ಕಡಂದಲೆ ಸುರೇಶ್ ಭಂಡಾರಿ ಫ್ಯಾಮಿಲಿ ಟ್ರಸ್ಟ್ (ರಿ.) ದ ಮುತಾಲಿಕೆಡ್ ಕಾಯಕಲ್ಪ ಪನ್ಪುನ ಯಕ್ಷಗಾನ ಮಾ.28 ಗುರುವಾರ ತಲಪಾಡಿ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಎದುರುದ ಬಾಕಿಮಾರ್ ಕಂಡಡ್ ಬಯ್ಯಗ್ ಪ್ರದರ್ಶನ ಆಯೆರೆ ಉಂಡು.
ಈ ಲೇಸ್ ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯ ಸ್ವಾಮಿ ಕೃಪಾಪೋಷಿತ ಯಕ್ಷಗಾನ ಮಂಡಳಿ ನಾಗವೃಜ ಕ್ಷೇತ್ರ ಪಾವಂಜೆದ ಯಕ್ಷಧ್ರುವ ಪಟ್ಲ ಸತೀಶ್ ಶೆಟ್ಟಿ ಮೆರೆನ ಸಾರಥ್ಯಡ್ ನಡಪರೆ ಉಂಡು.
ಪಡ್ಡೆದ್ರ: ಒಡಿಪು ಜಿಲ್ಲಾ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಬೊಳ್ಳಿ ಪರ್ಬದ ಸಂಭ್ರಮದ ಲೆಕ್ಕೊಡು ಕಾಪು ತಾಲೂಕ್ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಮುತಾಲಿಕೆಡ್ ಮಾ.5 ಅಂಗಾರೆ ಪೆಜಮಾಡಿದ ಬಸ್ತಿಪಡ್ಪು ರಾಜೀವಗಾಂಧಿ ಕ್ರೀಡಾಂಗಣಡ್ ಒಡಿಪು ಜಿಲ್ಲಾ ಪತ್ರಕರ್ತೆರೆನ ಕ್ರಿಕೆಟ್ ಪಂತ ನಡಪರೆ ಉಂಡು.
ಜಿಲ್ಲೆದ ಮಾತ ತಾಲೂಕು ಪತ್ರಕರ್ತೆರೆನ ಸಂಘದ ಕೂಟದಕುಲು ಪಂತೊಡು ರಜತ ಸಂಭ್ರಮ ಟ್ರೋಫಿಗಾದ್ ಗೊಬ್ಬೆರೆ ಉಲ್ಲೆರ್. ಮಾ.5 ಅಂಗಾರೆ ಬೊಲ್ಪುಗು 9 ಗಂಟೆರ್ದ್ ಪಂತ ಸುರು ಆಪುಂಡು.
ಈ ಲೇಸ್ ದ ಗುರ್ಕಾರ್ಮೆನ್ ಕಾಪು ತಾಲೂಕು ಪತ್ರಕರ್ತೆರ್ನ ಸಂಘದ ಗುರ್ಕಾರೆ ಹರೀಶ್ ಹೆಜ್ಮಾಡಿ ಒಯಿಸೊನ್ವೆರ್. ನೆತ್ತ ಉದಿಪನನ್ ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ ಮಲ್ಪುವೆರ್.
ಮಲ್ಲ ಬಿನ್ನೆರಾದ್ ಒಡಿಪು ಸಂಘದ ಗುರ್ಕಾರೆ ರಾಜೇಶ್ ಶೆಟ್ಟಿ, ಕಾಪು ತಹಸೀಲ್ದಾರ್ ಡಾ.ಪ್ರತಿಭಾ ಆರ್., ಪಡ್ಡೆದ್ರ ಆಸ್ಪಿನ್ ಇನ್ಫ್ರಾ ಪ್ರೈ.ಲಿ. ದ ಜಿ.ಎಮ್. ಅಶೋಕ್ ಶೆಟ್ಟಿ, ಪಡುಪಣಂಬೂರು ಗ್ರಾ.ಪಂ. ಮಾಜಿ ಗುರ್ಕಾರೆ ವಿನೋದ್ ಸಾಲ್ಯಾನ್ ಬೆಳ್ಳಾಯರ್, ಒಡಿಪು ಬಿಜೆಪಿ ಜಿಲ್ಲಾ ಒತ್ತು ಗುರ್ಕಾರೆ ಪ್ರಕಾಶ್ ಶೆಟ್ಟಿ ಪಾದೆಬೆಟ್ಟು, ತಾ.ಪಂ.ಮಾಜಿ ಸದಸ್ಯೆರ್ ಸಚಿನ್ ನಾಯಕ್, ತಾಲೂಕ್ ಯುವಜನ ಬೊಕ್ಕ ಕ್ರೀಡಾ ಅಧಿಕಾರಿ ರಿತೇಶ್ ಕುಮಾರ್ ಶೆಟ್ಟಿ, ಪೆಜಮಾಡಿ ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ಆಡಳಿತ ಮೊಕ್ತೇಸರೆರ್ ದಯಾನಂದ ಹೆಜ್ಮಾಡಿ, ರಜತ ಸಂಭ್ರಮ ಸಮಿತಿದ ಸಂಚಾಲಕೆರ್ ಮೊಹಮ್ಮದ್ ಶರೀಫ್ ಪಾಲ್ ಪಡೆಯೆರೆ ಉಲ್ಲೆರ್.
ಬಯ್ಯಗ್ ನಡಪುನ ಮುಗಿತಲದ ಲೇಸ್ ಡ್ ಮಾಜಿ ಸಚಿವೆರ್ ವಿನಯಕುಮಾರ್ ಸೊರಕೆ ಪ್ರಶಸ್ತಿ ಪಟ್ಟುವೆರ್. ಅದಾನಿ ಪವರ್ ಕಂಪೆನಿದ ಕಿಶೋರ್ ಆಳ್ವ, ಪಡ್ಡೆದ್ರ ಬೂಡು ರತ್ನಾಕರ ರಾಜ್ ಅರಸು ಕಿನ್ಯಕ್ಕ ಬಲ್ಲಾಳೆರ್, ಪಡ್ಡೆದ್ರ ಸಹಕಾರಿ ಸೊಸೈಟಿದ ಗುರ್ಕಾರೆ ವೈ.ಸುಧೀರ್ ಕುಮಾರ್, ಕಾಪು ಗಾರ್ಡನ್ ಪ್ಯಾಲೇಸ್ ಎಮ್.ಡಿ. ಗೌರವ್ ಶೇಣವ, ಪಡ್ಡೆದ್ರ ಅಮರ್ ಕಾಂಫರ್ಟ್ ದ ಮಿಥುನ್ ಆರ್.ಹೆಗ್ಡೆ, ಕೆಪಿಸಿಸಿ ಕೋರ್ಡಿನೇಟರ್ ನವೀನ್ಚಂದ್ರ ಜೆ.ಶೆಟ್ಟಿ ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆಪೆರ್ ಪಂದ್ ಕ್ರೀಡಾ ಸಮಿತಿದ ಸಂಚಾಲಕೆರ್ ರಾಕೇಶ್ ಕುಂಜೂರು ತೆರಿಪಾದೆರ್.
ಶ್ರೀ ಕೋದಂಡರಾಮ ಕೃಪಾಪೋಷಿತ ಯಕ್ಷಗಾನ ಮಂಡಳಿ ಹನುಮಗಿರಿ ಮೇಳದಕ್ಲೆರ್ದ್ ಎ.25 ಗುರುವಾರ ಬಯ್ಯಗ್ ಮೂಡುಕೊಟ್ರಪ್ಪಾಡಿ ಶ್ರೀ ಲಕ್ಷ್ಮೀ ಜನಾರ್ಧನ ಬ್ರಹ್ಮಲಿಂಗೇಶ್ವರ ದೇವಲ್ಯದ ಎದುರುಡು ಪಾಡಿನ ರಂಗ ಮಂಟಪಡ್ ಇಂದ್ರಪ್ರಸ್ಥ ಆಟ ನಡಪರೆ ಉಂಡು.
ಪ್ರಸಾದ್ ಕುಮಾರ್ ಮೊಗೆಬೆಟ್ಟು ವಿರಚಿತ, ವಾಸುದೇವ ರಂಗಾ ಭಟ್ ಕಥೆ ಸಂಯೋಜನೆದ, ವಿನಯ ಶೆಟ್ಟಿ ಬೊಕ್ಕ ಸತೀಶ್ ಸುರೇಂದ್ರ ಶೆಟ್ಟಿ ಮೂಡುಕೊಟ್ರಪ್ಪಾಡಿ ಮೊಕ್ಲೆನ ಪರಕೆದ ಆಟ ಉಂದಾತ್ಂಡ್.
ಈ ಲೇಸ್ ಡ್ ಕಲಾಭಿಮಾನಿಲು ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಅಜೆಕಾರು ಬಾಲಕೃಷ್ಣ ಶೆಟ್ಟಿ ಬೊಕ್ಕ ಬೊಂಬೈದ ಅಜೆಕಾರು ಕಲಾಭಿಮಾನಿ ಬಳಗದಕುಲು ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಸೂಟರ್ ಪೇಟೆ ಶ್ರೀ ಕೋರ್ದಬ್ಬು ದೈವೊಲ್ಯಡ್ ಭಗವಾನ್ ಶ್ರೀ ಬಬ್ಬುಸ್ವಾಮಿ ಬೊಕ್ಕ ಪರಿವಾರ ದೈವೊಲೆನ ವರ್ಷಾವಧಿ ನೇಮ ಮಾ.2-5 ಮುಟ್ಟ ನಡಪರೆ ಉಂಡು.
ಮಾ.1 ಸುಕ್ರಾರ ಬೊಲ್ಪುಗು ನಾಗದೇವೆರೆಗ್ ಪಂಚಾಮೃತ ಅಭಿಷೇಕ, ನಾಗತಂಬಿಲ, ಆಶ್ಲೇಷ ಪೂಜೆ, ಪ್ರಸನ್ನ ಪೂಜೆ, ಮಧ್ಯಾಹ್ನ ಸಾರ್ವಜನಿಕ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ ರಾತ್ರೆ ಸಾಂಸ್ಕೃತಿಕ ಲೇಸ್, ವಿಜಯ ಫ್ರೆಂಡ್ಸ್ ಸರ್ಕಲ್ ಸೂಟರ್ ಪೇಟೆ ಮೊಕ್ಲೆನ ಪ್ರಾಯೋಜಕತ್ವಡ್ ನೃತ್ಯ ಗಾನ ಸಿಂಚನ ನಡತ್ಂಡ್.
ಮಾ.2 ಸನಿಯಾರ ಬೊಲ್ಪುಗು ಹೋಮ ಬೊಕ್ಕ ಭಂಡಾರ ಏರ್ಂಡ್. ಮಧ್ಯಾಹ್ನ ಜಾಗೆದ ಗುಳಿಗ ನೇಮ, ರಾತ್ರೆ ಭಗವಾನ್ ಶ್ರೀ ಬಬ್ಬುಸ್ವಾಮಿ ಬೊಕ್ಕ ತನ್ನಿಮಾನಿಗ ನೇಮ ನಡತ್ಂಡ್.
ಮಾ.3 ಐತಾರ ಬಯ್ಯಗ್ ಶ್ರೀ ರಾಹುಗುಳಿಗ ನೇಮ, ರಾತ್ರೆ ಶ್ರೀ ಪಂಜುರ್ಲಿ, ಗುಳಿಗ ನೇಮ ನಡತ್ಂಡ್.
ಮಾ.4 ಸೋಮಾರ ಮಧ್ಯಾಹ್ನ ಶ್ರೀ ಧರ್ಮದೈವೊದ ನೇಮ, ರಾತ್ರೆ ಶ್ರೀ ಸುಬ್ಬಿ ಗುಳಿಗ ಬೊಕ್ಕ ಸುಬ್ಯಮ್ಮ ನೇಮ ನಡಪರೆ ಉಂಡು.
ಮಾ.5 ಅಂಗಾರೆ ಮಧ್ಯಾಹ್ನ ಶ್ರೀ ಸಂಕಲೆ ಗುಳಿಗ ದೈವೊದ ನೇಮ, ರಾತ್ರೆ ಶ್ರೀ ಕೊರಗಜ್ಜ ದೈವೊದ ನೇಮ ಬೊಕ್ಕ ಭಂಡಾರ ಜಪ್ಪೆರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಗುರಿಕಾರೆರ್ ಎಸ್ ರಾಘವೇಂದ್ರ ಬೊಕ್ಕ ಗೌರವ ಸಲಹೆಗಾರೆರ್, ಗ್ರಾಮದ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬನ್ನಂಜೆ ಬಿಲ್ಲವ ಸಂಘ ಶ್ರೀ ನಾರಾಯಣಗುರು ಮಂದಿರದ ಮಾಜಿ ಗುರ್ಕಾರೆ ತಾರೆಕಟ್ಟೆ ಕೃಷ್ಣಪ್ಪ ಕೋಟ್ಯಾನ್ ಮೇರ್ ಮಾ.1 ಕ್ಕ್ ದೇವೆರೆ ಪಾದೊ ಸೇರಿಯೆರ್.
ಮೆರೆನ್ ಬಿಲ್ಲವ ಸಮಾಜದ ಐರನ್ ಮ್ಯಾನ್ ಪಂದೇ ಲೆತ್ತೊಂದು ಇತ್ತೆರ್. ಮೇರ್ ನಾರಾಯಣ ಗುರುಕುಲೆನ ಪರಮ ಭಕ್ತೆರಾತೆರ್.
ಸೀನಿಯರ್ ಚೇಂಬರ್ ಇಂಟರ್ ನ್ಯಾಷನಲ್ ನೆಲ್ಯಾಡಿ ಲೀಜನ್ ದ ಮುತಾಲಿಕೆಡ್ ಸುರು ಆಯಿನ ಪುತ್ತೂರು ಸೀನಿಯರ್ ಚೇಂಬರ್ ಇಂಟರ್ ನ್ಯಾಷನಲ್ ಲೀಜನ್ ದ ಪದಗ್ರಹಣ ಅಶ್ಮಿ ಕಂಫರ್ಟ್ ಹಾಲ್ ಡ್ ನಡತ್ಂಡ್.
ಗುರ್ಕಾರ್ದಿಯಾದ್ ಮಲ್ಲಿಕಾ ಜೆ ಆರ್ ರೈ ಗುಂಡ್ಯಡ್ಕ, ಕಾರ್ಯದರ್ಶಿಯಾದ್ ಎಂಪಿ ರೋಹಿಣಿ ಆಚಾರ್ಯ, ಕೋಶಾಧಿಕಾರಿಯಾದ್ ಸುಮಂಗಲ ಶೆಣೈ ಬೊಕ್ಕ 16 ಜನ ಒತ್ತು ಗುರ್ಕಾರ್ಲು, ಸದಸ್ಯೆರ್ ಆಯ್ಕೆ ಆಯೆರ್.
