November 2026

ನನ ಪ್ರತಿ ವರ್ಷಲ ಸೆ.18 ಕ್ಕ್ ‘ತುಳು ದಿನ’ ಆಚರಣೆ

ತುಳು ಅಧಿಕೃತ ಬಾಸೆ ಘೋಷಣೆ ಆತಿನ ದಿನ

ಕುಡ್ಲ : ಕುಡ್ಲಡ್ ನಡತಿನ ವಿಶೇಷ ಸಚಿವ ಸಂಪುಟ ಸಭೆಟ್ಟ್ ತುಳು ಭಾಷೆನ್ ರಾಜ್ಯದ ಹೆಚ್ಚುವರಿ ಆಡಳಿತ ಭಾಷೆಯಾದ್ ಅಂಗೀಕಾರ ಮಲ್ತ್ ದಿನವಾಯಿನ ಸೆ.18 ಕ್ಕ್ ಪ್ರತಿವರ್ಷ ‘ತುಳು ದಿನ’ ಪಂದ್ ಆಚರಣೆ ಮಲ್ಪುವ ಪಂದ್ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಸಚಿವೆರ್, ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವೆರ್ ಯು.ಟಿ. ಖಾದರ್ ಘೋಷಣೆ ಮಲ್ದೆರ್.

ನೆಹರು ಮೈದಾನಡ್ ನ.1 ತಾರಿಕ್‌ಗ್ ನಡತಿನ ಜಿಲ್ಲಾಮಟ್ಟದ ಕರ್ನಾಟಕ ರಾಜ್ಯೋತ್ಸವ ಸಮಾರಂಭಡ್ ರಾಷ್ಟ್ರ ಧ್ವಜಾರೋಹಣ ಮಲ್ತ್‌ದ್, ರಾಜ್ಯೋತ್ಸವ ಸಂದೇಶ ಕೊರ್ತಿನ ಆರ್, ಪಂಚದ್ರಾವಿಡ ಭಾಷೆಡ್ ಒಂಜಾದುಪ್ಪುನ ತುಳು ಬಾಸೆಗ್ ದ.ಕ. ಬೊಕ್ಕ ಉಡುಪಿ ಜಿಲ್ಲೆಗ್ ಸೀಮಿತವಾದ್ ರಾಜ್ಯದ ಹೆಚ್ಚುವರಿ ಆಡಳಿತ ಭಾಷೆದ ಸ್ಥಾನಮಾನ ಕೊರ್ಪಿನ ಮೂಲಕ ಈ ಭಾಗದ ಜನಕ್ಲೆನ ಮಸ್ತ್ ವರ್ಷದ ಬೇಡಿಕೆ ಈಡೇರ್ಂಡ್. ತುಳುಭಾಷೆನ್ 8ನೇ ಪರಿಚ್ಛೇದಗ್ ಸೇರ್ಸಾವುನ ಪ್ರಕ್ರಿಯೆಗ್ ಉಂದು ಸಹಕಾರಿ ಆಪುಂಡು. ತುಳುಕ್ಕು ಅಧಿಕೃತ ಸ್ಥಾನ ತಿಕ್ಕೊಡು ಪಂದ್ ತುಳುವೆರ್‌ನ ಬಹುಕಾಲದ ಬೇಡಿಕೆ ಈಡೇರ್‌ದ್ಂಡ್ ಪಂದ್ ತೆರಿಪಾಯೆರ್.