Times Of Kuda

ಪೆಂಚಿಮಾರ್ ಮಹಮ್ಮಾಯಿ ಮಾರಿ ಪೂಜೆ ಸಮಿತಿದ ಅಧ್ಯಕ್ಷೆರಾದ್ ನಾರಾಯಣ ಪೂಜಾರಿ ನೇಮಕ

ಪೆಂಚಿಮಾರ್ ಮಹಮ್ಮಾಯಿ ಅಮ್ಮನ ಮಾರಿ ಪೂಜೆ ಸಮಿತಿದ ಪೊಸ ಅಧ್ಯಕ್ಷೆರಾದ್ ನಾರಾಯಣ ಪೂಜಾರಿ ಬೊಳ್ಳೂರ್ ನೇಮಕ ಆತೆರ್.

ಮೆರೆಗ್ ಮಹಮ್ಮಾಯಿ ಫ್ರೆಂಡ್ಸ್ ಕುದ್ಕುಂಜ ಮೊಕುಲು ಎಡ್ಡೆಪ್ಪು ಬಯಕಿಯೆರ್.

ಗುಡ್ಡೆ ಜರಿದ್ ತೀರ್ ಪೋಯಿನ ಕಾರ್ಮಿಕೆ

ಸುರತ್ಕಲ್‌: ಗುಡ್ಡೆ ಜರಿದ್ ಒರಿ ತೀರ್ ಪೋಯಿನ ಘಟನೆ ಚೇಳಾಯಿರು ಗ್ರಾಮದ ರೈಲ್ವೇ ಬ್ರಿಡ್ಜ್ ದ ಕೈತಲ್ ನಡತ್ಂಡ್.

ಕುಡೊರಿಯಗ್ ಮಸ್ತ್ ಪೆಟ್ಟಾತ್ಂಡ್. ಈ ಘಟನೆಡ್ ಓಬಲೇಶ್ವರ ತೀರ್ ಪೋತೆರ್. ಈ ಬಗೆಟ್ ಕಾರ್ಮಿಕೆರಾಯಿನ ಕಿಟ್ಟರಾಜ ಮೇರ್ ಸುರತ್ಕಲ್‌ ಪೊಲೀಸ್‌ ಠಾಣೆಡ್ ದೂರು ಕೊರ್ತೆರ್.

ಗುಜರಾತ್ ಡ್ ಸ್ಯಾಂಟ್ರೋ ರವಿ ಅರೆಸ್ಟ್

ಬೆಂಗ್ಲೂರ್: ಕೆಲವು ದಿರ್ನೊದಿಂಚ ರಾಜ್ಯ ರಾಜಕಾರಣಡ್ ಪುದರ್ ಪಡೆದ್ ಇತ್ತಿನ ಕೆ.ಎಸ್.ಮಂಜುನಾಥ ಅಲಿಯಾಸ್ ಸ್ಯಾಂಟ್ರೋ ರವಿನ್ ಗುಜರಾತ್​ಡ್ ಕರ್ನಾಟಕ ಪೊಲೀಸೆರ್ ಅರೆಸ್ಟ್ ಮಲ್ದೆರ್.

ಮೈಸೂರ್ ಮೂಲದಾರ್ ಆಯಿನ ಮೇರ್ ಕರಿನ ಸುಮಾರ್ 11 ದಿರ್ನೋದಿಂಚ ದಿಂಗ್ ದ್ ಕುಲ್ಲುದು ಇತ್ತೆರ್ ಪಂದ್ ತೆರಿದ್ ಬೈದ್ಂಡ್. ನೇರ್ದ್ ದುಂಬು ಮೆರೆನ ವಿರುದ್ಧ ಸುಮಾರ್ ಕೇಸ್ ದಾಖಲ್ ಆತ್ಂಡ್. ವೇಶ್ಯಾವಾಟಿಕೆ ದಂಧೆಡ್ ಬ್ರೋಕರ್ ಆದ್ ಕೆಲಸ ಮಲ್ತೊಂದು ಇತ್ತಿನ ಮೆರೆಗ್ ಮಲ್ಲ ಮಲ್ಲ ರಾಜಕಾರಣಿಲೆನ ಸಂಪರ್ಕ ಉಂಡು ಪಂದ್ ತೆರಿದ್ ಬೈದ್ಂಡ್.

ಶಿರಡಿ: ಬಸ್ ಬೊಕ್ಕ ಟ್ರಕ್ ಗುದ್ದುದು 10 ಜನ ತೀರ್ ಪೋಯೆರ್

ಖಾಸಗಿ ಬಸ್ ಬೊಕ್ಕ ಟ್ರಕ್ ಗುದ್ದುದು 10 ಜನ ತೀರ್ ಪೋಯಿನ ಘಟನೆ ಮಹಾರಾಷ್ಟ್ರದ ಸಿನ್ನಾರ ಶಿರಡಿದ ಪತ್ತಾರೆ ಶಿವಾರದ ಈಶಾನೇಶ್ವರ ದೇವಲ್ಯದ ಕಮಾನುದಲ್ಪ ನಡತ್ಂಡ್.

ಬಸ್ಸ್ ಟ್ 50 ಜನ ಪ್ರಯಾಣಿಕೆರ್ ಇತ್ತೆರ್. ನೆಟ್ಟ್ ಮಸ್ತ್ ಜನಕ್ ಪೆಟ್ಟಾತ್ಂಡ್ ಪಂದ್ ತೆರಿದ್ ಬೈದ್ಂಡ್.

ಜ.29 : ಬುಡಿಗಾಡ್ ನವಚೇತನಾ ಫ್ರೆಂಡ್ಸ್ ಮುತಾಲಿಕೆಡ್ ಸಾರ್ವಜನಿಕ ಸತ್ಯನಾರಾಯಣ ಪೂಜೆ, ಸಾಂಸ್ಕೃತಿಕ ಲೇಸ್

ಎಕ್ಕಾರ್, ಬುಡಿಗಾಡ್ ನವಚೇತನಾ ಫ್ರೆಂಡ್ಸ್ ನೆತ್ತ 10 ನೇ ವರ್ಷದ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ ಬೊಕ್ಕ ಸಾಂಸ್ಕೃತಿಕ ಲೇಸ್ ಜ.29 ಐತಾರ ಎಕ್ಕಾರ್ ದ ಬುಡಿಗಾಡು ಸಾರ್ವಜನಿಕ ಗಣೇಶೋತ್ಸವ ಸಭಾಭವನಡ್ ನಡಪರೆ ಉಂಡು.

ಬಯ್ಯಗ್ ಪೊಳಲಿ ಓಂಕಾರ ಅಖಿಲೇಶ್ವರ ಭಜನಾ ಮಂಡಳಿ ಮೊಕ್ಲೆರ್ದ್ ಭಜನೆ ಲೇಸ್ ನಡಪುಂಡು. ಬೊಕ್ಕ ಸಭಾ ಲೇಸ್ ನಡಪರೆ ಉಂಡು. ನೆತ್ತ ಗುರ್ಕಾರ್ಮೆನ್ ನವಚೇತನ ಫ್ರೆಂಡ್ಸ್ ದ ಅಧ್ಯಕ್ಷೆರ್ ಸುಧೀರ್ ಪೂಜಾರಿ ಒಯಿಸೊನ್ವೆರ್. ಕೇಮಾರು ಮಠತ ಶ್ರೀ ಈಶವಿಠಲದಾಸ ಸ್ವಾಮೀಜಿ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಶಾಸಕೆರ್ ಉಮಾನಾಥ ಕೋಟ್ಯಾನ್, ಎಕ್ಕಾರ್ ಕೊಡಮಣಿತ್ತಾಯ ದೈವೊಲ್ಯದ ಆಡಳಿತ ಮೊಕ್ತೇಸರೆರ್ ನಿತಿನ್ ಹೆಗ್ಡೆ, ಜಿಲ್ಲಾ ಪಂಚಾಯತ್ ಮಾಜಿ ಉಪಾಧ್ಯಕ್ಷೆರ್ ಕಸ್ತೂರಿ ಪಂಜ, ಸದಸ್ಯೆರ್ ಜನಾರ್ಧನ ಗೌಡ ಮುಚ್ಚೂರು, ಉದ್ಯಮಿ ಗಣೇಶ್ ಶೆಟ್ಟಿ ಮುಚ್ಚೂರು, ಪ್ರತೀಕ್ ಶೆಟ್ಟಿ, ಬಿ.ಕೆ ಪದ್ಮರಾಜ್, ಮುಕ್ತಾನಂದ ಶೆಟ್ಟಿ, ಕೃಷಿಕೆರ್ ಸದಾನಂದ ಶೆಟ್ಟಿ ಎಕ್ಕಾರ್, ಶ್ಯಾಮ್ ಶೆಟ್ಟಿ ಎಕ್ಕಾರ್, ತುಳು ಪಿಕ್ಚರ್ ದ ನಟೆ ಚೇತಕ್ ಪೂಜಾರಿ, ಎಕ್ಕಾರ್ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಸುರೇಖಾ ರೈ, ಸದಸ್ಯೆರ್ ಸತೀಶ್ ಶೆಟ್ಟಿ, ಕಲ್ಲಮಂಡ್ನೂರು ಗ್ರಾಮ ಪಂಚಾಯತ್ ಸದಸ್ಯೆರ್ ಲವೀನಾ ಡಿ ಸೋಜ ಬರಿಯೆರೆ ಉಲ್ಲೆರ್. ನೆಲ್ಲಿತೀರ್ಥ ಶ್ರೀನಿವಾಸ ಭಟ್, ಕೊಂಬೊಡಿ ಕೇಶವ ಪೂಜಾರಿ, ಬರಂಕಿಲ ವಾಮನ ಕೋಟ್ಯಾನ್ ಗ್ ಗೌರವ ಸಂದಾಯೆರ್ ಉಂಡು. ಕೈತಲ್ ದ ಪ್ರತಿಭೆಲೆರ್ದ್ ಸಾಂಸ್ಕೃತಿಕ ಲೇಸ್ ಬೊಕ್ಕ ಪ್ರಗತಿ ಕಲಾತಂಡ ಮುಚ್ಚೂರು ಕಲಾವಿದೆರೆರ್ದ್ ತುಳು ಸಾಮಾಜಿಕ ನಾಟಕ ಧರ್ಮ ಚಾವಡಿ ನಡಪರೆ ಉಂಡು ಪಂದ್ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಇನಿ ಭಾರತ-ಶ್ರೀಲಂಕಾ 2ನೇ ಏಕದಿನ ಪಂತೊ

ಸುರುತ ಪಂತೊ ಗೆಂದಿನ ಟೀಮ್ ಇಂಡಿಯಾ ಇನಿ ಶ್ರೀಲಂಕಾದೊಟ್ಟಿಗೆ ರಡ್ಡನೇ ಏಕದಿನ ಪಂತೊ ಗೊಬ್ಬೆರೆ ಉಂಡು.

ಈಡನ್ ಗಾರ್ಡನ್ ಮೈದಾನಡ್ ನಡಪರೆ ಇಪ್ಪುನ ಪಂತೊದ ಜಬದಾರಿನ್ ಕೂಟದ 3 ರನ್ ಯಂತ್ರ ವಿರಾಟ್ ಕೊಹ್ಲಿ, ನಾಯಕೆ ರೋಹಿತ್ ಶರ್ಮಾ ಬೊಕ್ಕ ವಿಕೆಟ್ ಕೀಪರ್ ಕೆ.ಎಲ್ ರಾಹುಲ್ ಒಯಿಸೊಂದೆರ್.

ಜೆಡಿಎಸ್ ದ 7 ಕಾರ್ಯಕರ್ತೆರ್ನ ಮಿತ್ತ್ ಕೇಸ್

ಜೆಡಿಎಸ್ ಗುಬ್ಬಿ ಶಾಸಕೆರ್ ಎಸ್.ಆರ್. ಶ್ರೀನಿವಾಸ್ ಬೊಕ್ಕ ಮೂಲ ಜೆಡಿಎಸ್ ಕಾರ್ಯಕರ್ತೆರೆನ ನಡುಟ್ ಸಾಮಾಜಿಕ ಜಾಲತಾಣಡ್ ಗಲಾಟೆ ನಡತ್ ದ್ಂಡ್.

ಈ ಬಗೆಟ್ 10 ಜನತ ಮಿತ್ತ್ ಗುಬ್ಬಿ ಪೊಲೀಸ್ ಠಾಣೆಡ್ ಎಫ್ ಐಆರ್ ದಾಖಲ್ ಆತ್ಂಡ್. ಮೊಕುಲು ಸೋಶಿಯಲ್ ಮೀಡಿಯಾಡ್ ಪರಸ್ಪರ ನಿಂದನೆ ಮಲ್ತೊಂದೆರ್ ಪಂದ್ ತೆರಿದ್ ಬೈದ್ಂಡ್.

ಆರ್ ಆರ್ ಆರ್ ಪಿಕ್ಚರ್ ಗ್ ಗೋಲ್ಡನ್ ಗ್ಲೋಬ್ ಪ್ರಶಸ್ತಿ

ಕ್ಯಾಲಿಫೋರ್ನಿಯಾ: ಅಮೆರಿಕದ ಪುಗರ್ತೆದ ಗೋಲ್ಡನ್ ಗ್ಲೋಬ್ ಪ್ರಶಸ್ತಿ ಆರ್ ಆರ್ ಆರ್ ಪಿಕ್ಚರ್ ದ ನಾಟು ನಾಟು ಪದ್ಯಗ್ ತಿಕ್ ದ್ಂಡ್.

ಈ ಪ್ರಶಸ್ತಿನ್ ಕ್ಯಾಲಿಫೋರ್ನಿಯಾದ ಬೆವರ್ಲಿ ಹಿಲ್ಸ್ ಡ್ ನಡತಿನ ಲೇಸ್ ಡ್ ಪ್ರದಾನ ಮಲ್ತೆರ್. ಪುಗರ್ತೆದ ನಿರ್ದೇಶಕೆರ್ ರಾಜಮೌಳಿ ಈ ಪಿಕ್ಚರ್ ದ ನಿರ್ದೇಶಕೆರಾತೆರ್. ಎಂ ಎಂ ಕೀರವಾಣಿ ಸಂಗೀತ ಕೊರ್ತೆರ್. ಜೂನಿಯರ್ ಎನ್ ಟಿ ಆರ್ ಬೊಕ್ಕ ರಾಮ ಚರಣ್ ನಾಟು ನಾಟು ಪದ್ಯಗ್ ನಲಿತ್ ದೆರ್.

ತೂ ರ್ದು ಮಗನ್ ಒರಿಪಾಯರೆ ತನ್ನ ಪ್ರಾಣ ಕಳೆವೊಂಡಿನ ಅಮ್ಮೆರ್!

ಶಿವಮೊಗ್ಗ : ಇಲ್ಲಡ್ ಶಾರ್ಟ್ ಸರ್ಕಿಟ್ ಆದ್ ಪೊತ್ತಿನ ತೂ ರ್ದ್ ಮಗನ್ ಬಚಾವ್ ಮಲ್ಪರೆ ಪೋದು ವ್ಯಕ್ತಿ ಒರಿ ತನ್ನ ಪ್ರಾಣನ್ ಕೊರ್ನ ಐತಾರ ಶಿವಮೊಗ್ಗಡ್ ನಡತ್ಂಡ್.

ಪುಗರ್ತೆದ ಭೂಪಾಳಂ ಫ್ಯಾಮಿಲಿದ ಶರತ್ (39) ತೀರ್ ಪೋಯಿನಾರ್. ಮೆರೆನ್ ಕೂಡ್ಲೆ ಕೈತಡೇ ಇಪ್ಪುನ ನಂಜಪ್ಪ ಆಸ್ಪತ್ರೆಗ್ ಸೇರ್ಸಾದ್ ಚಿಕಿತ್ಸೆ ಕೊರ್ಡಾಂಡಲ ಅವು ಫಲಕಾರಿ ಆವಂದೆ ತೀರ್ ಪೋಯೆರ್. ಜಾಗೆಗ್ ಅಗ್ನಿಶಾಮಕದಳ ಬತ್ತ್ ದ್, ತೂ ತೆಕ್ಕಾದೆರ್. ಕೈತಲ್ ದ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.

ತೋಕೂರು ಸುಬ್ರಹ್ಮಣ್ಯ ದೇವಸ್ಥಾನದ ಪೊಸ ಕೊಡಿಮರ ಮೆರವಣಿಗೆಗ್ ಪೂರ ತಯಾರಿ ಆತ್ಂಡ್: ಹರಿದಾಸ್ ಭಟ್

ಹಳೆಯಂಗಡಿ : ಜೀರ್ಣೋದ್ಧಾರ ಆವೊಂದು ಉಪ್ಪುನ ಪುಗರ್ತೆದ ಧಾರ್ಮಿಕ ಕ್ಷೇತ್ರ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯಡ್ ಸ್ಥಾಪನೆ ಆವರೆ ಇಪ್ಪುನ ಪೊಸ ಕೊಡಿಮರತ್ತ ಮೆರವಣಿಗೆ ಜ.14ಕ್ ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯರ್ದ್ ಪಿದಾಡರೆ ಉಂಡು. ಅಂಚಾದ್ ಮೆರವಣಿಗೆದ ಪೂರ ವ್ಯವಸ್ಥೆಲ ಆತ್ಂಡ್ ಪಂದ್ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಪಂಡೆರ್.

ಮೇರ್ ತೋಕೂರ್ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಚಾವಡಿಡ್ ನಡತಿನ ಅಟ್ಟಣೆದ ಸಭೆ ಬೊಕ್ಕ ಅಕೇರಿದ ಸಭೆಟ್ ಈ ಪೊಲಬು ಕೊರಿಯೆರ್. ಈ ಮೆರವಣಿಗೆಡ್ ಕೈತಲ್ ದ ಬೇತೆ ಬೇತೆ ಸಂಘ ಸಂಸ್ಥೆಲು ಸ್ವಯಂ ಪ್ರೇರಣೆರ್ದ್ ನಾಸಿಕ್ ಬ್ಯಾಂಡ್, ಚೆಂಡೆ, ಬೇತೆ ಬೇತೆ ವೇಷ, ನಲಿಕೆ ಬೊಕ್ಕ ನಿರಂತರ ಭಜನೆ, ಪೂರ್ಣಕುಂಭ ಕಲಶ, ಡೋಲು, ಸ್ಯಾಕ್ಸೊಫೋನ್, ಬಣ್ಣ ಬಣ್ಣದ ಕೊಡೆ, ಅನಾರ್ಕಲಿ, ಕೀಲ್ ಕುದುರೆ ಇಂಚಿನ ಮಾತ ಬಿರ್ದಾವಳಿ ಇಪ್ಪುಂಡು ಪಂದ್ ಪಂಡೆರ್.

ಪಡುಪಣಂಬೂರು ಕೋರ್‍ದಬ್ಬು ದೈವೊಲ್ಯದ ಬೊಕ್ಕ ಕಲ್ಲಾಪು ದೇವಲ್ಯದ ಕೈತಲ್ ತಂಪು ಬಾಜೆಲ್ ದ ವ್ಯವಸ್ಥೆ ಮಲ್ದ್ಂಡ್. ಬಪ್ಪನಾಡ್ ರ್ದ್ ಮುಲ್ಕಿ ಬಿಲ್ಲವ ಸಂಘ ಮುಟ್ಟ ಬತ್ತ್ ದ್ ಬೊಕ್ಕ ಪಡುಪಣಂಬೂರು ರಾಷ್ಟ್ರೀಯ ಹೆದ್ದಾರಿರ್ದ್ ಕಲ್ಲಾಪುದ ಮುಖೇನ ತೋಕೂರ್ ಗ್ ಪೊಸ ಕೊಡಿಮರತ ಮೆರವಣಿಗೆ ಬರಿಯೆರೆ ಉಂಡು ಪಂದ್ ಪಂಡೆರ್.

ಈ ಪೊರ್ತುಡು ಅರ್ಚಕೆರ್ ಮಧುಸೂಧನ ಆಚಾರ್ಯ, ವ್ಯವಸ್ಥಾಪನಾ ಸಮಿತಿದ ವಿಜಯಕುಮಾರ್ ರೈ, ಜೀರ್ಣೋದ್ಧಾರ ಸಮಿತಿದ ಉಪಾಧ್ಯಕ್ಷೆರ್ ಮೋಹನ್‌ದಾಸ್, ಕಲ್ಲಾಪು ದೇವಲ್ಯದ ರತ್ನಾಕರ ಶೆಟ್ಟಿಗಾರ್, ಎಲ್.ಕೆ. ಸಾಲ್ಯಾನ್ ಇತ್ತೆರ್.