ಲೋಕಸಭೆ ವೋಟುದ ತಯಾರಿದ ಬಗೆಟ್ಟ್ ಚರ್ಚೆ ಮಲ್ಪರೆ ರಾಜ್ಯ ಕಾಂಗ್ರೆಸ್ ಜ.10 ಕ್ಕ್ ಇಸೇಸ ಸಭೆ ನಡಪಾಯೆರೆ ಉಂಡು.
ಈ ಸಭೆಟ್ಟ್ ಸಿಎಂ, ಡಿಸಿಎಂ ಸೇರಿನಂಚೆನೆ ಪಕ್ಷದ ಮಾತ ನಾಯಕೆರ್, ಕಾರ್ಯಕರ್ತೆರ್ ಪಾಲ್ ಪಡೆಯೆರೆ ಉಲ್ಲೆರ್. ಅಂಚೆನೆ ಗ್ರಾಮ ಪಂಚಾಯತಿ ಮಟ್ಟಡ್ ರಾಜ್ಯ ಕಾಂಗ್ರೆಸ್ ದ ಧರ್ಮೊದ ಯೋಜನೆನ್ ಇಲ್ಲ ಇಲ್ಲಗ್ ಪ್ರಚಾರ ಮಲ್ಪುನ ಬಗೆಟ್ಟ್ ಸೂಚನೆ ಕೊರಿಯೆರೆ ಉಂಡು ಪಂದ್ ತೆರಿದ್ ಬೈದ್ಂಡ್.
ಶಬರಿಮಲೆತ್ತ ಅಯ್ಯಪ್ಪ ದೇವಲ್ಯ ಎಲ್ಲೆ (ಸನಿಯಾರ) ಬಾಕಿಲ್ ದೆಪ್ಪೆರೆ ಉಂಡು.
ಬುಧಾರ ರಾತ್ರೆ ಮಂಡಲ ಪೂಜೆದ ಬೊಕ್ಕ ದೇವಲ್ಯನ್ ತಾತ್ಕಾಲಿಕವಾದ್ ಮುಚ್ಚಿದ್ ಇತ್ತೆರ್. ಮಕರವಿಳಕ್ಕು ಮಹೋಚ್ಚಯದ ಲೆಕ್ಕೊಡು ಡಿ.30 ಕ್ಕ್ ಕುಡ ದೇವಲ್ಯದ ಬಾಕಿಲ್ ದೆಪ್ಪುವೆರ್. ಭಕ್ತೆರೆಗ್ ಅಯ್ಯಪ್ಪ ಸ್ವಾಮಿನ ದರ್ಶನ ತಿಕ್ಕಿಯೆರೆ ಉಂಡು. ಜ.13 ಶುದ್ಧಕ್ರಿಯಾ ಬೊಕ್ಕ ಜ. 14 ಕ್ಕ್ ಬಿಬಾಂ ಪ್ರದರ್ಶನ ನಡಪರೆ ಉಂಡು. ಜ.15 ಕ್ಕ್ ಮಕರಜ್ಯೋತಿ ದರ್ಶನ ಉಂಡು. ಜ.20 ಕ್ಕ್ ದೇವಲ್ಯದ ಬಾಕಿಲ್ ಮುಚ್ಚುವೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪಾದ್ ಕೊರ್ಪುನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 40ನೇ ಸಂಚಿಕೆ ಡಿ.29 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ವಿದ್ಯಾರ್ಥಿನಿಯಾದ್ ಪುಟಾಣಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್. ಡಿ.30 ಸನಿಯಾರ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಉಬಾರ್: ಈಚರ್ ಗಾಡಿದ ಡ್ರೈವರ್ ಜೆತ್ತಿನಡೆಗ್ ಹಾರ್ಟ್ ಆದ್ ತೀರ್ ಪೋಯಿನ ಘಟನೆ ಉಬಾರ್ ಗಾಂಧಿ ಪಾರ್ಕ್ ದ ಕೈತಲ್ ನಡತ್ಂಡ್.
ಈ ಗಾಡಿ ರಡ್ಡ್ ದಿರ್ನೊದಿಂಚ ಉಂತಿನಲ್ಪನೆ ಇತ್ತ್ಂಡ್. ಇನಿ ಕಾಂಡೆ ವಾಸನೆ ಬರಿಯೆರೆ ಸುರು ಆಯಿನ ಕಾರಣ ಜನಕ್ಕುಲು ಪೋದು ತೂನಗ ಜೆತ್ತಿನ ಸ್ಥಿತಿಟ್ಟ್ ಈ ಜನ ಇತ್ತೆರ್. ಸಾರ್ವಜನಿಕೆರ್ ಹಾರ್ಟ್ ಅಟ್ಯಾಕ್ ಅದಿಪ್ಪು ಪಂದ್ ಪನೊಂದುಲ್ಲೆರ್. ಎಚ್ಚಿನ ಪೊಲಬು ನನ ತೆರಿದ್ ಬರೊಡಾತೆ. ಪೊಲೀಸೆರ್ ಜಾಗೆಗ್ ಬತ್ತ್ ದ್ ಪರಿಶೀಲನೆ ಮಲ್ತೊಂದು ಉಲ್ಲೆರ್.
ಕಾರ್ಲ: ಡಾ.ನಿಟ್ಟೆ ಶಂಕರ ಅಡ್ಯಂತಾಯ ಪ್ರಥಮ ದರ್ಜೆ ಕಾಲೇಜ್ ಬೊಕ್ಕ ಮುಲ್ಪದ ಹಿರಿಯ ವಿದ್ಯಾರ್ಥಿ ಸಂಘದ ಒಟ್ಟುಸೇರಿಗೆಡ್ ವಿಶ್ವ ಹಿರಿಯ ವಿದ್ಯಾರ್ಥಿಲೆನ ಸಭೆ-2023 ಬೊಕ್ಕ 1996-1998ತ್ತ ಅವಧಿಡ್ ಶಿಕ್ಷಣ ಮುಗಿತಿನ ಸಂಸ್ಥೆದ ವಿದ್ಯಾರ್ಥಿಲೆನ ಬೊಳ್ಳಿ ಪುನರ್ಮಿಲನ ಲೇಸ್ ಡಿ.30 ಸನಿಯಾರ ನಿಟ್ಟೆ ಜಸ್ಟೀಸ್ ಕೆ. ಎಸ್. ಹೆಗ್ಡೆ ಉದ್ಯಮಾಡಳಿತ ಶಿಕ್ಷಣ ಸಂಸ್ಥೆದ ಸಭಾಂಗಣಡ್ ನಡಪರೆ ಉಂಡು.
ಈ ಪೊರ್ತುಡು ಸಂಸ್ಥೆಡ್ ನೆರ್ದ್ ದುಂಬು ಬೇಲೆ ಮಲ್ತಿನ ಉಪನ್ಯಾಸಕೆರ್, ಶಿಕ್ಷಕೇತರ ಸಿಬ್ಬಂದಿಲು ಬೊಕ್ಕ ಹಿರಿಯ ವಿದ್ಯಾರ್ಥಿಲು ಪಾಲ್ ಪಡೆಯೆರೆ ಉಲ್ಲೆರ್. ಅವೆರ್ದ್ ಬೊಕ್ಕ ಹಿರಿಯ ವಿದ್ಯಾರ್ಥಿಲು ಬೊಕ್ಕ ಉಪನ್ಯಾಸಕೆರೆನ ಸ್ನೇಹ ಮಿಲನ, ಸಾಂಸ್ಕೃತಿಕ, ಕ್ರೀಡಾ ಪಂತೊಲು ನಡಪರೆ ಉಂಡು ಪಂದ್ ಸಂಸ್ಥೆದ ಪ್ರಾಂಶುಪಾಲೆರ್ ಡಾ. ವೀಣಾ ಬಿ.ಕೆ ಮೇರ್ ತೆರಿಪಾದೆರ್.
ಬೆದ್ರ ಸಾರ ಕಂಬದ ಬಸದಿಡ್ ಸೋಮಾರ ರಾತ್ರೆ ಭ॥ ಶ್ರೀ ಚಂದ್ರನಾಥ ಸ್ವಾಮಿ ಪಂಚಾಮೃತ ಅಭಿಷೇಕ ಅಷ್ಟವಿಧಾರ್ಚಾನೆ ಪೂಜೆ ಬೊಕ್ಕ ಲಕ್ಷ ದೀಪೋತ್ಸವ ನಡತ್ಂಡ್.
ಈ ಲೇಸ್ ಆರ್ಯಿಕಾ ಪ್ರಸನ್ನ ಮತಿ, ಆರ್ಯಿಕಾ ಕೀರ್ತಿಮತಿ ಮಾತಾಜಿ ಮೆರೆನ ಉಪಸ್ಥಿತಿಡ್ ನಡತ್ಂಡ್. ಬೊಕ್ಕ ಡಾ| ಚಾರುಕೀರ್ತಿ ಭಟ್ಟಾರಕ ಪಂಡಿತಾಚಾರ್ಯ ವರ್ಯ ಮಹಾ ಸ್ವಾಮೀಜಿಲು ಆಶೀರ್ವಚನ ಕೊರಿಯೆರ್.
ಈ ಪೊರ್ತುಡು ಮಾಜಿ ಸಚಿವೆರ್ ಕೆ.ಅಭಯಚಂದ್ರ, ಶಂಭವ್ ಕುಮಾರ್, ಬಸದಿ ಮೊಕ್ತೇಸರೆರ್ ಪಟ್ಟಶೆಟ್ಟಿ ಸುಧೇಶ್ ಕುಮಾರ್, ದಿನೇಶ್ ಕುಮಾರ್, ಆದರ್ಶ್, ಅರಮನೆ ಕುಲದೀಪ ಎಂ., ಶೈಲೇಂದ್ರ ಜೈನ್, ಡಾ| ರೇಷ್ಮಾ ವಕೀಲ ಎಂ. ಆರ್. ಬಲ್ಲಾಳ್ ಪಾಲ್ ಪಡೆದಿತ್ತೆರ್.
ವಿಟ್ಲ: ಕಡಂಬು ಶ್ರೀ ಕಲ್ಲುಡ ಕಲ್ಲುರ್ಟಿ, ಕೊಡಮಣಿತ್ತಾಯ, ರುದ್ರಾಂಡಿ ಬೊಕ್ಕ ಪರಿವಾರ ದೈವೊಲೆನ ದೈವೊಲ್ಯಡ್ ಪುನರ್ ಪ್ರತಿಷ್ಠಾ ನವಕ ಕಲಶ ಡಿ.27 ಬೊಕ್ಕ 28 ಕ್ಕ್ ನಡತ್ಂಡ್.
ಡಿ.27 ಬುಧಾರ ಬಯ್ಯಗ್ ಪ್ರಾರ್ತನೆ, ವಾಸ್ತು ಪವನ ಪೂಜೆ, ರಾತ್ರೆ ಅನ್ನ ಪ್ರಸಾದ ಸೇವೆ ನಡತ್ಂಡ್.
ಡಿ.28 ಗುರುವಾರ ಬೊಲ್ಪುಗು ಪ್ರಾರ್ತನೆ, ಸಾನಿಧ್ಯ ಹವನ, ದೈವೊಲೆನ ಪುನರ್ ಪ್ರತಿಷ್ಠೆ, ನವಕ ಕಲಶ, ತಂಬಿಲ ಸೇವೆ, ಪಟ್ಟ ಕಾಣಿಕೆ ಸಮರ್ಪಣೆ, ನಾಗ ಪ್ರತಿಷ್ಠೆ, ಆಶ್ಲೇಷ ಬಲಿ, ನಾಗ ತಂಬಿಲ ಸೇವೆ, ಮಂಗಳಾರತಿ ಮಧ್ಯಾಹ್ನ ಮಹಾಪೂಜೆ, ಅನ್ನ ಪ್ರಸಾದ ಸೇವೆ ನಡತ್ಂಡ್.
ವಿಧಾನಸೌಧಡ್ ನಡತಿನ ತುಳುಕೂಟದ 50ನೇ ವರ್ಷದ ಗೌಜಿಡ್ ಪುತ್ತೂರು ಶಾಸಕೆರ್ ಅಶೋಕ್ ಕುಮಾರ್ ರೈ ಇನಿ ಕ್ಯಾಲೆಂಡರ್ ಬುಡುಗಡೆ ಮಲ್ತೆರ್.
ತುಳುಕೂಟ ಗುರ್ಕಾರೆ ಸುಂದರ್ ರಾಜ್ ರೈ, ಮಾಜಿ ಗುರ್ಕಾರೆ ಕೆಸಿ ಬಳ್ಳಾಲ್, ಶ್ರೀ ಪ್ರೇಮ್ ಪ್ರಸಾದ್ ಅಡ್ಯಂತಾಯ, ರಾಜ್ ರಾಮ್ ಶೆಟ್ಟಿ ಉಪ್ಪಳ, ಸೃಷ್ಟಿ ಕಲಾ ರಂಗಭೂಮಿದ ಮಂಜುನಾಥ್ ಅಡ್ಪೆರ್, ದ.ಕ ವಿಶ್ವ ಬ್ರಾಹ್ಮಣ ಸಂಘದ ಪ್ರಶಾಂತ್ ಕುಮಾರ್ ಜಿ, ಯಕ್ಷಮಿತ್ರೆರ್ ನಾಗರಾಜ ಆಚಾರ್ಯ, ಮುರಳೀಧರ್ ರೈ, ಜಯರಾಜ್ ಅರಿಗ, ನವೀನಾ ಶೆಟ್ಟಿ, ಸುಧಾ ಪುತ್ತರಾಯ, ತುಳುಕೂಟದ ಸದಸ್ಯೆರ್ ಪಾಲ್ ಪಡೆದಿತ್ತೆರ್.
ಕಡಂದಲೆ ಹಾಲು ಉತ್ಪಾದಕರ ಸಹಕಾರಿ ಸಂಘ (ನಿ.) ದ ನನದ 5 ವರ್ಷದ ಆಡಳಿತ ನಿರ್ದೇಶಕೆರೆನ ಮಂಡಳಿದ ತಾನಗ್ ಡಿ.23 ಕ್ಕ್ ನಡತಿನ ವೋಟುಡು ನೆರ್ದ್ ದುಂಬುದ ಮಾತಾ ನಿರ್ದೇಶಕೆರ್ ಆವಿರೋಧವಾದ್ ಆಯ್ಕೆ ಆತೆರ್.
ಗುರ್ಕಾರೆಯಾದ್ ದ.ಕ. ಹಾಲು ಉತ್ಪಾದಕರ ಸಹಕಾರಿ ಒಕ್ಕೂಟದ ಗುರ್ಕಾರೆ ಕೆ.ಪಿ. ಸುಚರಿತ್ ಶೆಟ್ಟಿ ಬೊಕ್ಕ ಒತ್ತು ಗುರ್ಕಾರೆಯಾದ್ ಕೆ. ಪಾಂಡುರಂಗ ಶೆಟ್ಟಿ ಕುಡೊರ ಆಯ್ಕೆ ಆತೆರ್. ಮೊಕುಲು 5 ನೇ ಸರ್ತಿ ಆಯ್ಕೆ ಆತೆರ್. ಅಂಚೆನೆ ನಿರ್ದೇಶಕೆರಾದ್ ಕೆ. ಬಾಬು ಶೆಟ್ಟಿ, ರಮೇಶ ಪೂಜಾರಿ, ವಿಲಿಯಂ ಡಯಾಸ್, ಜಯಂತ ಗೌಡ, ವಿಕ್ಟರ್ ಡಿ’ಸೋಜಾ, ಜಯಂತಿ, ಟಾಕು ಹರಿಜನ, ನಾರಾಯಣ ಮಡಿವಾಳ, ಚಂದ್ರಶೇಖರ ತಿಮ್ಮಯ್ಯ ಶೆಟ್ಟಿ ಗೀತಾ ಯಾನೆ ಗಾಯತ್ರಿ ಭಟ್, ಅಮಿತಾ ಶೆಟ್ಟಿ ಇಂಚ 13 ಜನ ಕುಡೊರ ಆಯ್ಕೆ ಆತೆರ್.
ಬಜಪೆ: ಎಕ್ಕಾರು ಶ್ರೀ ಕೊಡಮಂದಾಯ ದೈವೊಲ್ಯಡ್ ವರ್ಷಾವಧಿ ಜಾತ್ರೆದ ಲೆಕ್ಕೊಡು ಡಿ.25 ಸೋಮಾರ ರಾತ್ರೆ ಶ್ರೀ ಕೊಡಮಂದಾಯ ದೈವೊದ ನೇಮ ನಡತ್ಂಡ್.
ಈ ಪೊರ್ತುಡು ದೈವೊಲ್ಯದ ಆಡಳಿತ ಮೊಕ್ತೇಸರೆರ್ ತಿಮ್ಮ ಕಾವ (ನಿತಿನ್ ಹೆಗ್ಡೆ ಕಾವರ ಮನೆ), ಮೊಕ್ತೇಸರೆರ್ ಎಕ್ಕಾರು ಶ್ರೀ ಗೋಪಾಲಕೃಷ್ಣ ಮಠತ್ತ ವೇ।ಮೂ। ಹರಿದಾಸ ಉಡುಪ, ಭಾಸ್ಕರ ಮುದ್ದ ನದ್ದೋಡಿಗುತ್ತು, ರತ್ನಾಕರ ಶೆಟ್ಟಿ ಬಡಕರೆ ಬಾಳಿಕೆ, ರಮೇಶ್ ಭಂಡಾರಿ ಮಿತ್ತೊಟ್ಟು ಬಾಳಿಕೆ ಪಾಲ್ ಪಡೆದಿತ್ತೆರ್.
