ಬೆಂಗ್ಲೂರು ತುಳುನಾಡ ಜವನೆರ್ (ರಿ.) ಮುತಾಲಿಕೆಡ್ ತುಳುನಾಡ್ ಟ್ರೋಫಿ
ಬೆಂಗ್ಲೂರು ತುಳುನಾಡ ಜವನೆರ್ (ರಿ.) ಮುತಾಲಿಕೆಡ್ ಭಾಷೆ-ಕ್ರೀಡೆ-ಸೇವೆ ಪನ್ಪುನ ಧ್ಯೇಯವಾಕ್ಯದೊಟ್ಟಿಗೆ ತುಳುನಾಡ್ ಟ್ರೋಫಿ ಗೌಜಿಡ್ ನಡತ್ಂಡ್.
ತಾವರೆಕೆರೆ ಆರ್ ಎನ್ ಎಸ್ ವಿದ್ಯಾನಿಕೇತನ 2 ಡ್ ಆಯೋಜನೆ ಮಲ್ತ್ ದಿತ್ತಿನ TJB ಪ್ರೀಮಿಯರ್ ಲೀಗ್ ಡ್ ಒಟ್ಟು 12 ಕೂಟಲು ಪಾಲ್ ಪಡೆತ್ಂಡ್. ಬೆಂಗ್ಲೂರುಡು ಇಪ್ಪುನ ತುಳುನಾಡ್ ದ ಜವನೆರ್ ಮ್ಯಾಚ್ ತೂದು ಕುಸಿ ಪಡೆಯೆರ್.
ಸುರುತ್ತ ಇನಾಮುನ್ ತುಳುನಾಡ ರಂಗ್ ರಾಜಾಜಿನಗರ ಪಡೆಂಡ, ತುಳುನಾಡ ತುಡರ್ ಯಶವಂತಪುರ ರಡ್ಡನೇ ಇನಾಮುನ್ ಪಡೆತ್ಂಡ್. ತುಳುನಾಡ ಬಿರ್ಸೆರ್ ವೈಟ್ ಫೀಲ್ಡ್ ಬೊಕ್ಕ ತುಳುನಾಡ ಬೊಲ್ಪು ಬನ್ನೇರುಘಟ್ಟ ಮೂಜಿನೇ ಬೊಕ್ಕ ನಾಲ್ ನೇ ಇನಾಮುನ್ ಪಡೆತ್ಂಡ್.
ನೆತ್ತೊಟ್ಟಿಗೆ ತುಳುನಾಡ ಕೇಸರಿ ಯಲಹಂಕ, ತುಳುನಾಡ ಕುರಲ್ ಕೆಂಗೇರಿ, ತುಳುನಾಡ ಸೂರ್ಯಚಂದ್ರೆರ್ ವಿಜಯನಗರ, ತುಳುನಾಡ ಬೊಳ್ಳಿ ಅತ್ತಿಗುಪ್ಪೆ, ತುಳುನಾಡ ಪುರ್ಪ ಎಲೆಕ್ಟ್ರಾನಿಕ್ ಸಿಟಿ, ತುಳುನಾಡ ಸಿರಿ ಜೆಪಿನಗರ, ತುಳುನಾಡ ದಂಡ್ ಪೀಣ್ಯ ಕೂಟಲು ರಾಜಬೂಡುದ ಬೇತೆ ಬೇತೆ ಭಾಗಡ್ ಇಪ್ಪುನ ತುಳುವೆರೆನ್ ಒಟ್ಟುಸೇರ್ಸಾವುನಲ್ಪ ಪ್ರಮುಖ ಪಾತ್ರ ಒಯಿಸೊಂದುಂಡು.
ಸೇವಾ ಚಟುವಟಿಕೆಯಾದ್ ಬೆಂಗ್ಲೂರುದ ರಡ್ಡ್ ಆಶ್ರಮಲೆಗ್ ವಸ್ತ್ರದಾನ ಬೊಕ್ಕ ಅರಿನ್ ಕೊರಿಯೆರ್. ಅತ್ತಂದೆ ತುಳು ಭಾಷೆನ್ 8ನೇ ಪರಿಚ್ಚೇದಗ್ ಸೇರ್ಸಾವುನೆತ್ತೊಟ್ಟಿಗೆ ತುಳುಕ್ಕ್ ಪ್ರಾಧಾನ್ಯತೆ ಕೊರೊಡು ಪನ್ಪುನ ದಿಟ್ಟಿಡ್ ದೇಶದ ಮಾನ್ಯ ಪ್ರಧಾನ ಮಂತ್ರಿಲಾಯಿನ ನರೇಂದ್ರ ಮೋದೀಜಿ ಮೆರೆಗ್ ಪತ್ರದ ಮುಕೇನ ಬಿನ್ನಾಪುನ್ 5000 ಪೋಸ್ಟ್ ಕಾರ್ಡ್ ಅಭಿಯಾನಗ್ ಚಾಲನೆ ಕೊರಿಯೆರ್.
ತುಳುನಾಡ ಕೊಡಿಕ್ಕ್ ಪುಷ್ಪಾರ್ಚನೆ ಸಂದಾದ್, ತುಡರ್ ಅರ್ಲಾವುನ ಮುಕೇನ ಸಂಸ್ಥೆದ ಮಾರ್ಗದರ್ಶಕೆರ್ ಸಂದೀಪ್ ಹೆಗ್ಡೆ ಬೊಕ್ಕ ಸದಾನಂದ ಶೆಟ್ಟಿ ಚಾಲನೆ ಕೊರಿಯೆರ್.
ದುರ್ಗಾಪ್ರಸಾದ್ ಕಡೆಶೀವಾಲಯ ಲೇಸ್ ನ್ ಸುಧಾರಿಕೆ ಮಲ್ತೆರ್. ಸಂಚಾಲಕೆರ್ ಶ್ರುತಿನ್ ಕಡೇಶಿವಾಲಯ ಪ್ರಸ್ತಾವನೆದೊಟ್ಟಿಗೆ ಅಭಿನಂದನೆ ಸಂದಾಯೆರ್.
ಈ ಪೊರ್ತುಡು ಸಂಸ್ಥೆದ ಗುರ್ಕಾರೆ ಮಹೇಶ್ ಬೈಲೂರು, ಕ್ರೀಡಾ ಕಾರ್ಯದರ್ಶಿ ಅರ್ಜುನ್ ಎರ್ಮಾಳ್, ಕೋಶಾಧಿಕಾರಿ ಅಮಿತ್, ಸಹಸಂಚಾಲಕೆರ್ ಶಶಿ ಕಾವೂರ್, ಒತ್ತು ಗುರ್ಕಾರೆ ಹರಿಪ್ರಸಾದ್ ಪಾಲ್ ಪಡೆದಿತ್ತೆರ್.
ಲೇಸ್ ದ ಅಕೇರಿಡ್ ಮಾತ ಗೊಬ್ಬುಗಾರೆರ್ ಮೈದಾನ ಬೊಕ್ಕ ಶಾಲೆದ ಚಾವಡಿನ್ ಸ್ವಚ್ಚ ಮಲ್ಪುನ ಮುಕೇನ ಸ್ವಚ್ಚ ಭಾರತ ಅಭಿಯಾನಡ್ ಪಾಲ್ ಪಡೆಯೆರ್.
