ಉಳ್ಳಾಲ: ಶ್ರೀ ಶಬರಿಮಲೆ ಅಯ್ಯಪ್ಪ ಸೇವಾ ಸಮಾಜಂ (ರಿ.) ದ ಮುತಾಲಿಕೆಡ್ ಅಯ್ಯಪ್ಪ ಭಕ್ತೆರ್‍ನ ಮಹಾ ಸಂಗಮ ಲೇಸ್ ಡಿ.17 ಐತಾರ ಸೋಮೇಶ್ವರದ ಸೋಮನಾಥೇಶ್ವರ ದೇವಲ್ಯದ ಸಭಾಂಗಣಡ್ ನಡಪರೆ ಉಂಡು.
ಕವಡಿಯಾರ್ ಅರಮನೆತ್ತ ರಾಜಕುಮಾರ ಆದಿತ್ಯ ವರ್ಮ ಈ ಲೇಸ್ ದ ಉದಿಪನ ಮಲ್ಪರೆ ಉಲ್ಲೆರ್. ಕೊಂಡೆವೂರು ಶ್ರೀ ನಿತ್ಯಾನಂದ ಯೋಗಾಶ್ರಮದ ಶ್ರೀ ಯೋಗಾನಂದ ಸರಸ್ವತಿ ಸ್ವಾಮೀಜಿಲು ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಧಾರ್ಮಿಕ ಮುಖಂಡೆರ್ ಕುಂಟಾರು ರವೀಶ್ ತಂತ್ರಿಲು ಮಾರ್ಗದರ್ಶನ ಕೊರ್ಪೆರ್. ಮಲ್ಲ ಬಿನ್ನೆರಾದ್ ಸೋಮೇಶ್ವರ ಶ್ರೀ ಸೋಮನಾಥ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ರವೀಂದ್ರನಾಥ, ಕರ್ನಾಟಕ ರಾಜ್ಯ ಸಾಸ್ ದ ಒತ್ತು ಗುರ್ಕಾರೆ ಡಾ. ಮುನಿರಾಜು, ದೇರಳಕಟ್ಟೆ ಶ್ರೀ ಅಯ್ಯಪ್ಪ ಸ್ವಾಮಿ ದೇವಲ್ಯದ ಗುರುಸ್ವಾಮಿ, ಮೊಕ್ತೇಸರೆರ್ ವಿಶ್ವನಾಥ ಕಾಯರ್ ಪಳಿಕೆ, ವಿಶ್ವಹಿಂದು ಪರಿಷತ್ ದ ಗುರ್ಕಾರೆ ಎಚ್ ಕೆ ಪುರುಷೋತ್ತಮ, ದ.ಕ ಜಿಲ್ಲೆ ಸಾಸ್ ದ ಗುರ್ಕಾರೆ ಗಣೇಶ್ ಪೊದುವಾಳ್, ಸಾಮಾಜಿಕ, ಧಾರ್ಮಿಕ ಚಿಂತಕೆರ್ ಸತೀಶ್ ಪೂಜಾರಿ ಸಜೀಪ ಪಾಲ್ ಪಡೆಯೆರೆ ಉಲ್ಲೆರ್.
ಅಂಚೆನೆ ಈ ಲೇಸ್ ಗ್ ಪಂದಳದ ರಾಜವಂಶಸ್ಥೆರ್, ಮೇಲ್ ಶಾಂತಿಲು, ಸ್ವಾಮೀಜಿಲು, ಹಿರಿಯ ಗುರುಸ್ವಾಮಿ ಬೊಕ್ಕ ಅಯ್ಯಪ್ಪ ಸ್ವಾಮಿನ ಪಿಕ್ಚರ್ ಮಾಲಿಗಪ್ಪುರಂಡ್ ನಟನೆ ಮಲ್ತಿನ ಬಾಲನಟಿ ಬೇಬಿ ದೇವಾನಂದ ಪಾಲ್ ಪಡೆಯೆರೆ ಉಲ್ಲೆರ್.
ಈ ಲೇಸ್ ಗ್ ಅಯ್ಯಪ್ಪ ಭಕ್ತೆರಾಯಿನ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಲೇಸ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಉಳ್ಳಾಲ ತಾಲೂಕ್ ಸಾಸ್ ದ ಗುರ್ಕಾರೆ ಬೊಕ್ಕ ಪದುಕೆರ್ ಲೆಪ್ಪೋಲೆಡ್ ತೆರಿಪಾದೆರ್.
Editorial