ಕಾಂಗ್ರೆಸ್ ಮೈತ್ರಿ ಕೂಟ ಒಂಜಿ ಧರ್ಮದಕ್ಲೆನ್ ಮೆಚ್ಚಾವುನವು ದೇಶಗ್ ಹಾಳ್: ಶಾಸಕೆರ್ ವೇದವ್ಯಾಸ ಕಾಮತ್

ಕುಡ್ಲ : ದೇಶನ್ ಒಟ್ಟು ಸೇರ್ಸಾವುನ ಕೆಲಸ ಬಿಜೆಪಿ ಮಲ್ತ್ಂಡ, ಕಾಂಗ್ರೆಸ್ ಏಪದಲೆನೇ ತನ್ನ ಸ್ವಾರ್ಥಕ್ಕಾದ್ ದೇಶನ್ ಬೇತೆ ಬೇತೆ ಮಲ್ಪುನ ಕೆಲಸನ್ ಮಲ್ತೊಂದು ಉಂಡು. ಬಿಹಾರ ಡ್ ಸಾರ್ವಜನಿಕ ರಜೆತ್ತ ವಿಷಯಡ್ ಆಯಿನ ವಿವಾದ I.N.D.I.A ಮೈತ್ರಿ ಕೂಟದ ಜಿಹಾದಿ ಮನಸ್ಥಿತಿನ್ ಜಗತ್ತ್ ಗ್ ತೂಪಾವೊಂದುಂಡು ಪಂದ್ ಶಾಸಕೆರ್ ವೇದವ್ಯಾಸ್‌ ಕಾಮತ್‌ ಮೇರ್ ಬೆಚ್ಚ ಆತೆರ್.

ಬಿಹಾರದ ಶಿಕ್ಷಣ ಇಲಾಖೆ ಘೋಷಣೆ ಮಲ್ತಿನ 2024 ತ್ತ ಸಾರ್ವಜನಿಕ ರಜೆತ್ತ ಪಟ್ಟಿಡ್ ಹಿಂದೂಲೆನ ಶ್ರೀ ಕೃಷ್ಣಜನ್ಮಾಷ್ಟಮಿ, ರಕ್ಷಾ ಬಂಧನ, ರಾಮನವಮಿ, ಶಿವರಾತ್ರಿ, ವಸಂತ ಪಂಚಮಿ, ಜೀವಿತ ಪುತ್ರಿಕಾ ಪರ್ಬಗ್ ಕೊರೊಂದು ಇತ್ತಿನ ರಜೆನ್ ಕ್ಯಾನ್ಸಲ್ ಮಲ್ದ್ಂಡ್. ಇಸ್ಲಾಂ ಪರ್ಬಲೆಗ್ ಎಚ್ಚದ ರಜೆನ್ ಘೋಷಣೆ ಮಲ್ದ್ಂಡ್. ಉರ್ದು ಶಾಲೆಲು ಸೇರಿನಂಚೆನೆ ಮುಸ್ಲಿಂ ಪ್ರಾಬಲ್ಯ ಇಪ್ಪುನ ಸರ್ಕಾರಿ ಶಾಲೆಗ್ ಐತಾರದ ಬದಲ್ ಸುಕ್ರಾರ ವಾರದ ರಜೆನ್ ಘೋಷಣೆ ಮಲ್ದ್ಂಡ್. ಆ ಮುಖೇನ ಮುಸ್ಲಿಮೆರೆಗಾದ್ ಸರ್ಕಾರಿ ವಾರದ ರಜೆನ್ ಬದಲ್ ಮಲ್ತಿನ ದೇಶದ ಸುರುತ್ತ ರಾಜ್ಯ ಬಿಹಾರ ಆತ್ಂಡ್. ನೆರ್ದ್ ದುಂಬು ಬಜಿ ಮೆಚ್ಚಾವುನ ರಾಜಕೀಯಗಾದ್ ಕಾಶ್ಮೀರಗ್ ಆರ್ಟಿಕಲ್ 370 ಮುಖೇನ ತಾನಮಾನ ಕೊರ್ದು, ಪ್ರತ್ಯೇಕತಾವಾದಗ್, ಭಯೋತ್ಪಾದನೆಗ್, ಅಶಾಂತಿಗ್ ಕಾಂಗ್ರೆಸ್ ಕಾರಣ ಆದಿತ್ತ್ಂಡ್. ಆ ಸಮಸ್ಯೆನ್ ಸರಿ ಮಲ್ಪರೆ ಪ್ರಧಾನಿ ನರೇಂದ್ರ ಮೋದಿಯೆರೇ ಬರೊಡಾಂಡ್. ಇತ್ತೆ ಬಿಹಾರಡ್ ತನ್ನ ಮೈತ್ರಿ ಕೂಟದ ಜೆಡಿಯು ಪಕ್ಷದ ಮುಖೇನ ಅಂಚಿನನೇ ಸಮಸ್ಯೆನ್ ಸೃಷ್ಟಿ ಮಲ್ತ್ ದ್ ಭವಿಷ್ಯಡ್ ದೇಶದೊಲಯಿ ಕುಡ ಅಶಾಂತಿ, ಅಭದ್ರತೆನ್ ಸುರು ಮಲ್ತೊಂದು ಉಂಡು. ಇತ್ತೆನೇ ನೆನ್ ಉಂತಾಯಿಜಿಂಡ ಕಾಂಗ್ರೆಸ್‌ ಪಕ್ಷ ನನದ ದಿನಟ್ಟ್ ರಾಜ್ಯಡ್ ಇಂಚಿನನೇ ನಿಯಮನ್ ಜಾರಿಗ್ ಕನಪುನೆಟ್ಟ್ ಅಚ್ಚರಿ ಇಜ್ಜಿ. ಇಡೀ ದೇಶದ ವಾ ರಾಜ್ಯಡ್ಲಾ ಇಜ್ಜಂದಿನ ನಿರ್ಧಾರನ್ ಬಿಹಾರಡ್ ಮಾತ್ರ ಕನಯೆರೆ ಮೊಘಲ್‌ ಕಾಲದ ಮನಸ್ಥಿತಿದಕ್ಲೆರ್ದ್ ಮಾತ್ರ ಸಾಧ್ಯ ಪಂದ್ ಶಾಸಕೆರ್ ಕಾಮತ್ ಆರೋಪ ಮಲ್ದೆರ್ .