ಮೇ 26: ಅಡ್ಯಾರ್ ಗಾರ್ಡನ್ ಡ್ ಪಟ್ಲ ಸಂಭ್ರಮ 2024

ಯಕ್ಷಧ್ರುವ ಯಕ್ಷ ಶಿಕ್ಷಣರ್ದ್ ಕಲ್ಪಾರ್ಥಿಲೆಡ ಆತ್ಮ ವಿಶ್ವಾಸ: ಪಟ್ಲ ಸತೀಶ್ ಶೆಟ್ಟಿ

ಕುಡ್ಲ: ಯಕ್ಷಧ್ರುವ ಯಕ್ಷ ಶಿಕ್ಷಣದ ಮುಕೇನ ಕಲ್ಪಾರ್ಥಿಲೆಡ ಆತ್ಮ ವಿಶ್ವಾಸ ಬೈದ್ಂಡ್. ಬೆದ್ರದ ಆಳ್ವಾಸ್ ಚಾವಡಿಡ್ ನಡತಿನ ಯಕ್ಷ ಶಿಕ್ಷಣಡ್ ಸುಮಾರ್ ನಾಲ್ ಸಾರ ಕಲ್ಪಾರ್ಥಿಲು ಯಕ್ಷಗಾನ ಕಲೆಟ್ಟ್ ಉಲ್ಲೆರ್ ಪಂದ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ ಪಂಡೆರ್.

ಮೇರ್ ಮೇ26 ಕ್ಕ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಯಕ್ಷಧ್ರುವ ಪಟ್ಲ ಸಂಭ್ರಮ 2024 ನಡಪರೆ ಇಪ್ಪುನ ಲೇಸ್ ದ ಬಗೆಟ್ಟ್ ಬಲ್ಲಾಲ್ ಬಾಗ್ ಡ್ ಇಪ್ಪುನ ಪತ್ತ್ ಮುಡಿ ಸೌಧಡ್ ನಡತಿನ ಸಭೆಟ್ಟ್ ಗುರ್ಕಾರ್ಮೆನ್ ಒಯಿಸೊಂದು ಪಾತೆರಿಯೆರ್.

ಪಟ್ಲ ಫೌಂಡೇಶನ್ ಟ್ರಸ್ಟ್ ಇದ ಮುಟ್ಟ 24 ಇಲ್ಲ್ ನ್ ನಿರ್ಮಾಣ ಮಲ್ತ್ ದ್ ಕಲಾವಿದೆರೆಗ್ ಕೊರ್ತುಂಡು. ಯಕ್ಷಾಶ್ರಯ ವಸತಿ ಯೋಜನೆದಡಿಟ್ಟ್ 25ನೇ ಇಲ್ಲ್ ನ್ ಕೊರ್ಪುನ ಲೇಸ್ ಮಾ.22 ಕ್ಕ್ ಕುಂಬಳೆದ ಕೈತಲ್ ನಡಪರೆ ಉಂಡು. ಇತ್ತೆನೇ ಸುಮಾರ್ 200 ಇಲ್ಲ್ ದ ರಿಪೇರಿ ಬೇಲೆಗ್ ಪನವುದ ಸಕಾಯ ಮಲ್ದ್ಂಡ್. ಅವ್ವೇ ರೀತಿ ಆರೋಗ್ಯ, ವಿದ್ಯಾರ್ಥಿವೇತನ, ಶಿಕ್ಷಣ, ವೈದ್ಯಕೀಯ ಸಕಾಯದ ವಿಚಾರಲೆಗ್ ಸಂಬಂಧಪಟ್ಟಿನಂಚೆನೆ ಕಲಾವಿದೆರೆಗ್ ಕೋಟಿರ್ದ್ ಎಚ್ಚ ರೂಪಾಯಿ ಸಕಾಯ ಮಲ್ದ್ಂಡ್. ಈ ವರ್ಷ ಯಕ್ಷಗಾನ ಕಲಾವಿದೆರೆಗ್ ಅತ್ತಂದೆ ನಾಟಕ ರಂಗಭೂಮಿ ಕಲಾವಿದೆರ್ ಬೊಕ್ಕ ದೈವಾರಾದನೆದ ನರ್ತನ ಪರಿಚಾರಕೆರೆಗ್ ವಿಮಾ ಸೌಲಭ್ಯನ್ ಕೊರ್ಪುನ ಯೋಜನೆದ ಆಯೋಜನೆ ಮಲ್ದ್ಂಡ್ ಪಂದ್ ಪಂಡೆರ್.

2024ನೇ ಸಾಲ್ ದ ಪಟ್ಲ ಪ್ರಶಸ್ತಿನ್ ಬಡಗುತಿಟ್ಟುದ ಪುಗರ್ತೆದ ಹಿರಿಯ ಕಲಾವಿದೆರ್ ಕೊಂಡದಕುಳಿ ರಾಮಚಂದ್ರ ಹೆಗ್ಗಡೆರೆಗ್ ಕೊರಿಯೆರೆ ಉಂಡು. ಅಂಚೆನೆ ಪಟ್ಲ ಸಂಭ್ರಮಡ್ ಪಟ್ಲ ಫೌಂಡೇಶನ್ ದ ಮಹಾಪೋಷಕೆರ್, ಮಹಾದಾನಿಲು, ಉದ್ಯಮಿ ಬರೋಡಾ ಶಶಿಧರ ಶೆಟ್ಟಿ ದಂಪತಿಲೆಗ್ ಇಸೇಸವಾದ್ ಸನ್ಮಾನ ನಡಪರೆ ಉಂಡು.

ಯಕ್ಷಧ್ರುವ ಕಲಾ ಗೌರವನ್ ಯಕ್ಷಗಾನ ಮಾತ್ರ ಅತ್ತಂದೆ ಬೇತೆ ಬೇತೆ ಕ್ಷೇತ್ರಲೆಡ್ ಸಾಧನೆ ಮಲ್ತಿನ 15 ಜನ ಸಾಧಕೆರೆನ್ ಗುರುತಿಸಾದ್ ಕೊರಿಯೆರೆ ಉಂಡು ಪಂದ್ ಪಟ್ಲ ಸತೀಶ್ ಶೆಟ್ಟಿ ಪಂಡೆರ್.

*ಯುರೋಪ್ ಡ್ ಪಟ್ಲ ಫೌಂಡೇಶನ್*

ಯುರೋಪ್ ರಾಷ್ಟ್ರಡ್ಲಾ ಈ ವರ್ಷ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಘಟಕ ರಚನೆ ಆವೆರೆ ಉಂಡು ಪಂದ್ ಪಟ್ಲ ಸತೀಶ್ ಶೆಟ್ಟಿ ತೆರಿಪಾಯೆರ್.

ಸಭೆಟ್ಟ್ ಪಾಲ್ ಪಡೆದಿತ್ತಿನ ಯಕ್ಷಗಾನ ತಾಳಮದ್ದಳೆದ ಅರ್ಥಧಾರಿ ಉಜಿರೆ ಅಶೋಕ ಭಟ್ ಪಾತೆರ್ದ್, ಪಟ್ಲ ಫೌಂಡೇಶನ್ ಯಕ್ಷ ಶಿಕ್ಷಣದ ಮುಕೇನ ಜೋಕ್ಲೆನ್ ಯಕ್ಷಗಾನದ ವ್ಯಾಪ್ತಿಗ್ ಕನನಗ ಕಲೆತ್ತ ವಿಸ್ತರಣೆ ಆಪುಂಡು. ಪಟ್ಲ ಫೌಂಡೇಶನ್ ಟ್ರಸ್ಟ್ ಯಕ್ಷ ಶಿಕ್ಷಣ ಕ್ರಾಂತಿನ್ ಮಲ್ದ್ಂಡ್. ಯಕ್ಷ ಶಿಕ್ಷಣದ ಮುಕೇನ ನಾಲ್ ಸಾರ ಜೋಕ್ಲೆಗ್ ಯಕ್ಷ ಕಲೆತ್ತ ಪರಿಚಯ ಆತ್ಂಡ್ ಪಂದ್ ಪಂಡೆರ್.

ಮಂದಾರ್ತಿ ದುರ್ಗಾಪರಮೇಶ್ವರಿ ದೇವಲ್ಯದ ಮಾಜಿ ಟ್ರಸ್ಟಿ ಶೇಡಿಕೋಡ್ಲು ವಿಠಲ ಶೆಟ್ಟಿ ಪಾತೆರ್ದ್, ಫೌಂಡೇಶನ್ ಕೇವಲ ಕಲಾವಿದೆರೆನ ಕಾಮಧೇನು ಮಾತ್ರ ಅತ್ತ್, ಯಕ್ಷಗಾನನ್ ಕಲ್ಪಾದ್, ಒರಿಪಾದ್ ಬುಲೆಪಾವುನಂಚಿನ ಮಲ್ಲ ಕೆಲಸ ಮಲ್ತೊಂದುಂಡು ಪಂದ್ ಪಂಡೆರ್.

ಈ ಪೊರ್ತುಡು ಪುಂಜಾಲಕಟ್ಟೆ ಘಟಕರ್ದ್ ಯಶಸ್ವಿಯಾದ್ ನಡತಿನ ವಾರ್ಷಿಕ ಉಚ್ಚಯ ಲೇಸ್ ದ ಬೊಕ್ಕ ಒರಿನ ಕಾಸ್ ನ್ ಕೇಂದ್ರೀಯ ಸಮಿತಿಗ್ ಗುರ್ಕಾರೆ ಯಶೋಧರ ಶೆಟ್ಟಿ ಬೊಕ್ಕ ಕೂಟದಕುಲು ದೇಣಿಗೆ ರೂಪಡ್ ಕೊರಿಯೆರ್. ಬೊಕ್ಕ ಕೇಂದ್ರ ಮಹಿಳಾ ಘಟಕದ ಮುತಾಲಿಕೆಡ್ ಮಾ.22 ಕ್ಕ್ ನಡಪುನ 7ನೇ ವಾರ್ಷಿಕ ಉಚ್ಚಯದ ಲೆಪ್ಪೋಲೆನ್ ಬುಡುಗಡೆ ಮಲ್ತೆರ್.

ಸಭೆಟ್ಟ್ ಬೇತೆ ಬೇತೆ ಘಟಕರ್ದ್ ಬತ್ತಿನ ಟ್ರಸ್ಟಿಲು, ಪದುಕೆರ್ ಇತ್ತೆರ್. ಚಾವಡಿಡ್ ಭುಜಬಲಿ ಧರ್ಮಸ್ಥಳ ಕೇಂದ್ರೀಯ ಘಟಕದ ಪ್ರಧಾನ‌ ಕಾರ್ಯದರ್ಶಿ ಪುರುಷೋತ್ತಮ ಭಂಡಾರಿ ಅಡ್ಯಾರ್, ಕೋಶಾಧಿಕಾರಿ ಸಿಎ ಸುದೇಶ್ ಕುಮಾರ್ ರೈ, ಜತೆ ಕಾರ್ಯದರ್ಶಿ ರವಿ ಶೆಟ್ಟಿ ಅಶೋಕನಗರ ಸಂಘಟನಾ ಕಾರ್ಯದರ್ಶಿ ಬಾಳ ಜಗನ್ನಾಥ ಶೆಟ್ಟಿ, ಪ್ರದೀಪ್ ಆಳ್ವ ಕದ್ರಿ ಪಾಲ್ ಪಡೆದಿತ್ತೆರ್.