ಒಡಿಪು ಸಂತೆಕಟ್ಟೆ ಮಾರ್ಗ ರಿಪೇರಿ ಬೇಗ ಮಲ್ಪರೆ ತುಳುನಾಡ ರಕ್ಷಣಾ ವೇದಿಕೆದ ಆಗ್ರಹ

ಒಡಿಪು ತುಳುನಾಡ ರಕ್ಷಣಾ ವೇದಿಕೆದ ಒಡಿಪು ಜಿಲ್ಲಾ ಘಟಕದ ಮುತಾಲಿಕೆಡ್ ಮಾ.21 ಗುರುವಾರ ಬೊಲ್ಪುಗು ರಾಷ್ಟ್ರೀಯ ಹೆದ್ದಾರಿ ಸಂತೆಕಟ್ಟೆಡ್ ಸಾರ್ವಜನಿಕೆರ್ ಅನುಭವಿಸಾವುನ ಸಮಸ್ಯೆಲೆನ ಬಗೆಟ್ಟ್ ತುಳುನಾಡ ರಕ್ಷಣಾ ವೇದಿಕೆದಕುಲು ಒಡಿಪು ಜಿಲ್ಲಾಧಿಕಾರಿ ಬೊಕ್ಕ ರಾಷ್ಟ್ರೀಯ ಹೆದ್ದಾರಿ ಕುಡ್ಲ ವಿಭಾಗ ಯೋಜನೆ ನಿರ್ದೇಶಕೆರೆನ್ ಭೇಟಿ ಮಲ್ತ್ ದ್ ಬಿನ್ನಾಪು ಕೊರಿಯೆರ್.

ರಾಷ್ಟ್ರೀಯ ಹೆದ್ದಾರಿ 66 ಕಲ್ಯಾಣಪುರ ಸಂತೆಕಟ್ಟೆಡ್ ನಡತೊಂದು ಇಪ್ಪುನ ಅಂಡರ್ ಪಾಸಿಂಗ್ ರಸ್ತೆ ಕಾಮಗಾರಿ ಆವೊಂದು ಉಂಡು, ಸದ್ರಿ, ರಾಷ್ಟ್ರೀಯ ಹೆದ್ದಾರಿದ ಬಲತ್ತ ಬರಿತ್ತ ಮಾರ್ಗ ಸಂಪೂರ್ಣವಾದ್ ಹಾಳಾತ್ಂಡ್. ಸದರಿ ಮಾರ್ಗಡ್ ಸಂಚಾರ ಮಲ್ಪುನ ಗಾಡಿ ಸವಾರೆರೆಗ್ ಮಸ್ತ್ ತೊಂದರೆ ಆವೊಂದುಂಡು. ಈ ಪರಿಸ್ಥಿತಿ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದಕಲೆನ ನಿರ್ಲಕ್ಷರ್ದ್ ಆತ್ಂಡ್. ಸದರಿ ಮಾರ್ಗಡ್ ಇಡೇ ಮುಟ್ಟ ಸುಮಾರ್ ಆಕ್ಸಿಡೆಂಟ್ ಆದ್ ಸುಮಾರ್ ಕುಟುಂಬದ ಜೋಕುಲು ಬೊಕ್ಕ ಕೆಲಸ ಮಲ್ತೊಂದು ಇಪ್ಪುನ ವ್ಯಕ್ತಿಲು ದ್ವಿಚಕ್ರ ಗಾಡಿಡ್ ಪ್ರಯಾಣ ಮಲ್ಪುನಗ ತನ್ನ ಪ್ರಾಣನ್ ಕಳೆವೊಂದು ಏತೊ ಕುಟುಂಬಲು ಬೀದಿಗ್ ಬೈದ್ಂಡ್. ನೆಕ್ಕ್ ರಾಷ್ಟೀಯ ಹೆದ್ದಾರಿ ಪ್ರಾಧಿಕಾರ ಬೊಕ್ಕ ನಮ್ಮ ಜಿಲ್ಲಾಡಳಿತದ ಕಾರ್ಯವೈಖರಿಯೇ ಕಾರಣ ಆತ್ಂಡ್.
ಸದ್ರಿ ರಾಷ್ಟ್ರೀಯ ಹೆದ್ದಾರಿಡ್ ನಮ್ಮ ಜನಪ್ರತಿನಿಧಿಲು ಜಿಲ್ಲಾಧಿಕಾರಿ ಬೊಕ್ಕ ಸುಮಾರ್ ಅಧಿಕಾರಿಲು ಸದ್ರಿ ಮಾರ್ಗಡ್ ಸುಮಾರ್ ಸರ್ತಿ ಪ್ರಯಾಣ ಮಲ್ತ್ಂಡಲ ಒವ್ವೇ ಪರಿಣಾಮಕಾರಿ ಕ್ರಮ ದೆತೊನಂದಿನವು ವಿಷಾದನೀಯ. ಮಾರ್ಗಡ್ ಬೂರ್ದಿನ ಗುಂಡಿಲೆಗ್ ಸರಿಯಾಯಿನ ಕಾಮಗಾರಿ ಮಲ್ಪಂದೆ ಜಲ್ಲಿ ಪೊಡಿ ಪಾಡ್ದ್ ತಾತ್ಕಾಲಿಕವಾದ್ ಮುಚ್ಚಿರ್ನೆದಾವೆರ ಸವಾರೆರೆಗ್ ತೊಂದರೆ ಆಯೆರೆ ಮುಖ್ಯ ಕಾರಣ ಆತ್ಂಡ್. ಬೊಕ್ಕ ಅಲ್ಪದ ಮಾರ್ಗ, ಅಂಚಿ-ಇಂಚಿ ಧೂಳು ಉಂಡು.
ಗಾಡಿ ಸಂಚಾರಿಲೆಗ್ ಬೊಕ್ಕ ಪಾದಚಾರಿಲೆಗ್ ಮಸ್ತ್ ನರಕಯಾತನೇ ಆತ್ಂಡ್. ಆಂಚಾದ್ ಸಂಬಂಧ ಪಟ್ಟಿನ ಇಲಾಖೆದೊಟ್ಟಿಗೆ ಕೂಡ್ಲೆ ಕ್ರಮ ದೆತೊನೊಡು ಬೊಕ್ಕ ಕೆ. ಜಿ. ರೋಡ್ ಮಾರ್ಗನ್ ಸರಿ ಮಲ್ಪೊಡು ಪಂದ್ ತುಳುನಾಡ ರಕ್ಷಣಾ ವೇದಿಕೆ ಬಲವಾದ್ ಒತ್ತಾಯ ಮಲ್ದ್ಂಡ್. ಈ ಬಗೆಟ್ಟ್ ವಿಳಂಬ ಧೋರಣೆನ್ ಅನುಸರಿಸಾಯಿಜಿಂಡ ದುಂಬುದ ದಿನಟ್ಟ್ ತುಳುನಾಡ ರಕ್ಷಣಾ ವೇದಿಕೆ ಕೇಂದ್ರೀಯ ಅಧ್ಯಕ್ಷೆರ್ ಯೋಗಿಶ್ ಶೆಟ್ಟಿ ಜಪ್ಪು ಮೆರೆನ ಮುತಾಲಿಕೆಡ್ ಉಗ್ರ ರೀತಿದ ಪೊರ್ಂಬಾಟ ಮಲ್ಪುನೇ ಅನಿವಾರ್ಯ ಆಪುಂಡು ಪಂದ್ ತುಳುನಾಡ ರಕ್ಷಣಾ ವೇದಿಕೆ ನಿಯೋಗ ಆಕ್ರೋಶ ತೆರಿಪಾದ್ಂಡ್. ನಿಯೋಗಗ್ ಎ.15 ತ್ತೊಲಯಿ ಸಂತೆಕಟ್ಟೆರ್ದ್ ಒಡಿಪು ಪೋಪುನ ಅಂಡರ್ ಪಾಸಿಂಗ್ ಮಾರ್ಗ ಸಾರ್ವಜನಿಕೆರೆಗ್ ಉಪಯೋಗಗ್ ಬುಡ್ದು ಕೊರ್ಪ ಪಂದ್ ಭರವಸೆ ಕೊರ್ತುಂಡು.

ನಿಯೋಗಡ್ ಒಡಿಪು ಜಿಲ್ಲಾ
ವೀಕ್ಷಕೆರ್ ಫ್ರ್ಯಾಂಕಿ ಡಿ’ಸೋಜ ಕೊಳಲಗಿರಿ, ಜಿಲ್ಲಾ ಅಧ್ಯಕ್ಷೆರ್ ಕೃಷ್ಣ ಕುಮಾರ್, ಪ್ರಧಾನ ಕಾರ್ಯದರ್ಶಿ ಅಜರುದ್ದೀನ್ ಸುಬ್ರಮಣ್ಯ ನಗರ, ಉಪಾಧ್ಯಕ್ಷೆರ್ ಜಯರಾಮ್ ಪೂಜಾರಿ, ಮಹಿಳಾ ಜಿಲ್ಲಾಧ್ಯಕ್ಷೆರ್ ಶೋಭಾ ಪಂಗಳಾ, ಬ್ರಹ್ಮಾವರ ತಾಲೂಕ್ ಅಧ್ಯಕ್ಷೆರ್ ಸತೀಶ್ ಪೂಜಾರಿ ಕಿಳಂಜೆ, ಕಾಪು ತಾಲೂಕ್ ಅಧ್ಯಕ್ಷೆರ್ ಹರೀಶ್ ಶೆಟ್ಟಿ, ಮಹಿಳಾ ಪ್ರಧಾನ ಕಾರ್ಯದರ್ಶಿ ನಾಗಲಕ್ಷ್ಮಿ, ಕಾಪು ಮಹಿಳಾ ಅನುಸೂಯ ಶೆಟ್ಟಿ, ರೋಷನ್ ಬಲ್ಲಾಳ್, ಮಹಿಳಾ ಕೋಶಾಧಿಕಾರಿ ಸುನಂದ ಕೋಟ್ಯಾನ್, ಮುಖಂಡೆರ್ ಪ್ರೀತಮ್, ಕುಶಾಲ್ ಅಮೀನ್ ಬೆಂಗ್ರೆ, ರೋಷನ್ ಬಂಗೇರ, ರೋಹಿಣಿ ಶೆಟ್ಟಿ, ಶಂಕರ್ ಒಡಿಪು, ಮಜೀದ್ ದೊಡ್ಡಣ್ಣ ಗುಡ್ಡೆ, ಸಾಧನ, ರವಿಜಾ, ಸುಲತ ವರಾಂಗ, ಸಂಗೀತ ಶೆಟ್ಟಿ ಪಡ್ಡಮ್, ಮಮತಾ ಎಂ ಪಾಲ್ ಪಡೆದಿತ್ತೆರ್.