ಕುಂಪಲ: ಮಾರುತಿಮಠ ಶ್ರೀ ಕೃಷ್ಣ ಮುಖ್ಯಪ್ರಾಣ ದೇವಸ್ಥಾನಡ್ ಶನಿಪೂಜೆ ಸಪ್ತಾಹ ಮಾ.24-31 ಮುಟ್ಟ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಶನಿ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಕೇನೊಂದೆರ್.
ಕಿನ್ನಿಗೋಳಿ: ಅತ್ತೂರು ಶ್ರೀ ಅರಸು ಕುಂಜಿರಾಯ ದೈವಸ್ಥಾನದ ವರ್ಷದ ಜಾತ್ರೆ ಮಾ.28-31 ಮುಟ್ಟ ನಡಪರೆ ಉಂಡು.
ಮಾ.28 ಕ್ಕ್ ಬೊಲ್ಪುಗು ಅರಸು ಕುಂಜಿರಾಯೆರ್ನ ಭಂಡಾರ ಬರಿಯೆರೆ, ಶ್ರೀ ಅರಸು ಕುಂಜಿರಾಯೆರೆಗ್ ನವಕ ಪ್ರಧಾನ ಕಲಶಾಭಿಷೇಕ, ಕೊಡಿ ಏರ್ಂಡ್, ಬಯ್ಯಗ್ ದೇಲಂತಬೆಟ್ಟು ಗ್ರಾಮದ ಶಿಬರೂರು ಶ್ರೀ ಉಳ್ಳಾಯ ಬೊಕ್ಕ ಕೊಡಮಣಿತ್ತಾಯ ದೈವೊದ ಭಂಡಾರ ಬತ್ತ್ಂಡ್, ಕಿಲೆಂಜೂರು ಶ್ರೀ ಸರಳ ಧೂಮಾವತಿ ದೈವೊದ ಭಂಡಾರ ಬತ್ತ್ ದ್, ಮೂಡ್ರಗುತ್ತು ಶ್ರೀ ಕಾಂತೇರಿ ಧೂಮಾವತಿ- ಬಂಟ ದೈವೊಲೆನ ಭಂಡಾರ ಬತ್ತ್ ದ್, ಕೊಯಿಕುಡೆ ಶ್ರೀ ಜಾರಂದಾಯ ದೈವೊದ ಬಂಟ ದೈವೊದ ಭಂಡಾರ ಬತ್ತ್ ದ್, ರಾತ್ರೆ ಶ್ರೀ ಅರಸು ಕುಂಜಿರಾಯನ ನೇಮ ನಡಪರೆ ಉಂಡು.
ಮಾ.29 ಕ್ಕ್ ಬೊಲ್ಪುಗು ಶ್ರೀ ಉಳ್ಳಾಯ ದೈವೊದ ನೇಮ, ರಾತ್ರೆ ಕೊಡಮಣಿತ್ತಾಯ ದೈವೊದ ನೇಮ, ಶ್ರೀ ಕಾಂತೇರಿ ಧೂಮಾವತಿ- ಬಂಟ ದೈವೊದ ನೇಮ ನಡಪರೆ ಉಂಡು.
ಮಾ.30 ಕ್ಕ್ ಬಯ್ಯಗ್ ಕುಸಾಲ್ದ ಕಲಾವಿದೆರ್ ಸುರಗಿರಿ ಮೊಕ್ಲೆರ್ದ್ ತುಳು ನಾಟಕ “ಕಥೆ ಏರ್ ಬರೆಪೆರ್,” ರಾತ್ರೆ ಶ್ರೀ ಜಾರಂದಾಯ ಬಂಟ ದೈವೊದ ನೇಮ, ಅತ್ತೂರು ಮಾಗಣೆ ಶ್ರೀ ಕೊರ್ದಬ್ಬು ಶ್ರೀ ಬಂಟ ದೈವೊಲೆನ ಭಂಡಾರ ಬರಿಯೆರೆ, ಶ್ರೀ ಜಾರಂದಾಯ ಬಂಟ ದೈವೊಲೆನ ಬಂಡಿ ಉಚ್ಚಯ ಬೊಕ್ಕ ಸೂಟೆದಾರ ಸೇವೆ, ಜಾರಂದಾಯ- ಬಂಟ ಬೊಕ್ಕ ಕೋರ್ದಬ್ಬು ಶ್ರೀ ಧೂಮಾವತಿ ದೈವೊಲೆನ ಭೇಟಿ, ರಾತ್ರೆ ಶ್ರೀ ಸರಳ ಧೂಮಾವತಿ ಬಂಟ ದೈವೊದ ನೇಮ ನಡಪರೆ ಉಂಡು.
ಮಾ.31 ಕ್ಕ್ ಬೊಲ್ಪುಗು ಕೊಡಿ ಜಾವೆರೆ ಬೊಕ್ಕ ಶ್ರೀ ದೈವೊಲೆನ ಭಂಡಾರ ಪೋಯೆರೆ ಉಂಡು. ಅಂಚೆನೆ ಈ ಉಚ್ಚಯದ ಪೊರ್ತುಡು ಪ್ರತೀ ದಿನೊಲ ಮಧ್ಯಾಹ್ನ ಬೊಕ್ಕ ರಾತ್ರೆ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ದೈವಸ್ಥಾನದ ಪ್ರಕಟನೆ ತೆರಿಪಾದ್ಂಡ್.
ವಿಟ್ಲ: ದಶರಥ ನಂದನ ಶ್ರೀ ರಾಮ ಕನ್ನಡ ಭಕ್ತಿ ಸುಗಿಪುನ್ ಕುಕ್ಕಾಜೆ ಶ್ರೀ ಕಾಳಿಕಾಂಬ ಆಂಜನೇಯ ದೇವಸ್ಥಾನದ ಧರ್ಮದರ್ಶಿಲು ಶ್ರೀ ಶ್ರೀಕೃಷ್ಣ ಗುರೂಜಿ ಮೇರ್ ಬುಡುಗಡೆ ಮಲ್ತ್ ದ್ ಆಶೀರ್ವಾದ ಕೊರಿಯೆರ್.
ಈ ಲೇಸ್ ಡ್ ಸಾಹಿತ್ಯ ಬೊಕ್ಕ ಗಾಯನ ಮಲ್ತಿನ ಶ್ವೇತಾ ಪ್ರವೀಣ್ ಆಚಾರ್ಯ ಮೆರೆಗ್ ಮಾನಾದಿಗೆ ನಡತ್ಂಡ್.
ಈ ಪೊರ್ತುಡು ದಯಾನಂದ ಅಮೀನ್ ಬಾಯಾರು, ದೇವಿಪ್ರಸಾದ್ ಕುಕ್ಕಾಜೆ, ಸತ್ಯಪ್ರಸಾದ್ ಕುಕ್ಕಾಜೆ, ಅಶ್ವಿನ್ ಕುಕ್ಕಾಜೆ ಪಾಲ್ ಪಡೆದಿತ್ತೆರ್.
ಈ ಪದ್ಯಗ್ ಶ್ವೇತಾ ಪ್ರವೀಣ್ ಆಚಾರ್ಯ ಬೆದ್ರ ಗಾಯನ ಬೊಕ್ಕ ಸಾಹಿತ್ಯ ಮಲ್ದೆರ್. ಪ್ರಚಾರ ಕಲೆ ಬೊಕ್ಕ ಸಂಕಲನ ಜಿತೇಶ್ ಸರಪಾಡಿದ ದಯಾನಂದ ಅಮೀನ್ ಬಾಯಾರು ಸಮಗ್ರ ನಿರ್ವಹಣೆಡ್ ದಶರಥ ನಂದನ ಶ್ರೀ ರಾಮ ಕನ್ನಡ ಭಕ್ತಿ ಸುಗಿಪು ಬುಡುಗಡೆ ಆತ್ಂಡ್. ಈ ಪದ್ಯನ್ ದಯಾ ಕ್ರಿಯೇಷನ್ you tube channel ಡ್ ತೂವೊಲಿ.
ಸುಬ್ರಹ್ಮಣ್ಯ: ಸಮಾಜ ಸೇವೆನೇ ಜನಕ್ಲೆನ ಸೇವೆ ಪನ್ಪುನ ಉದಾರ ಮನೋಭಾವರ್ದ್ ನಿಟ್ಟೆ ಜಸ್ಟಿಸ್ ಕೆ ಎಸ್ ಸದಾನಂದ ಹೆಗಡೆರ್ ಸುಮಾರ್ ದುಂಬೇ ಮುಲ್ಪ ಗ್ರಾಮೀಣ ಬಡಪತ್ತ್ ದ ಜನಕ್ಲೆಗ್ ದೂರಗ್ ಪೋಪುನ ಬದಲ್ ಕೈತಲ್ ಡ್ ಮಾತ ವೈದ್ಯಕೀಯ ಸೇವೆಲು ತಿಕುಲೆಕ್ಕ ಆವೊಡು ಪನ್ಪುನ ಉದ್ದೇಶರ್ದ್ ಮುಲ್ಪ ಸದಾನಂದ ಆಸ್ಪತ್ರೆನ್ ಸುರು ಮಲ್ದೆರ್. ದುಂಬುದ ಕಾಲಡ್ ವೈದ್ಯಕೀಯ ಕರ್ಚಿಲು ರೋಗಿಲೆಗ್ ದಿಂಜ ಇತ್ತಿನೆನ್ ತೆರಿನ ಹೆಗಡೆರ್ ಬಡಪತ್ತ್ ದ ರೋಗಿಲೆಗ್ ಕಡಿಮೆ ಕಿರಯಡ್ ಬೊಕ್ಕ ಕೆಲವು ಪೊರ್ತುಡು ಧರ್ಮಾರ್ಥವಾದ್ ಸೇವೆನ್ ಕೊರ್ಪುನ ಮುಕೇನ ಸೇವಾ ತೃಪ್ತಿನ್ ಸುರು ಮಲ್ದೆರ್. ಮುಲ್ಪ ಪೂರ್ಣಕಾಲಿಕ ವೈದ್ಯೆರ್, ದಂತ ವೈದ್ಯೆರ್, ಬೊಕ್ಕ ತರಬೇತಿ ವೈದ್ಯೆರ್ ಲು ದಿನತ್ತ ಮಾತ ಪೊರ್ತುಡು ಸೇವೆನ್ ಒದಗಾವೊಂದು ಬೈದೆರ್. ಮುಲ್ಪದ ಸೇವೆನ್ ಫಲಾನುಭವಿಲು ಉಪಯೋಗಿಸಾವೊಡು ಪಂದ್ ಸುಬ್ರಹ್ಮಣ್ಯ ಮಠತ್ತ ಶ್ರೀ ವಿದ್ಯಾ ಪ್ರಸನ್ನ ತೀರ್ಥ ಸ್ವಾಮೀಜಿಲು ಪಂಡೆರ್.
ಮೇರ್ ಐತಾರ ಸುಬ್ರಹ್ಮಣ್ಯದ ಸದಾನಂದ ಆಸ್ಪತ್ರೆಡ್ ಜಸ್ಟಿಸ್ ಕೆ ಎಸ್ ಹೆಗಡೆ ಚಾರಿಟೇಬಲ್ ಆಸ್ಪತ್ರೆ ದೇರಳಕಟ್ಟೆ, ಸದಾನಂದ ವೈದ್ಯಕೀಯ ಬೊಕ್ಕ ದಂತ ಚಿಕಿತ್ಸಾ ಕೇಂದ್ರ ಸುಬ್ರಹ್ಮಣ್ಯ, ಬೊಕ್ಕ ರೋಟರಿ ಕ್ಲಬ್, ಲಯನ್ಸ್ ಕ್ಲಬ್, ಇನ್ನರ್ ವೇರ್ ಕ್ಲಬ್, ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದ ಒಟ್ಟುಸೇರಿಗೆಡ್ ನಡತಿನ ಧರ್ಮಾರ್ಥ ಆರೋಗ್ಯ ತಪಾಸಣಾ ಶಿಬಿರನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಮಲ್ಲ ಬಿನ್ನೆರಾದ್ ಬತ್ತಿನ ನೆಟ್ಟೆ ಕೆ ಎಸ್ ಹೆಗಡೆ ಚಾರಿಟೇಬಲ್ ಆಸ್ಪತ್ರೆದ ಮುಖ್ಯಸ್ಥೆರ್ ಸತೀಶ್ ಭಂಡಾರಿ ಪಾತೆರ್ದ್, ನಮಡ 23 ಗ್ರಾಮೀಣ ಆಸ್ಪತ್ರೆಲು ಉಂಡು. ಆಯಿಟ್ಟ್ ಸುಬ್ರಹ್ಮಣ್ಯ ಸದಾನಂದ ಆಸ್ಪತ್ರೆಗ್ ನಮ ಎಚ್ಚದ ಮಹತ್ವನ್ ಕೊರೊಂದು ಉಲ್ಲ, ಅತ್ತಂದೆ ಇಡೆಗ್ ಬೋಡಾಯಿನ ಸೌಲಭ್ಯನ್ ಲ ಹಂತ ಹಂತವಾದ್ ಕೊರೊಂದು ಉಲ್ಲ. ಶ್ರೀ ಸುಬ್ರಹ್ಮಣ್ಯ ಮಠ ಬೊಕ್ಕ ಸ್ಥಳೀಯ ಸಂಘ ಸಂಸ್ಥೆಲೆನ ಸಹಾಕಾರರ್ದ್ ನನಾತ್ ಈ ಆಸ್ಪತ್ರೆನ್ ಅಭಿವೃದ್ಧಿ ಮಲ್ಪೆರೆ ಉಂಡು ಪಂದ್ ಪಂಡೆರ್.
ಚಾವಡಿಡ್ ಸದಾನಂದ ಆಸ್ಪತ್ರೆ ಆಡಳಿತ ಅಧಿಕಾರಿ ಮೇಜರ್ ರಾಘವೇಂದ್ರ, ಲಯನ್ಸ್ ಕ್ಲಬ್ ಅಧ್ಯಕ್ಷೆರ್ ರಾಮಚಂದ್ರ ಪಳಂಗಾಯ, ರೋಟರಿ ಕ್ಲಬ್ ಅಧ್ಯಕ್ಷೆರ್ ಪ್ರಶಾಂತ್ ಕೋಡಿಬೈಲು, ಇನ್ನರ್ ವೇಲ್ ಕ್ಲಬ್ ಪ್ರಭಾರ ಅಧ್ಯಕ್ಷೆರ್ ಶ್ರುತಿ, ಡಾ|ರವಿ ಕಕ್ಕೆ ಪದವು, ನಿವೃತ್ತ ಪ್ರಾಂಶುಪಾಲೆರ್ ಎಸ್ಎನ್ ಭಟ್, ಸುಬ್ರಹ್ಮಣ್ಯದ ಉದ್ಯಮಿ ಹರೀಶ್ ಕಾಮತ್, ಸದಾನಂದ ಆಸ್ಪತ್ರೆದ ವೈದ್ಯಾಧಿಕಾರಿ ಡಾ. ಭಾನುಮತಿ ಪಾಲ್ ಪಡೆದಿತ್ತೆರ್.
ಲಯನ್ಸ್ ಕ್ಲಬ್ ದ ವಿಮಲಾ ರಂಗಯ್ಯ ಎದ್ಕೊಂದು ಲೇಸ್ ನ್ ಸುಧಾರಿಕೆ ಮಲ್ತೆರ್. ಲಯನ್ ರಾಮಚಂದ್ರಪ್ಪಳಂಗಾಯ ಸೊಲ್ಮೆ ಸಂದಾದೆರ್. ಶಿಬಿರಡ್ ಕಣ್ಣ್ ದ ಪರೀಕ್ಷೆ, ಚರ್ಮ ರೋಗದ ಪರೀಕ್ಷೆಲು, ಕಣ್ಣ್ ಕೆಬಿ ಮೂಂಕುದ ಪರೀಕ್ಷೆಲು, ಕೂಲಿದ ಪರೀಕ್ಷೆ, ಇಂಚ ಬೇತೆ ಬೇತೆ ಪರೀಕ್ಷೆಲೆನ್ ನಿಟ್ಟೆ ಆಸ್ಪತ್ರೆದ ವೈದ್ಯೆರೆನ ಕೂಟಲು ನಡಪಾದ್ ಕೊರಿಯೆರ್.
ಸುಬ್ರಹ್ಮಣ್ಯ: ಬ್ಯಾಂಕ್ ಆಫ್ ಬರೋಡಾ ಸುಬ್ರಹ್ಮಣ್ಯ ಶಾಖೆ ಸ್ಥಳಾಂತರ ಆದ್ ಪೊಸ ಕಟ್ವಾನ ಅಕ್ಷರ ವಸತಿ ಗ್ರಹದ ತೀರ್ತ್ ದ ಮಾಳಿಗೆಡ್ ಸೋಮಾರ ಸುರು ಆತ್ಂಡ್.
ಈ ಶಾಖೆನ್ ಬ್ಯಾಂಕ್ ಆಫ್ ಬರೋಡಾ ಮಂಗಳೂರು ವಲಯದ ಜನರಲ್ ಮ್ಯಾನೇಜರ್ ಗಾಯತ್ರಿ ಆರ್ ಮೇರ್ ಟೇಪ್ ಕಟ್ಟ್ ಮಲ್ತ್ ದ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.
ಬೊಕ್ಕ ಮೇರ್ ಪಾತೆರ್ದ್, ಸುಬ್ರಹ್ಮಣ್ಯದಂಚಿನ ಗ್ರಾಮೀಣ ಪ್ರದೇಶಡ್ ನಮ್ಮ ಶಾಖೆಗ್ ಎಡ್ಡೆ ಸ್ಪಂದನೆ ತಿಕ್ ದ್ಂಡ್. ಮುಲ್ಪದ ಗ್ರಾಹಕೆರೆನ ಬೇಡಿಕೆಗನುಗುಣವಾದ್ ಬೊಕ್ಕ ಅಕ್ಲೆನ ಅನುಕೂಲಗಾದ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದಕುಲು ನಮಕ್ ಎಡ್ಡೆ ಜಾಗೆನ್ ಕೊರ್ತೆರ್. ಮುಲ್ಪದ ಶಾಖೆಗ್ ಮಾತ ಗ್ರಾಹಕೆರ್ ಬೊಕ್ಕ ದೇವಸ್ಥಾನದ ನೌಕರೆರ್ ಬೊಕ್ಕ ಇಸೇಸವಾದ್ ಅಂಚಿ ಇಂಚಿ ಊರುದ ಕೃಷಿಕೆರ್ ಮಸ್ತ್ ಸ್ಪಂದನೆ ಕೊರ್ತೆರ್. ಮಾತೆರೆನ ಸಹಕಾರದೊಟ್ಟಿಗೆ ಈ ಶಾಖೆ ನನಾತ್ ಅಭಿವೃದ್ಧಿ ಆವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ಈ ಪೊರ್ತುಡು ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಕಾರ್ಯನಿರ್ವಹಣಾಧಿಕಾರಿ ಡಾ. ನಿಂಗಯ್ಯ, ಕುಡ್ಲ ಸಿರಿ ಗ್ರಾಮೋದ್ಯೋಗ ಸಂಸ್ಥೆದ ವ್ಯವಸ್ಥಾಪಕ ನಿರ್ದೇಶಕೆರ್ ಜನಾರ್ದನ, ಪುತ್ತೂರು ಪ್ರಾದೇಶಿಕ ಕಚೇರಿದ ಪ್ರಾದೇಶಿಕ ವ್ಯವಸ್ಥಾಪಕೆರ್ ದೇವಿ ಪ್ರಸಾದ ಶೆಟ್ಟಿ, ಉಪ ಪ್ರಾದೇಶಿಕ ವ್ಯವಸ್ಥಾಪಕೆರ್ ಶ್ರೀ ಮೂರ್ತಿ, ಕೈತಲ್ದ ಬ್ಯಾಂಕ್ ಆಫ್ ಬರೋಡ ಶಾಖೆದ ವ್ಯವಸ್ಥಾಪಕೆರ್ ಬೊಕ್ಕ ಗ್ರಾಹಕೆರ್ ಪಾಲ್ ಪಡೆದಿತ್ತೆರ್.
ಸುಬ್ರಹ್ಮಣ್ಯ ಶಾಖೆದ ವ್ಯವಸ್ಥಾಪಕೆರ್ ಕೃಷ್ಣಪ್ರಸಾದ್ ಮೇರ್ ಎದ್ಕೊನಿಯೆರ್. ನೂಜಿ ಬಾಳ್ತಿಲ ಶಾಖೆದ ವ್ಯವಸ್ಥಾಪಕೆರ್ ಶಿವಪ್ರಸಾದ್ ಲೇಸ್ ಸುಧಾರಿಕೆ ಮಲ್ತೆರ್. ಪ್ರಾದೇಶಿಕ ವ್ಯವಸ್ಥಾಪಕೆರ್ ದೇವಿ ಪ್ರಸಾದ್ ಶೆಟ್ಟಿ ಸೊಲ್ಮೆ ಸಂದಾಯೆರ್.
ಒಡಿಪು: ಲೋಕಸಭೆ ವೋಟುದ ನಿಲೆಟ್ಟ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆಡ್ ಎ.24 ರ್ದ್ ಮದ್ಯ ನಿಷೇಧ ಜಾರಿಗ್ ಬರ್ಪುಂಡು.
ವೋಟಿಂಗ್ ಬೊಕ್ಕ ಕೌಂಟಿಂಗ್ ನಡಪುನ ಪೊರ್ತುಡು ಕಾನೂನು ಬೊಕ್ಕ ಸುವ್ಯವಸ್ಥೆದ ಸಲುವಾದ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆಡ್ ಎ.24 ಕ್ಕ್ ಬಯ್ಯಗ್ 6 ಗಂಟೆರ್ದ್ ಎ.26 ನಡುರಾತ್ರೆ 12 ಗಂಟೆ ಮುಟ್ಟ, ಬೊಕ್ಕ ವೋಟುದ ಲೆಕ್ಕದ ದಿನ ಜೂನ್ 3 ಕ್ಕ್ ನಡುರಾತ್ರೆ 12 ಗಂಟೆರ್ದ್ ಜೂನ್ 4 ಕ್ಕ್ ನಡುರಾತ್ರೆ 12 ಗಂಟೆ ಮುಟ್ಟ ಮದ್ಯ ಮುಕ್ತ ದಿನಲು ಪಂದ್ ಘೋಷಣೆ ಮಲ್ದ್ಂಡ್.
ಆ ದಿನಟ್ಟ್ ಮಾತ ರೀತಿದ ಮದ್ಯದ ಅಂಗಡಿಲು, ಮದ್ಯ ಮಾರಾಟ ಡಿಪೋಲು, ಮದ್ಯ ತಯಾರಿಕಾ ಡಿಸ್ಟಿಲರಿಲು, ಸ್ಟಾರ್ ಹೋಟೆಲ್ಲು ಬೊಕ್ಕ (ಕಲಿ) ಶೇಂದಿ ಅಂಗಡಿಲೆನ್ ಮುಚ್ಚೊಡು ಪಂದ್ ಜಿಲ್ಲಾಧಿಕಾರಿಲು ಆದೇಶ ಕೊರ್ತೆರ್.
ಬೆದ್ರ: ವಿಶ್ವಹಿಂದು ಪರಿಷತ್-ಬಜರಂಗ ದಳ ‘ಮಾತೃಶಕ್ತಿ-ದುರ್ಗಾವಾಹಿನಿ ಬೆದ್ರ ಪ್ರಖಂಡದ 21 ನೇ ವರ್ಷದ ಸಾರ್ವಜನಿಕ ಶ್ರೀ ಶನೈಶ್ಚರ ಪೂಜೆ ಮಾ.30 ಸನಿಯಾರ ಬಯ್ಯಗ್ ಬೆದ್ರ ಸ್ವರಾಜ್ಯ ಮೈದಾನ ಶ್ರೀ ಆದಿಶಕ್ತಿ ದೇವಸ್ಥಾನದ ಚಾವಡಿಡ್ ನಡಪರೆ ಉಂಡು.
ಆನಿ ಬಯ್ಯಗ್ ಕಲಶ ಪ್ರತಿಷ್ಠೆ, ಶ್ರೀ ಶನೈಶ್ಚರ ಪೂಜೆ ಸುರು, ಮಹಾಪೂಜೆ, ರಾತ್ರೆ ಧಾರ್ಮಿಕ ಸಭೆ, ಪ್ರಸಾದ ವಿತರಣೆ, ಸಾರ್ವಜನಿಕ ಅನ್ನ ಪ್ರಸಾದ ಸೇವೆ, ಬೊಕ್ಕ ಹನುಮಗಿರಿ ಮೇಳದ ಕಲಾವಿದೆರೆರ್ದ್ ಶ್ರೀರಾಮ ಸೇತು ಕುಶಲವ ಯಕ್ಷಗಾನ ನಡಪರೆ ಉಂಡು.
ಕುದ್ರೋಳಿ ಭಗವತಿ ಅಪ್ಪೆನ ಪುಣ್ಯ ಮಣ್ಣಡ್ “ಸ್ವರ್ಣ ಸಂಭ್ರಮದ ಗೌಜಿ
ಮೋಕೆದ ಕಲಾ ಪ್ರೇಕ್ಷಕೆರೆ ನಿಕುಲು ತೋಜಾಯಿನ ಮೋಕೆ ಪ್ರೋತ್ಸಾಹದ ಒರುಟು ನಮ್ಮ ಸಾಯಿಶಕ್ತಿ ಕಲಾ ಬಳಗದ ಕದ್ರಿ ನವನೀತ್ ಶೆಟ್ರ್ ರಚನೆ ಮಲ್ತಿನ ಶ್ರೀಮತಿ ಲಾವಣ್ಯ ವಿಶ್ವಾಸ್ ದಾಸ್ ಮೆರೆನ ನಿರ್ದೇಶನಡ್ ಮೂಡ್ದು ಬತ್ತಿನ ತುಳು ಪೌರಾಣಿಕ ನಾಟಕ ” ಬೊಳ್ಳಿ ಮಲೆತ ಶಿವಶಕ್ತಿಲು ” ತಾರಿಕ್ 29/3/2024 ನೇ ಶುಕ್ರವಾರ ಕುದ್ರೋಳಿ ಭಗವತಿ ಅಪ್ಪೆನ ಪುಣ್ಯ ಮಣ್ಣ್ ಡ್ 55ನೇ ಪ್ರದರ್ಶನ ಆವರೆ ಉಂಡು.
ನಮ್ಮ ಕೂಟದ ಮಿತ್ತ್ ಕಲಾವಿದೆರ್ನ ಮಿತ್ತ್ ಮೋಕೆ ದೀದ್ ನಮ್ಮ ಗೆಲ್ಮನಗ್ ಕಾರಣೀಕರ್ತೆರಾಯಿನ ಕಲಾಭಿಮಾನಿಲೆಗ್, ಸಂಘ ಸಂಸ್ಥೆಲೆಗ್, ಕಲಾ ಪ್ರೇಕ್ಷಕೆರೆಗ್ ಬುಡು ಉಡಲ್ ದ ಸೊಲ್ಮೆ ಸಂದೈತ ಮಲ್ಪುವ.. ಈ ಪೊರ್ಲ ಲೇಸ್ ಗ್ ಮಾತೆರ್ಲ ಬತ್ತ್ ದ್ ನಾಟಕದ ಯಶಸ್ ಗ್ ಕಾರಣಿಕರ್ತೆರಾವೊಡು ಪಂದ್ ಸಾಯಿ ಶಕ್ತಿ ಕಲಾ ಬಳಗ ಉರ್ವಾ ಚಿಲಿಂಬಿ ಕುಡ್ಲ ಮೊಕುಲು ಬಿನ್ನಾಪು ಮಲ್ದೆರ್.
ಪೆರ್ನೆ: ಶ್ರೀ ಆದಿ ನಾಗಬ್ರಹ್ಮ ಮುಗೆರ್ಕಳ ಗರಡಿ ಶ್ರೀ ಸ್ವಾಮಿ ಕೊರಗಜ್ಜ ಕ್ಷೇತ್ರ ಕಾರ್ಲ ಪೆರ್ನೆದ ಮುತಾಲಿಕೆಡ್ ಊರುದ ಪರವೂರುದ ಭಕ್ತೆರ್ದ್ ಪೊಸತಾದ್ ನಿರ್ಮಾಣ ಆಯಿನ ಶ್ರೀ ನಾಗಬ್ರಹ್ಮರ ಗುಂಡ ಗುಳಿಗ ದೈವದ ಕಟ್ಟೆ ಸ್ವಾಮಿ ಕೊರಗಜ್ಜ ಕ್ಷೇತ್ರ 25 ಸೋಮಾರ ಪುನರ್ ಪ್ರತಿಷ್ಠಾಪನೆ ಆಂಡ್.
ಮಾ.29 ಸುಕ್ರಾರ ಮಧ್ಯಾಹ್ನ ಮೊಗೇರ್ಕಳ ಮಂಜ ಸೇವೆ ನಡಪರೆ ಉಂಡು. ಬೊಕ್ಕ ಪ್ರಸಾದ ವಿತರಣೆ, ರಾತ್ರೆ ದೈವೊಲೆನ ಭಂಡಾರ ದೆತ್ತ್ ದ್ ಬೊಕ್ಕ ಅನ್ನ ಪ್ರಸಾದ ಸೇವೆ, ಶ್ರೀ ಕೊರಗ ತನಿಯ, ಗುಳಿಗ ದೈವೊಲೆನ ಕೋಲ, ಪ್ರಸಾದ ವಿತರಣೆ ನಡಪರೆ ಉಂಡು.
ಕೇರಳಡ್ ರಿಕ್ಷಾ ಡ್ರೈವರ್ ಯೊರಿ ಒಂಜೇ ದಿನಟ್ಟ್ ಕೋಟ್ಯಾಧಿಪತಿ ಆತೆರ್.
ಕಣ್ಣೂರುದ ಅಳಕೋಡ್ ದ ರಿಕ್ಷಾ ಡ್ರೈವರ್ ನಾಸರ್ ಮೇರ್ 10 ಕೋಟಿದ ಕೇರಳ ಸಮ್ಮರ್ ಬಂಪರ್ ಲಾಟರಿ ದೆತೊಂದಿತ್ತೆರ್.
ಏಜೆಂಟ್ ರಾಜು ಪನ್ಪಿನಾರ್ ನಲ್ಪ ಇತ್ತಿನ ಒಂಜೇ ಒಂಜಿ ಲಾಟರಿ SC 308797 ಆದಿತ್ತ್ಂಡ್. ಅಂಗಾರೆ ಬಯ್ಯಗ್ 6 ಗಂಟೆಗ್ ರಾಜು ಮೆರೆನಲ್ಪ ಬತ್ತಿನ ನಾಸರ್ ಆ ಲಾಟರಿ ತೂದು ಅವೆನ್ ದೆತೊಂದು ಪೋದಿತ್ತೆರ್. ವಾಪಸ್ 7:30 ಕ್ಕ್ ಬತ್ತ್ ದ್ ಲಾಟರಿ ದೆತೊಂದೆರ್. ಕೋಡೆ 10 ಕೋಟಿ ರೂ. ಗೆಂದ್ ದೆರ್.
