ಕಾಪು: ಕರ್ನಾಟಕ ಜಾನಪದ ಪರಿಷತ್ ಬೆಂಗ್ಲೂರು ಮಹಾರಾಷ್ಟ್ರ ಘಟಕದ ವಾರ್ಷಿಕ ಜಾನಪದ ವಿಭೂಷಣ ಪ್ರಶಸ್ತಿಗ್ ಮೂಲತಃ ಕಾಪುದ ಇತ್ತೆ ಉದ್ಯೋಗ ನಿಮಿತ್ತ ಬೊಂಬೈಡ್ ಇಪ್ಪುನ ನಾಟಕೆಗಾರೆ, ಜಾನಪದ ರಂಗ ನಿರ್ದೇಶಕೆರ್ ಕರುಣಾಕರ ಕೆ. ಕಾಪು ಆಯ್ಕೆ ಆತೆರ್.
ಮಾ.24 ಕ್ಕ್ ಮಧ್ಯಾಹ್ನ 2 ಗಂಟೆರ್ದ್ ಕುರ್ಲಾ ಪೂರ್ವದ ಬಂಟರ ಭವನದ ಶ್ರೀಮತಿ ರಾಧಾಬಾಯಿ ಟಿ. ಭಂಡಾರಿ ಸಭಾಗೃಹಡ್ ನಡಪರೆ ಇಪ್ಪುನ ಸಂಸ್ಥೆದ ‘ಸಾಂಸ್ಕೃತಿಕ ಜಾನಪದ ಸಿರಿ ಸಿಂಚನ’ ಸಂಭ್ರಮಡ್ ಪ್ರಶಸ್ತಿ ಪ್ರದಾನ ಸಮಾರಂಭ ನಡಪರೆ ಉಂಡು.
ಮೇರ್ ಕಾಪುದ ಕೃಷ್ಣಪ್ಪ ಸಾಲ್ಯಾನ್ ಬೊಕ್ಕ ಗಿರಿಜಾ ಸಾಲ್ಯಾನ್ ದಂಪತಿಲೆನ ಮಗೆ ಆತೆರ್. ಪುಟ್ಟಿನ ಊರುಡು ಪ್ರಾಥಮಿಕ ಶಿಕ್ಷಣ ಮುಗಿತ್ ದ್, ಬೊಂಬೈಗ್ ಬತ್ತ್ ದ್ ಪಗೆಲ್ ಡ್ ಕೆಲಸ ಮಲ್ತ್ ದ್ ಮದರ್ ಇಂಡಿಯಾ ಧರ್ಮಾರ್ಥ ರಾತ್ರೆ ಶಾಲೆಡ್ ಬೊಕ್ಕದ ಶಿಕ್ಷಣ ಪಡೆಯೆರ್.
ಶಾಲಾ ಜೀವನಡೇ ರಂಗಕಲೆತ್ತ ವೈವಿಧ್ಯತೆಗ್ ಮಾರು ಪೋದು ಕಲೆನ್ ಮೈ ದಿಂಜಾವೊಂದು ಬೊಂಬೈಡ್ ಸಮಾನ ಮನಸ್ಕೆರ್ನೊಟ್ಟಿಗೆ ಅಭಿನಯ ಮಂಟಪ ಸಂಸ್ಥೆ ಸ್ಥಾಪನೆ ಮಲ್ತಿನ ಶ್ರೇಯಸ್ಸು ಮೆರೆನವು ಆತ್ಂಡ್.
ಉತ್ತಮ ಲೇಖಕೆ, ರಂಗನಿರ್ದೇಶಕೆರಾದ್ ಬೊಂಬೈ ರಂಗಭೂಮಿಡ್ ತನ್ನನೇ ಆಯಿನ ಸ್ಥಾನ ಪಡೆತೆರ್. ಸಮರ್ಥ ಸಂಘಟಕೆರಾಯಿನ ಮೇರ್ ಜನತಾ ಎಜುಕೇಶನ್ ಸೊಸೈಟಿ ಬೊಂಬೈಡ್ ಪದುಕೆರಾದ್ ಸೇವೆ ಸಂದಾದೆರ್.
ರಂಗಭೂಮಿಗ್ ಕಲಾ ಕಾಣಿಕೆಯಾದ್ ಸುಮಾರ್ ನಾಟಕನ್ ಬರೆದ್, ನಿರ್ದೇಶನ ಮಲ್ದೆರ್. ಮೆರೆನ ಸಾಧನೆನ್ ಸುಮಾರ್ ಸಂಘ ಸಂಸ್ಥೆಲು ಗುರುತಿಸಾದ್ ಮಾನಾದಿಗೆ ಮಲ್ದ್ಂಡ್.
Editorial