ಬೆಟ್ಟಂಪಾಡಿ: ಶ್ರೀ ಮಂಜುನಾಥೇಶ್ವರ ಭಜನಾ ಮಂದಿರಡ್ ಉಚಿತ ಯಕ್ಷಗಾನ ತರಬೇತಿ ತರಗತಿ ಸುರು ಆಂಡ್. ಯಕ್ಷಗಾನ ಗುರು ಶಶಿಕಿರಣ್ ಕಾವು ತುಡರ್ ಅರ್ಲಾದ್ ಉದಿಪನ ಮಲ್ತ್ ಶುಭ ಹಾರೈಸಾಯೆರ್.
ವೇದಿಕೆಡ್ ಶಿವಾಜಿ ಗೆಳೆಯರ ಬಳಗದ ಗುರ್ಕಾರ್ಲು ರಾಧಕೃಷ್ಣ ನಾಯಕ್, ಕಾರ್ಯದರ್ಶಿ ಭಾಸ್ಕರ್ ಎಂ.ಎಸ್, ಮಂಜುನಾಥೇಶ್ವರ ಭಜನಾ ಮಂಡಳಿ ಗೌರವಾಧ್ಯಕ್ಷೆರ್ ನಾರಾಯಣ ಬೆಟ್ಟಂಪಾಡಿ, ಭಜನಾ ಮಂಡಳಿದ ಗುರ್ಕಾರ್ಲು ಅವಿನ್ ಬೆಟ್ಟಂಪಾಡಿ, ಸನತ್ ಬರಮೇಲು ಇತ್ತೆರ್.
ಬೆಳಂದೂರು: ಅಂತರ್ ಕಾಲೇಜು ತುಳು ಐಸಿರೊ 2023 ತುಳು ವೈವಿಧ್ಯ ಪಂತೊದ ಮೋನೆಗ್ ಅರದಲ ವಿಭಾಗಡ್ ಬೆಳಂದೂರು ಸರಕಾರಿ ಪ್ರಥಮ ದರ್ಜೆ ಕಾಲೇಜ್ದ ದೇವಿ ಪ್ರಸಾದ್ ಬೊಕ್ಕ ಸಚಿನ್ ಪಿ. ಸುರುತ ಇನಾಮು ಪಡೆಯೊಂದೆರ್.
ಮೋನೆಗ್ ಅರದಲ ವಿಭಾಗಡ್ ಯಕ್ಷಗಾನದ ಹಾಸ್ಯ ಮುಖವರ್ಣಿಕೆ ಪನ್ಪುನ ವಿಷಯ ಕೊರ್ದು ಇತ್ತೆರ್. ದೇವಿ ಪ್ರಸಾದ್ ಬೊಕ್ಕ ಸಚಿನ್ ಪಿ. ಮೊಕ್ಲೆಗ್ ಕಾಲೇಜ್ದ ಸಾಂಸ್ಕೃತಿಕ ಸಂಚಾಲಕಿ ದೀಪ್ತಿ ಎ.ಸಿ. ಮಾರ್ಗದರ್ಶನ ಕೊರ್ದಿತ್ತೆರ್.
ಕುಡ್ಲದ ರಥಬೀದಿಡ್ ಇಪ್ಪುನ ಡಾ| ಪಿ. ದಯಾನಂದ ಪೈ – ಪಿ ಸತೀಶ ಪೈ ಸರಕಾರಿ ಪ್ರಥಮ ದರ್ಜೆ ಕಾಲೇಜ್ಡ್ ಸ್ಪರ್ಧೆ ನಡತ್ತ್ಂಡ್, ಬೆಳಂದೂರು ಸರಕಾರಿ ಕಾಲೇಜ್ದ ವಿದ್ಯಾರ್ಥಿಲು ಪಾಲ್ ಪಡೆದಿತ್ತೆರ್.
ಪುತ್ತೂರು: ಪುತ್ತಿಲ ಪರಿವಾರ ಧಾರ್ಮಿಕ ಸೇವಾ ಸಮಿತಿರ್ದ್ ಲೋಕ ಕಲ್ಯಾಣಾರ್ಥಕವಾದ್ ಕೆಮ್ಮಾಯಿ ಶ್ರೀ ಮಹಾವಿಷ್ಣು ದೇವೆರೆಗ್ ತುಳಸಿ ಅರ್ಚನೆ ಬೊಕ್ಕ ಸಾರ್ವಜನಿಕ ದುರ್ಗಾಪೂಜೆ ಡಿ.1ರಂದು ನಡಪೆರೆ ಉಂಡು, ಅವೆತ್ತ ಲೆಪ್ಪೋಲೆ ಬುಡುಗಡೆ ಪತ್ರನ್ ಆಮಂತ್ರಣ ದೇವಸ್ಥಾನದ ವಠಾರಡ್ ಬುಡುಗಡೆ ಮಲ್ತೆರ್.
ಈ ಪೊರ್ತುಡು ಅರ್ಚಕೆರ್, ಪುತ್ತಿಲ ಪರಿವಾರದ ಸದಸ್ಯೆರ್ ಇತ್ತೆರ್.
ಕರ್ನಾಟಕ ಸಮಾಜ, ಸೂರತ್ ನೆತ್ತ ಮುತಾಲಿಕೆಡ್ ನ.26 ದಾನಿ ಕರ್ನಾಟಕ ರಾಜ್ಯೋತ್ಸವ ಜೀವನ ಭಾರತಿ ಸಭಾಂಗಣಡ್ ನಡಪೆರೆ ಉಂಡು.
ಲೇಸ್ ದ ಉದಿಪನನ್ ಹಿರಿಯ ಉದ್ಯಮಿ ಬೊಕ್ಕ ಸಮಾಜ ಸೇವಕೆರ್ ಸೂರತ್ ದ ರಾಧಾಕೃಷ್ಣ ಶೆಟ್ಟಿ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಐಐಟಿ ಸೂರತ್ ಖೋಲ್ವಾಡ್ ಕಾಮ್ರೇಜ್ ದ ನಿರ್ದೇಶಕೆರ್ ಪ್ರೊ.ಜೆ. ಎಸ್ ಭಟ್ ಪಾಲ್ ಪಡೆಯೆರೆ ಉಲ್ಲೆರ್.
ಈ ಪೊರ್ತುಡು ಸಾಂಸ್ಕೃತಿಕ ಕಾರ್ಯಕ್ರಮ ಬೊಕ್ಕ ಮುಂಬಯಿ ಘಾಟ್ಕೋಪರ್ ಶ್ರೀ ಗೀತಾಂಬಿಕ ಯಕ್ಷಗಾನ ಮಂಡಳಿ ಮೊಕ್ಲೆರ್ದ್ ಗದಾಯುದ್ದ ಯಕ್ಷಗಾನ ನಡಪರೆ ಉಂಡು.
ಈ ಲೇಸ್ ಗ್ ಎಚ್ಚಿನ ಸಂಖ್ಯೆಡ್ ಜನಕುಲು ಪಾಲ್ ಪಡೆಯೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ.) ಬೊಕ್ಕ ಕಟ್ಟೋಣ ಸಮಿತಿದ ಒಟ್ಟುಸೇರಿಗೆಡ್ ಪೊಸತಾದ್ ನಿರ್ಮಾಣ ಆಯಿನ ಬಿಲ್ಲವ ಭವನದ ಉದಿಪನ ಲೇಸ್ ನ.26 ಐತಾರ ಬೊಲ್ಪುಗು ನಡಪರೆ ಉಂಡು.
ಅಂಚೆನೆ ಪೊಸ ಬಿಲ್ಲವ ಭವನದ ಉದಿಪನ ಲೇಸ್ ದ ಲೆಕ್ಕೊಡು ಸಾಂಸ್ಕೃತಿಕ ಲೇಸ್ ಅವ್ವೇ ದಿನ ಬಯ್ಯಗ್ ಪೊಸ ಚಾವಡಿಡ್ ಸಂಘದ ಬೊಕ್ಕ ಯುವವಾಹಿನಿ ಘಟಕದ ಸದಸ್ಯೆರೆರ್ದ್ ಬೇತೆ ಬೇತೆ ವಿನೋದಾವಳಿ ಬೊಕ್ಕ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆದ ಪುಗರ್ತೆದ ಕಲಾವಿದೆರೆನ ಒಟ್ಟುಸೇರಿಗೆಡ್ ನಾಟಕ ಪ್ರದರ್ಶನ ನಡಪರೆ ಉಂಡು ಪಂದ್ ಹಳೆಯಂಗಡಿ ಬಿಲ್ಲವ ಸಮಾಜ ಸೇವಾ ಸಂಘ (ರಿ.), ಕಟ್ಟೋಣ ಸಮಿತಿ, ಬೊಂಬೈ ಸಮಿತಿ, ದುಬೈ ಬೊಕ್ಕ ಮಸ್ಕತ್ ಸಮಿತಿ, ಯುವವಾಹಿನಿ (ರಿ.) ಹಳೆಯಂಗಡಿ ಘಟಕ ಲೆಪ್ಪೋಲೆಡ್ ತೆರಿಪಾದೆರ್.
ದೇಶ ಆರ್ಥಿಕತೆ ಬೊಕ್ಕ ಅಭಿವೃದ್ಧಿ ಆಯೆರೆ ಸಹಕಾರಿ ಕೇತ್ರ ಒಂಜಿ ಶಕ್ತಿ ಆತ್ಂಡ್. ಸಹಕಾರಿ ವ್ಯವಸ್ಥೆಡ್ ಸುಮಾರ್ ಬದಲಾವಣೆನ್ ಪ್ರಧಾನಮಂತ್ರಿ ಮೋದಿ ಮೇರ್ ಕನತ್ ದ್ ಬ್ಯಾಂಕಿಂಗ್ ಕೇತ್ರದಂಚಿ ಯುವ ಜನಾಂಗ ಬರ್ಪುಲೆಕ್ಕ ಮಲ್ತ್ ದೆರ್. ನೆರ್ದ್ ಸಹಕಾರಿ ಕೇತ್ರ ಇತ್ತೆ ಮಲ್ ಶಕ್ತಿಯಾದ್ ಬುಲೆಯೆರೆ ಸಹಕಾರಿ ಆತ್ಂಡ್ ಪಂದ್ ಒಡಿಪು ಶಾಸಕೆರ್ ಯಶಪಾಲ್ ಸುವರ್ಣ 70 ನೇ ಅಖಿಲ ಭಾರತ ಸಹಕಾರಿ ಸಪ್ತಾಹನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಕರ್ನಾಟಕ ರಾಜ್ಯ ಸಹಕಾರ ಮಹಾಮಂಡಲ ನಿ. ಬೆಂಗ್ಲೂರು, ಒಡಿಪು ಜಿಲ್ಲಾ ಸಹಕಾರಿ ಯೂನಿಯನ್ ನಿ., ಒಡಿಪು ಎಲ್ ಐ ಸಿ ಎಂಪ್ಲಾಯಿಸ್ ಕೋ- ಆಪರೇಟಿವ್ ಬ್ಯಾಂಕ್ ನಿ, ಟೀಚರ್ ಕೋ-ಆಪರೇಟಿವ್ ಬ್ಯಾಂಕ್ ನಿ, ಸಹಕಾರ ಇಲಾಖೆ ಒಡಿಪು ಜಿಲ್ಲೆದ ಒಟ್ಟುಸೇರಿಗೆಡ್ ಅಖಿಲ ಭಾರತ ಸಹಕಾರಿ ಸಪ್ತಾಹ ಲೇಸ್ ನ.14-21 ಮುಟ್ಟ ನಡಪರೆ ಉಂಡು.
ನೆತ್ತ ಉದಿಪನ ಲೇಸ್ ಅಂಗಾರೆ ಒಡಿಪು ಲಿಕೋ ಬ್ಯಾಂಕ್ ಸಭಾಂಗಣಡ್ ನಡತ್ಂಡ್. ಈ ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ನ ಒಡಿಪು ಜಿಲ್ಲಾ ಸಹಕಾರಿ ಯೂನಿಯನ್ ಗುರ್ಕಾರೆ ಜಯಕರ್ ಶೆಟ್ಟಿ ಪಾತೆರ್ದ್, ಸಹಕಾರಿ ಕ್ಷೇತ್ರಡ್ ಮಾನ್ಯ ಕೇಂದ್ರ ಸಹಕಾರಿ ಸಚಿವೆರ್ ಅಮಿತ್ ಶಾ ಸುಮಾರ್ ಬದಲಾವಣೆನ್ ಕನತ್ ದ್ ಸಹಕಾರ ಕ್ಷೇತ್ರ ಅಭಿವುದ್ಧಿ ಆಯೆರೆ ಸಕಾಯ ಆಯೆರ್. ಶೇ.42 % ಯುವ ಜನತೆ ಸಹಕಾರಿ ಬ್ಯಾಂಕಿಂಗ್ ನ್ ಇಷ್ಟ ಪಟ್ಟ್ ದ್ ಬೇತೆ ಬೇತೆ ಕ್ಷೇತ್ರಡ್ ಉಲ್ಲೆರ್. ಶಿಕ್ಷಣ ಕ್ಷೇತ್ರಡ್ ಇಪ್ಪುನ ನನ ಸಹಕಾರಿ ಬ್ಯಾಂಕಿಂಗ್ ಕ್ಷೇತ್ರಗ್ ವಿಧಾನಸಭೆಟ್ಟ್ 1 ನೇ ತಾನ ಕೊರ್ಪುಲೆಕ್ಕ ಸರಕಾರಗ್ ಬಿನ್ನಾಪು ಮಲ್ತೆರ್.
ಲೇಸ್ ಡ್ ಸಹಕಾರಿ ಬ್ಯಾಕಿಂಗ್ ಕ್ಷೇತ್ರಡ್ ಪ್ರಶಸ್ತಿ ಗೆಂದಿನ ಬ್ಯಾಂಕ್ ಗುರ್ಕಾರೆನ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿಮಾನಾದಿಗೆ ಮಲ್ತೆರ್. ಉಪನ್ಯಾಸಕೆರ್ ಸಂತೋಷ ಶೆಟ್ಟಿ ಬೆದ್ರ ದಿಕ್ಸೂಚಿ ಭಾಷಣ ಮಲ್ತೆರ್.
ಮಲ್ಲ ಬಿನ್ನೆರಾದ್ ಎಲ್ ಐ ಸಿ ಎಂಪ್ಲಾಯಿಸ್ ಕೋ- ಆಪರೇಟಿವ್ ಬ್ಯಾಂಕ್ ದ ಗುರ್ಕಾರೆ ಕೆ ಕೃಷ್ಣ, ಟೀಚರ್ ಕೋ-ಆಪರೇಟಿವ್ ಬ್ಯಾಂಕ್ ದ ಗುರ್ಕಾರೆ ಸಂತೋಷ ಕುಮಾರ್ ಶೆಟ್ಟಿ, ಸಹಕಾರ ಸಂಘದ ಸಹಾಯಕ ನಿಬಂಧಕೆರ್ ಅರುಣ್ ಕುಮಾರ್ ಕುಂದಾಪುರ, ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ ಹಾಲಪ್ಪ ಕೋಡಿಹಳ್ಳಿ, ಅಶೋಕ್ ಕುಮಾರ್ ಬಲ್ಲಾಳ, ವಿಶ್ವನಾಥ ಶೆಟ್ಟಿ, ದಯಾನಂದ, ಅಲೆವೂರು ಹರೀಶ್ ಕಿಣಿ, ಚಂದ್ರಹಾಸ್ ಶೆಟ್ಟಿ, ಶಂಕರ ಪೂಜಾರಿ, ಶಶಿಕಲಾ, ಮಂಜುನಾಥ, ಬೊಕ್ಕ ನಿರ್ದೇಶಕೆರ್ ಮಂಡಳಿ ಸದಸ್ಯೆರ್, ನೂದೆರ್ದ್ ಎಚ್ಚ ಸಹಕಾರಿಲು ಪಾಲ್ ಪಡೆದಿತ್ತೆರ್. ಒಡಿಪು ಜಿಲ್ಲಾ ಸಹಕಾರಿ ಯೂನಿಯನ್ ನಿರ್ದೇಶಕೆರ್ ಶ್ರೀಧರ್ ಎದ್ಕೊನಿಯೆರ್. ಸುಧಾಕರ್ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್. ಶಶಿಕಲಾ ಸೊಲ್ಮೆ ಸಂದಾಯೆರ್.
ಕುಡ್ಲ: ತುಳು ಅಪ್ಪೆ ಭಾಷೆ. ತುಳುಟ್ಟ್ ನಿರ್ಮಾಣ ಆಪುನ ಮಾತ ಪಿಕ್ಚರ್ ನ್ ಪೇಕ್ಷಕೆರ್ ಚಿತ್ರ ಮಂದಿರಡೇ ತೂವೊಡು. ಅಪಗ ತುಳು ಚಿತ್ರರಂಗ ನನಾತ್ ಬುಲೆಪುಂಡು ಪಂದ್ ನಟೆ, ನಿರ್ದೇಶಕೆರ್ ಡಾ. ದೇವದಾಸ್ ಕಾಪಿಕಾಡ್ ಪಂಡೆರ್.
ಭಾರತ್ ಮಾಲ್ ದ ಬಿಗ್ ಸಿನೆಮಾಸ್ ಡ್, ಧರ್ಮದೈವ ಪ್ರೊಡಕ್ಷನ್ ಹೌಸ್ ಬ್ಯಾನರ್ ಡ್, ಬಿಳಿಯೂರು ರಾಕೇಶ್ ಭೋಜರಾಜ ಶೆಟ್ಟಿ ನಿರ್ಮಾಣದ, ನಿತಿನ್ ರೈ ಕುಕ್ಕುವಳ್ಳಿ ನಿರ್ದೇಶನದ ಧರ್ಮದೈವ ತುಳು ಪಿಕ್ಚರ್ ದ ಟೀಸರ್ ಬುಡುಗಡೆ ಮಲ್ತ್ ದ್ ಪಾತೆರಿಯೆರ್.
ಬಿನ್ನೆರಾಯಿನ ನಿರ್ದೇಶಕೆರ್ ವಿಜಯಕುಮಾರ್ ಕೊಡಿಯಾಲ್ ಬೈಲ್ ಪಾತೆರ್ದ್, ಕಾಂತಾರ ಸಿನೆಮಾರಂಗಗ್ ಭದ್ರಬುನಾದಿ ಪಾಡ್ದ್ಂಡ್. ಧರ್ಮದೈವ ಪಿಕ್ಚರ್ ಲ ಯಶಸ್ಸ್ ಅವಡ್ ಪಂದ್ ಪಂಡೆರ್.
ಈ ಪೊರ್ತುಡು ನಿರ್ಮಾಪಕೆರ್ ಪ್ರಕಾಶ್ ಪಾಂಡೇಶ್ವರ್ ಎಡ್ಡೆಪ್ಪು ಬಯಕಿಯೆರ್. ಕಿಶೋರ್ ಡಿ.ಶೆಟ್ಟಿ, ಲೀಲಾಧರ ಶೆಟ್ಟಿ ಕಾಪು, ಚೇತನ್ ರೈ ಮಾಣಿ, ಅಕ್ಷಿತ್ ಸುವರ್ಣ, ರವೀಂದ್ರ ಶೆಟ್ಟಿ ನುಳಿಯಾಲು, ಜಯಂತ ನಡುಬೈಲ್, ಕೆ.ಕೆ ಪೇಜಾವರ, ಸಚಿನ್ ಉಬಾರ್, ಕಿಶೋರ್ ಸುಹಾನ್ ಆಳ್ವ, ಯೊಗೀಶ್ ಶೆಟ್ಟಿ ಜಪ್ಪು, ಸಹಜ್ ರೈ ಬಳಜ್ಜ, ದೀಪಕ್ ರೈ ಪಾಣಾಜೆ, ರೂಪಾಶ್ರೀ ವರ್ಕಾಡಿ, ರಮೇಶ್ ರೈ ಕುಕ್ಕುವಳ್ಳಿ ಪಾಲ್ ಪಡೆದಿತ್ತೆರ್. ನವೀನ್ ಶೆಟ್ಟಿ ಎಡ್ಮೆಮಾರ್ ಲೇಸ್ ದ ಸುಧಾರಿಕೆ ಮಲ್ತೆರ್.
ಕುಡ್ಲ ತುಳು ಕೂಟ (ರಿ.) ದ ಮುತಾಲಿಕೆಡ್ ನ.18 ಸನಿಯಾರ ಮಧ್ಯಾಹ್ನ ಸುರತ್ಕಲ್ ವಿದ್ಯಾದಾಯಿನಿ ಪ್ರೌಢಶಾಲೆಡ್ ತುಳುವೆರೆ ತುಡರ ಪರ್ಬೊ ದೀಪೊಲಿ-ಬಲ್ಯೇಂದ್ರೆ ನಡಪರೆ ಉಂಡು.
ಈ ಲೇಸ್ ನ್ ಅಗರಿ ಎಂಟರ್ ಪ್ರೈಸಸ್ ರಾಘವೇಂದ್ರ ರಾವ್ ಅಗರಿ ತುಡರ್ ಅರ್ಲಾದ್ ಉದಿಪನ ಮಲ್ಪರೆ ಉಲ್ಲೆರ್. ಕುಡ್ಲ ತುಳುಕೂಟ (ರಿ.) ದ ಗುರ್ಕಾರೆ ಮರೋಳಿ ಬಿ. ದಾಮೋದರ ನಿಸರ್ಗ ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ವೆರ್. ಸುರತ್ಕಲ್ ಪ.ಪೂ ಕಾಲೇಜ್ ಗೋವಿಂದದಾಸ ಕಾಲೇಜ್ ದ ಉಪನ್ಯಾಸಕೆರ್ ವೆಂಕಟರಮಣ ಭಟ್ ಪೊಲಬು ಕೊರಿಯೆರೆ ಉಲ್ಲೆರ್.
ಮಲ್ಲ ಬಿನ್ನೆರಾದ್ ಎಂಜೆಎಫ್ ಜನರಲ್ ಮ್ಯಾನೇಜರ್, ಸನ್ನಿಧೀಸ್ ಹೋಟೆಲ್ಸ್ (ಪ್ರೈ.ಲಿ) ದ ಲ/ ಭಾಸ್ಕರ್ ಸಾಲ್ಯಾನ್, ಸುರತ್ಕಲ್ ವಿದ್ಯಾದಾಯಿನಿ ಪ್ರೌಢಶಾಲೆದ ಸಂಚಾಲಕೆರ್ ಸುಧಾಕರ ರಾವ್ ಪೇಜಾವರ, ಮುಖ್ಯ ಶಿಕ್ಷಕೆರ್ ಬಾಲಚಂದ್ರ ಕೆ, ಪಾಲ್ ಪಡೆಯೆರೆ ಉಲ್ಲೆರ್.
ಅಂಚೆನೆ ಸಾಂಸ್ಕೃತಿಕ ಲೇಸ್, ಹರಿದಾಸರತ್ನೊ ಶ್ರೀ ಪುಷ್ಪಳ ಕುಮಾರ್ ತೋನ್ಸೆ ಮೆರೆನ ತುಳು ಭಾವಗೀತೆ ಪದರಂಗಿತೊ ನಡಪರೆ ಉಂಡು ಪಂದ್ ಕೂಟೊದ ಗುರ್ಕಾರೆ ಮರೋಳಿ ದಾಮೋದರ ನಿಸರ್ಗ ಬಿ, ಒತ್ತು ಗುರ್ಕಾರೆ ಜೆ.ವಿ ಶೆಟ್ಟಿ, ಪಣವುದ ಗುರ್ಕಾರೆ ಚಂದ್ರಶೇಖರ ಸುವರ್ಣ, ಪ್ರಧಾನ ಕಾರ್ಯಂತೆರ್ ವರ್ಕಾಡಿ ರವಿ ಅಲೆವೂರಾಯ, ಒತ್ತು ಕಾರ್ಯಂತೆರ್ ಗೋಪಾಲಕೃಷ್ಣ ಪಿ ಲೆಪ್ಪೋಲೆಡ್ ತೆರಿಪಾದೆರ್.
ಕಾಸ್ರೋಡು: ಉದ್ಯಾವರ ಮಾಡದ ಜಮೇಯಹಿತ್ಲು ಆದಿ ತರವಾಡು ಟ್ರಸ್ಟ್ ದ ಮುತಾಲಿಕೆಡ್ ಸುವರ್ಣ/ ಪುಲ್ಲ್ಯಾಂಜ ತೀಯಾ ಕುಟುಂಬದ ಮೂಲಸ್ಥಾನಡ್ ಶ್ರೀ ನಾಗದೇವರು, ಶ್ರೀ ಜಮೇಯ ಗುರು, ಶ್ರೀ ವಯನಾಟ್ ಕುಲವನ್, ಶ್ರೀ ವಿಷ್ಣುಮೂರ್ತಿ, ಶ್ರೀ ಪಂಡಿಂಞರ ಚಾಮುಂಡಿ, ಕಲ್ಲುರ್ಟಿ, ಪಂಜುರ್ಲಿ, ಕೊರತಿ, ಗುಳಿಗ ಬೊಕ್ಕ ಪರಿವಾರ ದೈವೊಲೆನ ನಾಗತಂಬಿಲ ಬೊಕ್ಕ ಕಾಲಾವಧಿ ಪರ್ವ ಜ.27 ಬೊಕ್ಕ 28 ಕ್ಕ್ ನಡಪರೆ ಉಂಡು.
ಜ.27 ಸನಿಯಾರ ಬೊಲ್ಪುಗು ನಾಗದೇವೆರೆಗ್ ಪಂಚಾಮೃತ ಅಭಿಷೇಕ, ಶ್ರೀ ವೆಂಕಟರಮಣ ದೇವೆರೆನ ಮುಡಿಪು ಕಾಣಿಕೆ, ಮಧ್ಯಾಹ್ನ ನಾಗತಂಬಿಲ, ಆಶ್ಲೇಷ ಬಲಿ, ಮಹಾಪೂಜೆ, ಪ್ರಸಾದ ಪಟ್ಟುನ ಲೇಸ್, ನುಪ್ಪು ಪ್ರಸಾದ ಸೇವೆ, ಬಯ್ಯಗ್ ದೈವೊಲೆನ ಪರ್ವ ಬೊಕ್ಕ ಅಡೆಸೇವೆದೊಟ್ಟಿಗೆ ಶ್ರೀ ವಯನಾಟ್ ಕುಲವನ್, ಶ್ರೀ ವಿಷ್ಣುಮೂರ್ತಿ ದೈವೊಲೆನ ದರ್ಶನ ಬೊಕ್ಕ ಪ್ರಸಾದ ಪಟ್ಟುನ ಲೇಸ್ ನಡಪರೆ ಉಂಡು.
ಜ.28 ಐತಾರ ಬಯ್ಯಗ್ ರಾಹು ಗುಳಿಗ ಬೊಕ್ಕ ಭೈರವ ದೈವೊಲೆಗ್ ಪರ್ವ, ದೈವಾಧೀನರಾಯಿನ ಗುರುಕಾರ್ನರೆಗ್ ನುಪ್ಪು ನೈವೇದ್ಯ, ಕುಟುಂಬಡ್ ತೀರ್ ಪೋಯಿನ ಸದಸ್ಯೆರೆನ ಆತ್ಮನ್ ಉಲಯಿ ಲೆತ್ತ್ ದ್, ತರವಾಡ್ ದ 16 ಕ್ಕ್ ಸೇರ್ಸಾಯೆರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಬೆಂಗ್ಲೂರ್ ಕರ್ನಾಟಕ ಪ್ರದೇಶ ಆರ್ಯ ಈಡಿಗೆರೆನ ಸಂಘದ ಅಮೃತ ಮಹೋತ್ಸವ ಬೊಕ್ಕ ಈಡಿಗ ಬೊಕ್ಕ 25 ಪಂಗಡದ ಬೃಹತ್ ಜಾಗೃತ ಸಮಾವೇಶ ಡಿ.10 ಐತಾರ ಬೆಂಗ್ಲೂರ್ ಅರಮನೆ ಮೈದಾನಡ್ ನಡಪರೆ ಉಂಡು.
ಈ ಲೇಸ್ ಕರ್ನಾಟಕ ಪ್ರದೇಶ ಆರ್ಯ ಈಡಿಗೆರೆನ ಸಂಘದ ಗುರ್ಕಾರೆ ಡಾ/ ಎಂ ತಿಮ್ಮೇಗೌಡೆರೆನ ಗುರ್ಕಾರ್ಮೆಡ್, ಸಮುದಾಯದ ಮಾತ ಸ್ವಾಮೀಜಿಲೆನ ಬೊಕ್ಕ ಘನ ಸರ್ಕಾರದ ಮುಖ್ಯಮಂತ್ರಿ, ಉಪಮುಖ್ಯಮಂತ್ರಿ, ಈಡಿಗ ಸಮಾಜದ ಮಂತ್ರಿಲೆನ ಉಪಸ್ಥಿತಿಡ್, ಸಮಾಜದ ಮಾತ ರಾಜಕೀಯ ಮುಖಂಡೆರ್, ಜಿಲ್ಲಾ ಬೊಕ್ಕ ತಾಲೂಕ್ ಸಂಘದ ಗುರ್ಕಾರೆ, ಚಿತ್ರರಂಗದ ನಾಯಕೆ, ನಟೆ, ನಟಿಯೆರೆನ ಒಟ್ಟುಸೇರಿಗೆಡ್ ನಡಪರೆ ಉಂಡು ಪಂದ್ ಕರ್ನಾಟಕ ಪ್ರದೇಶ ಆರ್ಯ ಈಡಿಗೆರೆನ ಸಂಘದ ಗುರ್ಕಾರೆ, ಪದುಕೆರ್ ಬೊಕ್ಕ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
