November 24, 2023

ನ.25: ಘಾಟ್ಕೋಪರ್ ಶ್ರೀ ದತ್ತಾತ್ರೇಯ ದುರ್ಗಾಂಬಿಕಾ ದೇವಲ್ಯಡ್ ಸಾಮೂಹಿಕ ಶ್ರೀ ಶನಿ ಪೂಜೆ

ಬೊಂಬೈ: ಘಾಟ್ಕೋಪರ್ ಶ್ರೀ ದತ್ತಾತ್ರೇಯ ದುರ್ಗಾಂಬಿಕಾ ದೇವಲ್ಯಡ್ ನ.25 ಸನಿಯಾರ ಮಧ್ಯಾಹ್ನ ಸಾಮೂಹಿಕ ಶ್ರೀ ಶನಿ ಪೂಜೆ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತಾದಿಲು ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ತೀರ್ಥ ಪ್ರಸಾದ ದೆತೊಂದು, ಶ್ರೀ ದತ್ತಾತ್ರೇಯ, ಶ್ರೀ ಆದಿಮಾತೆ ದುರ್ಗಾಂಬಿಕಾ, ಶ್ರೀ ಆಂಜನೇಯ, ಶ್ರೀ ನಾಗಶೇಷ, ಶ್ರೀ ಚಾಮುಂಡಿ ದೈವ ಬೊಕ್ಕ ಶ್ರೀ ಶನಿದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ದತ್ತಾತ್ರೇಯ ಮಿತ್ರ ಭಜನಾ ಮಂಡಳಿ (ರಿ.) ದ ಧರ್ಮದರ್ಶಿಲು ದೇವ್ ಬಿ ಪೂಜಾರಿ ಲೆಪ್ಪೋಲೆಡ್ ತೆರಿಪಾದೆರ್.

ನ.26: ಮಹಾಕಾಳಿಪಡ್ಪುದ ಜಪ್ಪು ಸಂಕಪ್ಪ ಮೆಮೋರಿಯಲ್ ಹಾಲ್ ಡ್ ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ

ಕುಡ್ಲ: ಮಹಾಕಾಳಿಪಡ್ಪುದ ಜಪ್ಪು ಶ್ರೀ ಭಗವತೀ ತೀಯಾ ಸೇವಾ ಸಂಘದ ಮುತಾಲಿಕೆಡ್ 30ನೇ ವರ್ಷದ ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ ನ.26 ಐತಾರ ಬೊಲ್ಪುಗು ಜಪ್ಪು ಸಂಕಪ್ಪ ಮೆಮೋರಿಯಲ್ ಹಾಲ್ ಡ್ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಗುರಿಕಾರೆರ್ ದಾಮೋದರ ಗುರಿಕಾರೆ, ಮಾನಾದಿಗೆದ ಗುರ್ಕಾರೆ ಚಂದ್ರಮೋಹನ್ ಜೆ, ಗುರ್ಕಾರೆ ಚಂದ್ರಶೇಖರ್ ಕೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್. ‌

ರೇಡಿಯೊ ಮಣಿಪಾಲಡ್ ಸಂಗೀತ ಪಾಠ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪಾದ್ ಕೊರ್ಪುನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 35ನೇ ಸಂಚಿಕೆ ನ.24 ಕ್ಕ್ ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಕಲ್ಪಾರ್ಥಿ ಪುಟಾಣಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್. ಈ ಲೇಸ್ ನ.25 ಸನಿಯಾರ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರ ದ ಪ್ರಕಟಣೆ ತೆರಿಪಾದ್ಂಡ್.

ಕಾರ್ನಾಡ್ ಹಿಮಾಯತುಲ್ ಇಸ್ಲಾಂ ಸಮಿತಿದ ಅಧ್ಯಕ್ಷೆರಾದ್ ಪುತ್ತು ಬಾವ ಆಯ್ಕೆ

ಮುಲ್ಕಿ: ಕಾರ್ನಾಡ್ ಹಿಮಾಯತುಲ್ ಇಸ್ಲಾಂ ಸಮಿತಿದ ಮಹಾಸಭೆ ಇಂಚೊಗು ಶಾಫಿ ಜುಮ್ಮಾ ಮಸೀದಿ ಆಡಳಿತ ಸಮಿತಿದ ಅಧ್ಯಕ್ಷೆರ್ ಸುಹೈಲ್ ಹೈದರ್ ಮೆರೆನ ಗುರ್ಕಾರ್ಮೆಡ್ ಸಂಸ್ಥೆದ ಕಚೇರಿಡ್ ನಡತ್ಂಡ್.

ಪೊಸ ಗುರ್ಕಾರೆಯಾದ್ ಪುತ್ತು ಬಾವ ಕಾರ್ನಾಡು ಬೊಕ್ಕ ಪ್ರಧಾನ ಕಾರ್ಯದರ್ಶಿಯಾದ್ ಎಂ ಕೆ ಹಸೈನಾ ದರ್ಗಾ ರೋಡ್ ಮೇರ್ ಆಯ್ಕೆ ಆಯೆರ್. ಬೊಕ್ಕ 23 ಸದಸ್ಯೆರೆನ್ ಆಯ್ಕೆ ಮಲ್ತೆರ್.

47ನೇ ವರ್ಷದ ದಫ್ ರಾತೀಬ್ ಲೇಸ್ ನ್ 2024 ತ್ತ ಫೆಬ್ರವರಿ 1-3 ಮುಟ್ಟ ನಡಪುನ ಬಗೆಟ್ಟ್ ತೀರ್ಮಾನ ನಡತ್ಂಡ್.

ಈ ಪೊರ್ತುಡು ಸಭೆಟ್ಟ್ ಫಾರೂಕ್ ಹಾಜಿ, ಕಾರ್ನಾಡು ಮದರಸದ ಸದರ್ ಉಸ್ತಾದ್, ಬಹುಮಾನ್ಯ ರಝಾಕ್ ಮದನಿಯೆರ್ ಇತ್ತೆರ್.

ಮಾ.22: ಗಬ್ಬರ್ ಸಿಂಗ್ ತುಳು ಪಿಕ್ಚರ್ ರಿಲೀಸ್

ಕುಡ್ಲ: ಟೈಟಲ್, ಪೋಸ್ಟರ್ ಡೇ ಆಸಕ್ತಿ ಪುಟ್ಟಾಯಿನ “ಗಬ್ಬರ್ ಸಿಂಗ್” ತುಳು ಪಿಕ್ಚರ್ ಮಾ.22 ಕ್ಕ್ ತುಳುನಾಡ್ ದ ಜಿಲ್ಲೆ ಇಡೀ ಬುಡುಗಡೆ ಆಯೆರೆ ಉಂಡು ಪಂದ್ ಪಿಕ್ಚರ್ ದ ನಿರ್ಮಾಪಕೆರ್ ಸತೀಶ್ ಪೂಜಾರಿ ಬಾರ್ಕೂರು ತೆರಿಪಾದೆರ್.

ಮುತ್ತು ಗೋಪಾಲ್ ಫಿಲ್ಮ್ಸ್ ಬಾರ್ಕೂರು ಲಾಂಛನಡ್ ತಯಾರಾಯಿನ ಗಬ್ಬರ್ ಸಿಂಗ್ ಪಿಕ್ಚರ್ ಗ್ ಸುರತ್ಕಲ್, ಚಿತ್ರಾಪುರ, ಬೈಕಂಪಾಡಿ ಪ್ರದೇಶಡ್ ಮೂಜಿ ಹಂತಡ್ ಶೂಟಿಂಗ್ ನಡತ್ ದ್ಂಡ್. ನಾಯಕೆ ನಟೆಯಾದ್ ಶರಣ್ ಶೆಟ್ಟಿ, ನಾಯಕಿಯಾದ್ ವೆನ್ಸಿಟಾ ಅಭಿನಯ ಮಲ್ದೆರ್. ಸಮಾಜಡ್ ಅಶಾಂತಿ ಸೃಷ್ಟಿ ಆನಗ ಕುಡ ಶಾಂತಿ ತಿಕುಲೆಕ್ಕ ಮಲ್ಪುನ ಖಡಕ್ ಅಧಿಕಾರಿ ಪಾತ್ರಡ್ ಶರಣ್ ಶೆಟ್ಟಿ ಅಭಿನಯ ಮಲ್ದೆರ್. ಗಬ್ಬರ್ ಸಿಂಗ್ ಆಕ್ಷನ್ ಥ್ರಿಲ್ಲರ್ ಫ್ಯಾಮಿಲಿ ಓರಿಯೆಂಟೆಡ್ ಫಿಲ್ಮ್ ಆತ್ಂಡ್. ಸಿನಿಮಾ ಕತೆ ಚಿತ್ರಕತೆನ್ ಸತೀಶ್ ಪೂಜಾರಿ ಬಾರ್ಕೂರ್, ನಿರ್ದೇಶನದ ಜಬದಾರಿನ್ ಪ್ರದೀಪ್ ಬೈಕಾಡಿ ಒಯಿಸೊಂದೆರ್. ಮಧು ಸುರತ್ಕಲ್ ಸಂಭಾಷಣೆ ರಚನೆ ಮಲ್ದೆರ್. ಮುಖ್ಯ ಪಾತ್ರಡ್ ಕುಸಲ್ದರಸೆ ನವೀನ್ ಡಿ ಪಡೀಲ್, ಅರವಿಂದ ಬೋಳಾರ್, ಭೋಜರಾಜ ವಾಮಂಜೂರು, ಪ್ರಸನ್ನ ಶೆಟ್ಟಿ ಬೈಲೂರು, ಸಾಯಿಕೃಷ್ಣ, ಉಮೇಶ್ ಮಿಜಾರ್, ರವಿರಾಮ ಕುಂಜ, ಗಿರೀಶ್ ಎಂ. ಶೆಟ್ಟಿ ಕಟೀಲ್, ಅಥರ್ವ ಪ್ರಕಾಶ್, ಉದಯ ಆಳ್ವ ಇಡ್ಯಾ, ಸಂದೀಪ್ ಭಕ್ತ, ಕಿರಣ್ ಮಲ್ಪೆ, ಪೂರ್ಣಿಮಾ ಶೆಟ್ಟಿ, ಪವಿತ್ರ ಶೆಟ್ಟಿ, ಸದಾಶಿವ ಬ್ರಹ್ಮಾವರ್, ಶಶಿ ಬೆಳ್ಳಾಯರು, ಚಂದ್ರಹಾಸ ಶೆಟ್ಟಿ ಮಾಣಿ, ಸಂಪತ್ ಲೋಬೋ, ಆಶಾ ಶೆಟ್ಟಿ ಶಿಬರೂರು, ಲಹರಿ ಶೆಟ್ಟಿ ಪಡ್ರೆ, ವೀಣಾ ಶೆಟ್ಟಿ, ಶಿಲ್ಪಾ ಶೆಟ್ಟಿ, ಸಂತೋಷ್ ನಟನೆ ಮಲ್ದೆರ್.

ಈ ಪಿಕ್ಚರ್ ಗ್ ರವಿ ಸುವರ್ಣ ಛಾಯಾಗ್ರಹಣ, ಪ್ರಜ್ವಲ್ ಸುವರ್ಣ ಸಂಕಲನ, ವೆಂಕಟೇಶ್ ಬೆಂಗಳೂರು ಕಲೆ, ಡೊಲ್ವಿನ್ ಕೊಳಲಗಿರಿ ಸಂಗೀತ, ಕಾರ್ತಿಕ್ ಮುಲ್ಕಿ ಹಿನ್ನಲೆ ಸಂಗೀತ, ಅಲ್ಟಿಮೆಟ್ ಶಿವ್ ಸಾಹಸ, ಅವಿನಾಶ್ ಬಂಗೇರ, ಶುಭಕಿರಣ್ ನೃತ್ಯ, ಪ್ರದೀಪ್ ಮೇಕಪ್, ಶರತ್ ಬರ್ಕೆ ವಸ್ತ್ರಾಲಂಕಾರ, ಪುಷ್ಪರಾಜ ರೈ, ಜಯರಾಜ್, ಸಹ ನಿರ್ದೇಶನ, ಭಾಗ್ಯರಾಜ್ ಸಹಾಯ, ಬೊಕ್ಕ ನರೇಶ್ ಕುಮಾರ್ ಸಸಿಹಿತ್ಲು, ಆರ್.ಎನ್. ಶೆಟ್ಟಿ ಕಳವಾರು ಗೀತಾ ಸಾಹಿತ್ಯ ಕೊರ್ತೆರ್.

ಗಬ್ಬರ್ ಸಿಂಗ್ ತುಳು ಪಿಕ್ಚರ್ ಡ್ ವಿಭಿನ್ನ ಕತೆ ಉಂಡು. ಉತ್ತರಪ್ರದೇಶಡ್ ನಡತಿನ ಘಟನೆಯೊಂಜೇನ್ ಪ್ರೇಕ್ಷಕೆರೆಗ್ ಇಷ್ಟ ಆಪುನ ರೀತಿಡ್ ಈ ಪಿಕ್ಚರ್ ದ ಕತೆನ್ ಬರೆತೆರ್. ಎಡ್ಡೆ ಕತೆ, ಹಾಸ್ಯ ಇಪ್ಪುನ ಪಿಕ್ಚರ್ ಉಂದಾತ್ಂಡ್. ಪಿಕ್ಚರ್ ಡ್ ಆಜಿ ಪದ್ಯ, ನಾಲ್ ಫೈಟ್ಸ್ ಉಂಡು. ಪಿಕ್ಚರ್ ಮಾ.22 ಕ್ಕ್ ತುಳುನಾಡ್ ದ ಜಿಲ್ಲೆ ಇಡೀ ರಿಲೀಸ್ ಆಪುಂಡು. ಫೆಬ್ರವರಿಡ್ ಬೊಂಬೈ ಬೊಕ್ಕ ವಿದೇಶಡ್ ಪಿಕ್ಚರ್ ರಿಲೀಸ್ ಆಪುಂಡು ಪಂದ್ ಪಿಕ್ಚರ್ ದ ನಿರ್ಮಾಪಕೆರ್ ಬಾರ್ಕೂರು ಸತೀಶ್ ಪೂಜಾರಿ ತೆರಿಪಾದೆರ್.

ನ.27: ಕೋಟೇಶ್ವರ ಶ್ರೀ ಕೋಟಿಲಿಂಗೇಶ್ವರ ದೇವಲ್ಯಡ್ ಕೊಡಿ ಪರ್ಬ, ತೇರ್ ಉಚ್ಚಯ

ಕುಂದಾಪುರ: ಕೋಟೇಶ್ವರ ಮಹತೋಭಾರ ಶ್ರೀ ಕೋಟಿಲಿಂಗೇಶ್ವರ ದೇವಲ್ಯಡ್ ವೃಶ್ಚಿಕ ಮಾಸಡ್ ಬರ್ಪಿನ ಪುಣ್ಣಮೆದ, ಕೃತಿಕ ನಕ್ಷತ್ರದ ಸೋಮಾರದಾನಿ ಮುಲ್ಪ ದೇವೆರ್ ನಿಲೆ ಉಂತುದೆರ್.

ಅಂಚೆನೆ ಕಾಕತಾಲ್ಯವಾದ್ ಈ ವರ್ಷಲ ಅವ್ವೆ ಮೂರ್ತ, ಸೋಮಾರ ಪುಣ್ಣಿಮೆ, ಕೃತಿಕ ನಕ್ಷತ್ರ ಭಾರೀ ಇಸೇಸದ ದಿನ. ಈ ಕೊಡಿ ತಿಂಗೊಲ್ಡ್ ಬರ್ಪುನವೇ ಕೊಡಿಪರ್ಬ, ಅತ್ತಂದೆ ಈ ದೇವಲ್ಯದ ಚರಿತ್ರೆಡ್ ಬೆದ್ ರ್ ಕೊಡಿತ್ತ ಬೆದ್ ರ್ ಮೆಳೆ ಕೈತಲ್ ದೇವೆರ್ ತಿಕಿನಿ ಪನ್ಪುನ ಕಾರಣರ್ದಾವೆರ ಬೆದ್ ರ್ ಕೊಡಿನ್ ರಥಕ್ಕ್ ಏರಿಸಾವುನ ಕ್ರಮ ಉಂಡು. ಅಂಚಾದ್ ಉಂದೆನ್ ಕೊಡಿಪರ್ಬ ಪಂದ್ ಲೆಪ್ಪುವೆರ್. ಉಂದು ಸೀಮೆದ ದೇವಲ್ಯ ಆಯಿನ 14 ಗ್ರಾಮಗ್ ಸಂಬಂಧಪಟ್ಟಿನಂಚಿನ ದೇವಲ್ಯ ಆತ್ಂಡ್. ‌

ಈ ದೇವಲ್ಯಗ್ ಸಾರ ವರ್ಷದ ಇತಿಹಾಸ ಉಂಡು. ಮುಲ್ಪ ದುಂಬು ಸುಮಾರ್ ರಾಜ ಮಹಾರಾಜೆರ್ ಆಳ್ವಿಕೆ ಮಲ್ದೆರ್. ಅತ್ತಂದೆ ಸುಮಾರ್ ಶಾಸನಲ ತಿಕ್ ದ್ಂಡ್. ಮಾತ ರಾಜ ಮಹಾರಾಜೆರೆನ ಆಡಳಿತಡ್ ಸೇರಿನಂಚಿನ ಭಾರೀ ಮಲ್ಲ ಪುಣ್ಯ ಕ್ಷೇತ್ರ ಆತ್ಂಡ್. ಆದಾಯದ ದೃಷ್ಟಿಡ್ ಮಲ್ಲ ದೇವಲ್ಯ ಅತ್ತ್ ಆಂಡಲ, ಕ್ಷೇತ್ರದ ದೃಷ್ಟಿಡ್ ಭಾರೀ ಪಿರಾಕ್ ದ ದೇವಲ್ಯ ಉಂದಾತ್ಂಡ್.

ಶಿವನ ಆರಾಧನೆ ಮಲ್ಪುನಕ್ಲೆಗ್ ಉಂದು ಈ ರಡ್ಡ್ ಜಿಲ್ಲೆಡ್ ಭಾರೀ ಮಲ್ಲ ಕ್ಷೇತ್ರ. ದಾಯೇ ಪಂಡ ಅನಾದಿ ಕಾಲರ್ದ್ ಲ ಈ ದೇವಲ್ಯ ಪುದರ್ ವಾಸಿ ಆತ್ಂಡ್ ಪನ್ಪುನೆಕ್ಕ್ ಕಾರಣ ದಾದ ಕೇಂಡ ತುಳುನಾಡ್ ದ ಪರಂಪರೆಡ್ ಬರ್ಪಿನ ಕೋಟಿ ಚೆನ್ನಯೆರೆನ ಇತಿಹಾಸ, ಅವು ಪಾರ್ದನಡ್ಲ ಬರ್ಪುಂಡು. ಆ ರಡ್ಡ್ ಜೋಕುಲೆಗ್ ದಾಯೆ ಪುದರ್ ದೀಯೆರ್ ಪಂಡ ಸುರ್ಯದ ಚೆನ್ನಕೇಶವ ದೇವೆರೆನ ಪುದರ್ ಡ್ ಚೆನ್ನಯೆ ಬೊಕ್ಕ ಕೋಟೇಶ್ವರ ಕೋಟಿಲಿಂಗೇಶ್ವರ ದೇವೆರೆನ ಪುದರ್ ಡ್ ಕೋಟಿ ಪಂದ್ ಪುದರ್ ದೀಯೆರ್. ನೇರ್ದ್ ಕೋಟಿ ಚೆನ್ನಯ ಪಂದ್ ಪುದರ್ ಬರಿಯೆರೆ ಕಾರಣ ಆಂಡ್. ಆ ಕಾಲಡ್ಲಾ ಆತ್ ಪುಗರ್ತೆ ಪಡೆಯಿನ ದೇವಲ್ಯ ಉಂದಾತ್ಂಡ್. ಅತ್ತಂದೆ ಜನಜೀವನದ ನಡುಟ್ಟ್ ಇಪ್ಪುನ ದೇವಲ್ಯ ಆತ್ಂಡ್.

ಒಂಜಿ 50 ವರ್ಷದ ಪಿರಾವುದ ಪರ್ಬ ಪಂಡ ಇಡೀ ಕುಂದಾಪುರ ತಾಲೂಕ್ ದ, ಅತ್ತಂಡ ಇತ್ತೆದ ಬೈಂದೂರು, ಬ್ರಹ್ಮಾವರ ತಾಲೂಕ್ ಪಂದ್ ಲೆಪ್ಪುನ ಬೇತೆ ತಾಲೂಕ್ ಆಂಡಲ, ಮಾತೆರ್ಲಾ ಕೃಷಿ ಕಾರ್ಯ ಮುಗಿ ಬೊಕ್ಕ ಆಯಿನ್ ವಿನಿಮಯ ಮಲ್ತೊಂದು ಆ ಕಾಸ್ ಡ್ ತನ್ನ ವರ್ಷದ ಮಾತ ಸೊತ್ತುಲೆನ್ ಮುಲ್ಪರ್ದ್ ಕೊನೊಪುನ ಜಾತ್ರೆ ಆತ್ಂಡ್. ಪ್ರತಿಯೊಂಜಿ ಸಾಮಾನ್ ಮುಲ್ಪ ತಿಕೊಂದು ಇತ್ತ್ಂಡ್. ಅಂಚಾದ್ ಮುಲ್ಪ ಒಂಜಿ ತಿಂಗೊಲ್ ಈ ಪರ್ಬ ನಡಪುಂಡು. ಅತ್ತಂದೆ ಉಂದು ತೇರ್ ಉಚ್ಚಯಡ್ ಬರ್ಪುನ ಸುರುತ್ತ ಪರ್ಬ ಆತ್ಂಡ್. ಸುಬ್ರಹ್ಮಣ್ಯದ ತೇರ್ ಬುಡ್ನ ಈ ಕೋಟಿಲಿಂಗೇಶ್ವರ ದೇವಲ್ಯದನೇ ಮಲ್ಲ ತೇರ್ ಆತ್ಂಡ್ ಪಂದ್ ಗೋಪಾಲಕೃಷ್ಣ ಶೆಟ್ಟಿ ಮಾರ್ಕೋಡು ಪಂಡೆರ್.

ಅಂಚೆನೆ ಈ ದೇವಲ್ಯದ ಕೊಡಿಪರ್ಬ ಬೊಕ್ಕ ತೇರ್ ಉಚ್ಚಯ ನ.27 ಸೋಮಾರ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತಾದಿಲು ಮಾತೆರ್ಲಾ ಪಾಲ್ ಪಡೆದ್, ಶ್ರೀ ಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ದೇವಲ್ಯದ ಕಾರ್ಯ ನಿರ್ವಾಹಣಾಧಿಕಾರಿ ಪ್ರಶಾಂತ್ ಕುಮಾರ್ ಶೆಟ್ಟಿ, ಪ್ರಧಾನ ಅರ್ಚಕೆರ್ ತಂತ್ರಿಲಾಯಿನ ಪ್ರಸನ್ನ ಕುಮಾರ್ ಐತಾಳ್, ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಎಮ್ ಪ್ರಭಾಕರ ಶೆಟ್ಟಿ ಬೊಕ್ಕ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.