March 25, 2024

ಹಿಂದುತ್ವಗ್ ಬದ್ಧತೆ, ಅಭಿವೃದ್ಧಿಗ್ ಆದ್ಯತೆ : ಬ್ರಿಜೇಶ್ ಚೌಟ

ಮುಲ್ಕಿ : ಪ್ರಧಾನಿ ನರೇಂದ್ರ ಮೋದಿಯೆರ್ನ ವಿಕಸಿತ ಭಾರತ ಸಂಕಲ್ಪಗ್ ಪೂರಕವಾದ್ ನಮ ಕೆಲಸ‌ ಮಲ್ಪೊಡು. ಸಂಸದೆರಾದ್ ಆಯ್ಕೆ ಆಂಡ ಯಾನ್ ಹಿಂದುತ್ವದ ರಕ್ಷಣೆಗ್ ಬದ್ಧವಾದುಲ್ಲೆ, ಅಭಿವೃದ್ಧಿ ಗ್ ಆದ್ಯತೆ ಕೊರ್ಪೆ ಪಂದ್ ದಕ್ಷಿಣ ಕನ್ನಡ ಲೋಕಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಕ್ಯಾ.ಬ್ರಿಜೇಶ್ ಚೌಟ ತೆರಿಪಾಯೆರ್.

ಆರ್ ಮುಲ್ಕಿದ ಆಧಿಧನ್ ಹೋಟೆಲ್ ಡ್ ನಡತಿನ ಸುದ್ದಿಗೋಷ್ಠಿಡ್ ಪಾತೆರಿಯೆರ್.

ದಕ್ಷಿಣ ಕನ್ನಡ ಜಿಲ್ಲೆದ ಮೂಲಸೌಕರ್ಯ ಅಭಿವೃದ್ಧಿ, ಪ್ರವಾಸೋದ್ಯಮ ಅಭಿವೃದ್ಧಿ, ಉದ್ಯೋಗ, ಶಿಕ್ಚಣ ವ್ಯವಸ್ಥೆ ಇಂಚ ಮಾತ ಕ್ಷೇತ್ರೊಡು ಅಭಿವೃದ್ಧಿ ಮಲ್ಪುನ ನಿಲೆಟ್ಟ್ ತಜ್ಞೆರೆನೊಟ್ಟುಗು ಪಾತೆರ್ದ್ ಅಯಿತ್ತ ಸಮಗ್ರ ಅಧ್ಯಯನ ಮಲ್ತ್ ದ್ ಅಭಿವೃದ್ಧಿ ಯೋಜನೆ ಪಾಡುವೆ ಪಂದ್ ಆರ್ ತೆರಿಪಾಯೆರ್.

ಪ್ರಸ್ತಾವಿಕವಾದ್ ಪಾತೆರಿನ ಶಾಸಕೆರ್ ಉಮಾನಾಥ ಕೋಟ್ಯಾನ್, ಬ್ರಿಜೇಶ್ ಚೌಟೆರ್ನಂಚಿನ ಸೇನಾನಿ, ಜವನೆ ಅಭ್ಯರ್ಥಿ ನಮ್ಮ ಕ್ಷೇತ್ರದ ಪೆರ್ಮೆ. ಅರೆನ್ 50 ಸಾರ ವೋಟುದ ಲೀಡ್ ಡ್ ಗೆಂದಾಗ ಪಂದ್ ಪಂಡೆರ್.

ಸುದ್ದಿಗೋಷ್ಠಿಡ್ ಬಿಜೆಪಿದ ಮಾಜಿ ಜಿಲ್ಲಾಧ್ಯಕ್ಷೆರ್ ಸುದರ್ಶನ ಎಂ., ಮುಖಂಡೆರಾಯಿನ ರಂಜಿತ್ ಪೂಜಾರಿ ತೋಡಾರ್, ದಿನೇಶ್ ಪುತ್ರನ್, ಹರಿಪ್ರಸಾದ್, ಈಶ್ವರ ಕಟೀಲ್, ಭಾಸ್ಕರ ಆಚಾರ್ಯ, ಸುಚರಿತ್ ಶೆಟ್ಟಿ, ಸುನಿಲ್ ಆಳ್ವ, ಶಾಂತಿಪ್ರಸಾದ್ ಹೆಗ್ಡೆ, ಚಂದ್ರಶೇಖರ ಬಪ್ಪಳಿಗೆ ಇತ್ತೆರ್.

ನೆರ್ದ್ ದುಂಬು ಬ್ರಿಜೇಧ್ ಚೌಟೆರ್ ಮುಲ್ಕಿ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ, ಶ್ರೀ ವೆಂಕಟರಮಣ ದೇವಸ್ಥಾನ ಬೊಕ್ಕ ಲಿಂಗಪ್ಪಯ್ಯಕಾಡ್ ನಿಂದರಕಿ ಮಠಕ್ಕ ಭೇಟೀ ಕೊರ್ದಿತ್ತೆರ್.

ನಾಟೆಕಲ್‌ಡ್ ಆಕ್ಸಿಡೆಂಟ್; ಪೆಟ್ಟಾದಿತ್ತಿನಾರ್‌ಲ ತೀರ್ ಪೋಯೆರ್

ಉಳ್ಳಾಲ: ಮಂಜನಾಡಿ ನಾಟೆಕಲ್ ಕೈತಲ್ ಕೋಡೆ ನಡತಿನ ಆಕ್ಸಿಡೆಂಟ್‌ಡ್ ತೋಕೂರುದ ಶ್ರೀ ನಿಧಿ ತೀರ್ ಪೋದಿತ್ತ್‌ದ್ ಸಂಬಂಧಿಕೆ ಒರಿಯಗ್ ಮಸ್ತ್ ಪೆಟ್ಟಾದಿತ್ತ್ಂಡ್. ಇತ್ತೆ ಆರ್‌ಲ ಚಿಕಿತ್ಸೆ ಫಲಿಸಂದೆ ತೀರ್ ಪೋಯಿನ ಘಟನೆ ನಡತ್ಂಡ್.

ಯತೀಶ್ ದೇವಾಡಿಗ ತೀರ್ ಪೋಯಿನಾರ್ ಪಂದ್ ಗುರ್ತಿಸಾದೆರ್. ಮುಡಿಪುಡ್ ಇತ್ತಿನ ಸಂಬಂಧಿಕೆರೆನ ಇಲ್ಲ್ ಒಕ್ಕೆಲ್‌ಗ್ ಪೋದು ಪಿರ ಬರ್ಪುನ ಪೊರ್ತುಡು ಬೈಕ್ ನಾಟೆಕಲ್ ಗ್ರೀನ್ ಗ್ರೌಂಡ್ ಕೈತಲ್ ಇತ್ತಿನ ಡಿವೈಡರ್‌ಗ್ ಗುದ್ದ್‌ದ್ಂಡ್.

ಕುಡ್ಲ ದಕ್ಷಿಣ ಸಂಚಾರಿ ಠಾಣಾ ಪೊಲೀಸೆರ್ ಕೇಸ್ ದಾಖಲ್ ಮಲ್ತ್‌ದೆರ್. ಯತೀಶ್ ದೇವಾಡಿಗ ಪೋಷಕೆರೆಗ್ ಒರಿಯೇ ಮಗೆ .

ಮುಂಡ್ಕೂರು ದುರ್ಗಾಪರಮೇಶ್ವರಿ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರಾದ್ ಮುಲ್ಲಡ್ಕ ಕೋರಿಬೆಟ್ಟುಗುತ್ತು ಸುರೇಂದ್ರ ಎಸ್ ಶೆಟ್ಟಿ ಆಯ್ಕೆ

ಮುಂಡ್ಕೂರು: ಇತಿಹಾಸ ಪುಗರ್ತೆದ ಮುಂಡ್ಕೂರು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರಾದ್ ಮುಂಡ್ಕೂರು ಮುಲ್ಲಡ್ಕ ಕೋರಿಬೆಟ್ಟುಗುತ್ತು ಸುರೇಂದ್ರ ಎಸ್ ಶೆಟ್ಟಿ (ಬಾಬಣ್ಣ) ಮೇರ್ ಆಯ್ಕೆ ಆತೆರ್.

ವ್ಯವಸ್ಥಾಪನಾ ಸಮಿತಿದ ಸದಸ್ಯೆರಾದ್ ರಾಮದಾಸ ಜೆ. ಆಚಾರ್ಯ (ಪ್ರಧಾನ ಅರ್ಚಕೆರ್), ಸುಜಾತಾ ಸುಭೋದ ಶೆಟ್ಟಿ ಸಚ್ಚರ ಪರಾರಿ, ಜಗದೀಶ್ ಎಸ್ ಶೆಟ್ಟಿ ಕುದುರೊಟ್ಟು ನಡಿಗುತ್ತು ಸಚ್ಚೇರಿಪೇಟೆ, ಶೇಖರ ಎಸ್ ಶೆಟ್ಟಿ ಮಾಣಿಬೆಟ್ಟು-ಪುನ್ಕೆದಡಿ, ಕೃಷ್ಣ ಪೂಜಾರಿ ಬಂಡ್ರೊಟ್ಟು ಮುಂಡ್ಕೂರು, ನಳಿನಾಕ್ಷಿ ರಾಜು ಸೇರಿಗಾರ ಕಡಪುಕರಿಯ, ಅಕ್ಷತಾ ವಿಶ್ವಿತ್ ಶೆಟ್ಟಿ ಸಂಕಲಕರಿಯ, ಸುರೇಶ್ ಸಾಲ್ಯಾನ್ ಅಲಂಗಾರ್ ಆಯ್ಕೆ ಆತೆರ್. ಆಯ್ಕೆ ಆಯಿನಕ್ಲೆಗ್ ಊರು ಪರವೂರುದ ಗ್ರಾಮಸ್ಥೆರ್ ಅಭಿನಂದನೆ ಮಲ್ದೆರ್.