಂಡು. ಒಡಿಪುರ್ದ್ ಕುಡ್ಲ ವಿಮಾನ ನಿಲ್ದಾಣಗ್ ಪ್ರಯಾಣ ಮಲ್ಪುನ ಟ್ಯಾಕ್ಸಿ ಅತ್ತಂಡ ಗಾಡಿಲು ಮುಲ್ಕಿರ್ದ್ ಕಿನ್ನಿಗೋಳಿ ಮುಖೇನ ಪೋಪುನೆರ್ದಾವೆರ ಸುರತ್ಕಲ್ ಟೋಲ್ ರೇಟ್ ಕೊರ್ಪುನ ಅವಶ್ಯಕತೆ ಇಜ್ಜಂಡ್, ಆಂಡ ಇತ್ತೆ ಸುರತ್ಕಲ್ ಟೋಲ್ ರೇಟ್ ಪೆಜಮಾಡಿ ಟೋಲ್ ದೊಟ್ಟಿಗೆ ವಿಲೀನರ್ದ್ ಮೂಲ್ಕಿರ್ದ್ ಕಿನ್ನಿಗೋಳಿ ಮುಖೇನ ವಿಮಾನ ನಿಲ್ದಾಣಗ್ ಪ್ರಯಾಣ ಮಲ್ಪುನ ಟ್ಯಾಕ್ಸಿ ಸೇರ್ದ್ ಬೇತೆ ಗಾಡಿ ಸವಾರೆರ್ ಪೆಜಮಾಡಿ ಟೋಲ್ ಡ್ ಹೆಚ್ಚದ ರೇಟ್ ಕೊರೊಡಾಪುಂಡು. ಅತ್ತಂದೆ ಸುರತ್ಕಲ್ ಟೋಲ್ ಡ್ ಕೈತಲ್ ದ ವಾಣಿಜ್ಯ ಉದ್ದೇಶಗ್ ಗಲಸುನ ಗಾಡಿಲೆಗ್ ಶೇ 50 ದಾತ್ ರಿಯಾಯಿತಿ ಇತ್ಂಡ್. ನೆನ್ ಈ ಈ ಟೋಲ್ ಡ್ ವಿಲೀನ ಮಲ್ಪುನಗ ಆಯಿನ ತೂವಂದೆ ಇಪ್ಪುನ ಬಗೆಟ್ ಬಿನ್ನಾಪುನ್ ತೆರಿಪಾಯೆರ್. ನಿತಿನ್ ಗಡ್ಕರಿ ಮೇರ್ ಡಿ. 5 ಕ್ ರಾಷ್ಟ್ರೀಯ ಹೆದ್ದಾರಿ ಅಭಿವೃದ್ಧಿ ಪ್ರಾಧಿಕಾರದ ಹಿರಿಯ ಅಧಿಕಾರಿಲೆನೊಟ್ಟಿಗೆ ನಡಪಾವುನ ಸಭೆಟ್ ಸೂಕ್ತ ನಿರ್ಧಾರ ದೆತೊನುನ ಮುಟ್ಟ ಟೋಲ್ ರೇಟ್ ಹೆಚ್ಚ ಮಲ್ಪಂದಿಲೆಕ್ಕ ಶಾಸಕೆರ್ ರಘುಪತಿ ಭಟ್ ಮೇರ್ ಜಿಲ್ಲಾಡಳಿತಡ ಬೆಚ್ಚ ಆಯೆರ್. ಕೇಂದ್ರ ಕೃಷಿ ಬೊಕ್ಕ ರೈತರೆನ ಕಲ್ಯಾಣ ರಾಜ್ಯ ಸಚಿವೆರ್ ಆಪ್ತ ಕಾರ್ಯದರ್ಶಿ ಸಾಕತ್ ಸಿಂಗ್ ರಾಣಾವತ್ (IFS), ಹೆಚ್ಚುವರಿ ಆಪ್ತ ಕಾರ್ಯದರ್ಶಿ ಮಂಜುನಾಥ್ ಗೌಡ ಬೊಕ್ಕ ಒಡಿಪು ಪೇಂಟೆದ ಬಿಜೆಪಿ ಅಧ್ಯಕ್ಷೆರಾಯಿನ ಮಹೇಶ್ ಠಾಕೂರ್ ಇತ್ತೆರ್.

ದೈಹಿಕ ಶಿಕ್ಷಣ ಶಿಕ್ಷಕ ವೃತ್ತಿಗ್ ನಿವೃತ್ತರಾಯಿನ ತೀರ್ಥರಾಮ ಸಾರ್

ದೈಹಿಕ ಶಿಕ್ಷಣ ಶಿಕ್ಷಕೆರಾದ್ ಕರಿನ 23 ವರ್ಷಲೆರ್ದ್ ಸರಕಾರಿ ಉನ್ನತೀಕರಿಸಿನ ಪ್ರಾಥಮಿಕ ಶಾಲೆ ಜಯನಗರಡ್ ಸೇವೆ ಸಂದಾದ್, ಮಾಸ್ತ್ ಜೋಕುಲೆನ ಏಳಿಗೆಗಾದ್ ಬೆಂದೊಂದು ಇತ್ತಿನ, ಸುಳ್ಯ ತಾಲೂಕ್ ದ ಜಯನಗರ ಪರಿಸರದ ಜನಕುಲೆನ ಪೆರ್ಮೆದ ಶಿಕ್ಷಕೆರ್ ಅಡ್ಕ ಬಳೆ ತೀರ್ಥರಾಮ ಸಾರ್ ಮೇರ್ ನ.30 ಕ್ ತನ್ನ ಸೇವೆ ಮುಗಿತ್ಂದ್ ಸೇವಾ ನಿವೃತ್ತಿ ಆಯೆರ್.

ಮೆರೆನ್ ಸುಳ್ಯ ತಾಲೂಕ್ ದ ಜಯನಗರ ಶಾಲಾ ವತಿರ್ದ್ ಮಾನಾದಿ ಮಲ್ತ್ ದ್, ಬುರ್ದು ಕೊರಿಯೆರ್. ಈ ಪೊರ್ತುಡು ತಾಲೂಕ್ ಶಿಕ್ಷಣಾಧಿಕಾರಿ ಮಹದೇವಪ್ಪ, ಶಾಲಾ ಮುಖ್ಯ ಶಿಕ್ಷಕಿ ವೀಣಾ, ಸಹ ಶಿಕ್ಷಕಿರಾಯಿನ ಎಸ್.ಕೆ ಮಮತ, ಭಾರತಿ, ನಳಿನಾಕ್ಷಿ, ಅಶ್ವಿನಿ, ಅಂಗನವಾಡಿ ಶಿಕ್ಷಕಿ ತಿರುಮಲೇಶ್ವರಿ, ಆರೋಗ್ಯ ಸಹಾಯಕಿ ಲೀಲಾವತಿ ಬೊಕ್ಕ ಶಾಲೆದ ಜೋಕುಲು ಪಾಲ್ ಪಡೆದ್, ನಿವೃತ ಜೀವನಗ್ ಎಡ್ಡೆಪ್ಪು ಬಯಕಿಯೆರ್.