March 24, 2024

ಬಿತ್ತ್ ಲ್ದ ಶ್ರೀ ಭಗವತಿ ಬೊಕ್ಕ ಬಪ್ಪನಾಡ ಶ್ರೀ ದುರ್ಗೆನ ಭೇಟಿ ಆಂಡ್; ವರ್ಷದ ಜಾತ್ರೆಗ್ ಕೊಡಿ ಏರ್ಂಡ್

ಮುಲ್ಕಿ: ಸಸಿಹಿತ್ಲು ಭಗವತಿ ದೇವಿ ಪರಿವಾರ ಸಮೇತ ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿನ ಕ್ಷೇತ್ರೊಗು ಬತ್ತ್ ದ್ ಮೆಗ್ದಿ ಪಲಿ ದೇವಿಯೆರೆನ ಅಪರೂಪದ ಭೇಟಿ ಆಪಿನ ಪೂರ್ವಕಟ್ಟ್ ದ ಪ್ರಕಾರ ಐತಾರ (ಮಾ.24) ಮಧ್ಯಾಹ್ನ ಐತಿಹಾಸಿಕ ಬಪ್ಪನಾಡ್ ಜಾತ್ರೆಗ್ ಕೊಡಿ (ಧ್ವಜಾರೋಹಣ) ಏರ್ಂಡ್.

ಕ್ಷೇತ್ರದ ತಂತ್ರಿಲಾಯಿನ ಶಿಬರೂರು ಗೋಪಾಲಕೃಷ್ಣ ತಂತ್ರಿಲು,ಅರ್ಚಕೆರ್ ಶ್ರೀಪತಿ ಉಪಾಧ್ಯಾಯೆರ್, ನರಸಿಂಹ ಭಟ್ ಮೊಕ್ಲೆನ ಮುಂದಾಳತ್ವಡ್ ವಿಶೇಷ ಪ್ರಾರ್ತನೆ, ಮಹಾಪೂಜೆ ನಡತ್ಂಡ್.

ಪಲಿ ಶ್ರೀ ಭಗವತಿನ ಅನು ದೆತೊನಿ ಬೊಕ್ಕ ಮೆಗ್ದಿ ದುರ್ಗಾಪರಮೇಶ್ವರಿ ನ ವರ್ಷದ ಜಾತ್ರೆಗ್ ಕೊಡಿ ಏರ್ಂಡ್. ಬೊಕ್ಕ ಬಲಿ ಉತ್ಸವ, ಶ್ರೀ ಭಗವತಿ ಪರಿವಾರದಕ್ಲೆನ ಜಕ್ಕೆ ನಲಿಕೆ ಆದ್ ಭಕ್ತೆರೆಗ್ ಅನ್ನ ಸಂತರ್ಪಣೆ ನಡತ್ಂಡ್.

ಈ ಪೊರ್ತುಡು ಅತ್ತೂರು ಬೈಲು ರಾಘವೇಂದ್ರ ಉಡುಪೆರ್, ಧರ್ಮದರ್ಶಿ ಹರಿಕೃಷ್ಣ ಪುನರೂರು, ಅನುವಂಶಿಕ ಮೊಕ್ತೇಸರೆರ್ ದುಗ್ಗಣ್ಣ ಸಾವಂತೆರ್, ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ಟಿ, ಕಾರ್ಯ ನಿರ್ವಹಣಾಧಿಕಾರಿ ಜಯಮ್ಮ, ಅಧಿಕಾರಿ ಶಿವ ಶಂಕರ್, ಮುಲ್ಕಿ ಶ್ರೀ ವೆಂಕಟರಮಣ ದೇವಸ್ಥಾನದ ಮೊಕ್ತೇಸರೆರ್ ಅತುಲ್ ಕುಡ್ವ, ಸಸಿಹಿತ್ಲು ಶ್ರೀ ಭಗವತಿ ಕ್ಷೇತ್ರದ ಮೊಕ್ತೇಸರೆರ್ ಅಪ್ಪು ಯಾನೆ ಶ್ರೀನಿವಾಸ ಪೂಜಾರಿ, ಅಧ್ಯಕ್ಷೆರ್ ವಾಮನ ಇಡ್ಯಾ, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ನಾಲ್ಕುಪಟ್ಣ ಮೊಗವೀರ ಸಭಾದ ಅಧ್ಯಕ್ಷೆರ್ ಸುಜಿತ್ ಸಾಲ್ಯಾನ್, ಜೀರ್ಣೋದ್ಧಾರ ಸಮಿತಿದ ಸುನಿಲ್ ಆಳ್ವ, ಡಾ. ಹರಿಶ್ಚಂದ್ರ ಸಾಲ್ಯಾನ್ ಬೊಕ್ಕ ಭಾರಿ ಸಂಖ್ಯೆಡ್ ಭಕ್ತೆರ್ ಸೇರ್ದಿತ್ತೆರ್.

“ವರ್ಕಾಡಿ ಕ್ಷೇತ್ರಪಾಲ” ತುಳು ಭಕ್ತಿ ಸುಗಿಪು ಬುಡುಗಡೆ

ಬೆಂಗಳೂರು: ವರ್ಕಾಡಿ ಶ್ರೀ ಕಾವಿ ಸುಬ್ರಹ್ಮಣ್ಯ ದೇವಸ್ಥಾನದ ಬ್ರಹ್ಮ‌ಕಲಶೋತ್ಸವದ ಗೌಜಿ ಸಂಭ್ರಮದ ಪೊರ್ತುಡು “ವರ್ಕಾಡಿ ಕ್ಷೇತ್ರಪಾಲ” ಪನ್ಪಿನ ತುಳು ಭಕ್ತಿ ಸುಗಿಪುಗ್ ಸಾಹಿತ್ಯ ಬರೆಯಿನ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆರ್ ಪುರುಷೋತ್ತಮ ಚೇಂಡ್ಲಾ ಬೊಕ್ಕ ಪುಗರ್ತೆದ ಗಾಯಕೆ ಎಸ್.ಕೆ.ಪ್ರಶಾಂತ್ ಮೆರೆನ ಪೊರ್ಲ ಸ್ವರೊಟು ಪದ ಮೂಡ್ದ್ ಬೈದ್ಂಡ್.

ಮಾ.24 ಐತಾರ, ಕಾಂಡೆ 9 ಗಂಟೆಗ್ ಶ್ರೀ ವೀರಾಂಜನೇಯ ದೇವಸ್ಥಾನ ಮಹಾಲಕ್ಷ್ಮೀ ಪುರಂ, ಬೆಂಗಳೂರು ಮೂಲು ವರ್ಕಾಡಿ ಕ್ಷೇತ್ರಪಾಲ ಭಕ್ತಿ ಸುಗಿಪು ಸ್ವರಾಲಯ YouTube ಚಾನೆಲ್ ಡ್ ಲೋಕಾರ್ಪಣೆ ಆಂಡ್.

ಈ ಸಂದರ್ಬೊಡು ಶ್ರೀ ಪುರುಷೋತ್ತಮ್ ಚೇಂಡ್ಲಾ, ಎ.ಯನ್.ಕುಲಾಲ್ ಅಡ್ಡೂರು, ರೋಹಿತ್ ಬಂಗೇರ, ಸಂಕಬೈಲು ಮಂಜುನಾಥ ಅಡಪ್ಪ, ಸುಬೋಧ್ ನಾಯ್ಕ ವರ್ಕಾಡಿ, ಚಿತ್ತರಂಜನ್ ನಾಯ್ಕ್, ಮನೋಹರ್, ವಿಶ್ವನಾಥ್ ಕುಲಾಲ್, ಶಶಿಧರ್ ನಾಯ್ಕ್ ಮಂಟಮೆ, ಪ್ರಥಮ್ ಚೇಂಡ್ಲಾ, ಧೀರಜ್ ಅತ್ತಾವರ್, ಯಾದವ ಎಸ್ ಕಲ್ಲಾಪು ಮೊಕುಲು ಪೂರ ಬಿಡುಗಡೆದ ಲೇಸ್ ಡ್ ಪಾಲ್ ಪಡೆದ್ ಎಡ್ಡೆಪ್ಪು ಬಯಕಿಯೆರ್.
✒️ಯಾದವ ಎಸ್ ಕಲ್ಲಾಪು

ರಾಜಬೂಡು ತುಳು ಸಂಘಟನೆದ ಸದಾ ಕಾರ್ಕಳ ಮೆರೆಗ್ ಭಾವಪೂರ್ಣ ಶ್ರದ್ಧಾಂಜಲಿ ಸಭೆ

ಬೆಂಗಳೂರು: ರಾಜಬೂಡುಡು ಮಿನ್ಕೊಂದಿತ್ತಿನ ಪೆರ್ಮೆದ ತುಳುವೆ ಬೊಕ್ಕ ಕಾಯಕ ರತ್ನ ಬಿರ್ದ್ ಮಾನಾದಿಗೆ ಪಡೆಯಿನ ಸದಾನಂದ ಪೂಜಾರಿ ಕಾರ್ಕಳ ಮೆರೆನ ಶ್ರದ್ಧಾಂಜಲಿ ಸಭೆ ತುಳುವೆರೆಂಕುಲು ಬೆಂಗಳೂರುದ ಮುತಾಲಿಕೆಡ್ ಮೆಜೆಸ್ಟಿಕ್ ಕೈತಲ್ದ ಹೋಟೆಲ್ ಸ್ವಾಗತ್ ದ ಚಾವಡಿಡ್ ಮಾ.24 ಐತಾರ ನಡತ್ತ್ಂಡ್.

ತುಳುವೆರೆಂಕುಲು ಬೆಂಗಳೂರುದ ಜೊತೆ ಕಾರ್ಯೆಂತೆರ್ ಆದ್ ಬೆನ್ತಿನ ಮಾಮಲ್ಲ ತುಳುವೆ,ಸಜ್ಜನೆ, ಸದಾನಂದ ಪೂಜಾರಿ ಕಾರ್ಕಳ ಮೆರೆನ ನಂಬರೆನೇ ಸಾಧ್ಯ ಆವಂದಿನ ಮರಣದ ಸುದ್ದಿ ಕೇನ್ದ್ ತುಳುವ ಬಂದುಲೆಗ್ ಮಸ್ತ್ ಬೇಜಾರ್ ಆತ್ಂಡ್. “ಸದಾ ಕಾರ್ಕಳ” ಪಂಡ್ದೇ ಮಾತಾ ತುಳುವ ಬಂದುಲೆನ ಉಡಲ್ಡ್ ಪುಗರ್ತೆ ಪೆಡೆದಿತ್ತೆರ್. ತುಳು ಸಂಘಟನೆದ ಕೆಲವು ಮುಖ್ಯಸ್ಥೆರೆನಕುಲು ಪಾತೆರೊಂದು ಸದಾ ಕಾರ್ಕಳ ಮೇರ್ ಸದಾ ಸಮಾಜ ಸೇವೆನ್ ಸಮಾಜಗೋಸ್ಕರ ಮಲ್ತೊಂದ್ ತನ್ನ ಉಡಲ್ಡ್ ಮಸ್ತ್ ಗೆಲ್ಮೆನೆಡ್ ಇತ್ತೆರ್. ವೊವ್ವೆ ಜಾತಿ ಬೇದ ದಾಂತೆ ಮಾತಾ ಸಮುದಾಯದ ಬಂದುಲೆಡ ಸ್ನೇಹ ಜೀವಿ ಆದ್ ಎಡ್ಡೆ ಪುದರ್ ಪಡೆದಿತ್ತೆರ್. ಮೇರ್ ಕನ್ನಡ ಸಂಘಟನೆಡಲ ಸಮಾಜ ಸೇವೆ ಮಲ್ತ್ ದ್ ಸೇವಾಲಯ ಪಂಡ್ದ್ ಕೂಟೊನ್ ಕಟ್ಟ್ ದ್ ಏತೋ ಸಮಾಜದಕ್ಲೆನ ಬದ್ ಕ್ ಗ್ ಬೊಲ್ಪಾದ್ ಕಾಯಕ ರತ್ನ ಪಂಡ್ದ್ ಬಿರ್ದ್ ಮಾನಾದಿಗೆ ಪಡೆದಿತ್ತೆರ್.ಆಂಡ ಸದಾ ಕಾರ್ಕಳನಂಚಿನ ಎಡ್ಡೆ ಉಡಲ್ ಇನಿ ಇಜ್ಜಿ ಪನ್ಪಿನ ಬೇನೆ ಬೇಜಾರ್ ಮಾತಾ ಸಂಘಟನೆದ ಮುಖ್ಯಸ್ಥೆರ್ ಆರೆನ ತುಳು ಅಪ್ಪೆನ ಚಾಕಿರಿ ಬೊಕ ಸೇವಾಲಯ ಕಜ್ಜೊದ ಬಗ್ಗೆ ರಡ್ಡ್ ಪಾತೆರ್ದ್ ಅಂಚೆನೇ ಬೇಜಾರ್ದ ನಾಲು ಪನಿ ಕಣ ನೀರ್ ಪಾಡ್ದ್ ಸದಾ ಕಾರ್ಕಳ ಮೆರೆನ ಆತ್ಮೊಗ್ ಸದ್ಗತಿ ತಿಕ್ಕಂಡ್ ಪಂಡ್ದ್ ದೇವೆರೆಡ ಕೇನೊನಿಯೆರ್.

ತುಳುವೆರೆಂಕುಲು ಸಂಘಟನೆದ ಗುರ್ಕಾರ್ಲು ಜಲಜ ಶೇಖರ್, ಕಾರ್ಯೆಂತೆರ್ ಮಟ್ಟಿ ರಾಮಚಂದ್ರ ರಾವ್, ಕೆ.ಎನ್.ಅಡಿಗ, ವಿಜಯ ಕುಮಾರ್ ಕುಲಶೇಖರ್, ಚಂದ್ರಹಾಸ್ ಶೆಟ್ಟಿಗಾರ್, ಗೋಪಾಲಕೃಷ್ಣ ,ದಕ್ಷಿಣ ಕನ್ನಡಿಗರ ಸಂಘದ ವೈ ವಿ ಜಯಂತ್ ರಾವ್,ತುಳುಕೂಟದ ಗುರ್ಕಾರ್ಲು ಸುಂದರ್ ರಾಜ್ ರೈ, ತುಳುವೆರೆ ಚಾವಡಿದ ಮಾನಾದಿಗೆದ ಗುರ್ಕಾಲು ಪುರುಷೋತ್ತಮ ಚೇಂಡ್ಲ, ಗುರ್ಕಾರ್ಲು ಉಮೇಶ್ ಪೂಂಜ, ವಿಶ್ವನಾಥ್ ಕುಲಾಲ್, ಸೃಷ್ಟಿ ಕಲಾಭೂಮಿ‌ ಬೆಂಗಳೂರುದ ಸಂಸ್ಥಾಪಕೆ ಸಂಕಬೈಲು ಮಂಜುನಾಥ ಅಡಪ, ಸಂಪಾಜೆ ರಂಗ ಸಂಗಮದ ರಾಜ್ ಸಂಪಾಜೆ, ನವೀನ್ ಹೆಗ್ಡೆ, ತೌಳವ ಸಂಘದ ರಾಜಾರಾಮ್ ಶೆಟ್ಟಿ ಉಪ್ಪಳ, ಕನ್ನಡ ಕರಾವಳಿ ಅಧ್ಯಕ್ಷೆರ್ ನಾಗರಾಜ್ ಶೆಟ್ಟಿ, ಸಂಘಟಕಿ ಲೀಲಾವತಿ ಶೆಟ್ಟಿ, ಪವರ್ ಫ್ರೆಂಡ್ಸ್ ಬೊಕ್ಕ ಬಿಲ್ಲವ‌ ಸಮುದಾಯದ ಶಿವ್ ಸಾಲ್ಯಾನ್, ಪುಷ್ಪರಾಜ್ ಬಿಲ್ಲವ, ಲೋಕನಾಥ್ ಪೂಜಾರಿ, ತುಳುನಾಡು ಫ್ರೆಂಡ್ಸ್ ಅಸೋಸಿಯೇಷನ್ ಅಶೋಕ್ ಕರ್ಕೇರ, ರಾಜೇಶ್ ಕೊಟ್ಯಾನ್ ಅಂಚೆನೇ ಮಾತಾ ಸಂಘಟೆನೆದ ಸದಸ್ಯೆರ್ ಶ್ರದ್ಧಾಂಜಲಿ ಸಭೆಟ್ ಪಾಲ್ ಪಡೆದಿತ್ತೆರ್‌. ಅಂಚೆನೆ ಸದಾನಂದ ಪೂಜಾರಿ ಮೇರ್ ಬೆಂಗಳೂರುಡು ಅಪ್ಪೆ ಬಾಸೆ ತುಳುತ ಪೆರ್ಮೆದ ಟೈಮ್ಸ್ ಕುಡ್ಲ ಪತ್ರಿಕೆಗಲ ಬೆರಿ ಬಲ ಕೊರೊಂದಿತ್ತೆರ್.

-ಯಾದವ ಎಸ್ ಕಲ್ಲಾಪು, ಬೆಂಗಳೂರು

ಪ್ರಿಯದರ್ಶಿನಿ ಸೊಸೈಟಿದ ಕಿನ್ನಿಗೋಳಿ ಶಾಖೆಡ್ ಪೂಜೆ

ಕಿನ್ನಿಗೋಳಿ : ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿದ ಕಿನ್ನಿಗೋಳಿ ಶಾಖೆ ಉದಿಪನದ ನಿಲೆಟ್ಟ್ ಐತಾರ ಕಾಂಡೆ ಪೂರ್ವಭಾವಿ ಪೂಜಾ ಕಾರ್ಯಕ್ರಮ ನಡತ್ಂಡ್.

ಈ ಪೊರ್ತುಡು ಪ್ರಿಯದರ್ಶಿನಿ ಸೊಸೈಟಿದ ಅಧ್ಯಕ್ಷೆರ್ ವಸಂತ ಬೆರ್ನಾಡ್, ಉಪಾಧ್ಯಕ್ಷೆರ್ ಪ್ರತಿಭಾ ಕುಳಾಯಿ, ನಿರ್ದೇಶಕೆರಾಯಿನ ಗೌತಮ್ ಜೈನ್, ಉಮಾನಾಥ್ ಶೆಟ್ಟಿಗಾರ್, ಡಾ. ಗಣೇಶ್ ಅಮೀನ್ ಸಂಕಮಾರ್, ನವೀನ್ ಕುಮಾರ್ ಪಂಜ, ಗಣೇಶ್ ಪ್ರಸಾದ್ ದೇವಾಡಿಗ, ತನುಜಾ ಶೆಟ್ಟಿ, ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಸುದರ್ಶನ್, ಕಿನ್ನಿಗೋಳಿ ಶಾಖೆದ ಮ್ಯಾನೇಜರ್ ಮೋಹನ್ ದಾಸ್ ಇತ್ತೆರ್.

ತಮಿಳ್ ಡ್ ನಟನೆ ಮಲ್ಪೆರೆ ಉಲ್ಲೆರ್ ಬಿಗ್ ಬಾಸ್ ರೂಪೇಶ್‌ ಶೆಟ್ಟಿ

ಪುಗರ್ತೆದ ತಮಿಳು ಹಾಸ್ಯ ನಟೆ ಯೋಗಿ ಬಾಬುನೊಟ್ಟಿಗೆ ನಟನೆ ಮಲ್ಪೆರೆ ಉಲ್ಲೆರ್ ನಮ್ಮೂರುದ ಬಿಗ್‌ಬಾಸ್‌ ವಿನ್ನರ್‌ ನಮ್ಮ ತುಳುನಾಡ್ ದ ರೂಪೇಶ್‌ ಶೆಟ್ಟಿ ಗಡಿ ದಾಟ್ ದ್ ಪೋದು ಸಿನೆಮಾ ರಂಗಡ್ ಸಾಧನೆ ಮಲ್ತೊಂದು ಉಲ್ಲೆರ್.

ಅಂಚಾದ್ ಇತ್ತೆ ಮೇರ್ ತಮಿಳ್ ಡ್ ನಟನೆ ಮಲ್ಪುನ ಅವಕಾಶ ಪಡೆಯಿನವು ಪೊಸ ಸೇರ್ಪಡೆ. ಬಿಗ್‌ ಬಾಸ್‌ ವಿನ್ನರ್‌ ಆಯಿನ ಬೊಕ್ಕ ಮೆರೆನ ವೃತ್ತಿ ಜೀವನ ಕುಡೊಂಜಿ ಎತ್ತರಗ್ ಪೋತ್ಂಡ್. ನೆರ್ದ್ ದುಂಬು ಮೇರ್ ಮಲ್ತಿನ ಸಾಧನೆ, ಪಡೆಯಿನ ಜನಪ್ರಿಯತೆರ್ದ್ ಮೆರೆಗ್ ಬಿಗ್‌ಬಾಸ್‌ಡ್ ಅವಕಾಶ ತಿಕ್ ದ್ಂಡ್.‌ ಬೊಕ್ಕ ಬಿಗ್‌ಬಾಸ್‌ ಇಲ್ಲಲ್ ತೂಪಾಯಿನ ನಿರ್ವಹಣೆರ್ದ್ ವಿನ್ನರ್‌ ಆಯಿನಗ ತುಳುನಾಡ್ ದೊಟ್ಟಿಗೆ ಇಡೀ ರಾಜ್ಯನೇ ಕುಸಿ ಪಡೆತ್ಂಡ್.

ಗಿರಿಗಿಟ್‌, ಗಮ್ಜಾಲ್, ಸರ್ಕಸ್‌ ದಂಚಿನ ಹಿಟ್‌ ಸಿನಿಮಾಲಲನ್ ಮಲ್ತಿನ ರೂಪೇಶ್‌ ಶೆಟ್ಟಿ ಸ್ಯಾಂಡಲ್‌ವುಡ್‌ದ ಸುದೀಪ್‌ ನಂಚಿನ ಫಟಾನುಫಟಿಲೆನೊಟ್ಟಿಗೆ ಸ್ನೇಹ ಸಂಪಾದಿಸಾದೆರ್. ಬಿಗ್ ಬಾಸ್ ವಿನ್ನರ್ ಆಯಿನ ಬೊಕ್ಕ ರೂಪೇಶ್ ಕನ್ನಡಡ್ ಅಭಿನಯ ಮಲ್ತಿನ ಅಧಿಪತ್ರ ಸಿನಿಮಾದ ಶೂಟಿಂಗ್ ಮುಗಿದ್ಂಡ್. ಮೇರ್ ಕನ್ನಡಡ್ ಅಭಿನಯ ಮಲ್ತಿನ “ಮಂಕುಭಾಯ್ ಫಾಕ್ಸಿರಾಣಿ” ಯಶಸ್ಸ್ ಆತ್ಂಡ್. ಅತ್ತಂದೆ ಮಲಯಾಳಂದ ಪುಗರ್ತೆದ ನಟಿ ಭಾವನಾನೊಟ್ಟಿಗೆ ನಟನೆ ಮಲ್ತಿನ “ಗೋವಿಂದಾ ಗೋವಿಂದಾ” ಸಿನಿಮಾಲ ಸಕ್ಸಸ್ ಆತ್ಂಡ್. ಇತ್ತೆ ತಮಿಳ್ ದ ಪುಗರ್ತೆದ ನಟೆ ಯೋಗಿಬಾಬು ಮೆರೆನೊಟ್ಟಿಗೆ ನಟನೆ ಮಲ್ಪುನ ಅವಕಾಶನ್ ಪಡೆತೆರ್.

ಸನ್ನಿಧಾನಂ ಪಿ ಒ ಪನ್ಪುನ ಪಿಕ್ಚರ್ ಡ್ ಮೇರ್ ಪ್ರಮುಖ ಪಾತ್ರದೊಟ್ಟಿಗೆ ನಟನೆ ಮಲ್ದೆರ್. ಈ ಸಿನಿಮಾನ್ ಪುಗರ್ತೆದ ನಿರ್ದೇಶಕೆರ್ ಅಮುತಸಾರಥಿ ಮೇರ್ ನಿರ್ದೇಶನ ಮಲ್ದೆರ್. ನಮ್ಮೂರುದ ಕುಡೊರಿ ಪ್ರಮುಖ ನಟೆ ಪ್ರಮೋದ್‌ ಶೆಟ್ಟಿಲ ಈ ಸಿನಿಮಾಡ್ ನಟನೆ ಮಲ್ತೊಂದು ಉಲ್ಲೆರ್.

ತಮಿಳ್ ದ ಪುಗರ್ತೆದ ಕಾಮಿಡಿ ಹೀರೋ ಆಯಿನ ಯೋಗಿಬಾಬುನೊಟ್ಟಿಗೆ ನಟನೆ ಮಲ್ಪುನ ಅವಕಾಶ ತಿಕಿನವು ಎನ್ನ ಭಾಗ್ಯ. ನಿಕ್ಲೆನ ಮಾತೆರೆರ್ನಾಲ ಆಶೀರ್ವಾದ ಎನ್ನ ಮಿತ್ತ್ ಇಪ್ಪಡ್ ಪಂದ್ ಸಾಮಾಜಿಕ ಜಾಲತಾಣಡ್ ಬರೆಯಿನ ತುಳುನಾಡ್ ದ ಸುಂದರೆ ರೂಪೇಶ್‌ ಶೆಟ್ಟಿ ಮೇರ್ ಈ ಪಿಕ್ಚರ್ ದ ಮುಕೇನ ತಮಿಳೆರೆನ ಮನಸ್ ಗೆಂದಿಯೆರೆ ಪಿದಾಡಿನವು ನಮಕ್ ಮಾತ ಸಂತೋಷ ಬೊಕ್ಕ ಪೆರ್ಮೆದ ಸಂಗತಿ. ಅವ್ವೇ ರೀತಿ ರೂಪೇಶ್ ಪೊಸ ತುಳು ಸಿನಿಮಾದ ಸ್ಕ್ರಿಪ್ಟ್ ರಚನೆಲ ನಡತೊಂದು ಉಂಡು. ನೆತ್ತೊಟ್ಟಿಗೆ ಸ್ಟಾರ್ ಸ್ಪೋಟ್ಸ್ ಡ್ ಐಪಿಎಲ್ ಕ್ರಿಕೆಟ್ ಪಂತೊದ ಕಮೆಂಟರಿನ್ ಪುಗರ್ತೆದ ಮಾಜಿ ಕ್ರಿಕೆಟ್ ಆಟಗಾರೆ ಗುಂಡಪ್ಪ ವಿಶ್ವನಾಥನೊಟ್ಟಿಗೆ ಮಲ್ತೊಂದು ಉಲ್ಲೆರ್. ಒಟ್ಟಾಡ್ ರೂಪೇಶ್ ಇತ್ತೆ ಬಿಝಿ ನಟೆ ಆತೆರ್.