November 8, 2023

ರಾಜ್ಯ ಮಟ್ಟದ ಕ್ವಿಜ್ ಪಂತೊಗು ಮಾಧವ ಕಾಮತ್ ಆಯ್ಕೆ

ಮುಲ್ಕಿ: ರಾಜ್ಯ ಶಿಕ್ಷಣ ಇಲಾಖೆದ ಮುತಾಲಿಕೆಡ್ ಮೈಸೂರ್ ಡ್ ನಡತಿನ ಝೋನ್ ಮಟ್ಟದ ಕ್ವಿಜ್ ಪಂತೊಡು ಮುಲ್ಕಿದ ಕಿಲ್ಪಾಡಿ ಶ್ರೀ ವ್ಯಾಸ ಮಹರ್ಷಿ ವಿದ್ಯಾಪೀಠದ 10ನೇ ಕ್ಲಾಸ್ ದ ಕಲ್ಪಾರ್ಥಿ ಮಾಧವ ಕಾಮತ್ ಕೆಂಚನಕೆರೆ ಮೇರ್ ಪ್ರಶಸ್ತಿ ಪಡೆದ್ ತುಮಕೂರುಡು ನಡಪುನ ರಾಜ್ಯ ಮಟ್ಟದ ಕ್ವಿಜ್ ಪಂತೊಗು ಆಯ್ಕೆ ಆತೆರ್.

ಆಯ್ಕೆ ಆಯಿನ ಮೆರೆಗ್ ಶಾಲೆದ ಸಂಚಾಲಕೆರ್, ಮುಖ್ಯೋಪಾಧ್ಯಾಯೆರ್ ಬೊಕ್ಕ ಸಿಬ್ಬಂದಿ ವರ್ಗದಕುಲು ಅಭಿನಂದನೆ ಸಂದಾದೆರ್.

ದೀಪಾವಳಿ ಕವಿಗೋಷ್ಠಿದ ಗುರ್ಕಾರೆಯಾದ್ ನಾರಾಯಣ ರೈ ಕುಕ್ಕುವಳ್ಳಿ

ಸುಳ್ಯ ಚಂದನ ಸಾಹಿತ್ಯ ವೇದಿಕೆದ ಮುತಾಲಿಕೆಡ್ ಸುಳ್ಯದ ಶಾರದಾ ವಿದ್ಯಾಲಯಡ್ ಸಾಹಿತಿ, ಜ್ಯೋತಿಷಿ ಎಚ್. ಭೀಮರಾವ್ ವಾಷ್ಠರ್ ಸುಳ್ಯ ಮೆರೆನ ಸಭಾಧ್ಯಕ್ಷತೆಡ್ ನ.9 ಗುರುವಾರ ನಡಪುನ ದೀಪಾವಳಿ ಕವಿಗೋಷ್ಠಿದ ಗುರ್ಕಾರ್ಮೆನ್, ಶಿಕ್ಷಣಡ್ ಹಿರಿಮೆಗ್ ರಾಜ್ಯ ಪುರಸ್ಕೃತೆರ್, ಪುತ್ತೂರುದ ನಿವೃತ್ತ ಶಿಕ್ಷಕೆರ್, ದ.ಕ.ಜಿಲ್ಲಾ ಜೇನು ವ್ಯವಸಾಯಗಾರೆರೆನ ಮಧುಪ್ರಪಂಚ ಸಂಚಿಕೆದ ಪ್ರಧಾನ ಸಂಪಾದಕೆರ್ ಪುತ್ತೂರು ಸುದ್ದಿ ಬುಡುಗಡೆದ ಪ್ರತಿಭಾರಂಗದ ಅಂಕಣಕಾರೆ, ಕವಿ ಲೇಖಕೆ ನಾರಾಯಣ ರೈ ಕುಕ್ಕುವಳ್ಳಿ ಒಯಿಸೊನ್ವೆರ್.

ಲೇಸ್ ದ ಉದಿಪನನ್ ಶಾರದಾ ವಿದ್ಯಾಲಯದ ಪ್ರಾಂಶುಪಾಲೆರ್, ಶಾರದಾ ಸುಳ್ಯ ಒಯಿಸೊನ್ವೆರ್. ನೃತ್ಯ ನಿರ್ದೇಶಕೆರ್ ವಸಂತ್ ಕಾಯರ್ತೋಡಿ, ಬ್ರಹ್ಮಕುಮಾರಿ ಈಶ್ವರಿದ ವಿಶ್ವ ವಿದ್ಯಾಲಯದ ಸಂಚಾಲಕೆರ್ ರಾಜಯೋಗಿನಿ ಉಮಾ ಬೊಕ್ಕ ಬಿ. ಕೆ. ಉಮೇಶ್ ಆಚಾರ್ಯ ಜಟ್ಟಿಪಳ್ಳ ಮಲ್ಲ ಬಿನ್ನೆರಾದ್ ಪಾಲ್ ಪಡೆಪೆರ್.

ಈ ಪೊರ್ತುಡು ಚಂದನ ಸಾಹಿತ್ಯ ವೇದಿಕೆದ ಕ್ರಿಯಾಶೀಲ ಕವಿ ಕುಸುಮಾಕರ್ ಅಂಬೆಕಲ್ಲು ಚೆಂಬು, ಮೆರೆನ ಚೊಚ್ಚಲ ಸಾಹಿತ್ಯ ಬೂಕು ಅರಳು ಮಲ್ಲಿಗೆ ಬುಡುಗಡೆ ಆಯೆರೆ ಉಂಡು ಪಂದ್ ಸುಳ್ಯ ಚಂದನ ಸಾಹಿತ್ಯ ವೇದಿಕೆದ ಗುರ್ಕಾರೆ, ಕವಿ, ಚಲನಚಿತ್ರ ನಿರ್ದೇಶಕೆರ್, ನಟೆ ಜ್ಯೋತಿಷಿ ಎಚ್. ಭೀಮರಾವ್ ವಾಷ್ಟರ್ ತನ್ನ ಪ್ರಕಟಣೆಡ್ ತೆರಿಪಾದೆರ್.

ಬೆಂಗ್ಲೂರ್ ಡ್ NIA ದಾಳಿ

ಬೆಂಗ್ಲೂರ್ ಡ್ ಇನಿ ಬೊಲ್ಪುಗು NIA ಮಲ್ಲ ಕಾರ್ಯಾಚರಣೆ ಮಲ್ತ್ ದ್, ಅಕ್ರಮ ಬಾಂಗ್ಲಾ ವಲಸಿಗೆರೆನ ಮಿತ್ತ್ ದಾಳಿ ಮಲ್ದ್ಂಡ್.

ಸೋಲದೇವನಹಳ್ಳಿ, ಕೆಆರ್ ಪುರಂ, ಬೆಳ್ಳಂದೂರು ಸೇರಿನಂಚೆನೆ 15 ಕಡೆಟ್ಟ್ NIA ಅಧಿಕಾರಿಲು ಕಾರ್ಯಾಚರಣೆ ನಡಪಾದೆರ್. 8 ಜನನ್ ವಶಕ್ಕ್ ಪಡೆತೆರ್. ನರಮಾನಿನ್ ಕಂಡ್ ದ್ ಸಾಗಸವೊಂದು ಉಲ್ಲೆರ್ ಪಂದ್ ಆರೋಪ ಕೇಂದ್ ಬತ್ತಿರ್ನೆದಾವೆರ NIA ಈ ದಾಳಿ ನಡಪಾದ್ಂಡ್. ಎಚ್ಚದ ಪೊಲಬು ನನ ತೆರಿವೊಡಾತೆ.

ಬೊಂಬೈ: ಬಿವಾಂಡಿಡ್ ತೂ ಪೊತ್ತ್ ದ್ 2 ಜನ ಜುವಪ್ಪ ಸೈತೆರ್

ಪರ್ತಿದ ಗೋದಾಮು ಒಂಜೇಟ್ ತೂ ಪೊತ್ತ್ ದ್ 2 ಜನ ಜುವಪ್ಪ ಸೈತಿನ ಘಟನೆ ಬೊಂಬೈದ ಬಿವಾಂಡಿ ಪ್ರದೇಶಡ್ ನಡತ್ಂಡ್.

ಜಾಗೆಗ್ ಅಗ್ನಿಶಾಮಕ ದಳತ್ತ ಸಿಬ್ಬಂದಿ ಬತ್ತ್ ದ್ ತೂ ತೆಕ್ಕಾದೆರ್. ಈ ಬಗೆಟ್ಟ್ ಎಚ್ಚದ ಪೊಲಬು ನನ ಗೊತ್ತಾವೊಡಾತೆ.

ಪೊಸ ಚಿಂತನೆದೊಟ್ಟಿಗೆ ವಿದ್ಯಾದಾಯಿನಿ ಸಭಾಗ್ ಪೊಸ ದೇಕಿ ಕೊರೊಡು: ಪುರುಷೋತ್ತಮ ಕೋಟ್ಯಾನ್

ಬೊಂಬೈ: ವಿದ್ಯಾದಾಯಿನಿ ಸಭಾ ಸಾರರ್ದ್ ಎಚ್ಚ ಕಲ್ಪಾರ್ಥಿಲೆಗ್ ವಿದ್ಯಾದಾನ ಕೊರ್ತಿನ ಸಂಸ್ಥೆ. ಈ ರಾತ್ರೆ ಶಾಲೆದ ಮುಖೇನ ಶಿಕ್ಷಣ ಪಡೆಯಿನ ಸುಮಾರ್ ಜನ ಮಲ್ಲ ಬೇಲೆದೊಟ್ಟಿಗೆ ಸಮಾಜಡ್ ಎಡ್ಡೆ ತಾನಮಾನ ಪಡೆತೆರ್. ಪ್ರತಿಯೊಂಜಿ ಬೇನೆಲ ಪಾಠ ಕಲ್ಪಾವುಂಡು. ಅಂಚಿನ ಪಾಠ ವ್ಯಕ್ತಿನ್ ಬದಲ್ ಮಲ್ಪುಂಡು. ಅಂಚಿನ ನೂದು ಜನ ಒಂಜಿ ಸಂಸ್ಥೆದ ಚಿತ್ರಣ ಬದಲ್ ಮಲ್ಪರೆ ಸಾಧ್ಯ, ಮಾತೆರ್ಲಾ ಒಟ್ಟು ಸೇರ್ದ್ ಪೊಸ ಚಿಂತನೆದೊಟ್ಟಿಗೆ ವಿದ್ಯಾದಾಯಿನಿ ಸಭಾಗ್ ಪೊಸ ದೇಕಿ ಕೊರೊಡು ಪಂದ್ ವಿದ್ಯಾದಾಯಿನಿ ಸಭಾ ಬೊಂಬೈದ ಗುರ್ಕಾರೆ ಪುರುಷೋತ್ತಮ ಎಸ್. ಕೋಟ್ಯಾನ್ ಪಂಡೆರ್.

ಮೇರ್ ಸಾಂತಕ್ರೂಜ್ ಈಸ್ಟ್ ದ ಬಿಲ್ಲವ ಭವನಡ್ ಅ.29 ಕ್ಕ್ ನಡತಿನ ವಿದ್ಯಾದಾಯಿನಿ ಸಭಾದ ಶತಮಾನೋತ್ಸವ ಸಂಭ್ರಮಾಚರಣೆ ಮುಗಿತಲದ ಲೇಸ್ ಡ್ ಪಾತೆರಿಯೆರ್.

ಅಂತಾರಾಷ್ಟ್ರೀಯ ಖ್ಯಾತಿದ ಪುರೋಹಿತೆರ್, ಜೋತಿಷ್ಯ ಡಾ| ಪ್ರವೀಣ್ ಭಟ್ ಆಶೀರ್ವಚನ ಕೊರ್ದು ಪಾತೆರ್ದ್, ನರಮಾನಿ ಜನ್ಮನ್ ಸದುಪಯೋಗ ಮಲ್ಪೊಡು. ಪರೋಪಕಾರದ ಬದ್ ಕ್ ನಮ್ಮ ಆವೊಡು. ನಮ ಸಾಮಾಜಿಕವಾದ್ ಬದ್ ಕ್ಂಡ, ಜನ್ಮ ಸಾರ್ಥಕತೆ‌ ಪಡೆಪುಂಡು. ಅಂಚಿನ ಎಡ್ಡೆ ಸಮಾಜಪರ ಬೇಲೆಲು ವಿದ್ಯಾದಾಯಿನಿ ಸಭಾದಕ್ಲೆರ್ದ್ ನಡತೊಂದು ಇಪ್ಪುನನೇ ಮೆಚ್ಚುಡಾಯಿನವು. ಈ ಸಂಸ್ಥೆ ಮಸ್ತ್ ಎತ್ತರಗ್ ಬುಲೆವಡ್ ಪಂದ್ ಪಂಡೆರ್.‌

ಮಲ್ಲ ಬಿನ್ನೆರಾದ್ ಪಾಲ್ ಪಡೆಯಿನ ಜಯಶ್ರೀಕೃಷ್ಣ ‌ಪರಿಸರ ಪ್ರೇಮಿ ಸಮಿತಿದ‌ ಗುರ್ಕಾರೆ ಎಲ್ ವಿ ಅಮೀನ್ ಪಾತೆರ್ದ್, ಒವ್ವೇ ಒಂಜಿ ಸಂಸ್ಥೆ ಶತಮಾನೋತ್ಸವ ಆಚರಣೆ ಮಲ್ತೊಂದು ಉಂಡು ಪಂಡ ಅವೊಂಜಿ ಮಲ್ಲ ಸಾಧನ. ಬಂಜಿದ ಪೋಷಣೆಗಾದ್ ಅನಿ ಬೊಂಬೈ ಸೇರಿನ ಸಾರರ್ದ್ ಎಚ್ಚ ಜನ ಶಿಕ್ಷಣರ್ದ್ ವಂಚಿತೆರಾಯಿನಕ್ಲೆಗ್ ಶಿಕ್ಷಣ ಕೊರ್ಪಿನ ಮಲ್ಲ ಕಾಯಕನ್ ವಿದ್ಯಾದಾಯಿನಿ ಸಭಾ ಮಲ್ದ್ಂಡ್. ಆನಿ ತುಳುನಾಡ್ ದ ಜನಕ್ಲೆನ ಏಳಿಗೆಗಾದ್ ಈ ವಿದ್ಯಾದಾಯಿನಿ ಸಭಾ ಸ್ಥಾಪನೆ ಆತ್ಂಡ್. ವಿದ್ಯಾದಾನದ ಸೇವೆ ವಿದ್ಯಾದಾಯಿನಿ ಸಭಾ ಮುತಾಲಿಕೆಡ್ ಏಪಲ ದುಂಬರಿಯಾಡ್ ಪಂದ್ ಪಂಡೆರ್.

ಶತಮಾನದ ಶ್ರೇಷ್ಠ ಸಮಾಜ ಸೇವಕ ಬಿರ್ದ್ ಪುರಸ್ಕೃತೆರ್ ಹರೀಶ್ ಜಿ ಅಮೀನ್ ಪಾತೆರ್ದ್, ವಿದ್ಯಾದಾಯಿನಿ ಸಭಾದ ಶತಮಾನೋತ್ಸವ ಅರ್ಥಪೂರ್ಣವಾದ್ ನಡತ್ ದ್ಂಡ್. ಎಂಕ್ ಬಿರ್ದ್ ಕೊರ್ದು ಮಾನಾದಿಗೆ ಮಲ್ದರ್. ಈ ಸನ್ಮಾನ ಎನ್ನ ಸಾಮಾಜಿಕ ಜಬದಾರಿನ್ ನನಾತ್ ಎಚ್ಚಾ ಮಲ್ದ್ಂಡ್. ಬಿಲ್ಲವರ ಅಸೋಸಿಯೇಶನ್ ಎಂಕ್ ಸಮಾಜ ಸೇವೆ ಮಲ್ಪುನ ಯೋಗ ಕೊರ್ತುಂಡು. ನವಿಬೊಂಬೈ ಸಮುದಾಯ ಭವನದ ಉದಿಪನದೊಟ್ಟಿಗೆ ಅಸೋಸಿಯೇಶನ್ ಗ್ ಭದ್ರ ಬುನಾದಿ ಪಾಡುನ ಯೋಜನೆದ ಕನ ಉಂಡು. ಗುರುದೇವೆರೆನ ಅನುಗ್ರಹರ್ದ್ ಯೋಜನೆಲು ಸಾಕಾರ ಆಪುನ ಆಶಯ ಉಂಡು ಪಂದ್ ಪಂಡೆರ್.

ಶತಮಾನದ ಶ್ರೇಷ್ಠ ಉದ್ಯಮಿ ಬಿರ್ದ್ ಪುರಸ್ಕೃತೆರ್ ಎನ್ ಟಿ ಪೂಜಾರಿ ಪಾತೆರ್ದ್, ವಿದ್ಯಾದಾಯಿನಿ ಸಭಾ ಸಂಸ್ಥೆರ್ದ್ ಸಾರರ್ದ್ ಎಚ್ಚ ಜನ ಶಿಕ್ಷಣ ಪಡೆತೆರ್. ನಮ್ಮ ಹಿರಿಯೆರ್ ಎಡ್ಡೆ ಉದ್ದೇಶರ್ದ್ ರಾತ್ರೆ ಶಾಲೆನ್ ಸ್ಥಾಪನೆ ಮಲ್ತೆರ್. ಎನ್ನಂಚಿನ ಸುಮಾರ್ ಜನಕ್ಕ್ ಉದ್ಯೋಗದೊಟ್ಟಿಗೆ ಈ ರಾತ್ರೆ ಶಾಲೆಡ್ ಶಿಕ್ಷಣ ಪಡೆಪುನ ಅವಕಾಶ ತಿಕ್ಕ್ಂಡ್. ವಿದ್ಯೆರ್ದ್ ವಂಚಿತೆರಾಯಿನಕ್ಲೆಗ್ ವಿದ್ಯಾದಾಯಿನಿ ಸಭಾ ಧರ್ಮೊಗು ಶಿಕ್ಷಣ ಕೊರಿನ ಹಿರಿಮೆ ಉಂಡು.

ಕುಡೊರಿ ಬಿನ್ನೆ ಪುಣೆ ಬಿಲ್ಲವ ಸಂಘದ ಗುರ್ಕಾರೆ ವಿಶ್ವನಾಥ್ ಪೂಜಾರಿ ಕಡ್ತಲ ಪಾತೆರ್ದ್, ನೂದು ವರ್ಷದ ಪಿರವು ನಮ್ಮೂರುದಕುಲು ಉದ್ಯೋಗದ ಲೆಕ್ಕೊಡು ಬೊಂಬೈ ಸೇರಿನ ಬೊಕ್ಕ ವಿದ್ಯೆ ಪಡೆಯೆರೆ ಆಸಕ್ತಿ ಇಪ್ಪುನಕ್ಲೆಗ್ ವಿದ್ಯೆನ್ ಕೊರ್ದು, ಆಶ್ರಯ ಕೊರ್ನ ಸಂಸ್ಥೆನೇ ವಿದ್ಯಾದಾಯಿನಿ ಸಭಾ. ಅವೆತೋ ಹಿರಿಯೆರ್ ಈ ಸಂಸ್ಥೆದ ಬುಲೆವಣಿಗೆಗ್ ಬೆನೊಂದು ಉಲ್ಲೆರ್. ಅತ್ತಂದೆ ಅಪಾರ ಶಿಕ್ಷಕೆರ್, ಕಲ್ಪಾರ್ಥಿಲೆಗ್ ವಿದ್ಯೆನ್ ಕೊರ್ದು ಅಕ್ಲೆನ ಉಜ್ವಲ ಭವಿಷ್ಯಗ್ ಕಾರಣ ಆತೆರ್ ಪಂದ್ ಪಂಡೆರ್.

ಬಿನ್ನೆರಾದ್ ಪಾಲ್ ಪಡೆಯಿನ ಆದಿತ್ಯ ಬಿರ್ಲಾದ ಒತ್ತುಗುರ್ಕಾರೆ ಅಶೋಕ್ ಸುವರ್ಣ, ವಿಶ್ವನಾಥ್ ಪೂಜಾರಿ ಕಡ್ತಲ, ಭಾರತ್ ಬ್ಯಾಂಕ್ ಮಾಜಿ ನಿರ್ದೇಶಕೆರ್ ರಾಜಾ ವಿ ಸಾಲ್ಯಾನ್, ಭಾರತ್ ಬ್ಯಾಂಕ್ ದ ಮಾಜಿ ನಿರ್ದೇಶಕಿ ಶಾರದಾ ಸೂರು ಕರ್ಕೇರ, ಬಿಲ್ಲವರ ಅಸೋಸಿಯೇಶನ್ ಡೊಂಬಿವಲಿದ ಕಚೇರಿದ ಕಾರ್ಯಾಧ್ಯಕ್ಷೆರ್ ಸುಭಾಷ್ ಪಾಲನ್, ವಿದ್ಯಾದಾಯಿನಿ ಸಭಾದ ಮಾನಾದಿಗೆದ ಗುರ್ಕಾರೆ ಜೆಎಂ ಕೋಟ್ಯಾನ್, ಒತ್ತು ಗುರ್ಕಾರೆ ಆರ್ ಕೆ. ಕೋಟ್ಯಾನ್, ಗೌರವ ಕೋಶಾಧಿಕಾರಿ ಪದ್ಮನಾಭ ಎಸ್ ಪೂಜಾರಿ, ಶಾಲೆದ ಕಾರ್ಯಾಧ್ಯಕ್ಷೆರ್ ಡಾ | ಪ್ರಕಾಶ್ ಬೆದ್ರ, ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್ ವಸಂತಿ ಆರ್ ಕೋಟ್ಯಾನ್ ಎಡ್ಡೆಪ್ಪು ಬಯಕಿಯೆರ್.

ವಿದ್ಯಾದಾಯಿನಿ ಸಭಾದ ಮುತಾಲಿಕೆಡ್ ಬಿಲ್ಲವರ ಅಸೋಸಿಯೇಶನ್ ಬೊಂಬೈದ ಗುರ್ಕಾರೆ ಹರೀಶ್ ಜಿ.ಅಮೀನ್ ಮೆರೆಗ್ ಶತಮಾನದ ಶ್ರೇಷ್ಠ ಸಮಾಜ ಸೇವಕೆ ಬೊಕ್ಕ ಬಿಲ್ಲವ ಚೇಂಬರ್ ಆಫ್ ಕಾಮರ್ಸ್ ಆ್ಯಂಡ್ ಇಂಡಸ್ಟ್ರೀಸ್ ಕಾರ್ಯಾಧ್ಯಕ್ಷೆರ್, ಉದ್ಯಮಿ ಎನ್ ಟಿ ಪೂಜಾರಿ ಮೆರೆಗ್ ಶತಮಾನದ ಶ್ರೇಷ್ಠ ಉದ್ಯಮಿ ಪನ್ಪುನ ಬಿರ್ದ್ ಕೊರ್ದು ಸನ್ಮಾನ ಮಲ್ತೆರ್. ಬೊಕ್ಕ ವಿದ್ಯಾದಾಯಿನಿ ಸಭಾದ ಗುರ್ಕಾರೆ ಪುರುಷೋತ್ತಮ ಎಸ್ ಕೋಟ್ಯಾನ್ ಮೆರೆಗ್ ಮಾನಾದಿಗೆ ನಡತ್ಂಡ್.

ಈ ಲೇಸ್ ಡ್ ಮೊಮಿತಾ ಹರೀಶ್ ಅಮೀನ್, ಯಶೋದಾ ನಾರಾಯಣ ಪೂಜಾರಿ, ಪೂಜಾ ಪುರುಷೋತ್ತಮ್ ಕೋಟ್ಯಾನ್ ಪಾಲ್ ಪಡೆದಿತ್ತೆರ್. ಕ್ರೀಡಾ ಪ್ರತಿಭೆ ಮೋಕ್ಷಾ ಸುರೇಶ್ ಪೂಜಾರಿ ಮೆರೆಗ್ ಕ್ರೀಡಾ ಪುರಸ್ಕಾರ ಕೊರ್ದು ಮಾನಾದಿಗೆ ಮಲ್ತೆರ್. ಲೇಸ್ ದ ನಿರೂಪಕೆರ್ ಸಚೇಂದ್ರ ಅಂಬಾಗಿಲು ಬೊಕ್ಕ ಹರಿಣಿ ನೀಲೇಶ್ ಪೂಜಾರಿ ಮೆರೆಗ್ ಮಾನಾದಿಗೆ ನಡತ್ಂಡ್.

ವಿದ್ಯಾದಾಯಿನಿ ಸಭಾದ ಗೌರವ ಪ್ರಧಾನ ಕಾರ್ಯದರ್ಶಿ ಚಿತ್ರಾಪು ಕೆ.ಎಂ ಕೋಟ್ಯಾನ್ ಪ್ರಾಸ್ತಾವಿಕ ಪಾತೆರಿಯೆರ್. ಲೇಸ್ ನ್ ಸಚೇಂದ್ರ ಅಂಬಾಗಿಲು, ಹರಿಣಿ ನಿಲೇಶ್ ಪೂಜಾರಿ, ವಿದ್ಯಾದಾಯಿನಿ ಸಭಾದ ಕಾರ್ಯದರ್ಶಿ ಹರೀಶ್ ಶಾಂತಿ ಸುಧಾರಿಕೆ ಮಲ್ತೆರ್. ಜತೆ ಕಾರ್ಯದರ್ಶಿ ಉಮೇಶ್ ಅಂಚನ್ ಸಹಕಾರ ಕೊರಿಯೆರ್.

ಎಲ್ಲೆ ನ್ಯಾಯಬೆಲೆ ಅಂಗಡಿ ಬಂದ್!

ಅನ್ನಭಾಗ್ಯದ 5kg ಅರಿತ್ತ ಕಾಸ್ ನ್ ಡೈರೆಕ್ಟ್ ಫಲಾನುಭವಿನ ಅಕೌಂಟ್ ಗ್ ಪಾಡುನೆನ್ ವಿರೋಧಿಸಾದ್ ನ್ಯಾಯಬೆಲೆ ಪಡಿತರ ವಿತರಕೆರೆನ ಸಂಘ ಎಲ್ಲೆ ಬೆಂಗ್ಲೂರ್ ಡ್ ಪ್ರತಿಭಟನೆ ಮಲ್ಪೆರೆ ಉಂಡು.

ರಾಜ್ಯದ ಒವ್ವೇ ಭಾಗಡ್ಲಾ ಪಡಿತರ ಕೊರಿಯೆರ್ ಇಜ್ಜಿ ಪಂದ್ ಘೋಷಣೆ ಮಲ್ತಿನ ಸಂಘಟನೆ ಮಾಲೀಕೆರ್, ವೈವಾಟ್ ಬಂದ್ ಮಲ್ತ್ ದ್ ಪ್ರತಿಭಟನೆಡ್ ಪಾಲ್ ಪಡೆಯೆರೆ ಪಂತ್ಂಡ್. ಫಲಾನುಭವಿಲೆಗ್ ನೇರವಾದ್ ಅಕೌಂಟ್ ಗ್ ಕಾಸ್ ಪಾಡುನೆರ್ದ್ ಅಂಗಡಿ ಮಾಲೀಕೆರೆಗ್ ಕಮಿಷನ್ ಮುಖೇನ ತಿಕೊಂದು ಇತ್ತಿನ ಕಾಸ್ ನಷ್ಟ ಅವೊಂದು ಉಂಡು ಪಂದ್ ಪಂತ್ಂಡ್.

RBI ಡ್ ಕಾಲಿ ಇಪ್ಪುನ 450 ಬೇಲೆದ ಪರೀಕ್ಷೆಗ್ ಕಾಲ್ ಲೆಟರ್ ಬುಡುಗಡೆ

ದೇಶ ಇಡೀ RBI ಶಾಖೆಡ್ 450 ಸಹಾಯಕ ಬೇಲೆದ ಲಿಖಿತ ಪರೀಕ್ಷೆಗ್ ಕಾಲ್ ಲೆಟರ್ ಬುಡುಗಡೆ ಆತ್ಂಡ್.

ಅಭ್ಯರ್ಥಿಲು ರಿಜಿಸ್ಟ್ರೇಶನ್ ಸಂಖ್ಯೆ ಬೊಕ್ಕ ಪಾಸ್ ವರ್ಡ್ ನ್ ಪಾಡುನ ಮುಖೇನ https://www.ibps.in/ ವೆಬ್‌ಸೈಟ್‌ ರ್ದ್ ಡೌನ್‌ಲೋಡ್ ಮಲ್ಪೊಲಿ.

ಪ್ರಿಲಿಮ್ಸ್ ಈ ತಿಂಗೊಲ್ದ 18-19 ಕ್ಕ್ ಬೊಕ್ಕ ಮುಖ್ಯ ಪರೀಕ್ಷೆ ಡಿ.31 ಕ್ಕ್ ನಡಪರೆ ಉಂಡು. ಈ ಬೇಲೆಗ್ ಸೆ.13 ರ್ದ್ ಅ.4 ಮುಟ್ಟ ಆನ್ ಲೈನ್ ಡ್ ಅರ್ಜಿ ಸ್ವೀಕಾರ ಮಲ್ದ್ಂಡ್.

ಶಿರ್ವ ಮಹಿಳಾ ಮಂಡಲದ ಪೊಸ ಗುರ್ಕಾರ್ದಿಯಾದ್ ಡಾ.ಸ್ಪೂರ್ತಿ.ಪಿ.ಶೆಟ್ಟಿ ಆಯ್ಕೆ

ಒಡಿಪು ಜಿಲ್ಲೆದ ಹಿರಿಯ ಮಹಿಳಾ ಸಂಸ್ಥೆಲೆಡ್ ಒಂಜಾಯಿನ ಶಿರ್ವ ಮಹಿಳಾ ಮಂಡಲ (ರಿ.) ಶಿರ್ವದ ಪೊಸ ಗುರ್ಕಾರ್ದಿಯಾದ್ ನಿಟ್ಟೆ ತಾಂತ್ರಿಕ ಶಿಕ್ಷಣ ಸಂಸ್ಥೆದ ಅಸೋಸಿಯೇಟ್ ಪ್ರೊಫೆಸರ್ ಆಯಿನ ಡಾ. ಸ್ಪೂರ್ತಿ ಪಿ. ಶೆಟ್ಟಿ ಮೇರ್ ಆಯ್ಕೆ ಆತೆರ್.

ಇಂಚಿಪ್ಪ ನಡತಿನ ವಾರ್ಷಿಕ ಮಹಾಸಭೆಟ್ಟ್ ನನದ ಮೂಜಿ ವರ್ಷ ಮುಟ್ಟ ಪೊಸ ಕಾರ್ಯಕಾರಿ ಸಮಿತಿನ್ ರಚನೆ ಮಲ್ಪರೆ ಉಂಡು. ಕರಿನ ಮೂಜಿ ವರ್ಷೊದಿಂಚ ಕಾರ್ಯದರ್ಶಿಯಾದ್ ಬೇಲೆ ಮಲ್ತಿನ ಸ್ಪೂರ್ತಿ ಪಿ. ಶೆಟ್ಟಿ ಮೇರ್ ನಿರ್ಗಮನ ಗುರ್ಕಾರ್ದಿಯಾದ್ ಗೀತಾ ವಾಗ್ಳೆ ಮೆರೆರ್ದ್ ಜಬದಾರಿ ದೆತೊಂಡೆರ್.

ಪೊಸ ಕಾರ್ಯಕಾರಿ ಮಂಡಳಿದ ಗೌರವ ಸಲಹೆಗಾರೆರಾದ್ ಗೀತಾ ವಾಗ್ಳೆ, ಮಾನಾದಿಗೆದ ಗುರ್ಕಾರ್ದಿಯಾದ್ ಬಬಿತಾ ಜಗದೀಶ್ ಅರಸ, ಒತ್ತು ಗುರ್ಕಾರ್ದಿಯಾದ್ ಗೀತಾ ಮೂಲ್ಯ, ಕಾರ್ಯದರ್ಶಿಯಾದ್ ಐರಿನ್ ಲುಸ್ರಾದೋ, ಜತೆ ಕಾರ್ಯದರ್ಶಿಯಾದ್ ಗೌರಿ ಶೆಣೈ, ಕೋಶಾಧಿಕಾರಿಯಾದ್ ದೀಪಾ ಶೆಟ್ಟಿ ಬೊಕ್ಕ ಕಾರ್ಯಕಾರಿ ಸಮಿತಿ ಸದಸ್ಯೆರಾದ್ ಮರಿಯಾ ಜೆಸಿಂತ ಫುರ್ಟಾಡೋ, ಸುಮತಿ ಜಯಪ್ರಕಾಶ್ ಸುವರ್ಣ, ಜಯಶ್ರೀ ಜಯಪಾಲ್ ಶೆಟ್ಟಿ, ಮಾಲತಿ ಮುಡಿತ್ತಾಯ, ಸುನೀತಾ ಸದಾನಂದ್, ಪುಷ್ಪಾ ಆಚಾರ್ಯ, ವಸಂತಿ ಗೋಪಾಲ್, ಗ್ಲಾಡಿಸ್ ಅಲ್ಮೇಡಾ, ಸುಮಾ ಬಾಮನ್, ಆಫ್ರಿನ್ ಬಾನು ಆಯ್ಕೆ ಆಯೆರ್.

ಈ ಪೊರ್ತುಡು ಶಿರ್ವ ಗ್ರಾಮ ಪಂಚಾಯತ್ ದ ಪೊಸ ಗುರ್ಕಾರೆಯಾದ್ ಆಯ್ಕೆ ಆಯಿನ ಸವಿತಾ ರಾಜೇಶ್ ಮೆರೆಗ್ ಮಾನಾದಿಗೆ ನಡತ್ಂಡ್. ಗುರ್ಕಾರ್ಮೆನ್ ಒಯಿಸ್ ದಿತ್ತಿನ ಗೀತಾ ವಾಗ್ಳೆ ಮೇರ್ ಅರೆಗ್ ಸಹಕಾರ ಕೊರ್ನ ಮಾತೆರೆಗ್ಲಾ ಕೃತಜ್ಞತೆನ್ ಸಂದಾದ್, ಪೊಸ ಗುರ್ಕಾರ್ದಿಗ್ಲಾ ಸಹಕಾರ ಕೊರೊಡು ಪಂದ್ ಬಿನ್ನಾಪು ಮಲ್ತೆರ್. ಪುಷ್ಪಾ ಆಚಾರ್ಯ ಬೊಕ್ಕ ಸುನೀತಾ ಸದಾನಂದ್ ಮೇರ್ ಪ್ರಾರ್ತನೆ ಮಲ್ತೆರ್. ಮಾನಾದಿಗೆದ ಗುರ್ಕಾರ್ದಿ ಬಬಿತಾ ಜಗದೀಶ್ ಅರಸ ಎದ್ಕೊನಿಯೆರ್. ಪೊಸ ಕಾರ್ಯದರ್ಶಿ ಐರಿನ್ ಲುಸ್ರಾದೋ ಸೊಲ್ಮೆ ಸಂದಾಯೆರ್. ಹಿರಿಯ ಸದಸ್ಯೆ ಸುಮತಿ ಜಯಪ್ರಕಾಶ್ ಸುವರ್ಣ ಲೇಸ್ ನ್ ಸುಧಾರಿಕೆ ಮಲ್ತೆರ್.

ನ.16: ಗೆಜ್ಜೆಗಿರಿ ಮೇಳ ಪಿದಾಡರೆ; ಅಶ್ವಮೇಧ ಸೇವೆದ ಆಟ

ಶ್ರೀ ಆದಿ ಧೂಮಾವತಿ, ಶ್ರೀ ದೇಯಿಬೈದೆತಿ ಕೃಪಾಪೋಷಿತ ಯಕ್ಷಗಾನ ಮಂಡಳಿ ಮೂಲಸ್ಥಾನ ಶ್ರೀ ಕ್ಷೇತ್ರ ಗೆಜ್ಜೆಗಿರಿಟ್ಟ್ ರಡ್ಡನೇ ವರ್ಷೊದ ಸುರುತ್ತ ಸೇವೆದ ಆಟ ನ.16 ಗುರುವಾರ ನಡಪರೆ ಉಂಡು.

ಆನಿ ಬೊಲ್ಪುಗು ಜಾಗೆ ಶುದ್ದಿ, ಮಧ್ಯಾಹ್ನ ಮಹಾಪೂಜೆ, ಬಯ್ಯಗ್ ಭಜನೆ ಸಂಕೀರ್ತನೆ, ಗೆಜ್ಜೆಮೂರ್ತ, ಚೌಕಿ ಪೂಜೆ, ಸಾರ್ವಜನಿಕ ನುಪ್ಪು ಪ್ರಸಾದ ಸೇವೆ, ರಾತ್ರೆ ಸುರುತ್ತ ದೇವೆರೆನ ಸೇವೆದ ಆಟ ಅಶ್ವಮೇಧ ಪನ್ಪುನ ಪ್ರಸಂಗರ್ದ್ ಸುರು ಆದ್, ಬೊಕ್ಕ ನಿತಿನ್ ಕುಮಾರ್ ತೆಂಕಕಾರಂದೂರು ರಚನೆ ಮಲ್ತ್ ದ್ ನಿರ್ದೇಶನ ಮಲ್ತಿನ, ಗೆಲ್ಮೆದ ರಾಜೆ ಮಾಧವ ಭಂಡಾರಿ ಕುಲಾಯಿ ಪದ್ಯರಚನೆದ ಮನ್ಮಥ ಸುಂದರಿ ಪನ್ಪುನ ಹಾಸ್ಯ ಪ್ರಧಾನ ತುಳು ಸಾಮಾಜಿಕ ತುಳು ಪ್ರಸಂಗ ಪ್ರದರ್ಶನ ಆಯೆರೆ ಉಂಡು.