ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ನಮ ಧರ್ಮನ್ ರಕ್ಷಣೆ ಮಲ್ತ್ಂಡ ಧರ್ಮ ನಮನ್ ಕಾಪುಂಡು: ವಿದ್ಯಾಪ್ರಸನ್ನತೀರ್ಥ ಸ್ವಾಮೀಜಿ

ಸುರತ್ಕಲ್: “ಜೋಕ್ಲೆಗ್ ಎಲ್ಯೆಡೇ ಧಾರ್ಮಿಕ ಸಂಸ್ಕಾರ ಕೊರೊಡು. ನಮ ಧರ್ಮದ ರಕ್ಷಣೆ ಮಲ್ತ್ಂಡ ಧರ್ಮ ನಮನ್ ರಕ್ಷಣೆ ಮಲ್ಪುಂಡು. ನಮ ಮಾತ್ರ ಪೊರ್ಲುಡು ಬದ್ ಕ್ಂಡ ಯಾವಂದ್, ನಮ್ಮೊಟ್ಟಿಗೆ ಬೇತೆಕುಲುಲ ಬದ್ಕೊಡು. ದುರ್ಬಲೆರೆನ್ ಬಲಿ ಕೊರ್ದು ಬದ್ಕುನ ಬೊರ್ಚಿ. ಬದಲ್ ಗ್ ಅಕ್ಲೆನೊಟ್ಟಿಗೆ ಪೋಪಿನ ಮುಕೇನ ಬದ್ಕ್ ನ್ ಪೊರ್ಲು ಮಲ್ಪೊಡು” ಪಂದ್ ಮಧ್ವಾಚಾರ್ಯ ಮಹಾಸಂಸ್ಥಾನ ಕುಕ್ಕೆದ ಶ್ರೀ ವಿದ್ಯಾಪ್ರಸನ್ನತೀರ್ಥ ಸ್ವಾಮೀಜಿ ಪಂಡೆರ್.

ಮೇರ್ ಶಿಬರೂರು ಶ್ರೀ ಕೊಡಮಣಿತ್ತಾಯ ಕ್ಷೇತ್ರಡ್ ಬ್ರಹ್ಮಕಲಶ ಉಚ್ಚಯ ನಾಗಮಂಡಲದ ಲೆಕ್ಕೊಡು ಬುದಾರ ನಡತಿನ ಧಾರ್ಮಿಕ ಸಭಾ ಲೇಸ್ ಡ್ ಆಶೀರ್ವಚನ ಕೊರಿಯೆರ್.

ಧಾರ್ಮಿಕ ವಿದ್ವಾಂಸೆರ್ ವಿದ್ವಾನ್ ಪಂಜ ಭಾಸ್ಕರ ಭಟ್ ಪಾತೆರ್ದ್, “ಶಿಬರೂರು ಕ್ಷೇತ್ರದ ಪವಿತ್ರ ಮಣ್ಣ್ ಗ್ ವಿಷನ್ ಶರೀರರ್ದ್ ದೆಪ್ಪುನ ಶಕ್ತಿ ಉಂಡು. ದುಂಬುದ ಕಾಲಡ್ ವಿಷ ಜಂತು ತುಚ್ಚಿಂಡ ಮುಲ್ಪದ ಮಣ್ಣ್ ನ್ ಪವಿತ್ರ ಗಂಧ ಪಂದ್ ಕೈಮುಗಿದ್ ದೇಹಗ್ ಬೊಕ್ಕ ಬಾಯಿಗ್ ಪಾಡ್ದ್ ಸ್ವಾಮಿ ಕೊಡಮಣಿತ್ತಾಯ ಪಂಡ ವಿಷದ ಪ್ರಭಾವ ಜತ್ತ್ ದ್ ಪ್ರಾಣಗ್ ತೊಂದರೆ ಆಪುನವು ತತ್ತೊಂದು ಇತ್ತ್ಂಡ್. ಉಂದು ಮುಲ್ಪದ ದೈವೊದ ಕಾರಣಿಕ. ಇತ್ತೆಲ ಶಿಬರೂರುದ ಮಣ್ಣ್ ನ್ ವಿಷನಾಶಕ ಪಂದೇ ಲೆಪ್ಪುವೆರ್. ಉಳ್ಳಾಯ ದೈವ ಬೊಕ್ಕ ಕೊಡಮಣಿತ್ತಾಯ ದೈವ ಜನಕ್ಲೆನ ರಕ್ಷಣೆ ಮಲ್ತೊಂದು ಕ್ಷೇತ್ರಡ್ ಉಲ್ಲೆರ್. ಮುಲ್ಪದ ತೀರ್ಥನ್ ಇತ್ತೆಲ ಮರಾಯಿಡ್ ದೆತ್ತ್ ದ್ ಭಕ್ತೆರೆಗ್ ಪಟ್ಟುವೆರ್. ಇಂಚಿನ ಪವಿತ್ರ ಸನ್ನಿಧಾನಡ್ ನಡಪರೆ ಇಪ್ಪುನ ನಾಗಮಂಡಲದೊಟ್ಟಿಗೆ ಬ್ರಹ್ಮಕುಂಭಾಭಿಷೇಕ ಲೇಸ್ ಪೊರ್ಲುಡೇ ನಡಪಡ್” ಪಂದ್ ಪಂಡೆರ್.

ಶ್ರೀ ಕ್ಷೇತ್ರ ಕೊಡಮಣಿತ್ತಾಯನ ಮೂಲಕ್ಷೇತ್ರ ಪಡ್ಯಾರಬೆಟ್ಟುದ ಮೊಕ್ತೇಸರೆರ್ ಜೀವಂಧರ್ ಕುಮಾರ್ ಯಾನೆ ಕಂಚಿ ಪೂವಣಿ ಮೇರ್ ಗುರ್ಕಾರ್ಮೆನ್ ಒಯಿಸೊಂದು, ಪಾತೆರ್ದ್, “ಕೊಡಮಣಿತ್ತಾಯ ನೆಲೆ ಇಪ್ಪುನ ನಮ್ಮ ಮೂಲ ಕ್ಷೇತ್ರ ದೈವೊದ ಅನುಗ್ರಹರ್ದ್ ಬೆಳಗ್ ದ್ಂಡ್. ತಿಬಾರ್ ಕ್ಷೇತ್ರದ ಕಾರಣಿಕ, ಬೆಳಗದ್ ಬತ್ತಿನ ರೀತಿನ್ ತೂನಗ ಮನಸ್ ದಿಂಜಿದ್ ಬರ್ಪುಂಡು. ಈ ಕ್ಷೇತ್ರ ನನಾತ್ ಬೆಳಗಡ್. ಮಾಧ್ಯಮೊಲು ದೈವ ಒಲ್ಪರ್ದ್ ಬೈದ್ಂಡ್ ಒಡೆಗ್ ಪೋಂಡ್ ಪಂದ್ ಮಾತ ಮನಸ್ಸ್ ಗ್ ಬೋಡಾಯಿಲೆಕ್ಕ ಬರೆಪುನ ಬದಲ್ ವಿಮರ್ಶೆ ಮಲ್ತ್ ದ್ ಬರೆವೊಡು” ಪಂದ್ ಪಂಡೆರ್.

ಚಾವಡಿಡ್ ಬ್ರಹ್ಮಕಲಶ ಉಚ್ಚಯ ಬೊಕ್ಕ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಪ್ರಭಾಕರ್ ಶೆಟ್ಟಿ ಕೋಂಜಾಲುಗುತ್ತು, ಶ್ರೀ ಕೊಡಮಣಿತ್ತಾಯ ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ಎಂ. ಮಧುಕರ ಅಮೀನ್, ಬಂಟರ ಯಾನೆ ನಾಡವರ ಮಾತೃಸಂಘದ ಅಧ್ಯಕ್ಷೆರ್ ಅಜಿತ್ ಕುಮಾರ್ ರೈ ಮಾಲಾಡಿ, ಅಜಿತ್ ಕಿಟ್ಟಣ್ಣ ಶೆಟ್ಟಿ ಕೋಂಜಾಲುಗುತ್ತು, ಭಾರತ್ ಬ್ಯಾಂಕ್ ಬೊಂಬೈದ ಆಡಳಿತ ನಿರ್ದೇಶಕೆರ್ ಸೂರ್ಯಕಾಂತ್ ಜಿ ಸುವರ್ಣ, ಕಿರಣ್, ಪ್ರವೀಣ್ ಶೆಟ್ಟಿ ಸೂರತ್, ಚಂದ್ರಶೇಖರ ಪೂಜಾರಿ, ಶ್ರೀಧರ್ ಎಸ್. ಪೂಜಾರಿ, ದಯಾನಂದ ಶೆಟ್ಟಿ, ಪಂಜ ನಲ್ಯಗುತ್ತು ಪ್ರಕಾಶ್ ಶೆಟ್ಟಿ, ಯಾದವ ಕೃಷ್ಣ ಶೆಟ್ಟಿ, ಗಂಗಾಧರ್ ಪೂಜಾರಿ, ಸಮಿತಿದ ಕಾರ್ಯಾಧ್ಯಕ್ಷೆರ್ ಪ್ರದ್ಯುಮ್ನ ರಾವ್ ಪಾಲ್ ಪಡೆದಿತ್ತೆರ್.

ನವೀನ್ ಶೆಟ್ಟಿ ಎಡ್ಮೆಮಾರ್ ಲೇಸ್ ನ್ ಸುಧಾರಿಕೆ ಮಲ್ತೆರ್. ಸುನೀತಾ ಶೆಟ್ಟಿ ಪಡುಮನೆ ಪ್ರಾರ್ತನೆ ಮಲ್ತೆರ್. ವಿನೀತ್ ಶೆಟ್ಟಿ ಎದ್ಕೊನಿಯೆರ್‌. ಜಯಲಕ್ಷ್ಮಿ ಸುರೇಂದ್ರ ಶೆಟ್ಟಿ ಸೊಲ್ಮೆ ಸಂದಾಯೆರ್.

ಎ.26 : ನವಿ ಬೊಂಬೈಡ್ ಗುರುಮಂದಿರ, ಬಿಲ್ಲವ ಸಮುದಾಯ ಭವನ ಉದಿಪನ

ಬೊಂಬೈ ಬಿಲ್ಲವರ ಎಸೋಸಿಯೇಶನ್ ನವಿಬೊಂಬೈ ಕೈತಲ್ದ ಕಚೇರಿದ ಗುರುಮಂದಿರ ಬೊಕ್ಕ ಬಿಲ್ಲವ ಸಮುದಾಯ ಭವನದ ಉದಿಪನ ಲೇಸ್ ಎ.25 ಬೊಕ್ಕ 26 ಕ್ಕ್ ನಡಪರೆ ಉಂಡು.

ಎ.25 ಗುರುವಾರ ಬಯ್ಯಗ್ ವಾಸ್ತುಪೂಜೆ, ಸುದರ್ಶನ ಹೋಮ, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.

ಎ.26 ಸುಕ್ರಾರ ಬೊಲ್ಪುಗು ಗಣಹೋಮ, ಶ್ರೀ ಸತ್ಯನಾರಾಯಣ ಮಹಾಪೂಜೆ, ಬಿಲ್ಲವ ಸಮುದಾಯ ಭವನದ ಉದಿಪನ, ತೀರ್ಥ ಪ್ರಸಾದ ವಿತರಣೆ, ಸಭಾ ಲೇಸ್, ಅನ್ನ ಪ್ರಸಾದ ಸೇವೆ, ಭಜನೆ, ಯಕ್ಷಗಾನ ನಡಪರೆ ಉಂಡು ಪಂದ್ ಅಧ್ಯಕ್ಷೆರ್ ಹರೀಶ್ ಜಿ ಅಮೀನ್, ಗೌ.ಪ್ರ ಕಾರ್ಯದರ್ಶಿ ಹರೀಶ್ ಜಿ ಸಾಲ್ಯಾನ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ರೇಡಿಯೊ ಮಣಿಪಾಲಡ್ ಯೋಗ ಸುಯೋಗ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಸಮುದಾಯ ಬಾನುಲಿಡ್ ಯೋಗ ಸುಯೋಗ ಸರಣಿ ಲೇಸ್ ದ 56ನೇ ಸಂಚಿಕೆ ಎ.22 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಂಡ್.

ಈ ಲೇಸ್ ನ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರಾಯಿನ ಆರ್ ಶಿವಕುಮಾರ್ ನಡಪಾದ್ ಕೊರಿಯೆರ್. ಎ.23 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಂಡ್.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ ಆಫ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಮಿಥುನ್ ರೈ ಏರ್ನ ಪಿರವುಡು ಉಲ್ಲೆರ್ ಪಂದ್ ಗೊತ್ತುಂಡು: ಉಮಾನಾಥ ಕೋಟ್ಯಾನ್

ಮುಲ್ಕಿ: ಕಾಂಗ್ರೆಸ್ ಅಭ್ಯರ್ಥಿ ಪರವಾದ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಉಲ್ಲೆರ್ ಪಂದ್ ಮಿಥುನ್ ರೈ ಪನ್ತಿನ ಪಾತೆರ ಮೂರ್ಖತನದ ಪರಮಾವಧಿ. ಸುರುಕ್ಕು ಆರ್ ಏರ್ನ ಪಿರವುಡು ಉಲ್ಲೆರ್ ಪಂದ್ ಪನಡ್ ಪಂದ್ ಮುಲ್ಕಿ ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್ ಪಂಡೆರ್.

ಮುಲ್ಕಿದ ಸ್ವಾಗತ ಹೋಟೆಲ್ ಡ್ ನಡತಿನ ಸುದ್ದಿಗೋಷ್ಠಿಡ್ ಪಾತೆರ್ನ ಆರ್, ಬೆದ್ರದ ಸುದ್ದಿಗೋಷ್ಠಿಡ್ ಮಿಥುನ್ ರೈ ನ ಹೇಳಿಕೆ ಮೂರ್ಖತನದ ಹೇಳಿಕೆ ಆದುಂಡು. ಮುಲ್ಕಿ ಬಿಲ್ಲವ ಸಮಾವೇಶಡ್ ಯಾನ್ ಪನ್ತಿನ ಭಾಷಣದ ವಿಚಾರೊನು ತಿರ್ಗಾದ್ ಅಪಪ್ರಚಾರ ಮಲ್ತೊಂದುಲ್ಲೆರ್. ಒವ್ವೇ ಕಾರಣೊಗು ಜಾತಿ ಪತ್ ದ್ ಪೋಪಿನಾಯೆ ಯಾನತ್ತ್. ಉಂದು ಪಂಚಾಯಿತಿ , ಎಂಎಲ್ ಎ ವೋಟತ್ತ್, ದೇಶೊಗಾದ್ ನಡಪುನ ವೋಟು. ಅಂಚಾದ್ ಪ್ರಧಾನಿ ನರೇಂದ್ರ ಮೋದಿ ಕುಡೊರ ಪ್ರಧಾನಿ ಆಪಿನ ಮುಖ್ಯ.ಅಂಚಾದ್ ಎಂಕ್ಲೆಗ್ ಹಿಂದುತ್ವ ಬೊಕ್ಕ ಬಿಜೆಪಿಯೇ ಮುಖ್ಯ ಪಂದ್ ಕೋಟ್ಯಾನ್ ಪಂಡೆರ್.

ಬಿಜೆಪಿ ಅಭ್ಯರ್ಥಿ, ಯುವ ನಾಯಕೆ ಕ್ಯಾ.ಬ್ರಿಜೇಶ್ ಚೌಟೆರೆನ್ 50,000 ವೋಟುಡು ಗೆಂದಾವುನ ಗುರಿ ಎಂಕ್ಲೆನ ಆದುಂಡು. ಏ.26 ಕ್ಕ್ ಮಸ್ತ್ ಮದಿಮೆ, ಇಲ್ಲ್ ಒಕ್ಕೆಲ್ ಇಂಚಿನ ಪ್ರೋಗ್ರಾಮ್ ಉಂಡು. ಅಂಚಾದ್ ಕಾರ್ಯಕರ್ತೆರ್ ಅಂಚಿನ ಇಲ್ಲಗ್ ಪೋದು ಬೇಗನೆ ವೋಟು ಪಾಡುಲೆಕ ಮಲ್ಪೊಡು ಪಂದ್ ಪಂಡೆರ್.
ಪತ್ರಿಕಾಗೋಷ್ಠಿಡ್ ಬಿಜೆಪಿ ನಾಯಕೆರಾಯಿನ ಸುನಿಲ್ ಆಳ್ವ, ಚಂದ್ರಶೇಖರ ಬಪ್ಪಳಿಗೆ, ರಂಜಿತ್ ಪೂಜಾರಿ ತೋಡಾರ್, ದಿನೇಶ್ ಪುತ್ರನ್, ಭುವನಾಭಿರಾಮ ಉಡುಪ ಇತ್ತೆರ್.

ಪೇರಂಕಾಯಿದ ಇರೆತ್ತ ಚಾ ಆರೋಗ್ಯಗ್ ಎಡ್ಡೆ

ಪೆರಂಕಾಯಿ, ಪೇರಲೆದ ಇರೆತ್ತ ಚಾ ಆರೋಗ್ಯಗ್ ಮಸ್ತ್ ಎಡ್ಡೆ. ನಮ್ಮ ಸರೀರೊಡಿತ್ತಿನ ಬೊರ್ಚಂದಿನ ಕೊಲೆಸ್ಟ್ರಾಲ್ ಮಟ್ಟನ್ ಉಂದು ಕಮ್ಮಿ ಮಲ್ಪುಂಡು.

ಅಂಚೆನೆ ನೆತ್ತೆರ್ ಡ್ ಇಪ್ಪುನ ಸೆಕ್ಕೆರೆದ ಮಟ್ಟನ್ ನಿಯಂತ್ರಣ ಮಲ್ಪುಂಡು. ಹೃದಯದ ಆರೋಗ್ಯನ್ ಉತ್ತೇಜನ ಮಲ್ಪುಂಡು.

ಪೇರೂಲ್ ಕಾರ್ಬೋಹೈಡ್ರೇಟ್ ಲು ಸೆಕ್ಕರೆಯಾದ್ ಪರಿವರ್ತನೆ ಮಲ್ಪುನೆನ್ ಉಂತಾವುನೆನ್ ತೂಕ ನಷ್ಟಗ್ ಸಕಾಯ ಮಲ್ಪುಂಡು.

ಪ್ರಾಸ್ಟೇಟ್, ಸ್ತನ ಬೊಕ್ಕ ಬಾಯಿದ ಕ್ಯಾನ್ಸರ್ ನ್ ಉಂತಾವುಂಡು. ರೋಗನಿರೋಧಕ ಶಕ್ತಿನ್ ಎಚ್ಚ ಮಲ್ಪುಂಡು.

ತಿಬಾರ್ ಬ್ರಹ್ಮಕಲಶದ ರಡ್ಡನೇ ದಿನತ್ತ ಧರ್ಮಸಭೆ

ನಾಗ ಸಂತೆತಿ ವಾಸ ಮಲ್ಪುನ ಪ್ರಕೃತಿದ ಬನಕ್ಲೆನ್ ನಿರ್ಮಾಣ ಮಲ್ಪುಗ: ಎಂ. ಬಾಲಕೃಷ್ಣ ಶೆಟ್ಟಿ

ಶಿಬರೂರು : ನಾಗಾರಾಧನೆ ಜಗತ್ತ್ ದ ಇಡೀಕ ತೋಜಿದ್ ಬರ್ಪುಂಡು. ತುಳುನಾಡ್ ಡ್ ನಾಗಾರಾಧನೆ ಅತ್ಯಂತ ಪ್ರಾಮುಖ್ಯವಾದುಪ್ಪುನು. ಆಂಡ ಆಧುನಿಕತೆದ ಪುದರ್ ಡ್ ನಾಗ ಬನಕ್ಲೆನ ಪೊರ್ಲು ಕೆಟ್ಟುಂಡು. ಬನಕ್ಲೆನ್ ನಾಗ ಸಂತೆತಿಗ್ ಅಹಿತ ಆಪಿಲೆಕ ನಿರ್ಮಾಣ ಮಲ್ಪುನೆನ್ ಉಂತಾಗ ಪಂದ್ ಉಪನ್ಯಾಸಕೆರ್ ಎಂ. ಬಾಲಕೃಷ್ಣ ಶೆಟ್ಟಿ ಪಂಡೆರ್.

ಆರ್ ತಿಬಾರ್ ಶ್ರೀ ಕೊಡಮಣಿತ್ತಾಯ ಕ್ಷೇತ್ರದ ಬ್ರಹ್ಮಕಲಶೋತ್ಸವ ನಾಗಮಂಡಲದ ಅಂಗವಾದ್ ಅಂಗಾರೆ ನಡತಿನ ದಿನತ್ತ ಪಾತೆರಿಯೆರ್.

ದೈವ ದೇವಸ್ಥಾನಲೆಡ್ ಭಕ್ತೆರ್ ಹಾಳ್ ಚಿಂತನೆ ಮಲ್ಪಂದೆ ನಿಜ ಭಕ್ತಿಡ್ ಉಪ್ಪೊಡು. ಶಿಸ್ತು ದ ತುತ್ತೈತ ಪಾಡೊಂದು ಪೋವೊಡು. ಅರ್ಚಕೆರ್ ನಿಸ್ವಾರ್ಥ ಭಕ್ತಿಡ್ ಪೂಜೆ ಮಲ್ತ್ಂಡ ಅಲ್ಪ ಸಾನ್ನಿಧ್ಯದ ಶಕ್ತಿ ಎಚ್ಚಾಪುಂಡು ಪಂದ್ ಆರ್ ಪಂಡೆರ್.

ಮಾಣಿಲ ಶ್ರೀಧಾಮದ ಶ್ರೀ ಮೋಹನದಾಸ ಸ್ವಾಮೀಜಿ ಪಾತೆರ್ದ್, ದೈವ ದೇವೆರ್ನ ಪುದರ್ ಡ್ ಉತ್ಸವ ಬ್ರಹ್ಮಕಲಶೋತ್ಸವದ ಕಾರಣರ್ದ್ ಗ್ರಾಮಸ್ಥರ್ ಮಾತೆರ್ಲ ಸಂಘಟನೆ ಆವರೆ ಮಲ್ಲ ಅವಕಾಶ. ಸತ್ಯ ಧರ್ಮ ಶ್ರದ್ಧೆಡ್ ದೈವ ದೇವೆರೆ ಚಾಕರಿ ಮಲ್ಪುನ ಮುಕೇನ ಮಾತೆರೆಗ್ಲ ಎಡ್ಡೆ ಆವಡ್ ಪಂದ್ ಪಂಡೆರ್.

ಡಾ. ಹರಿಕೃಷ್ಣ ಪುನರೂರು ಪಾತೆರ್ದ್, ನಾಗನಕ್ಲೆಗ್ ಬನ ನಿರ್ಮಾಣ ಮಲ್ಪುಲೆ. ಬದಲ್ ಗುಡಿ ಕಟ್ಟುನ ಬೊಡ್ಚಿ.ದೈಕ್ಲೆನ್ ನಡ್ದ್ ಕಾಡ್ ಬನಕ್ಲೆನ್ ಅಭಿವೃದ್ಧಿ ಮಲ್ಪೊಡು. ನಾಗಪಾತ್ರಿಲೆಡ ಯಾನೇ ಏತೋ ಸರ್ತಿ ಪನ್ತಿನ ಉಂಡು. ಭಕ್ತೆರೆಗ್ ನೈಜ ನಾಗಬನ ನಿರ್ಮಾಣ ಮಲ್ಪುಲೆ ಪಂದ್. ದಾನಧರ್ಮ ಮಲ್ತ್ ಆತ್ಮಸಂತೋಷ ಪಡೆಲೆ ಪಂದ್ ಪುನರೂರು ಪಂಡೆರ್.

ಈ ಪೊರ್ತುಡು ಜೀರ್ಣೋದ್ಧಾರಗ್ ಸಹಕಾರ ಮಲ್ದಿನ ದಾನಿಲೆಗ್ ಮಾನಾದಿಗೆ ಮಲ್ತೆರ್.

ಕಟೀಲು ದೇವಸ್ಥಾನದ ಅರ್ಚಕೆರ್ ವೆಂಕಟರಮಣ ಆಸ್ರಣ್ಣ, ಐಡಿಯಲ್ ಐಸ್ ಕ್ರೀಮ್ ಆಡಳಿತ ನಿರ್ದೇಶಕೆರ್ ಶಿಬರೂರು ಮುಕುಂದ ಕಾಮತ್, ಮೂಡುಬಿದ್ರೆ ಶ್ರೀಪತಿ ಭಟ್, ನಾರಾಯಣ ಪಿ.ಎಂ, ಪ್ರಕಾಶ್ ಬಿ.ಎನ್, ಡಾ. ಅಣ್ಣಯ್ಯ ಕುಲಾಲ್, ವೇಣುಗೋಪಾಲ್ ಶೆಟ್ಟಿ, ಜೀರ್ಣೋದ್ಧಾರ ಸಮಿತಿದ ಪ್ರಭಾಕರ ಶೆಟ್ಟಿ ಕೋಂಜಾಲಗುತ್ತು. ಪ್ರದ್ಯುಮ್ನ ರಾವ್, ಚೆನ್ನಪ್ಪ ಶೆಟ್ಟಿ, ಗಣೇಶ್ ಶೆಟ್ಟಿ, ಕಾಂತಪ್ಪ ಶೆಟ್ಟಿ, ರಘುನಾಥ ಶೆಟ್ಟಿ ಮೊಕುಲು ಮಾತ ಇತ್ತೆರ್.

ಸಂತೋಷ್ ಸುವರ್ಣ ಬಿನ್ನೆರೆನ್ ಎದ್ಕೊಂಡೆರ್. ವಿಜೇಶ್ ಶೆಟ್ಟಿ ಸನ್ಮಾನಿತೆರ್ನ ಪೊಲಬು ಮಲ್ತ್ ಕೊರಿಯೆರ್. ಅಮಿತಾ ಸುದೀಪ್ ಸೊಲ್ಮೆ ಸಂದಾಯೆರ್. ಶರತ್ ಶೆಟ್ಟಿ ಸಭೆ ಸುಧಾರಿಕೆ ಮಲ್ತೆರ್.
ಬೊಲ್ಪುಗು ನಾಗೇಶ್ ಬಪ್ಪನಾಡು ಕೂಟದಕ್ಲೆರ್ದ್ ನಾದಸ್ವರ ವಾದನ, ಕಾರ್ತಿಕ್ ರಾವ್ ಬಳಗರ್ದ ಭಕ್ತಿಗೀತೆ ಗಾಯನ, ಗಣೇಶ್ ಪಾಟೀಲ್ ಮೆರೆರ್ದ್ ಹರಿಕಥೆ ಅಂಚೆನೆ ಶಿಬರೂರು ಮಹಿಳಾ ಮಂಡಳಿದ ಸದಸ್ಯೆರ್ ರ್ದ್ ಸಸಿಹಿತ್ಲು ಪರಮಾನಂದ ಸಾಲ್ಯಾನ್ ನಿರ್ದೇಶನದ “ಬಾಲೆಗ್ ಒಲಿಯಿನ ಭ್ರಾಮರಿ”ನಾಟಕ ಪ್ರದರ್ಶನ ನಡತ್ಂಡ್.

ತಿಬಾರ್ ದ ಬ್ರಹ್ಮಕಲಶ ಉಚ್ಚಯೊಗು ಉಗ್ರಾಣ ಮೂರ್ತ, ಸುರೂತ್ತ ಧರ್ಮ ಸಭೆ

ಸುರತ್ಕಲ್: ತಿಬಾರ್ (ಶಿಬರೂರು) ಶ್ರೀ ಕೊಡಮಣಿತ್ತಾಯ ಕ್ಷೇತ್ರಡ್ ಎ.26 ಕ್ಕ್ ನಡಪರೆ ಉಪ್ಪುನ ಬ್ರಹ್ಮಕುಂಭಾಭಿಷೇಕ ಬೊಕ್ಕ ನಾಗಮಂಡಲ ಅಂಚೆನೆ ವಿಶೇಷ ಜಾತ್ರಾ ಮಹೋತ್ಸವದ ನಿಲೆಟ್ಟ್ ಉಗ್ರಾಣ ಮೂರ್ತ ಕಾರ್ಯಕ್ರಮ ಕ್ಷೇತ್ರದ ತಂತ್ರಿಲಾಯಿನ ವೇದಮೂರ್ತಿ ವೇದವ್ಯಾಸ ತಂತ್ರಿಲೆನ ಪೌರೋಹಿತ್ಯಡ್ ಸೋಮವಾರ ಬೊಲ್ಪುಗು ನಡತ್ಂಡ್.

ಸುರುಕ್ಕಾದ್ ತಿಬಾರ್ ಗುತ್ತುದ ಭಂಡಾರ ಸಾನೊಡು ಶ್ರೀ ಕೊಡಮಣಿತ್ತಾಯ ದೈವಗ್ ಸಾಮೂಹಿಕ ಪ್ರಾರ್ಥನೆ ಮಲ್ತೆರ್. ಅಯಿರ್ದ್ ಬೊಕ್ಕ ನಡತಿನ ಸುರೂತ್ತ ಧರ್ಮ ಸಭೆನ್ ಬಿನ್ನೆರ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ಈ ಪೊರ್ತುಡು ಪಾತೆರಿನ ಸಂಜೀವಿನಿ ಟ್ರಸ್ಟ್ ಅಧ್ಯಕ್ಷೆರ್ ಡಾ. ಸುರೇಶ್ ರಾವ್ ಎಕ್ಕಾರ್ ಮೇರ್, “ಶಿಬರೂರು ಕ್ಷೇತ್ರಗ್ ತಲೆತಲಾಂತರದ ಇತಿಹಾಸ ಉಂಡು. ಮುಲ್ತ ಮಣ್ಣ್ ಗ್ ಲ ರೋಗ ಗುಣ ಮಲ್ಪುನ ಶಕ್ತಿ ಇತ್ತ್ ದ್ ಭಕ್ತೆರ್ ಕ್ಷೇತ್ರಕ್ಕೆ ಹೆಚ್ಚಿನ ಸಂಖ್ಯೆಡ್ ಬತ್ತ್ ದ್ ಪುನೀತೆರಾವೊಂದುಲ್ಲೆರ್. ಕ್ಷೇತ್ರಡ್ ಇನಿ ನಡತಿನ ಉಗ್ರಾಣ ಮುಹೂರ್ತ ಕಾರ್ಯಕ್ರಮರ್ದ್ ಸುರುವಾದ್ ಮಾತಾ ಧಾರ್ಮಿಕ ಕಾರ್ಯಕ್ರಮಕ್ಕುಲು ಯಶಸ್ವಿಯಾದ್ ನೆರವೇರಡ್ ಪಂಡೆರ್.

ಕಟೀಲು ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಸನತ್ ಶೆಟ್ಟಿ ಪಾತೆರ್ದ್, “ಶ್ರೀ ಕ್ಷೇತ್ರಡ್ ನಡಪುನ ಮಾತಾ ಕಾರ್ಯಕ್ರಮಕ್ಲೆಗ್ ಒವುಲ ಅಡಚಣೆ ಬರಂದೆ ಕಟೀಲ್ ದೇವಿನ ಅನುಗ್ರಹೊಡು ಸಾಂಗವಾದ್ ನಡಪಡ್. ಕ್ಷೇತ್ರಗ್ ಬರ್ಪಿನ ಭಕ್ತೆರ್ ದೈವದ ಅನುಗ್ರೊಹೊಗು ಪಾತ್ರರಾವಡ್” ಪಂದ್ ಶುಭ ಹಾರೈಕೆ ಮಲ್ತೆರ್.

ಧರ್ಮ ಸಭೆತ್ತ ಮತ್ತರ್ಮೆಡ್ ಕಟೀಲು ಕ್ಷೇತ್ರದ ಅನುವಂಶಿಕ ಅರ್ಚಕೆರಾಯಿನ ವೇದಮೂರ್ತಿ ಲಕ್ಷ್ಮೀನಾರಾಯಣ ಅಸ್ರಣ್ಣೆರ್, ಶಿಬರೂರು ಗುತ್ತಿನಾರ್ ಉಮೇಶ್ ಎನ್. ಶೆಟ್ಟಿ, ಕಟೀಲು ಕ್ಷೇತ್ರದ ಅನುವಂಶಿಕ ಮೊಕ್ತೇಸರೆರ್ ಸನತ್ ಕುಮಾ‌ರ್ ಶೆಟ್ಟಿ ಕೊಡೆತ್ತೂರುಗುತ್ತು, ಬ್ರಹ್ಮಶ್ರೀ ವೇದವ್ಯಾಸ ತಂತ್ರಿಲು ಶಿಬರೂರು ಮಠ, ಸಹಾಯಕ ಆಯುಕ್ತೆರ್ ಹರ್ಷವರ್ಧನ ಎಸ್.ಜೆ. , ಮುಲ್ಕಿ ಸೀಮೆದ ಅರಸೆರ್ ಎಂ. ದುಗ್ಗಣ್ಣ ಸಾವಂತೆರ್, ವೇ.ಮೂ. ವೆಂಕಟರಾಜ ಉಡುಪೆರ್ ಅತ್ತೂರುಬೈಲು, ವೇ.ಮೂ. ಶ್ರೀನಿವಾಸ ಭಟ್, ವೇ.ಮೂ. ಹರಿದಾಸ ಉಡುಪೆರ್ ಗೋಪಾಲಕೃಷ್ಣ ಮಠ, ಡಾ.ಸುರೇಶ್ ರಾವ್ ಮುಂಬೈ, ಟ್ರಸ್ಟಿ ಮಧುಕರ್ ಅಮೀನ್, ಕಾರ್ಯಾಧ್ಯಕ್ಷೆರ್ ಪ್ರದ್ಯುಮ್ನ ರಾವ್ ವೇದವ್ಯಾಸ ಉಡುಪ ದೇವಸ್ಯ ಮಠ ಕೊಡೆತ್ತೂರು, ಭುವನಾಭಿರಾಮ ಉಡುಪ, ಗಣಪತಿ ಮಯ್ಯ, ಸುಬ್ರಹ್ಮಣ್ಯ ಭಟ್, ನಾಗೇಂದ್ರ ಭಾರಧ್ವಾಜ ಜ್ಯೋತಿಷ್ಯಿ, ಹಯವದನ ಭಟ್ ಕೈಯೂರು, ಪ್ರಭಾಕರ ಶೆಟ್ಟಿ ಕೋಂಜಾಲಗುತ್ತು, ನಿತಿನ್ ಹೆಗ್ಡೆ ಯಾನೆ ತಿಮ್ಮ ಕಾವ, ಕಾವರ ಮನೆ ಎಕ್ಕಾರು, ಶಂಭು ಮುಕ್ಕಾಲ್ದಿ, ಜಯರಾಮ್ ಶೆಟ್ಟಿ, ದಿನೇಶ್ ಭಂಡ್ರಿಯಾಳ್ ತಾಳಿಪಾಡಿಗುತ್ತು, ಬಾಬು ಭಂಡ್ರಿಯಾಲ್ ಪಡ್ರೆ ಚಾವಡಿ ಮನೆ, ಗುರುರಾಜ್ ಮಾಡ ಬೊಳ್ಳೊಳ್ಳಿಮಾರುಗುತ್ತು, ಸೀತಾರಾಮ ಶೆಟ್ಟಿ, ಲಕ್ಷ್ಮಣ ಅಮೀನ್ ಕೋಡಿಕಲ್, ಅತುಲ್ ಕುಡ್ವ, ಶಂಕರ ರೈ ಕುಳಾಯಿಗುತ್ತು, ಬಾಲಕೃಷ್ಣ ಶೆಟ್ಟಿ ಹೊಸಬೆಟ್ಟುಗುತ್ತು, ಚಿನ್ನಯ ಮಾಡ, ಶಂಕರ ಹೆಗ್ಡೆ, ಮದ್ಯಬೀಡು, ವಿಶ್ವನಾಥ ಶೆಟ್ಟಿ ಯಾನೆ ಸದಾಶಿವ ಶೆಟ್ಟಿ ಏತಮೊಗರುಗುತ್ತು, ಸುಧಾಕರ ಶೆಟ್ಟಿ ಗುತ್ತಿನಾರ್ ದೆಪ್ಪುಣಿಗುತ್ತು- ಅತಿಕಾರಿಬೆಟ್ಟು, ಪ್ರಭಾಕರ ಶೆಟ್ಟಿ, ಪನೋಡಿಗುತ್ತು, ಕರಿಯ ಮಾರ್ಲ ಮದಕಾಡಿಗುತ್ತು, ಮುಚ್ಚೂರು ಬಾಳಿಕೆ ಪ್ರಸಾದ್ ಶೆಟ್ಟಿ, ಬಾಲಕೃಷ್ಣ ಶೆಟ್ಟಿ ಅಂಗಡಿಗುತ್ತು, ದಿವಾಕರ ಆಳ್ವ ತೋಕೂರುಗುತ್ತು, ಬಂಕಿ ನಾಯ್ಗೆರ್ ಸುರತ್ಕಲ್, ಸುಧಾಕರ ಶೆಟ್ಟಿ ಮೂಡಗುತ್ತು, ಅತ್ತೂರು, ರಘುರಾಮ ಮಾಡ ಕಿಲೆಂಜೂರು, ಸದಾಶಿವ ಸಂಕು ಶೆಟ್ಟಿ ಶಿಬರೂರುಗುತ್ತು, ಯಾದವಕೃಷ್ಣ ಶೆಟ್ಟಿ, ಲಕ್ಷ್ಮೀನಾರಾಯಣ ರಾವ್ ಕೈಯೂರುಗುತ್ತು, ಬಾಲಕೃಷ್ಣ ಪುತ್ತುರಾಯೆರ್ ಕೈಯೂರು, ನಾಗೇಂದ್ರ ಕಾಮತ್, ಸುಧಾಕರ್ ಶೇಣವ, ಶ್ರೀಧರ ನಾಯ್ಕ ಕೋರ್ಯಾರು ಗುತ್ತು, ಆನಂದ ಆಳ್ವ ಕೋರ್ಯಾರ್ ಬಾಳಿಕೆ, ಶಿವಾನಂದ ಶೆಟ್ಟಿ ಪಡುಮನೆ, ತುಕರಾಮ ಶೆಟ್ಟಿ ಪರ್ಲಬೈಲುಗುತ್ತು, ರಘುನಾಥ ಶೆಟ್ಟಿ ಅಶ್ವತ್ವದಡಿ, ಸುಧಾಕರ ಶೆಟ್ಟಿ, ಪಾತ್ರಿ ಪ್ರಸಾದ್ ಶೆಟ್ಟಿ ಪೆರ್ವಾಜೆ ಮೊಕುಲು‌ ಮಾತ ತನಿಷ್ಕಾ ಶೆಟ್ಟಿ ಬೊಕ್ಕ ಕೋರ್ಯಾರು ಗುತ್ತು ಜೀತೇಂದ್ರ ಶೆಟ್ಟಿ ಬಿನ್ನೆರೆನ್ ಸ್ವಾಗತ ಮಲ್ತೆರ್. ವಿಜೇಶ್ ಶೆಟ್ಟಿ ಪ್ರಾಸ್ತಾವಿಕ ನುಡಿ ಪಂಡೆರ್. ಸಾಯಿನಾಥ್ ಶೆಟ್ಟಿ ಕಾರ್ಯಕ್ರಮ ನಿರೂಪಣೆ ಮಲ್ತೆರ್ . ಸುರೇಂದ್ರ ಶೆಟ್ಟಿ ದೇಲಂತಬೆಟ್ಟು ಸೊಲ್ಮೆ ಸಂದಾಯೆರ್.

ಸೀನಿಯರ್ ಚೇಂಬರ್ ಇಂಟರ್ ನ್ಯಾಷನಲ್ ಪುತ್ತೂರು ಲೀಜನ್ ರ್ದ್ ಪುತ್ತೂರು ಜಾತ್ರೆದ ಲೆಕ್ಕೊಡು ಸಾಂಸ್ಕೃತಿಕ ವೈವಿಧ್ಯ ಭಕ್ತಿ ಗಾನ ನೃತ್ಯ ಲೇಸ್

ಸೀನಿಯರ್ ಚೇಂಬರ್ ಇಂಟರ್ ನ್ಯಾಷನಲ್ ಪುತ್ತೂರು ಲೀಜನ್ ರ್ದ್ ಮಹತೋಭಾರ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನ ಪುತ್ತೂರು ಜಾತ್ರೆದ ಲೆಕ್ಕೊಡು ವೈಭವದ ಸಾಂಸ್ಕೃತಿಕ ವೈವಿಧ್ಯ ಭಕ್ತಿ ಗಾನ ನೃತ್ಯ ಲೇಸ್ ನಡತ್ಂಡ್.

ಅಧ್ಯಕ್ಷೆರ್ ಮಲ್ಲಿಕಾ ಜೆ ಆರ್ ರೈ ಮೇರ್ ಗಣೇಶನ ತುಳು ಭಕ್ತಿ ಸುಗಿಪುದೊಟ್ಟಿಗೆ ಲೇಸ್ ಸುರು ಆಂಡ್. ಸಮನ್ವಿ ರೈ ನುಳಿಯಾಲು, ಸಮೃದ್ಧಿ ಜೆ ಶೆಟ್ಟಿ ಮೆರೆನ ಪದ್ಯ ಬೊಕ್ಕ ನೃತ್ಯ ಜನಕ್ಲೆಗ್ ಭಾರಿ ಕುಸಿ ಕೊರ್ಂಡ್.

ಕಾರ್ಯದರ್ಶಿ ರೋಹಿಣಿ ಆಚಾರ್ಯ, ಕೋಶಾಧಿಕಾರಿ ಸುಮಂಗಲ ಶೆಣೈ, ಜತೆಕಾರ್ಯದರ್ಶಿ ಹರಿಣಾಕ್ಷಿ ಜೆ ಶೆಟ್ಟಿ ಬೊಕ್ಕ ಎಸ್ ಸಿ ಐ ಸದಸ್ಯೆರ್ ಸಹಕಾರ ಮಲ್ದೆರ್.

ಪುತ್ತೂರುಡು ಸುರುತ್ತ ಸರ್ತಿ ಸ್ಥಾಪನೆ ಆಯಿನ ಸೀನಿಯರ್ ಚೇಂಬರ್ ಇಂಟರ್ ನ್ಯಾಷನಲ್ sci ಪುತ್ತೂರು ಲಿಜನ್ ಪೊಸ ಪಜ್ಜೆಗ್ ಈ ಲೇಸ್ ಮುನ್ನುಡಿ ದೀತ್ಂಡ್.

ಬಡಗುತಿಟ್ಟುದ ಭಾಗವತೆರ್ ಸುಬ್ರಹ್ಮಣ್ಯ ಧಾರೇಶ್ವರ ದೇವೆರೆ ಪಾದ ಸೇರಿಯೆರ್

ಬಡಗುತಿಟ್ಟು ಯಕ್ಷಗಾನದ ಪುಗರ್ತೆದ ಭಾಗವತೆರ್ ಸುಬ್ರಹ್ಮಣ್ಯ ಧಾರೇಶ್ವರ (67) ಮೇರ್ ಬೆಂಗಳೂರುಡು ಇನಿ ದೇವೆರೆ ಪಾದ ಸೇರಿಯೆರ್.

ಪೆರ್ಡೂರು ಯಕ್ಷಗಾನ ಮೇಳಡ್ 26 ವರ್ಷರ್ದ್ಲ ಎಚ್ಚ ವರ್ಷ ಭಾಗವತೆರಾದ್ ಸೇವೆ ಮಲ್ದೆರ್. ಮೆರೆಗ್ “ಕರಾವಳಿ ಕೋಗಿಲೆ” ಪನ್ಪಿನ ಬಿರ್ದ್ ಅತ್ತಾಂದೆ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಸೇರ್ದ್ ಮಸ್ತ್ ಪ್ರಶಸ್ತಿ ,ಮಾನಾದಿಗೆ ತಿಕ್ ದ್ಂಡ್. ಧಾರೇಶ್ವರ ಮೆರೆಗ್ ಬೊಡೆದಿ, ಹವ್ಯಾಸಿ ಕಲಾವಿದೆ ಮಗೆ ಬೊಕ್ಕ ಮಗಲ್ ಉಲ್ಲೆರ್.