ಕಿನ್ನಿಗೋಳಿ: ತುಳುನಾಡ್ ದ ಕಾರ್ಣಿಕದ ಪುಣ್ಯ ಮಣ್ಣ್, ಕಟೀಲ್ ಕೈತಲ್ದ ತಿಬಾರ್ ದ (ಶಿಬರೂರು) ಕೊಡಮಣಿತ್ತಾಯ ದೈವಸ್ಥಾನ ಅಂದಾಜಿ 9 ಕೋಟಿ ರೂ. ಕರ್ಚಿಡ್ ಜೀರ್ಣೋದ್ಧಾರ ಆದ್ ಏಪ್ರಿಲ್ 22-30 ತಾರೀಕ್ ಮುಟ್ಟ ಬ್ರಹ್ಮಕುಂಭಾಭಿಷೇಕ ಕಾರ್ಯಕ್ರಮ ಬೊಕ್ಕ ವಿಶೇಷ ಜಾತ್ರಾ ಮಹೋತ್ಸವ ನಡಪರೆ ಉಂಡು ಪಂದ್ ತಿಬಾರ್ ಗುತ್ತಿನಾರ್ ಉಮೇಶ್ ಎನ್. ಶೆಟ್ಟಿ ಶಿಬರೂರುಗುತ್ತು ತೆರಿಪಾಯೆರ್.
ಶ್ರೀ ಕ್ಷೇತ್ರದ ಚಾವಡಿಡ್ ಬುಧಾರ ನಡತಿನ ಸುದ್ದಿಗೋಷ್ಠಿಡ್ ಪಾತೆರಿನ ಆರ್, ಏ.22 ಕ್ಕ್ ಉಗ್ರಾಣ ಮೂರ್ತ ಆವರೆ ಉಂಡು. ಏ.26 ಕ್ಕ್ ಕಾಂಡೆ ಶ್ರೀ ಉಳ್ಳಾಯ ಕೊಡಮಣಿತ್ತಾಯ ದೈವೊಲೆಗ್ ಬ್ರಹ್ಮಶ್ರೀ ವೇದವ್ಯಾಸ ತಂತ್ರಿಲು ಶಿಬರೂರು ಮೆರೆನ ಮುತಾಲಿಕೆಡ್ ಬ್ರಹ್ಮಕುಂಭಾಭಿಷೇಕ ನಡಪರೆ ಉಂಡು. ಅವೇ ದಿನ ರಾತ್ರೆ ಈ ಕ್ಷೇತ್ರದ ವಿಶೇಷ ಸಂಪ್ರದಾಯದ ಪ್ರಕಾರ ನಾಗದೇವರೆಗ್ ನಾಗಮಂಡಲ ಸೇವೆ ನಡಪರೆ ಉಂಡು.ಏ.27-30 ಮುಟ್ಟ ವಿಶೇಷ ಜಾತ್ರಾ ಮಹೋಚ್ಚಯ ನಡಪರೆ ಉಂಡು ಪಂದ್ ತೆರಿಪಾಯೆರ್.
ಕ್ಷೇತ್ರದ ಮೊಕ್ತೇಸರೆರ್ ಮಧುಕರ ಅಮೀನ್ ಪಾತೆರ್ದ್, ಈ ಸರ್ತಿ ದಾನಿಲೆನ ಸಹಕಾರೊಡು ಬಂಗಾರ್ ದ ಪಲ್ಲಕ್ಕಿ ನಿರ್ಮಾಣ ಮಲ್ಪುನ ಉದ್ದೇಶ ಉಂಡು. ಕ್ಷೇತ್ರಡ್ 1ಕೆಜಿ ಬಂಗಾರ್ ಇತ್ತ್ ದ್ ಅವೆನ್ ಗಲಸರೆ ಸರಕಾರದ ಅನುಮತಿ ದೆತೊನ್ನ ಕೆಲಸ ಆವೊಂದುಂಡು. ಜಾತ್ರೆದ ಪೊರ್ತುಡು ಅವು ದೇವೆರೆಗ್ ಸಮರ್ಪಣೆ ಆಪಿನ ವಿಶ್ವಾಸ ಉಂಡು. ಅವ್ವತ್ತಾಂದೆ ಕ್ಷೇತ್ರದ ನಾಲ್ ಕಡೆತ್ತ ಗೋಪುರ ಪುನರ್ ನಿರ್ಮಾಣದ ಬೇಲೆ, ಮೂಲಭೂತ ಸೌಕರ್ಯದ ಬೇಲೆ ಇಂಚ ಸುಮಾರ್ 3 ಕೋಟಿ ರೂ.ದ ಬೇಲೆ ಆತ್ಂಡ್ ಪಂಡೆರ್.
ಜೀರ್ಣೋದ್ಧಾರ ಸಮಿತಿದ ಸಂಚಾಲಕೆರ್ ಸುಬ್ರಹ್ಮಣ್ಯ ಪ್ರಸಾದ್ ಪಾತೆರ್ದ್, ನಂದಿನಿ ತುದೆ ಬರಿತ್ತ ಪ್ರಕೃತಿ ರಮಣೀಯ ಕ್ಷೇತ್ರವಾಯಿನ ತಿಬಾರ್ ದ ಬ್ರಹ್ಮಕುಂಭಾಭಿಷೇಕದ ಲೇಸ್ ಗ್ 3-4 ಲಕ್ಷ ಜನ ಸೇರುನ ನಿರೀಕ್ಷೆ ಉಂಡು. ಲೇಸ್ ದ ಯಶಸ್ವಿಗ್ 26 ಸಮಿತಿಲೆನ್ ರಚನೆ ಮಲ್ತ್ ದ. ತುಳುನಾಡ್ ಡ್ ಅತಿ ಎತ್ತರವಾಯಿನ ಕಂಚಿದ ಕವಚ ಇತ್ತಿನ ಕೊಡಿಮರನ್ (58 ಅಡಿ ಎತ್ತರ) ನಿರ್ಮಾಣ ಆದ್ ಪ್ರತಿಷ್ಠಾಪನೆ ಆವರೆ ಉಂಡು.ಮಿತ್ತ್ ದ ಸಾನೊದ ಗರ್ಭ ಗುಡಿಕ್ಕ್ ಪಿತ್ತಾಳೆದ ಮುಚ್ಚಿಗೆ ಪಾಡ್ದ್ಂಡ್ ಪಂಡೆರ್.
ಜೀರ್ಣೋದ್ಧಾರ ಸಮಿತಿದ ಕಾರ್ಯಾಧ್ಯಕ್ಷೆರ್ ಪ್ರದ್ಯುಮ್ನ ರಾವ್ ಪಾತೆರ್ದ್, ಶಾಸಕೆರ್ ಬೊಕ್ಕ ಸಂಸದೆರ್ನ ಅನುದಾನೊಡು ಕ್ಷೇತ್ರದ ನಂದಿನಿ ತುದೆ ಬರಿಟ್ಟ್ 1 ಕೋಟಿ ರೂ. ಕರ್ಚಿಡ್ ತಡೆಗೋಡೆ ಕಾಮಗಾರಿ ಆವೊಂದುಂಡು. ಬ್ರಹ್ಮಕುಂಭಾಭಿಷೇಕ ಉಚ್ಚಯದ ಪೊರ್ತುಡು ಪ್ರತಿದಿನೊಲ ಸ್ವಾಮೀಜಿಲು ಬೊಕ್ಕ ಧಾರ್ಮಿಕ ಮುಖಂಡೆರ್ನ ಸಮಕ್ಷಮಡ್ ಧರ್ಮ ಸಭೆ, ಬೇತೆ ಬೇತೆ ಸಾಂಸ್ಕೃತಿಕ ಕೂಟದಕ್ಲೆರ್ದ್ ಸಾಂಸ್ಕೃತಿಕ ಕಾರ್ಯಕ್ರಮ ಅಂಚೆನೆ ಬೇತೆ ಬೇತೆ ಭಜನಾ ಮಂಡಳಿರ್ದ್ ನಿರಂತರ ಭಜನಾ ಕಾರ್ಯಕ್ರಮ ನಡಪರೆ ಉಂಡು ಪಂದ್ ತೆರಿಪಾಯೆರ್.
ಪತ್ರಿಕಾಗೋಷ್ಠಿಡ್ ಜೀತೇಂದ್ರ ಶೆಟ್ಟಿ, ಕೊರ‍್ಯಾರುಗುತ್ತು, ತುಕರಾಮ ಶೆಟ್ಟಿ, ಪರ್ಲಬೈಲುಗುತ್ತು, ಮೊಕ್ತೇಸರೆರ್ ಕಾಂತಪ್ಪ ಸಾಲಿಯಾನ್, ಸುಧಾಕರ ಶಿಬರೂರು, ಸುದೀಪ್ ಶೆಟ್ಟಿ, ಜಗದೀಶ ಶೆಟ್ಟಿ, ಸುರೇಂದ್ರ ಶೆಟ್ಟಿ, ಪಂಚಾಯತ್ ಅಧ್ಯಕ್ಷೆರ್ ಗೀತಾ ಶೆಟ್ಟಿ ಶಿಬರೂರು ಗುತ್ತು ಸುಧಾಕರ ಶೆಟ್ಟಿ, ಚಂದ್ರಹಾಸ ಶಿಬರೂರು, ಪ್ರಭಾಕರ ಶೆಟ್ಟಿ ಹೊಸಕಟ್ಟ, ಮಾಧ್ಯಮ ಸಂಚಾಲಕೆರ್ ಜಗನ್ನಾಥ ಶೆಟ್ಟಿ ಬಾಳ ಇತ್ತೆರ್.
ತಿಬಾರ್ ಕ್ಷೇತ್ರದ ಇತಿಹಾಸ
ತಿಬಾರ್ ಶ್ರೀ ಕೊಡಮಣಿತ್ತಾಯ ಕ್ಷೇತ್ರ ಭಾರಿ ಪೊರ್ಲುದ ಇತಿಹಾಸ ಇತ್ತಿನ ಕ್ಷೇತ್ರ. ತಿಬಾರ್ ಗ್ ಲ ಶ್ರೀ ಕ್ಷೇತ್ರ ಕಟೀಲಿಗ್ ಲ ಅವಿನಾಭಾವ ಸಂಬಂಧ ಇತ್ತಿನೆಕ್ಕ್ ಸಾಕ್ಷಿಯಾದ್ ವರ್ಷಲ ಕಟೀಲ್ ಜಾತ್ರೆದ ಪೊರ್ತುಡು ಕೊಡಮಣಿತ್ತಾಯನ ಭೇಟಿ ಆಪಿನವು ಏನಿಕಾಲೊರ್ದು ನಡತೊಂದು ಬೈದ್ಂಡ್. ಕುಡ್ಲರ್ದ್ 25 ಕಿ.ಮೀ. ದೂರ ಬೊಕ್ಕ ಕಟೀಲ್ ರ್ದ್ 2 ಕಿ.ಮೀ. ದೂರದ ಪೊರ್ಲು ಜಾಗೆಡ್ ನಂದಿನಿ ತುದೆತ್ತ ಬರಿಟ್ಟ್ ಶ್ರೀ ಉಳ್ಳಾಯ ಕೊಡಮಣಿತ್ತಾಯ ಬೊಕ್ಕ ಪರಿವಾರ ದೈವೊಲು ಸುಮಾರ್ 700 ವರ್ಷದ ಪಿರವುಡು ದೈವ ಭಕ್ತೆರಾಯಿನ ಶಿಬರೂರುಗುತ್ತು ತಿಮ್ಮತ್ತಿ ಕರಿವಾಳ್‌ ರೆನ ಭಕ್ತಿಗ್ ಒಲಿದ್ ನಿಲೆಯಾತಿನ ಇತಿಹಾಸ ಉಂಡು.
ಈ ಕ್ಷೇತ್ರ ಮುಜರಾಯಿ ಇಲಾಖೆಗ್ ಸೇರ್ದಿನ ಎ ಗ್ರೇಡ್ ದೈವಸ್ಥಾನವಾದಿತ್ತ್ ದ್ ಪ್ರತಿ ವರ್ಷ ಡಿಸೆಂಬರ್ ತಿಂಗೊಲ್ದ ಧನು ಸಂಕ್ರಾಂದಿದಾನಿ ಕೊಡಿ ಏರ್ ದ್ ಎಡ್ಮ ದಿನತ್ತ ಜಾತ್ರಾ ಮಹೋತ್ಸವ ನಡತೊಂದು ಲಕ್ಷಾಂತರ ಭಕ್ತೆರೆನ ಆರಾಧ್ಯ ಕೇಂದ್ರವಾದುಂಡು. ತಿಬಾರ್ ದ ಗುವೆಲ್ದ ತೀರ್ಥಗ್ ವಿಷನ್ ಅಮೃತ ಮಲ್ಪುನ ಶಕ್ತಿ ಉಂಡು. 1976 ಇಸ್ವಿಡ್ ತಿಬಾರ್ ಗುತ್ತು ಮುದ್ದಣ್ಣ ಶೆಟ್ರೆನ ಮುತಾಲಿಕೆಡ್ ಕ್ಷೇತ್ರ ಸಂಪೂರ್ಣ ನವೀಕರಣ ಆದಿತ್ತ್ ದ್, 2010 ನೇ ಇಸ್ವಿಡ್ ಕೊಂಜಾಲಗುತ್ತು ಪ್ರಭಾಕರ ಶೆಟ್ರೆನ ಮುತಾಲಿಕೆಡ್ ಊರುದ ಬೊಕ್ಕ ಪರವೂರುದ ಭಕ್ತೆರ್ನ ಸಹಕಾರಡ್ ಸುಮಾರ್ ರೂ. 5 ಕೋಟಿ ಕರ್ಚಿಡ್ ಜೀರ್ಣೋದ್ಧಾರ ಆದ್ ಈ ಸರ್ತಿ ಪೊಸತ್ತ್ ಕೊಡಿಮರ, ಸುತ್ತುಪೌಳಿ ಅಂಚೆನೆ ಬೇತೆ ಬೇತೆ ಅಭಿವೃದ್ಧಿದ ಬೇಲೆನ್ ರೂ. 9 ಕೋಟಿ ಕರ್ಚಿಡ್ ಮಲ್ತೊಂದುಂಡು.
Editorial