ಕುಕ್ಕೆ: ಸ್ಕಂದ ಪಂಚಮಿದ ದಿನ 267 ಭಕ್ತೆರೆರ್ದ್ ಎಡೆಸ್ನಾನ ಸೇವೆ

ಸುಬ್ರಹಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವೆರ್ನ ಚಂಪಾಷಷ್ಠಿ ಜಾತ್ರಾ ಮಹೋತ್ಸವದ ಸ್ಕಂದ ಪಂಚಮಿದ ದಿನವಾಯಿನ ಐತಾರ ಕುಕ್ಕೆ ಸುಬ್ರಹ್ಮಣ್ಯಡ್ ಭಕ್ತೆರ್ ಎಡೆಸ್ನಾನ ಸೇವೆ ಮಲ್ತೆರ್.

ಪೆತ್ತ ಕಂಜಿಲು ಸ್ವೀಕಾರ ಮಲ್ತಿನ ತೆನಸ್ ದ ಬಾರೆದ ಇರೆತ ಮಿತ್ತ್ ಭಕ್ತೆರ್ ಎಡೆಸ್ನಾನ ಸೇವೆ ಮಲ್ಪುನ ಮುಖೆನ ಚಂಪಾಷಷ್ಠಿದ ಜಾತ್ರೋತ್ಸವದ ಪಂಚಮಿ ದಿನದಾನಿ ಎಡೆಸ್ನಾನ ಪರಕೆ ಸಂದಾಯೆರ್.

ಸುಮಾರು 267 ಭಕ್ತೆರ್ ಸ್ವಯಂಪ್ರೇರಿತರಾದ್ ಸೇವೆ ನೆರವೇರಿಸಾಯೆರ್.

ಧಾರ್ಮಿಕ ದತ್ತಿ ಇಲಾಖೆದ ಪಂಡಿತೆರ್ನ ಮಾರ್ಗದರ್ಶನದಂಚ ದೇವೆರ್ನ ಮಧ್ಯಾಹ್ನದ ಮಹಾಪೂಜೆ ಬೊಕ್ಕ
ದೇವಸ್ಥಾನದ ಪಿದಯಿ 432 ಬಾರೆದ ಇರೆನ್ ಪಾಡ್ದ್ ಅವೆತ್ತ ಮಿತ್ತ್ ದೇವೆರ್ನ ನೈವೇದ್ಯನ್ ಬಲಸ್ ದ್ ಇತ್ತೆರ್.

ಈ ಪೊರ್ತುಡು ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಗುರ್ಕಾರ್ಲು ಮೋಹನರಾಂ ಸುಳ್ಳಿ, ಕಾರ್ಯ ನಿರ್ವಹಣಾಧಿಕಾರಿ ಡಾ.ನಿಂಗಯ್ಯ, ವ್ಯವಸ್ಥಾಪನಾ ಸಮಿತಿ ಸದಸ್ಯೆರಾಯಿನ ವನಜಾ.ವಿ.ಭಟ್, ಶ್ರೀವತ್ಸ ಬೆಂಗಳೂರು, ಮನೋಹರ ರೈ, ಪಿಜಿಎಸ್‌ಎನ್ ಪ್ರಸಾದ್, ಪ್ರಸನ್ನ ದರ್ಬೆ, ಲೋಕೇಶ್ ಮುಂಡೋಕಜೆ, ಶೋಭಾ ಗಿರಿಧರ್, ದೇವಸ್ಥಾನದ ಅಧೀಕ್ಷಕೆರ್ ಪದ್ಮನಾಭ ಶೆಟ್ಟಿಗಾರ್, ಹೆಬ್ಬಾರ್ ಪ್ರಸನ್ನ ಭಟ್ ಇತ್ತೆರ್.