December 2023

ಡಿ.9: ಸುಳ್ಯ ಅಯ್ಯಪ್ಪ ಸೇವಾ ಸಮಿತಿದ 29ನೇ ವರ್ಷದ ದೀಪೋತ್ಸವ

ಸುಳ್ಯ ಸಾರ್ವಜನಿಕ ಶ್ರೀ ಅಯ್ಯಪ್ಪ ಸ್ವಾಮಿ ಸೇವಾ ಸಮಿತಿದ ವತಿರ್ದ್ 29ನೇ ವರ್ಷದ ಶಬರಿಮಲೆ ಶ್ರೀ ಅಯ್ಯಪ್ಪ ಸ್ವಾಮಿನ ದೀಪೋತ್ಸವ ಸುಳ್ಯ ಶ್ರೀ ಚೆನ್ನಕೇಶವ ದೇವಲ್ಯದ ಎದುರುಡು ಜಟ್ಟಿಪಳ್ಳ ಎಸ್‌. ಕೆ.ಸತೀಶ್ ಗುರುಸ್ವಾಮಿ ಮೆರೆನ ಮುತಾಲಿಕೆಡ್ ನಡಪರೆ ಉಂಡು.

ಬೊಲ್ಪುಗು ಗಣಪತಿ ಹವನ ಆದ್ ಉನಾ ಪೂಜೆ, ಮಧ್ಯಾಹ್ನ ಮಹಾಪೂಜೆ, ನುಪ್ಪು ಪ್ರಸಾದ ಸೇವೆ, ಬಯ್ಯಗ್ ಅಯ್ಯಪ್ಪ ಭಕ್ತೆರೆನ ಪಾಲ್ ಕೊಂಬು ಮೆರವಣಿಗೆ, ರಾತ್ರೆ ಗಾಯಕೆ ಶಿವಪ್ರಸಾದ್‌ ಶೆಟ್ಟಿ ನಿರ್ದೇಶನದ ಶಿವ ಸ್ವರ ಮೆಲೋಡೀಸ್ ಮೊಕ್ಲೆರ್ದ್ ಭಕ್ತಿಗಾನ ಸುಧಾ ಲೇಸ್ ಬೊಕ್ಕ ಶ್ರೀ ಬೆಂಕಿನಾಥೇಶ್ವರ ಕೃಪಾಪೋಷಿತ ದಶಾವತಾರ ಯಕ್ಷಗಾನ ಮಂಡಳಿ ಕಳವಾರು ಬಾಳ ಮೊಕ್ಲೆರ್ದ್ ಧರ್ಮದೈವ ಧೂಮಾವತಿ ತುಳು ಆಟ ನಡಪರೆ ಉಂಡು.

ಡಿ.10 ಕ್ಕ್ ಬೊಲ್ಪುಗು ಅಯ್ಯಪ್ಪ ವೃತಧಾರಿಲೆರ್ದ್ ಅಗ್ನಿ ಸೇವೆ ನಡಪರೆ ಉಂಡು ಪಂದ್ ಸಮಿತಿದ ಗುರ್ಕಾರೆ ಜನಾರ್ದನ ದೋಳ ತೆರಿಪಾದೆರ್.

ಕರ್ಣಾಟಕ ಬ್ಯಾಂಕ್ ನೇಮಕಾತಿಗ್ ಅಧಿಸೂಚನೆ ಬುಡುಗಡೆ

ಕರ್ಣಾಟಕ ಬ್ಯಾಂಕ್ ಡ್ ಬೇಲೆಗ್ ನೇಮಕಾತಿಗ್ ಅಧಿಸೂಚನೆ ಬುಡುಗಡೆ ಮಲ್ದ್ಂಡ್.

ಆಸಕ್ತ ಬೊಕ್ಕ ಅರ್ಹ ಅಭ್ಯರ್ಥಿಲು ಡಿ.15 ತ್ತ ಉಲಯಿ ಆನ್ ಲೈನ್ ಮುಖೇನ ಅರ್ಜಿ ಸಂದಾವೊಲಿ. ಕಾನೂನು ಇಸಯಡ್ ಪದವಿ ಇಜ್ಜಿಂಡ ಸ್ನಾತಕೋತ್ತರ ಪದವಿ ಆದಿಪ್ಪೊಡು. ನೆಕ್ಕ್ ಲಾ ಆಫೀಸರಾದ್ ಬೇಲೆ ಖಾಲಿ ಉಂಡು. 63000 ರೂ. ಪ್ರತಿ ತಿಂಗೊಲ್ ಗ್ ಸಂಬಳ ಉಂಡು. ಅರ್ಜಿ ಸಂದಾವುನ ಅಭ್ಯರ್ಥಿಲೆಗ್ 30 ವರ್ಷ ಆದಿಪ್ಪೊಡು. ಅಂಚೆನೆ ನೆತ್ತ ಅರ್ಜಿ ಶುಲ್ಕ 600 ರೂ. ಉಂಡು. ಎಚ್ಚದ ಪೊಲಬುಗಾದ್ karnatakabank.com ವೆಬ್ ಸೈಟ್ ಗ್ ಭೇಟಿ ಕೊರೊಲಿ.

ಮೊಬೈಲ್ ಟವರ್ ನೇ ಕಂಡಿನ ಕಲ್ವೆರ್!

10 ಟನ್ ತೂಕದ 50 ಮೀಟರ್ ಎತ್ತರದ ಮೊಬೈಲ್ ಟವರ್ ನ್ ಕಲ್ವೆರ್ ಕಂಡಿನ ಘಟನೆ ಉತ್ತರ ಪ್ರದೇಶದ ಕೌಸಂಬಿ ಜಿಲ್ಲೆದ ಉಜ್ಜಯಿನಿ ಗ್ರಾಮಡ್ ನಡತ್ಂಡ್.

ಟವರ್ ತೋಜೊಂದು ಇಜ್ಜಿ ಪಂದ್ ಕೋಡೆ ತಂತ್ರಜ್ಞೆರ್ ಪೊಲೀಸೆರೆಗ್ ದೂರು ಕೊರ್ತೆರ್. ಟವರ್ ದೊಟ್ಟಿಗೆ 8.5 ಲಕ್ಷ ಬಿಲೆತ್ತ ಶೆಲ್ಟರ್ ಬೊಕ್ಕ ಬೇತೆ ಉಪಕರಣಲು ನಾಪತ್ತೆ ಆತ್ಂಡ್ ಪಂದ್ ಎಫ್ ಐಆರ್ ಡ್ ತೆರಿಪಾದೆರ್.

ಮಾರ್ಚ್ 25-ಎಪ್ರಿಲ್ 6 ಮುಟ್ಟ ಎಸ್ಸೆಸ್ಸೆಲ್ಸಿ ಪರೀಕ್ಷೆ

ಬೆಂಗ್ಲೂರು : ಈ ಸರ್ತಿದ 10ನೇ ಕ್ಲಾಸ್ ದ ವಾರ್ಷಿಕ ಪರೀಕ್ಷೆ ಮಾ.25 ರ್ದ್ ಎ.6 ಮುಟ್ಟ ನಡಪರೆ ಉಂಡು.

ಎಸ್ಸೆಸ್ಸೆಲ್ಸಿ ಪರೀಕ್ಷೆದ ತಾತ್ಕಾಲಿಕ ವೇಳಾಪಟ್ಟಿನ್ ಶಿಕ್ಷಣ ಇಲಾಖೆ ಇನಿ ಪ್ರಕಟ ಮಲ್ದ್ಂಡ್.

ಮಾ.25 ಕ್ಕ್ ಕನ್ನಡ, ಮಾ.27 ಕ್ಕ್ ಸಮಾಜ ವಿಜ್ಞಾನ, ಮಾ.30 ಕ್ಕ್ ವಿಜ್ಞಾನ, ಎ.2 ಕ್ಕ್ ಗಣಿತ, ಎ.4 ಹಿಂದಿ, ಎ.6 ಕ್ಕ್ ಇಂಗ್ಲಿಷ್ ಪರೀಕ್ಷೆ ನಡಪರೆ ಉಂಡು.

ಮಾರ್ಚ್ 2- 22 ಪಿಯುಸಿ ಪರೀಕ್ಷೆ

ಬೆಂಗ್ಲೂರು: ಸೆಕೆಂಡ್ ಪಿಯುಸಿ ವಾರ್ಷಿಕ ಪರೀಕ್ಷೆ ಮಾರ್ಚ್ 2-22 ಮುಟ್ಟ ನಡಪರೆ ಉಂಡು.

ಮಾ.2 ಕ್ಕ್ ಕನ್ನಡ, ಮಾ.4 ಕ್ಕ್ ಇತಿಹಾಸ, ಮಾ.6 ಕ್ಕ್ ಸಮಾಜ ಶಾಸ್ತ್ರ, ಗಣಕ ವಿಜ್ಞಾನ, ಮಾ.7 ಕ್ಕ್ ಹಿಂದಿ, ಮಾ.9 ಕ್ಕ್ ರಾಜ್ಯಶಾಸ್ತ್ರ, ಸಂಖ್ಯಾಶಾಸ್ತ್ರ, ಮಾ.11 ಕ್ಕ್ ಇಂಗ್ಲಿಷ್, ಮಾ.13 ಕ್ಕ್ ವ್ಯವಹಾರ ಅಧ್ಯಯನ, ಮಾ.16 ಕ್ಕ್ ಭೂಗೋಳಶಾಸ್ತ್ರ, ಜೀವಶಾಸ್ತ್ರ, ಮಾ.18 ಕ್ಕ್ ರಸಾಯನಶಾಸ್ತ್ರ, ಮಾ.20 ಕ್ಕ್ ಐಚ್ಚಿಕ ಕನ್ನಡ, ಲೆಕ್ಕಶಾಸ್ತ್ರ‌, ಮಾ.22 ಕ್ಕ್ ಅರ್ಥಶಾಸ್ತ್ರ ಪರೀಕ್ಷೆ ನಡಪರೆ ಉಂಡು.

ಬಂಟರ ಸಂಘ ಬೊಂಬೈದ ಒತ್ತು ಗುರ್ಕಾರೆಯಾದ್ ಮಹೇಶ್ ಶೆಟ್ಟಿ ಆಯ್ಕೆ

ಸಮಾಜಪರ ಚಿಂತಕೆರ್, ಶಿಕ್ಷಣ ಪ್ರೇಮಿ, ಸಮಾಜ ಸೇವಕೆರ್ ಮಹೇಶ್ ಮೇರ್ ಬಂಟರ ಸಂಘ ಬೊಂಬೈದ ಒತ್ತು ಗುರ್ಕಾರೆಯಾದ್ ಆಯ್ಕೆ ಆತೆರ್.

ಕರಿನ 23 ವರ್ಷೊದಿಂಚ ಪೊವಾಯಿ ಪಾಸ್ಪೋಳಿ ಕನ್ನಡ ಶಾಲೆದ ಜೋಕುಲೆಗ್ ಮಾತ ರೀತಿಡ್ ಸಹಕಾರ ಮಲ್ತ್ ದ್, ಶಾಲೆಗ್ ಗೌರವ ಶಿಕ್ಷಕೆರೆನ್ ಕೊರ್ನ ಅಪ್ಪಟ ಕನ್ನಡ ಪ್ರೇಮಿ ಮೇರ್, ಬೊಂಬೈ ಮಹಾನಗರಡ್ ಬಂಟರ ಸಂಘದ ಬೇತೆ ಬೇತೆ ಜಬದಾರಿ ದೆತೊಂದು ಶಿಕ್ಷಣಗ್ ಎಚ್ಚದ ಮಹತ್ವ ಕೊರ್ದು, ಒವ್ವೇ ಜಾತಿ ಮತ ಭೇದ ಭಾವ ಮಲ್ಪಂದೆ ಸಮಾಜದ ಪರ ಬೇಲೆ ಮಲ್ಪುನ ಮಹೇಶ್ ಒರಿ ಎಡ್ಡೆ ಮನಸ್ ದ ವ್ಯಕ್ತಿ.

ಹುಷಾರ್ ದಾಂತಿನಕ್ಲೆನ್ ಅಕ್ಲೆನ ಇಲ್ಲಗ್ ಭೇಟಿ ಕೊರ್ದು ಅಕ್ಲೆನ ಚಿಕಿತ್ಸೆಗ್ ಸಕಾಯ ಆಪುನ ಮೇರ್ ಒವ್ವೇ ಪ್ರಚಾರನ್ ಬಯಸಂದೆ ತನ್ನೆರ್ದ್ ಆಪುನ ಸಹಾಯನ್ ಮಲ್ತೊಂದು ಬೈದೆರ್. ಸಮಾಜದ ಒವ್ವೇ ಜಾತಿ ಧರ್ಮದ ಬಡಪತ್ತ್ ದ ಪೊಣ್ಣು ಜೋಕ್ಲೆನ ಮದಿಮೆಗ್ ಸಕಾಯ ಮಲ್ತೊಂದು ಬಂಟರ ಸಂಘದ ಮುಖೇನ ಬಡ ವರ್ಗದ ಪೊಣ್ಣು ಜೋಕ್ಲೆನ ಮದಿಮೆದ ಮಾತ ಖರ್ಚ್ ನ್ ದೆತೊನುನ ಯೋಜನೆನ್ ಕನಯೆರೆ ಮಸ್ತ್ ಶ್ರಮ ಪಾಡ್ದೆರ್.

ಪೊವಾಯಿ ಕನ್ನಡ ಸೇವಾ ಸಂಘದ ಮತ ಯೋಜನೆಲೆಗ್ ಸಕಾಯ ಆಯೆರೆ ಮಹೇಶ್ ಮೆರೆನ ಕೊಡುಗೆ ಮಸ್ತ್ ಉಂಡು. ಪದವೀಧರೆರ್ ಆಯಿನ ಮೇರ್ ಮದ್ಯಗುತ್ತು ಶ್ಯಾಮ ಶೆಟ್ಟಿ ಬೊಕ್ಕ ಪಡ್ಡೆದ್ರ ಕಾಜಲ್ ನಿವಾಸ ಲೀಲಾವತಿ ಶೆಟ್ಟಿ ದಂಪತಿಲೆನ ಮಗೆ ಆತೆರ್. ಸಂಸಾರ ಜೀವನಡ್ ಬೊಡೆದಿ ವಿಜಯಲಕ್ಷ್ಮಿ, ಜೋಕುಲು ಅಶ್ವಿನ್ ಬೊಕ್ಕ ಸಾಗರ್ ಉಲ್ಲೆರ್. ವೃತ್ತಿಡ್ ಬಾಬಾ ಗ್ರೂಪ್ಸ್ ಆಪ್ ಕಂಪನೀಸ್ ಸಂಸ್ಥೆದ ಮಾಲಕೆರ್ ಆಯಿನ ಮೇರ್ ಬಂಟರ ಸಂಘದ ಮಲ್ಲ ಮಟ್ಟದ ತಾನಗ್ ಏರ್ದೆರ್.

ಡಿ.10: ಬಜ್ಪೆ ಬ್ರಹ್ಮಶ್ರೀ ನಾರಾಯಣ ಗುರು ಸಮುದಾಯ ಭವನಡ್ ನೆತ್ತೆರ್ ಉಂಬೊಲಿ

ಜೈ ತುಲುನಾಡ್ (ರಿ.) ಕುಡ್ಲ ಎಗ್ಗೆದ ಮುತಾಲಿಕೆಡ್, ಎ.ಜೆ ಹಾಸ್ಪಿಟಲ್ ದ ಒಟ್ಟುಸೇರಿಗೆಡ್ ನೆತ್ತೆರ್ ಉಂಬೊಲಿ ಡಿ.10 ಐತಾರ ಬಜ್ಪೆ ಬ್ರಹ್ಮಶ್ರೀ ನಾರಾಯಣ ಗುರು ಸಮುದಾಯ ಭವನಡ್ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ನೆತ್ತೆರ್ ದಾನ ಮಲ್ಪೊಲಿ ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಲಡಾಖ್ ಡ್ ಭೂಕಂಪ

ಲಡಾಖ್ ಡ್ 3.4 ಬಿರ್ಸ್ ದ ಭೂಕಂಪ ಆತ್ಂಡ್.

ಭೂಕಂಪನದ ರಾಷ್ಟ್ರೀಯ ಕೇಂದ್ರದ ಪ್ರಕಾರ ಬೊಲ್ಪುಗು ಆತ್ಂಡ್ ಪಂದ್ ತೆರಿದ್ ಬೈದ್ಂಡ್. ಭೂಮಿ ನಡ್ ಗ್ನಗ ಜನಕುಲು ಇಲ್ಲರ್ದ್ ಪಿದಯಿ ಬೈದೆರ್. ಆಂಡ ಇಡೇ ಮುಟ್ಟ ಒವ್ವೇ ತೊಂದರೆ ಆತಿಜಿ.