November 28, 2023

ಸುಬ್ರಹ್ಮಣ್ಯ ಲಯನ್ಸ್ ಕ್ಲಬ್ ವತಿರ್ದ್ ಕ್ರೀಡಾಪಟುಲೆಗ್ ಮಾನಾದಿಗೆ

ಸುಬ್ರಮಣ್ಯ: ನ .28. ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಲಯನ್ಸ್ ಕ್ಲಬ್ ವತಿರ್ದ್ ಇಂಚಿಪ್ಪಗ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯೇಶ್ವರ ಕಾಲೇಜ್ ಡ್ ನಡತ್ತಿನ ಕುಡ್ಲ ವಿಶ್ವವಿದ್ಯಾಲಯ ಮಟ್ಟದ ಗುಡ್ಡಗಾಡು ಓಟದ ಪಂತೋಡು ಆಂಜೊಕ್ಲೆನ ಬೊಕ್ಕ ಪೊಂಜೊಕ್ಲೆನ ವಿಭಾಗಡ್ ಕೆ.ಎಸ್. ಎಸ್. ಕಾಲೇಜ್ ದ ಆಂಜೊಕ್ಲೆನ ಬೊಕ್ಕ ಪೊಂಜೊಕ್ಲೆನ ತಂಡ ಮೂಜನೇ ಇನಾಮು ಪಡೆತೆರ್.

ಆ ನಿಟ್ಟ್ ಡ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಲಯನ್ಸ್ ಕ್ಲಬ್ ದಕುಲು ನ.28 ತಾನಿ ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಸಭಾಂಗಣಡ್ ಇನಾಮು ಗೆಂದಿನ ಮಾತ ವಿದ್ಯಾರ್ಥಿ ವಿದ್ಯಾರ್ಥಿನಿಯರೆಗ್ ಮಾನಾದಿಗೆ ಮಲ್ತೆರ್.

ಇನಾಮು ಗೆಂದಿನ ಆಂಜೊಕ್ಲೆನ ವಿಭಾಗಡ್ ಸುಮಂತ್ 1 ಬಿಎ ,ಜೀವನ್ 1 ಬಿ ಕಾಮ್, ವರುಣ್ 1ಬಿ ಕಾಂ, ದಿಶಾಂತ್ 2 ಬಿಎ, ರಕ್ಷಿತ್ 3ಬಿಕಾಂ ,ವಿಜಯ್ ಕುಮಾರ್ 3 ಬಿಕಾಂ, ಪೊಂಜೊಕ್ಲೆನ ವಿಭಾಗಡ್ ಅರ್ಚನಾ 1ಬಿಕಾಂ, ಪುನೀತ 1 ಬಿಕಾಂ ,ಪ್ರತಿಕ್ಷ 1 ಬಿ ಕಾಂ, ಪ್ರಗತಿ 2 ಬಿ ಕಾಮ್, ದೀಕ್ಷಾ3 ಬಿ ಎ ,ಹಾಗೂ ಹಂಪಿಕಂ 3 ಬಿಕಾಂ ಇನಾಮುನ್ ಪಡೆಯೊಂದಿನಕುಲು.

ಲೇಸ್ ದ ಗುರ್ಕಾರ್ಮೆನ್ ನ್ ಕುಕ್ಕೆ ಸುಬ್ರಹ್ಮಣ್ಯ ಲಯನ್ಸ್ ಕ್ಲಬ್ ದ ಗುರ್ಕಾರ್ಲು ರಾಮಚಂದ್ರ ಪಳಂಗಾಯ ವಹಿಸ್ ದ್ ಇತ್ತೆರ್. ಕುಕ್ಕೆ ಸುಬ್ರಮಣ್ಯ ಲಯನ್ಸ್ ಕ್ಲಬ್ ದ ಸ್ಥಾಪಕ ಗುರ್ಕಾರ್ಲು ಪ್ರೊ. ರಂಗಯ್ಯ ಶೆಟ್ಟಿಗಾರ್, ಎಸ್ .ಎಸ್. ಕಾಲೇಜಿನ ದೈಹಿಕ ಶಿಕ್ಷಣ ನಿರ್ದೇಶಕೆರ್ ಡಾl ದಿನೇಶ್, ಲಯನ್ಸ್ ಕ್ಲಬ್ ಖಜಾಂಜಿ ಚಂದ್ರಶೇಖರ ಪಾಣೆತ್ತಿಲ್, ಲಯನ್ಸ್ ಕ್ಲಬ್ ದ ಸದಸ್ಯೆರಾಯಿನ ಪ್ರಕಾಶ್ ಶೆಟ್ಟಿ ,ಕೃಷ್ಣಕುಮಾರ್ ಬಾಳುಗೋಡು, ದಿನೇಶ್ ಎಂಪಿ, ಮೋಹನ್ದಾಸ್ ರೈ ಈ ಪೊರ್ತುಡು ಇತ್ತೆರ್.

ಕ್ಲಬ್ ದ ಸದಸ್ಯೆರ್ ಪವನ್ ಪ್ರಾರ್ಥನೆ ಮಲ್ತೆರ್. ಕ್ಲಬ್ ದ ಕಾರ್ಯದರ್ಶಿ ಸತೀಶ ಕೂಜುಗೂಡು ಬಿನ್ನೆರೆನ್ ಎದ್ಕೊಂಡೆರ್. ಕ್ಲಬ್ ದ ಸದಸ್ಯೆ ವಿಮಲ ರಂಗಯ್ಯ ಲೇಸ್ ದ ಸುದಾರಿಕೆ ಮಲ್ತೆರ್. ಕ್ಲಬ್ ದ ಉಪಾಧ್ಯಕ್ಷೆರ್ ಅಶೋಕ್ ಮೂಲೆ ಮಜಲು ಸೊಲ್ಮೆ ಸಂದಾಯ ಮಲ್ತೆರ್.