ಬೆದ್ರ: ಇನಿ ಬೆದ್ರ (ಸೇವಕ )ಶಾಸಕೆರೆನ ಕಚೇರಿಡ್ ಜನ ಸಂಪರ್ಕ ಸಭೆ ನಡತ್ಂಡ್.
ಈ ಪೊರ್ತುಡು ಮುಲ್ಕಿ ಬೆದ್ರ ಕ್ಷೇತ್ರದ ಶಾಸಕೆರಾಯಿನ ಉಮಾನಾಥ್ ಕೋಟ್ಯಾನ್ ಮೇರ್ ಸಾರ್ವಜನಿಕೆರೆನ ಕುಂದು ಕೊರತೆನ್ ಬೊಕ್ಕ ಕೇನ್ದ್ ಜಾಗೆಡೇ ಆಯಿನಾತ್ ಬೇಗ ಅಯಿಕ್ಕ್ ಪರಿಹಾರ ಮಲ್ತ್ ದ್ ಕೊರೊಡು ಪಂದ್ ಅಧಿಕಾರಿಲೆಗ್ ಆದೇಶ ಮಲ್ತೆರ್. ಲೇಸ್ ಡ್ ಅಧಿಕಾರಿಲು ಇತ್ತೆರ್.
✍️ಜಗದೀಶ್ ಪೂಜಾರಿ
ಬೆದ್ರ
ಸುರತ್ಕಲ್: ಸುರತ್ಕಲ್ ಪೇಂಟೆರ್ದ್ ಪಿದಯಿ ಚೊಕ್ಕಬೆಟ್ಟು ಪನ್ಪುನಲ್ಪ ಇಲ್ಲದ ಎದುರು ಉಂತುದು ಇತ್ತಿನ ಬಾಲೆನ್ ಗುರ್ತ ಇಜ್ಜಂದಿನ ವ್ಯಕ್ತಿಯೊರಿ ಕಂಡೆರೆ ತೂಯಿನ ಘಟನೆ ಡಿ.5 ರಾತ್ರೆ ನಡತ್ಂಡ್.
ಈ ದೃಶ್ಯದ ವೀಡಿಯೋ ಸಿಸಿ ಕ್ಯಾಮರಾಡ್ ದಾಖಲ್ ಆತ್ಂಡ್. ಈ ಬಗೆಟ್ ಜಾಗೆಗ್ ಸುರತ್ಕಲ್ ಪೊಲೀಸೆರ್ ಭೇಟಿ ಕೊರ್ದು ಪರಿಶೀಲನೆ ನಡಪಾದೆರ್.
ಮೂಲ್ಕಿ: ಒಳಲಂಕೆ ಶ್ರೀ ವೆಂಕಟರಮಣ ದೇವಲ್ಯಡ್ ಪ್ರತಿಷ್ಠಾ ಪುಣ್ಣಮೆ ಉಚ್ಚಯ ಡಿ.8 ತಾರೀಕ್ ಗುರುವಾರ ಶ್ರೀ ಕಾಶೀ ಮಠಾಧೀಶೆರ್ ಶ್ರೀಮದ್ ಸಂಯಮೀಂದ್ರತೀರ್ಥ ಸ್ವಾಮೀಜಿ ಮೆರೆನ ಉಪಸ್ಥಿತಿಟ್ಟ್ ನಡಪರೆ ಉಂಡು.
ಡಿ.7 ಕ್ಕ್ ಬರ್ಪಿನ ಸ್ವಾಮೀಜಿ ಡಿ. 9 ಮುಟ್ಟ ಕ್ಷೇತ್ರಡ್ ವಾಸ ಉಪ್ಪುವೆರ್. ಡಿ.8 ಗ್ ಕಾಂಡೆ ಮೂಲ್ಕಿ ಪೇಂಟೆದ ಭಕ್ತೆರೆರ್ದ್ ನಗರ ಕಾಣಿಕೆ ಸಮರ್ಪಣೆ ಆಯಿಬೊಕ್ಕ ಪ್ರಾರ್ಥನೆದೊಟ್ಟುಗು ಸ್ವಾಮೀಜಿಡ್ದ್ ಬೇತೆ ಬೇತೆ ರೀತಿದ ದ್ರವ್ಯ ಅಂಚನೆ ಸೀಯಾಳ ಅಭಿಷೇಕ ನಡಪರೆ ಉಂಡು.
ಬಯ್ಯಗ್ ಗಂಗಾ ಭಾಗೀರಥಿ ಅಭಿಷೇಕ ಬೊಕ್ಕ ಕನಕಾಭಿಷೇಕ, ಮಹಾ ನೈವೇದ್ಯ ನಡತ್ ದ್ ಬಯ್ಯ 7 ಗಂಟೆಗ್ ಮಹಾ ಭೂರಿ ಸಮಾರಾಧನೆ, ರಾತ್ರೆ 11.30 ಗ್ ಮಹಾ ರಥೋಚ್ಚಯ, ಚಂದ್ರ ಮಂಡಲೋಚ್ಚಯ ಅಂಚನೆ ದೇವ ದರ್ಶನಡ್ ಆಭಯ ಪ್ರಸಾದ ಕೊರ್ಪಿನ ಲೇಸ್ ನಡಪರೆ ಉಂಡು. ಅಂಚೆನೆ ಡಿ.9 – 11 ಮುಟ್ಟ ದೇವದರ್ಶನ ಸೇವೆ ಇಪ್ಪುಜಿ ಪಂದ್ ಪ್ರಕಟನೆ ತೆರಿಪಾದ್ಂಡ್.
ಬೊಲ್ತೇರ್: ಕರ್ನಾಟಕ ಸರ್ಕಾರ ಕೊರ್ಪುನಂಚಿನ 2022 ನೇ ಇಸ್ವಿದ ಕ್ರೀಡಾ ರತ್ನ ಪ್ರಶಸ್ತಿಗ್ ಬೊಲ್ತೇರ್ ತಾಲೂಕ್ದ ಮರೋಡಿ ಗ್ರಾಮದ ಶ್ರೀಧರ್ ಕುಲಾಲ್ ಆಯ್ಕೆಯಾತೆರ್.
ಕಂಬುಲ ಕ್ಷೇತ್ರಡ್ ಮಲ್ಲ ಸಾಧನೆ ಮಲ್ತ್ದಿತ್ತ್ದ್ ಎಡ್ಡೆ ರೀತಿದ ಕ್ರೀಡಾಪಟುವಾದ್ ಮಿಂಚಿದೆರ್. ಮೆರೆನ ಸಾಧನೆನ್ ಗುರ್ತಿಸಾದ್ ರಾಜ್ಯ ಸರ್ಕಾರ ಕ್ರೀಡಾ ರತ್ನ ಪ್ರಶಸ್ತಿಗ್ ಆಯ್ಕೆ ಮಲ್ತ್ದ್ಂಡ್.
ಚಿಕ್ಕಮಗಳೂರು: ಕಾಫಿನಾಡ್ಡ್ ದತ್ತ ಜಯಂತಿ ಉಚ್ಚಯಗ್ ಅಡ್ಡಿ ಮಲ್ಪರೆ ಬೋಡಾದ್ ಮಾರ್ಗಡ್ ಆಣಿಲೆನ್ ದಕ್ ದೆರ್.
ಇನಿರ್ದ್ ದತ್ತ ಜಯಂತಿಗ್ ಚಾಲನೆ ಕೊರ್ತಿನ ನಿಲೆಟ್ಟ್ ಸುರುತ್ತ ದಿನ ಆಯಿನ ಇನಿ ಶ್ರೀ ಅನುಸೂಯ ಜಯಂತಿ ನಡತೊಂದು ಇತ್ತ್ಂಡ್. ಈ ಬಗೆಟ್ಟ್ ದತ್ತಪೀಠಗ್ ಪೋದು ಅನುಸೂಯ ದೇವಿನ ದರ್ಶನನ್ ಪೊಂಜೋವುಲು ಪಡೆಯರೆ ತಯಾರ್ ಆದಿತ್ತೆರ್. ಈ ಪೊರ್ತುಡು ಚಿಕ್ಕಮಗಳೂರು ತಾಲೂಕ್ದ ದತ್ತಪೀಠ ಮಾರ್ಗಡು ಇಪ್ಪುನ ಕೈಮಾರ ಚೆಕ್ ಪೋಸ್ಟ್ರ್ದ್ ದತ್ತಪೀಠದ ಮಾರ್ಗದ ಉದ್ದಗ್ಲ ಬಚ್ಚಾಲಿಲು ಆಣಿನ್ ದಕ್ಚದ್ ದತ್ತ ಪೂಜೆ ಅಡ್ಡಿ ಮಲ್ಪರೆ ಯೋಜನೆ ಪಾಡ್ದಿತ್ತೆರ್.
ಸುಳ್ಯ ತಾಲೂಕು ಕಲ್ಮಡ್ಕ ಮಾನಸ ನಿಲಯ ಮಾಳಪ್ಪಮಕ್ಕಿ ಇಲ್ಲಲ್ ಶ್ರೀ ಕೊರಗ ತನಿಯಜ್ಜ ದೈವದ ನೇಮೋಚ್ಚಯ ಡಿ.10 ಶನಿಯಾರ ರಾತ್ರೆ 8 ಗಂಟೆಗ್ ನಡಪರೆ ಉಂಡು.
ಈ ಲೇಸ್ ಗ್ ಮಾತ ಭಕ್ತೆರ್ ಬತ್ ದ್ ಶ್ರೀ ದೈವದ ಕರಿಗಂಧ ಪ್ರಸಾದ ದೆತೊಂದು ದೈವದ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಇಟಲಿ ಪ್ರವಾಸಡ್ ಇಪ್ಪುನ ಕೇಂದ್ರ ಕೃಷಿ ಬೊಕ್ಕ ರೈತೆರೆನ ಕಲ್ಯಾಣ ರಾಜ್ಯ ಸಚಿವೆರ್, ಶೋಭಾ ಕರಂದ್ಲಾಜೆ ಮೇರ್ ಕೋಡೆ ಇಟಲಿದ ಕೃಷಿ ಸಚಿವೆರಾಯಿನ ಶ್ರೀ ಪ್ರಾನ್ಸಿಸ್ಕೋ ಲೊಲ್ಲೋಬ್ರಿಗಿದಾ ಮೆರೆನ್ ಇಟಲಿದ ರೋಮ್ ನಗರಡ್ ಭೇಟಿಯಾದ್ ಚರ್ಚೆ ಮಲ್ತೆರ್.
ರಡ್ಡ್ ದೇಶಲೆನ ನಡುಟ್ ಕೃಷಿ ರಪ್ತು, ಕೃಷಿ ಕ್ಷೇತ್ರದ ಅಭಿವೃದ್ಧಿಗಾದ್ ತಂತ್ರಜ್ಞಾನಲೆನ ವರ್ಗಾವಣೆ ಬೊಕ್ಕ ಬೇತೆ ಬೇತೆ ಕೆಲವು ರಾಜತಾಂತ್ರಿಕ ವಿಚಾರದ ಬಗೆಟ್ ಚರ್ಚೆ ಮಲ್ತೆರ್.
ಕಾರ್ಲ: ತೋಟಡ್ ಬೇಲೆ ಮಲ್ತೊಂದು ಇತ್ತಿನ ಪೊರ್ತುಡು ಬಾಲೆವೊಂಜಿ ಅಂಬಿದ ಗುಂಡಿಗ್ ಬೂರ್ದು ತೀರ್ ಪೋಯಿನ ಘಟನೆ ಹೆಬ್ರಿ ತಾಲೂಕ್ ದ ಮುದ್ರಾಡಿ ಬಚ್ಚಪುಡ್ ನಡತ್ಂಡ್.
ಜಾರ್ಖಂಡ್ ಮೂಲದ ಮುನೇಶ್ವರ (6) ತೀರ್ ಪೋಯಿನ ಬಾಲೆ. ಜಾರ್ಖಂಡ್ ಮೂಲದ ಸೋಮೇಶ್ವರ ಓಕಾನ್ ದಂಪತಿಲು ಅಂಟೋನಿ ಪನ್ಪುನರೆನ ತೋಟಡ್ ಕರಿನ 6 ವರ್ಷೋರ್ದಿಂಚ ಬೇಲೆ ಮಲ್ತೊಂದು ಉಲ್ಲೆರ್. ಐತಾರ ರಜೆ ದಿನ ಆಯಿನೆರ್ದಾವೆರ ಬಾಲೆ ಗೊಬ್ಬೊಂದು ಇಪ್ಪುನಗ ಈ ಘಟನೆ ನಡತ್ಂಡ್. ಈ ಬಗೆಟ್ ಹೆಬ್ರಿ ಪೋಲಿಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.
ಕುಡ್ಲ: ಕುಡ್ಲ ಜಂಕ್ಷನ್ ಬೊಕ್ಕ ಬೊಂಬೈದ ಲೋಕಮಾನ್ಯ ತಿಲಕ್ ನಿಲ್ದಾಣದ ನಡುಟ್ ನಂ. 01453 ಸಾಪ್ತಾಹಿಕ ಇಸೇಸ ರೈಲ್ ಪೋಯೆರೆ ಉಂಡು.
ಈ ರೈಲ್ ಬೊಂಬೈರ್ದ್ ಡಿ. 9, 16, 23, 30 ಬೊಕ್ಕ ಜನವರಿ 6 (ಶುಕ್ರಾರ) ರಾತ್ರೆ 10.15ಗ್ ಪಿದಡ್ ದ್ ಮನದಾನಿ ಬಯ್ಯಗ್ 5.05ಗ್ ಕುಡ್ಲ ಜಂಕ್ಷನ್ ಎತ್ತೆರೆ ಉಂಡು. ಈ ರೈಲ್ ಕುಡ್ಲ ಜಂಕ್ಷನ್ರ್ದ್ ಡಿ. 10, 17, 24, 31 ಬೊಕ್ಕ ಜನವರಿ 7 (ಶನಿಯಾರ) ಬಯ್ಯಗ್ 6.45ಕ್ ಪಿದಡ್ ದ್ ಮನದಾನಿ ಬೊಂಬೈಗ್ ಮಧ್ಯಾಹ್ನ 2.25ಗ್ ಎತ್ತುಂಡು. ಥಾನೆ, ಪನ್ವೆಲ್, ರೋಹ, ಖೇಡ್, ಚಿಪ್ಲೂನ್, ಸಂಗಮೇಶ್ವರ ರೋಡ್, ರತ್ನಗಿರಿ, ಕಂಕಾವಿ, ಸಿಂಧುದುರ್ಗ, ಕುಡಾಳ್, ಸಾವಂತವಾಡಿ ರೋಡ್, ತಿವಿಮ್, ಕರ್ಮಾಲಿ, ಮಡಗಾಂವ್, ಕಾರವಾರ, ಗೋಕರ್ಣ ರೋಡ್, ಕುಮಟಾ, ಮುರುಡೇಶ್ವರ, ಭಟ್ಕಳ, ಬೈಂದೂರು, ಕುಂದಾಪುರ, ಒಡಿಪು, ಮುಲ್ಕಿ, ಸುರತ್ಕಲ್ಡ್ ಉಂತೆರೆ ಉಂಡು.
ಪ್ಯಾಂಗ್ಯಾಂಗ್: ಜೋಕುಲೆಗ್ ಬಾಂಬ್, ಗನ್, ಸ್ಯಾಟಲೈಟ್ ಪಂದ್ ಪುದರ್ ದೀಯರೆ ಉತ್ತರ ಕೊರಿಯಾ ಸರ್ಕಾರ ವಿಚಿತ್ರ ಆದೇಶ ಮಲ್ತ್ದ್ಂಡ್.
ಜನಕ್ಲೆಡ ದೇಶ ಭಕ್ತಿ ಎಚ್ಚ ಮಲ್ಪುನ ಬಗೆಟ್ ಈ ಕ್ರಮ ದೆತೊಂದೆರ್. ಜೋಕುಲೆಗ್ ಮಿಲಿಟರಿ ಅರ್ಥ ಬರ್ಪಿನಂಚಿನ ಪುದರ್ ದೀವೊಡು ಪಂದ್ ಅದೇಶ ಮಲ್ತ್ದೆರ್ ಪಂದ್ ಸರ್ಕಾರದ ಮೂಲಲು ತೆರಿಪಾದ್ಂಡ್.
