ತುಳು ಅಧಿಕೃತ ರಾಜ್ಯಭಾಷೆಗ್ 95% ಕೆಲಸ ಮುಗಿದ್ಂಡ್ : ವೇದವ್ಯಾಸ ಕಾಮತ್

ಕುಡ್ಲ: ತುಳು ಭಾಷೆಗ್ ಅಧಿಕೃತ ರಾಜ್ಯಭಾಷೆದ ತಾನಮಾನ ತಿಕೊಡು ಪಂದ್ ತುಳು ಭವನಡ್ ಸಂವಾದ ಲೇಸ್ ನಡತ್ಂಡ್.

ಮಾಜಿ ಶಾಸಕೆರ್ ಮೊಯ್ದೀನ್ ಬಾವಾ ಮೆರೆನ ಮುತಾಲಿಕೆಡ್ ನಡತಿನ ಈ ಲೇಸ್ ಡ್ ಪಕ್ಷ, ಜಾತಿ ಬೇಧ ಮರತ್ ದ್ ಮಾತೆರ್ಲಾ ಒಟ್ಟಾದ್ ಪಾಲ್ ಪಡೆಯೆರ್. ಅತ್ತಂದೆ ತುಳುಭಾಷೆಗ್ ಅಧಿಕೃತ ತಾನಮಾನ ತಿಕ್ಕೊಡು ಪಂದ್ ರಾಜ್ಯ ಸರಕಾರದ ಮಿತ್ತ್ ಒತ್ತಡ ಪಾಡೊಡು, ಅವೆರ್ದ್ ಬೊಕ್ಕ ಸರಕಾರರ್ದ್ ವೇಗ ತಿಕಿಜಿಂಡ ಪೊರ್ಂಬಾಟ, ಉಪವಾಸ ಸತ್ಯಾಗ್ರಹ ಮಲ್ಪೊಡು ಪಂದ್ ತೀರ್ಮಾನ ದೆತೊಂಡೆರ್.

ಶಾಸಕೆರ್ ವೇದವ್ಯಾಸ ಕಾಮತ್ ಪಾತೆರ್ದ್, ಬೇತೆ ರಾಜ್ಯಲು ಒಂಜೇರ್ದ್ ಒಂಜಿ ಎಚ್ಚ ಭಾಷೆನ್ ವಾ ರೀತಿ ಅಧಿಕೃತ ಭಾಷೆಯಾದ್ ಮಲ್ತೆರ್ ಪನ್ಪುನ ಸಂಪೂರ್ಣ ವರದಿನ್ ರಾಜ್ಯ ಸರಕಾರ ಇತ್ತೆನೇ ಪಡೆತ್ಂಡ್. ಇತ್ತೆ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಮುಕೇನ ಕ್ಯಾಬಿನೆಟ್ ಡ್ ಆದೇಶ ಮಲ್ಪೆರೆ ಮಾತ್ರ ಬಾಕಿ ಉಂಡು. 95% ಕೆಲಸ ಸಂಪೂರ್ಣ ಆತ್ಂಡ್. 5% ಕೆಲಸ ಮಾತ್ರ ಬಾಕಿ ಉಂಡು. ಅವುಲ ಆಯಿನಾತ್ ಬೇಗ ಆವೊಡು ಪನ್ಪುನವು ಎಕ್ಲೆನ ಆಶಯ ಪಂದ್ ಪಂಡೆರ್.

ಮಾಜಿ ಶಾಸಕೆರ್ ಮೊಯ್ದೀನ್ ಬಾವಾ ಪಾತೆರ್ದ್, ತುಳುಕ್ಕು ಅಧಿಕೃತ ತಾನಮಾನ ತಿಕ್ಂಡ ಪಿದಯಿರ್ದ್ ಬತ್ತಿನ ಕಂಪೆನಿಡ್ ಊರುದ ಜವನೆರೆಗ್ ಕೆಲಸ ತಿಕ್ಕುಂಡು, ಒಡಿಪು, ದ.ಕ ಜಿಲ್ಲೆದ ಸಂಸತ್ ಸದಸ್ಯ ತಾನಗ್ ಉಂತುನ ಅಭ್ಯರ್ಥಿಲು ತುಳು ಅಧಿಕೃತ ಭಾಷೆ ಮಲ್ಪುನ ಬಗೆಟ್ಟ್ ತನ್ನ ವೋಟುದ ಪ್ರಣಾಳಿಕೆನ್ ಘೋಷಣೆ ಮಲ್ಪೊಡು ಪಂದ್ ಪಂಡೆರ್.