ಕುಡ್ಲ: ಕುಡ್ಲ ಮಹಾನಗರ ಪಾಲಿಕೆದ 60 ವಾರ್ಡ್ಲೆಡ್ ಕಜವು ಇಲಬರಿ ಮಲ್ತೊಂದಿತ್ತಿನ ಆ್ಯಂಟನಿ ಸಂಸ್ಥೆದ ಪಗತೆಗ್ ಇತ್ತೆ ಮಹಾನಗರ ಪಾಲಿಕೆ ಸ್ವತಃ ಕಜವು ಇಲಬರಿ ಮನ್ಪುನ ಯೋಜನೆ ಪಾಡೊಂದುಂಡು. ಆಂಡ ಕಜವು ಇಲಬರಿ ಗಾಡಿಲೆಗ್ ಚಾಲನೆ ಕೊರ್ದು ಮೂಜಿ ತಿಂಗೊಲಾಂಡಲಾ ಗಾಡಿಲು ಮಾತ್ರ ಉಂತಿನವುಲೇ ಉಲ್ಲ. ಕೇಂದ್ರ ಸರಕಾರೊದ ಸ್ವಚ್ಛ ಭಾರತ್ ಮಿಷನ್ದ ಅಡಿಟ್ ಕುಡ್ಲ ಪಾಲಿಕೆ ಗಾಡಿಲೆನ್ ಗೆತೊಂದಿತ್ತ್ದ್, 107 ಎಲ್ಯ ವೆಹಿಕಲ್, 30 ಟಿಪ್ಪರ್, 16 ಕಾಂಪ್ಯಾಕ್ಟರ್ ಒಟ್ಟು 153 ಗಾಡಿಲು ಉಲ್ಲ. ಉದಿಪನ ಆಯಿ ಬೊಕ್ಕ ಪಂಡ ಕರಿನ ಮೂಜಿ ತಿಂಗೊಲುರ್ದು ಪೇಂಟೆದ ಮಣ್ಣಗುಡ್ಡೆ ಬೊಕ್ಕ ಬೈಕಂಪಾಡಿಡ್ ಗಾಡಿಲೆನ್ ಉಂತಾದೆರ್.
ಕೆಲ ಗಾಡಿಲೆಗ್ ಇತ್ತೆನೇ ಎಲ್ಯ ಮಟ್ಟ್ಡ್ ಮಣ್ಣ್ ಪತ್ತ್ದ್ಂಡ್. ಗಾಡಿಲೆನ್ ಪಾಲಿಕೆನೇ ಕಾಸ್ ಪಾಡ್ದ್ ಗೆತೊಂದಿತ್ತ್ದ್, ಆಂಡ ನೆತ್ತ ಡ್ರೈವರ್, ಲೋಡರ್ ಬೇಲೆ, ವರ್ಕ್ಶಾಪ್ ಬೊಕ್ಕ 3 ವರ್ಷೊದ ಮೈಂಟೆನೆನ್ಸ್ಗ್ ಟೆಂಡರ್ ಲೆಪ್ಪುಂಡು. ಇತ್ತೆ ಆ್ಯಂಟನಿ ಸಂಸ್ಥೆಡ್ ಬೇಲೆ ಮಲ್ತೊಂದಿತ್ತಿನ ಪೌರಕಾರ್ಮಿಕೆರೆನ್ ನೇಮಕ ಮಲ್ತೊನೊಡು ಒಟ್ಟುಗು ಎಚ್ಚಿನ ಬೇಲೆಲೆಗ್ ಬೋಡಾಪಿನ ಕಾರ್ಮಿಕೆರೆನ್ ನೇಮಕ ಮಲ್ತೊನೊಡಾತೆ. ಈ ಪ್ರಕ್ರಿಯೆಲು ಕಡೆಸ್ಸಿನೆರ್ದಾವರ ನನಲಾ ಆ್ಯಂಟನಿ ಸಂಸ್ಥೆನೇ ಕೋವು ವಿಲೇವಾರಿ ಮಲ್ತೊಂದುಂಡು. ಇಂಚೆನೇ ದುಂಬರಿಂಡ ಮೈದಾನೊಡು ಉಂತುದುಪ್ಪುನ ಕೋಟಿಗಟ್ಲೆ ರೂಪಾಯಿ ಕಾಸ್ ಕೊರ್ದು ಗೆತೊಂದಿನ ಕಜವು ಇಲಬರಿ ಗಾಡಿಲು ದೊಂಬು, ಬರ್ಸೊರ್ದಾವರ ಗಲಸೆರಾವಂದಿಲೆಕ ಆಪಿನೆಕ್ ದುಂಬು ಅವೆನ್ ಬೇಲೆಗ್ ಜಪ್ಪಾವೊಡು. ಇಜಿಂಡ ಗಾಡಿಲೆನ ಟಯರ್, ಬ್ಯಾಟರಿ, ಇಂಜಿನ್ ಇಂಚ ಒಂಜೊಂಜೇ ತೆಟ್ಟ್ದ್ ಕುಡೊರ ಸರ್ವೀಸ್ ಮನ್ಪಾವುನೆತೊಟ್ಟುಗು ಪಾಲಿಕೆದ ಕುಡ ಒಂತೆ ಕಾಸ್ನ್ ಬೊಲ್ಲಗ್ ಬುಡ್ಲೆಕ ಆಪಿನ ಪರಿಸ್ಥಿತಿ ಉಂಡಾವು. ಆಯಿನಾತ್ ಬೇಗ ಉಂತುದಿನ ಗಾಡಿಲೆನ್ ಬೇಲೆಗ್ ಜಪ್ಪಾದ್ ಪಾಲಿಕೆದ ಕಾಸ್ ವ್ಯರ್ಥ ಆವಂದಿಲೆಕ ಕ್ರಮ ಗೆತೊನೊಡು.
