ಮಣಿಪಾಲ: ಮಣಿಪಾಲ್ 90.4 Mhz ಡ್ ಸಮುದಾಯ ಬಾನುಲಿ ಕೇಂದ್ರ ಅರ್ಪಣೆ ಮಲ್ಪುನ ಮಧುರಗಾನ ಲೇಸ್ ಫೆ.29 ಗುರುವಾರ ಬಯ್ಯಗ್ 6.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಸಂಗೀತ ಶಿಕ್ಷಕೆರ್ ಸ್ವಾತಿ ಯಶ್ಪಾಲ್ ಬಾರ್ಕೂರು ಪಾಲ್ ಪಡೆದ್ ಸುಮಧುರ ಪದ್ಯ ಪನಿಯೆರೆ ಉಲ್ಲೆರ್. ಮಾ.1 ಕ್ಕ್ ಮಧ್ಯಾಹ್ನ 2.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಫ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ರಾಜ್ಯ ಇಡೀ ಎಲ್ಲೆರ್ದ್ (ಮಾ.1) ಮಾ.22 ಮುಟ್ಟ ಬೊಲ್ಪುಗು 10:30-1:30 ಮುಟ್ಟ ಸೆಕೆಂಡ್ ಪಿಯುಸಿ ಪರೀಕ್ಷೆ-1 ತ್ತ ವಾರ್ಷಿಕ ಪರೀಕ್ಷೆ ನಡಪರೆ ಉಂಡು.
ಪರೀಕ್ಷೆ ದಾಲ ತೊಂದರೆ ಇಜ್ಜಂದೆ ಶಾಂತಿಡ್ ನಡಪುನ ಉದ್ದೇಶರ್ದ್ ಪರೀಕ್ಷಾ ಕೇಂದ್ರಲೆನ ಸುತ್ತ 200 ಮೀ. ವ್ಯಾಪ್ತಿಡ್ ಮೊಬೈಲ್, ಪೇಜರ್, ಜೆರಾಕ್ಸ್, ಟೈಪಿಂಗ್ ನ್ ನಿಷೇಧ ಮಲ್ದ್ಂಡ್.
ಅಂಚೆನೆ ಪರೀಕ್ಷೆದ ಕೇಂದ್ರಡ್ ಒವ್ವೇ ಅವ್ಯವಹಾರ, ಅಕ್ರಮ ನಡದಿಲೆಕ್ಕ ನಿಷೇಧಾಜ್ಞೆ ಜಾರಿ ಮಲ್ದ್ಂಡ್.
ಹಾಸ್ಯನಟೆ, ಸಂಗೀತ ನಿರ್ದೇಶಕೆರ್ ಸಾಧು ಕೋಕಿಲಾ ಮೆರೆನ್ ಕರ್ನಾಟಕ ಚಲನಚಿತ್ರ ಅಕಾಡೆಮಿ ಗುರ್ಕಾರೆಯಾದ್ ಸರ್ಕಾರ ನೇಮಕ ಮಲ್ಪೆರೆ ಆದೇಶ ಕೊರ್ತುಂಡು.
ನಿಗಮ ಮಂಡಳಿಗ್ 44 ಜನನ್ ಸಿಎಂ ನೇಮಕ ಮಲ್ದೆರ್. ಆಯಿಟ್ಟ್ ಚಲನಚಿತ್ರ ಅಕಾಡೆಮಿಲ ಸೇರ್ದ್ಂಡ್.
ಸುಮಾರ್ ದಿನೊರ್ದಿಂಚ ಅಧ್ಯಕ್ಷೆರ್ನ ತಾನೊಗ್ ಸುಮಾರ್ ಜನತ್ತ ಪುದರ್ ಕೇಂದ್ ಬರೊಂದು ಇತ್ತ್ಂಡ್. ಆಂಡ ಸಿದ್ದರಾಮಯ್ಯ ಮೆರೆಗ್ ಆಪ್ತೆರಾಯಿನ ಸಾಧು ಕೋಕಿಲಾ ಮೆರೆನ್ ಅಕಾಡೆಮಿದ ಅಧ್ಯಕ್ಷೆರಾದ್ ನೇಮಕ ಮಲ್ಪರೆ ತೆರಿಪಾದೆರ್.
ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದಕ್ಲೆರ್ದ್ ಮಾ.2 ಸನಿಯಾರ ಬಯ್ಯಗ್ ಕೋಟೆಕಾರ್ ಬೀರಿ ಮಾಡೂರು ನೀರ್ ದ ಟ್ಯಾಂಕ್ ದಲ್ಪ ಪಾಡಿನ ರಂಗ ಮಂಟಪಡ್ ಶ್ರೀ ದೇವಿ ಮಹಾತ್ಮೆ ಆಟ ನಡಪರೆ ಉಂಡು.
ದಿ. ಕುಂಞಪ್ಪ ಪೂಜಾರಿಲೆನ ನೆಂಪುಗಾದ್ 12ನೇ ವರ್ಷದ ಆಟ ನಡಪರೆ ಉಂಡು. ಅಂಚೆನೆ ಶ್ರೀ ಕಟೀಲ್ ಕ್ಷೇತ್ರದ ಕೆ. ಲಕ್ಷ್ಮೀನಾರಾಯಣ ಅಸ್ರಣ್ಣ ಮೆರೆನ ಮುತಾಲಿಕೆಡ್ ಶ್ರೀ ದೇವಿನ ಮೆರವಣಿಗೆ ನಡಪರೆ ಉಂಡು. ರಾತ್ರೆ ಅನ್ನ ಪ್ರಸಾದ ಸೇವೆ ನಡಪುಂಡು ಪಂದ್ ಕುಡ್ಲ ಬಿಜೆಪಿ ಮಂಡಲದ ಪ್ರಧಾನ ಕಾರ್ಯದರ್ಶಿ ಸುಜಿತ್ ಮಾಡೂರು ಲೆಪ್ಪೋಲೆಡ್ ತೆರಿಪಾದೆರ್.
ಕಿನ್ನಿಗೋಳಿ : ಕಟೀಲ್ ಕೈತಲ್ದ ಕೊಡೆತ್ತೂರು ಶ್ರೀ ಅರಸು ಕುಂಜರಾಯನ ದೈವೊಲ್ಯ ಸುಮಾರ್ 6 ಕೋಟಿ ರೂ. ಕರ್ಚಿಡ್ ಜೀರ್ಣೋದ್ಧಾರ ಆದ್, ಇನಿರ್ದ್ (ಫೆ.29) ಮಾರ್ಚ್ 13 ಮುಟ್ಟ ಕ್ಷೇತ್ರಡ್ ಬಿಂಬ ಪುನರ್ ಪ್ರತಿಷ್ಠೆ, ಬ್ರಹ್ಮಕಲಶಾಭಿಷೇಕ, ವಾರ್ಷಿಕ ನೇಮ ಉಚ್ಚಯ ಕೊಡೆತ್ತೂರು ದೇವಸ್ಯ ಮಠ ವೇದವ್ಯಾಸ ಉಡುಪೆರೆನ ಮುತಾಲಿಕೆಡ್ ನಡಪರೆ ಉಂಡು ಪಂದ್ ಸಂಸದೆರ್ ನಳಿನ್ ಕುಮಾರ್ ಕಟೀಲ್ ತೆರಿಪಾಯೆರ್.
ಕ್ಷೇತ್ರದ ಅಂಗಣೊಡು ಬುಧಾರ ಪತ್ರಿಕಾಗೋಷ್ಠಿಡ್ ಪಾತೆರ್ನ ಸಂಸದೆರ್, ಮಾರ್ಚ್ 1 ಸುಕ್ರಾರ ಬೊಲ್ಪುಗು ಪೊಸ ಭಂಡಾರ ಚಾವಡಿಡ್ ಶ್ರೀ ಅರಸು ಕುಂಜರಾಯ ಬೊಕ್ಕ ಸಪರಿವಾರ ದೈವೊಲೆನ ಪುನರ್ ಪ್ರತಿಷ್ಠೆ, ಕಲಶಾಭಿಷೇಕ ಮಾ.8 ಸುಕ್ರಾರ ಬೊಲ್ಪುಗು ಶ್ರೀ ಅರಸು ಕುಂಜರಾಯನ ಬ್ರಹ್ಮಕಲಶಾಭಿಷೇಕ ನಡಪರೆ ಉಂಡು ಪಂದ್ ಪಂಡೆರ್.
ಸುಮಾರ್ 30 ಲಕ್ಷ ರೂ. ಕರ್ಚಿಡ್ ಶಾಸಕೆರ್ನ ನಿಧಿರ್ದ್ ದೈವೊಲ್ಯದ ಕೂಡು ರಸ್ತೆ ಅಭಿವೃದ್ಧಿ, ಸಂಸದೆರ್ನ ನಿಧಿರ್ದ್ ಸುಮಾರ್ 65 ಲಕ್ಷ ರೂ. ಕರ್ಚಿಡ್ ತಡೆಗೋಡೆ, ಕ್ಷೇತ್ರಗ್ ಪಾಗರ ನಿರ್ಮಾಣ ಇಂಚ ಬೇತೆ ಬೇತೆ ಕಾಮಗಾರಿ ಪೂರ್ಣ ಆತ್ಂಡ್. ಬ್ರಹ್ಮಕಲಶ ಉಚ್ಚಯನ್ ಯಶಸ್ವಿ ಮಲ್ಪೆರೆ ಬೇತೆ ಬೇತೆ ಸಮಿತಿನ್ ರಚನೆ ಮಲ್ದ್ಂಡ್ ಪಂದ್ ಪಂಡೆರ್.
ಉಚ್ಚಯದ ಧರ್ಮ ಸಭೆಟ್ಟ್ ಅಂತರಾಷ್ಟ್ರೀಯ ವಾಸ್ತು ತಜ್ಞೆರ್ ಶ್ರೀ ಚಂದ್ರಶೇಖರ ಸ್ವಾಮೀಜಿ, ವಾಸ್ತುಶಿಲ್ಪಿ ಪ್ರಸಾದ್ ಮುನಿಯಂಗಳ, ಕಟೀಲ್ ಕ್ಷೇತ್ರದ ಆಸ್ರಣ್ಣ ಬಂಧುಲೆನೊಟ್ಟಿಗೆ ಸುಮಾರ್ ಧಾರ್ಮಿಕ ನೇತಾರೆರ್ ಪಾಲ್ ಪಡೆವರೆ ಉಲ್ಲೆರ್. ಅಂಚೆನೆ ಪ್ರತಿದಿನಲ ಸಾರ್ವಜನಿಕ ಅನ್ನ ಪ್ರಸಾದ ಸೇವೆ ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು ಪಂದ್ ಪಂಡೆರ್.
ಪತ್ರಿಕಾಗೋಷ್ಠಿಡ್ ದೈವೊಲ್ಯದ ಬ್ರಹ್ಮಕಲಶ ಉಚ್ಚಯ ಸಮಿತಿದ ಪದುಕೆರ್, ಕೊಡೆತ್ತೂರು ದೇವಸ್ಯ ಮಠತ್ತ ವೇದವ್ಯಾಸ ಉಡುಪ, ದೇವಿ ಪ್ರಸಾದ ಶೆಟ್ಟಿ ಕೊಡೆತ್ತೂರು, ಭುವನಾಭಿರಾಮ ಉಡುಪ, ಜಯರಾಮ ಮುಕ್ಕಾಲ್ದಿ, ಪುರುಷೋತ್ತಮ ಶೆಟ್ಟಿ, ನಿತಿನ್ ಶೆಟ್ಟಿ, ಶ್ರೀಧರ್ ಆಳ್ವ ಕೊಡೆತ್ತೂರು ಮಾಗಂದಡಿ, ಲೋಕೇಶ್ ಶೆಟ್ಟಿ, ಹರೀಶ್ ಶೆಟ್ಟಿ ಸಾಂತ್ಯ, ಶೈಲೇಶ್ ಅಂಚನ್, ಮೋಹನ್ ಶೆಟ್ಟಿ ದೇವಸ್ಯ, ಪ್ರೇಮ್ ರಾಜ್ ಶೆಟ್ಟಿ, ಈಶ್ವರ ಕಟೀಲ್, ರವಿರಾಜ್ ಪಾಲ್ ಪಡೆದಿತ್ತೆರ್.
ಕಲ್ಯಾಣಪುರ: ನೇಜಾರ್ ಶ್ರೀ ಭಗವತೀ ತೀಯಾ ಸಮಾಜ (ರಿ.) ದ ಮುತಾಲಿಕೆಡ್ ಗಣಹೋಮ ಬೊಕ್ಕ 8ನೇ ವರ್ಷದ ಶ್ರೀ ಭಗವತೀ ಕಲ್ಪೋಕ್ತ ಪೂಜೆ ಮಾ.3 ಐತಾರ ನಡಪರೆ ಉಂಡು.
ಆನಿ ಬೊಲ್ಪುಗು ಗಣಹೋಮ, ಭಗವತೀ ಕಲ್ಪೋಕ್ತ ಪೂಜೆ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಅಂಚೆನೆ ಶ್ರೀ ಭಗವತೀ ಕಲ್ಪೋಕ್ತ ಪೂಜೆದ ಸಂಕಲ್ಪಗ್ ಕುಲ್ಲುನ ಭಕ್ತೆರ್ ಬೊಲ್ಪುಗು 8:30 ಕ್ಕ್ ಸಮಾಜ ಮಂದಿರಡ್ ಹಾಜರಿಪ್ಪೊಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ಭಗವತೀ ಮಾತೆನ ಕೃಪೆಗ್ ಪಾತ್ರರಾವೊಡು ಪಂದ್ ನೇಜಾರ್ ಶ್ರೀ ಭಗವತೀ ತೀಯಾ ಸಮಾಜದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ತುಳುನಾಡ ರಕ್ಷಣಾ ವೇದಿಕೆ ಒಡಿಪು ಜಿಲ್ಲಾ ಕಚೇರಿಡ್ ಫೆ.26 ಸೋಮಾರ ಬಯ್ಯಗ್ ತುಳುನಾಡ ರಕ್ಷಣಾ ವೇದಿಕೆದ ಒಡಿಪು ಜಿಲ್ಲಾ ಘಟಕದ ಸಭೆ ನಡತ್ಂಡ್.
ಸಭೆತ್ತ ಗುರ್ಕಾರ್ಮೆನ್ ಕೇಂದ್ರೀಯ ಮಂಡಳಿ ಗುರ್ಕಾರೆ- ಸ್ಥಾಪಕೆರ್ ಯೋಗೀಶ್ ಶೆಟ್ಟಿ ಜಪ್ಪು ಒಯಿಸ್ ದಿತ್ತೆರ್. ಕೇಂದ್ರೀಯ ಮಂಡಳಿ ಸಂಘಟನಾ ಕಾರ್ಯದರ್ಶಿ ಪ್ರಶಾಂತ್ ಭಟ್ ಕಡಬ ಮೇರ್ ಸಭೆತ್ತ ಪ್ರಾಸ್ತವಿಕ ಭಾಷಣ ಮಲ್ತೆರ್. ಬೊಕ್ಕ ಒಡಿಪು ಜಿಲ್ಲಾ ಘಟಕದ ಪೊಸ ಸಮಿತಿ ರಚನೆ ಮಲ್ತೆರ್. ಸಭೆಟ್ಟ್ ಒಡಿಪು ಜಿಲ್ಲಾ ಘಟಕದ ಗುರ್ಕಾರೆಯಾದ್ ಕೃಷ್ಣ ಕುಮಾರ್ ಮೆರೆನ್ ಆಯ್ಕೆ ಮಲ್ತೆರ್.
ಗೌರವ ಸಲಹೆಗಾರೆಯಾದ್ ರವಿ ಅಚಾರ್ಯ, ಸುಧಾಕರ ಅಮೀನ್, ಒತ್ತು ಗುರ್ಕಾರೆಯಾದ್ ಜಯ ಪೂಜಾರಿ, ಉಮೇಶ್ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿಯಾದ್ ಅಜರುದ್ದೀನ್ ಸುಬ್ರಹ್ಮಣ್ಯ ನಗರ, ಜತೆ ಕಾರ್ಯದರ್ಶಿಯಾದ್ ಸುಭಾಷ್ ಸುದನ್, ಸಾಮಾಜಿಕ ಜಾಲತಾಣ ಸಂಚಾಲಕೆರಾದ್ ರೋಶನ್, ಸಹ ಸಂಚಾಲಕೆರಾದ್ ಸ್ವಸ್ತಿಕ್, ಕ್ರೀಡಾ ಕಾರ್ಯದರ್ಶಿಯಾದ್ ಅವಿನಾಶ್ ಸಂತೆಕಟ್ಟೆ, ಆಟೋ ಘಟಕದ ಗುರ್ಕಾರೆಯಾದ್ ಅನಿಲ್ ಪೂಜಾರಿ, ಬ್ರಹ್ಮಾವರ ಘಟಕದ ಮಾನಾದಿಗೆದ ಗುರ್ಕಾರೆಯಾದ್ ಸದಾಶಿವ ಬ್ರಹ್ಮಾವರ, ಗುರ್ಕಾರೆಯಾದ್ ಸತೀಶ್ ಪೂಜಾರಿ ಕೀಳಂಜೆ, ಕಾಪು ಯುವ ಘಟಕದ ಗುರ್ಕಾರೆಯಾದ್ ಪ್ರಶಾಂತ್ ಕಟಪಾಡಿ ಆಯ್ಕೆ ಆತೆರ್.
ಜಿಲ್ಲಾ ಕಾರ್ಯಕಾರಿ ಸಮಿತಿದ ಪದುಕೆರಾದ್ ವೇಣುಗೋಪಾಲ್, ರಾಹುಲ್ ಪೂಜಾರಿ, ಪ್ರೀತಮ್, ದಿವ್ಯಾ ರಾಜ್ ಸಂತೆಕಟ್ಟೆ, ಸ್ವಾಗತ್ ಕಲ್ಯಾಣಪುರ, ಶಂಕರ್ ಒಡಿಪು, ಪೆರ್ಡೂರು ಮೊಹಮ್ಮದ್ ಮಜೀದ್ ನೇಮಕ ಆತೆರ್.
ಒಡಿಪು ಜಿಲ್ಲಾ ಮಹಿಳಾ ಘಟಕದ ಗುರ್ಕಾರ್ದಿಯಾದ್ ಶೋಭ ಪಾಂಗಳ, ಪ್ರಧಾನ ಕಾರ್ಯದರ್ಶಿಯಾದ್ ನಾಗಲಕ್ಷ್ಮಿ, ಒತ್ತು ಗುರ್ಕಾರ್ದಿಯಾದ್ ಶಾಂಭವಿ, ಗುಲಾಬಿ, ಜತೆ ಕಾರ್ಯದರ್ಶಿಯಾದ್ ಗುಣವತಿ, ಸಂಘಟನಾ ಕಾರ್ಯದರ್ಶಿಯಾದ್ ಉಷಾ ಪೆಜಮಾಡಿ, ಕೋಶಾಧಿಕಾರಿಯಾದ್ ಸುನಂದ ಕೋಟ್ಯಾನ್, ಜಿಲ್ಲಾ ಮಹಿಳಾ ಕಾರ್ಯಕಾರಿ ಸದಸ್ಯದ ಪದುಕೆರಾದ್ ಹೇಮಾ ನಳಿನಿ, ಲಕ್ಷ್ಮಿ ಆದಿ ಒಡಿಪು,
ನಿರ್ಮಲ ಮೆಂಡನ್, ಸುಕನ್ಯಾ, ರೇಣುಕಾ, ಶರಣ್ಯ, ಸಾಧನಾ, ಸುಲೋಚನಾ, ಲಲಿತಾ ಕಟಪಾಡಿ, ಸವಿತಾ ಸಂತೆಕಟ್ಟೆ, ಕಾವ್ಯ, ಪುಷ್ಪ, ರಂಜಿತಾ ನೇಮಕ ಆತೆರ್.
ಒಡಿಪು ಜಿಲ್ಲಾ ವ್ಯಾಪ್ತಿದ ಸುಮಾರ್ ಜನ ಈ ಪೊರ್ತುಡು ಸಂಘಟನೆಗ್ ಸೇರ್ಪಡೆ ಆಯೆರ್. ಪೊಸತಾದ್ ಆಯ್ಕೆ ಆಯಿನ ಪದುಕೆರೆನ್ ತುಳುನಾಡ ರಕ್ಷಣಾ ವೇದಿಕೆದ ಸ್ಥಾಪಕಾಧ್ಯಕ್ಷೆರ್ ಯೋಗೀಶ್ ಶೆಟ್ಟಿ ಜಪ್ಪು ಮೇರ್ ಶಾಲ್ ಪಾಡ್ದ್ ಅಭಿನಂದನೆ ಸಂದಾಯೆರ್.
ಬೊಕ್ಕ ಮೇರ್ ಪಾತೆರ್ದ್, ನನದ ದಿನಟ್ಟ್ ಒಡಿಪು ಘಟಕದ ಬೇತೆ ಬೇತೆ ತಾಲೂಕ್ ಮಹಿಳಾ ಘಟಕ ಯುವ ಘಟಕ ಗ್ರಾಮ ಘಟಕನ್ ರಚನೆ ಮಲ್ತ್ ದ್ ಒಡಿಪು ಜಿಲ್ಲೆದ ಸರ್ವತೋಮುಖ ಅಭಿವೃದ್ಧಿ ಐಕ್ಯತೆ ಮಲ್ಪುನಲ್ಪ ಸಮರ್ಥವಾದ್ ಸಂಘಟನೆನ್ ಬುಲೆಪಾಯೆರೆ ಪ್ರಯತ್ನ ಮಲ್ಪೊಡು. ಒಗ್ಗಟ್ಟ್ ಡ್ ಮಾತ ಕಾರ್ಯಕರ್ತೆರೆನ್ ವಿಶ್ವಾಸಗ್ ದೆತೊಂದು ಜನಕ್ಲೆನ ಸಮಸ್ಯೆ ಪರಿಹಾರ ಮಲ್ಪೆರೆ ಪ್ರಯತ್ನ ಮಲ್ಪೊಡು ಪಂದ್ ಪೊಸ ಆಯ್ಕೆ ಆಯಿನ ಪದುಕೆರೆಗ್ ತೆರಿಪಾಯೆರ್.
ಜಿಲ್ಲಾ ವೀಕ್ಷಕೆರ್, ಒಡಿಪು ಜಿಲ್ಲಾ ಉಸ್ತುವಾರಿ ಆಯಿನ ಫ್ರ್ಯಾಂಕಿ ಡಿಸೋಜ ಮೇರ್ ಪಾತೆರ್ದ್, ನಮ ಮಾತೆರ್ಲಾ ಎನ್ನ ಸಂಘಟನೆ ತುಳುನಾಡು ರಕ್ಷಣಾ ವೇದಿಕೆ ಪಂದ್ ಎನ್ನ್ ದ್ ಪ್ರತಿಯೊರಿಲ ಸಂಘಟನೆ ಗಟ್ಟಿ ಮಲ್ಪುನಲ್ಪ ಪ್ರಯತ್ನ ಮಲ್ಪೊಡು. ಅಂಚೆನೆ ಗುರ್ಕಾರೆಯಾದ್ ಆಯ್ಕೆ ಆಯಿನ ಕೃಷ್ಣಕುಮಾರ್ ಮೇರ್ ಪಾತೆರ್ದ್, ಎನ್ನ ಮಿತ್ತ್ ವಿಶ್ವಾಸ, ಭರವಸೆ ದೀದ್, ಗುರ್ಕಾರೆ ತಾನದ ಜಬದಾರಿ ಕೊರ್ನ ತುಳುನಾಡ ರಕ್ಷಣಾ ವೇದಿಕೆ ಕೇಂದ್ರೀಯ ಗುರ್ಕಾರೆ ಯೋಗಿಶ್ ಶೆಟ್ಟಿ ಜಪ್ಪು ಮೆರೆನ ಇಚ್ಛೆದಲೆಕ್ಕನೇ ಮಾತ ಪದುಕೆರೆನ ಬೊಕ್ಕ ತಾಲೂಕ್ ಗುರಿಕಾರೆರೆನ, ಕಾರ್ಯಕರ್ತೆರೆನ ಸಹಕಾರದೊಟ್ಟಿಗೆ ಒಡಿಪು ಜಿಲ್ಲೆಡ್ ತುಳುನಾಡು ರಕ್ಷಣಾ ವೇದಿಕೆನ್ ಸಮರ್ಥವಾದ್ ಕಟ್ಟ್ ದ್ ಬುಲೆಪಾವ ಪಂದ್ ಪಂಡೆರ್.
ಮುಲ್ಕಿ: ತುಳುನಾಡ್ ದ ಅರಸು ಇಲ್ಲದ ಧಾರ್ಮಿಕ, ಸಾಮಾಜಿಕ ಬೊಕ್ಕ ಕಂಬುಲ ಕ್ರೀಡೆದ ಮುಕೇನ ಕೃಷಿ ಪರಂಪರೆದ ಅಧ್ಯಯನ ಗ್ರಂಥ ಮಲ್ದಿನವು ಮೆಚ್ಚೊಡಾಯಿನವು ಕೆಲಸ ಪಂದ್ ಮೈಸೂರ್ ಮಹಾರಾಜೆರ್ ಯದುವೀರ ಕೃಷ್ಣದತ್ತ ಚಾಮರಾಜ ಒಡೆಯೆರ್ ಪಂಡೆರ್.
ಮುಲ್ಕಿ ಸೀಮೆದ ಅರಮನೆಟ್ಟ್ ಉಪನ್ಯಾಸಕಿ ಅಕ್ಷತಾ ವಿ ಎಡ್ಮೆಮಾರ್ ತನ್ನ ಸ್ನಾತಕೋತ್ತರ ಪದವಿಗಾದ್ ನಡಪಾಯಿನ ಮುಲ್ಕಿ ಸೀಮೆದ ಅರಸು ಪರಂಪರೆದ ಕಿರು ಸಂಶೋಧನಾ ಪ್ರಬಂಧನ್ ಸೋಮಾರ ಮುಲ್ಕಿ ಸೀಮೆದ ಅರಸು ದುಗ್ಗಣ್ಣ ಸಾವಂತೆರೆಗ್ ಕೊರ್ಪಿನ ಲೇಸ್ ಡ್ ಪಾತೆರಿಯೆರ್.
ಸೀಮೆದ ಅರಸು ದುಗ್ಗಣ್ಣ ಸಾವಂತೆರ್ ಗುರ್ಕಾರ್ಮೆನ್ ಒಯಿಸೊಂದು ಪಾತೆರ್ದ್, ಮುಲ್ಕಿದ ಅರಸು ಪರಂಪರೆದ ಬಗೆಟ್ಟ್ ನನದ ಪೀಳಿಗೆಗ್ ತೆರಿಪಾವುನ ಸಲುವಾದ್ ನಿರ್ಮಾಣ ಮಲ್ತಿನ ಸಂಶೋಧನಾ ಪ್ರಬಂಧ ಯುವ ಸಮಾಜಗ್ ಅಧ್ಯಯನ ಸೆಲೆಯಾದ್ ತಿಕ್ಕುಂಡು ಪಂದ್ ಪಂಡೆರ್.
ಈ ಪೊರ್ತುಡು ಮೈಸೂರು ಮಹಾರಾಜ ಯದುವೀರ ಕೃಷ್ಣದತ್ತ ಚಾಮರಾಜ ಒಡೆಯರ್ ಮೆರೆಗ್ ಮಾನಾದಿಗೆ ನಡತ್ಂಡ್. ಸುರತ್ಕಲ್ ಹಿಂದು ವಿದ್ಯಾದಾಯಿನಿ ಸಂಘದ ಗುರ್ಕಾರೆ ಜಯಚಂದ್ರ ಹತ್ವಾರ್, ಮುಲ್ಕಿ ಅರಮನೆ ವೆಲ್ಫೇರ್ ಟ್ರಸ್ಟ್ ದ ನಿರ್ದೇಶಕೆರ್ ಗೌತಮ್ ಜೈನ್, ಶರತ್ ಕಾರ್ನಾಡ್, ಕೃಷ್ಣಮೂರ್ತಿ, ವಕೀಲ ಚಂದ್ರಶೇಖರ್ ಜಿ. ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.
ಮುಲ್ಕಿ ಸೀಮೆದ ಅರಸು ಪರಂಪರೆದ ಎಲ್ಯ ಸಂಶೋಧನಾ ಪ್ರಬಂಧನ್ ಯದುವೀರ ಕೃಷ್ಣದತ್ತ ಚಾಮರಾಜ ಒಡೆಯರೆನ ಉಪಸ್ಥಿತಿಡ್ ಮುಲ್ಕಿ ಸೀಮೆದ ಅರಸು ದುಗ್ಗಣ್ಣ ಸಾವಂತ ಅರಸೆರ್ ಪ್ರದರ್ಶನ ಮಲ್ತೆರ್.ಸಾಧಕೆರೆನ ನಿಲೆಟ್ಟ್ ಉದ್ಯಮಿ ಬಿ.ಸೂರ್ಯಕುಮಾರ್ ಹಳೆಯಂಗಡಿ, ವಿನೋದ್ ಸಾಲ್ಯಾನ್ ಬೆಳ್ಳಾಯರು, ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿ ಗುರ್ಕಾರೆ ಎಚ್ ವಸಂತ್ ಬೆರ್ನಾಡ್, ಧರ್ಮದರ್ಶಿಲು ಮೋಹನ್ ದಾಸ್ ಸುರತ್ಕಲ್, ನಾಗಸ್ವರ ವಾದಕೆರ್ ವಿದ್ವಾನ್ ನಾಗೇಶ್ ಬಪ್ಪನಾಡ್, ರಂಗಕರ್ಮಿ ಎಂ ಚಂದ್ರಶೇಖರ ಸುವರ್ಣ, ಮುಲ್ಕಿ ಠಾಣೆದ ಎಎಸ್ ಐ ಸಂಜೀವ, ಸಂದೀಪ್ ಶೆಟ್ಟಿ ಪಡುಪಣಂಬೂರು, ಅನಿಲ್ ಶಾಮ್ ಶೆಟ್ಟಿ ಮೂಡುತೋಟ, ಸುಧೇಶ್ ಕುಮಾರ್, ಹರ್ಷಿತ್ ಸಾಲ್ಯಾನ್, ಗಾಯತ್ರಿ ಮಹಿಳಾ ಮಂಡಲದ ಸದಸ್ಯೆರೆಗ್ ಮಾನಾದಿಗೆ ಮಲ್ತೆರ್.
ಸುರತ್ಕಲ್ ಗೋವಿಂದದಾಸ ಕಾಲೇಜ್ ದ ಎನ್ನೆಸ್ಸೆಸ್ ಕಲ್ಪಾರ್ಥಿಲು ರಚನೆ ಮಲ್ತಿನ ಮೈಸೂರು ಮಹಾರಾಜರೆನ ಭಾವಚಿತ್ರನ್ ಕೊರಿಯೆರ್. ಡೆಲ್ಲಿದ ಗಣರಾಜ್ಯೋತ್ಸವ ಪರೇಡ್ ಡ್ ಪಾಲ್ ಪಡೆಯಿನ ಕಲ್ಪಾರ್ಥಿಲೆಗ್ ಮಾನಾದಿಗೆ ಮಲ್ತೆರ್. ಹಿತಾಕ್ಷಿ ಉಮೇಶ್ ಲೇಸ್ ದ ಸುಧಾರಿಕೆ ಮಲ್ತೆರ್. ಬೊಕ್ಕ ಮೈಸೂರು ಮಹಾರಾಜೆರ್ ಯಕ್ಷಗಾನ ತೂಯೆರ್.
ಕುಡ್ಲ ವಿಶ್ವವಿದ್ಯಾನಿಲಯ, ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳು ಪೀಠ, ಶ್ರೀ ಸಂಸ್ಥಾನ ಒಡಿಯೂರು ತುಳು ಅಧ್ಯಯನ ಕೇಂದ್ರ, ತುಳು ಸ್ನಾತಕೋತ್ತರ ಅಧ್ಯಯನ ವಿಭಾಗ, ವಿಶ್ವವಿದ್ಯಾನಿಲಯ ಸಂಧ್ಯಾ ಕಾಲೇಜ್ ದ ಒಟ್ಟುಸೇರಿಗೆಡ್ “ತುಳುವೆರೆ ಬೆನ್ನಿ ಬದ್ಕ್ ” ಗೇನ ಪೊಲಬುದ ಪರಪು ಲೇಸ್ ಮಾ.2 ಸನಿಯಾರ ಬಯ್ಯಗ್ ಆನ್ ಲೈನ್ ಡ್ ನಡಪರೆ ಉಂಡು.
ಈ ಲೇಸ್ ದ ಗುರ್ಕಾರ್ಮೆನ್ ವಕೀಲೆರ್ ಸುರೇಶ್ ಕುಮಾರ್ ಬಿ. ನಾವೂರು ಒಯಿಸೊನ್ವೆರ್. ಶ್ರೀ ಕ್ಷೇತ್ರ ಧರ್ಮಸ್ಥಳದ ಕೃಷಿ ವಿಭಾಗದ ವ್ಯವಸ್ಥಾಪಕೆರ್ ಬಿ. ಬಾಲಕೃಷ್ಣ ಪೂಜಾರಿ ಗೇನದ ಪೊಲಬು ಕೊರಿಯೆರೆ ಉಲ್ಲೆರ್.
ಮಲ್ಲ ಬಿನ್ನೆರಾದ್ ಕನ್ನಡ ಪ್ರಭ ಪತ್ರಿಕೆದ ಪ್ರಧಾನ ಪುರವಣಿ ಸಂಪಾದಕೆರ್ ಜೋಗಿ ಬೊಕ್ಕ ಮಾನಾದಿಗೆದ ಬಿನ್ನೆರಾದ್ ಕಾಪು ತಾಲೂಕ್ ಕಾರ್ಯನಿರತ ಪತ್ರಕರ್ತರ ಸಂಘದ ಹರೀಶ್ ಕುಮಾರ್ ಪೆಜಮಾಡಿ ಪಾಲ್ ಪಡೆಯೆರೆ ಉಲ್ಲೆರ್.
ಈ ಲೇಸ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಕಾರ್ಯಕ್ರಮ ಸಂಯೋಜಕೆರ್ ವೇದಸ್ಮಿತಾ, ಪ್ರಸಾದ್ ಅಂಚನ್, ಶ್ರೀ ಧ.ಮಂ.ತುಳುಪೀಠ, ತುಳು ಸ್ನಾತಕೋತ್ತರ ಅಧ್ಯಯನ ವಿಭಾಗದ ಡಾ. ಮಾಧವ ಎಂ.ಕೆ, ಕುಡ್ಲ ವಿಶ್ವವಿದ್ಯಾನಿಲಯ ಸಂಧ್ಯಾ ಕಾಲೇಜ್ ಪ್ರಾಂಶುಪಾಲೆರ್ ಡಾ. ಲಕ್ಷ್ಮೀದೇವಿ ಎಲ್ ಲೆಪ್ಪೋಲೆಡ್ ತೆರಿಪಾದೆರ್.
ಸುಬ್ರಹ್ಮಣ್ಯ: ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅರೆನ ಆಡಳಿತನ್ ತೂದು ವಿದೇಶಡ್ಲ ಭಾರತೀಯೆರೆನ್ ಎದ್ಕೊನುವೆರ್. ಪ್ರಧಾನಿ ಎಡ್ಡೆ ಅಭಿವೃದ್ಧಿ ಯೋಜನೆನ್ ರೂಪಿಸಾದ್ ಆಡಳಿತ ಮಲ್ತೊಂದು ಉಲ್ಲೆರ್. ಗ್ರಾಮೀಣ ಭಾಗದ ಅಭ್ಯುದಯಗ್ ಮೋದಿ ಮಲ್ತಿನ ಯೋಜನೆಲು ಅನನ್ಯವಾಯಿನ ಪಂದ್ ಸುಳ್ಯ ಶಾಸಕಿ ಭಾಗೀರಥೀ ಮುರುಳ್ಯ ಪಂಡೆರ್.
ಅಮೃತ ಭಾರತ್ ರೈಲು ನಿಲ್ದಾಣ ಯೋಜನೆಡ್ ಸುಬ್ರಹ್ಮಣ್ಯ ರೋಡ್ ನೆಟ್ಟಣ ರೈಲು ನಿಲ್ದಾಣಡ್ ನಡಪುನ ಅಭಿವೃದ್ದಿ ಕಾಮಗಾರಿಗ್ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಶಂಕು ಸ್ಥಾಪನೆ ಮಲ್ತ್, ಫೆ.26 ತಾರೀಕ್ ತಾನಿ ನಡತ್ತಿನ ಸಭಾ ಕಾರ್ಯಕ್ರಮ ಉದಿಪನ ಮಲ್ತ್ ಪಾತೆರಿಯೆರ್. ಸುಬ್ರಹ್ಮಣ್ಯ ರೋಡ್ ರೈಲ್ ನಿಲ್ದಾಣಗ್ 50 ವರ್ಷ ಆವೊಂದು ಬರ್ಪುಂಡು. ಈ ಪೊರ್ತುಡು ರೈಲ್ ನಿಲ್ದಾಣ ಸಮಗ್ರ ಮೂಲಭೂತ ವ್ಯವಸ್ಥೆದೊಟ್ಟಿಗೆ ಅಭಿವೃದ್ಧಿ ಕೆಲಸ ಪೂರ್ಣ ಆವೆರೆ ಉಂಡು. ಮುಲ್ಪದ ರೈಲ್ ನಿಲ್ದಾಣದ ಬೇಡಿಕೆಲು ಅಮೃತ ಭಾರತ ರೈಲು ನಿಲ್ದಾಣ ಯೋಜನೆದ ಅನುದಾನಡ್ ಈಡೇರೆರೆ ಉಂಡು. ದುಂಬುಗ್ಲ ಮುಲ್ಪದ ಬೇಡಿಕೆದ ಬಗ್ಗೆ ಸಂಬಂಧಪಟ್ಟಿನ ಅಧಿಕಾರಿಲೆಡ ಮನವಿ ಮಲ್ತ್ ಪರಿಹಾರ ಮಲ್ಪುವ ಪಂದ್ ಪಂಡೆರ್.
ರೈಲ್ವೇ ಉದ್ಯೋಗಗ್ ನಮ್ಮ ಭಾಗದ ಅಭ್ಯರ್ಥಿಲು ನೇಮಕ ಆಂಡ ಈ ಭಾಗಗ್ ಅನುಕೂಲ ಆವೆರೆ ಉಂಡು. ಈ ನಿಟ್ಟ್ಡ್ ಪ್ರಯತ್ನಲು ನಡತೊಂದು ಉಂಡು. ಸುಳ್ಯ ಬಿಜೆಪಿ ಮಂಡಲದ ಸಮಿತಿ ಅಧ್ಯಕ್ಷೆ ವೆಂಕಟ್ ವಳಲಂಬೆ ಪಾತೆರ್ದ್ ಕೇಂದ್ರಡ್ ನರೇಂದ್ರ ಮೋದಿ ನೇತೃತ್ವದ ಬಿಜೆಪಿ ಸರಕಾರ ಮಾತ ವಿಭಾಗಡ್ಲ ಅಭಿವೃದ್ದಿ ಮಲ್ಪುನೆಟ್ಟ್ ಯಶಸ್ವಿಯಾತ್ಂಡ್. ಉಂದು ನಮಕ್ಕ್ ಮಾತ ಖುಷಿತ್ತ ವಿಚಾರ. ರೈಲ್ವೇ ಇಲಾಖೆಡ್ ಎಡ್ಡೆ ಅಭಿವೃದ್ದಿ ಕೆಲಸಲು ಆವೊಂದು ಉಲ್ಲ ಪಂದ್ ಪಂಡೆರ್. ಬಿಳಿನೆಲೆ ಗ್ರಾ.ಪಂ ಅಧ್ಯಕ್ಷೆ ಶಾರದಾ ದಿನೇಶ್, ಜಿಲ್ಲಾ ಪರಿಷತ್ ಮಾಜಿ ಸದಸ್ಯೆ ಸಯ್ಯದ್ ಮೀರಾ ಸಾಹೇಬ್, ಜಿ.ಪಂ ಮಾಜಿ ಸದಸ್ಯೆರಾಯಿನ ಕೃಷ್ಣ ಶೆಟ್ಟಿ ಕಡಬ, ಪಿ.ಪಿ ವರ್ಗೀಸ್, ಹರೀಶ್ ಕಂಜಿಪಿಲಿ, ತಾ.ಪಂ ಮಾಜಿ ಸದಸ್ಯೆ ಫಝಲ್ ಕೋಡಿಂಬಾಳ, ರೈಲ್ವೇ ಇಲಾಖೆದ ಅಧಿಕಾರಿ ರಾಘವೇಂದ್ರ, ನೆಟ್ಟಣ ರೈಲ್ ಬಳಕೆದಾರರ ಸಂಘದ ಅಧ್ಯಕ್ಷೆರ್ ಕೆ.ಜಿ ಪ್ರಸಾದ್ ನೆಟ್ಟಣ, ಪ್ರಮುಖೆರಾಯಿನ ರೋಯಿ ಅಬ್ರಾಹಂ ಈ ಪೊರ್ತುಡು ಇತ್ತೆರ್. ರೈಲ್ವೇ ಇಲಾಖೆದ ಸುರೇಶ್ ಲೇಸ್ದ ಸುಧಾರಿಕೆ ಮಲ್ತೆರ್.
