ಪರ್ತಿನಾಯಗ್ ತಿಕ್ ದಿನಿ 5-10 ಲಕ್ಷ ರೂ.ದ ಬ್ಯಾಗ್, ಪೊಲೀಸೆರೆನ ಕೈಕ್ ತಿಕಿನಿ 49 ಸಾರ ರೂ.
ಕುಡ್ಲ: ಕರಿನ ತಿಂಗೊಲ್ಡು ಅಮಲ್ ದ ಮರ್ದ್ ಪರೊಂದು ಇಪ್ಪುನ ಶಿವರಾಜ್ ಪನ್ಪುನರೆಗ್ ಪಂಪ್ವೆಲ್ ಬಾರ್ ದ ಕೈತಲ್ ನ. 27ಕ್ ಒಂಜಿ ಬಾಕ್ಸ್ ಡ್ 500, 2,000 ರೂ. ದ ನೋಟುಲು ತಿಕಿನವು ಭಾರಿ ಅಚ್ಚಿರೊಗು ಕಾರಣ ಆತ್ಂಡ್.
ಮೇರ್ ಕಾಸ್ ತಿಕಿ ಬೊಕ್ಕ ಬಾಕ್ಸ್ ಡ್ ಇತ್ತಿನ 1 ಸಾರ ರೂ. ದೆತ್ತ್ ದ್ ಗಂಗಸರ ಪರ್ತೆರ್. ಬೊಕ್ಕ ಆಯನೊಟ್ಟಿಗೆ ಇತ್ತಿನಾಯಗ್ ಲ ನೋಟುದ ಕಟ್ಟ್ ನ್ ಕೊರ್ತೆರ್. ಈ ವಿಷಯ ತೆರಿನ ಪೊಲೀಸೆರ್ ಜಾಗೆಗ್ ಬತ್ ದ್, ಕಾಸ್ ದ ಪೆಟಿಗೆ ಸಮೇತ ಶಿವರಾಜ್ ನ್ ವಶಕ್ ದೆಲ್ಲಿದ್ ಮೂಜಿ ದಿನ ಠಾಣೆಡ್ ಕುಲ್ಲದ್ ಬುಡ್ತೆರ್. ಶಿವರಾಜ್ ಬಾಕ್ಸ್’ಡ್ 5ರ್ದ್ 10 ಲಕ್ಷ ಇತ್ಂಡ್ ಪಂದ್ ಹೇಳಿಕೆ ಕೊರ್ತೆರ್. ಆಂಡ ಬಾಕ್ಸ್ ಡ್ 49 ಸಾರ ರೂ. ಮಾತ್ರ ಇತ್ಂಡ್ ಪಂದ್ ಪೊಲೀಸೆರ್ ತೆರಿಪಾದೆರ್. ವಾರ ಕರಿಂಡಲ ಕಾಸ್ ದ ವಾರಸುದಾರೆರ್ ಮಾತ್ರ ಪತ್ತೆ ಆತಿಜೆರ್. ಈ ಬಗೆಟ್ ಪೊಲೀಸೆರ್ ಒವ್ವೇ ದೂರು ದಾಖಲ್ ಮಲ್ಜೆರ್. ಉಂದು ಸುಮಾರ್ ಸಂಸಯಗ್ ಕಾರಣ ಆತ್ಂಡ್.
